وبشر الصابرين

البارت الحادي عشر

مرحبااا

عيد مبارك عليكم ..
كل عام وانتم بخير عساكم من العايدين والسالمين .

///وبشر الصابرين ///

البارت الحادي عشر .

بقلم Aseel

.........
شو محد اجاني ودك عليه الباب
ولا كلمة شلونك جتي من يمهم
شلون الكعده تكمل وانه ماموجود
معقوله الاحبهم صرت ماهمهم
يادنيا نسوني ونسو ذاك الطيب
ولاجني هذاك الجان يحضنهم
لو بزاد اغصن والله اعوف الزاد
اكولن ربعي يمكن لكمه ما عدهم
يادنيا الاحبهم بيه كطعو ليش
وانه الماعندي كروه وجنت اواصلهم
طحت محد اجاني وكالي شمحتاج
مامحتاج بس محتاجه عيني اتشوف لمتهم

......

احد المتابعين دزة ويكول هذا حال لسان شيرين على ابوها وزوجة ابوها ..

.......

مرة من المرات .. جنا راجعين من المدرسة اني ومحسن وامير ..

وصلنا للشارع ومحسن كال .

محسن :انتظروني هنا اروح اشتري واجي من هذا المحل .

لافين: لا تتاخر حباب .

ضلينا واكفين اني وامير..جان تفوت سيارة عروس ..

صحت بصوت سيارة عروووس شكد حلوة ااااالله

امير :يجي يوم وتصيرين عروس ...

لافين: ماريد اتزوج اني ..

امير: لا ماكو بنية متتزوج .. تكبرين وتصيرين احلى عروس ..

لافين: بلي اكو اني ماتزوج احب بابا وماكدر اعوفة

امير: كل بنية مصيرها الزواج .

لافين: ماريد اني لان اخاف بابا يصير بي شي اذا عفتة

امير: الله كريم يجي يوم واذكرج بكلامج هذا

لافين: مافهمتة شجان يقصد ..
اجة محسن ورجعنا للبيت ..

اول مطبيت لكيت بابا جاي من وكت رحت ركضت عليه .. وكعدت بحضنة

شاهين: هلة بحبيبة ابوها واميرتة .. شلونها اليوم غاليتي .

لافين: زينة واخذت ١٠ بالاملاء .. وصفكولي الطلاب .

شاهين: عفية ببنيتي .. هيج اريدك شاطرة وتضلين بشطارتج وتاخذين شهادة ترفيعن راسنا ..

شيرين: ماما ليش مابدلتي كومي بدلي ورجعي يم ابوج مطاير .. حتة نتغدة كلنا .

لافين: وينها ازهار .. اريدها هية تبدلي .

شيرين: عيب ماما كبرتي . انتي بدلي . لوين تضل ازهار تبدلج ..

لافين: هية تلبسني بسرعة .. اني اضل هواي يلة البس البلوز ويكتلني البرد ..

شيرين: لان معتمدة على اختج تلبسج .

شاهين: هسة عوفيها ازهار تبدللها لا تستبرد بنيتي .

شيرين: خطية ازهار هم تشتغل بالبيت وهم دراسة وهم اخوانها وانوب هاي المدللة .

اجتي ازهار .

ازهار :يمة عوفيها شعندي غيرها هاي بنيتي .. خليها تتدلل علية اروح فدوة لدلالها ..

شيرين: انوووب .. انتي هم مثل ابوج . نفس الحجاية .

شاهين: انتي ليش تضوجين .. شنو تغارين .

شيرين: وليش اغار .. ترة هاي بنتي واني هم احبها واموت عليها بس دلالك زايد عن حدة.

شاهين: بابا ازهار اخذي لافين بدلليلها خل اشوف امج شنو موضوعها الظاهر تريد هية هم دلال .

ازهار :ماشي بابا يلة لولة ..

شيرين: طلعو البنات .. وهوة صاحني وراه للغرفة .
طبينا ..

ها شتريد مني .. مو تكولي اغار .

شاهين: ولج انتي حبيبتي ونبض كلبي شلون تقارنين نفسج ويا بنتج

شيرين :انت مصدك يعني اغار .. شاهين البنية حيل مدللها ومتعلقة بيك .. ترة محد يتعذب غيرها من تكبر ..ترة تتعود ع الدلال ومتلكة الي يدللها مثلك .

ليش تضلمها ماريدها تعاني من تكبر اريدها تكون مستعدة للصدمات
اريدها تتوقع كلشي من هلدنيا ..

شاهين: شيرين اني هم هيج افكر بس ماكدر امنع روحي وارفضلها طلب .. ولج ماكدر اقاوم برائة عيونها

شيرين: لعد ضل بدلالك وخربها علية .

شاهين: هههههاااي والله تغارين من بنتج لان ادللها مو

شيرين: اذا تشوف نفسك مقصر وياي واغار هاي مشكلتك مو مشكلتي .. اني ماغار من بنتي .

شاهين: بس اني اشوف روحي مقصر وياج ومامنطيج حقوقج .

شيرين :هههه لا ممقصر قايم بالواجب وزيادة .

شاهين: بس هم احس مقصر ..

شيرين: اني حروح احضر الغدة مجوعان .

شاهين: اي والله تعالي غديتي ميت جوع عليج .
............

لافين: رحت لغرفتي ويا ازهار وبدلتلي .
ماما ليش متخليج تبدليلي يومية ليش تصيح علية .

ازهار :لان انتي كبرتي حبيبتي ولازم تتعلمين تعتمدين على روحج ميصير ..

لافين: بس احبج من تبدليلي انتي سريعة اني اذا ابدل ابرد .

ازهار :ميخالف شوية شوية تتعلمين ..محد بينا اجة يعرف كلشي .

لافين: اني احبج كومة .

ازهار: بستها واني اموت عليج..

.....

بعدها بكم يوم رحنا للمدرسة كالعادة

من رجعت ملكيت ازهار

لافين: ماما لعد ازهار وين .

شيرين: راحت ويا نةنة .. لبيت عمج ابنهم طلع من الاسر وراحو ..واني علمودج بقيت العصر نروح وياهم

لافين: لعد منو حيبدلي ..

شيرين: اني شكم مرة كتلج بدلي انتي شفتي هسة شلون حتبدلين .

لافين: بدليلي انتي .

شيرين لا اعتمدي على روحج وبدلي وحدج.

لافين :صعدت معترضة وادردم..
ضليت ابدل واحاول وكتلني البرد .. حيل بردت .

عما خلصت اني ميتة واحس كمت اسحب نفس كوة .

خلصت ونزلت جوة حتة اتغدة ويا ماما ومحسن وحسن جان ماكو احد ..تقريبا .

كملنا غدة ووصعدت نمت اشوية .. كعدتني ماما العصر حتة نروح لبيت عمي .. جنت احس اكو حرارة بعيوني بس محجيت عبالي لان نعسانة بعدني . بس مكتلهم خاف ميخلوني اروح وياهم .

رحنا وطول الكعدة افرك بعيوني .. بابا انتبهلي .

شاهين: شبيج باباتي .

لافين: نعسانة اريد انام .

شاهين: يلة لعد خل نرجع ..

شيرين :ليش شكو .

شاهين :لافين نعسانة اشو شكلها معاجبني .

شيرين: اول تالي لافين تنعس بالطلعة تموت ع الطلعة ... خاف مريضة شو شوفها خاف مصخنة .

شاهين :اشوية صخونة خل نرجع لا تتخربط .

لافين: رجعنا والحركة بعيني زادت .. بس ماكللهم بس اكلهم نعسانة .

نمت وحتة مقريت دروسي ..
كعدتني ماما الصبح حتة اروح .

شيرين: ماما لولة .. بيج حيل اداومين .

لافين :اي ماما مابية شي ...
طبعا جنت احس نحول مو طبيعي . بس ماريد اغيب صرت احب المدرسة ..

بدلتلي ماما واني كوة اباوع ..

رحنا للمدرسة وبالطريق .

محسن: لافين شبيج اشو تسحلين بروحج شبيج

لافين :مابية شي

محسن: اذا مابيج حيل نرجع .

لافين: لا لا منرجع بس نعسانة .

امير :خاف مريضة شوفها .

لافين عوفوني ماريد ارجع
عاندت واصريت اداوم ..
بس طول الدروس عيوني حركتني وخشمي انسد وكمت اعطس واحس جسمي برد .

كوة تحملت ..من طلعنا مابية حيل اكوم من الرحلة .
اجة علية محسن وشافني حاطة راسي ع الرحلة .

محسن : لولة شبيج .. خرب ولج صايرة نار مو كلنالج لا تداومين شنو هلعناد ..

لافين :ماكدر اكوم عيوني توجعني وجسمي هم خلوني انام ..

امير: دشيلها خلة نمشي راح يسدون باب المدرسة علينا ..

لافين :شالني محسن .. وطلعنا ..
نص الطريق وتعب واخذني امير شالني .. صارو يتعاونون على شيلتي جنت ابجي من الوجع

وصلنا للبيت وطبينا جوة تلكتنا امي وسولفلها محسن

شيرين: يمة سودة علية بنتي .
تعالي يما ادفي ع الصوبة ... هسة اسويلج حليب دافي وتطيبين ..

لافين: كمت ابجي اريد بابا ..

شيرين: هسة يجي حبيبتي على جية .

لافين: شربت الحليب واحس ارتاحيت ..
وراها اجة بابا وسولفتلة امي الموضوع ..

شاهين: يلة كومي اوديج للمستوصف لا تصير ليل وتتخربطين

لافين :بابا اخاف ماريد

شاهين: ماينطيج ابرة حبيبتي اني مااخلي .

لافين: اخذني بابا ومخلاهم يضربوني ابرة .. طلع عندي افلاونزة وكتبولي دوة واخذة بابا ورجعنا للبيت ونمت ..

ثاني يوم مداومت اخذلي محسن اجازة ٣ ايام لحد مااطيب

..وراها رجعت صحتي ورجعت للمدرسة واحس متيهة الدنيا ماعرف شكو ..

رغم نغم انطت الدروس المحسن والمعلمات جانن يكتبلي بورقة وبيد محسن ..

وماما جانت تشرحلي بس احس مستغربة ...
كملت يومي ..

ومرت الايام مثل القبلها ..طبينا بسنة ال١٩٩١

خلصت المدرسة وامتحنت وطلعت الاولى .. بابا اشترالي لعابة تخبل .. جانت جبيرة ومقبلت افتحها ..

ضميتها هية وكارتونتها .. بس اباوعلها لان جان المقدمة مال غلاف شفافة ..

خلصنا مدارس كلنا .. اني وحسن واخواني التوم احمد ومحمد ..واخواني الكبار وحتة ازهار

الي بقة بس محسن لان جان بكلوريا سادس ابتدائي .

فمرة اجة صديقة امير حتة يقرة وياه واني طبيت لان جنت احبة لامير مثل محسن .

جانو يسولفون ويقرون اسلامية ..

واشوف امير يحجي على واحد اسمة نبي يوسف ضليت مستمعة بس مافهمت ..

هوة منو نبي يوسف .

امير: هذا نبي الله .. ابن النبي يعقوب ابن النبي ابراهيم ..

لافين :حيييل واني عرفت واحد حتة اعرف كل هذولة ..

امير: ههههههه يعني متعرفيهم .

محسن: منين تعرفهم هوة احنا هستونا اخذناهم.

امير: لا اقصد اني اعرفهم من جدي وابوية يسولفولي قصص الانبياء .

لافين: الله احب القصص احجيلي .

محسن :لافين كافي نريد نقرة

لافين :ما ما احجيلي .

امير :دعوفها خل احجي وانت هم استفاد لان اني حافظها كلها وانت اذا سمعتها مني تبقة مطبوعة براسك .

لافين: وضل يحجيلنا على الانبياء وحجالنا قصة النبي يوسف وشلون انظلم وانسحن وبعدين الله فرجها ..

جان يحجي بطريقة خلاني اتخيل روحي بنصهم .. يحجي بتفاصيل كلش دقيقة كأنو عايش وياهم جان

حبيت النبي يوسف على صدقة وحبة لله .. وصرت اتخيل اني وياهم واشوف النبي ومن جمالة اقطع ايدي .. .

كلش اندمجت .. خلص القصة واني بعدني اتخيل .

محسن :لافين .. لافين وين رحتي يلة كومي نريد نقرة عدنا امتحان .

لافين :اي رايحة ...

طلعت منهم واني بعدني .. بالقصة .. اجتي امي وسألتها كتلها .
ماما انتي ليش متحجيلي قصص الانبياء .

شيرين :منين عرفتي اكو قصص انبياء .

لافين: امير سولفلي .. وحجالي على قصة النبي يوسف .

شيرين: وفهمتيها .

لافين :اي اصلا عبالك عايشة وياهم .

شيرين :بعد من تريدين شي كوليلي الية عيب تطبين يم الولد انتي بنية حبيبتي .

لافين: بس اني احب امير .. واحب اسمع سوالفة

شيرين: ميخالف بنتي عيب .. ميصير تكعدبن يم ولد غريب .. وهوة هم جاي يقرة مو يسولف ويلعب وياج .

لافين: ماشي ماما ..

بعد كم يوم تفاجأت من سمعت ازهار حتتزوج .. مجنت اعرف شكو غير بس هوسة وعرس وركص .

بس من شفتها اخذوها هنا ماتحملت كمت اعيط ..وابجي من اخذها واحد .

شيرين: انخطبت ازهار لابن عمها الجبير.. جان اسير بحرب ايران وطلع بسنة ال١٩٩٠..

هنا عدهم البنية ابن عمها اولى بيها كل مااسمع ابن عمها كلبي يلجمني .. من اتذكر شلون جنت متعشمة بابن عمي ..

الي ماعرف اخبارة واستحي اسأل عنة ..
بس الحمد لله الله عوضني بخوش قسمة تسوة الدنيا ..

قرب عرسها وبدينا نحضر ومخبوصين وجهزتها مثل اختها ووصيتها ترفع راسنا ..

رغم جنت خايفة على لافين لان متعلقة بيها كلش ..
جانت بالعرس ينطبق عليها المثل مال اطرش بالزفة ..

تركص ولا يمها .. بس من شافت ازهار اخذوها يزفوها كتمت تعيط وجلبت ببدلتها ونسحب بيها وماكو متقبل ..

شاهين شالها وهية ترعص ..وتعيط .

ازهار :ماما خليها تجي وياي .

شيرين: عيب ماما شنو تجي وياج .

ازهار: يمة كلبي مينطيني خل تصعد وياي بالسيارة وبعدين رجعوها وياكم .

شيرين: يلة هسة اشوف واحد يجيبها
شفت جيها ن اشرتلها جتني كتلها

اخذي لافين كعديها بسيارة ويا ازهار. . بس من ترجعون تجيبيها حتة لو ملخت روحها عيب تضل وياهم .

جيهان: ماشي ماما ..

شيرين: اخذو لافين وكعدوها بحضن ازهار ومجلبة بيها وتبجي ..

من رجعو جانو كوة لازميها تبجي وتعيط .. واخذتلها اسبوع مريضة ومتقبل تحجي وبس تبجي على ازهار ..

لحد ما شاهين طكت روحي من شافها هيج متاأثرة

شاهين :كومي بدلي دناخذها تشوف ازهار .

شيرين :عيب من العالم شاهين لا كلشي تريد تسويلها .

شاهين: متشوفيها راح تموت.

شيرين: تتعود يا حبيبي لا تعلمها هيج .
اخذها وديها للالعاب واشتريلها وونسها هسة تنسة طفلة وتتقشمر لا تمشيك بكيفها انت مشيها بكيفك .

شاهين :دبدليلها يلة .

شيرين: بدلتلها واخذها .

لافين :من شفت ازهار راحت كمت اعيط واريدها ترجع جنت لازمة ثوبها .. لحد مجتي جيهان واخذتني يم ازهار وصعدتني بسيارتهم ..

جنت لازمة ازهار طول الطريق ومن وصلنا نزلو ونزلت وياها ولازمة ايدها .. بعدين اخذتني جيهان وازهار طبت لغرفة وهوسة ونسوان وهلاهل واني ابجي ..

جيهان كبل شالتني وصعدوني بسيارة رجلها الي هوة خالي سامي .

والطريق كلة اناشغ من البجي ..
وصلنا متخربطة ومابية احجي .. ضليت اسبوع بلاعيمي وماكدر اكل واريد بس ازهار ..

اجتي ماما بدلتلي واني مااحجي مقهورة حيل وكمت احس اكرهم لان خلو ازهار تعوفني وتروح ..

اخذني بابا للالعاب ولعبني اشوية اشوية بديت افك وتونست ونسيت .. اشترالي شعر بنات .. وحلويات واخذني لبيت عمي ..

طلعتلي ازهار شمرت روحي بحضنها وكمت ابجي .

ليش عفيني حبابة رجعي ويانا .

ازهار: حبيبتي عيب . لازم ابقة اني كل فترة اجي .. اذا تحبيني كافي تبجين ليش تخليني مقهورة واتأذة عليج .. تقبلين اتأذة اني واكوم ابجي من وراج .

لافين: لا لا ماريد تتأذين وتبجين .

ازهار: لعد حبيبتي صيري سباعية وبطلي دلع ..كل بنية من تكبر تتزوج .. وانتي هم يجي يوم وتتزوجين .

لافين: اني اتزوج بابا وابقة بلبيت محد ياخذني منة .

ازهار :هههههه هسة اتفقنا ماكو بجي .

لافين: بس لا تعوفيني كل يومية تعالي.

ازهار: كل جمعة اجي ويا عمي وعمتي .. من نلتم .

لافين: ضليت يمها وباستني وطلعنا احس رتاحيت حيل من سولت وياي ..

رجعت فرحانة للبيت ورجعت لطبعي القديم ..

مرة جنت اتعارك ويا حسن بالطرمة ولازمتلة النعال اريد اضربة شافني زيدون عاط بية ..

زيدون: لافين .. شنو هلتصرف هذا .

لافين: خل يولي اكرهة ميقبل يروح يشتريلي .

زيدون: ذبي النعال وتعالي وياي بسرعة ..

لافين: شمرت النعال خفيف ورحت ويا زيدون جوة جان عمرة ١٦ سنة بوكتها ..

زيدون :لافين شنو هذا الاسلوب .. شنو تشيلين نعال لاخوج الاكبر منج .
مو عيب انتي مترباية ميصير هلحجي ..

لافين :اني اكرهة ماحبة كلهم ماحبهم بس انت ومحسن وازهار احبكم ..

زيدون: لافين اذا بعد سمعتج تحجين هيج ازعل منج .. احنا اخوان واما وابونا واحد ليش هيج تسوين .. هاي تصرفات ماريدها منج بعد عيب عليج ..

بطلي سوالفج لا ابطل حتة اسولف وياج انتي صغيرة البيت لازم تسمعين الكلام وهذولة اخوانج الاكبر منج لازم تحترميهم ..

ميشترولج اني اجي واشتريلج .. لا تطلبين منهم .
وبعدين حقهم يعادوج انتي شايفة اسلوبج .. عيب هيج تحجين وتغلطين على حسن وفوكاها شايلتلة النعال مارضاها منج ..

واذا ابوية سمع راح يزعل منج هم .. تقبلين بابا يزعل منج .

لافين :لا حباب والله ماسويها بعد بس لا تكول لبابا ..

زيدون :هسة اصيح حسن وتعتذرين منة.. اتفقنا ..

لافين :تمام ..

زيدون: عفية حبيبتي الي تسمع الكلام .

لافين: اجة حسن بعد مصاحلة زيدون وعتذرت منة وراضيتة ..

زيدون: لافين توعديني متسوين هيج بعد .

لافين: اي اوعدك ..

زيدون: اي حبيبتي انتي مؤدبة وحبابة متشوفين ليش بابا يحبج لان تسمعين كلام .

لافين :شجعني اصير حبابة ومااعادي اخواني ابد

....
اجتي المدرسة وداومنا .. وصرنا نروح ونجي اني وحسن لان محسن صار متوسطة ..
بس المدرسة لزك ويانا بس احنا نحل قبلهم لان ابتدائية ودروسنا قليلة ..

مرة من دنرجع صادف كلنا رجعنا سوة ..
بالطريق وصار مطر .. خواني حطو قماصلهم وكتبهم على راسهم واني شلت الجنطة وحطيتها لان ملابسة قمصلة جنت ..

امير نزع قمصلتة وحطها على راسي

امير :هاج هاي حطيها على راسج لا تتبدللين ..

لافين: لا هاي جنطة حاطتها .

امير: يمعودة لا تتمرضين ونبتلي بيج تعالو شيلوها انوب ترة لهسة ظهري يوجعني .

لافين: محد كلك شيلني .. انت وحيدك شلتني .

امير: اشيلج بعيوني ..

لافين: غطاني بالقمصلة واخواني ملتهين بروحهم ويتراكضون

جنت مرات اشوفة امير يصفن علية ..
مجنت افهم نظراتة شنو ..جان يهتم بية اكثر من اخواني ..واني دلوعة واحب الي يدللني فتعلقت بي احب سوالفة حيل

جنت متونسة حيل وصديقتي نغم ويانا ..
جنت اموت على المدرسة والمدرسات يحبني حيل ..

مرت الاشهر وخلصنا المدرسة ونجحت للثالث

من داومت جان امير ماكو مااشوفة يروح لو يجي .

ورة اسبوع.
سألت محسن ..

اكلك لعد امير وين ..

محسن: امير ترحلو للرمادي .. بعد ميجي حيعيش هناك ..

لافين :صارت عبرة ببلعومي وكمت ابجي .

محسن: شكو تبجين ..

لافين: ليش كل واحد احبة يروح وبعد ميجي .

محسن: غير الظروف جبرتة ..ياعيني خطية اهلة تأذو بالحصار .. لا تشوفينا احنا هنا ناكل ونشرب بكيفنا ترة لان عدنا فلوس ونعمة من االله ..

ترة اكو ناس حسرة عليها اللكمة .. واهلة كياعينهم هناك لازم يستفادون منها .. ترة الحصار اذة هواي ناس .

لافين: اني انطي اكل .. بعد.مااكل وياكم وانطو حصتي ..

محسن: هههههه حبيبتي هسة يجي يشوفج هوة كلي هيج اذا بجت لافين لان ادري دمعتها بطرف عينها .. كلها وعد اجي واشوفج ..

لافين: والله كال هيج .

محسن: اي والله .

لافين: فرحت من كال هيج لان امير بعمرة ماكسرلي وعد

بس هلمرة كسر وعدة وبعد ماشفتة
مرت السنين ودخلنا سنة ١٩٩٧

جنت انتظر المدارس تجي لان نجحت للاول متوسط .. جنت شاطرة حيل ..

جنت دائما بهاي الفتر اسمع صوت نقاش حاد بين امي وابوية وخالد وزيدون وحتة عمي خليل هم مجنت افهم ليش ..

بس بعدين على صوتهم كلش جان متدخل جدي ونةنة..

جنت كاعدة على الدرج احاول افهم بس الي سمعتة بوكتها خلاني انصدم صدمة مجنت متوقعتها بحياتي ..

شيرين.: جانو خالد وزيدون وخليل حماي الصغير .. يدرسون جامعة وكملوها .. وتخرجوا ..

بس فاجأونة .. بسنة ١٩٩٧ يريدون يهاجرون للخارج .. بوكتها دكيت ولطمت ماتصور افاركهم .. تعرفون شنو ام تفارك ضناها .. وتخلي يروح بذلة الغربة ..

خالد: يمة والله هناك احسن ..

شيرين: ضليت قافلة وشاهين كذلك .

بس بيوم اتدخل عمي وصارت مناقشات عالية ..
متحملت وحجيت ..

شيرين: ليش تريدون تعوفوني قصرت وياكم بشي اني ردتو شي وما نفذتة الكم ..

ليش هيج .. تحرموني شوفتكم.. ليش تأذون كلبي .

خالد :يمة والله هناك مستقبلنا يصير احسن .

خليل :باجي اذا تفكرين بمصلحتنا خلينا نروح ..
يعني امي وابوية قبلو انتي حتعترضين .

شيرين :شلون اشمر لحمي بالغربة ..
خالد يمة كافي لخاطر الله .. يعني لو امنا عايشة متسوي هيج جان فكرت بمستقبلنا وعرفت لهلشي زين النة .

شاهين: انجب ادب سزز.. شيرين امك وغصب عليك هية الي تعبت.وربت ..

خالد: يابة مو قصدي والله اقلل منها بس اقصد شوفها حتموت روحها .. اقصد لو امنا الحقيقية متسوي هيج بكدهة والله احبها ووهية امي عصب عني وعن الكل ..
بس هذا مستقبلنا وهاي حياتنا .

شيرين :هاهية اذا تشوفون روحتكم راحة ومستقبل الكم الله وياكم ..

اني مو قصدي اوكف بنص سعادتكم ..بس مايهون علية افارككم وكل ما نلتم ماشوفكم بلمتنا .. انتو اذا تتأخرون بليلة اضل اكل بروحي والزم الباب انتظركم شحال هسة مراح اعرف شبيكم مابيكم منو يوكلكم منو يغطيكم .. صعبة والله صعبة ..

لافين: اني الي سمعتة كوم والي فهمتة كوم ثاني ..

الي سمعتة همة حيسافرون واهلي معارضين ..

بس الي فهمتة انو همة مو من امي .. يعني امي مو امهم .. هنا ضليت حايرة ماعرف شتصرف ..

اسوي نفسي مادري لو اطب وابينلهم اني عرفت ..
دفكر وشفت امي صارت بوجهي .

...
شيرين :ضلو يحاولون وياي الكل قبل الة اني جنت غاصة بيها لهاي الشغلة ..

اوافق تروحون بشرط ..

كلها كالت موافقين

شيرين: غير تسمعون الشرط .

زيدون: يمة الي تريدي تأمرين بي .. بس وافقي مو بلاعيمنا طكت من الحجي.

شيرين: تتزوجون منا .. متتزوجون غريبة . حتة اضمن ترجعولي .

خالد: يما غير نكون روحنا يلة نتزوج

شيرين: اي تسافرون سنة وترجعون تخطبون وانوب ترجعون حتة تتزوجون وهيج سنتين عدكم تكدرون تكونون روحكم ..

خليل :هاهية .. نبصم بالعشرة اذا شاء الله .

شاهين: هاهية متفقين .. ماكو تراجع .

كلها كالت تمام متفقين .

شيرين: رتاحيت اشوية وضمنت رجعتهم لحضني بس هم ميهون علية يفاركوني .

عفتهم يتناقشون وطلعت جان تصير بوجهي لافين وعيونها بيهن دمعة كالتلي .

لافين :يمة صدك الي سمعتة .

شيرين: اي يمة حيسافرون

لافين :لاماما اقصد الي كالة خالد صدك .

شيرين: شبيج ماما انتي شسمعتي ..

لافين: انتي مو امهم ..

شيرين: اسكتي ونصي حسج لا يسمعون خوانج ..
كلهم ولدي اني .. ومحد يحجي غير هلحجي ..

لافين: بس فهميني يعني بابا جان متزوج قبلج لو وراج ماعرف هسة شنو ..

شيرين: اسكتي فضحتينا .. ماريد خوانج يسمعون تعالي صعدي فوك وياي للغرفة افهمج .

لافين: كعدت ماما تفهمني منو خواني منها ومن ابوية
تقريبا فهمت قصة زواجهم .. بس مو كاملة عرفت بس هية زوجة اب الهم ..

بس عمري مفكرت للحظة ممكن متكون امهم هية حتة تفضلهم مرات علينا ..

تتلكاهم من الباب بالهلة والمرحبا .. يعني معقولة اكو هيج مرت اب..

اشو اسمع غير قصص اني من مرت الاب ..
وكتها عرفت امي عدها گلب مو بشري .. گلبها ملائكي ..

معقولة تحب ٦ اولاد مو منها وتفضلهم على جهالها بس لانها تحبهم واولاد زوجها ..

كبرت بنظري حيل .. حقة ابوية يعشقها ويبوس ترابها ..

اذا تسوي كل هلشي .. وهية مقتنعة انو همة جهالها .. اكيد هاي يرادلها تمثال ..

بدو يجهزون للسفر ..
بهاي الفترة طلع اسم محسن بجامعة بغداد..
ومجان هوة بس جان حتة صديقة امير ويا .

جانت بكل هاي الفترة يلتقون من يجون اهل امير للمصيف بكركوك .. يلتقي محسن بي ويتفقون ويطلعون سوة ..

بس جان ميجي ابد للبيت لان اخواني مو من النوع الي يطببون اصدقائهم لبيت ولا ابوية يقبل احد يجيب اصدقائة..

لذلك امي انتكست حالتها .. لان فراك خالد وزيدون وخليل وانضاف محسن .. احسها طفت .. صارت بس تتصفن ..

وطلع صورهم وتبجي .. رغم محسن ميطول بس هم غايب ..

تعلمنا على فراكهم .. بس امي لا ..
ومرت سنة ورجعو المسافرين ..

امي خطبتلهم لان طلبو منها تخطبلهم على ذوقها ..

خطبت لزيدون بنت خالتي شيلان ..
وخطبت لخالد بنت عمي انس ...

وعمي خليل .. بقة ممفكر بالزواج بعد .
خطبو وعقدو وبقو تقريبا شهر ... ورجعو سافرو

نجحت من المرحلة المتوسطة وخلصتها اعفاءات
وجبت معدل بالثالث ..

دخلت اعدادية .. هنا حياتي تغيرت ..
ملامحي تغيرت صرت احلة ..

بس جان شي واحد ما تغير .. اني لجمال ابن عمي انس .

هلشي سوالي عقدة ..لان صرت بحلك الكل .. بكل عرس او مناسبة يكولون هاي خطيبة جمال .. رغم جنت رافضة فكرة الزواج ابد .. ماريد اعوف اهلي ..ماريد أذيهم .

جمال جان بعمر اخواني احمد ومحمد ..
ما اختلط وياهم هواي يعني ماعرف طبعة كلش ..

بس هلفكرة بدت تضايقني حيل انو يخطبوني لواحد بدون مياخذون رأيي

اريد اكمل دراسة .. احب اخذ شهادة وارفع راس ابوية بيها ..

جنت بالرابع اعدادي المدرسات كلهن يعرفني شاطرة
فمرة جان عدنا امتحان انكليزي المدرسة جانت كلش نحسه جنت اكتب بالجواب وخلص الوقت على ما كتبت اسمي طلعت ..

ومااخذت مني الورقة طبعا متت بجي رجعت لبيت حتى غدة مااتغديت جنت متعودة احجى كل شى لابوية ..

رجع ابويه من شغل راسا بجيت .
ابويه جان اذا يشوف دموعي يتخبل كال..

شاهين: شكو من دايسلج على طرف..

لافين :وانى ابجي جان تحجي نة نة

ام شاهين : هسه احجى فهمينا بعدين كملى بجى مالتج

لافين: بابا مدرسة هيج سوت ويايه بس كتلة هيج اتخبل.... جان يكول ..

شاهين: شلون يطلع لى صبح واروح اكلب مدرسة على راسهم ..

لافين :ثانى يوم اجى ابويه وطب للمديرة بس سلم وكبل حجة وياهم كللهم

شاهين: انتوا تعرفوها اكثر منى شاطرة وكل سنة اعفاء و مو من صفاتها تغش ليش هيج مسويه مدرسة

المديرة : ابو لافين اتفضل استريح ونحلها أن شالله

وصاحت المدرسة وكالت

المدرسة :انى جديدة بس مايخالف ماطول شاطرة احسبلها امتحان شهر اول ....

.....

يتبع ...

لا تنسو التصويت ..

احبكم ..
تحياتي Aseel