خفايا ضابط
بارت٣٤
بقلم كهرمانه
🍃🍃🍃🍃🍃🍃
في بلآدنآ خمسون قآعدة للحب
الأولى؛كن صآدقا" مع من تحب . والتسعة والأربعون الأخريات"،تعلم كيف تنسآآه إذا خذل حبك..
........
ترف:- رحنا الضهر لبيت البنيه الرادت بيبي تخطبها لخالو اني وياها ومرت خالو هاشم .. مبين عليهم حالتهم زينه والبنيه أسمها هبه همه گرايب بيبي متعوده كعدنا بالصاله مالتهم ويمنا ثنين نسوان وحده بعمر بيبي والثانيه اصغر يجي عمرها بالخمسينات يسولفن ويه بيبي وبعدين بيبي گالت ردت اخطب لشهم واجت هبه بتكم على بالي ام البنيه صاحتلها أجت شايله صينيه عصير وقدمتلنا گعدت بصف امها شويه وكامت طلعت من الصاله هيه سمرا شفايفها كبار وعيونها هم كبار لابسه عدسات يعني حلوه كالت جدتها نشوف رأي البنيه ونردلكم خبر رجعنا من عدهم وكلنا لخالو عاللي حجوه اهل البنيه حددو عشره غايب وحاضر سبعه ومنتضرين بس موافقتهم حتى تروح تشوفها ..
الساعه ٤:٣٠م
كاعدين اني ورفل وڤيان العصر بالصاله ندك الجرس وبيبي نايمه طفرت رفل تفتح الباب تأخرت بحدود الخمس دقايق ورجعت مطنگره سألناها منــوو بالباب متجاوب
ڤيان:-منــوو دگ الجرس
رفل:-اففففف شسمه هذا ابن عمو
ترف:-منــوو
رفل:-حماج
ترف:-سيف
رفل:-لا انمار
ڤيان:-متلفضين اسمه تلفين وتدروين وينه ليش ما اجه
رفل:-كلتله محد موجود حتى جدو خله وراح
ترف:-هاا وتتأخرين خمس دقايق مدري اكثر
رفل:-يبووو شبيجن صدك تحجن
ڤيان:-اندري شو انتي عصبيه جايه عبالك مدري شمسويلج
رفل:-ماكو بــس يغث اسلوبه
ترف:-لا بالعكس انمار أحــسن واحد بيهم بعد رسلان طبعاً
رفل:-الزلم كلهم نفس الطينه مابيهم واحد زين واحد مو زين
ترف:-يا يا يا شو تعممين عالكل
رفل:-سكتي من عندي كايمه اسويلجن كيكه فد شويه اروح
ڤيان:-اي فدوووااا
...
رفل:-عفتهن وگمت أسوي كيكه حضرت الغراض يمي وبديت اشتغل واني افكر باللي صار قبل شويه "ندگ الجرس وطلعت اشوف منــوو ماخليت شي على راسي بــس اعرف منــوو بدون لا امد راسي فتحت الباب وقبل لا اعرف منــوو دخل انمار ابن عمو قاسم بــس شافني بينت العصبيه على ملامحه وحجه شبه الصياح
أنمار:-ليش انتييي تفتحين الباب ماكو غيرج هناا
رفل:-علكيفك ليش تصيح ماكو واحد وبيبي نايم فتحت اني
أنمار:-متطلعين للباب لو يتفلش صار معلوم
رفل:-أنت شعليكك؟ أطلع ما اطلع شنو الحارگك
أنمار:-لأن اني اريد هذا الشي مــآريد تطلعين للباب ،بعدين تعاي انتي مو محجبه ليش مالابسه حجاب وملابسج ضاكات على جسمج هيج تعلمتي الحجاب
رفل:-بكيفي هذا الشي راجعلي ، راح تخبلني شسوي بكيفي
أنمار:-والله ابوجن منطيجن حرية اكثر من اللازم
رفل:-ابوي سبورتي وتفكيره منفتح
أنمار:-وهذا الراح يطيح حضجن راح اروح وبعد لتطلعين للباب هيج
رفل:-مخبل والنبي ،اجيت حتى بدون لتدخل للبيت استلمتني ترزل وتصيح عليه
أنمار:-مو بــس انتي اي وحده لو جانت مكانج وهيج منضرها هم جانت هيج ردة فعلي
رفل:-شبيه منضري وانت بصفتك شنو تحاسبني ترى مو من حقك
أنمار:-بصفتي ابن عمج والي الحق ارشدج للصح شلون تقبليها على نفسج شعرج طالع وصدرج هم جان ستحيتي لو سترتي نفسج
رفل:-"مانتضر ردي طلع من البيت وركع الباب وراه حيل باوعت لملابسي صدك فتحة التيشيرت واسعه وصدري نصه مبين عززه وهوو ليش يباووع فلك بــس لايغار.. اي اكيد يغار لعد ليش هيج يتصرف ..خلصت الكيكه وخليتها بالفرن سويت منبه أبو ال٢٥دقيقه ورحت كعدت بالصاله يمهن جانن يتهامسن ثنيناتهن من اجيت بدلن الموضوع
ترف:-ها خلصتيها
رفل:-اي وراح اخذها ويايه لاهلي لأن انتن مو وجه نعمه ابد تتهامسن ومن اجي اني تغيرن الموضووع
ڤيان:-لاا بــس جنت احجي وماريد احد يسمع
رفل:-علييينااا هو بــس اني هنا وبيبي نايمه
ترف:-خرب موضوع مينحجي بصوت عاالي حتى لو جنا وحدنا لازم بيني وبينها
رفل:-يله احجن شنو هذا الموضوع
ڤيان:-علمود وسام داكوللها البارحه خابرني وتعاركنا وسد التليفون بوجهي
رفل:-صخام بعينج بــس لا مسويه علاقه وياه
ڤيان:-هيييووو ششايفتني
رفل:-كلشي اتوقع منج يجوز بدافع الانتقام
ڤيان:-لا حتى متعجبه منين جاب رقمي
رفل:-ممممم تلگينه من شافج رجع حن الج
ڤيان:-سدي الموضوع مــآريد احجي بيه اني كلت لترف لأن ماكدر اضم عليها شي يضل ياكل بگلبي
ترف:-خلص سدينا الموضوع، رفييلان صدك راح تاخذين الكيكه السويتيها وياج لاهلج
رفل:-لا بــس ردت اخليچن تحچن
.
.
وسام:-رحت سألت عالولد المتقدم لـ سيزا وبحثت عنه وعن عشيرته ماكدر أأمنها شلون ماكان لازملها قسمه زينه الحمدلله طلعو ناس مثقفين وماعدهم أي سوابق ..العصر خابرت خالتي گلتلها خوش قسمه خابريهم ونطيهم موافقه ومن يحددون يوم الشوفه رديلي خبر حتى أكون موجود ..بــس دعائها إلي جان كلش كافي خلصت يومي يم فهد بقيت يمه لحد مانام يله طلعت من المستشفى وضعه نفس ماهو مابيه جديد ..
.
.
ڤيان:-بعد مارجعو موافقه أهل البنيه راح عمو شافها ووافق بيها وتعاي ياڤيان ابتلي وروحي لبيت البنيه مكيجيها بيبي مسويتني هدى بيوتي كدام البنيه واله اني امكيجها..يله امكيج العروس أحــسن من ما ابقى بالبيت ويلتمن عليه البنات حتى البخ وجههن ومالحك اسوي روحي ..يوم الجمعه الصبح أجه سيف حتى ياخذني لبيت البنيه
سيف:-يله هلاه بلكي تستعجلين شويه
ڤيان:-اييييي دصبر
سيف:-شكد اصبر مو ساعه ساعتين
ڤيان:-بــس ابدل واجي روح اكعد يم بيبي جذب عليها
سيف:-زمرد مشغله الديجي وجاي تركص ومن تروح تكابل الله تصلي على رحله والله بيها كتله
ڤيان:-هههههههههه غير فرحانه لابنها
سيف:-يله دوم افراحها
ڤيان:-"صعدت الدرج ركض محضره ملابسي الألبسهن بالخطوبه والمكياج الاخذه وغراض مال شعر خاف تريد تسريحه تعلمت اسوي تسريحات من اشتغلت بالصالون كم تسريحه بسيطه ترهم للمهر بــس هو مهر يعني شعر مفتوح المهم لبست تيشيرت أسود نص ردان وبنطرون ثلجي كفيته من جوه صار تسعين وحذاء سبورت سوده شعري جان كعكه ضفرته وطلعت كذله كم خصله بأهمال بخيت عطر رطبت وجهي بــس ماخليت اي مكياج اخذت غراضي ونزلت دورت على سيف كالت بيبي كاعد بالسياره منتضرج فلتت قبل لايجون الگرايب ويضلن يسألن طلعت لكيت سيف هو والسياره بالگراج
سيف:-يله ست الحسن والجمال
ڤيان:-شعندك مستعجل
سيف:-ميصير هيج وراي اغسل السياره مال رسلان اذا اكه وشاف سيارته مامغسوله يسوي كتلتي عمل شعبي
ڤيان:-شدعواك هيج خايف منه يله عيني وديني لبيت العروسه "شغل السياره وطلع من البيت رحع نزل سد الباب وصعد حرك السياره لبيت العروسه
سيف:-يستاهدلي عمي واكعله بوحده جگمه
ڤيان:-ههههههه يكولون ملامحها حلوه عود من اشوفها اردلك خبر جگمه لو صاكه
سيف:-أنتي غير راح تخليها تتنكر بالمكياج
ڤيان:-المكياج فن مو تنكر وجع
سيف:-لا والله اكبر غش وتنكر ولعب على عقل الزلم نشوفها شي وبدون مكياج شي
ڤيان:-تطمن ديروح موديل المكياج القوي شويه شويه بــس بالمناسبات يبقى
سيف:-الله يبشرج بالخير
ڤيان:-هسه انت تعيب عالبنات نشوف التاخذها
سيف:-لج اني الأتزوجها كون من تباوع للگمر يخجل من گد ماحلوه
ڤيان:-خطيييييييههه الصاكات لازمات سره عليك
سيف:-خويه اني على مايوصلني السره حتى سنوني واكعات
ڤيان:-لا يامگرود ليش ؟
سيف:-شما اشوف اخواني مابيهم ضنة زواج واني مــآريد اتزوج قبلهم عندج انمار قافل قفله مال يهود
ڤيان:-متدري يجوز سنة الجايه كلكم متزوجين
سيف:-شنو نزل عليج نور من السما وخلاج تنطقيه
ڤيان:-لا بــس انتو كبار اله اشحن عمو عليكم بسيطه
سيف:-شنهييي انتي شبسرعه تگلبين بالحجي شو هسه گمتي تخبثين
ڤيان:-اكلك سيف وين صار بيت البنيه انت تندله
سيف:-اني وين رايح ماندل بيتهم بالضبط اندل بــس الشارع البيه هم واكو فروع ماعرف يافرع بالضبط
ڤيان:-هنياليي ماخذتمن انيي يوصلني وين الاثول
سيف:-خابري عمي خلي يوصفلنا البيت يافرع
ڤيان:-"خابرت عمي وحجه ويه سيف ووصفله الطريق وصلنا نزلت وسيف ماراح الاشاف الباب نفتح ودخلت يله حرك السياره ..فتحتلي الباب مره جبيره بكد امي تقريباً كلتلها مرحبه
ام هبه:-هلا بيج
ڤيان:-اني ڤيان ، شهم يصير عمي
أم هبه:-يا أهلاً حبيبه كلبي تفضلي تفضلي
ڤيان:-شكراً دخلت للبيت حلو ومرتب ماعدهم هوايه ناس الضاهر بعد محد جاي عمي راد الخطوبه العصر علمود دوامه ميكدر يتركه .. دخلت للصاله لكيت نسوان كاعدات سلمت عليهن وگلتلهن "يله وين عروستنا "كالت المره الجبيره هــآي نزلت العروس شفتها حلوه ملامحها حاده جنها هنديه
هبه:-هلاو
ڤيان:-هلاوات حبيبتي
هبه :-تعاي خلي نكعد بغرفتي
ڤيان:-اي يله "صعدت لغرفتها وكعدت على كرسي "..تردين نبدي هسه لو تنتضرين
هبه:-هسه ورانه تسريحه وشعري طويل خاف يتعبج
ڤيان:-ليش متتركيه مفتوح احلى خلي التسريحه للحنه والعرس حتى تبرزين
هبه:-اني شفت شغلج وكلش عجبني خلي كلشي على ذوقج
ڤيان:-يالون فستانج
هبه:-وردي هذا معلك عالزاويه
ڤيان:-حلو ونازك
هبه:-ايي
ڤيان:-مرت عمي ذواقه فديت
هبه:-ههههههه يروحي انتي اصل الذوق ،اكلج
ڤيان:-گولي
هبه:-يعني اني راح اصير مرت عمكم انتو كم واحد
ڤيان:-يبوو هوايه احنا عشيره احلى شي لو يصيحولج باجي لو عمه
هبه:-انجلط غير
ڤيان:-اني عندي ثنين خوات وحده اكبر من عندي واحده اصغر واخو جبير وعمو قاسم عنده خمس ولد كبار بــس ماعنده بنيه عمو مثنى عنده تلث ولد وثنين بنات هم كبار غيث ابنه الجبير حيدخل تلاثين وعمتي نوره متوفيه عدها فهد هم ميت الله يرحمه وترف اللي اجت ويه بيبي واخر شي عمو شهم
هبه:-اهاا ومنو بالبيت مال عمتي الحجيه
ڤيان:-خالو وجدو وبيبي واني وترف مقيمين هناك ترف حتتزوج ورى دورة السنه مال اخوها وابقى بــس اني مگابلتج هههههه ومرات رسلان ابن عمو قاسم يجي يبات لان هو اصلاً جان عايش ويه بيت جدو وعنده غرفته وبيها ملابسه بــس من الوًانتقل للعيشه ببغداد راح هناك
هبه:-حلوو صار عندي فضول اتعرف عليكم كلكم . زين شعجب انتي كاعده يم بيت جدج .والله اني فضوليه تعاي كعدي نلحك عالمكياج
ڤيان:-سالفه طويله
هبه:-سولفي شنو ورانه هيه خطوبه ههههههههههه
ڤيان:-اي اني مطلقه من تطلگت بقيت يم بيت جدو مارحت لاهلي
هبه:-ياعيني هذا الجمال كله وطلگج اعمى
ڤيان:-يبوو ماكدر اسمع واحد يمدحني أنغر
هبه:-والله مداجذب
ڤيان:-الله ماكتبلنا بعد نبقى سوا
هبه:-الله يعوضج بالأحسن
ڤيان:-لا يعع جربت مره بعد ماعيد التجربه الفاشله
هبه:-الزواج تجربه فاشله لعد بطلت مــآريد اتزوج
ڤيان:-لااااا يبوووي عمو حباب وبيت جدو مابيهم أذيه والله قسمتج خوش قسمه.
"كلتلها تروح تغسل وجها حتى ابدي امكيجها غسلت وأجت لبست عدسات رطبتلها وجهها ورسمت عيونها بالبدايه بعدين أساس كملت مكياجها بربع ساعه طلعت تخبل ماگلبت خلقتها بــس ركزت على ملامحها وبرزتهم بطريقه حلوه تعجبت عالمكياج وامها اجت شافتها
أم هبه:-ڤيونه شنو هذا شغلج يجنن فنانه ماشاءالله
ڤيان:-هيه بنتكم حلوه
أم هبه:-والله ابد متوقعت هيج
ڤيان:-ههههه لان مكياج بالبيت
أم هبه:-معدله بعد روحي
ڤيان:-تردين امكيجج هم
أم هبه:-لا يمه اني امكيج روحي واخلي الحمره السحريه
ڤيان:-اوكي كيفج "خلصت العروسه وسويت شعرها مفتوحه شسورته إلها بالشسوار وويفي خفيف خليتها تلبس الفستان وساعدتها بتضبيطه كعدت على جربايتها واني كعدت بمكانها عالكرسي وگبال المرايا بديت اخلي مكياج لروحي هم اكثر شي بالمكياج برزت عيوني خلصت فتحت شعري نزلته بالشسوار لان بيه كسرات مال ضفيرة تركته على طوله مفتوح كلش طولان وصل لركبة رجلي ام هبه اجت اخذت بنتها وكالت من تطلعين من الغرفه قفليها وجيبيلي المفتاح ..
لميت مكياجي اهم شي وغراضي خليتهم على صفحه كعدت خابرت ترف كلتلها شوكت تجون
ترف:-ها فوفه جنت اغسل مواعين وبيتنا اجو هوايه ناس هسه داخلي مكياج وبعدهن البنات كلشي ممسويات
ڤيان:-يا اني خلصت والعروس هم
ترف:-خالو قبل شويه اجه من الدوام يعني ساعه ساعه ونص يله نجي
ڤيان:-اي "طلعت من الغرفه وقفلتها نزلت جوه الناس كثرانين بــس شو هدوء ولا عبالك عدهم خطوبه مشغلين اغنية إليسا حالة حب شنو هــآي ماعدهم جهال شو حتى بيتهم نضيف ..
البنات يصورن ويه العروس دورت على امها ونطيتها المفتاح لزمتني بالمطبخ إلا اكل ماقبلت
أم هبه:-والله ازعل عليج اجيتي الصبح حتى غده ماقبلتي تتغدين
ڤيان:-لا خاله مخليه مكياج ماكدر اكل واصلاً شبعانه
أم هبه:-راح اسويلج لفه تاكليها يله حتى ميخرب مكياجج عسى متاكلين ربع ميخالف
ڤيان:-هههههه خاله اذا ابقى يمج اسبوع تسويني برميل
أم هبه:-ابو المثل بگول اكل واشرب لحد ما ملك الموت يگرب
ڤيان:-هلا حلوو
أم هبه:-يله هاج تشربين ببسي لو عصير
ڤيان:-ببسي
أم هبه:-هذا الببسي وهاي گصبه خاف حمرتج تخرب
ڤيان:-أكلت شويه وشربت ببسي كمت من المطبخ ورحت يم البنات لكيت كرسي فارغ يم مره چبيره كعدت بصفها التفتت عليه وصفنت بوجهي عدها عين من عيونها طافيه وهي لابسه نضارات تحجي بثوت عالي عبالك ماسمعها
الحجيه:-انتي شتعودين لزمرد ام قاسم
ڤيان:-بيبيتي ام ابويه
الحجيه:-سبحان الله نسخه منها
ڤيان:-هههههه اي الكل يگول هيج
الحجيه:-انتي بت منــوو
ڤيان:-بت هاشم الوسطانيه
الحجيه:-هاا متزوجه؟
ڤيان:-منفصله
الحجيه:-عندي حميد ابني يريدله مره معدله بــس هو شلون حميد هو يصيح باع يشك الكاع
ڤيان:-"بدت تحجيلي بطولات عن ابنها عمره اربعين سنه اني يفترون وراي الشياب فوكاها متزوج ثنين وثنيناتهن ميتات وعنده اربع اطفال ..
هسه شجابني وكعدني يمها حضي ونوب تخلص سالفه تدخل بسالفه اجيت ابجي خابرت ترف ردت بــس اشرد من هــآي المره شماكله ماعرف بــس تسولف
ترف:-ها شبيج خبصتيني
ڤيان:-يله تأخرتو
ترف:-ترى بتلاثه بعدها مصايره
ڤيان:-اي ماعرفهم بالكوه كاعده
ترف:-يله بــس منتضرين يجون الباقين ونجي
ڤيان:-اوكي
.
.
ترف:-الخطوبه ناقصها فهد صح خالو ستعجل بموضوع زواجه هو اول وتالي يتزوج وفهد ميرجع شوفة بيبي فرحانه وجدو هم كلش تسعدني بدلت وخليت مكياج خفيف مو ثكيل ونزلت اسلم على كرايبنا الأجو خالو نزل النا بهيبتة ورزانته ماعرف ليش احسه مافرحان ولا مبينه ضحكه على عيونه احس الضحكه تنرسم على شفته مجامله يجوز اني نكديه وجاي اشوف هيج اذا ميريد يخطب ليش اجه هو بنفسه وطلب ..شمدريني بعد الله يسعده وتطلع هــآي البنيه ع گد ايده ..
أجتني رساله فتحت التليفون من رسلان كاتبلي تعاي لغرفتي ..
حسبت حساب واخذت ويايه حمره ضميتها بصدري هسه حيخرب مكياجي متأكده صارله هواي مكاعد يمي ومفرود بيه واني هم الشوق يقرا الف شيخلص امتحاناتي صعدت
للغرفه محد بالممر مال الفوك البنات بغرفة ڤيان يخلن مكياج والله لو تعرف بيهن تجي تكلب الخطوبه عزا
دخلت لغرفة رسلان بعدني ماساده الباب انسحبت سد الباب برجله نضربت بصدره وبقيت مخليه راسي ع صدره حضني كل قوته وباس راسي
رسلان:-شدعوه يابه
ترف:-ها مو البارحه حجيت وياك بالليل
رسلان:-لا شدعوه هالگد حلوه
ترف:-"خله إبهامه على شفتي ومسح الحمره باصبعه طلع كلنسه من جيبه ومسح اصبعه بالكلنسه ..
باوعلي وتأكد بعد ماكو حمره هجم على شفتي يتفنن ببوسته خليت ايدي على جتفه قفل الباب ودفعني عالچربايه أجه فوكاي دفن راسه برگبتي يعضها ويبوسها دفعته بــس اعوفه يتمادى وميحس على روحه "
رسلان:-ليش وخرتي
ترف:-لو مادافعتك جان رحنا بيها رسلان سيطر على روحك ترى دتخوفني هيج
رسلان:-ارجع واكووول مررررتييي شريد اسوي ميهم
ترف:-اي انتضر للعرس
رسلان:-ترف طلعي بره
ترف:-ياا يعني لو تسوي شغلات عيب لو تزعل
رسلان:-طلعيييي بررره
ترف:-"نگلب ١٨٠درجه دخلت لغرفتي بسرعه سديت الباب وكمت ابجي وارجف من الخوف خوف من فكرة هو زعل وعصب من عندي ..
لازم احافظ على روحي حتى لو چان زوجي ينتضر للعرس عدلت مكياجي وخليت حمره لبست شال و عبايه اسلامبه سمعت صوت الولد لأن ..
نزلت لكيتهم ديتحضرون حتى يطلعون طلعنا حتى نصعد بالسيارات عبالي خالو ياخذنا وياه بــس خالو كاعد بصف وسام شفت جدو صعد يم رسلان بيبي كالتلي امشي نصعد ويه جدج ماكدرت ارفض واحنا دنمشي للسياره بيبي كالت خشمج احمر ليش كلتلها تذكرت فهد كالت الله يرحمه وصلنا للسياره صدت بيبي واني بصفها باوعت عالمرايه البالنص شفته يباوعلي نزلت عيوني ودرت وجهي اباوع عالشارع ..
وصلنا لبيت العروس صف السياره كلش لزك بالباب خلاني انزل اني وبيبي وبعدين قدمها لغير مكان لان سد الطريق ..
دخلنا البيت الرياجيل باب خارجي من الاستقبال يدخلون واحنا لا للبيت
اجتني ڤيان تجنن طالعه من زمان مشايفتها بهيج مكياج دخلنا نسلم وبقينا كاعدين عداتنا لا نركص ولا نسوي شي الا يعقدون بعد يجوز الكل هيج بــس ماعرف عائله عن عائله تختلف المهم اتفقو الزلم عالحاضر والغايب والنسوان هلهلن
بيبي فتحت باب الاستقبال ع كد أيدها حتى تطش چكليت كامن يگولن ويهوسن اخذو العروس بغرفه وكالو حيدخل السيد وخالو وياه شهود حتى يعقدون
خليت شال على راسي دخل خالو وياه سيد وجدو واخوانه انتضرنا لحد ماعقدو وطلعو
جنت صافنه عليهم ووحده من خوات بيبي هلهلت هيه واكفه ورايه مو هلهوله زرفت طبلة أذني طفرتني طفره
كعدو ثنينهم عالكوشه جدو طلع والسيد وخوالي لبسها الحلقه ومحبس وگلادة هدية بيبي الها أخذتلهم صور بتليفوني طلع خالي وبقن النسوان يركصنن قدمولنا كيك وببسي وبيبي التقت بكريبها وحبايبها بعد شيخلص السوالف
تقريباً نص ساعه ومرت خالو هاشم كالت يله ابو يزن خابرني يكول تأخرنا ورانه حفله طلعنا صعدت بالسياره مال رسلان ويه بيبي وجدو ..كرايبنا ركعو لبيوتهم بقو بــس خوالي بالبيت واصدقاء خالي والولد بره يحضرون الحديقه للحفله مسوين حفله لاصدقاء خالي
..
ڤيان:-طلعت من البيت يزن أشرلي اصعدي بسيارتي مشيت سيارته صايره بالاخير شفت سيارة وسام قبل السياره مال يزن ..
واكف ومنتجي عالسياره مالته كمت امشي على كيف واخر شي يزن صاف سيراته خرب حضييي مشيت من عنده هو شافني جان يحجي يريد يسمعني
وسام:-مخليه صبغ القنادر كله تريد اصير حلوه بالگوه
ڤيان:-"هيج گمت اغلي بداخلي والله لو ما الشارع مليان ولد وامي تمشي ورايه شويه بعيده جان ماعديتها إله
....
يتبع
البارت ٢٧٠٠كلمه بعدين اكمل باقي تفاصيل الخطوبه ببارت جاي 💕🥰
هالمره اريد توقعاتكم الجهنميه 😝
احبجن وحده وحده 😍 عاذراتني من اتأخر شكد حلوات دخيل ربجن 💕💕💕