وطلع عبدالله من الصبح علشان يقابل عز لانو عايزو
في موضوع مهم لكن زي العاده عز اتاخر وفضل
عبدالله واقف حوالي ساعه كده لحد ما الزفت جه.
عز: عبدالله.... فينك يا صاحبي محدش بيشوفك.
عبدالله: هو انا قايلك أشوفك الساعه كام يا زفت انت
ها.
عز: معلش بقا ما انت رايح تتصل الصبح وانا كنت
مطبق من امبارح.
عبدالله: طب فوق كده معايا وركز علشان عايزك في
موضوع مهم.
عز: اشجيني يا سي روميو.
عبدالله: ركز معايا يا عز بدل ما شايف العمود ده
هعلقك عليه.
عز: طيب ركزت اهو.
عبدالله: ماشي بص بقا وشغل دماغك معايا فاكر لما
اكرم صاحبنا كان معاه سلسله حديد ومن غير قصد
وهو بيلفها جت علي ايدك وعملت علامه زي علامه
الضرب كده.
عز: ايوه فاكر بس ايه دخل ده في الموضوع اللي
عايزني علشانو.
عبدالله: بص مش انت بعديها قولت انك جبت دوا
كده معين وجاب معاك نتيجه ومبقاش فيه أي اثر
للعلامه علي أيدك.
عز: ايوه بس بردو معرفتش انت بتسأل ليه.
عبدالله: انا بقا عايز الدوا ده.
عز: مين ده اللي اتجرأ يرفع ايدو عليك قولي بس
وانا اجيب الرجاله ونساوي وشو بالاسفلت.
عبدالله: لاء انا عايزو لواحد صاحبي هتقدر تجبهولي.
عز: هو هيبقا صعب شويه اني اجيب الروشته
واجيبو لانو مبيتباعش كتير بس هقلبلك الدنيا
واجبهولك متقلقش انت لكن كان في حاجه كده.
عبدالله: ايه.
عز: الدوا سعرو غالي حبتين.
عبدالله: ميهمكش انت بس هاتو وانا هدبر الفلوس.
عز: ماشي يا صاحبي يومين بالكتير ويكون عندك...اه
وابقا سلملي علي چوليت بتاعتك.
عبدالله: ياض انت عايز تموت النهارده ها.
عز: خلاص سلام.
♕♕♕♕♕♕♕
ورجع عبدالله علي البيت ولقا امو واقفه وحوليها
شنط كتير وهو عارف ان الشنط دي كانت علي
السطح والمفروض حمزه ينزلهم لانهم ثقال وهو
عارف ان حمزه مش في الييت فراح لامو وقال يا
امي هو انا مش قولتلك مليون مره لازم ترتاحي ده
انتي لسه عامله العمليه ايه اللي خلاكي تنزليهم.
الام: بس انا منزلتش حاجه ده كنزي ربنا يسعدها هي
اللي نزلتهم.
فقال باستغرام كنزي وهي فين....
فردت امو وقالت فوق علي السطح وقبل ما يطلعلها
تلفونو رن وطلع بره علشان يرد عليه وكانت أسراء
اللي قولتلكو هتعرفوها بعد شويه ولسه مش
هتعرفوها دلوقتي بعد شويه كده المهم وهو بيكلمها
شاف حمزه داخل ولما قفل معاها وجاي داخل لقا
حبيبتو واقفه علي الكرسي وبترفع الحاجات علي
الرف بس مش هنا المشكله المشكله ان التيشرت
بتاعها بيترفع والعلامات اللي علي ضهرها بدأت تبان
وحمزه داخل وامو واقفه راح عبدالله زء حمزه راح
حمزه وقع وخبط برجلو الكرسي وهي خدت واقعه
محترمه يعني وبعدها جايه تقوم وبتقول.... ئااااا
ألاهي يا حمزه يجيلك طفل يطلع عينك ويوقعك زي
موقعتني يا بومه.
فامو ضحكت وقالت امين.
فقال حمزه بغضب ايه يا ماما بتدعي عليا.
فقالت اسكت ياض وبعدين متتلحلح كده وتجيبلنا
طفل يملي البيت علينا امال احنا مجوزينك ليه.
فضحك عبدالله وكنزي وقال عبدالله ايوه صحيح يا
حمزه متتلحلح كده وتجيب عيل ولا اتنين بدل ما
انت ملكش لزمه كده.
حمزه: اسكت ياض انت كمان.
♕♕♕♕♕♕♕
وبعد ما عز قال لعبدالله علي سعر الدوا راح عبدالله
خد الساعه الفضه بتاعتو وراح علشان يبيعها وهو
في الطريق قابل أدم.
ادم: ايه يا عبدالله رايح فين كده.
عبدالله: رايح ابيع الساعه دي.
ادم: مش دي ساعتك الفضه وهتبيعها ليه ده انت
علي حد علمي بتحبها اوي.
عبدالله: محتاج شويه فلوس الفتره دي فهبيعها.
ادم: انت اهبل ياض اقف كده وقولي عايز كام
ومتبعش الساعه انا عارف قد ايه انت بتحبها.
عبدالله: بطل هبل انا مستحيل اخد فلوس منك حتي
لو كنت صاحبي.
ادم: لا باين اني صاحبك.
عبدالله: بطل هبل واخلص امشي ده انت اصلا
مفلس.
ادم: لا طبعا ده انا معايا خمسه جنيه ونص قد
النخله.
عبدالله: هههه..... طب امشي يا ابو خمسه ونص.
وفعلا راح وباع الساعه وكمل علي الفلوس وبعدها
بيومين كان عز قلب البيت كلو علي الروشته لانو
مش هيقدر يجيب الدوا من غيرها وبعدها راح
واشتري الدوا واتصل بعبدالله واداهولو واكيد خد
الفلوس بس فعلا الدوا كان غالي وبعدها كلم ضحا
علشان تقول لحبيبتو انها تقابلو بعد ساعه واداها
عنوان المكان اللي هيتقابلو فيه ونسي ياخد من
ضحا رقمها الجديد لانو مش معاه المهم راح وفضل
مستني كتيير وكتيير لحد ماجت......
كنزي: ها قولي بقا عايزني في ايه.
عبدالله: علشان دي.... وأداها الشنطه كانت شنطه
شكلها محترم المهم قالتلو..... ايه ده انت جايبلي
حاجه ويا تري أيه هي أستني انا هخمن اكيد جايب
شوكلاته لاحلي الشوكلاته في الدنيا صح.
عبدالله: لاء غلط.
كنزي: ايه غلط امال جايب أيه.
عبدالله: لاء استني متفتحيهاش دلوقتي لما تروحي
ابقي شوفيها تمام انا لازم امشي دلوقتي يالا سلام.
كنزي: ماشي سلام.
ولما روحت وفتحت الشنطه شافت علبه عمله زي
علب الدوا لكن مكنتش فاهمه ايه دي او لايه وبعدها
لقت رساله في الشنطه قالها فيها ان ده دوا وانها
هتعرف ده لايه وبيتعمل بيه ايه من الروشته اللي
مع الدوا وانو من غير ميقصد شاف العلامات اللي
علي ضهرها لاكن مقلهاش اي حاجه عن انو يعرف
حاجه عن الماضي ونهي الرساله بان الدوا ده
هيمحي بعض علامات الماضي لكن احنا مع بعض
هنمحي الماضي بأكمله ومش هنخلي منه غير
السعاده ومش هيكون في غير السعاده والحب
واحنا الاتنين.
♕♕♕♕♕♕
صوتو وعلقو للفصل كتييير.
#بقلم الملكة❤.