#زينوفوبيا 🥀
🔥الحلقة السادسة عشر 16 والاخيرة 🔥
♥ħ㉫๓✿♥
_________
بدت الجلسة والمحامين يناقشو في القضية وخدو الاقوال وخبط القاضي باش ينطق الحكم في حق منعم
القاضي بعد الاتطلاع علي اوراق وملفات القضية واقوال الشهود حكمت المحكمة علي المدعة عليه منعم ### بأحالته اوراقه الي مفتي الديار
مهند ابتسم بنصر
وجأءة سمعو عيطة تلفتوو
كانت سماح طايحة والدم طالع من خشمها وفمها وودانها والمرا اللي جنبها تعيط
تلفت منعم يشبحلهم وخايف بيموت وخلاص حس روحه بيموت من الرعشة حتى هوا وهني بدي الزمان يرفع فيه لي لحظة بيقتل مريم كيف قتله حتى كان قتلت العالم كله مش حتهرب من ربي والندم يقتل فيه لاكن بعد شني
مهند:افتح الحديد تعاالا
جي الشرطي فتح الحديد وخشت الشركية لي سماح سمتها وتلفتت لي مهند ووقفت
الشرطية: هادي ميتة
مهند:كيف مييته من شني شن السبب جييبو دكتووور بسرعة 😠
ابراهيم:شن اللي صار
مهند:قالت ماتت خلي يجيبو دكتور
القاضي :حد يفهمني شن صار
مهند:برا فهمه يا عمي ابراهيم اني بنتفجر
ابراهيم مشي للقاضي
جي الدكتور يجري خش لي سماح وقعد يفحص فيها
مهند:شني
الدكتور:ارتفاع كبير في الضغط لدرجة انه انفجر في الراس البقاء لله
مهند ضغط علي ايده بلقوة وصكر سنوونة :ارفعووها
اشرف:تو انت خيرك متعفلف مش تبيها تموت اهو ربي عطاها عقابها
مهند مصكر سنونة:اني نبي انشوووفها هي ويااه علي حبل المشنقة نبي نشفي غلييلي 😤
مهاب:باهي خلاص اطلع شم هوا اهو الكلب التاني بيشنقوه
مهند طلع براا لين وصل قدام سياارته اتكى علي الباب وشد راسه
اشرف:تي افرح ربي يااخدلك في حقك منهم
مهند:اني نبي انشووفها علي خبل المشنقة نبي انشووفها وهي تحس في الموت بلبطئ هي السبب هي السبب في كل شي كان مامشتش في سكة الحرام مع الفااسد اللي اسمه منعم رااهو مامات حد راهي امي قاعدة جنبي
اشرف :باهي صلي ع النبي
مهند تنهد:عليه الصلاة والسلام
جي مهاب من بعيد هوا وبهاء
مهاب:قال القاضي ان بينفدو الحكم غدوا
اشرف:احسن خير مايطولو بيها
وبدي يتكلم الاسلكي اللي في سيارة مهند
مهند:هي اني ماشي وركب في سيارته وطلع
بهاء :هي حتى اني خلي نمشي تشاو
اشرف:مع السلامة
مشي مهاب مع بهاء واشرف ركب سيارته ومشي
ابراهيم والعارف طالعين من قدام المحكمة
العارف:والله انشغلت امس وانسيت الموضوع ومايجي منه لاكن اليوم انشاء الله انرد عليك
ابراهيم:اني قلت اكيد كلمتها
العارف:لا والله راح من بالي خلي انكلم مهاب انقوله وهوا يقول لي مهند مانبيش انكلمه اني
ابراهيم:تي شن دوينة يا عارف
العارف:ابدا مستحيل انكلمه لين يحط عقله في راسه ويولي للحوش
ابراهيم ركب في السيارة وجنبه العارف
العارف:ايوا ها يا مهاب وين انت
مهاب:طلعت ..ماشي للقهوة
العارف:باهي اسمع عمك ابراهيم طالب اختك لي نسيبه بهاب واني قاعد ماشاورتش اختك قول لي مهند وخودو رايها انتو ومنها انتم الولاد ادرة بي بعض
مهاب شبح لي بهاء: بهااااء
العارف:اي ودير زي ماقتلك ماتنساش تكلم مهند
مهاب درس :باهي باهي ماشي الحال
بهاء شبحله :شني 😕
مهاب حط تليفونه :انت باعت عمي ابراهيم ولا هوا من راسه
بهاء:وين بنبعته ؟
مهاب:عمي ابراهيم طلب اختي ليك انت
بهاء انصدم: طلب اختك ليا؟😳
مهاب:اي
بهاء قعد مصدوم شوية وبعدين ضحك :والله اني ماعندي علم لاكن ليا الشرف اناسبكم كان ماعندكش مانع
مهاب:ماعندكش موضوع من قبل يعني
بهاء:لا ماعنديش فاضي 😂
مهاب قعد ساكت شوبة وبعدين ضحك:والله نسحابك انت باعته وحرك السيارة وطلع
بهاء :اني بعت مابعتاش لاكن والله ماعندي مانع
مهاب كمل سواقة وهو يهدرز علي بهاء ويقصقص فيه علي حياته
_________
مع الظهر وصل خبر وفاة سماح لي جلال وصغاره قريب هبلو وهوا يضربوه بي موس ماتطلعش منه نقطت دم متحصرم علي صغاره وعلي سمعته اللي بدت في التراب بين عيلته
وطبعا امالي سماح رفضو ان يديرو حتى عزاها
_____________
الساعة6:00 العشية
درس مهند قدام حوش العارف ونزل واول مافتح باب الجنان طول تخيل لما كان يروح ويمشي طول لي تارا ويرفعلها في الهداية قعد واقف شوية وبعدين ركب للحوش وفتح الباب وخش
مهند:مرت خالي
شيخة طلعت من الدار :مهند وليدي جيت اهلين تعالا خش مهند سلم عليها وقعمز جنبها :خالي وين
شيخة:مقعمز برا مع ابراهيم
مهند:وصفاء وين نادي عليها
طلع مهاب من الدار ووراه صفاء طول
شيخة :اهم جو
صفاء:عين قاابل وسلمت عليه شن الجو
مهند ابتسم:ماشية
مهاب جي قعمز جنب مهند :جاي علي خاطر الموضوع اللي كلمتك عليه
مهند :اي اي
صفاء شبحت لي امها :شن في
مهاب:بري ديريلنا قهوة وتعالي
صفاء شبحتلهم بتعجب ومشت دارت القهوة
_______
شموس:كدااااب قصدك ماقتلهاش
بهاء:نبيها تعرف بروحها
تارا تعفلقت وقرنت حواجبها
بهاء:خيرك قارنة حواجبك
تارا :شي 😠
وناضت خشت للدار
بهاء :خيرها هادي وناض وراها هوا وشموس
تارا تبي اتصكر الباب وبهاء شده:تي غير خيرك حولي
تارا:حول مانبيكمش
بهاء دف الباب وخش
شموس:العفوو خيرك شن جاك فجأءة هبلتي
تارا :بهاء ماتتزوجشش 🥺
بهاء ضحك:علاش😂
تارا:تو بتتزوج وبتبدا تحب مرتك ومعش تحبنا حني ومعش بتجينا زي توا ومعش بتتغدى معانا ومعش بتجي تقيل جنبي
بهاء ضحك بصوت عالي :علاش معش بنجي اني بنسكن عند امي يعني زي توا بزبط
شموس:وبعدين مش تحبي صفاء وضفاء تحبك اكيد مش حتقوله معش تمشي لي تارا
تارا:لا لا مش زي
بهاء حضن تاارا:يوووخيتي محلااها اللي تبكي علي خاطري
تارا :مانبكيش علي خاطرك امشي لي صفاء حول😒
بهاء:خلاص عاد تو انتي لما بتاخدي راجل بنقعد انقولك معش بتجي هني ديمة وبنحرج
تارا:😒😒
بهاء:باهي خلاص مش متزوج باهي وكان قتلي صفاء علاش بنقوللها تارا قتلي ماتاخدهاش
وتلفت بيطلع
تارا:خلااص اتزوج ماقلت شي اني 😠
بهاء وشموس:😂😂😂
___________
جت صفاء حطت القهوة وقعمزت عطت لي امها ولي مهند ومهاب وقعمزت
شيخة:اي شن في من بكري وانتو توشوشو
مهند خدي رشفة وحط الفنجال :احمم اني جاي بناخد رايك في موضوع يخصك ولو باهي قولي باهي وكان لا قولي لا متخافي من شي
صفاء بلعت ريقها:شني 😥
مهند:في واحد ولد كويس ومشاء الله عليه وحني نعرفوه كويس وحتى انتو تعرفوه
صفاء قلبها بيوقف وبدت عرق ومش عارفة كيف اتقوللهم لا
مهند:المهم جي نسيبه طلب خالي وقاله نبي بنتكم لي ولدنا علي سنة الله ورسوله وحنى طبعا لازم ناخدو رايك قبل يعني حني موافقين عليه وتوا عليك انتي بس
شيخة:من هوا به
صفاء خلاص عيونها دمعو وبتبكي
مهند:بهاء نسيب عمي ابراهيم
شيخة:ااه ولد الحاجة فتحية مشاء الله عليها حتى امه مرا كويسة وهدرازة مشاء الله عليها
صفاء جتها صدمة تلاتية الابعاد وقعدة متنحة وساكتة
مهند:ها شني رايك الناس يستنو في الرد
صفاء:اااه ؟🙄 اءااااء ااني ال الولد مانعرفاش وانتو ادرا بيه شني ديرو اللي تبوه
مهاب:من غير جو باب الحارة باهي ولا لا
مهند:ضم فمك انت خلاص اني خديت جوابها وقام قهوته يشرب فيها وصفاء ناضت خشت للدار
فتحت الباب وخشت صكراته وحطت ايديها علي فمها وقعدة تنقز بشوية وهي فرحانة ادير في تعابير بي وجهها زي المهبولة قامت تليفونها اتصلت لي بهاء
بهاء كيف طالع من حوش ابراهيم صكر الباب ورد :ايوا
صفاء تتكلم بشوية:هكي معقولة تخليني نعرف من مهاب ومهند
بهاء ضحك:وافقتي ولا لا
صفاء:قتلهم الحق اني الولد مانعرفاش انتو ادرى
بهاء ضحك:صار طلعتي ماتعرفينيش
صفاء:بهاااء جديات اني مش مصدقة قصدك انت طلبتني
بهاء:والله حتى اني ماني مصدق لما قالي ابراهيم قلت مش حنقولك لين بوك يقولك
صفاء:تي هما رعشوني قالولي ان في واحد جاي يخطب وماقالوش اسمك لين اني قريب متت بعدين مهند قال بهاء نسيب ابراهيم اني هني جتني صدمة قعدت متنحة
بهاء:اقسم بالله ماعاطي فرحتي لي واحد
صفاء:متحسش ان تسرعنت شوية يعني مرات بعدين تقلق مني
بهاء:اولا ابراهيم مشي منه ليه طلب اني مابعتاش تانيا ضمي فمك ومعش اتقولي تقلق مني اني مستحيل نقلق منك
صفاء:باهي اسفة
بهاء:اي اوصفيلي شن شعورك
___________
شموس مقعمزة تتفرج علي التلفزيون شرين تليفونها
شموس:الوو
اشرف:هااابييكا شن الجو
شموس:مليح شن جوك انت
اشرف:جوي يهبل لدرجة ان مقعمز بين المخرومين والمجارم
شموس :وين انت
اشرف: في مركز مكافحة المخدرات
شموس:وشن ادير غادي
اشرف:عندي قضية انحقق فيها
شموس:اتعطل هلباا انت قصدك ديمة هكي
اشرف:متخافيش المتزوجين يغيرولهم في مواعيد عملهم يعني لما بنتزوجو قاعدلك يابيكتي
شموس ضحكت:تي معش اتقولي بيكا
اشرف:تي مشت فيك خلاص
شموس :هههههه باهي قولي شوشو شوشتي شيمو شموسة
اشرف:شن شعورك زمان لما انغنو يا شمس ياشموسة ياقبلة العروسة خودي سن حمار وعطيني سن غزال
شموس تضحك: تي زمان نفشخ في بهاء طرايح وهوا يغنيلي فيها بلعاني الحيوان
اشرف: حتى اني بنغنيهالك
شموس:لا انت خليك علي بيكا بس
اشرف:باهي امتى بتولي لي حوش عمتك استاحشتك نبي انشوفك
شموس: مش عارفة توا عمتي مشت لي حوش خالتها اتروح ونمشو اني وياها
اشرف عيط:اهواااا اي اي خليه في النظاارة اهو جااي ياا مؤمن خليك جنبه
شموس:وووه ودني طرشتها براا اخدم تو اني انكلمك بعدين
اشرف: باهي بيكتي باي
شموس:باي وصكرت الخط
جتها تارا :شموس
شموس:نعم
تارا ورتها صورة :شوفي الظفرة هادي تعرفي اديريها
شموس شافتها:اي اي ساهلة هاتي انديرها
___________
تسريع الاحداث
شنقو منعم ومهند كان اسعد يوم في حياته ووصل الخبر لي عيلة ابراهيم كلهم
اما جلال ف كان يحاول يأقلم روحه علي انه يربي صغاره من غير ام وابرار بنته تغيرت هلبا وبدت متحملة مسؤولية خوتها وتعاني فيهم وكأنها امهم
اما نوح فروح لي حوش امه اللي قاعد فيه وقرر ان يبيع حوشه هوا وجلال لاكن ابراهيم منعهم وقاللهم انتو باانين في نص العيلة مافيش بيعان وثعد حاضل في اجار شقة باش تقعد فيها مرته التانية لان مايقدرش يطلقها ومرتاحش بكل من مشاكل انساوينه الزوز
مشت فتحية لي شيخة وهدرزو وحكو شن بيديرو لي صفاء من دهب وبدلة كبيرة وصغيرة
العارف قاعد مايبيش يكلم مهند
اما مهاب ف نجيب كل يوم يطلعله قضية جديدة يقوله اخدمها انت ومنتهى يبي يتعلق بيها بلعاني
وهوا وياها و ياخدو علي بعض بشوية
تارا رجعت تعاين عند دكتورها النفسي وكانت تتجاوب مع الجلسات بسرعة لان نفسيتها تحسنت هلبا بعد ما منعم مات وطبعا عبد الله مختفي من الانظار ورافض انه يعالج تارا ولا حتى يكلمها علي قد ماكلمه بوه هوا رافض بفضل مهند طبعا والطريحة المقومة اللي عطاهاله 😂
مهند شادها قضاية ورابعض يحاول ينسي روحه في تاارا لاكن مش قادر واشرف قاعد بينفس هبااله هوا وشموس
وهدية قاعدة بين حوش خوها وحوش خالتها
ابراهيم جاب عمال وبدي يصين في الحوش وفتح الدروج علي حوشهم ودار دروج تاني من برا ويفتح بي باب مقابل باب الحوش بش كان بيجيهم حد براني
__________
بعد مرور ستة اشهر
شموس راقدة علي السرير والدار حنبها مقلووبة قلب كلها حوايج شرين تليفونها جبداته وعيونها مغمضات
شموس:الو
اشرف:قااااعدة رااقدة
شموس:خيييرك تعيط اي متمرقدة
اشرف:كيف راقدة لا توا نووضي عييطي اني امس ملبسك الدبلة ورااقدة
شموس:شني بنطلع انقولها في الشارع
اشرف:حبيبتي شن شعورك واني خطيبك
شموس ضحكت وتشقلبت علي ضهرها وتشبح للدبلة :شعور يهبل 😍
اشرف:تي اني مرقدتش قعدة لا الصبح نتفرج علي صورتك
شموس ضحكت: حتى اني قعدة نتفرج علي صورنا يهبلو بدات انت حبيبي طلعت تهبل
اشرف:انحبك ياابنتي طبيعي بنكون حلو
شموس:باهي برا اقلب وجهك بنرقد
اشرف:امنيت حياتي تفاجئيني وتكملي معاي رومانسية شوية
شموس:باهي انحبك انموت فيك اموااااااه هي بااي
اشرف:علي اساس بري بري معش تكلميني
شموس:حبيبي خييرك
اشرف:مش حبيب حد اني بري ارقدي
شموس: كداب انت حبيب البيكا
اشرف ضحك:لا لا خلاص البيكا بدي صوتها رقيق
شموس ضحكت:ماشي للمركز انت ولا وين
اشرف:تي لا لا ماشي لي مهند يوتو لي للفاتحة
شموس:ووووه دكرتني خلي انوض حتى اني امس روحت بدرقة علي اميمة
اشرف:واختك وين
شموس:تي اسكت تاارا والله بايتة غادي وتعول وتضحك وتبصر مع بنات خالتي خلاص اخر جلسة عند الدكتور من اسبوعين معش مشت بعدها
اشرف:باهي مليح والله فرحتلها
شموس:حتى اني اقسم بالله مش مصدقة ان حيااتنا تغيرت خلاص وبدينا عاايشين مرتاحين منغير هم
اشرف:تو مزال الراحة علي اصولها لما اتجيني بعد خمسة شهور
شموس ضحكت:اهونا هدوو عليا الباب يطقطق
اشرف:هي بااي بااي بري
شموس:باي حبي بااي صكرت الخط وناضت تجري فتحت الباب لقتهم تارا ومنتهى
منتهى:ناموسيتك كحلي هاربة بايتة هني باش تسهري مع الحب براحتك
شموس:والله ماكلمته غير توا
تارا:هي اميمة قالت تعالو باش نربطو الحاجات اللي بنرفعوها لي حوش صفاء
شموس:باهي انغير حوايجي وانجي
تارا :حتى اني جاية بنغير حوايجي
خشو للدار غيرو حوايجهم الزوز وطلعو معاهم منتهى مشو لي حوش حناهم والدنيا زحمة والمنضومة للجلدة
مشو البنات للحوش وبدو يربطو في الحاجات اللي بيرفعووهم لي صفاء ويزغرطو عليهم
تارا كانت فرحانة بشكل مش طبيعي وهي ماتتفكرش في روحها حاضرة عرس من قبل بكل كانت كل شي عندها جديد واول مرة تشبحه
ادن العصر وقرو الفاتحة وجي بهاء سلم عليهم وتارا شادة فيه وماتبيش من يضبطه ويبوسه كأنها بيبي
وبعدين رفعو الحاجات اللي ربطوهم لي حوش صفاء ودارولها شوط دربوكة
وصفاء كانت زي المسبوهة تضحك وخلاص مش فااهمة شي
تاني يوم الحفلة طبعا صفاء دارت الحفلة في الصالة وعزمت البنات كلهم ومشو شموس ومنتهى بس
وتارا قعدة مع حناها وخالاتها
جي بهاء درس قدام الصالة ويتصل بي شموس ويقوللها هياا طلعوها ودار العار لين طلعوهاله وهوا ماباش يخش
ركبتها شموس جنب بهاء وقاللهم هونا بيروح بيكم مهاب
شموس:هييييي حي علي الحمار هداا تي شن مهاب اللي بنركبو معاه خيرك
بهاء:اسمعو هونا في مهند ومهاب اختارو واحد وقولوله يروح بيكم وانتي هونا خطيبك واقف غادي
منتهى:ياا ماما بطني وجعتني كأنا لوحنا في الشارع ولا
بهاء طلع جري بسيارة وهوا يبيب
شموس تلفتت لقت اشرف جايها
شموس:وووه عليااا
اشرف:شن موقف فيتك في الشارع عبيااتك اتوقل ديسكو
شموس:بهاء مشي علينا وقالو دورو من يروح بيكم
منتهى:اي وحق ربي هكي قال
اشرف:باهي تعالو انوصلكم هياا تحركي
وفتح سيارته ركبت شموس من قدام ومنتهى من تالي
شافها مهاب راكبة مع اشرف تعفلق
ولع اشرف وطلع
اشرف:تعرفي بهاء هدا كان مش خاالك راهو عرفت شغلي معاه
شموس:خليه فرحان بي عروسته
اشرف:ويخليلي مرتي واقفة في الشارع يتفرجو عليها ستين واحد
شموس ضحكت :مرتك ؟ 😏
اشرف:بالك مش عاجبك 😒
شموس:عاجبني 😂 وقوت المسجل وبدت اتصفق
ومنتهى تضحك عليهم
شموس:اسمع المرش مظلم
اشرف:علاش تسألي
شموس:غير قول
اشرف:مظلم اي
شموس:حولت وشاحها منتهى تعالي تلقي في توكة حاشيتهالي في نص رااسي اجبديها دارتلي صدااع
منتهى :وينها وقعد تجبد في التوكات لين جبدتها
اشرف:بسررررعة المرش القدامي مش مظلم
شموس:تي بااهي اشرف خيرك وقدمت قعمزت علي الكرسي ااااه راسي
اشرف:بيكاا علاش حوستي روحك هي تو امي في العرس غادي كيف بتشوفك
شموس:انت خطبتني خلاص توا بتتقبلني بجميع حالاتي
اشرف:اني متقبلك ياا قلبي لاكن امي لازم اتشوفك مرتبة
شموس:حاضر حبيبي تو انخش داخل طول انساوي روحي
اشرف شدلها ايدها وباسها وقعد شادها ويسوق
منتهى قدمت وجهها:احمممممم
اشرف:اتكي ارقدي لين نوصلو
منتهى:حسبي الله
شموس:تضحك وطول الطريق حب وغرام هي وياه ومنتهى التالي زي الشفافة
درس بهاء قدام الحوش :صفوو حبي دقاايق واطلعي ماتموتيش داخل باهي
صفاء :باهي غير انزل افتحلي الباب ونزلني انحس في روحي زي البركاطوطة
نزل بهاء يجري فتحلها الباب ونزلها وجو خواته قدام الباب خدوها دخلوها وهوا قعد برا وجو صحاابه بنوبة
درس اشرف :لا لا ماتنزلووش استنوو الدنيا كلها ولا وقعد يقدم بسيارة يقدم لين قريب خش في الخيمة
شموس:حيي العاار حيي كلهم عرفو انك جاايبني
اشرف:يعرفو ولا يطربقوو خطيبك والله
منتهى نزلت تجري خشت
فتحية شبحتها وجتها
شموس نزلت طول واشرف وخر
فتحية قارنة حواجبها وكيف بتعاركها
شموس:معقووولة ياا اميمة معقوولة بهاء هكي ايدير فيناا تخيلي خلانا قدام الصالة وقال قولو لي مهاب ومهند يروحو بيكم وطبعا اشرف مرضاش ان نركب مع حد وجاابنا هوا بارك الله فيه
فتحية:هيييييي انهااره ابيض هلحماار هدا توو انوريه غدوا خشي سلم بنتي خشي
خشت شموس ومشت طول داخل ساوت روحها وطلعت مشت لي صفاء هزبتها وصفاء ميتة بضحك
فات الوقت وشوية وطلعت صفاء لي بهاء بيدخلو في فندق لان حوشهم زحمة
والناس بدو يروحو بشوية لين فضي الحوش قعدو العيلة بس وبدو يضمو في الدنيا كلها لان لازم يروحو قبل تالت يوم علي خاطر بهاء
___________
فاتو اسبوعين
تارا كانت نايضة من الصبح متوترة وتوتي في روحها
وقفت علي المراية تساوي في وشاحها
شموس:اسمعي تارا
تارا :نعم
شموس:هاك هادي دبلة ماما البسيها باش تحسي بيها معاك
تارا ابتسمت ولبسها في صبعها الوسطي
شموس:تي شن لبستبها هني هاتي جاي ولبستهالها في صبع الخطوبة
تارا :لا مش هدا صبع الزواج
شموس:صبع الخطوبة هدا يا دكية
تارا:باهي حوليه تو يسحابوني مخطوبة
شموس:اني نبيهم يسحابوك مخطوبة خليه تحوليه نحرج منك
تارا شبحت لي الخاتم وابتسمت
وطلعت هي وبوها وشموس مشو للمعهد اللي تقرا فيه
لان عندها معرض لي لوحاتها اللي ترسم فيهم والطلبة كلهم خاشين يتفرجو عليهم
شموس بعتت رسالة لي اشرف
شموس: "صباح الخير حبيبي حني وصلنا للمعهد واني درت اللي اتفقنة عليه "
اشرف:"صباح الورد ياعمري مية مية اني شوية وانجي "
_______
خشت منتهى للمكتب :صباح الخير
مهاب شبحلها:صباح الورد
منتهى:شن الجو
مهاب:مليح خيرك تأخير اليوم
منتهى :بابا كان عنده شغل داره ولالي والطريق زحمة
مهاب :باهي هي ديريلنا قهوة وتعالي عندنا قضية جديدة بتستلميها انتي
منتهى:اياااه باهي هي ومشت طيبت قهوة وجت قعمزت جنبه شني وين خالي
مهاب شرب جغمة من القهوة وشبحلها: عنده جلسة اليوم .. هي افتحي الملف واقري وقوليلي شن بنديرو هي
منتهى ابتسمت :احممم بسم الله وفتحت الملف وبدت تقرا وبعد دقايق تلفتت لي مهاب وبدت تشرحله شن بيديرو
مهاب:تمام صح باهي كملي
منتهى:كملت تشرحله وهوا يشبحلها ومبتسم
منتهى:شني
مهاب:شي كملي
منتهى:فيا حاجة وقامت تليفونها شبحت روحها ملقت شي خيرك تضحك باه
مهاب:شي عاجبتيني
منتهى خدودها ولو حمر وخرت بلكرسي التالي :احمم مبردك من غير اتسهويك😊
مهاب:مانتسهوكش علتش انتي مش مقتنعقة انك حلوة ولا شني
منتهى:مش حلوا ومش شينة شكلي عادي وتوا خلي انكملك
مهاب :باهي اني انشوف فيك حلوا شن بديري هي
منتهى ضحكت:خلاص خلي انكملك شن بندير
مهاب:غير اسمعي جديات كان جي حد خطبك توافقي ولا لا
منتهى وجها زي الطماطمة :مهاب خيرك شن جاك علي الاسئلة هادي
مهاب:جاوبي
منتهى:مش عارفة علي حسب الولد لو كويس ولا لا
مهاب:باهي مية مية كملي توا هي
منتهى تضحك:اسمع وترتني انسيت شن بنقول
مهاب:😂
____________
مهند مقعمز في المكتب ويشبح للخاتم وساكت
اشرف:لا امتى بتقعد هكي اااه شني يعني هي برت وانت جاتك الزيزو فوبيا
مهند:معش تتسهوك
اشرف:تو هي تندري عليك واخد خاتمها
مهند دسه في حوايجه:حتى انت ماتندريش عليه
اشرف:تهديد قوي الشيت وناض وقف هي اني ماشي ناتبيش اتجي
مهند :وين
اشرف:تارا مدايرة معرض لي رسماتها اليوم في المعهد اللي تقرا فيه
مهند:علاش هي بدت تقرا في معهد
اشرف:قتلي شموس ان كانت تقرا بي النت وتوا لما برت بدت تقرا فيه
مهند:مش عارف نمشي ولا لا
اشرف قام ورقة وكتب فيها العنوان وحطهاله علي المكتب :هدا العنوان كان خطرلك اتجي
مهند شبحله وسكت
اشرف :مافيش وقت راه يمكن مزال ساعة ويتم المعرض
ومشي اشرف طلع ركب في سيارته
ومهند وراه طول خليك قدامي
اشرف:ولك يضرب الحب شو بيزل
مهند :سوق وفمك مضموم
اشرف طلع بسيارة ومهند وراه لي وضلو للمعهد ونزلو
خشو هما الزوز تارا عاطية بظهر وتهدرز هي وشموس وبنت تانية
اشرف وقف ورا شموس :بيكا
شموس تلفتت ومشتله:شن الجو
اشرف:مليح وقعد يشبح لي لبسة شموس سروالك ضيق راه
شموس:وووه فوتها الدسكة اهيا باهي
جت تارا سلمت علي اشرف
اشرف:اهلا شني الرسمات هادو مفهمت شي
تارا:خزي معقولة مفهمت شي
اشرف:انبصر عليك الله يبارك عليك مشاء الله
تارا ضحكت:شموس بابا مشي قال لما اتكلمو اتصلو بيا
اشرف:اني قاعد معاكم مدورو شي
شموس نخصاته وتلفتتله وتتكلم وهي مصكرة سنونها ومبتسمة:وينه
اشرف غمزلها :ااه تارا ترا تعالي الرسمة هادي قوليلي شن هي مفهمتهاش
تارا: وينها
اشرف تلفت شاف مهند يتفرج علي اللوحات وواقف قدام وحدة :اهيااا تعالي
مشت تارا هي وشموس ورا اشرف
تارا :هادي
اشرف : اي اي
تارا: هادي بنت شادة مراية اتشوف في روحها شخص تاني
اشرف:باهي شن معناها
تارا:يعني يمكن انتي اتشوفي في روحك في ناس تانية يعني مثلا انت وشموس لو شموس كانت حزينة ف حتى انت حتبدا حزين لو هي ضحكت انت حتضحك ونفس الشي بلعكس
تارا تشبح للرسمة وتشرحلهم وهما مشو من وراها
مهند كان واقف جنبها وهي مش ملاحظاته
تاارا تلفتت:فهمتو 😕 وين مشو
مهند:اني فهمت
تارا شبحتله وانصدمت :ااء ااانت شن ادير هني 🙄
مهند:ماتبينيش نمشي ؟
تارا:لا ماقلتش هكي بلعكس فرحت بي شوفتك غير انصدمت شوية بس ليا هلبا معش ريتك
مهند:الف مبروك علي المعرض حلو هلبا
تارا ابتسمت:شكرا
مهند :وفرحتلك هلبا انك تحسنتي و بديتي تخطلتي بناس
تارا ابتسمت وعدلت وشاحها وسكتت
مهند كيف بيتكلم شاف الدبلة في ايدها من غير اي كلمة جبدلها ايدها :شن هداا؟
تارا انخلعت :شني ؟
مهند:شني الدبلة هادي امتى انخطبتي خيرني مسمعتش ومن هوااا 😠🔥
تارا:اااء اا اني مم
شموس :اي انخطبت وحني مانبوش انقولو لين انديرولها بيان
مهند طلق ايده تارا وطلع
تارا :شمووس خيرك تكدبي علاش هكي
شموس:تعالي هني خليه
تارا :حولي ايدك تعرفيني منحبش نكدب ومشت لحقاته
اشرف ايييييييه يلا اللي علينا درناه وكان توا ماتفاهموش اني معش دخلني
شموس شبحتله: تي خطتنا مليحة متخافش
اشرف قرصلها خدها :محلا بيكاا اللي تخطط اني محلاااااها نحبك ♥️
شموس:نزل ايدك عييب
اشرف:باهي قتلك نحبك
شموس:ياهي حتى اني نحبك مش حاجة جديدة
اشرف: ياخرا تعلمي تترمسني شوية
شموس:باهي اووف 😑
اشرف ضربها علي راسها :تعالي خلي انشوفو هدوكا شن صار فيهم
______
تارا تلحق في مهند لين وصلت فيه وشداته من مرفقه :مهنننند خيرك من امبركي انكلم فيك خليتهم كلهم يشبحولنا
مهند:حوولي ايدك وقفتك معاي غلط لو شافنا خطيبك شن بيقول عليك
تارا ضحكت:مهند اهدا شوية بس اني مش حنعرف نتكلم معاك وانت تفنض فيا هكي
مهند تنهد وغمض عيونه وهوا يغلي غلي طلع السنسلة من حواايجه :رييتيييه هداا رييتيه طول المدة اللي فاتت وهوا هني مش راضي انحوله لان كل مانشوفله نحسك جنبي مافيش يوم رقدت زي النااس واني انفكر فيك مافيش حاجة في رااسي غيرك انتي وغير شكلك عيوونك تسمعي فياا وانتي فااايتيني ومخطووبة لي اشبح مني لاكن اني الغالط اللي انراجي منك في حاجة وتلفت بيمشي
تارا شدااته :مهننند استنى خييرك
مهند:شني شني
تارا حولت الدبلة لبستها في صبعها الوسطي :هادي دبلة ماما لبستها هني من البداية باش انحس ان ماما معاي اليوم لاكن شموس هي اللي قتلي البسيها هني اني مش مخطوبة ولا شي وشموس تكدب عليك 😔
مهند قعد يشبح لي تارا وحط ايديه علي عيونه:بنقتلها اختك بنقتلهااا تي قريب جاني الضغط 😠
تارا ضحكت :تستاهل
مهند شد ايد تارا ورفعا وراه
تارا:هي هي وين رافعني
مهند:اسكتي وفتح باب سيارته ركبها وركب هوا
شموس:تي وين راااافع البنت هداا
اشرف:اسكتي هي ماشية بي رجليها
شموس:انشاء الله ميجيش بابا حي علياا 😥
اشرف:تعالي نركبو حتى حني في السيارة 😉
شموس ضرباته :اسكتت
اشرف:😑
_____
تارا : مهند علاش ركبنا هني
مهند شدلها ايديها الزوز :تارا اسمعي اللي بنقولهولك كويس وافهميه باهي
تارا هزت راسها
مهند : ااء اني نحبك نحبك من لما كنت انجيك في المرسم وكنتي تحكيلي في كل شي كنت نبيك اتقوليلي مني القاتل بس لاكن كنت كل يوم نأجل في سؤالي باش يكترو تقعميزاتي معاك باش انشوفك كل يوم تعودت عليه مع انك كنتي ماتتكلميش لاكن كنت نفهم في شبحة تشبحيلي فيها والحب اللي انحبهولك اني مش زي حبك لي بوك واختك الحب هدا من نوع تاني انتي فااهمتيني ولا
تارا حطت راسها لوطة وخدودها حمر وهزت راسها بي اي
مهند:ردي عليها فاهمة اني شن انقول
تارا ابتسمت:اي فاهمة
مهند ابتسم:يعني عارفة كيف نحبك ولا
تارا توترة:خلاص مهند نبي ننزل وجت بتفتح الباب مهند صكر البطمة من عنده وشدلها ايدها تاني :مزال ماكملتش كلامي
تارا:حول مهند عيب يشوفو فينا الناس
مهند:مافيش حد يشوف فينا السيارة مظلمة
تارا:باهي شن تبي بننزل 😞
مهند باسلها ايدها : استنيت اللحظة هادي هلبا ممكن تخليني فرحان شوية
تارا ضحكت:باهي لازم انكون معاه يعني
مهند: تو كيف اتقوليلي فاهمة وانت مش عارفة كان لازم اتكوني معاي ولا لا مني اللي علمك شن هوا الحب
تاارا:شموس
مهند:اممم لا معناها خلي اني نشرحلك لان كان بتعبي علي شموس معناها اني بيصيرلي زي ماصاير في اشرف
تارا:كيف يعني
مهند قعد يشبحلها وهوا مبتسم وباسها من خدها
تارا:هيييي 😧 لا افتحلي بننزل
مهند :نتصل بيك ردي عليا باهي
تارا:مانعرفش رقمك
مهند:تو نبعتلك رسالة قبلها
تاارا :به
مهند:نحبك
تارا:باهي فهمت 😄
مهند :نحبك
تارا:افتحلي الباب
مهند:فتح الباب وهوا يضحك
تارا فتحت الباب وبتنزل
مهند شدلها ايدها تارا تلفتت
مهند:نحبك
تارا ضحكت ونزلت وصكرت الباب
مهند نزل حتى هوا ومشي وراها
تارا:وين ماشي
مهند:بنقعد لين تكملي المعرض
تارا :مهند انت كيف خديته خاتمي اللي عندك
مهند مرا تبزعو عليك الالوان حولتيه خديته
تارا ضحكت:قعدة اندور فيه هلبا
مهند:عادي زي عندي زي عندك
خشت تارا للقاعة اللي فيها المعرض جتها شموس طول :احممم وين كنتو
مهند :عندك علم ان اني كارهك ونبي نقتلك
اشرف:صلي ع النبي شن تقتلها معناها اني نقتل تارا ولا شني
مهند:كيف متحملها وهي مستفزة
شموس :ونبييي اصلا تستااهل اللي جاك المفروض اكتر من هكي باش تتعلم مرا تانية معش تلعب علي حك
مهند حك راسه من تالي :والله !!
تارا وقفت في النص :هيي انتو الزوز خلاص اني مش حرجانة من مهند وشموس خلاص انسي الموضوع قديم
شموس:كان انتي انسييتي قداش بكيتي وقداش سهرتي ليلة وانتي اتقوليلي علاش دارلي هكي اني شن دنبي ف اني منسيتش
تارا :خلاص اني نسيت كل شي وسامحته معش تتفكري الماضي لان مش حترتاحي في حياتك بكل
شموس مشت واشرف مشي وراها
مهند: تارا اني اسف هلبا
تارا:مهند ماتتأسفش مني خلاص والله اني نسيت كل شي اني معش نبي شي غير انك اتكون جنبي توا بس
مهند:مستحيل انعاود غلطي وانسيبك اصلا في اقرب وقت بنكلم بوك وبنقوله نبيها
تارا ابتسمت وهي تشبحله
__________
فات الوقت وجي اليوم اللي روح فيه بهاء من شهر العسل كانو العيلة كلهم متلقطين في حوش فتحية ومقعمزين كلهم يهدرزو
شرين تليفون شموس ناضت تهدرز علي اشرف
بهاء:صكري صكري وتعالي جنبي قوليله مش وقتك
شموس ضحكت ومشت خشت للدار
شرين تليفون منتهى وكان مهاب ومشت لحقت شموس
بهاء:شني الانااتي هادو تعاالو هني خالكم مرووح
صفاء ضرباته علي كتفه:خلي البنات خيررك
بهاء:باهي صفاء حاضر
فتحية:شن مدتير معاك المهبول هداا
صفاء:مهبلني شن بيدرلي اكتر من هكي
ضحكو كلهم
جت تاار من الكوجينة مدت العصير وقعمزت جنب بهاء
بهاء حضنها:يووخيتي سلم الفرخة هادي اللي كبرت وحق ربي فرحان بيك لا للمليون
تارا ضحكت :حول ماتضبتنيش برا لي صفاء
صفاء:معقولة يااتارا قاعدة ماتبينيش
تارا :لا لا لاكن مفروض اتزوجتي حد تاني مش بهاء
صفاء ضحكت:حي عليا نحس في روحي مرت الخال المسمومة
تارا ضحكت:انبصر عليه
شرين تليفون تاارا قلباته علي وجهه وماردتش
بهاء شبح لي تارا خيرك مارديتيش
تارا :مانبيش انرد
بهاء ضيق عيونه:من اللي اتصل
تارا فنصت فيه :تو بعدين نحكيلك
بهاء:حي حي حي انهار مغبر سافرت اسبوعين البنت ضاعت تي شن في
تارا :بهااء
بهاء:تعرفيني ماتحكيليش نقتلك
تارا:باااهي 😄
صفاء:الموضوع هداكا صار منه
تارا :امم اي
بهاء تلفت لي صفاء:حتى انتي تعرفي
صفاء ضحكت:لا لا
بهاء يوشوش :تي مني ولد الكلب هدا
صفاء:تحشم
تارا ضرباته:معش اتقول هكي
بهاء:وماتبينيش نتكلم عليه تي نوضي نوضي
__________
مهند اتصل بي العارف
العارف شبحله :شني
مهند اشرله بي معنى ادوي
العارف:اصبر الصبر حلوو وكمل هدرزة مع خوت ابراهيم وقعد يهدرز لين ناضو كلهم روحو
العارف:شن صار في عرس اختك امتى
ابراهيم:والله ماني عارف مرات مع شموس اصلا هي ماتبيش شي وولد خالتي بيسكن معاها هني
العارف :باهي امالا عندي موضوع بندوي فيه معاك
مهند ناض طلع هوا ومهاب
والعارف فتح الموضوع لي ابراهيم
ابراهيم قلبه نخصه وقعد ساكت
العارف:ها شني قلت
ابراهيم تنهد :ماكنتش موتي روحي للموضوع هدا بكل
العارف:علاش خيرك
ابراهيم:مزال نحس فيها صغيرة ديمة انحس فيها ماتقدرش تقعد بلاي ماتعرفش ادير شي بلاي كيف بنعطيها كيف
العارف :هادي سنة الحياة ماتوقفش في نصيب بنتك
ابراهيم:خلي انشاورها وانرد عليك اني ماعنديش مشكلة مع مهند خيرت الناس
العارف:خلاص شاورها ورد عليا
__________
الساعة 12:00
خشو البنات للحوش
خشت شموس طول لي دارهم وتارا مشت لي بوها
تارا :بابا ليااا من الصبح مااشفتكش استاحشتك وقعمزت جنبه وحضناته
ابراهيم: تعودي تستااحشيني تواا
تارا:علاش 😕
ابراهيم:كبرتي توا بيااخدك راجل
تارا:لا اني نبي نقعد معاك .
ابراهيم:باهي كان قتلك في واحد جي خطبك شن اتقولي
تارا بلعت ريقها : مم من هوا
ابراهيم:مهند ولد اخت العارف
تارا :اااه ؟
ابراهيم:شن رايك في الموضوع
تارا:اا اني مش عارفة انت قول
ابراهيم :كان يفهم في تارا من عيونها وعرفها تبيه ومش عارفة كيف اتقول لي بوها عيونه دمعو ونزلت منه دمعه وزاد حضنها بلقوة :كيف بتعطيك ياابنتي كيف
تارا بكت طول :لاا بابا بالله عليك ماتبكيش اني ماانبي شي مانبي حد خليني جنبك بس
جت شموس :خييركم ؟ بابا خيرك وجت قعمزت جنبه خيييرك
ابراهيم حضنها حتى هي
_______
في سنة 2019 يعني فاتو سنتين ونص
الساعة11:00
درس مهند سيارته ونزل فتح الباب لي تارا خدي منها تميم كان راقد وشدلها ايدها باش نزلت
تارا طبست وحولت الكعب :ااااه ووعليا عييت
مهند :بشوية راهي تخش فيك حاجة
درس اشرف ونزلت شموس هي وياه
واشرف شاد بنته شمس وشموس قايمة عبايتها وتمشي بسيف
تارا: شادة في مهند وتمشي بشوية
شموس:حولي اني بنركب جري لاني كان ماوصلتش توا للشقة بنعيط
تارا ضحكت وحولتلها وشموس ركبت تجري
مهند:راجي خلي يركب الاستاد اشرف
اشرف:ريتوها كيف تجري هاربة مني
تارا:خيركم وانتو ديمة هاربين من بعض
اشرف:قتلها ماتبدليش في المزين وهي صكرت راسها
وركب وراها يجري
مهند:راك اطيح البنت
تارا ضحكت وشدت في مهند تاني وركبو بشوية عليهم لين وضلو لي شقتهم وفتح مهند الباب وخشو
تارا حولت عبايتها وخشت طول خدت تليفونها اتصلت بي بوها تسال فيه تعشى ولا لا وشن يدير وصكرت
مهند:تارا تعالي تميم ناض
تارا:هي جيت جيت
مهند:وصل مهاب زعما للفندق ولا لا
تارا :اكيد وصلو طالعين قبلنا
مهند:والله باهي اللي اتزوج هوا كان ماخداهاش راهو خلاها في الرقبة
تارا :عطلو هلباا لاكن
غيرت لي ولدها حوايجه وجت وقفت علي المراية تمسح في وجهها
مهند جي وراها وحضنها ويشبحلها من المراية :توتو
تارا :نعم حبيبي
مهند :نحبك
تارا ضحكت:حتى اني نحبك
مهند ضحك :تارا
تارا :ها😂
مهند:نحبك
تارا:مبردك 😂
مهند حضنها ويضحك
تارا تلفتت و شدتله وجهه :امشي غير حوايجك وحط تميم في سريره
مهند :حاضر وبعد مانحط تميم في سريره انحطك انتي باهي
تارا :برا امشي 😂
__________
شموس مصكرة علي روحها الدار
اشرف :افتحي قلت
شموس:لا لا والله ملقيت من يروح بيا وانت ماجيتنيش هدا علاش بدلت غادي شن تبيني نمشي للصالة بتوتة واني بنت خالت العروسة
اشرف:باهي افتحي تو حسستيني ان بنضربك مثلا ماهو انتي اللي ديمة تهبكي فيا
شموس:وشني لما نضربك تسكت ماهو اتنوض اتردلي فيها
اشرف:بالك بنسكتلك افتحي
شموس:فتحت وهي خايفة بنتي وين
اشرف:راقدة يااا قلبي راقدة معقولة الحمال هدا كله ومصكرة عليا الباب
شموس ضحكت:مني كان يعيط ورا الباب 😏
اشرف باسها :مش عارف جاارنا ممكن
شموس ضحكت : باهي حول انغير حوايجي قبل
اشرف:تؤ تؤ لا لا تعالي معاي قبل
شموس:اشرررف
_______
صفاء واقفة في الجنان قدام المرسم وعطت لي بهاء ولده ليث ومدتله صاكوه
صفاء:اسمع كان ناض اعطيه رضعة وخلاص راه خير مايفددك
بهاء:تي حني ماصدقنا نساها مدوريشي خلاص تو نعرف كيف نسكته المهم حرارته ماترتفعش تاني
صفاء:لا انشاء الله لا توا عطيته شروبو اصلا مش حينوض لان الشروبو فيه منوم اني نسيت
بهاء:خلاص مدوريشي اصلا امي كلمتني وقالتلي بيروح بيها راجل ماجدة
صفاء:عاد هيا تحب ليث اكتر منك انت 😂
بهاء:تي قريب هبلت قتلي كيف الولد مريض وماحدش يقولي
صفاء :ياناري تو اكيد بيتعبها
بهاء:لا لا مدوري شي اني معاها بري انتي خلاص
صفاء:صحيت حبيبي اني الصبح انجي طول ناخده
بهاء باسها من خدها:بري يااعمري اركبي متخليش امك بروحها هي تصبحي علي خير
صفاء: تلاقي الخير
روح بهاء للحوش وهوا شاد ولده غيرله حوايجه ورقده جنبه وقعد كل شوية ينوض يساويه ويغطيه لين خشت امه وخداته جنبها وقعدت للصبح فايقة علي خاطره خايفة حرارته ترتفع وهي راقدة
وبهاء قعد ماشي جاي عليها
_________
اما مهاب فكان اسعد يوم في حياته بعد علاقة سنين مع منتهى وستلاف عركة وستين مرة سيبو بعض واخيرا خداها وبدت مرته
_______
ابراهيم كان مقرر انه مستحيل تخش مرا لي حياته وقعد ساكن بروحه في حوشه فوق وبناته مدايرين له يوم بي يوم كل مرة وحدة اتجيه ومهند واشرف كانو مش معارضين الفكرة بكل
وكانت هدية هي وولد خالتها ساكنين في الحوش لوطة وكل يوم تبعتله في غداه وعشاه
_______
ابرار بنت جلال تغير 180درجة بدت شادة قرايتها وتمشي تقرا في الجامع وتلبس في ملاية شرعية ولا اليوم بوها ماقاللهاش علي ولا حاجة كان يربي في صغاره صح بس
وخوها الكبير يخدم ويساعد في بوه في الصرف
وهي تعلمت اطيب كل شي واتروح من المدرسة ادير الغدي وتمشي للجامع وجلال كان فرحان هلبا بلانجاز اللي مدايره ان عرف ربي يصح ويدمة يدعي لي ربي ان صغاره ميكونوش زي امهم
______
نوح مرتاحش بكل ولا شاف الراحة من اول يوم روح فيه وكان من مشكلة لا التانية وولده كل يوم والتاني شادينه بعملة يوم خانب ويوم ضارب وكل مرة مصيبة من غير مشاكل انساوينه الزوز
______
وبعد فترة مهند واشرف قررو ان يبيعو شققهم ويشرو حياش نوح وجلال لاكن بيغيرولهم فصالتهم وكل شي من داخل يعني صيانة تمامة
وابراهيم فرح هلباا بلخبر ان بناته بيرجعو جنبه تاني
______
#النهاية ♥️🥀
#زينوفوبيا🥀
#hemo 🍓
✏بقلم هيموtk📚