#زينوفوبيا🥀
🔥الحلقة الاولى 1🔥
♥ħ㉫๓✿♥
_______________
سنة 2001
في ليلة مضلمة مافيهاش ضي قمر الدنيا سحاب والمطر تصب وبرق ورعد كان مشهد كأنه في فيلم رعب
كانت مريم مقعمزة علي الطالة وقدامها عرم ورق وملفات قضاية وحاطة جنبها فانوس
مريم حولت النضارة وحطت ايديها علي عيونها من التعب وتواني ورجعت لبستها وهي تشبح للورق فاتو ساعات وهي علي نفس الحالة لين فجأءة نااضت وقفت
مريم في ايدها ورقة :لا لا مستحيل يكون هواا مستحيل وحطت ايدها علي رااسها يااربي الادلة كلها عليه كيف بندير كييف
ومشت شدة الارضي وقامت السماعة حطتها علي ودها
مريم:ماافيش حراارة كيف بنديير كيف ابراهيم لااازم يعرف
طلعت بنتها تارا من الدار كان عمرها 5سنين
تارا تحك في عيونها وتبكي :مااماا اني خاايفة
وسمعت صوت الرعد عيطت
مريم قامتها :خلاص حبيبتي خلاااص
تارا:علاش ضلام
مريم:الضي هارب حبيبتي ماهو برا في عااصفة
ولع الضي فوقهم
مريم:اييي اهو الضي جي هي تعالي انحطك في فراشك هي
تارا:خلي الضي واالع باهي
مريم:متخافيش ياماما اهي شموس اختك جنبك متخافيش وحطتها في سريرها وغطتها وخلت السهارة جنبها مفتووحة وطلعت ومشت تجري لي الصالون شدت الارضي وقعدة تحاول لين شد الخط واتصلت بي ابراهيم راجلها
مريم:الوو ابراهيم كيف حالك
ابراهيم :اها مريم شن اخباركم وكيف حال البنات خيرا ماحصلتكمش اليوم
مريم:عاصفة والضي هارب كيف جي...اءء اسمع في موضوع مهم لازم نتكلمو فيه ضروري امتى جااي انت
ابراهيم:مرات الفجر نطلع من هني نوصل الظهر بأدن الله ... خيرك شن في
مريم:موضوع بخصوص القضية لازم اتجي بسرعة مايندواش في التليفون
ابراهيم: انشاء الله تكوني عرفتيه من هوا لان اليوم جي بلاغ ان في مرا تانية انقتلت بنفس الطريقة امس في الليل
مريم انصدمت:لاا هدا تماادا هلبااا ولازم نوقفوه عند حده لاتوا قاتل اربعة لاسبااب مجهولة
ابراهيم:اني اللي حارقني ومخليني مهتم بلقضية هادي العارف مسكين اخته راجلها متوفي وعندها ولد بس وتوا انقتلت هي وهوا قعد عنده الولد تيتم مسكين والعارف بيهبل علي اخته
مريم:انت غير تعاالا بس وانشاء الله انحلو المواضيع كلها اني شبه عرفته من هوا
ابراهيم:تمام اني بنحاول نطلع توا
مريم:لا لا لا الدنيا عاصفة اصبر لين يأدن الفجر علي الاقل الدنيا ضي
ابراهيم:باهي حاااضر ردي بالك علي رووحك وعلي البناات
مريم:حاضر وحتى انت رد باالك علي روحك توصل بسلامة
صكرة التليفون وناضت قعمزت قدام الورق وخدة ملف كتبت عليه
المتهم رقم 1 (......) وكتبت اسمه
وفتحت الملف وحطت فيه الورااقي اللي فيهم معلومات المتهم
طلعت تارا من الدار تاني:ماااماا
مريم:خيرك يا توتو شن في تاني
تارا:اني خايفة مقدرتش نرقد
مريم :باهي تعالي خليك بحداي وتفرجي عليا لين يجيك النوم
جت تارا جنب امها وهي شادة بمبلتها :ماما
مريم بملل حطت القلم :نعم يا ماما
تارا:علاش بمبلتي ماتوقفش وقفيها
مريم:كيف
تارا:لما انشد فيها اطيح القدام
مريم خدتها منها وخدت ورقة غليضة طبقتها وحطتهالها في القفطان متع البمبلة من القدام
تارا ضحكت:اييييي وقفت باست امها باهي ماما اني جعانة
مريم ضحكت:يحليلي منك ياا تارا لا ترقدي لا تخلي من يرتاح وناضت مشت للكوجينة
تارا قعدة تشبح للورق اللي قدامها وقامت ورقة من الملف اللي قدامها وطبقتها وحطتها في قفطان البمبلة من تاالي وهي تشبح لي بمبلتها بي برااءة وتضحك
جت امها حطت قدامها صفرة وقعمزت تكمل في خدمتها وماركزتش في الورقة اللي نقصت من ملف المتهم رقم واحد
____________
♥ħ㉫๓✿♥
<...>
في مكان تاني
هوا:الوو
هي توشوش :ايوااا انت وين
هوا:في الجنان شن في
هي :سمعت ان مريم فاتحة ملف قضية سري وتحقق فيه والملف هدا علي النساوين الاربعة اللي ماتو بنفس الطريقة
هوا انصدم :شن اتقولي انتي كيف هكي كييف شن بندير توا كيف مسمعتش
هي :قتلك سري
هوا:وانتي كيف عرفتي مدامه سري
هي :بنت عمي محامية تخدم معاها في نفس المكتب وقتلها افتحي الملف شوفي علي من تتحرى وطلع اسمك بينا تهم
هوا تعفلق وضرب رجله في الوطى بلقوة :تماام ماشي ماشي
هي:شن بدير
هوا:مع انه صعب عليا لاكن بنقتلها شن بندير يعني
هي شهقت:كيف بتقتلها كيف شني انسيت ان...
هوا:اسكتيييي اسكتييي متزيديهاش علياا عارف لاكن مافيش حل تاني
هي :باهي رد بالك تنشد
هوا صكر الخط وقعمز علي الكرسي وولع سبسي وهوا متوتر ومش عارف كيف يتصرف
_____________
♥ħ㉫๓✿♥
<...>
مريم:تارا ماما الوقت تأخر بري لي دارك وارقدي امشي هي باش اتنوضي تلقي بابا هني باهي
تارا:لا اني نبي نقعد معاك
مريم نفخت وشبحت للورق بحزن :انشاء الله نطلع غالطة وماتكونش انت يااربي
فاتت نص ساعة تانية وتارا شي ولا قالت نرقد ناضت مريم وقفت وكيف بتلم الورق سمعت صوت باب الحوش كأنه انفتح وتصكر تاني
مريم قربت من باب الصالة اللي مقعمزة فيها:ابراهيم؟!؟!؟
.....
.....
....
معش سمعت صوت قربت من الممر انطفي الضي وسمعت صوت مشي يقرب منها
ولت تجري للدار
تارا:ماما هرب الضي تاني
مريم شدت تارا وحطتها تحت الصالون:مهماااا صاار ماطتلعييش من هني بكل لين اني انطلعك بااهي ماتتحركيش وماتتكلكيش
تارا :به
مريم ولعت الفانوس وهي ترعش ومش فاهمة شي
خش واحد لي الدار وهوا يمشي بيبطء ووجهه مغطي وقف في العتبة وقعد يشبح لي مريم
مريم بصوت عالي :منيي انت شن تبييي
هوا :حول اللتام بدون ملامح
مريم عيونها دمعوو:انت صح؟!؟! انت اللي قتلتهم ولا 🥺
هوا:غصبن عني
مريم:مافيش حاجة اسمها عصبن عني علااش شني السبب اللي خلاك تقتل حرام عليك ضيعت رووحك
هوا:اشششش اسكتي ماليكش علاقة انضيع رووحي ولا لا
مريم عيونها دموع :بتقتلني حتى اني ولا ؟
هوا ساكت
مريم:خديجة اخت العارف علاش قتلتها وهي مرا علي حالها حتى خلطة بناس ماعندهاش ولدها تيتم والمرا اللي ماتت اليوم بنفس الطريقة علاش قتلتها
هوا قعمز علي الصالون :بما انك حتى انتي حتموتي فخلي نحكيلك القصة
مريم واقفة تشبحله وتبيه يتكلم باش تارا تسمع
هوا:اني و(....) علي علاقة مع بعض نتلاقو ديمة لما تطلع من حوشها لي اي سبب والعيل اللي في بطنها توا مني اني مش من راجلها
مريم رجليها فشلو معش قدرت تووقف قعمزت علي الكرسي طوول وشدة راسها :كييف كييف شن اتقول انت م مم. قعدة تشبحله وسكتت كمل كمل
هوا:في يوم كانت ماشية لي لمة جيرانا اللي مقاابلين وكنت متفق اني وياها بنتلاقو وزي ماتعرفي اني عندي تليفون متع العمل كلمتني عليه بلارضي وقالت اسمي في التليفون وقالت امتى بتطلع وتكلمنا علي اللي في بطنها ولما صكرت الخط عرفت ان خديجة كانت تسمع فيها
مريم:وانت ملقيتش حل غير ان تقتلها حرام عليك خلت ولد عمره 12السنة مع خاله ملوح
هوا:حتى انتي بتخلي زوز بنات
مريم مسحت دموعها:ربك في الوجود حتى لو قتلت نص العالم علي خاطر الموضوع هدا مافيش وين بتهرب من ربي
هوا ساكت
مريم :والتلاتة التانين كيف ماتو
هوا:ماليهمش علاقة ببعض يعني زي اللي قتلتها اليوم نقزنا في حوشها اني وجماعتي بنخنبو دهبها شافتنا
ووالزوز التاانين اللي ماتو مع بعض هدوكة كانو طالعين بسيارة في الليل انشركت بيهم العجلة جو لي حوازة السيد جارنا وشافوني كيف ندفن في الدهب اللي خنبته مشي مشو في القص
مريم:انت مريض نفسي انت بديت مدمن دم
هوا ضحك: وتوا دوورك انتي
مريم ممكن نطلب طلب قبل مانموت
هوا ناض وقف :واسطات يعني علي خااطر ولد عمك اطلبي هي والله عاجبتيني من زمان لاكن سبقني ابراهيم وقعدة هكي
مريم:اندير عليا الوضوء بس 🥺
هوا بلع ريقه: باهي بري هي
خشت للحمام بسرعة توضت وطلعت وهي تبكي بلعبرة
هوا بكل دم بااارد: متخاافيش مش حنخليك تتعدبي بنقطع قطع وطلع الموس من جييبه جت لي صاالحي ان رااجلك المصون مهنااش كانهدا راهو مقدرتش نتصرف
مريم الدموع ينزلوو وتشاهد في داخلها وماتسمعش في شي من اللي يقول فيه دعت اخر دعوة بس ان يطلع من غير ميشووف تارا وماينتبهش للملف اللي وراه
فجأءة معش حست بيشي غير موس يخترق في رقبتها والدنيا اضلمت قدامها
هوا وقف وهوا يصب عرق طلع الموس من رقبتها مسحق في حواايجها
وتارا شافت امها كيف طاحت وكيف طلع الموس من رقبتها ومن الصدمة معش قادرة حتى تعيط الخوف اللي دااخلها يااكل فيها وقلبها بيوقف ايديها وراسها كانو عرق وبطنها توجع فيها وتحس في روحها بترجع لاكن للاسف ماشفتش شكل الراجل اللي قتل امها
تلفت شاف لي الطااولة وطبس قام الملف و
خدي الورق اللي كان علي الطااولة كله داره في شكارة وطلع يجري مشي للحوازة حرقه
طلعت تارا من تحت الصالون والبمبلة في ايدها رقدة في حضن امها وهي ترعش زي الفراارة وتبكي
اختها شموس كانت اكبر منها بي سنتين يعني عمرها 7 سنين
طلعت من الدار وهي تحك في عيونها :مااماا وينك! ماما ؟؟! وطلعت لي الصالة وقعدة وااقفة تشبح لي امها تواني وفااقت علي رووحها
شموس :مااااااااامااااااا 😧 وطبست عليها ماما ردي عليااا ياا ماما خيره فيك دم خييرك ردي علياا يا ماما لااا متمووتييش لاااا 😭😭
تارا كانت ساكتة ودموعها ينزلووو خط واحد وماتبيش تطلق امها
مشت شمووش فتحت البااب وطلعت تجري نزلت في الجنان وهما كان مدخلهم وجناان حوشهم وراحوش جدهم والحوش مبني فوق المربوعة مش فوق الحوش
طلعت تجري وهي حفياانة و تقربع علي باب حوش جدها
كانو فيه عماتها الكبار الزوز وجدها وحناها متوفين
فتحتلها عمتها هادية :بسم الله خيرك يا بنتي خيرك شن في
شموس :ماما ياااعمتي تعاالي بسرعة فووفيها تعالي 😭
جت عمتها التانية هدية: يااسااتر استر ياربي شن في خيرها امك
شموس :فيها دم في رقبتها وطاايحة لوطة تعالي شووفيها بالله عليك
طلعو عماتها الزوز يتجارو وركبو معاها لي حوشهم وعرفو ان مريم انقتلت قتل مابوش يمسو شي نزلو البنات لوطة نادو علي خوتهم الولاد الزوز واتصلو بي الشرطة
ومريم كانت متزوجة ولد عمها واماليها يسكنو جنبهم سمعو وجو حتى هما كانو عندها زوز خوات وخو واحد صغير موالد 89 اسمه بهاء
الساعة 9:00 الصبح
ابراهيم واقف وواضح التعب والحزن علي وجهه كان واقف بسيف
جي من وراه الشرطي
الشرطي :حضرة الضابط المكان مافيشي اي بصامات او اي دليل ضد القاتل
ابراهيم:يعني الدليل الوحيد طريقة القتل
الشرطي :هدا هوا الدليل الوحيد
ابراهيم :وراق القضية مختفيات هدا دليل تاني لانها امس كلمتني وقالت ان عرفت من هوا القاتل يعني اكيد عنده حد يوصله في معلومات باش عرف معلومة سرية زي هادي
الشرطي :اني ماشي توا لي الطبيب الشرعي بناخد النتأيج
ابراهيم :جيبهملي انشوفهم
جي جلال ولد عم ابراهيم خش للحوش
جلال حضن ابراهيم:ابرااهيم عضم الله اجركم يا خوي ربي يتقبلها برحمة
ابراهيم غمض عيونه بتعب :اجرنا واجرك
جلال شبحله:كيف صاار مني اللي قتلها اني كيف روحت من العمل كنت مناوب ولقيت الزحمة وشرطة
ابراهيم : مزال مش معروف مني اللي قتلها لاكن في الاكيد نفسه اللي قتل اللي قبلها لان نفس طريقة القتل
جلال خاف : معش ينقعد فيها المنطقة يا ولد عمي
ابراهيم تنهد :هدا حال الدنيا
جلال:اني كنت ماشي اليوم لاكن بنراجي لين يتم العزي وبنمشي
ابراهيم:وين
جلال:بنطلع من طرابلس العمل بيحولوني لي الشرق
ابراهيم:غاادي بعيد علي اماليك يا جلال
جلال:انت قلتها قبل شوية هدا حال الدنيا
ابراهيم سكت وقعد يشبحله
جلال:هي اني خلي ننزل وانت كمل خدمتك
___________
في حوش ام مريم كانت الناس عندهم جاايين يعزو فيهم وتارا شادة بمبلتها وشادة في شموس اختها ومقعمزة وساكتة وشموس كانت شادتها وتبكي
فتحية حناهم كانت مقعمزة تبكي شبحت بنتها فوزية خطمت من قدامها
فتحية:ياا فوزية تعاالي ياافوزية
فوزية:نعم يماا خيرك
فتحية:بنات اختك وين متهلوهمش بروحهم
فوزية طبست علي امها:الكبيرة تبكي وكاتبي تاكل شي لاكن الصغيرة اشبح خيرها رايحة صفرة مصقعة وجامدة في مكاانها من امش ماقالتش بغ خايفة اتكون شافت امها كيف انقتلت
فتحية مسحت دموعها :نوضيني خلي انشوفها نوضيني
نوضت فوزية امها وخشت هي وياها داخل
فتحية:بنياتي خيركم ماكليتو شي خيركم تبو امكم تحرج ولا كيف
شموس:اني نبي ماما مانبي شي تااني مانبيش نااكل
فوزية حضنت بنت اختها وقعدة تبكي معااها
فتحية:حطت ايدها علي خد تارا:هييي خييرها البنت مصقعة بالك مش لابسة بااهي
تارا دفتلها ايدها وزادة شدة في اختها بلقوة وغمضت عيونها
فتحية:قولي يا شموش اختك وين كانت لما شفتي امك طايحة
شموس:اني نضت من النوم علي صوت بكااها لقيتها راقدة في حضن ماما وتبكي
فتحية:غباارة سودة مش بعيد شافت امها كيف انقتلت البنت قاعدة فيها الخلعة وبالعتها امشي يا فوزية نادي علي بوها توا مش معقولة تقعد هكي البنت تو تركبها مصيبة
طلعت فوزية من الدار وخشت سماح مرت جلال وبطنها قدامها
سماح:خيرهم البنيات يا عمتي فتحية
فتحية : البنية الصغيرة مش عاجبتني فيها حاجة ابقولي شافت امها
سماح :حيي زعمك اوووه وكيف عرفتوها
فتحية:البنت متلجة ومخلوعة واضح عليها وماتبي حد كان اختها
جي واحد من الصغار نادا علي سماح وطلع يجري
والنساوين خاشين طالعين يشبحو في بنات مريم وواجعينهم
فوزية:يماا اهو ابراهيم برا جيبي البنت هي
فتحية :شموش بنيتي ارفعي اختك لي بوك اني ماتبينيش انمسها
تارا شادة بكل قوتها في اختها ومغمضة عيونها وترعش
وماتبيش حد يمسها
ناضت شموس شدة اختها من ايدها وطلعتوهي وياها
قامت القيطون وطلعت
ابراهيم شاف بناته طبس طول وحضنهم وقعد يبكي
وقعد هكي دقاايق وبعدين وخر
ابراهيم:خيرها اختك يا شموس
شموس مسحت دموعها :مش عارفة لاكن اميمة وخالتي قالو شافت ماما كيف انقتلت
ابراهيم :معش اتقولي هكي يابنتي امك ماحدش قتلها هادي ساعتها وماتت باهي ... واي حد يقولك اي حاجة دااخل متصدقيشي اسمعي كلام بابا بس
شموس هزت رااسها
ابراهيم :خلاص انتي بري خشي وخلي اختك معاي تو انجيبها
مشت شموس خشت
ابراهيم قام تارا ومشي بيها
تارا شدت في بوها بلقوة غطست رااسها فيه معش بت تقيمه
ركب ابراهيم في السيارة وصكر الباب: بنتي حبيبتي اشبحيلي اني معااك متخاافيش هي ماافي شي قيمي رااسك
تاارا بدت تبكي بصوت عالي
ابراهيم سكت وخلاها تبكي برااحتها وقعد يبكي حتى هوا لين فاتو ربع ساعة
ابراهيم يشبح لي بنته ويمسحلها علي شعرها :قوليلي توا شن شفتي امس في الليل مني اللي جي وضرب ماما قولي ؟
تارا تشبح لي بوها بخوف وسااكتة
ابراهيم :ادوي يا بابا متخافيش امي معاك قوليلي من اللي جاكم امس شن شفتي شن سمعتي
تارا ساكتة
ابراهيم :خيرك ماتبيش تدوي معاي ؟؟اني بابا متخافيش قولي شن صار وشن شفتي
تارا اللي صار كله يتعاود في راسها كأنه مسجل ومش قادرة اطلع صوت امها والراجل من راسها غمضت عيونها بلقوة وايديها عرق ويرعشو ووجها اصفر
ابراهيم خاف علي بنته وحضنها :خلاص يابنتي خلاص متقولي شي خلاص
تاارا قعدة حاضنة بوها وتبكي لين خداها النوم
_______
بعد اسبوع
في حوش امالي مريم وين مافي العزي
سماح مرت جلال مقعمزة وبطنها قداامها تهدرز علي سلفتها جميلة
سماح:سمعتي بي ينت مريم الصغيرة تارا
جميلة:لا لا خيرها
سماح:قالو من يوم ماتت امها معش فتحت فمها بحرف شورها حضرت امها كيف انقتلت
جميلة:لا لااا ياانااري وين كان مدسووس هدا كله
سماح :اي ماتبيش من يمسها ولا يكلها ولا يقربها غير اختها وبوها وعمتها هدية امبارح بس خلتها تشدها وترقدها
جميلة:والله وجعتني البنية وهي زي الغزاالة
سماح :الله غالب
جميلة:شني انتي امتى شهرك
سماح:كيف خسيت الخامس مزاال
جميلة:باهي علي خير ... ووين ناوية تجيبي في نفس مستشفة متع ولدك الاول
سماح:لا لا العمل متع جلال حولوه لي الشرق بنمشو غادي غير كنا انراجو في العزي يتم بس
جميلة حطت ايدها علي بطنها :باهي ربي يسهللكم
سماح :وانتي في اما شهر توا حسيتك منفخة
جميلة:اني في السابع
سماح:باهي انشاء الله في خلاصك
جميلة :سلمك
..........
فاتو ايام وفات اسبوع وتنين
ومزال التحقيق في قضنية مريم والنساوين الخمسة مستمرة
ابراهيم مخلي بناته الزوز مع عماتهم وهوا مش فاضي يحك راسه ميشوفش فيهم الا في الليل
سيب حوشه اللي ماتت فيه مرته ويبني في واحد تاني فوق اماليه والحياش الزوز فاصل بينهم حيط يعني يقدر يحلهم علي بعض
___________
في حوش نوح ولد عم ابراهيم وخو جلال
جميلة امبطبسة علي الغسالة واطلع في الحوايج
طلعت تيشرت لي نوح لونه بيج شدتله كمه ونفخت :وااااك معش بت تتحول التلبيزة هادي من شني زعمة وطلعت لي وسط الحوش نوح؟؟
نوح وهوا يتفرج علي التلفزيون :هاا شني
جميلة:شني تلبيزة الدم هادي اللي في تيشرتك ليها قريب شهر واني واجعني التيشرت قلت مش ملوحااته لاكن علي ما حاولت معاه مابتش تتحول شني انلوحه ؟؟
نوح شبحلها :هدا تلبز يوم اللي صلحت سيارتي جرحني التل لوحيها وخلاص مدامه ماباش يتحول
جميلة ولت للحمام وحطت التيشرت علي جنب وطلعت تنشر في الحوايج في الجنان
__________
سماح كانت واقفة في الكوجينة واتطيب في الشاهي لي جلال
جلال :سماح؟!؟
سماح:ايوااا
جلال:البدلة متع العمل الصيفية وينها
سماح:شن بدير بيها الدنيا صقع
جلاال :تي هااتيها شن دخلك
سماح مشت لي الدار وطلعت الشنطة من ورا البااب وفتحتها
طلع جلال البدلة متااعه ويفتشلها في جيووبها
سماح:حي في حواايج هني واني نسحاب الشنطة فيها البدلة بس وقعدت اطلع فيهم وحدة من السواري طاحت منها طبست قامتها
سماح بأستغراب :جلاال!!
جلال عيونه في البدلة ويفتش فيها :هااا
سماح:سوريتك كمها ملبز دم وجاف شكله ليه هلبا خيرك ماقتليش عليه اني هدا وين ريتها
جلال شبحلها:وينه الدم ؟؟
سماح وراته السورية:اهواا
جلال:مش عاارف اشبح شن نايش ولا شن جاارحني معش نتفكر اصلا هوا شوية مش هلبا لوحيها وخلاص كان متحولش
سماح فضت الشنطة وردتها في مكانها
وجلال قاعد قالب الدنيا ويدور في التصريح متااعه اللي مريحه
_______________
♥ħ㉫๓✿♥
<...>
شموس مواليد 94 كانت لونها قمحية يعني مايلة للاسمرار شوية عيونها عسلياات وشعرها قهوي هافت يعني كانت اسم علي مسمة وشخصيتها تو تعرفوها مع الحلقات
تارا مواليد 96 معنى اسمها ضوء القمر سمتها مريم علي صاحبها مصرية ملامحها كانت بيضة زي امها وعيونها ملونات وحتتعرفو علي شخصيتها مع الحلقات
_________
في سنة 2016 🌷
يعني بعد 15السنة من قتل امهم 🌼
______
في مكان تاني وفي منطقة تانية
كان مهند مقعمز علي المكتب ومتكي علي الكرسي ويدخن
لابس سورية بيضة وسروال ساعقة ولابس سبتة علي ضهره اللي يحطو فيها في السلاح وفي سلاح تاني علي خصرة
مهاب :انت متأكد ان هوا اللي مبلغ فيهم
مهند بصوت غليض ويخوف :تي هوااا اي لاكن باااعهم في نص الطريق لان عاارف روحه مرااقب
مهاب شاف لي ساعته وقام الكاب الاسود اللي جنبه علي الكرسي :تمام اني توا لازم نمشي عندي محكمة نتلاقو في الحوش
مهند :زينة
طلع مهاب وخش النائب طارق
ناض مهند وقف :احترامي سيدي
طارق قعمز :قعمز يا مهند قعمز
قعمز مهند وهوا يشبحله
طارق :مبروك قالولي اليوم شديت المهربين وربحت قضيتك
مهند:الله يبارك فيك هدا واجبي
طارق ابتسم :عندي ليك خبر ممكن يعجبك وممكن لا
مهند عدل تقعميزته:انشاء الله خير
طارق:طبعا في اجتماع غدوا حيتم ترقيتك فيه ونقلك لي المركز العام في طرابلس وحتشرف علي الضباط الجدد
مهند ضحك:وحدة وحدة عليا
طارق ابتسم :انت انساان مجتهد وطموح وتحب شغلك وعلي صغر سنك لاكن ترقيت علي هلبا ليهم سنين قبلك وماوصلولكش
مهند:الحمد الله بفضل ربي
طارق :اني كلمت خالك العارف وحكيتله وفرحلك هلباا تساهل كل خير
مهند ابتسم وساكت
طارق : بنسألك؟
مهند:تفضل
طارق : وصلني اليوم الملف الخاص بلقضاية المطالب بي اعادة فتحها ولقيت اسمك في وحد من الزراف لاكن مافتحتش الزرف شن في ؟
مهند :احمم ااي اني مطالب بي اعادة فتح قضيت امي الله يرحمها انت عارف انها انقتلت قتل ومعاها اربعة نساوين تانيات والقاتل قاعد حر لا اليوم ف لو سمحتلي نبي انعاود التحقيق في القضية
طارق سكت وهوا يشبح لي مهند
مهند: ها شني قلت
طارق:شوف يا مهند ماتعتبرنيش النائب طارق واني انكم فيك توا اعتبرني طارق صاحب خالك
مهند شبحله بأنتباه
طارق :انت عارف ان القضية هادي ليها اكتر من عشرة سنين
مهند :ليها 15السنة ووشهرين
طارق :تماام وخود اللي بنقولهولك بعين الاعتباار القااتل هدا مش سااهل في نفس السنة اللي اتوفت فيها امك توفت فيها مرت الضابط ابراهيم كان تعرفه صاحب خالك
مهند: اكيد المحامية مريم شعبان توفت في ضروف مجهولة في عمر الخمسة وتلاتين وتم اخفااء كل الاوراق والملفات الخاصة بلقضية في ليلة الحادثة
طارق ابتسم:قاري كويس
مهند:حافظ صم
طارق:اني بنفتحلك القضية من جديد مع اني عارف ان حيكون في قتلة جدد بسبب الشي هدا وعارف حيجوك مشاكل بسببه لاكن منقدرش نوقف في طريقك لان هدا حقك انك تعرف قاتل امك بس مع كل تقتي فيك حنقولك رد باالك كويس راهو الموضوع مش ساهل
مهند ناض وقف :وبادن االله حنكون عند ثقتك فيا ومش حنستسلم لين نعرف القاتل من هواا
__________
♥ħ㉫๓✿♥
<...>
______________
تاني يوم 🌹
الساعة10:30 الصبح🌼
شموس واقفة علي الغاز تقلي في دحي
ابراهيم خدي براد الشاهي من جنبها :هي حرقتيه الدحي جيبي بسرعة
شموس:باهي هي جييت وحطاته علي الطاولة وقعمزت
ابراهيم:تارا وين ؟
شموس:في المرسم
ابراهيم:فطرت ولا لا
شموس:منعرفش اني نضت ملقيتهاش بعتلها رسالة ردة عليا قتلي في المرسم
ابراهيم:شكلها قاعدة حرجانة من امس
شموس:تطربق مش تحرج بس معقولة تبيني نقعمزلها ساعتين باش ترسمني علي الشمس
ابراهيم:لاا اختك هادي ديمة انقولك ساايريها وضعها يختلف علي وضعك انتي بصحتك مشاء الله عليك
شموس:ماهو هدا اللي مطيح سعدي اني 😒
ابراهيم قام النص اللي في ايده وصب طاسة عصير وحطهم في الصفرة
شموس:وين ؟
ابراهيم:بنرفعهم لي اختك
شموس :اني ماشية لي حوش اميمة
ابراهيم:متعطليش روحي باش اديري معاي الغدي
شموس ضحكت:شني بدير اليوم حضرة الضابط
ابراهيم ضحك: جبت حوت من امس نضفته ودرته في الفريز بنديرو طاجين في الكوشة
شموس: اشييه اشييه
_________
طبعا المربوعة اللي كان باني فوقها ابراهيم داروها مرسم لي تارا
فتح ابراهيم الباب وخش
تارا كانت واقفة قدام لوحة وقايمة شعرها كودة وشاداته بريشة وايديها كلهم الوان
والمرسم كله معلقة لوحات هي راشمتهم
ابراهيم حط الصفرة ووقف جنبها : صباح الورد
تارا شبحتله وابتسمت
ابراهيم:خيرك نزلتي بكري حرجانة ولا شني
تارا هزت رااسها بمعنى لا
ابراهيم :احلفي انك مش حرجانة
تارا طلعت لساانها وحطت صبعها علي رقبتها
ابراهيم ضحك :شن ترسمي
تارا حطت ورقة وكتبت فيها :اليوم حلمت بي حاجة وبنرسمها
ابراهيم:باهي انشاء الله خير
تارا تلفتت وكملت رسم
ابراهيم: امتى امتحانك
تارا تلفتت تاني وكتبتله :الاسبوع الجاي
ابراهيم:نهائي ولا
تارا هزت راسها
ابراهيم:باهي هدا سيمستر ورتحتي منه
تارا ابتسمت
شرين تليفون ابراهيم : كوولي فطورك متخلييشي ااه
تارا هزت راسها وهي ترسم وقربت من تليفونها علت صوت الاغاني وكملت ترسم
___________
ابراهيم :اهلا اهلا يا عارف كيف حالك
العارف:الحمد الله بخير ونعمة والله كيف حالك انت وحال البنات
ابراهيم:الحمد الله تمام
العارف:شني مش مقرر ترجع تخدم رسمي اووه
ابراهيم:لا لا خليني هكي نمشي في المهمات الرسمية بس احسنلي منقدرش انخلي بناتي بروحهم
العارف:باهي اتزوج وخليها تهتم بلبنات وانت اخدم علي راسك
ابراهيم:والله صاعبة اولا اني مسترزنها وتاني شي انت عارف المشكلة اللي صارت لي تارا بنتي مانقدرش انخليها هي لي حوش جدها وتخش مرة في الشهر وبسيف
العارف:باهي ربي يعاونك ويكون معاك
ابراهيم:انشاء الله يارب
العارف:قتلك ياا ابراهيم !!
ابراهيم:نعم
العارف:متحصليش حوش هكي للايجار تبدا عارفه قنين وفي منطقة كويسة
ابراهيم:والله ماني عارف لاكن حاضر تو انشوفلك لي مني هوا
العارف:ليا اني ماهو درت انتقالة لي طراباس تاني وحتى مهند نقلوه هني
ابراهيم:ايااه باهي مليح بكل علي الاقل نربحو شوفتك
العارف ضحك:بنرد ايام الشباب امالا
ابراهيم :علاش لا
العارف:باهي باهي مانبيش انعطلك اكتر شوف ورد عليا
ابراهيم :باهي اسمع
العارف:نعم
ابراهيم:تسكن في حوشي الاول؟ مصينه ومأتت ومدخله بروحه جاي بعيد علي مدخل العيلة تخشله من الرئيسي طول ومنها نتونسو بيكم
العارف:والله ماني عارف شن انقول بالك خوتك ولا عمامك مايبوش
ابراهيم:تي شن ليهم علاقة هما وبعدين خوتي كل واحد ساكن في منطقة وفي تركينة بروحه وولاد عمي الزوز اللي شارين مننا قطعة وباانين فيها حياشهم فاضيات واحد في شرق ليه سنين والتاني بوه لما توفى بدي يقعد مع امه هلبا ويجي مرة مرة قاعد اني وخواتي تحتي وحوش عمي بس راه
العارف:انت غير شوف وشااورهم ورد علياا
ابراهيم:ياودي كان انت ماعندكش مشكلة تعالا من غدوا ماحدش عنده معاي كلمة الحوش حوشي واني عطيتهولك
العارف:ولد اصوول ياا ابراهيم من يوومك والله ماني عارف شن انقولك
ابراهيم:متقول شي جيب عويلتك وتعالا اسكن امتى ماتبي ومن اليوم الحوش حوشك
______________
خشت شموس لي حوش جدها امالي امها
شموس: توحااا وينك ؟؟
طلعت حناها فتحية من الكوجينة :شموش بنييتي جيتي
شموس: تي شموس ياا اميمة شمووووس بسيين
فتحية ضحكت: باهي اللي هوا هي تعالي افطري معاي
شموس:صحتين سبقتك وين بهااء
فتحية:قاعد رااقد امتى ينوض هوا زي الناافس
شموس مشت لي دار خالها وحلت الباب وخشت :بهااااااااااااااء
بهاء قام راصه وهوا مخلوع :خيرررررر @#$% خلعتييني الزح ولا حط راسه علي المخدة
شموس:نوووض رد علي الخاامرة متاااعك داارتلي القدااد من الصبح تتصل وتبعت في الرساايل
بهاء:فوتيها ركي امها في الحظر
شموس:باهي نوض عندي ليك خبر
بهاء:شن هوا
شموس:كلمت بابا علي سيارتك وقالي تو نرفعها للورشة اليوم العشية
بهاء نااض :كداابة
شموس :والله الله
بهاء:تي والله لا قدر ومااك عادية بااهي
شموس:احممم اي نعرف لاكن نبي مكاافئة
بهاء:شن تبي ؟
شموس:مش قتلك خاطري نركب علي الموطو
بهاء:لاااا
شموس:بالله عليك ف الليل ميشووفني حد لا راس الشارع وردني
بهاء:انفكر
شموس:هياا ياا دره مبردك
بهاء:احترمي نفسك ياابهيمة اني خاالك
شموس:تي بااهي بااه شن حالك 😒
بهاء:باهي خلاص تو انركبك لاكن لين يجبوهولي عند واحد صاحبي قاعد
شموس:بااه مليح
بهاء:هي اطلعي بنرقد
شموس:لااا كسااد نووض هدرز علياا وتعاالا معاي للحوش بابا بيدير حوت اليوم
بهاء:ايااه مليح بكل باه تو انجي
شموس:باهي نوض
___________
روح مهند للحوش درس سياارته ونزل
خش لقي مرت خاله في الكوجينة اطيب في الغدي و بنتها صفاء جنبها
مهند:السلام عليكم
ردو عليه السلام
مهند:خالي وين؟
صفاء:في دار التقعميز
مهند تلفت ومشاله
مهند:خاال
العارف شبحله وناض وقف وهوا مبتسم :مباارك مبااارك الترقية
مهند:الله يبارك فيك
العارف:قعمز قعمز
مهند قعمز :خالي نبي انكلمك في موضوع
العارف:خلي ندوي اني قبل
مهند سكت
العارف:طبعا اني درت انتقالة لي طرابلس وبنمشو كلنا مع بعض وصفاء بننقلها وراقيها في الجامعة غادي وكلمت ابراهيم صاحبي قتله يشوفلي حوش للايجار وبارك الله فيه قالي تعالو اسكنو في حوشي فاضي
مهند:لا لا كيف نسكنو عنده وهوا ساكن فوق امااليه عيب ميجييش وبعدين متقلقلوش روحكم علي خاطري وتسيب خوشك ورزقك وتأجر اني تو اندبر راسي
العارف:اني حاالف انك ماتطلعش من عندي الا وانت عريس لي حوشك طوول انت امانة من اختي مستحيل انخليك تمشي لي طرابلس برووحك رجلي علي رجلك
وحوش ابراهيم قالي مدخله برووحه جاي علي الرئيسي طول
مهند سكت
العارف:اني نمشي انشوفه قبل كان لقيته مناسب اللهم بارك وكان هدا اندورو حوش تاني
مهند:مش عارف مسترزنها
العارف:خلاص نمشو مع بعض نشوفوه
مهند:اني غدوا فاضي كان هدا نتوكلو الصبح
العارف:عادي نمشو مافيش مشكلة
مهند ناض وقف:تم خلاص الصبح انكلمك
ومشي خش لي دراه هوا ومهاب وغير حوايجه
خش مهاب:تي شني يابروو قالو رقووك
مهند قعمز علي السرير :رقووني اماالا شنوو 😏
مهاب:باهي وشن بتولي
مهند:نقلوني لي طرابلس وبنولي مسؤول علي الضباط الجدد اللي غادي
مهاب:اضرب هي وامتى بتمشي
مهند:مش عارف علي بوك امتى بينقوله اني حتى غدوا نمشي عادي
مهاب:قصدك حتى بوي بيمشي غادي معنااها حتى امي وصفاء
مهند:اكيد وحتى انت
مهاب:تي خيره بوي ماقاليش
مهند: حتى اني توا قالي لما خشيت برا كلمه
__________
في مكان تاني وفي منطقة تانية
ابرار: مش عارفة امتى بنمشو غادي لاكن علي الاغلب بعد اسبوعين
رمزي:باهي مليح حني بنمشو بعد غدوا بوي قال مش معطلين حناي بتشبح العيلة وبنولوو
ابرار:اني استااحشتك هلباا
رمزي:حتى اني الزفت طولنا الغيبة هلبا المرة هادي
ابرار :هانت خلااص
سماح:ابرااار ياا ابراار
ابرار:اسمع ماما تنادي تو انكلمك بعدين
رمزي:باهي بااي
ابرار صكرت وناضت :نعم ماما
سماح:تعالي تغدي
_______
رمزي مقعمز يتغدى:بوي
نوح:نعم
رمزي:امتى ماشين لي الحوازة
نوح:الاسبوع الجاي انشاء الله
رمزي:وحتى حوش عمي جااين
نوح:اني كلمت عمك لاكن مانعرفش يجي ولا لا
ماجد خوه :حتى ابرار امتحانات زيني اكيد لين تكمل
جميلة:اي اكيد ماهو انت بتكمل الاسبوع الجاي حتى هي معاك ومرات علي خواتها
نوح شرين تليفونه سيب غداه وناض
________
شموس كانت مع بوها في الكوجينة وبهاء معاهم
بهاء: هي وين اختك ناديها
ابراهيم:كلمتها تو اتجي
خشت تارا للحوش مشت طول للدار غيرت حوايجها ومشت لي الكوجينا لقت بهاء قعدة واقفة
بهاء:اسمعي من غير جو مش واكلك الزفت من يومي عايش معاكم في الحوش اكتر من حوش بوي وقاعدة كل متشوفيني ترعشي
تارا ضحكت وقدمت لي الصبورة اللي محطوطة في الكوجينة وكتبت:انخلعت مانحسابكش انت
بهاء:تو بالله عليك من بيجيكم
تارا قعمزت علي الكرسي
(طبعا كانت تتعامل مع الكل بلكتابة لان رفضت تتعلم لغة الصم وتعب معاها هلبا بوها لين تعلمت تكتب وكانت تقرا بطريقة خاصة بناس اللي عندهم التوحد مع انها مش مريضة توحد لاكن كان اقرب شي لي حالتها )
وابراهيم جي حط طاجين الحوت في النص وجنبه صونية السلاطة والرز وقعمز :في حاجة بنقولهالكم
شبحوله بأهتمام
ابراهيم:صاحبي العارف يدور في حوش يبي ينتقل لي طرابلس واني قتله تعالا واسكن في حوشي اللي فوق مرسم تارا
تارا شبحت لي بوها بصدمة
شموس:كيف اتقوللهم يجو وتاارا نسيتها
ابراهيم:الدكتور قال لازم تتعرف علي ناس جدد وتتخالط معاهم باش تقدر تتخطى المرض اللي عندها وبعدين العارف ماعنداش الا بنت وولد ومعاهم ولد اخته اللي امه توفت زمان
بهاء:كيف بيسكنو ولاد منعرفوهمش وفي حوش الحيط في الحيط معاك وانت عندك بنات
ابراهيم:تشبح فيهم ولاده واحد ضابط وواحد محاامي يعني اني بنأمنهم علي بناتي
تارا فتحت تليفونها وكتبت :اني مش حنتحمل ووجود ناس اكتر منعرفهمش انت عارف ان مش بي ايدي الشي هدا
ابراهيم :يابنتي اني نبي مصلحتك والدكتور قال هدا الحل الوحيد للعلاج انك تغصبي علي نفسك وتتعرفي علي ناس جدد
تارا قعدة تشبحله واشرت علي صونيتها بتعفليق
ابراهيم حطلها حوتة :كولي كولي اني متأكد انك حتتعالجي بطريقة هادي تو اتشوفي
بهاء :وامتى جااين
ابراهيم :مش عارف ماقاليش
بهاء:انشاء بنته طرف بس
شموس نخصااته :ضمه فمك🙂
ابراهيم:حي عليك نلقااك جاي جيهتهم ولا مكلم البنت ااهو انت توا كنت خاايف علي بنات اختك خاف عليها حتى هي
بهاء:انبصرو يا باشا خيرك تي صبلي نااكل صب
ابراهيم:اني قتلك
شموس:تحب تتهزب مش عارفة علاش
بهاء:بيجيك كف انتي رااه
شموس:😒😒
__________________
#يتبع 🌹
راايكم علي الحلقة بلا ملصقاات ❤
ومن تتوقعو القاتل؟ جلال؟؟ولا نوح؟؟ ولا شخص تاني بكل؟؟
#hèmø🍓
✏بقلم hèmøtk📚