دراويش

دراويش ٥٣

#دراويش
بقلم #روز_الفياض
ح٥٣
.
.
.

‏يبدأ الحب من اللحظة التي تخشى فيها أن تُحبّه.❤️
.
.
.
( آمنة )
جنت احس بكل اعراض الحمل لكن اجذب نفسي .. اذكر نفسي كل شوية ( آمنة انت عاقر ) سنين جنتي متزوجة كريم ومصار عندج اطفال بينما كريم قبلج عنده سيف وبعدج عنده تلاثه من ضحى قابل من تالي تطلعين حامل !!
ارجع احاجي نفسي يجوز ... عسى ولعل ... مجان اكو سبب يمنع الحمل عندي بس مشيئة الله .. يجوز هسه الله اراد ..

وارجع انفض هالامل من راسي واكول عاقر .. ماله داعي تعيشين نفسج بوهم وتتأملين وبعدين تنصدمين .. والاهم ماله داعي تخلين فؤاد يتأمل وياج ..
شلون لو باجر راد اطفال ؟؟
شلون تتحملين باجر من يشوف طفل ويشيله ويناغيه ؟؟

وره شوية ارجع اكول مو هاي اخته اتزوجت كريم قبل لا اني اتزوج كريم الثاني .. وهم مخلفت منه بس من اتزوجت مره ثانية الله انطاها .. ليش انتِ كاطعة الامل ..

جنت خايفة احجي لفؤاد وبعدين يطلع ماكو حمل واتفشل وينقهر ..
بس مااكدر اضم الموضوع اكثر اخاف يكون فعلا اكو حمل واني متهاونة بالموضوع ..

من حجيت لفؤاد كالعادة حاول يطمني وياخذ الموضوع بهدوء وعقلانية لكن اني اعصابي كانت تعبانه .
وحتى من سويت تحليل وعرفنه حامل هم ظليت ابجي واللي قهرني اكثر حتى فؤاد بجه ..
بعدين رجعنه للبيت فرحانين رغم الصدمة سبحان الله .
وكل شوية اسأل فؤاد :
فؤاد ؟
فؤاد :
نعم حبيبتي ؟
آمنة :
عود صدك اني هسه حامل ؟
فؤاد :
باجر نروح حتى يسوولج كل الفحوصات اللازمة ومن ضمنها السونار حتى نطمئن بس لازم تكعدين من وكت .
آمنة :
يعني صدك ؟

خليت ايدي على بطني احاول استشعر حركة او نبض المخلوق الصغير بالموجود بأحشائي ..
فؤاد :
فرحانه ؟
آمنة :
لهسه اشك بالموضوع .. مااكدر اصدك ..

حضني كلي :
صعبه على رب العالمين ؟
آمنة :
لا استغفر الله قادر على كل شيء .
فؤاد :
لعد ليش تشكين وممصدكة مو هاي حنان مثلج .. ملك الملوك اذا وهب لاتسألن عن السبب .. كولي الحمدلله .
آمنة :
الحمدلله الحمدلله .. وجهك خير .
فؤاد :
على اساس اني مو ابوه هههه .
آمنة :
هههههه لاقصدي من رجعت انت كل حياتي اتغيرت للاحسن كله خير .. خلصت من كريم وكدرنه نجي هنا وساعدت سيف ووكفت وياي .. واتزوجت احلى واطيب واحن گلب بالدنيا كلها .. وهسه من بعد سنين مراجعات وعلاجات اشكال والوان ومبقى شي ولابقى حل مجربته بس ماكو نتيجة .. بعد اني هذا شغلي وهذا الشي الجان يقهر اكثر وجنت اسمعه من الناس ( هسه انت دكتورة نسائية ومتكدرين تسوين لنفسج شي ؟ ) .
الى ان يأست وبطلت العلاج .
والحمدلله من رحمة الله كريم اتزوج وصار عنده جهال جان معتقني ..
فؤاد :
( وخلقنا الانسان عجولا ) كل شي الله سبحانه وتعالى اله بي حكمة ورحمة للانسان بس احنه ماعدنه صبر .. الله مرادلج تبقين مرتبطه بي باي شكل من الاشكال .. وبنفس الوقت راد يعوضني ويعوضج ..
آمنة :
يعني جان عندي حق احبك ؟
فؤاد :
لا صدك خل نحجي لو اكتشفتي كل هذا حلم وكعدتي من النوم واتحقق وبدت تنعاد كل الاحداث اللي صارت بحياتج ...
راح تختارين تحبيني من جديد ؟؟ لو تكولين التوبة ؟

حضنته كتله :
شبيه قابل مخبله اخليك لوحده ثانية .. انوب تتزوج عذراء مدري ذيج الامريكية مدري شسمها .. لاعيوني اني كاعدتك كعده حتى لو انعادت القصة تلكاني متانيتك هههههه .
فؤاد :
ههههه يعني انت هذا الهامج خاف اتزوج وحده ثانية ؟ هذا حب تملك يعني مو تحبيني ..
آمنة :
والله عاد تملك مو تملك اني تعرفني يافؤاد ياابن ام فؤاد كلش زين هذا الحجي ميمشي عندي لو تنعاد حياتك مية مره متتزوج غيري بالنهاية مفهوم ؟؟
فؤاد :
صار ههههه .. بس خل اتفاهم ويه سيف يرحمني من البداية مو يشلع كلبي كلما اجي اخطبج يعيد نفس القصة .

ضحكنه حيل ..
خبر الحمل كان صدمة للكل .. وفرحة جبيرة غير متوقعة .
وخصوصا سيف من عرف اجه عدنه بقى يومين مخلاني اسوي اي شي بالبيت هو ينطف ويرتب .
وفرحنه اكثر من عرفنه انه الطفل هو ( بنت ) ..
سيف كلش فرح بالخبر وكلما يتصل يكلي :
شلونها اختي ؟
آمنة :
تدعيلك .
سيف :
فدوة لعمرها اروح اني .
آمنة :
اسم الله عليك حبيبي الله يفرحني بيكم اثنينكم ولايحرمني من احد منكم .
سيف :
امونه ؟
آمنة :
امم ؟
سيف :
ميخالف اني اختار اسمها ؟
آمنة :
اممم .. والله يعتمد عالاسم اللي تريد تسمها بي اذا حلو نمشي عليه واذا لا تعذرنه خومتريدها تبقى على كلبنه من تكبر محد يتزوجها بسبب اسمها .
سيف :
ههههههههههههه .. لا اريد اسميها فاطمة .
آمنة :
ماشاءالله حلو .. بس اشمعنه هالاسم ؟
سيف :
ماادري .. من جنت صغير جان وياي صاحبي بالمدرسة عنده اخت اسمها فاطمة جان دوم يسولف بيها ..
آمنة :
اي ؟
سيف :
جنت اتمنى اني هم عندي اخت اسمها فاطمة ..

انقهرت على سيف ومن حجيت لفؤاد كلي :
والله عنده ذوق .. اكو احلى من هالاسم على اسم السيدة فاطمة بنت الرسول سيدة نساء العالمين .
آمنة :
عليهم الصلاة والسلام .. يعني عجبك ؟
فؤاد :
طبعاً عجبني وموافق .
آمنة :
وافرض اني معاجبني مثلاً ؟
فؤاد :
مالنه علاقة اني ابوها وهو اخوها شنسويلج يعني ؟

ضحكت كتله :
ها هيجي صار الحجي ابوها واخوها .. يالله هم ميخالف .

وفعلاً سميناها فاطمة ..
قبل مااجيب فطومة سيف انتقل ويانه ..
ومن صارت فاطمة جان ميقبل الا اخليها تنام يمه بغرفته ..
نقل فؤاد فراشها واشيائها لغرفة سيف اللي كلما تبجي بالليل ونكعدلها يكعد ويانه حتى يشوفها من تبجي .. جان متعجب بيها عبالك لعابة ولاحظنه انه حتى نفسيته اتغيرت واتحسنت ( ١٨٠ ) درجة ..
رغم انه كان ضايج لان لازم يداوم سنة بالمدرسة قبل ميلتحق بالجامعة لكن فؤاد اقنعه وغير وجهة نظره :
والله انت متعافي ..
سيف :
لا عمو اني مصدكت اخلص انوب ارجع اعيد سنة .
فؤاد :
قابل مدارس العراق هي وتضوج منها ؟ لك بابا هاي مدارس مرتبة واغلبها مختلطة شفايتلي مداوم هنا بايام المدرسة بين الشگر والسمر جان صرت كازنوفا .
آمنة :
عود ليش الرجال من يصير عنده جهال يحاول يبين نفسه صغير وبعده شاب ويريد يرجع لايام السردح مردح ؟
فؤاد :
ههههههههه يابه احنه نحجي مجرد حجي قابل صدك رجعت للمدرسة .
سيف :
هههههههه .

بيوم من الايام رجع فؤاد من الشغل وجنه اني وسيف كاعدين نبدل لفطومة ..
فؤاد :
السلام عليكم ؟

وعليكم السلام .. جاوبناه ..
راح للغرفة بدون ميحجي ويتشاقه ويانه وبدون ميسال على فطومة ويبوسها .
رحت وراه كلي :
دخلي وسدي الباب .
آمنة :
شبيك ؟ تعبان ؟
فؤاد :
كعدي شويه ..
آمنة :
شكو .. كعدت ..
فؤاد :
ليث اتصل بيه الصبح كلي ....

سكت ..
آمنة :
شنو ؟ شكو ؟
فؤاد :
كريم متصل بي وكايله يريد يشوف سيف ..

بقيت فاتحة عيوني مصدومة ..
آمنة :
شتحجي فؤاد ؟ شنو يعني كريم يريد يشوف سيف ؟ وين يشوفه يعني ؟
فؤاد :
كريم حالياً باستراليا .. ويريد يجي يشوف سيف ..

لزمت راسي كتله :
دقيقة .. خل استوعب .. كريم وين ؟

كلي بنوع من العصبية :
ماادري آمنة هذا الكاله ليث شلون ليش شوكت ماادري .. المهم كريم  يريد يشوف ابنه ..
آمنة :
ابنه ؟
فؤاد :
اي ابنه .. آمنة هذا ابنه عجبج لو معجبج سيف ابنه .
آمنة :
لا مو ابنه .. حتى بالجواز مو ابنه .. ياكل خ..... يريد يشوفه .
فؤاد :
هذا الحجي غلط .. اذا رفع عليج قضية يوديج بداهية تدرين لو لا مو بس سجن لا يسفروج .. ترجعين منين مااجيتي ..

ظليت مخلوسة ماادري شحجي دمعت عيوني كتله :
يكدر ياخذ ابني مني ؟
فؤاد :
ميكدر ياخذه ابنج مو طفل حتى يكدر ياخذه .. بس يكدر يرفع عليج قضية اثبات نسب .. ابسط منها ماكو يسووله تحليل دن ان اي ( DNA ) ويتأكدون سيف ابنه ..

حسيت نفسي احتريت حيل ظليت اهفي بايدي على وجهي يمكن اختل ضغطي .. فؤاد فتح التكييف ورجع كعد يمي كلي :
على كيفج .. لتنفعلين اهدأي وسمعيني ..
آمنة :
وين انطي وجهي ؟ وين اشرد من هالانسان ؟ وين اروح واخلص منه ؟
فؤاد :
لاتشردين ولاترحين .. انت هسه مره متزوجة من شنو خايفة ؟
آمنة :
يشلع كلبي بسيف .. يريد يشلع كلبي بسيف .. هو يرد يشلع كلبي بسيف ...
فؤاد :
ماكو شي ان شاءالله . اهدأي ..

من ساعتها اكلني القلق ومن عرف سيف كال :
شيريد يسوي خل يسوي مااريد اشوفه .

لكن بعد تدخل فؤاد وليث اللي حجوا وياه واقنعوه قبل انه يحجي ويه كريم بالتليفون .
وصار بينه وبين كريم اتفاق انه يتواصل وياه بالاتصال عالاقل لحد مواحد منهم يكدر يسافر يشوف الثاني ..

ليث :
اني كتله ابنك هنا مرتاح وعايش احسن عيشة وانت تعرف آمنة شكد تحبه وشكد مقدمته على نفسها .. رادت تبيع بيت اهلي خاف سيف يدرس بالجامعة قبل متكمل اوراقهم ويجون هنا.
آمنة :
شكال ؟
ليث :
مكال .. كال ادري ادري .. بس هو ابني واني مشايفة صار كم سنة ومشتاقله ومن حقي اشوفه ومن هالحجي .
آمنة :
يعني مكال شي عالجواز ؟ على اسم سيف ؟
ليث :
لا يجوز ميدري وصي سيف ميحجي شي كدامه .
فؤاد :
تره هو مو غبي حتى يفتح هالموضوع ويسوي مشكلة لان حتى سيف راح يتضرر لان دخل للبلد وهو بالغ سن الرشد يعني يعرف جوازه مزور واسم ابوه مو حقيقي .. مااعتقد راح يستفاد شي من يبلغ على ابنه ويخرب حياته ويخليه يرجع للعراق .
آمنة :
شلون شنسوي هسه ؟ احاجيه اني ؟

خزرني فؤاد كلي :
شنو تحجين وياه ؟
ليث :
لا انتِ ولا اي واحد اني راح احجي وياه واشوف فلمه شنو ومادام مسأل عنج معناها يعرف انت هسه متزوجة ..
آمنة :
منين يعرف ؟
ليث :
شلون منين يعرف جماعته نصهم هنا قدموا لجوء واجوا لهنا ولغير دول راحوا بحجة حياتهم مهدده .. يعني جماعته ينطوه الاخبار .
آمنة :
الله ياخذه وياخذهم لحكوني لهنا !!
فؤاد :
انت شبيج مرعوبه تره هذا ابنه من حقه يشوفه ويطمئن عليه حتى الانسان العاصي اله ساعة ربج يهديه بيها وهذا من صالح سيف ليش تردين تحرميه من ابوه ؟
آمنة :
اريد احرمه ؟ انعم الله عليك .
ليث :
آمنة لتصيرين حساسة احنه نحجي لمصلحة سيف فحاولي تسيطرين على عاطفتج انت امه اوكي بس هو هم ابوه وابنج محتاج يحس ابوه يسال عنه مهتم بي يتفقد احواله ..
فؤاد :
انت حره بعد .. اني بريت ذمتي امام الله سبحانه وتعالى اني اب مااكدر اتخيل اريد اشوف فطومة ومتخليني ..
آمنة :
هسه اتذكر هو اب وعنده ابن يريد يطمئن عليه وتعاي يا آمنة اتحملي ؟
ليث :
لازم نسايره ونمشي وياه بالطريق السهل احسن ميشتكي عليج وانت تعرفيه ...
يسويها ..

بقيت اسبوع اكل بروحي شلون لو كريم دك الناقصة بيه واشتكى علي ؟؟
انوب خاف انسجن ؟ خاف سيف هم ينسجن ؟ بتي وين تبقى اذا انسجنت لو سفروني ؟؟
الله ينتقم منك كريم .
كدر فؤاد يقنع سيف يتواصل ويه ابوه بالتليفون شوية شوية بدا تواصلهم بالمسجات كل كم يوم كريم يدز مسج لسيف يسال عن اخباره واحواله سيف جان يتذمر وميقبل يحجيلي شنو الحديث اللي يدور بينهم لكن جان يحجي لفؤاد .
فؤاد :
حديث عادي مثل اي اب وابنه شلونك وشخبارك وشمسوي .
آمنة :
فؤاد رحمة لامك لتكول مثل اي اب وابنه لان هو مو مثل اي اب هو مو اب اصلا .
فؤاد :
اني مااحبه وانتِ تدرين لكن اني شفت المسجات كلها كلام عادي .
يجوز ضميره صحى وحب يحسن علاقته بسيف .
آمنة :
من شوكت عنده ضمير هو .
فؤاد :
خوفج ماله داعي مادام ابنه يتواصل وياه ومرافض هالعلاقة معناها كريم مراح يأذينه باي شكل من الاشكال لان ابنه اول واحد يتضرر مااتصور يقبل ابنه يتضرر بالعكس هو اصلا مرتاح من مسؤوليته ولايدري عنه شمحتاج .. اتفائلي .
آمنة :
آآه ياربي ..
فؤاد :
بتي شلونها اليوم ؟ محجت مكالت بابا ؟
آمنة :
لا هاي العايزة اني مكسور ظهري وسهرانه الليل كله وتالي تكول بابا .
فؤاد :
ههههههه لعلمج كل الاطفال يكولون بابا قبل ميكولون ماما .
آمنة :
منو مفرحك بهالفلم ؟
فؤاد :
ههههه والله وداعتج هذا الحجي صحيح اصبري بس وشوفيها اذا متكول بابا قبل ماما فلا اني فؤاد .
آمنة :
اي .. مكيوله انه الربيت ولغيري صفيت .
فؤاد :
هههههههه على اساس عندج ولد ومتزوج وتسمعين الجنة ههههههه .
آمنة :
اهوو هسه انوب صار بيها ولد ..
فؤاد :
لا والله لا هههه الحمدلله الف الحمدلله اني جنت احلم اتزوج ويصير عندي فطومة ؟؟ غير هي وامها نعمة شريد بعد اكثر من هيج الحمدلله رب العالمين .
آمنة :
يعني اذاااااااا  اذا بالمستقبلللللل طلعت حامل متريده يعني ؟

كعد فؤاد عدل بعد مكان متمدد كلي :
صدك ؟
آمنة :
شنو ؟
فؤاد :
حامل ؟
آمنة :
اممم .. ماادري .. يمكن .. يجوز ..
فؤاد :
احجي آمنة لتشلعين كلبي صدك حامل لو تلعبين بأعصابي ؟
آمنة :
هههههه شبيك اتشاقه شنو تريد حجة .
فؤاد :
ياريت ..
آمنة :
هههههه

سيف عجبته المدرسة وبدا يكون صداقات .. صحيح مو هواي لكن المهم بدا يتأقلم .
واني درست لغة وبعدين كعدت بالبيت انتظرت فطومة شوية تكبر حتى ادرس وسيف بعد المدرسة انقبل هندسة بجامعة اريزونا يعني بنفس الولاية اللي احنه بيها لكن طلب انه يستأجر شقة قريبة على جامعته هو وواحد من اصدقائة .

وبعد مرور مدة صار عندي حمل ثاني وهالمرة ولد وطلبت من فؤاد انه نسميه ( غيث ) على اسم اخوي الله يرحمه ..
وصار عنده فطومة وغيوثي واني رجعت ادرس حتى اعادل شهادتي واتوظف .

وحنان ايضاً هم صار عدها ولد وبنية .
وهدى متزوجت بعد سمير بقت هي وجهالها وفتحت مركز تجميل بالفلوس اللي اخذتها عشيرتها فصل من اهل كريم ..
وسمير طليق هدى نصبوا عليه جماعة بعمان واخذوا فلوسه بحجة يستثمروها بشغل ومكدرت الشرطة تلزمهم لان انهزموا خارج البلد .
.
.
.

‏ملأتُ من حُسنها عيني، فما نظَرت من بعد رؤيتها يوماً الى أحدِ ♥️
.
.
.
( فؤاد )
بعدما الله رزقنه بفاطمة وكبرت فرحتنه بقبول سيف بالجامعة ..
حاولت اخليه يقبل صداقة كريم ولو على كبر ..
حتى ولو كان مو خوش انسان لكن بالنهاية هو ابوه ممعقولة ميحبه يجوز حاسب نفسه وحس بتقصيره اتجاه ابنه ..
يجوز ضميره اتنبه اخيراً ..
فؤاد :
تحجي ويه ابوك ؟

هز راسه اي بعدين كال :
مااحبه .. مااحسه ابوي .
فؤاد :
ميخالف .. مو مشكلة .. ممطلوب منك تحبه لكن اهم شي تتعامل وياه بأحترام .

هز راسه بأيجاب ..
خليت ايدي على جتفه كتله :
امك تريد تسمي اخوك غيث .

ابتسم ودمعت عيونه :
خالي غيث الله يرحمه جان خوش انسان .
فؤاد :
الله يرحمه .. بس بعد انت هالمرة مو يمنه راح اتطيح براسي المسؤوليه ههههه .
سيف :
هههه حلوين الجهال .
فؤاد :
حلوين .. بس تبقى انت الاعز امك اذا تتاخر عنها ساعة متتصل تاكل راسي ماادري شلون اذا تتزوج ههههه يمكن تكلك اكعد وياك حتى تكعد على كلب مرتك ههههههه .
سيف :
هههههه لا هي لازم تجي تعلمها قوانين البيت على كولتها ههههه .
فؤاد :
ياقوانين ؟ مال الدبك ومدري شنو ؟ ههههههه
سيف :
اي هههههه .

وصار عدنه غيث ولله الحمد ..
وآمنة رجعت تدرس .. وسيف سكن بشقة قريبة من الجامعة اللي يداوم بيها وبعد مرور الايام والسنين من اتخرج سيف خطب بنية من اقارب زوجة خاله ليث اما كريم فاتذكر لهسه اول مرة من اجه لامريكا بعد خطوبة سيف ..
جنه اني وآمنة والاطفال موجودين بتكساس مع سيف حتى نحدد موعد الزواج والامور المتبقية وكريم اتصل على سيف كله انه هو موجود بأمريكا ويريد يشوفه .

خلصنه غدا واقترحت على آمنة نطلع ناخذ الجهال ونروح لاي مكان حتى منشوف كريم من يجي لبيت ليث .
لكن واحنة طالعين وصل كريم بالتكسي لكن اني وآمنة اتجاهلنه وجوده وكملنه طريقنه ..
من رجعنه كان سيف بعده طالع مع كريم فبقت آمنة بقلق رايحة راجعه للباب ..
ام سارة :
آمنة كعدي هسه يجي قابل شيسويله يعني ؟.
آمنة :
ميسوي شي بس يستفزه بالحجي وسيف انتِ تعرفيه .. ميحبه ولايتحمل منه كلمة .
ليث :
تره سيف كبر وراح يتزوج وانت بعدج متصورته ذاك الولد الصغير الخواف .. خليه يتعامل ويه ابوه بالطريقة اللي تريحه حقه ميحبه وحقه ميريده وحقه اذا رد عليه بطريقة مو حلوه خليه يعبر عن اللي بداخله لتضغطين عليه ..

شوية ورجع سيف :
السلام عليكم

ردينه السلام ..
آمنة :
تأخرت حبيبي ؟
سيف :
رحنه اتمشينه بعدين كعدنه بالبارك ( حديقة ) .
آمنة :
متعشي ؟
سيف :
لا .. ومااريد ..

كان مزاج سيف متعكر فعرفت انه كريم مضوجه بالحجي .
بعد مرجعنة لبيتنه سالت آمنة :
حجيتي ويه سيف ؟
آمنة :
امم
فؤاد :
وشطلع ؟
آمنة :
مثلما اتوقعت كتلكم يستفزه اني اعرفه واعرف طينته .
فؤاد :
شكايله ؟
آمنة :
مااريد اتذكر فؤاد ولا اريد احجي ..

جانت واكفة عالمراية تمشط شعرها .. سحبتها لحضني كتلها :
شحاجي ؟
دمعت عيونها :
يكله امك جانت مصاحبته وتحجي وياه وهي عندي بالبيت ..
فؤاد :
امم .. نذل شنو الجديد ..
آمنة :
الجديد انه سيف ميريد يشوفه بعد ..
فؤاد :
اني شكايلج ؟ سيف خلي علي ..
آمنة :
هو اصلا بس انت تكدر عليه .. ماادري شتسويله ويقتنع مسويله سحر ؟
فؤاد :
اني رجال درويش لاسحر ولا شي بس اني احبه وهو يستشعر هذا الشي ..

صارت مشاكل بين كريم وسيف اكثر من مره لكن الحمدلله سيف بدا يتعود عليه وصار يعرف شلون يتعامل وياه .
تكررت زيارات كريم لامريكا لكن ماكو اي احتكاك بينه وبينه تواصله مع سيف فقط .
كريم بعد مده اعترف لسيف انه مصاب بسرطان البروستات من مدة ومستمر يتعالج .. وطلب من سيف يتواصل مع اخوانه من ابوه ..
ومن سألني عن رأيي كتله :
الاخوان عزوه حتى لو بآخر الدنيا نعمة جبيرة انه انت تحس اكو عندك اهل بغير مكان وانه في حالة ضاقت بيك السبل تكدر تستند عليهم وتروحلهم .
سيف :
اني ممحتاجهم .
فؤاد :
يجوز همه محتاجيك .. لاتخلي كرهك اله يخليك تكره كل عائلتك يجوز همه مثلك مضطهدين ومحتاجين شخص يساعدهم ويوكف بظهرهم مثلما امك وكفت وياك ..
سيف :
وانت ..
فؤاد :
شنو ؟
سيف :
انت هم وكفت وياي .. انت مو بس عمي اعتبرك انت ابوي وصديقي ..
فؤاد :
واني يزيدني فخر انه انت تكون ابني وتعتبرني ابوك لان انت شخص طيب وشاب عندك طموح وتذكرني بنفسي جنت مثلك هادئ .

وبدا سيف يتواصل مع اخوانه من ابوه اللي حالهم كان مو احسن من حال وكان سيف سندهم الوحيد ضد كريم ..
هالشي خله سيف يكون شخص عنده ثقة بنفسه ويتحمل المسؤولية ..
وبعد زواجه صار عنده ( مصطفى ) وصرنه اني وآمنة جد وجده ..

اما محمود فبعد كل هالسنوات لازال بنفس موقعه لكن اصبح اكثر ثراءً وهالشي خله الخلافات بيني وبينه تزيد لان ميقبل احد ينصحه ويكله هذا حرام وهذا حلال .
اما دريد فكل فترة يجي هو وعائلته لامريكا وحالياً يشغل منصب مدير عام في دائرة ما ولازال طيب وخدوم اما زوجته ام رقية فكلما تجي لازم تجيب لآمنة صفطت دشاديش مخيطتها الها .

جنان وعدنان اخر مرة من اتصلوا بينه صادف خطوبة واحد من ابنائهم.
فراس وميسون صارت عدهم بعد بنية سموها ( زينب ) على اسم امي الله يرحمها ..
اما ابوي فبعد مراح للحج هو وفراس وصار حجي رسمي .. اقنعني انه اخذ آمنة ونروح للحج وهي هم كانت هاي امنيتها من سنوات ..
وصرنه حجاج بسنة ٢٠١٤، وكل فترة ادزله القاسمه الله حتى يروح للعمره ..
مؤخرا بعت قطعة الارض اللي اشتريتها بفلوس التعويض بمبلغ زين وناوي احج بالنيابة عن امي الله يرحمها وعن غازي الله يرحمه وكذلك ليث وآمنة باعوا بيت اهلهم واتقاسموا الورث وهم ناوين يحجون عن اهلهم الله يرحمهم .

عذراء حسب مسمعت من آمنة حنان حاجيتلها .. متزوجة من شخص ما وعايشة حياتها .

ولحد الان آمنة ترفض تسوي عملية لاذنها او كف ايدها .. لكن الحمدلله كدرنه نعيش حياتنه طبيعية بعد اللي واجهنا وكل اللي شفناه ..
آمنة كانت العلاج المناسب الي حتى اكدر انسى حياتي السابقة واعتقد اني كنت العلاج المناسب الها حتى تتعافى وتنسى اللي عاشته وشافته بسنوات زواجها من كريم ..
.
.
.

‏كُن معي للأبد ، ولن أرهقك إلا بـ حُبي لك ❤️❤️❤️
.
.
.
ختامنا :
يقول الله عز وجل ( انا عند ظن عبدي بي )
فأحسنوا الظن بالله ..وتفائلوا ولاتتخلوا عن احلامكم ولاتفقدوا الايمان بأنفسكم ولاتسمحوا لليأس ان يتسلل الى قلوبكم فأن اليأس من رحمة الله كفر ..
وقال تعالى ( فان مع العسر يسراً ان مع العسر يسراً )
ذكر الله تعالى العسر مرتين بصورة معرف ب( ال ) مفرد اما اليسر فجاء متعدد ومنكر ( يسراً ) للدلالة على رحمة الله وتعدد ابواب الرحمة والفرج واولها الصبر والدعاء فأن الله مع الصابرين وانه لايريد القضاء الا الدعاء ..

اما عنوان قصتنا هذه المره فهو للدلالة على الزهد والنقاء رغم المعاناة والشقاء فالدراويش هم :
هم زهاد بعض الطرق الصوفية شديدي الفقر والمتقشفين عن اقتناع وإيمان. وكان الدراويش الصوفيون معروفون بحكمتهم، ومعرفتهم بالطب والشعر والذكاء والدهاء.

وبالعربية الحديثة أصبحت كلمة درويش تدل على شخص بسيط فقير لكن مكتفي الحال .

اما الدروشة في الصوفية فهي أولى درجات الترقي في التطور الروحي. والدراويش الصوفيون هم زهاد اتخذوا باب التسول للتدرب على البساطة والتواضع والابتعاد عن التملك المادي. ومن شروط نجاحهم أن لا يتسولوا لأنفسهم أو لأغراض ذاتية وعليهم التبرع بكل ما يحصِلونَهُ إلى فقراء آخرين.

دمتم بخير القاكم مرة اخرى في رواية اخرى قريباً بأذن الله 😘
تحياتي
روز الفياض🌹