دراويش

دراويش ٤٢

#دراويش
بقلم #روز_الفياض
ح٤٢
.
.

وفزينه ولگينه ارواحنه مشيبين ... 💔
.
.
.
( فؤاد )
آه آه من تلك المشاعر التي لااستطيع البوح بها ولا اقدر على كتمانها ..
استرق نظرات لاشبع قلبي من ملامحك الندية ..
تجلسين بجواري وانتِ لستِ لي فتملأني الحسرة على قلبي ..
متى تصبحين حره .. لكي ابوح لك بما يؤلمني ..
واحدثك عما يخالج صدري ..
راقبت كفك الشفاف وهو يطوق مقبض الكرسي .. اخائفةٌ انتِ ؟
كم تمنيت ان المس كفك مهدءاً وكم تمنيت ان اغمض عيني كي لا افكر فيك ..
ولكن هيهات .. قربك مني يشعل قلبي ناراً ويجعلني كطفلٍ صغيرٍ ضعيفٍ يبحث عن حضن امه ..
ايعقل ان يكون كل هذا حب ؟؟!!
اكاد افقد صوابي وانا اسأل نفسي في كل دقيقة احقاً انتِ بقربي الان ؟

هدأت آمنة من صعدنه بالطيارة بعد مخلصت وقت الانتظار بالبجي على سيف ..
كرسيها كان مجاور للكرسي مالتي رغم انه اني طلبت من الموظف بمكتب الحجوزات يخيلي كراسينه قريبة على بعض لكن مو كلش..

صافنه تباوع من الشباك وساكتة .. بيدها سبحة سودة تحرك بخرزاتها مره يمين ومره يسار كأنما تحركها بدون وعي ..

باوعت لكف ايدها لفت نظري وحده من ايديها بيها مثل التشوه بالعظم اول مره انتبهله .. معقولة قديم ؟
حاجيتها بهدوء :
هاي ايدج هي هيج لو متعرضه لحادث ؟

مجاوبتني وكأنما مسمتعني .. فرجعت سألتها ..
لكن هم مجاوبتني ..
استغربت كلت اني كاعد بصفها معقولة مسمعتني لهدرجة هي ممركزة وصافنة ؟

سكتت وخليتها على راحتها .. وره شوية جابولنه وجبه خفيفة عالطائرة والتفتت هي من شافتني اتحركت فقدمتلها الوجبة كالت :
شكراً
فؤاد :
العفو .. سألتج قبل شوية بس مجاوبتيني ؟

هزت راسها شنو ؟
فؤاد :
سألتج عن ايدج مجاوبتيني ؟

انتبهتلها مدت ايدها جوه الحجاب لاذنها كأنما خلت سماعة او شالت سماعة ..
آمنة :
العفو ؟ مسمعتك ؟
فؤاد :
ليش مسمعتيني ؟ شجنتي تسمعين ؟
آمنة :
جنت نازعة السماعة .. بدون سماعة باذني هاي سمعي ضعيف شوية .

بقيت ساكت وخايف اسألها ليش وشلون ومن شوكت خاف يطلع كريم وره الموضوع واقهرها واقهر نفسي ..

بلعت ريكي وجريت نفس وغيرت الموضوع كتلها :
سألتج عن ايدج هذا من شوكت العظم هيجي مااتذكر عندج هيج تشوه بالعظم قبل او يجوز اني ممنتبه ؟

ابتسمت ابتسامة حزينة كالت :
هو قديم .. بس مو قديم كلش على ايام كريم صار عندي ..
فؤاد :
حادث ؟
آمنة :
مرة رجع كريم سكران وحلفني عالقران اذا بيني وبينك شي من اللي تكوله امه .. ومن خليت ايدي وحلفت سحب ايدي وداس عليها ..

جانت تحجي بهدوء وعلى كيف كأنما خايفة من دموعها بس هي فعلاً دمعت ..
فؤاد :
وبعدين ؟
آمنة :
بس ... داس عليها لحدما انكسر العظم وطاب على عيب بسبب الضرب بعدين .. بيمن احمي نفسي من الضرب غير بأيدي ..

الالم الحسيت بي بلحظتها خنكني لدرجة كتلها :
كافي .. مااريد اسمع بعد .

سكتت وبقت تحرك بالخرز الي بالسبحة .. حسيتها مثل الطفلة المقهورة ومستهضمة وتريد واحد يحضنها حتى تبجي ..
استغفرت ربي ومديت ايدي عالعصير كدامي فتحته وقدمته الها وكتلها :
اغلس عن وحده تطلع البعدها ابله منها ..
آمنة :
شنو هي ؟
فؤاد :
خفت اسألج عالسماعة تكولين كريم وره الموضوع بعدين سألتج عن ايدج حتى اغير الموضوع طلع كريم وراي وراي ..
آمنة :
هاي سوالف قديمة اتعودت عليها .. والسماعة هم بسببه .. ضربني مره على اذني وصار عندي ثقب بطبلة الاذن .. اخاف من العملية فبقيت هيجي ومن اجينه لمصر سويت السماعة ..

باوعتلها بتساؤل وكتلها بتوسل :
شضامه بكلبج بعد من سوالف كريم ؟ احجيلي خليني اعرف شنو شفتي وشلون عشتي ؟
آمنة :
الشي الوحيد اللي مسواه كريم ماادري شعجب محلق شعري مثل المساجين .. وانت اتصور اني شنو شفت وشلون عشت وياه ..

نزلت دموعها ودارت وجها عالشباك واني رجعت راسي عالكرسي وغمضت عيوني قبل متوكع دموعي ..
طول مدة الرحلة اللي هي مايقارب الساعتين ونص حسيتها ممرتاحة وخايفة وحزينة حاولت اغير مودها وكتلها :
تدرين اني اتزوجت مرتين ؟

باوعتلي وابتسمت شبه ابتسامة :
مرتين ؟ وشصار ؟
فؤاد :
اول مرة اتزوجت من رحت لامريكا علمود الجنسية يعني كان بالاتفاق مع البنية نفسها انه نكون متزوجين امام العامة ونسكن سوا ولكن بحقيقة الامر زواج مصلحة.. وبعدما حصلت الجنسية انفصلنه حسب الاتفاق ..
آمنة :
امم .. يعني مجنت تحبها ؟ مصارت بينكم مشاعر ؟
فؤاد :
لاا .. شحب بيها شبيه مخبل احب امريكية يومية مصادقة واحد .. والمشاعر مو بكيفنه لو باختيارنه .. مكدرت احب اي وحده بعد ..

لمحت بعيونها نظرة المتفاجأة لثواني وبعدين دارت وجهها وكالت :
المحيط الي يعيش بي الانسان هو اللي يخليه مينسى ويبقى يقارن دائما بين الانسان اللي يتمناه وبين الناس الحواليه .
فؤاد :
صحيح .. عالاقل انت جان سيف بحياتج ..
آمنة :
الحمدلله على كل حال .. سيف نعمة من رب العالمين ..
فؤاد :
الله يحفظه الج ..
آمنة :
لتضيع القصة واحجيلي شلون عشت ويه الامريكية ؟
فؤاد :
ههههه .. والله كانت ومازالت صديقة عزيزة وخدومه ..
آمنة :
يعني شلون جانت حياتكم ؟
فؤاد :
اني مكان عندي حياة .. حياتي عبارة عن شغل ودراسة .. لكن هي كونها في بلدها فحياتها مااتأثرت .. تطلع تسهر وتسافر .. اني من وصلت لامريكا جنت احس بالضياع ماعندي احد الحمدلله اتعرفت على ولد جان وياي بالمخيم واستمرت صداقتنه هناك .. اول موصلنه هناك كان لازم ندرس لغة .. الحمدلله لغتي كانت جيدة وانهيت دراستي بسرعة .. وبعدها اتعرفت على أنجيلا وهي اقترحت علي موضوع الزواج علمود الجنسية ..
آمنة :
وشنو المقابل ؟
فؤاد :
المقابل اتحمل نصف تكاليف البيت والفواتير وغيرها .. كله بالنص .. لذلك جنت ادرس واشتغل ماعندي مجال الا ساعات قليلة حتى انام ..
آمنة :
وبعدين كملت دراسة الطب ؟
فؤاد :
اخذت كورسات حتى اعادل شهادتي .. كل كورس كان يعادل سنة من التعليم الجامعي .. بعدين كثفت جهودي حتى اكون من الاوائل بتخصصي ..
آمنة :
انت جنت تريد تصير جراح .. مو هيج ؟
فؤاد :
الحمدلله رب العالمين .. بس مطلعت من العشرة الاوائل للاسف ..
آمنة :
يعني صرت ؟ شكد حلو واحد يحقق حلمه رغم كل الظروف القاسية اللي يمر بيها .. مو مهم العشرة الاوائل المهم انت هسه شنو .
فؤاد :
هسه تخصصت بجراحة العظام .
آمنة :
ماشاءالله عيني الباردة عليك .. انت طيب فؤاد لذلك تستاهل احسن واعلى المراتب ان شاءالله ربي يوفقك اكثر واكثر ..
فؤاد :
ظليت اشك بكوني انسان طيب ..
آمنة :
ليش ؟ انت ممأذي احد ..
فؤاد :
بس الاذوني هواي ..
آمنة :
وهذا من علامات الطيبين يتعرضون دائماً للاذيه ..
فؤاد :
قصدت الاية ( الطيبون للطيبات ) اني بزواجي الثاني اكتشفت العكس ..
آمنة :
يجوز هي انسانة سيئة ولو اني مااعرفها بس انت طول عمرك انسان طيب .. ومعنى الاية انه الناس الطيبين متصدر منهم الا الكلمات الطيبة لان المقصود هنا بالطيبات هي الطيب من الكلمات .
يعني هم تنطبق عليك الايه ..
بس ليش طلكتها ولو يمكن متحب تحجي بهالموضوع ؟
فؤاد :
مو مثل مااريد .. اني ابالي من اتزوج كون تشبه شخصية معينه وهي جانت على النقيض منها ..

اكتفيت بهالجواب لان مااكدر احجي بشرف بت الناس راحت لحال سبيلها ورجعت مره غريبة عني ..

سكتت آمنة شوية بعدين كالت :
اكو سؤال بكلبي ومتردده اسأله ..
فؤاد :
ليش متردده سألي واني اجاوب ..
آمنة :
منو همه اللي جنت تشتغل وياهم بالعراق ؟ من انخطف سيف اقصد؟ وشنو علاقتك بيهم ؟
فؤاد :
جماعة محمود ودريد .. حزبنه القديم ..

باوعتلي بغرابة بعدين كالت :
ما اتعضت من هذا الطريق فؤاد؟ مو جربته وشفت تاليته شنو ؟ بعدين ابني شنو ذنبه يخطفوه ؟ وهمه شنو علاقتهم بالضبط بالحكومة حتى يعتقلون ويخطفون الناس ؟ مو ثوبك هذا فؤاد ..
فؤاد :
اني رجعت للعراق على اساس اكون عضو فعال لكن بصراحة شفت هذا مو ثوبي على كولتج .. وحتى اكون صادق همه لزموا سيف علمودي .. لان اني جان عندي هدف من رجعت وهو انتقم من الكريمين اثنينهم .. بس حتى ابري ذمتي همه مكانوا راح يأذوه ولا اني ممكن اسمح بهالشي .
آمنة :
وابني شذنبه ؟
فؤاد :
جانوا يتصورون اذا كريم عرف ابنه عدنه راح يجي ويسلم نفسه او عالاقل يحصلون خيط يوصلهم اله ..
آمنة :
كريم مكانه سهل عايش حياته عادي مخايف من احد ولو سآئلني جان كتلك هذا عنوانه ولو يردون يوصلون لكريم مراح يتعبون ولا راح يدوخون اذا همه هسه الهم سلطة مثلما تكول ..
فؤاد :
والله ماادري ياآمنة .. الوضع معجبني والحجي اصر علي اترك هالانتماءات اللي نهاياتها مثل سابقاتها .. واني بعدما انخطف حمودي ابن فراس طلعت الدنيا من عيني بعد ونذرت اذا رجع سالم اترك كل هالافكار والانتماءات ..
آمنة :
احسن .. كلها متفيد بس الله سبحانه وتعالى هو القادر يخلصك من كل ضيق والدليل اني .. اهلي كلهم جانوا بحزب البعث بس لهسه بعدني معلكة ومااكدر اخلص من كريم ..
فؤاد :
فعلاً ..
آمنة :
خليك حر .. مستقل بعيد عن الاحزاب والسلطة ودوختها .. متدري شوكت تدخل ناس بخطيتك وتشيل ذنبهم ليوم الدين مثلما كريم سوه ..

سكتنه شوية بعدين دارت علي كالت :
فؤاد ممكن اطلب منك طلب ؟
فؤاد :
انتِ تأمرين امر مو تطلبين ..
آمنة :
اريد  اروح ازور قبر امي وابوي وغيث الله يرحمهم ..

اشرتلها على عيوني وكتلها :
من هاي قبل هاي .

من وصلنه لكينه دريد بانتظارنه ..
هي من شافت دريد بجت وهو هم بجه ..
فؤاد :
اذكروا الله المفروض تفرحون التقيتوا بعد كل هالسنين .
دريد :
لا اله الا الله .. شلونج خوية شخبارج ؟
آمنة :
الحمدلله شلونك انت شلون الاهل ؟

ظلوا يحجون ويسولفون طول الطريق الى بيت دريد .. حيث مكان اقامتها خلال وجودها بالعراق حتى تكون في امان من اهل كريم في حال عرفوا بموضوع طلب الطلاق ..
آمنة كانت مستغربة من الحماية والسيارات والسلاح لكن مبينت هالشي ..
نزلنه واطمئنيت عليها يم زوجة دريد واولاده ورحت لبيت اهلي ..
اللي اتفاجأوا بحضوري واتصوروا رجوعي لحضور زواج حنان ..
ابوي :
هالايام مشتغلنه مفاجآت ؟
فؤاد :
هههه شسوي هي الظروف اجت هيج .
ابوي :
ظروفيش ؟ بطلت من روحت امريكا ؟
فؤاد :
لاا بس اجلتها شوية .
ابوي :
ليش ؟
فؤاد :
والله يابه قصة طويلة ..

وبديت احجي لابوي واهلي موضوع آمنة .. اتأثروا كلهم واولهم ابوي اللي ظل يدعيلها بالخلاص وحنان انقهرت عليها لان عرفت انه كريم زوجها السابق كان متعاون مع كريم زوج آمنة على ظلمي وظلم آمنة ..

طول الليل بقينه نحجي ونتناقش بالموضوع واحنه بانتظار حضور خطيب حنان حتى احجي وياه وجهاً لوجه ..
.
.
.

أشتقت إليك
فعلمني أن لا اشتاق
علمني كيف اقص
جذور هواك من الأعماق ..🖤
.
.
.
( آمنة )
وصلت للعراق لاول مره بعد طلعتي منه ..
وصلت ومن اول خطوة خطتها رجلي خارج الطيارة واني احس وصلت لبيتي ولاهلي ..
ماانكر اكو شوية خوف لكن اتبدد واني اشوف دريد والحماية والسيارات ..
ايقنت انه كلام فؤاد صحيح .. كريم ماله سلطة بعد .. ميكدر يأذيني .. الا اذا بشغلات قانونية ..
طول السنتين الفاتت جنت منتظره كريم يوصلي لان اعرفه بس يوصلي هو اللي راح يرفع دعوه عليه حتى ارجع ..
ان شاءالله الله يخليه ميعرف يسوي شي وميندل دربه منين ..
يارب مو صعبة عليك تهديه وتخليه يطلكني بدون مشاكل ولايحاول يتدنالي او لسيف بعد .
ربي شغلة بعائلته واكفينه شره ..
زوجة دريد جانت خوش انسانة ورحبت بيه ترحيب حار وجهاله هم مؤدبين ..
اجه الليل وكعدنه اني وزوجة دريد ( ام رقية ) نسولف .. تسألني عن حياتي واجاوبها الى ان اجه دريد وكال :
بعد العشا راح يجي ابو مصطفى حتى يسلم عليج ام سيف .
آمنة :
منو ابو مصطفى ؟
دريد :
محمود .. محمود ..
آمنة :
ها ها هلا بي ..
دريد :
جا خل اتصل على فؤاد هم حتى يجي هو ورجل اخته .. مساع خابرت على فراس اخوه وحجيت وياه كال متواعد بالليل ويه رجل اخته المحامي ..
آمنة :
اني دوختكم .
دريد :
انت اختنه وعزيزه علينه وبيج ريحة تغريد وغازي وذيج الايام الحلوه گبل وهذا واجب علينه .. نساعدج بالنكدر عليه وان شاءالله مانقصر .
آمنة :
والنعم منكم ..

عالساعة تسعة بعد العشا سمعنه صوت السيارات بره واتصلوا على دريد بلغوه بوصول محمود ..
اجه دريد كال :
اخوج ابو مصطفى اجه ويريد يسلم عليج ..

رحت ويه دريد للاستقبال مالتهم محد موجود بس محمود من دخلت شفته شكد كبران ومتغير ..
شعره كله ابيض ولحيته بادي بيها الشيب وتجاعيد حوالين عيونه ..
سلم علي سلام حار ورحب بيه بعدين كلي :
اتصلت على فؤاد جاي بالطريق هو والمحامي .. حتى يصير الحجي كبالج .. واحنه حاضرين بالتردينه .. فؤاد هم لخاطرج ماسافر ورجع للعراق وهو الوضع مو زين بالنسبة اله وخطر عليه بس لخاطرج جازف بسلامته واجه ..
دريد :
جا خليت الشباب يمه .
محمود :
وديتله اربعة شباب وسيارة .. اثنين يطلعون وياه واثنين يبقون يم باب بيته ..
آمنة :
قلقت راحتكم اني ..
محمود :
كل قلق ماكو وانه اخوج .. احنه هاي حياتنه صارت من رجعنه للعراق وحتى فؤاد بس فؤاد ماارتاح لهذا الوضع وكال ارجع لامريكا بعدما خطفوا ابن اخوه ..
هسه احجيلي بالله شيريد منج هذا كريم ال .. مانريد نبديها بغلط .. شيريد بالله فهميني ؟
آمنة :
ميريد .. ميريد شي مني لان مجان يعرف مكاني .. بس اني اريد اتطلك منه .
محمود :
اي هاي ادري بيها .. كالوا ذولة الكاعدين عدكم بالبيت كالوا خذت الولد وانهزمت .. انه ماشفته ابنج من جان هنا بس ابو رقية وفؤاد شافوه كالوا زلمة .. يعني مو مال انت تخطفينه ..

بديت احجي لمحمود مشوار عمري ويه كريم بالمختصر .. ومن اول ماذكرت الاعتقال واللي صار بين على محمود التأثر ..
محمود :
اعتقلوا تغريد كبلكم يعني ؟
آمنة :
قبلنه اي وانعدمت هي واهلها وحاول ابوي الله يرحمه بكل الطرق يطلعهم لكن مكدر ..
محمود :
جا ماطلعهم الشفيه .. مو كرايبج هو لو غريب ؟
آمنة :
اي اكو قرابة من الجهتين .. من جهة امي ومن جهة ابوي .. هو هذا جان عذر ابوي حتى يطلع فؤاد واهله بوقتها كله اجيتك على جيراني ومساعدتهم هسه هم تفشلني وترجعني ؟ .. الله هداه وقبل يطلعه ..
دريد :
شلون واحد خسيس .. مبيت النيه هو ويعرف شيسوي مرتب وضعه عدل ..
محمود :
اي نذل طلعه كدامها وكدام اهلها وانوب من وراهم ظل يودي عليه جماعته حتى يرجعونه ويعدمه لو يذبه بالسجن الله يعلم شكد ..

وصل فؤاد والمحامي واشتغل السلام والترحيب وحسيت بالاحراج كوني المرأة الوحيدة الموجودة بينهم ..
رغم معرفتي القديمة بيهم بس الخجل كان غالب وحسيت بنوع من التوتر وكان اكو نوع من التعامل غريب بينهم انتبهت عليه عند انتهاء الاجتماع ..
وهو تعاملهم كأنما اني اخصه لفؤاد لحد الان وبصراحة هذا الشي ازعجني ..
كانوا من يحجي المحامي ويشرحلي الخطوات الي راح نقوم بيها يوجهون الكلام لفؤاد كأنما فؤاد ولي امري ..
حسيت بالاحراج انه تفكيرهم لحد الان بعده بالماضي .. رغم كوني متزوجة ، صحيح اني جايه حتى اطلب الطلاك من زوجي اللي يعتبر عدوهم الاول لكن استزحمت الموضوع .
المحامي :
ست الدكتور حجالي القصة فبالنسبة لموضوع الشكوى اللي مشتكيها عليج تهمة الخطف هاي موضوع مختلف ولو هو جاي وياج جان انحل الموضوع بنفس اليوم .. وحتى لو حركوا الموضوع هسه وجددوا الشكوى عليج هم سهلة نتصل عليه يجي ينهي الموضوع لان هو هسه بالغ ويكدر يكول امي ربتني واريد ابقى وياها وتسقط الدعوى .وهي اصلا الدعوه تعتبر ساقطة لان هو بلغ سن الرشد ويحقله يختار مع منو يعيش .
اما موضوع الطلاق فباجر نبدي بي ان شاءالله ..
آمنة :
شكد يطول ؟
مروان ( المحامي ) :
الله اعلم القاضي طبعا ماممكن يحكم بالطلاك من اول جلسة لازم المحكمة تدز للطرف الثاني استدعاء في حال محضر احتمال يدزوله استدعاء ثاني اما لو كان عندج شهود عالموضوع فاحتمال يخلص الموضوع اسرع استناداً الى اقوال الشهود .
آمنة :
ماعندي شهود منين اجيب شهود .
محمود :
كرايبه كرايبج جيرانكم ؟
آمنة :
كرايبه يحسدوني عليه عبالهم عايشة بعز ودلال .. وكرايبي محد موجود نصهم ماتوا ..
دريد :
والجيران ؟
آمنة :
بس الجيران .. جانوا جيرانه بيت ابو مروه يعرفون سوالفه ويسمعون صياحه ومرات جانوا يتدخلون ..
محمود :
جا خوش نروحلهم ونكللهم يابه تشهدون ويانه لو لا ؟
آمنة :
اي ميكولون شي يحبوني همه خوش ناس .. يعرفون هم كريم واذيته حتى ويه زوجتة الاولى المرحومة ..

بقوا يحجون يمكن ساعتين خلال هالساعتين فؤاد كان قليل الكلام ولمحته كذا مره يباوعلي .
من رادوا يطلعون سألت المحامي عن اتعابه جاوبني :
اتفاهمت ويه الدكتور على الاتعاب .

من طلع المحامي هو ومحمود برا فؤاد دار علي كلي :
الصبح امر عليج حتى نروح للمحكمة .
آمنة :
ان شاءالله .. بس افتهملي من المحامي شكد اتعابه .
فؤاد :
اذا ياخذ منج حنان تطين عيشته هههه .
آمنة :
لا مااقبل .. هذا تعبه اذا مياخذ اشوف غيره .
فؤاد :
اني وياه نتحاسب لتفكرين بهالامور .
آمنة :
وانت شذنبك تدفع عني مو كافي دفعت فلوس التذكرة ؟ تره اني عندي الحمدلله واكدر ادفع ..
فؤاد :
يابه بالعافية عليج والله يرزقج اكثر واكثر مكايلين ماعندج .. بس نسيبي واريد اخسره .. بيها شي هاي ؟
آمنة :
هههه لا مابيها شي .. انت ونسيبك ..

مشى باتجاه الباب :
تره انت معزومة على زواجهم مو تنسين .
آمنة :
اصلا اجي بدون عزومة ..

بعدما طلعوا رحت اتمددت بعدين حجيت ويه زوجة دريد اخذت تليفونها اتصلت بسيف اتطمنت عليه عالسريع وطمنته علي ..
نمت جنت تعبانه ..
خليتها على الله ونمت ..
بيت دريد جانوا مخصصيلي غرفة وحدي بيتهم جبير ماشاءالله ..

الصبح رحنه اني ودريد اتوجهنه للمحكمة والتقينه هناك بفؤاد والمحامي ..
.
.
.

‏ولهُ بيّن أضلُعي شيئاً لم يكُن لِأحد أبداً..❣️
.
.
.
( فؤاد )
بعدمرجعنه من الاجتماع في بيت دريد وبعد مخلينه النقاط عالحروف ابوي سألني :
وهي هاي المرة مالها احد هنا ؟
فؤاد :
مالها احد يابه .. تتذكر انت ابوها ؟
ابوي :
اي اتذكره الله يرحمه طلعنه اني وفراس ووصلنه لحد باب البيت ..
فؤاد :
الله يرحمه .. واخوها بعدين مات ماادري اذا شايفه انت لو لا هو جابني وهم وصلني للباب من طلعوني من الامن ..
ابوي :
الله يرحمهم .. هي يروح بيها الزين .
فؤاد :
امها اتوفت من جنه بعدنه نداوم بقى بس اخ واحد عدها بس عايش بامريكا وهم يخاف يجي خاف ينقتل مثل اخوه ..
ابوي :
لا اله الا الله .. وهذا رجلها هو نفسه ابو الامن مو ؟
فؤاد :
اي هو .. الحقق وياي ووياها .
ابوي :
ادري اذا هي متريده من زمان ومتزوجها بالكوه ليش انتظرت لهسه جان اتطلكت من ذاك الوكت ..
فؤاد :
تخاف .. هو بذاك الوقت منو جان يتجرأ يوكف بوجه المفوض بالشرطة حتى يوكف بوجه ضابط بالامن .. يدبر لاخوانها تهمه ويسجنهم وياخذ منها ابنها .
ابوي :
طيح الله حظه .. متولي هالمره شيريد منها مجلب بيها .

مروان حجه بصوت ناصي ويه حنان وضحك التفتنه عليه كله ابوي :
شبيكم ؟
مروان :
ماكو شي عمي سلامتك .. حنان تكول ابوي جلب المره والمره .

ضحكت اني كال :
شنكول قابل زغيرونه مره متزوجة وبكد اخوج شنسميها ؟
فؤاد :
لا يابه مو بكدي اصغر مني بعدها زغيره ..
حنان :
اتذكر هاي القصة جنت اني بالسادس اعدادي وانت اخر مرحلة وهي اول مرحله يعني اكبر مني بسنة .
ابوي :
هاا .. الله يستر عليها .

نمت واني اصبر نفسي بقرب الفرج ..
الصبح كعدت ويه ابوي للصلاة وسألني :
هاي البنية ..
فؤاد :
شبيها ؟
ابوي :
بعدك تريدها ؟

سكتت واني اصبله جاي مااعرف شجاوبه بعدين كتله الصدك :
بعدني ..
ابوي :
وهي ؟
فؤاد :
هي مره متزوجة على كولتك يعني شتتوقع ؟
ابوي :
يعني ملمحتلك مبينتلك ؟
فؤاد :
لا .. بالعكس اني حاولت ابينلها ورفضت اي تلميح .
ابوي :
زين وابنها ؟
فؤاد :
مو ابنها هو ... ابنه من مرته الاولى ..هي مربيته .
ابوي :
يعني ابنها لو لا ؟
فؤاد :
ابنها ..
ابوي :
شكبره ؟
فؤاد :
جبير شاب ( ١٨ ) سنة عمره ..
ابوي :
والله ماادري يا بابا العمر يمشي وانت متاني بس اذا مقبلت شلون بيك ؟

ضجت من كلام ابوي وحسيت بشعور مزعج بمعدتي ..
بالسبعة اجه مروان علي وطلعنة للمحكمة ..
فؤاد :
راح نتعبك ..
مروان :
لا شالقصة .. ماكو تعب ان شاءالله .
فؤاد :
المثلك ملتهي يجهز لعرسه .
مروان :
كل شي كامل وجاهز واحنه تعبنه بس اليوم نقدم الطلب ونشوف القاضي لشوكت يأجلنه .
فؤاد :
ماكو امل ينفض الموضوع من اول جلسة ؟
مروان :
لا .. ميصير ..
فؤاد :
زين شوكت الجلسة الثانية تتوقع ؟
مروان :
اقل شي شهر حتى يبلغون الطرف الثاني على اساس ويهيأ نفسه يشوف محامي يجيب شهود يضبط وضعه يعني .
فؤاد :
مو احنه متاكدين هو مستحيل يجي ..
مروان :
احنه هسه راح نقدم الطلب وهي راح تحجي للقاضي وانت تكدر تبينله انه هو منهزم لان مطلوب دم ومطلوب للدولة فمستحيل يحضر .. مااتصور يقلل المدة لكن عالاقل تنبني عده صورة عن الوضع .
فؤاد :
يعني حتى لو كناله ميجي هم مراح يخلصنه من اول جلسة ؟
مروان :
لا مستحيل من اول جلسة .. اذا هو ميحضر هاي مشكلته بس اجراءات المحكمة تبقى مثلما هي يدزوله تبليغ وينتظرون للجلسة الجايه يجي المحامي ماله يجي هو ونشوف شيصير ..

سكتت واني خايف تتعقد الامور وتطول واني عمري خلص بالانتظار مابيه حيل انتظر بعد ..

وصلنه للمحكمة ولكينة دريد وآمنة واصلين قبلنه ..
لاحظت الخوف والارتباك على وجهها :
ها ام سيف .. بد العد التنازلي راح تخلصين ان شاءالله .

ردت بصوت ناصي ومرتبك :
ان شاءالله ..
فؤاد :
لتخافين .. احنه هنا راح نكون بانتظارج ومروان محامي شاطر يعرف شغلة زين ..
آمنة :
لا مخايفة .. بس عطشت من هسه ..

رحت جبتلها مي وانطيتها شفت ايدها ترجف كتلها :
كولي يا الله ..
آمنة :
ياالله ..

كملنة كل الاوراق وراح مروان قدمها بهالاثناء دريد كال :
اني راح اشوف القاضي منو .. بلكي واحد نعرفه ويعرفنه .. حتى ميشلع كلبنه وخلصنه ..

راح دريد وبقيت اني وياها كالت :
عبالي اخلص بنفس اليوم ..
فؤاد :
اعتبري الموضوع منتهي .. حريتج مضمونه .. شيريد يسوي يعني من يعرف ؟ يطلبج لبيت الطاعة ؟
آمنة :
لاعفية دكتور يابيت الطاعة ؟ يكدر يسوي هيج يعني ؟ يكدر يجبرني ارجع ؟
فؤاد :
مااعرف مو قصدي اخوفج بس بكل الحالات شرعا الزواج بالاكراه باطل ..
آمنة :
هاي بعد متفيد .. بعد كل هالسنين باطل .. اقنع بيها منو هاي ؟ يعني جنت عايشة وياه بالحرام ؟

اجه مروان كال :
هسه راح يجي القاضي اتحضروا ..
آمنة :
عفيه استاذ اذا عرف كريم وفرضا راد يطلبني لبيت الطاعة ؟ يكدر ؟
مروان :
مفهمت ؟
فؤاد :
يكدر يطلبها لبيت الطاعة ؟ يكدر يجبرها ترجع ؟
مروان :
هاا .. لا ميكدر .. تكدر تمتنع وترفض بس بهالحالة تسقط حقوقها .. المؤخر وهالسوالف .
آمنة :
خل تسقط .. مااريدها .. كل شي مااريد منه بس يكفيني شره ..
فؤاد :
مو كتلج .. ماكو شي يخوف .

دقايق وصاحوا عليهم وراحت هي ومروان تقدم رجل وتاخر رجل ..
رجع دريد كال :
منعرفه .. خل نشوف محمود بلكي يعرفه ..

اتصل دريد على محمود وانطاه اسم القاضي كله :
خل نشوف فلمه شنو واخابركم .
.
.
.

'' ماذا أقولُ لِأَضلُعٍ مَزَّقْتُها خَوفَاً عليك! ''💘
.
.
.
صبحكم الله بالخير
وصلت امنة للعراق قهرتني بالطيارة 😭
حبيت موقف دريد ومحمود .. رغم شكهم لكن لخاطر فؤاد وكفوا وياها ..
اوقعاتكم شراح يصير ؟
شراح يسوي كريم ؟
يجي لو لا ؟

لايك وتعليق وعشر ملصقات 😍😍😍

شوفوا الفيديو ☹️😞😢