وبشر الصابرين

البارت الرابع

البارت الرابع ..

//وبشر الصابرين //

بقلم Aseel

...........

جنا نحجي همس حتة احنة كوة نسمع .. الخوف جان عامينا .. نخاف كلمة تنسمع بالغلط وتوصل لابوية .. خاصة سيرة امي محرمة بهذا البيت ..

ماجد: يلة نامو كافي لغوة باجر عدنة دوام وشغل ..

شيرين: الله يساعدكم ..

هيج جان يمر اليوم .. بس اليوم نامو خطية من وكت .. حسيت بفراغ هواي .. طلعت كتاب بي رواية رومانسية .. ضليت اقرة .. واتخيل روحي البطلة .. والبطل هيمن .. مجرد الخيال خلاني احس شي بكلبي يدغدغني .. هيج احساس حلو ..

سديت الكتاب وغمضت عيوني واني اتخيل القصة ببالي ..

ثاني يوم جان يوم العزيمة ..كعدت متحمسة حيل ..
كعدت نضفت البيت ..وخلصت من وكت وبلشنا طبخ ..
مجنت اعرف منو ومنو الجاي بس يكفي انو سمعت بيت عمي نشأت ..

احلام : شبيك اليوم فرحانة خيرج ..

شيرين : ماكو شي ..

احلام : مامرتاحة الج هليام صايرة تتصفنين ..

شيرين : لا بس البارحة جنت اقرة كتاب حلو واشوية اندمجت ويا ..

احلام :هم كتاب .. واريد اشوف تالي هلكتاب وين يوديج ..

شيرين : سكتت محجيت وكملت شكلي ماردت تخرب واهسي .. ردت تكمل بسرعة حتة اصعد اسبح وابدل ...

خلصنا كلشي ..

باجي خلصت حروح اسبح ..

احلام : ليش شكو شعندج سابحة هسة ..خايفة لا تفوتج الزفة عيني ..

شيرين :لا بس عيب حيجون خطار واني هدومي تدمرن وصخ وزفر مال سمج ..

احلام: ليش انتي منو كلج حتكعدين يم خطار .. من شوكت انتي كاعدة وياهم .. اليوم شكلج مو طبيعي شكو ..

شيرين: ماكو شي بس كلت اذا اجن خواتي ويا بيت عمي نشأت اكعد وياهم ..

احلام: وشجاب خواتج علة بيت نشأت .. شوفي شيرين وضعج معاجبني ...اذا جان ابالج شي ..
صدكيني ادمر حياتج ...

شيرين: شنو الي بالي باجي .. هاهية اسبح وابدل وماانزل .. حتة لو مراح اكعد يمهم بس هم لازم اسبح ..

احلام: ثرمي الزلاطة وولي مبقة شي ويجيون ..

شيرين: انغثيت حيل بوكتها .. جنت اثرم واحس بلعومي يوجعني من العبرة ..
ادري مو بشر اني .. ليش متقبل انزل ويا الخطار ..
يعني بكل عزيمة اني الي اطبخ واحضر .. والي يسأل تكول هية طبخت .. وهية بس تفرت فوك راسي ..

ربي صبرت وراح اصبر واشوف تاليتها ...
كملت ورحت كبل سبحت وصعدت لغرفتي .. ضليت ابجي لحد ماغفيت ..

كعدت تقريبا ورة دقايق على بوس بخدي .. فتحت عيوني والكة خواتي جايات ...

كمزت وحضنتهن واشهك بجي ..

شيلان: ولج شكو شبيج .. ليش هيج مسوية بنفسج ..

ديلان: شيرين شبيج ماما ..

شيرين: تعبت عاد .. والله تعبت .. يعني اني مو بشر حابستني هنا كل ميجي احد ليش .. يعني كل مايجي خطار لازم اختفي .. ممسويتلي اي اعتبار او وجود ..

يعني طبخت وكملت وخلتني احبس روحي فوك مثل كل مرة ..

ديلان: شو كومي كدامي لبسي شي حلو. وتعالي ويانا ..

شيرين: لا عليج الله والله تذبحني اذا نزلت ..

ديلان: كومي كتلج .. اني احاجيها عود ...

شيرين : كمت عدلت شكلي وحطيت الربطة على شعري .. ونزلت واني اقدم رجل وااخر رجل من الخوف ..

راحت ديلان قبلي تحاجيها .. ماعرفت شنو كالتلها بس شفتها هزت راسها بقبول ..

وصلت جان محد جاي بس بيت عمي سيروان ..
طبيت سلمت ..طبعا الكل استغرب من وجودي

سيروان : يا هلا .. والله بعد وكت همزين تنازلتي وجيتي كعدتي ويانا ..

ديلان: عمو شيرين كلش خجولة وتستحي تكعد يم الخطار ..

سيروان: واحنا بيت عمها مو خطار ..

شيرين: اسفة بس مو بيدي ..  قاطعتني ديلان

ديلان :امشي نحضر الاكل عما يجون بيت عمي نشأت

شيرين: رحنا للمطبخ ...اول مطبينا كرصتني بيدي ديلان ..

ااااخخخخ شبيج ليش كرصتيني ..

ديلان: من اني احجي انتي تسكتين تريدين تسويلنا مصيبة .. ترة باجي على اعصابها خلتج ..

شيرين :صدك انتي شكتليلها وقبلت ..

ديلان: بعدين اكلج مو هسة ..

شيرين: اهوووو تدرين بية فضولية ولازم اعرف .. حبابة احجي ...

ديلان: اهووو لتباوعيلي بهاي النظرة ..
..يلة كافي راح احجي ..

شيرين: اي حبابة ..

ديلان: كتلها عمي نشأت ومرتة يريدون يشوفون شيرين ترة همة جايين حتة يشوفوها ممعقولة متنزل عيب منهم ..وقبلت ..

شيرين: وليش يشوفوني ..

ديلان: بس لا صدك متدرين ..

شيرين :غير تحجي شكو . ..

ديلان :بابا انتي مخطوبة ومتدرين ..

شيرين: المن .. بس لا لابن عمي نشأت ..

ديلان :هلو هلو وشمدريج عيني ..

شيرين: لا بس قبل مدة طويلة سمعت بالصدفة بهذا الموضوع .. بس عبالي رفضو لان محد فتح وياي اي شي..

ديلان: يلة عادي كلنا هيج .. متعرفين ابوج عندة المرة والنعال سوة ماكو لا احترام ولا تقدير .. بس احلام تختلف ..

شيرين: اششش صوتج لا تسمع ترة حتة جهالها يلقطون الصوت من بعيد ...

ديلان: ههههه وشدعوة هلخوف منها لازم بعدها شادة وياج ..

شيرين: يا شادة وياي .. ولج يعني تخيلي اذا واحد من جهالها جاب درجة مو زينة بالامتحان احسبي الكتلة والرزالة صارت بية زين اني شكو بيهم ..

ديلان: اي صدك انتي شكو ..

شيرين: تكلي بس فالحة تقرين بالقصص والروايات ومابيج خير تدرسين اخوتج ...وكومي ولمي كتب مازن وحركيهن ع الطباخ خلت مازن يصير اعصاب بس ماحجة يخاف علية لا تكبر لان يدري بابوية من تكبر يحاسبنا النا مو الها ..

ديلان: اوف يعمري الله يساعد كلبج .. انشالله تزوجين وتخلصين ..

شيرين: انشالله الله يفرجها علية .. والله تعبت والله .

ديلان: ياحبيبتي شبيدي عليج ..يلة خل نحضر المواعين هسة على جية بيت عمج ..

حضرنا كلشي وبقة بس الصب .. ورة نص ساعة اندكت الباب .. احس كلبي اندك ويا ...

يعني احساس حلو صارلي .. رغم مصارلي فترة من عرفتة وحتة كلام مدار بيناتنا غير مرة وحدة .. بس ليش هيج احس ..

راح ماجد فتحها ودخلهم .. اول مدخل عمي ومرتة .. سلمو علينا وهم استغربو وجودي ..

دخل هوة وراهم واوووف ياكلبي شصار بي ..
ماانسة نظرتة الي وهوة صافن علية ويسلم علينا ..

دنكت وارتبكت من نظراتة .. بعدين انتبه على روحة وحمحم ودخل للاستقبال ...بس بعديش ..بعد ما كلها انتبهت عليه ونظراتة جانت مفضوحة ..

رحنا نحضر ونصب الاكل .. واحس جسمي يرجف ..

شيلان: شكو شيرين شبيج ترجفين .. مريضة حبيبتي ..

شيرين: مادري اشو مدسيطر على جسمي ..

ديلان: امممممم كلتي مدتسيطرين ... حقج عيني ..

شيرين: شنو قصدج ..

ديلان: ههههههه لا ماقصد شي ... وغمزتلي .

شيلان: اكو شي صاير ومادري بي ..

ديلان: لا ماكو شي بس اختج كلبها رهيف متتحمل الدراما ..

شيرين: اهو انتن صدك مزعجات صايرات .. عفتهن ورحت بسرعة لان احس اذا ابقة اكثر افضح روحي ..

من طلعت انردمت بواحد .. رفعت راسي واجت عيوني بعيونة ... اوووف يعيونة .. سبتني سباية ..

هيمن: على كيفج شبيج طايرة .. لا تتعورين ..

شيرين: هااا لااا بسس .. اتذكرت شي وطلعت بسرعة ..

ضل صافن بعيوني ثواني وانتبه على نفسة انو احنة بباب المطبخ وورانا خواتي الي ضلن يتمضحكن ويتبسبسن ..

وخر ايدة الي جانت لازمتني من زنودي الي صارت بماكنها كهرباء من لزمتة ..  سووالي مجال .

هيمن: احم احم .  تفضلي فوتي ..

شيرين: من رخصتك ..

هيمن: اكول ديلان .. مازن موجود اشو ماشفتة ..

ديلان: والله ابوية كال عندة شغل اشوية حيتاخر يلة يجي .

هيمن: ها يلة لعد عبالي اشوفة ..بلكت الحك عليه.

ديلان: تلحك تلحك ابن عمي تلحك .ههههههه

شيرين: شفت هيمن ارتبك  من كلام ديلان الي ماكو شي عدها اسمة احساس ...
جنت واكفة وراهم بعدني مرايحة .. رجع اندار صرت بوجها .. كبل عفتة ورحت اركض ...

ضليت اباوع عليه  من محجر الدرج بدون مايحس .. جنت صافنة بطولة وضخامتة يشبه جسم ابوية ..

جان شعرة ينطي على شكار وعيونة جوزي .. وشواربة بلون شعرة ..

جان فارس احلام كل بنية خاصة بوضعي ..
جنت اباوعلة من يسولف ويا عمامي وولدهم ..

محسيت غير عينة اجت بعيني .. ييمة الفشلة .. طفرت مثل الواحد المنتول .. بس قبل لا ادير وجهي شفتة ابتسم .. وركضت للغرفة وكلبي يدك الف ..

اشوية وصعدت شيلان .

شيلان: هاي انتي هنا امشي ويانا دنصب وين رحتي ديلان تريدج تكول تعالي شيلي ويانا الاكل للسفرة منلحك حيكوم يصيح ابوية ...

شيرين: جنت عركانة وجسمي يرجف .. ماعرف شصار بوكتها بية بس احس وضعي تخربط ..

نزلت وياها وكبل رحت غسلت وجهي ونشفتة ورحت للمطبخ احضر ..

وكمنا نشيل للسفرة وطول الكعدة احس بي يراقبني ..

خلصو اكل وصبينا جاي ... كعدو يسولفون .. لهناك وفتحو موضوعي .. طبعا جنا مكاعدين يمهم همة بالاستقبال واحنة بالهول بس جان صوتهم مسموع وواضح...

شوان : اني كلت ماعندي مانع .. بس مو هسة الزواج بعدني مامقرر انطيها هسة ..

نشأت :شنو السالفة شوان .. كنالك هيمن جاهز ومكون روحة وشغلة خير من الله ..

شوان :بنتي وبكيفي واني اشوفهم ثنينهم مامستعدين للزواج خاصة شيرين .. مو حمل مسؤلية
واني ماريدها تفشلني وياكم ..

هيمن :هاهية عمي الي تشوفة بس بنت عمي الي ..

شوان: هية الك .. بس مو هسة ..

نشأت :انشالله يلة نترخص احنة مضل وكت ..

.....

شيرين: جنت كاعدة اسمع حجيهم والعبرة لازمتني

ديلان :هوة شنو ممستعدة للزواج اخاف بعد ماشبعو منها خدامة .. لعد هذا الطبخ منو سواه .

شيلان: اكيد قارين براسة ...

شيرين: عفية سكتو .. بس يسمعوكم تصيرلي مشكلة ..

ديلان: عمت عيني عليج يشيرين .. الله وين شمرج .

شيرين :الحمد لله .. ماضاقت الا فرجت ..

ديلان :حلوة هاي الحجاية منين جايبتها ..

شيرين: قريتها بكتاب من الكتب الي يجيبها مازن ..
قول الامام علي ..تدرين كل ما اختنك واحس الدنيا صغيرة اتذكر هاي الجملة كلبي ينشرح ..

شيلان: انشالله الله يفرجها عليج ويريحج ..

ديلان: يلة ديصيحون علينا الظاهر احنة هم دروح ..

شيرين: عليجن الله تعالن مو تطولن ترة اختنك والله..

شيلان: والله لو بيدنا نجي يومية بس تدرين الوضع شلونة ..

ديلان: الله كريم حبيبتي تحملي شكم شهر وتتزوجين وترتاحين ..

شيرين: الله كريم ..

راحو كلهم ورجع البيت فارغ علية رغم الموجودين بس احس بفراغ رهيب ..

ورة نص ساعة اجة مازن وسويتلة غدة وكعدنا نسولف اني ويا وماجد ..
سولفتلة على اليوم ومنو اجة وماجد نبص بنص السالفة ..

ماجد :ولك غير طلعت شيرين مخطوبة ومندري ..

شيرين :باوعت كبل لمازن وكعت الخاشوكة من ايدة ..

مازن: شنو .. المن وشوكت .. وليش احنا مندري

ماجد :والله اني هم اليوم صفنت من طلعت مخطوبة لهيمن .. ومو بس هاي من قبل كم شهر ومحد يدري ..

مازن: وهيمن النهار كلة يمي وميكلي .

ماجد :ميدري احنة مندري حتة تفاجأ من سألتة وكتلة شوكت خطبتوها ..

مازن: بيها الخير هيمن خوش ولد ..  وانتي شيرين شنو رأيج قابلة بي ..

شيرين: ليش يعني اذا رفضت ابوك راح يتقبل رأي اكيد هم راح يجبرني وغصب اقبل ...

مازن: شيرين ماعاش الي يجبرج لو اعرف انهزم بيج ولا اخليج تتزوجين غصب ...

شيرين: مازن لا تسوي مشاكل مابية حيل تعبت منها ترة كل فعل تسوي يصير براسي ..
واطمن مو هسة الزواج .. بعد.مندري شوكت .

مازن: الله كريم ..
.............

شيرين: مرت الايام ويوم عن يوم يزيد حبي لهيمن .. حتة هوة هم كمت احس بي يحبني ..

جانت نظراتة الي وكانما يسولف وياي .. جان يعرف مكاني دائما من يجي يريد شي يباوع على شباك الاستقبال الي دائما اوكف واباوعلة .. جان يضل يتمعن بية .. واني اظل اباوعلة .. جنت عايفة الخجل من نظراتة كل ااي اريدة اشبع منة شوف بهلثواني .. ماريد اتندم على ثانية تروح بدون ماشوف طولة وهيبتة ...

مرت اكثر من سنتين .. والوضع مثل ماهوة .. ماجان يدور بيناتنا كلام .. بس مجرد نظرات كفيلة تعبر على الي بداخلنا ..

اكثر من مرة يجي ويفاتح ابوية بموضوع الزواج بس  ياخذ نفس الجواب ...شيرين مامستعدة للزواج ...

يطلع وهوة مكسور خاطرة ...
ماجنت افهم تخطيط ابوية وباجي شنو ...

رغم اني مثقلة عليهم .. بس ميريدون ينطوني لهيمن ..

زين ليش مايكلولة منريدك .. ليش يشلعون كلبة .. اشبع قهر من اشوف نظرة عيونة وهوة يباوعلي بترجي اسوي شي ...

ميدري الحال من بعضة .. اذا هوة يكدر يحجي اني اذا اتنفس بصوت كبال ابوية احتمال يكتلني خلاص ..

جنا نتعذب ثنينة ..

جانو يجوني خطاطيب هواي .. جانت باجي احلام تكوللهم ابن عمها حاجزها ...

لحد ما بدت الناس تعرف اني لابن عمي ومحد بعد دك بابنا ....

جان هذا الشي مفرح الي .. خصوصا زاد املي من عرفت محد حياخذني غير هيمن ..

جنت اطير من الفرح وعيوني تدمع بالشوك من يمر طاري اسمة ..

حبنا غريب .. رغم ماكو كلام بيناتنا. بس احس بي يعشقني مو بس يحبني ..

خصوصا حيصير اكثر من سنتين هوة حاجزني بس لا خطوبة ولا حلقة ...

لو غير واحد هم يمل ويريد خطيبتة يسولف وياها يتعرف عليها ...

احنا جان حسرة علينا نتشاوف ..
...

مرة اندكت الباب ... جانت باجي بالحمام ومحد يفتح .. رحت حطيت الربطة وطلعت اشوف منو ..

شيرين: منو .
سمعتة يحمحم ..

هيمن: احم احم .. اني اني... هيمن.

شيرين :يمة طار كلبي ..  عبالك مو كال اني احسة احتواني بهاي الكلمة ...

ارتبكت وترددت افتح لو لا ... باوعت لباب المطبخ ولباب الاستقبال .. شفتها فرصة اشبع منة ..

رحت فتحتها وصار بوجهي ..  التقينا عين بعين ..
التقت نظراتنا سوة .. ضلينا ماعرف شكد بس صافنين بعدين حسيت على روحي ..

دنكت .. تفضل .

هيمن: رايدج ..الج .

شيرين: رفعت راسي متفاجأة بكلامة .. شنو

هيمن: تعبت اريدج يمي لوين اضل اتحسر على نظرة منج ..

شيرين: ضليت امتمت وهوة يسولف  واتلفت لا تسمعة باجي .

حباب صوتك لا تسويلي سالفة وروح منا اذا متريد شي ..

هيمن :حسي بية وبناري .. ولج ميت شوك الج .  ولعيونج الخبلني .. ارحمي حالي وكليلي يبنت عمي رايدتني لو لا ...

شيرين: قبل لا افتح حلكي حسيت شعري راد ينشلع من راسي .. ماشوف الة باجي جارتني من شعري ووكعتني بالكاع .. وهيمن صاح بيها ..

هيمن: هيييي انتي شبيج وياها ... ليش هيج .

احلام: انت اسكت وتطلع برة لا اعيط وافضحك .. اكوللهم تهجم علينا ..

هيمن: شنو هاي الحجي بيت عمي هذا وشيرين باعتبار خطيبتي والدنيا كلها تدري .. واني جيت حتة اشوف عمي لان رادني بشغلة وكلي انتظرني بالبيت ..

ااحلام: كلك انتظرني مو اكعد حاجي بنتة ..

هيمن: محاجي وياها شي مو زين .. جنت اسألها ..

شيرين: جانو يتناكرون فوكاية وباجي لازمة شعري وتفر بي .. جرتني من شعري الي طلع من الربطة لان ملخت راسي .. وهيمن ميكدر يتقرب عليها ويوخرني ..

سحبتني لجوة البيت ... راحت جابت العودة الي دائما انظرب بيها جانت يسموها خيزرانة ..

احلام :بنت الحيوانة .. تريدين تفضحين ابوج لازمة البيبان وتسولفين ويا الولد .. هاي بس غفلت عنج ربع ساعة حتة اسبح الكاج بلباب الله اعلم شسوين من اطلع ..

شيرين: جنت انضرب واسمعها تحجي علية وحتة شتايم جانت تشتم علية وعلى امي ..

مالي حق ابرر او اعارض لان يزيد العقاب .. وماكو الي يحميني منها ..

جنت اكتم صوت صياحي حتة هيمن ميسمع ..  فشلانة منة حيل ..

ملخت جسمي بالضرب .. وراها كالتلي ..

احلام: لج تصعدين فوك وماريد اشوف خلقتج والي صار اذا تكرر اوصلة لابوج وتعرفين ابوج بلا شي هوة مطايقج مو نوب عااار يا عاار ....

شيرين: يعني مراح تكوليلة ..

احلام: وتريديني اجلطة حتة يموت دتفرحين انتي واخوتج ... والله لاكلب حياتج جحيم .. فاهمة .. جحيم اسويها .. ولا اخليج تتهنين  ..
وووولي من وجهي ..

شيرين: كمت اسحل بروحي .. واسند نفسي وسرعت مشيتي كوة ... اريد اخلص ..

صعدت لغرفتي وحبست روحي بيها ..
ماطلعت منها ابد .. وسويت روحي نايمة من اجو اخواني .. ماريدهم يشوفون حالتي ..وهية جانت تضرب بس بالجسم .. ما تقرب للوجه حتة مايبين اثر بوجهي ويدري بيها مازن ..

جنت احسها اشوية تخاف منة ..لان مازن جان يعاندها بكلشي ...

مر اسبوع واني حالتي نفسها حابسة روحي .. كمت اكره حياتي .. تمنيت الموت والحك امي ..

محد يحس بمعاناتي .. اخواني صرت ابتعد عنهم .. اتحجج بمرض لو نعس .. بس ماعفتهم وقصرت بواجبي تجاههم جنت اكمل شغلي واصعد اغطي راسي وابقة هيج ..

بليل تفاجأت من سمعت بعمي نشأت ومرتة جااين يشوفوني .. صاحني رزكار ..

زركار: شيرين امي تصيحج ..

شيرين: جيت ماشي ..
نزلت بعد ما رتبت شكلي .. وعدلت الربطة .. ونزلت ..
سلمت وصار بوجهي هيمن .. دنكت راسي كبل ..

حجت مرت ابوه لهيمن لان امة متوفية من هوة صغير ..

تهاني : شلونج شيرين جينا نشوفج اليوم ..

نشأت: نسأل عليج دائما كل منجي ليش متقبلين تنزلين ..

شيرين: رفعت راسي متفاجأة من كلامهم .. اجت عيني بعين هيمن .. دنكت وكلت ..
استحي اطلع ..

تهاني: ميصير.. حتصيرين جنتنا .. غير نتعرف عليج نشوفج .. لحد هسة مكاعدين ومسولفين ..

احلام: انشالله الله كريم خانم تهاني ..

شيرين: ترخصت ورحت اسوي ضيافة الهم ...
كملت ورحت قدمتها الهم . .. واني طلعت .. لان باجي غمزتلي بمعني طلعي منا ..

رحت لغرفتي ... سديت الباب وحطيت المخدة بحلكي وصحت ...اااااااااااخخخخخ كللللببببي ..

جنت اعيط بهستيريا بس مينسمع الصوت .. لان حاصرتة بالمخدة ...

جنت حيل مختنكة ..  وحيل كاتلني الشوك الة ..
ربي لو تاخذني ولو تخلصني متت والله متت من الصبر .. ليوين اضل اكول تهون ... اشو ماهانت .. كل ماجالها تصعب اكثر ....

..... يتبع .....

تحياتي Aseel ..

لاتنسو التصويت... احبكم .

فامان الله