دراويش

دروايش ٣٥

#دراويش
بقلم #روز_الفياض
ح٣٥
.
.
.
الديرة المابيها حسكم .. طافية بخدها السوالف ..💔
.
.
وفاة اخوي غيث كسرتني ..
كسرتني حيل ..
خلت الدنيا سودة بعيني ...
ليل ونهار ابجي ..
ليل ونهار افتر بالبيت واتذكرهم ..
شوية بغرفة امي وابوي وشوية بغرفة غيث وشوية اروح انفض همومي بغرفة ليث ...

بقيت وحيدة .. لولا وجود سيف وياي جان فقدت عقلي ...
بهالفترة اركان خطية هم خاف على نفسه وعلى عائلته ..
اخذهم وسافروا ..
فرغ علي البيت ..
محد وياي بس ابني ..
اخلص الليل اراقب خاف احد يدخل علينه ..
من سافر اركان كلي :
ام سيف اني رايح بس مااعوفج .. بس اوصل راح احاول اجيبج ..بس ارتب اموري .
آمنة :
توصلون بالسلامة ان شاءالله طمني عليكم من توصلون لتشلع كلبي عليكم اركان وتنسى محد بقالي غيركم ..
اركان :
الله كريم ..

وفعلاً بس وصلوا اتصل بيه :
آمنة حصلتلج واحد يسوي جواز لسيف ..
آمنة :
اه ..وين ؟

انطاني عنوان وكلي :
هذا الجواز منه عبالك طالع من الجوازات مو تزوير .. صح اسعاره غالية بس بضمانتي ..
آمنة :
خايفة ..
اركان :
لتخافين اذا مصارت اني ارجع عليكم اخذكم كتلج مااعوفج لو اعرف انكتل ..
آمنة :
لايمه .. اسم الله عليك خويه .. الله يحفظك لزوجتك وعائلتك ابد لتشيل همنه .. ربك ميقصر .. يسد باب يفتح عشره .

اخذت عنوان المزور ورحتله ...
لبست جبه ورحت على ولد صديق اركان هو اللي يعرف المزور ومتفق وياه على كل شي .،
اتفاجات بوقتها طلب مني عشرين ورقة ..
جانت كلش هواي بعد السقوط .. تقريبا سعر سيارة ..
فكتله :
ماعندي هالمبلغ ،
جاوبني :
شالقصة غير انت دكتورة ..
آمنة :
صحيح بس مجوه ايدي هلكد فلوس .. الوضع مو مال اخلي عندي هيجي فلوس ..

حاولت وياه بس بقى مصر مقبل ينزل ..
آمنة :
احاول ادبرلك المبلغ ... بس بشرط ..
جاوب :
شنو ؟
آمنة :
اريد الجواز بغير اسم واريد وياه مستمسكات كاملة كلها تمشي وتتطابق مع الجواز المزور ..
كلي :
بس هاي تكلفج هواي ...
آمنة :
شتكلفني بعد اكثر كافي ( ٢٠) ورقة ..
كلي :
لا وين كاعدين اني شغلي طبق الاصل بأختام الحكومة يعني جنج مطلعة جواز اصولي من الجوازات ..
آمنة :
شكد يعني ؟
كال :
كلهن يصيرن تلاثين ورقة .

حاولت وياه بكل طريقة بس مقبل ..
رجعت للبيت محتارة شسوي منين اجيب هالمبلغ ؟
حسبت الفلوس العندي طلعت ( ١٥) ورقة ..
متكفي بعد نص المبلغ منين اجيبه ؟

فتشت البيت كلت اكيد غيث شايل فلوس بالبيت ..
دورت غرفته ماكو شي ..
دورت غرفة ابوي هم ماكو شي ..
وين ممكن يكون مخلي فلوسه ؟؟
ماادري شلون الله الهمني وخليت كرسي وصعدت عليه اباوع فوك الكنتور مالت غيث ..لكيته مصفط الفلوس عالكنتور من فوك ..
نزلت الفلوس وحسبتها طلعت ( ٣٠) ورقة ..
الحمدلله والشكر ..
ثاني يوم اخذت الفلوس ورحت لصديق اركان :
بالله وبيك تره والله العظيم هاي الفلوس مو الي اقسم بالله ..

راح وده الفلوس للمزور وكلي فد اسبوع ويخلصهن ..
سيصبرني اسبوع ،.
ثاني يوم اجه كريم ...
اندك الباب الساعة ب ( ١١ ) بالليل ظليت ارجف ..
منو جاينه بهالليل ؟
وظلمة طافية الكهرباء ..سيف توه نايم واني كاعده يم راسه مااكدر انام من الخوف ..
كاعده ومخلية يمي سجينه .،
كل شي يصير الدنيا تخوف وبدا التسليب والقتل وخاف يدخلون علينه اني وابني ..
فتحت الشباك مااشوف منو ..
رجع اندك الباب حيل صحت :
منو ؟؟
جاوبني :
اني اني .
آمنة :
منو انت ؟
كريم :
ابو سيف ..

رحت اركض للباب وكفت وره الباب شفته هو بس ملثم فتحتله الباب ودخل جوه ..
كريم :
شلونكم ؟
آمنة :
وينك ؟ وين جنت ؟ شهر وانت مختفي ؟
كريم :
ويني يعني .. مختفي خاتل .. 
آمنة :
عالاقل اتصل طمنه .. اسأل علينه ..
كريم :
بلا لغوه .. مو وكتج هسه .. اني جاي بالبوكة الناس تدور علي ..
خلصيني ..
آمنة :
ياناس ؟ ليش يدورون عليك ؟
كريم :
اذا طاح الجمل كثرت سجاجينه .. شافوني طحت طلع الف حافي والف مجدي يدورون وراي لان نظفت البلد من امثالهم .. نظفت البلد من هالجلاب وهسه طلع الهم صوت وظلوا ينبحون ..
آمنة :
قصدك اهالي الشباب اللي عدمتهم ..
كريم :
جلاب .. جلاب وفطست شيردون هسه .. المفروض كلهم احركهم .. هذوله الحثالات الجنتي تعرفيهم .. شفتي شلون شفتي شلون طلعوا هسه مدوا راسهم يردون يطالبون بدمهم ..

بقيت ساكته واني افكر سبحان الله دارت السنين وراح المنصب وراحت العلاقات والصيت ..
اجه وقت تسديد الدين .. الله حق مينسى حق بشر حاشاه بعد كل هالسنين يافؤاد بعد كل هالسنين حقك وحق غازي وتغريد ودريد ومحمود الله راح ياخذه الكم ..
الله راح يقتصلكم من كريم ..
دمعت عيوني واني خايفة نكون اني وابني جزء من هالقصاص ..
كريم :
لموا غراضكم .. خلونه نروح مادام ظلمة الدنيا وطافية الكهرباء .
آمنة :
وين نروح ؟
كريم :
نشرد .. ننهزم خو متردين نبقى هنا لحد ميجون يكتلوني هالمرتزقة ..
آمنة :
مرتزقة ؟؟
كريم :
دروحي روحي خلصيني لمي الاشياء الضرورية بس على كد الطريق .. وينه سيف ؟
آمنة :
نايم ..
كريم :
كعديه خل نروح بسرعة ..
آمنة :
نروح وين فهمني ؟
كريم :
اني متفق ويه واحد راح يهربنه ( قجق ) للبنان ..
آمنة :
يمه ؟ بهالبرد والضيم تريد تاخذنه اني وابني تبهذلنه بالتهريب وتبقى هناك هم عايشين بكسافة لان داخلين للبلد بصورة مو اصولية ؟؟
كريم :
شتردين ؟ شتردين اسوي ؟ اروح اسلم نفسي للامريكان ؟
آمنة :
اصبر عالاقل لحد ميهدأ الوضع ..
كريم :
ثوله انتِ ثوله ؟ اكلها الناس يدورون علي يردون يكتلوني تكول نتتظر لحد متهدأ الاوضاع .. غبية متصيرلج جاره .. هسه من يكتلوني ويكتلون ابنج عود ارتاحي ..
آمنة :
اسم الله على ابني ..
كريم :
دورحي فضيني روحي كعديه ولمي اغراضكم ..

رحت الم ملابسنه وافكر.. اخاف نروح وياه وينلزم ويروح ابني مني ينقتل مثل غيث بلا ذنب ..
يمه وليدي .. اسم الله عليه ..
لا لا منروح وياه ..
ويمكن هاي هي فرصتي اخذ ابني ونسافر بحدنه بدون محد يعرف لاكريم ولا غيره ..

ذبيت الملابس ورحت كتله :
احنه منكدر نروح اذا تريد اخذ ضحى وجهالها وروحوا ..
كريم :
شتخربطين انتِ شنو مترحين ؟ شنو متكدرين ؟
آمنة :
مااروح وياك .. بالله لزموك الامريكان لو غدر بيك المهرب ؟ ابني شنو ذنبه يروح مثل مراح غيث الله يرحمه .
كريم :
لج شتحجين انت شنو مترحين غبية .. ثولة .. خلصيني مااكدر اتأخر الفجر نطلع ..
آمنة :
روح .. محد لازمك احنه منروح اني مااجازف بأبني واروح وياك شنو بزون لاكيته بالشارع واجازف بعمره علمودك .. روح انت وين متريد تروح الله وياك بس اني وابني لا ..
كريم :
ايا ساق.... طلع صوتج هسه وظليتي تعارضين وترفضين عبالج طحت وطلع لسانج ؟ اني الج اني إلج .. بسيطة اذا مخليتج تتوسلين تطلبين بس ارجع عليج اخذج بسيطة ... وابني اذا صارله اي شي الا اذبحج بمكانه .. وتعرفين كريم يسويها ... لوما مستعجل جان دست ابطنج وخليت المنطقة كلها تتفرج على كتلتج .. صارلج هواي ممضروبه ومنهانه .. طلعت عينج ياسگط يا بت السگط ..
آمنة :
خلصت .. روح كريم روح .. روح واكفينه شرك وياريت لو تطلكني ..

جان طالع من كتله هيج التفت علي :
هاا دزلج خبر كلج بعدني عدل ؟؟ ها ساق.... خابرج وتردين تبقين علموده ؟؟ تفففف على شكولج النكسة ... تموتين ومتطلكين تموتين .

طلع يركض بالظلمة وراح ...
رحت وراه قفلت الباب ودخلت لكيت سيف كاعد بفراشة كلي :
ليش بابا دوم يتهمج عندج شي ويه واحد ثاني ؟

ظليت متحنطه ...
بعدين بلعت ريكي :
ابوك لاذمة ولاضمير ولامخافة الله ..
سيف :
ادري هو مو يكول يحبج ؟ شلون يغلط عليج اذا يحبج ؟
آمنة :
نام ماما نام .. ابوك ميحب بس نفسه ..
سيف:
ليش مقبلتي نروح وياه ؟
سيف :
طريق ابوك خطر .. مااريدك تتأذى ... البعد عن ابوك امان .. هسه الناس تدور عليه تريد تاخذ حقها منه ..
سيف :
ياناس ؟
آمنة :
ابوك اذى ناس هواي من جان يداوم .. هسه هاي الناس اللي اذى اولادها تدور عليه حتى تاخذ حق اولادهم اللي ماتوا منه ..
سيف :
يعني بابا مجرم ؟؟

بقيت ساكته مااريد اصدم ابني .. هو هسه مراهق وخاف يتأثر بكلام الناس ويسوي بنفسه شي ..
مرت الايام واني بمنتهى القلق ماعندي احد بس اني كريم اختفى واركان سافر وليث اخوي هو وزوجته طلع لجوئهم من زماان وتركوا عمان وراحوا لامريكا ..
محد بقالي واخاف على ابني اخلص الليل افتر على بيبان البيت واراقب خاف يدخلون علينه اني وابني بسبب كريم .. لو لان اني دكتوره .
اسوء الايام واكثرها رعب لحدما اجه الولد جاب الجواز والهويات يالله جريت نفس ..
هسه شسوي ؟ اتصلت على اركان كتله :
استلمت الاوراق والجواز وكل شي تمام ..
اركان :
واني راح ادزلكم سايق ثقة يجيبكم لهنا ..
آمنة :
هنا وين يعني ؟
اركان :
اجيبكم هنا يمي بسوريا ..
آمنة :
ليش مو لعمان ؟
اركان :
عمان كلها جماعة كريم هسه هو اكيد يروح وراهم هناك .. اذا اجيتوا لسوريا عالاقل يمي واكدر احميكم ..

وفعلا سافرنه لسوريا ... سافرنا بالسيارة وطريق مرعب موحش وطويل ومابي ملامح حياة بس سيطرات الامريكان تلاكينه كل مدة وسيارات مثلنه ناس رايحة هاجه من بلدها بس قليلة ..
الطريق تقريباً تسع ساعات لكن بسبب كثرة التوقف للسيطرات الامريكية زاد الوقت بعد ساعتين ..
كل شوية يوكفونه يباوعون داخل السيارة يشوفونه عوائل وخلونه نروح بعد ميشوفون الجوازات .
السيارة جان بيها اني وسيف وعائلة صغيرة مكونه من اب وام وبنات اثنين ..

كلما نوكف يم سيطرة ينقبض كلبي اخاف يكتشفون جواز سيف مزور ..
الحمدلله عبرنه ودخلنه للاراضي السورية يالله ارتاحيت .. كان اكو سايق ينتظرنه يحمل بيده يافطه مكتوب عليها اسم سيف الجديد بالجواز ( سيف محمد خالد ) ..

اخذنه السايق لمكان تواجد اركان وعائلته وصلنه للسيدة زينب الي تبعد عن جنوب العاصمة دمشق مايقارب العشرة كيلومتر اركان كان ينتظرنه هناك ..
من شفت اركان حسيت بالراحة والامان ..
اخيراً اني وابني بأمان واخيراً يمي احد من اهلي ..
اخذنه لشقة جانوا مستأجريها ..
شقة جبيرة ومخصصين بيها غرفة النه اني وسيف ..
واستقبلتنه زوجته و مرت عمي بدموع الفرح بسلامتنه ..
بقينه يمهم اسبوع بس خفت نكون ثقال عليهم وينحرجون من عدنه وسيف احسه محرج ميكدر يتحرك براحته ..
طلبت من اركان يشوفلنه شقة زغيرة وتكون قريبة عليهم .
اركان :
متضايقة من شي ؟
آمنة :
لا ابد والله بس اني مااخذ راحتي وسيف هم يستحي ..
اركان :
اني اطلع من البيت وانتو ابقوا اذا تطلعون ابقى بقلق ..
آمنة :
لا لا والله ازعل عليك انت اخوي ميضايقني وجودك بالعكس .. تذكرني بغيث الله يرحمه ويطول بعمرك .. انت مثله من اشوفك جاي عبالك شفته .. بس سيوفي يستحي واني مااريد اضايقكم اخاف زوجتك وعمتي مياخذون راحتهم بوجود سيف .. وسيف يعتبر غريب عنهم ..
اركان :
شتحجين ؟ آمنة سيف ابنه .. انت مو ربيتيه ؟ انتِ شتحسين ؟ مو تكولين ابنج ؟

هزيت راسي اي وطاحت دموعي كلي :
وابنج ابنه ... هذا ابنه .. احنه ربيناه عمي رباه وغيث الله يرحمهم وليث .. وانتِ انتِ امه مادام انت ربيتيه معناها ابنج وابنج ابني ...
شيلي هالافكار من راسج واخذي راحتج بالبيت لان احنه مرتاحين ماعدنه مشكلة الشقة جبيرة الحمدلله ..

جنت محرجة حيل من اركان ..
احس بعدها مشاعره القديمة موجودة .. جنت اسأل نفسي معقولة بعد كل هالسنين مانسى ؟؟
وارجع اجاوب نفسي ليش انتِ نسيتي ؟؟؟
مااكدر انسى ..
كريم عيشني حياة تعيسة .. خله نفسه بموقع مقارنة مع فؤاد بكل موقف وبكل تصرف وبكل كلمة ..
آآخ يافؤاد ..
مشتاقتلك ..
اي مشتاقتلك .. اول مرة اكول هالكلمة من هالسنين ..
احس هسه يالله اتحررت ..
شكد جنت احبك .. ويمكن لازلت .. اتمنيت لو عندك قبر واروح ازوره كل مدة ...
بس حتى قبر ما إلك .. ماكو الك شي غير الصور اللي جنت اطلعها بسكوت من كريم اشوفهم واحضنها واكحل عيوني بشوفتها وارجعها تحت الجرباية ..

بهاللحظة اتذكرت الصور .. رحت للغرفة فتحت جنطة الاوراق المهمة وطلعت الصور ...
فرشتهم عالجرباية ..
اريد براحتي اشوفك هسه ..
اشوفكم كلكم ..
بدون خوف لامن كريم ولامن غيره ..

صبت دموعي وشوية شوية بدا يعلى صوتي واني اباوع لصورة امي وابوي وغيث ..
دخل علي سيف من سمعني ابجي :
ماما ؟ شبيج ؟

هزيت راسي ماكو شي ..
كعد بصفي وحضني :
ماما انتِ قوية ..
آمنة :
خليني شوية اضعف .. خليني شوية اطلع من القهر اللي بكلبي ..
سيف:
اذا انتِ تضعفين اني منو يقويني ؟؟؟
بسته وحضنته وظليت ابجي حيل :
تعبت ياسيف يايمه ... تعبت ...

بقى حاضني ويمسح على ظهري كتله :
امك تعباانه ..
سيف :
بعدج شابة امونه ههه ..

ابتسمت مااريد اقهره واضوجه كتله :
مادام انت وياي اني مااريد شي من الدنيا انت فرحتي وعزوتي واهلي واصدقائي ..

بقى كاعد يمي يباوع عالصور ويسألني :
هذا منو ؟
آمنة :
هذا غازي الله يرحمه .. دكتور غازي .. جان وياي بالكلية ..
سيف :
شلون مات ؟

رجعت عيوني دمعت ورجعت بجيت :
انعدم ... عدموه الميخافون الله ..

سكت سيف كأنما فهم اني اقصد ابوه ..
رجع أشر على فؤاد بالصوره :
هذا منو ؟ هاي اكثر من صورة واكف يمج ..
آمنة :
الله يرحمه .. هم جان وياي وهم مات ... جنه شلة حلوه ولد وبنات نسولف ونضحك وندرس .. الله يرحمهم ..
سيف :
كلهم ماتوا ؟
آمنة :
لا .. بس هاي البنية رشا يكولون كدرت تنهزم هي واهلها قبل ميلزمونهم الامن .. وامك هم بقت ..
سيف :
شسووا وعدموهم ؟شنو جريمتهم ؟
آمنة :
جريمتهم يعرفون امك ...

لزمت نفسي كوه حتى لاابجي بعد لان حسيت ابني ضاج ابني كبر ويعرف ابوه انسان مو نظيف ولانزيه يعرف ابوه اتصرف من خلال منصبه تصرفات مو من حقه يتصرفها ..
واستغل منصبه علمود يحقق امور شخصية مو محبة بالبلد والدولة .

شفت سيف ضاج كتله :
من اجينه لليوم مطلعنه خل ننزل نروح نزول السيدة زينب ابوك جان حارمنه هناك  ؟
سيف :
خالي اركان يقبل ؟
آمنة :
ميكول شي بس خل نشوف بيبي ام اركان تروح ويانه لو لا ..

رحت سألتهم ونزلنه كل احنه سوه رحنه زرنه السيدة زينب بنت سيدنا علي كرم الله وجهه وكعدنه هناك ساعة تقريباً المكان بي هواي عراقيين حسيت بالراحة ..
بعدين رجعنه مشي اتمشينه واشترينه سندويشات فلافل وكعدنه بحديقة عالطريق اكلنه وبعدين كعدنه نسولف ونضحك واركان اخذ سيف راحوا اشتروا كره وظلوا يلعبون شوية ورجعنه بالليل للبيت ..

مر على وجودنه بسوريا شهر بس اني ماارتاحيت ..لان سوريا هم جان بيها هواي من جماعة كريم الهاربين ..
فقررت اروح لمصر ..
وحجيت ويه اركان بالبداية اعترض لكوني وحدي وعلى كولته :
آمنة انتِ بعدج شابة وزغيرة الف واحد عينه عليج وابنج بعده زغير شلون ترحين هناك وحدج ؟ بالله صار عليج شي ؟
آمنة :
ميصير شي صدكني بعدين شيريد يصير بآمنة اكثر من اللي صار .. انت متعرف اني شنو شفت ويه كريم .. لو تعرف جان مخفت علي ..
اركان :
ابقى قلق عليج .. شلون اخليج ترحين وحدج آمنه ؟!!

بقى اركان يومين ضايج بعدين من شافني مصره ولحيت هواي وافق ..
وراح ويانه لمصر ضبطلنه كل شي ورجع ..
اشتريت شقة زغيرة بمصر حتى اضمن الاقامة غرفتين وصالة ومطبخ وصحيات ..
وحصلت شقة ثانية بعمارة قريبة استأجرتها كعيادة .. مصر جبيرة وبالذات القاهرة ومزدحمه وبيها عراقيين هواي لذلك مجنت خايفة من ناحية الشغل ..
سافر اركان .. رجع  لسوريا لعائلته بعد متأكد انه كل امورنه تمام ..
وبقيت بمصر اشتغل وسيف يدرس ..
عرفت كريم واهله مشتكين علي او رافعين علي قضية بحجة خطفت سيف ..
ورايحين لاهل امه ( سهام ) زوجة سيف الاولى ومحرضيهم هم يرفعون علي قضية وبنفس الحجه ..
اهل سهام زوجة كريم جانوا يخافون من كريم خوف مو طبيعي لدرجة من اتزوجت كريم ولحد مطلعنه من العراق ولامرة سألوا على سيف او اجوا شافوه حتى لو من بعيد ..
ماادري بيا عين رايحين مشتكين ...

اتواصلت مع ليث اخوي قررنه نبيع بيت اهلي لان منكدر نرجع وبنفس الوقت اني محتاجه فلوس لان سيف يريد يدرس بره ..
اذا خلص الثانوية العامة يريد يكمل دراسة بأمريكا يم خاله ليث ..
حصلت محامي وطلبت منه يعرض البيت البيع بس العروض اللي يقدمها عروض ضعيفة مو من مستوى مساحة وفخامة بيت اهلي ولا من مستوى اسعار العقارات اللي ارتفعت بصورة غير معقولة حسب مسمعت ..
طلب مني سيف اكثر من مره انه هو يروح للعراق حتى يبيع البيت ويرجع لكن اني رفضت ..
وبيتنه اللي هو بيت كريم كعدوا بيت ابن خالة كريم ..

وبيوم رجعت من العيادة ملكيت سيف بالشقة ..
اتصلت علية مغلق ..
استغربت وين راح الساعة بالتسعة نص بالليل هو حده للساعة تسعة لان يعرف اني ارجع بهالوقت من العيادة فيرجع للبيت حتى نتعشا سوا ..
وينه اليوم ؟؟؟
بقيت كل شوية اتصل عليه ماكو مغلق ..
وره ساعة اتصل بيه كلي :
ماما اني بسوريا ..
آمنة :
شنوو ؟
سيف :
على كيفج على كيفج .. لتخافين يومين او تلاثة وراجع ..
آمنة :
شعندك بسوريا ؟ شلون رحت ؟ شوكت ؟ المن رايح هناك ؟ ليش مكتلي؟؟
سيف :
هاي عود كتلج على كيفج هههه لتخافين ماما اني تره مو طفل وانتِ كله لازم بعلمج وبموافقتج ..
آمنة :
فهمني شتسوي بسوريا لا والله احجز واجي وراك هسه ..
سيف :
متحصليني ... راح اروح ابيع بيتنه وارجع ..
آمنة :
يمه !!!! تحجي صدك لك لو تريد تجلطني ؟؟ سيف ؟؟

بقى يتوسل بيه اهدأ ويحاول ميخوفني لكن اني دخلت انذار ...
ابني جان رايح الموت برجلية ..
راح للعراق رغم معارضتي وبعدها بيومين رجع جهازه انغلق وخلاني متت الف موته ..
خليت ليث يتصل على بيت ابن خالة كريم سألتهم عليه كالوا طلع ومرجع وعالاكثر انخطف ...
اني هنا انهاريت ..
اذا انخطف ابني معناها عرفوه ...
عرفوه ابن كريم وقتلوه ...
انهزمت لاخر الدنيا علمود احميه من كريم ومصايب كريم انوب راح للموت برجلية !!!!
بعد هاليومين اللي بقيت بيهم بالبيت لاشغل ولاطلعة ولاطبه ولااكل ولاشرب ولانوم وشبه انجنيت ... دك علي رقم من العراق ...
جاوبت :
الو الو الو 

ماكو جواب قطعته .. اتصلت اني على نفس الرقم دك شوية وجاوبوا :
الو ؟
آمنة :
الوو .. الوو سيف ؟سيف حبيبي ماما ؟ تسمعني ؟

بس سمعت صوته ظليت ابجي .. ابني عايش الف الحمدلله والشكر ..
حجيت وياه واتأكدت مابي شي وكلي يومين ويطلعوني ..
مصدكت هالكلمة اذا مخطوف فمعناها اكيد يردون فلوس بس كلي ميردون فلوس ..

فاجأني كلي اكو واحد يعرفج منهم !!!
ومن سألته منو انقطع الاتصال مجاوبني ...

اتخبلت بذاك اليوم من الرعب والافكار اللي اجت براسي وماعندي احد احجيله واشكيلة رحت للشقة المقابلي هم جان بيها عراقيين رجال وزوجته كبار بالعمر وعدهم ولد شباب دكيت عليهم الباب ابجي دخلوني عدهم وحجيتلهم على سيف شلون راح للعراق وانخطف متركوني وحدي من عرفوا وحاولوا يخلوني اهدأ ..

بقيت ادك على نفس الرقم بس ماكو جواب محد يرد جربت اتصلت من غير ارقام من العيادة من الجيران من حارس العمارة ماكو فايدة ..
مرت يومين أيست بيها ..
كلت مات ابني خلص .. بس رجعت اتصلت وجاوبني شخص :
الوو ؟

الصوت من سمعته حسيت رجفت .. قشعريرة بكل جسمي ..
عبالك السنين رجعت بيه وووووييين .. عبالك بعدني طالبة  وبعده فؤاد عايش ...
مثل صوت فؤاد .. معقولة هالسنين المرت خيال ..
لثواني شكيت بنفسي .. بذاكرتي .. بسلامة عقلي .. بس من رجع كال الو جاوبته :
الو .. الو ..

محد جاوب ..
رجعت كلت:
الووو الوو دتسمعني ؟ عفيه اريد احجي ويه ابني سيف الله يخليك اني امه ..

جاوبني نفس الصوت :
الو ..
اسمعج .. اسمعج ..
اني مو يمه حالياً بعيد ..
آمنة :
الله يخليك صارلي يومين اتصل على هذا الرقم محد يجاوب والله راح اموت من الخوف على ابني شتريدون انطيكم بس تركوه والله ماعندي غيره .. هو شنو ذنبه اذا ابوه جان بالامن هو طفل مراهق ..

بجيت واني اتوسل بي يترك ابني .. كلي :
لتخافين .. مابي شي .. محد سواله شي .. راح اخليهم يطلعوه بس لتخلينه يرجع للعراق مره ثانية ..
آمنة :
الله يخليك طلعوه والله فقير وماله ذنب اخذوني آني بمكانه وطلعوه هو اخذوني آني ... اريد ابني منك ..
فؤاد :
ان شاءالله يطلع .. لتخافين محد اذاه مااخلي احد يأذيه اطمئني ..
آمنة :
لعد ليش صار يومين متجاوب عالتليفون ؟ عليك الله اذا بي شي كول لتلوع كلبي على وليدي .. والله ماعندي غيره والله ..
فؤاد :
مابي شي بس اني جنت تعبان والتليفون مو يمي .. لتخافين كتلج مااخلي احد يأذيه .. احنه ناس دراويش مو مثل ممتصورة .. احنه مو مثل كريم ..

بقيت ساكته .. لثواني اخذتني الصدمة ...
دراويش !!!!
هاي الكلمة مسمعتها من احد طول عمري ..
بس من فؤاد ...
انخرست حسيت لساني انشل .
الصوت نفسه .. جذبت نفسي من سمعت صوتك بس هالكلمة محد يكولها غيرك ...بجيت .. حيل بجيت ... سنين عمري ضاعت بالبجي والالم وانت حي ...
كتله واني منهارة بالبجي :

فؤاد ؟؟؟
..... ابداعتي لتأذي ابني ..
مو ذنبه ابوه مو خوش آدمي ...

بقى ساكت ... كأنما انصدم لان عرفته ..
معناها فعلاً انت فؤاد ..
آمنة :
الوو ؟ فؤاد ؟ الوو ؟؟؟

جاوبني بحسره :
لتخافين آمنة .. كتلج احنه مو مثل زوجج ..

رجعت بجيت :
لخاطر المعروف اللي سواه ابوي وياك فؤاد ... اريدك تخلص ابني من الموت ..

جاوبني بعصبية :
كتلج احنه مو مثل كريم الكلب .. ابنج راح يرجعلج ..

اني هم صرت عصبية :
لا ميرجع .. ميرجع .. انت متعرف شي .. متعرف اي شي ..
فؤاد :
شعرررف ؟ شعرف ؟
آمنة :
اذا انت وجماعتك تركتوه غيرك ميتركه .. ابني ابوه عادم اوادم تفتهم شنو عادم اوادم ؟؟ مأذي ناس بكد شعر راسه ... فهمتني ؟؟؟
فؤاد :
ههه .. ههه .. هو هذا الشي المااعرفه ؟ اني اكثر واحد اعرف هالكلام ..
آمنة :
اني اخذته وسافرت حتى ميدفع ثمن اخطاء ابوه .. وهسه رجع من وراي .. رجع للموت برجليه ... المن اني انهزمت واتغربت ؟؟ المن ؟؟ رجع حتى يشلع كلبي ..
فؤاد :
اخطاء !!! كولي جرائم .. كولي مصايب .. كولي بلاوي ..
آمنة :
آآآه ... آآآه ... شتريد مني الدنيا بعد .. شتريد مني ...

سمعته يتنهد ويبجي يمكن :
اهدأي .. باجر يطلع ابنج .. خلاص .. لتبجين ..
آمنة :
عليك الله فؤاد تطلعه .. حلفتك بالله .. عليك بروح والدتك تطلعه وكون سالم مابي شي .. اني والده .. ام يافؤاد ام وابني ماادري وينه صار ايام مخطوف ..
فؤاد :
يرجعلج ان شاءالله ... لخاطر اثنين ابوي وابوج ..

سد التليفون وخلاني متخبله ...
اني صاحية لو مجنونة ؟؟
هذا حلم لو حقيقة ؟؟
هذا منو الجان يحجي وياي ؟؟
اذا مو فؤاد اذن منو ؟؟؟

خلصت باقي اليوم بجي وصفنات ودعاء ..
خفت اكون انجنيت ..
فقدت عقلي بسبب كل الي صار قبل وهسه ...
شوكت تطلع ياسيف وتجي .. شوكت اشوفك هنا يمي ياماما ...
ربي مابيه حيل المصايب بعد ..
تعبت وانت تدري شكد بيه تعب ..

بقيت الليل كله اتكلب مره اكول حلم ..
مره اكول واقع ..
مره اكول اتخيل .. التعب اللي عشته ويه كريم طلع هسه واثر على عقلي ..
لا الصدمة من اللي سواه سيف خلتني اتخيل ..
مستحيل يكون هذا فؤاد ..
مستحيل ..
فؤاد ميت صارله ( ١٤ ) سنة ...
لعد هذا منو ؟؟
وكل شوية اروح للتليفون اشوف الرقم حتى اتأكد عقلي مابي شي ولاجاي اتخيل هذا رقمه موجود وحجيت وياه ...
.
.

أصعب بكاء ذاك الذي لادموع بهِ ولاصوت بهِ يرتجفُ بلا عبرات ولاشهيق صامتاً يبكى بين العين وجفنها وبين الروح وظلها ...💔

.
.
.

صباحو كبدات قلبي ..
هالبارت بي امل واخيرا طلعت امنة وكدرت تنهزم ..
حبيت اركان وشهامته  رغم حبه الها محترم قرارتها ومحاول يفرض نفسه عليها وساعدها ووكف وياها ..
ووصلنه للبارت من عرفت فؤاد  💘

موقف صعب الله يعينهم اثنينهم ..

اوقعاتكم وارائكم ؟
لايك وتعليق وعشر ملصقات ❤️