دراويش

دروايش ٣٤

#دراويش
بقلم #روز_الفياض
ح٣٤
.
.
.

اشك برجعتك واتلاكفك خوف
واعزفك للظنون البيه نغمه
امنيتي علئ كد ماارمش انساك
اقل شي علئ بعدك كلبي اعلمه ..

.
.
.
بديت افكر فعلاً اروح الحج ..
بديت افكر اغير حياتي .. بأي لحظة بأي ضربة ممكن كريم يموتني ..
شمسويه لاخرتي ؟ ولاشي ..
صحيح اني اساعد هواي ناس ومحتاجين وصحيح اني ربيت طفل يتيم وصحيح ماأذيت بشر بيوم من الايام بس اني عندي خير من الله يعني اكدر اروح للحج .. ليش مااروح لعد ..
بس لازم بالاول تتحجبين ياآمنة ..

بديت اقنع نفسي بفكرة الحجاب ورحت اشتريت مجموعة حجابات وبديت اجربها على وجهي بالبيت ..
لازم اغير لبسي البس كله طويل بعد هاي التنانير القصيرة والفستاتين متفيد ..
لازم اتحجب حجاب صحيح ..

دخل كريم واني لابسة الحجاب وكاعده كبال المراية اشوف شكلي ..
بقى واكف يباوعلي بعدين ضحك وكال :
ها حجية هههه اليوم لابسة حجاب خيرج ؟

اعرف كريم ماعنده حرمة لالدين ولا لغيره فكلت خل احاول وياه بالعيني والاغاتي والدلع عسى ولعل الله يهديه ويسكت ..
آمنة :
ابو سيوفي عاجبني اتحجب .. انت تدري اني الحمدلله اصلي واصوم وماعندي زايدة وناقصة على احد بعد ليش اني مبتعده عن الله سبحانه وتعالى وليش ماالبس حجاب احسن بدل مياكلوني الناس بعيونهم وين ميشوفوني .. وانت هم تغار علي فهيج احسن .. مو صح .

سكت .. بدل ملابسه واتمدد عالجرباية وكلي :
يعني تردين تتحجبين ؟
آمنة :
اي والله ياريت ..
كريم :
واني ماعندي مانع بس بشرط ..
آمنة :
شرطيش ؟
كريم :
ترجعين تنامين هنا .. يمي .. بغرفتنه ..

ضجت وكلت ياريتني محجيت ولاگلت ..
آمنة :
وهاي شدخلها بهاي ؟ تره احنه كبرنه على هالسوالف ..
كريم :
هذا حقي .. لو تعرفين الله بكل شي الا بكريم  ..
آمنة :
استغفر الله ..

سكتت وفكرت بيني وبين نفسي كلت يجوز كلامه صحيح .. يجوز هذا هم ينحسب علي ذنب .. هاي شلون بلوه ..
بس يالله بكل الحالات اني عندي هدف ويجوز هيج راح يصدكني لو كتله اريد اطلع جواز حتى اروح للحج ..
آمنة :
صار .. تدلل .. حقك مطلبت غير حقك .
كريم :
دتعاي هنا يمي ..
.
.
.
لبست الحجاب وماادري حسيت بفرحة واني لابستة وحسيت الكل فرحلي واولهم اركان ابن عمي جاب زوجته واجوا باوكولي وجابولي حجابات حلوة وراقية ..
وهدى هم اجت باركتلي :
امونه يخبل عليج الحجاب ماشاءالله وجهج گمر ..
آمنة :
هاي المجاملات مااحبها احجي الصدك مو جني حجية ؟
هدى :
والله تخبلين وجهج مدور وابيض واحس اليشوفج هسه يركز كبل على عيونج عيني باردة عليج والله خليتيني اغار يمكن هم اتحجب مثلج .
آمنة :
هداوي العمر خلص وواحد ميدري شوكت يموت يجوز اوكع وره شوية اروح لربي بيا وجه ..
هدى :
اي والله حجيج صحيح بالعافية عليج انت طيبة وفقيرة والله يريدلج الستر وخلاج تفكرين بالحجاب ..
آمنة :
جاي افكر اقدم عالحج ..
هدى :
هههه تحجين صدك ؟
آمنة :
اي والله شبيج .. ليش تضحكين مو باجر الله يحاسبني لان اكدر اروح ومرحت ..
هدى :
احسج كلش متوجه عدل عالصراط حجاب وحج شسالفة ؟
آمنة :
جبت حياتي كلها تعب ويه كريم وهسه احس بس هاي راحتي اريد ارتاح عالاقل اسوي شي لنفسي لاخرتي .
هدى :
انت بس تربية سيف هاي الج بيها اجر شكبره .. عليج بالعافية ..
آمنة :
بعد .. بعد احس مقصرة .. عندي ذنوب هواي .. شايلة ذنب ناس مالهم ذنب .. اذاهم كريم بسببي ..
هدى :
منو ؟ بس لااا قصدج .... الدكتور ؟
آمنة :
ترحين وترجعين عالدكتور .. تردين احجيلج شنو قصة الدكتور حتى ترتاحين ؟
هدى :
ياريت حتى بعد مااسألج عليه ههههه،.
آمنة :
اول سنة من داومت كلية .. اتقدملي ولد جان بمرحلة اخيرة .. خطبني يعني بس موافقنه .. كريم جان خاطبني قبله وهم موافقت لان اول سنة واريد اكمل .. من عرف كريم اكو ولد جاي خاطبني دز عليه جماعته واعتقلوه وعذبوه .. وبعدين مات ..

دمعت عيوني وسكتت ..
هدى :
عزااا .. كتلوه ؟؟

هزيت راسي لا :
من طلع وطبعا ابوي اتوسطله وطلعه ظل كريم يدز الامن عليه للبيت فالولد انهزم لان يعرف بعد مراح يتركوه بحاله .. اني ماادري بي يطارده بس هو من يسكر يحجيلي ومره كلي مات ..
هدى :
يبوووي .. خطية .. معقولة كريم هيجي يسوي ؟؟ زين شلون مات ؟
آمنة :
ماادري ولتسألين اكثر لان مالي خلك احجي بالموضوع سنين واني اعاني واخاف الله يشيلني ذنبه .. وماادري شسوي حتى الله يسامحني ..
هدى :
وانتِ شذنبج .. كريم هو المسؤول ..
آمنة :
وغيره وغيره .. هذا واحد من مجموعة خليني ساكته ومخليه ضيمي بكلبي شكو واحد او وحده حجوا وياي كلهم انعدموا تدرين لو لا ..
هدى :
لا مو لهدرجة .. كولي غيرها ..
آمنة :
حقج متصدكين .. كريم اتزوجني بالتهديد لو اقبل لو يدبرلي تهمة وانعدم اني واخواني .. ولحد الان ...
هدى :
معقولة كل هذا حب ؟؟
آمنة :
هداوي .. اليحبج ميأذيج .. اليحبج يتأذى من تتأذين واني كريم شوفني نجوم الظهر من اول زواجنه ولهذا اليوم ..
هذا مو حب .. هذا مرض .

بقت هدى مخلوسة ممصدكة كريم هيجي رغم هي حسب كلامه جانت عدها علاقة وياه .. بس الظاهر وجهة الحقيقي بس يمي ..

صار عمر سيف ( ١٥ ) سنة وامنيتي تكبر كل يوم اكثر .. اريد اروح احج ..
آمنة :
اريد اروح للحج ..

عالعشا كاعدين اني وكريم وسيف ..
سيف :
ماما بعدج صغيرة مو مال حج هههه
آمنة :
الحج مو بالعمر حبيبي الحج لمن استطاع اليه سبيلا .
سيف :
يعني شنو ؟
آمنة :
يعني اليكدر ماديا يروح للحج لازم يروح اذا ميروح الله يحاسبه بعدين .

كريم ساكت ولايمه ..
سيف :
خل اروح وياج حتى يصيحولي حجي هههه .
آمنة :
انت ميصير الا بابا ياخذك بعدك زغير ..

باوعلي وهو ياكل :
حجيش هذا بعد .. مو جنج طوختيها بسالفة الديانه هاي .. خليتج على راحتج لبستي الحجاب ويومية مكسور ظهرج بالصلاة لنص الليل .. كافي ... لتصدكين نفسج عاد ..
آمنة :
انت تكره راحتي ؟
كريم :
راحتج ؟ هي هاي راحة ؟
آمنة :
اني ارتاح من اصلي شيضايقك لو صليت ؟ شيضايقك لو اتحجبت ؟
كريم :
ميضايقني .. يطبج مرض .. بس لهنا وكافي ماكو حج ولا غيره تروح للحج منو يوديج ؟ وحدج ماكو لازم اني وياج واني مااكدر فلتلحين .. حجي هنا ابيتج  .
آمنة :
استغفر الله ..يعني انت متكدر تسافر تحرمني ليش ؟ اني مطلبت منك شي بحياتي واول مطلبت ترفض ؟ وحاسدتني ضحى وين متروح تكول ساحرتله يحبها ومدللها .. وينه الدلال ماادري ..
كريم :
جاحده .. طول عمرج جاحده .. منو عايشة عيشتج ؟ منو بصباحية عرسها رجلها يجيبلها سيارة ؟ بس ميجي بعينج ..
آمنة :
يمعود مو بعدين ابنك يصدك .. السيارة اجت وره شهرين مدري تلاثة مدري اربعة وهم ياريت جديدة انطيتني سيارتك القديمة واشتريت لنفسك وحدة جديدة وانوب حتى القديمة رجعت عليها بعتها وخليت فلوسها بجيبك .. بعد يادلال ..
كريم :
ها هيجي هههههه هههههه والله طلعتي متحمله ..
آمنة :
ذكرني اذا جذابة ذكرني شوكت اجيت بيوم جبتلي هدية لو قطعة ذهب لو اشتهيتلي قميص شفته بمحل .. حتى من تروح لمكان تتونس متكول اخذها تغير جو ..
كريم :
اهووو .. انفتكت بعد .. غير نسوان لزكة ادري شحبيت بيج اني متكوليلي ..

دار على سيف كله :
امك اتزوجتها على حب .. حبيتها على اساس وخلصتها من حبل المشنقة واخذتها .. وشوف شلون ميجي بعينها ..
آمنة :
الشكوى لله ..

ضجت كلش ضجت وانقهرت وبقيت يومين مالي خلك هذا العذر الوحيد اللي اكدر اسوي بي جواز وتالي فشلني ومقبل ..
وراها بكم يوم صادف زواج اخوي ليث بعد مخطب البنية الي يحبها ..
سواله ابوي عرس جبير اجت ناس شكددد ..
من ضمن الموجودين جان صديق ابوي هو وابنه ..
صديق ابوي مرة شافني من جنت بعدني بالمدرسة وحجه ويه ابوي خطبني لابنه بس ابوي بوقتها كله بعدها زغيرة وتريد تكمل دراسة .
من شافني بالعرس جنت واكفة احجي ويه ابوي واقنعه بصوت ناصي يحجي ويه كريم حتى يخليني اروح للحج ..
مكلت لابوي عن نيتي الحقيقية من الجواز خفت ميوافق  واكيد ميوافق لان يخاف علي ..
اجه ابو رياض صديق ابوي هو وابنه سلموا على ابوي وباركوله بزواج ليث وسلم علي وسألني شخباري بجيت كريم باتجاهنه ..
ابوي :
تريد تروح للحج .
ابو رياض :
تستاهل .. تستاهل تروح الدكتورة مؤدبة بنيتنه خليها تروح .

اجه كريم سلم على ابو رياض وابنه اللي جان ويه حماية الوزير .
ابو رياض :
آمنة بابا روحي وادعلينه اني وابوج هههه بلكي احنه هم نكدر نروح للحج .
كريم :
لا وين تروح .. شنو هو لعب .. منو يوديها منو يروح وياها؟ اني مااكدر ..

جاوبه ابو رياض :
هاا ليش تريد تمنعها هي بس خل تنوي ومالك علاقة منو يوديها .. ليش تريد تحرمها اذا ايمانها قوي ؟ هاي ممقبولة منك .. الدكتورة بتي مو بس بت ابو غيث ومااقبل على اللي يزعلها اخلي رياض يزعله ها مو تكول ههههه ..
كريم :
اخاف عليها متدبرها ..
رياض :
خلي الموضوع يمنه احنه نرتبلها وضعها اذا تريد تروح صدك .. لتخاف عليها وياها ناس وعالم من شنو تخاف عليها بعد ..

سكت كريم وبقى ضايج ومن رجعنه كلي :
طلع ابوج واصل .. يعرف حماية الوزير ويعرف بيت المحافظ والله مالكم امان ..
آمنة :
ليش شسوينالك ؟ هو ابوي منو مثله رجال فقير ..
كريم :
انوب يدافعولج .. اليزعلها يزعلنه مدري شلون .
آمنة :
وعلى اساس انت خفت على زعلي هسه .
كريم :
لااا .. بس ذوله يخوفون .. واحد يكسبهم احسن حاولي تقربيني منهم بلكي نحصل ترقية بدفعة منهم .. شتكولين ؟
آمنة :
انت وافق على روحتي للحج واني اخلي ابوي يعرفك عليهم وياخذك فد يوم الهم بفد مناسبة او يعزمهم بالبيت وانت وياهم واتعرف عليهم ..
كريم :
ماكو .. حج ماكو .. گطنه وشيليها من اذنج ..
آمنة :
هو شنو القابل علية انت ؟ كله لا .. ابوي من كتله كلي اني اخذج ..
كريم :
عمي اصلا منو كال يكدر يروح ؟ بكيفكم تحجون ..
آمنة :
لو مرتك ذيج الثانية جان قبلت .. بس هاي آمنة لازم تشلع كلبها ..
كريم :
اي خطية .. عمت عيني عليج .
آمنة :
بروح ابوك لو ضحى تريد تروح هم تكللها لا ؟
كريم :
اهووو شيخلصنه بعد .. لامااخليها تروح .. ارتاحي ..

سكتت .. ماكو شي يقنعه شسوي بالله ..

بالليل حضني :
امونه .. نمتي ؟
آمنة :
اممم ؟
كريم :
احجي ويه عمي خل يعرفني على ابو رياض وابنه .. خل نستفاد شوية ..
آمنة :
مااا ..
كريم :
ماا شنو انوب ؟ شنو جاهله انتِ ؟
آمنة :
عوفني كريم بحالي بس من تريد شغلة اصير امون وامونه ..
كريم :
هسه شرايد منج متكليلي غير شغلة بيها مصلحتنه ..
آمنة :
لا بيها مصاحتك انت .. ومصلحتي تغلس عليها ليش الشغلة البيها مصلحتي متقبل عليها ؟
كريم :
مصلحتيش مصلحتنه وحده اذااني اترقى انت هم وياي .
آمنة :
خليني اروح للحج واخلي ابوي يعرفك عليهم ..

سكت ..
ثاني يوم الصبح :
يصير امي تروح وياج ؟
آمنة :
وين ؟
كريم :
للحج بعد وين ..
آمنة :
شطلعت هاي لازم امة محمد كلها تروح ويه آمنة امك وابوي ومدري منو ..
كريم :
قابل شايلتها على راسج لو جايه لبيتج رايحة لبيت الله ..
آمنة :
ماادري ..
كريم :
لو اكلج مالازم .. انسي .. هي امي وينها ووين الحج ..

كتله بكلبي همزين تعرف ..
آمنة :
هسه ؟
كريم :
شنو ؟
آمنة :
وافقت لو لا ؟
كريم :
بعدني افكر .. من اقرر اكلج ..
آمنة :
معناها موافق بس تريد تشلع كلبي اعرفك ..
كريم :
كتلج بعدني افكر .
آمنة :
زين سويلي جواز عالاقل حتى من توافق او تجي فرصة اروح ويه ابوي لو ويه امك عالاقل مااتعطل ..
كريم :
متتعطلين لتخافين .

هم موافق ...

بقيت ضايجة ومن رحت لاهلي عرفت ليث يريد ياخذ زوجته ويسافرون لعمان ويستقرون هناك ..
هالشي شجعني اكثر ابقى مصره على خطتي وفكرتي ..
حجيت لاخواني على خطتي لاول مره كلي ليث :
يوصلج بعمان .. اذا رحتي لعمان باعتبار مطلعتي من العراق .. يجيبج يجيبج ..
غيث :
انت مو تريد تقدم لجوء ؟
ليث :
ان شاءالله .. اذا وصلنه واستقرينه نقدم ليش لا ..
غيث :
معناها على متكدر هي تخلص نفسها يجوز انتو لجوئكم مقبول وتساعدوها ..
بس شلون بسيف تعوفيه هنا ؟؟
آمنة :
يمه .. اتحملت الضيم هذا كله علموده واعوفه مستحيل بس على ما اكدر اسافر يكون هو صار عمره ( ١٨ ) ويكدر يسافر وحده ..
ليث :
واذا انكشفتي ؟؟
كريم يتخبل ويخبلج وياه رسمي ..
غيث :
شحده .. ابوك هسه يكدر يواجهه بس غير هو لازمها بسيف جان طيحنه حظه ..

بقيت الح على كريم على موضوع الجواز بعد ماتفقت ويه اخواني يساعدوني بخطتي ..
لكن كريم بقى مصر على موقفه وراحت بعد من عمري سنة .. وسيف صار ( ١٦ سنة ) ..
حجيت ويه ابوي يضغط على كريم حتى يوافق اروح للحج ..
ابوي لحد الان ميعرف بهدفي من الحج هو الجواز لذلك وافق وحجه ويه كريم ورغم رفض كريم الواضح بس ابوي بقى مصر هالمره وكله :
متمنعها تروح للحج .. اذا متسويلها جواز وتخليها تروح اني اسويلها واقدملها ..
كريم :
عمي انت هيج تخربها علي هذا دلال ماله معنى ..
ابوي :
خليها تروح شمضايقك من الموضوع ؟
كريم :
اخاف عليها ..
ابوي :
هسه خل تسوي جواز وبعدين لكل حادث حديث عود من يجي وقت الحج نرتب الموضوع اخلي ابو رياض يخليها ويه عائلته زوجته واخته يردون يرحون .. هو يكدر يدبر الموضوع لتخاف عليها .
كريم :
متعرفني عليهم بلكي يساعدوني اترقى ..
ابوي :
سوي لامنة جواز وخليها تروح بالاول وبعدين اخليك متفاركهم ..

كريم هنا بدا يلين وبعد مده اخذني سوالي جواز ..
شلون فرحت فرحه .. هاي اول خطوة بطريق حريتي وحرية ابني ..
لكن هالفرحة مكملت..
بعدها بكم شهر ابوي اتوفى ...
صار عنده سكته قلبية وهو اصلا كان عنده قلب .
الدنيا طلمت بعيني وخصوصا بعد مسافر ليث هو وزوجته ..
غيث جان رافض الزواج خطية ..
اما كريم فرجع لاخلاقه القديمة ..
ابوي وراح منين يخاف بعد ..
كريم :
بت خالتج باجر تمر عليج بالعيادة ..
آمنة :
خير ؟
كريم :
شوفيلها حل مااريد جهال بعد متشبع ولد واثنين بنات وتريد تخلف بعد ..
آمنة :
وشسويلها اني ... خل تروح لدكتورتها ..
كريم :
وانت مو دكتورة ؟ لو دكتورة مال صخول انتِ ؟
آمنة :
رجعنه للشرب ورجعنه للمغثه ..
كريم :
معاجبج مو ؟ تدورين متدينين هههه تالي مات مثل الجلب شفاده الدين ...

يقصد فؤاد اللي صار مثل كلمة صباح الخير ومساء الخير بكلام كريم لازم يومية يصبحني ويمسيني وهو يعيرني بحبي لفؤاد ..
كريم :
وبعد هذا الاسود تنزعيه .. مااريد اسود مفهوم ؟
آمنة :
بعد ؟ عندك اوامر ثانية ؟
كريم :
حطي مكياج مثل النسوان طاح حطج من شفتج وانتِ حتى الكحلة محاربتها ..
.
.
.
بدا الوضع يتوتر بين العراق وامريكا بهالفترة امريكا تهدد العراق بحرب اذا السلطة الحاكمة مااستسلمت واتنازلت عن الحكم ..
الناس جانت ممصدكة بهالكلام ولامتخيله انه الحكومة تتغير وتجي حكومة ثانية وينتهي الحصار هذا كان محال بالنسبة للعراقيين ..

زاد التوتر وبدت الناس تخاف .. والتهديدات تصير اقوى ..
كريم اترقى ..
ومن اترقى اتفرعن اكثر من قبل ..
اتصلت بيه ضحى بيوم تبجي وتشتكي :
رفسني ابطني وسوه عندي نزف وهو يدري اني حامل ..
آمنة :
اممم ؟
ضحى :
خبلني وياه ياآمنة خبلني يوميه ضرب وغلط كدام الناس حتى بناته يخافن منه والله العظيم ..
آمنة :
اممم
ضحى :
متحجين شنو امم ؟
آمنة :
شحجي ؟ انت من شوكت من كلج مااريد اطفال بعد يعني الا يسوي بيج شي يالله تبطلين ! تره الرجال مينربط بالجهال .. الف طفل ميلزمه اذا راد يخون لو راد يعوفج .. انت هيج بس تخسرين صحتج ..
ضحى :
صحيح .. بس انت احجي وياه هو يحبج اكثر مني ويسمع كلامج .
آمنة :
ههههههه صدك ضحكتيني .. الكلج يسمع كلامي جذاب لو يحبني ويسمع كلامي جان مااخذج على راسي .. اذا انت سوه عندج اسقاط ونزف مرة ... اني وصلني لمرحلة ذبيت على نفسي نفط لوما الجيران لحكوا علي .. مسدس كم مره بمره يسحب علي ويخليه براسي .. مشفتي شي من كريم بعدج ..
هذا كريم .. كريم الجنتو حاسديني عليه .. متدرون كريم شسوه بيه واتحملت لخاطر ابني ..

من يومها ضحى بعد لااتصلت ولاشفتها ..
.
.
.
تأزم الوضع كلش ..
كريم :
ميضربون العراق جذب .. يستعرضون عضلاتهم .
آمنة :
واذا ضربوا ؟
كريم :
وخل يضربون انتِ من شنو خايفة ؟
آمنة :
شلون من شنو خايفة .. اخاف صدك يشيلون الحكومة ويجون الامريكان شيصير بينه بعدين ..؟
كريم :
لتخافين .. اني مااكدر ابقى اكثر تأخرت ماادري لشوكت يستمر الانذار ..
آمنة :
واني وسيف ؟
كريم :
شعليكم سدوا الباب عليكم وناموا .. راح اروح اشوف ذيج هي وجهالها اوديهم لاهلي ..
آمنة :
لعد احنه هم ودينه بطريقك لبيت اهلي ..
كريم :
وهو منو ابيت اهلج غيث هم انذار ..

طلع للباب وطلعت وراه :
كريم ... دير بالك على نفسك ..
كريم :
شبيج جبانه كتلج ماكو شي ..
آمنة :
لا هالمرة اكو .. امريكا اتكول لو تسلم الحكومة الحكم وتطلع لو همه يطلعوها بالقوة يعني بالحالتين راح يدخلون الامريكان ..

طبك باب السيارة ورجع كلي بصوت ناصي :
خايفة منين ؟ من الامريكان ؟
آمنة :
من هواي اشياء ..ذولة ماعدهم لادين ولاذمة ولا حرمه لمره ولابشر ..
كريم :
لتخافين .. اذا صار شي راح ارجع .. ابقى يمكم واذا طبوا علينه الامريكان اكتلج وبعدين اكتل نفسي ..
آمنة :
يااا انعم الله عليك .
كريم :
لعد شتردين ابقيج الهم .. وياي وياي بالدنيا وبالاخرة هههههههه دفوتي فوتي جبانه ...

راح كريم بعد مكعد يمنه اقل من ساعة ..
نمنه اني وسيف بقلق مندري شراح يصير وشنو تاليتنه ..
والصبح اندك الباب بكل قوة ..
كعدت ركض لبست حجابي وباوعت من باب المطبخ شفت غيث ..
فتحتله الباب رأساً حضني :
آمنة .. شلونج ؟
آمنة :
هلا هلا حبيبي شلونك ؟
غيث :
منو عدكم ؟
آمنة :
محد بس اني وسيف كريم عدهم انذار ..

وكف بالباب مقبل يفوت كلي :
دخلوا الامريكان .. دريتي ؟

ضربت صدري :
يمه ... صدك تحجي ؟
غيث :
اي والله توه ولد صديقي اتصل بيه كال البصرة حرب لان دخلوا الامريكان ..
آمنة :
خوية غيث .. شلون بينه اني ووليدي ؟
غيث :
الله الحافظ اهم شي عدكم اكل ومي ادوية شي عدكم ؟
آمنة :
عدنه عدنه كل شي موجود ..
غيث :
للاحتياط اذا عندج فلوس خليها بمكان غير متوقع بس كون بسهولة توصليلها لو احتاجيتي .. اوراقكم الرسمية جوازج اوراق سيف وكريم كلها جمعيها عندج شكو شي ثمين ..
آمنة :
يمه غيث خفت اني ..
غيث :
شنو اول حرب تشوفيها اشو احنه يومية حرب ..
آمنة :
قبل ماعندي مسؤولية .. قبل اني عدكم ومدلله مااخاف وانتو كلكم وياي .. هسه بحدي محد وياي واخاف على ابني ..

رجع باس راسي وبجى .. وبجاني وياه ..
طلع للباب ودعته كلي :
ابريني الذمة خوية .
آمنة :
مبري الذمة بعد روحي انت .. دير بالك على نفسك غيوثي .. واذا صار شي تعال يمي بعد اختك ..
غيث :
الله كريم .. مع السلامة ..اذا احتاجيتي شي اتصلي بأركان .
آمنة :
الله وياك .. ان شاءالله

هاي جانت اخر مرة اشوف بيها غيث اخوي ..
.
.
.

الغزو الأمريكي للعراق أو معركة الحواسم أو حرب الخليج الثالثة (حرب العراق أو احتلال العراق أو حرب تحرير العراق أو عملية حرية العراق) هذه بعض من أسماء كثيرة استعملت لوصف العمليات العسكرية التي وقعت في العراق سنة 2003م،استمرت من 19 آذار/مارس إلى 1 آيار/مايو 2003, والتي أدت إلى احتلال العراق عسكريا من قبل الولايات المتحدة الأمريكية ومساعدة دول أخرى مثل بريطانيا وأستراليا وبعض الدول المتحالفة مع أمريكا حسب تعريف مجلس الأمن لحالة العراق في قانونها المرقم 1483 في 2003م, وانتهت الحرب بسيطرة الولايات المتحدة على بغداد.

ومن الأسماء الأخرى التي أطلقت على هذا الصراع هي "حرب العراق" وحرب الخليج الثالثة و"عملية تحرير العراق" وأطلق المناهضون لهذه الحرب تسمية "حرب بوش" على هذا الصراع أو حرب احتلال العراق.

وبدأت عملية غزو العراق في 20 مارس 2003م، من قبل قوات الائتلاف بقياده الولايات المتحدة الأمريكية وأطلقت عليه تسمية ائتلاف الراغبين وكان هذا الائتلاف يختلف اختلافاً كبيرا عن الائتلاف الذي خاض حرب الخليج الثانية لأنه كان ائتلافاً صعب التشكيل واعتمد على وجود جبهات داخلية في العراق متمثلة في الاكراد في الشمال بزعامة جلال طالباني ومسعود برزاني وبعض رجال الدين في وسط وجنوب العراق . وبعض القيادات العسكرية وشيوخ العشائر من المنطقة الغربية .وشكلت القوات العسكرية الأمريكية والبريطانية نسبة %98 من هذا الائتلاف.
.
.
سقطت بغداد بيد الاحتلال ..
.
.
كريم اختفى ..
بقينه اني وسيف بالبيت وقفلت الباب بالسلسلة والقفل علينه  من اول يوم بدت مظاهر الفوضى والسلب والنهب في مختلف المحافظات ..
منكدر نطلع من البيت لان الوضع بعده يخوف ..
اتصل على اهلي غيث ماكو ..
مر اسبوع كامل واني وسيف بالبيت محد سأل علينه ولااحد دك بابنه كال وين صاروا ..
اليوم الثامن دك التليفون غيث اتصل بيه :
ها امنة شلونكم ؟
آمنة :
ها خوية وينك ظل بالي عليك اختفيت ومطمنتي عليك بعد ..
غيث :
ماكو شي الحمدلله .. جنت ويه ولد صديقي خطية من اهل النجف وسوه عملية مصران اعور محد وياه خطيه.. اهله ميكدرون يجون يخافون .. فبقيت وياه لحد مصار زين وطلع ..
آمنة :
يالله الحمدلله على سلامتك وسلامته .. خوفتني كلت خاف الامريكان سوولك شي ..
غيث :
ههههه شمسوي حتى الامريكان يسوولي ههههه احنه الحمدلله اني وابوي الله يرحمه ياما خدمنه وساعدنه ناس حتى اللي منعرفهم ساعدناهم .. الله يرحمه ..
آمنة :
الله يحفطك ويطول عمرك ولايحرمني منكم انت وليث ..
غيث :
ولايحرمنه منج يارب ..
آمنة :
خل تهدأ الاوضاع الا ازوجك .
غيث :
ههههه واني موافق .. من هسه شوفيلي مرة ضجت ارجع للبيت كله وحدي ..
آمنة :
مو تدلل .. والله بس يهدأ الوضع وتعدي هاي الفترة بسلامة الا اخطبلك وازوجك واركص بعرسك ..
غيث :
هههههههه تعرفين تركصين هههههه .
آمنة :
اتعلم ههههه الله يفرح كلبك مثلما ضحكتني وفرحتني .. متكدر تجي تتغدى ويانه اني وسيوفي ؟
غيث :
لا والله تعبان .. خليها على باجر ..
آمنة :
هلا بيك يابعد عمري .
غيث :
آمنة .. ديري بالج على نفسج وعلى سيف .. مثلما وصيتج ... واذا احتاجيتي اي شي واني مموجود اتصلي على اركان ..
.
.
هاي جانت آخر مكالمة بيني وبين غيث ..
بعدها بساعة اندك الباب حيل .. طلعت اركض شفت اركان ابن عمي خفت واستغربت اول مره يجينه للبيت ..
فتحت الباب بخوف وارتباك شفته يمسح عيونه :
شكو ؟ شبيك ؟ بيكم شي ؟
اركان :
لبسي ملابسج وامشي وياي .
آمنة :
وين ؟ وين نروح ؟ شكو ؟
اركان :
مو وكت اسئلة ام سيف .. غيث اتصوب ..

ضربت صدري :
يمه ... اتصوب ؟ شلون ووين ؟ شوكت اتصوب قبل شوية يحجي وياي ..

دخلت اركض بدلت ملابسي واخذت سيف وياي ورحنه ..

الطريق كله سيطرات امريكان ومدري شنو ..
مسلحين ويخوفون ..
وصلنه لبيت اهلي شفت الجيران بره واكفين ملتمين ..
نزلنه من السيارة ودخلت للحديقة شفت زوجة اركان ومرت عمي جوه يبجن ..
درت على اركان كتله :
ليش يبجن ؟ شكو ؟ وينه غيث ؟

بجى اركان .. من بجى اني بلا وعي صرخت :
يمااااااايييي يمه اخووووي ..
اخوي وين اركااان ؟؟

بقى اركان يبجي وطلعت مرت عمي وزوجة اركان يبجن وياي كللي :
البقية بحياتج ...

حسيت الدنيا لفت بيه..
آمنة :
شنو يعني البقية بحياتي ؟؟
اخوي وين ؟
غيوثي وين ؟
اركان :
غيث انقتل ...

من كلي انقتل حسيت اني متت ..
ملخت نفسي صرخت لطمت جريت حتى حجابي من راسي بس اركان لزمني ..
لزم حجابي بيده وخلاه على راسي وشده ..

طلعت اركض بالشارع ادور غيث وينه ..
شفت الدم اباب البيت انهد حيلي من شفته ..
لزمني اركان كوه دخلني للبيت :
اريده .. اريده ...
اركان اريد اخوي اريده .....

هو يبجي واني ابجي :
خلصوا اهلي ... خلصوا ..
كلهم راحووا كلهم ماتوا ... ولك اركان شلون بيه ؟؟ وين انطي وجهي غيوثي ماات ؟؟ توه يحجي وياي ويكلي باجر اجي اتغدى عندج ....
توه يوصيني على نفسي ...
اخذني اله .. اريد اشوفه ..
اركان :
ميصير .. ميصير اهدي شوية .. اهدي ..
آمنة :
يمه يايمه .. ولج يمه غيث مات يممممممه .. ولج يمه وليدج كتلوه ..
ليش كتلوه ليش ؟ ليش شمسوي ؟ لااذى بشر ولا خان بشر ... ليش كتلوه ليش ....
.
.
.
بسبب الاوضاع مكدرنه حتى نسوي عزا بيه حظ ..
راح غيث انقتل بدون ذنب ..
انقتل بس لان اسمه بعثي رغم هو واوبوي واركان اكثر ناس ساعدوا غيرهم ونقذوا ارواح كثيرة ..

بقينه اني وسيف ابيت اهلي ويانه مرت عمي واركان يروح ويرجع علينه يومية ..
بعد تقريبا شهر من الاحتلال ظهر كريم ..
.
.
.
عافوني لكن من مشوا اخذوا سواد عيوني ... 💔
.
.
.
مساء الخير
ماادري افرح لو ابجي مالحكت تفرح اتوفى ابوها ..
مالحكت ترتاح لان كريم بعد الغزو فقد منصبه انقتل اخوها 😭
متت من القهر على غيث 😭
فعلا اكو ناس راحت بالرجلين بدون ذنب ..
ارائكم وتعليقاتكم ..😞
لايك وتعليق وعشر ملصقات فضلاً
القصه تصعد بكثرة التعليقات اذا تشوفوها تستحق علقوا شكد متكدرون 💆🏼‍♀️