دراويش

دراويش ٢٦

#دروايش
بقلم #روز_الفياض
ح٢٦
.
.
.

ولن يهواك غيري فاستمر بهذا الصد إني مستمر، أنادي اللّه في سرٍ وجهرٍ ..
متى يدنو اللقاء ونستقر؟ 🖤
.
.
.
فجأة دخل كريم !!!

( كريم ضابط بالامن ابوه يصير ابن عم ابوي .. جان متزوج كرايبه وقبل فترة اتوفت وتركتله ولد صغير عمره تقريبا تلث او اربع سنوات ..
بعدما اتوفت زوجته الله يرحمها بمده .. مره من المرات انعزمنه عدهم على عشا .. بوقتها استغربت لان مو ذيج العلاقة الوثيقة بينه وبينهم شعجب عزمونه وماكان اكو مناسبة ..
اتذكر بوقتها كان اهتمامه بيه واضح جدا للكل من اهله واهلي ..
لدرجة جان جايب كاميرا ويصور الكل فيديو اثناء العشا واغلب الوقت التصوير الي ..
من طلعنه حجه ويه امي ولمحلي على موضوع خطوبة لكن اني رفضت ..
بيومها امي ظلت تلمحلي لان هو هم يصير اقاربها من بعيد..
كريم من عائلة معروفة بالثراء وبمجرد موصلنه للبيت اتصل على امي تليفون وبدا يقنعها :
بيت ابحدها اكيد .. امونه متتحمل عيال .. خدامة اجيبلها خو مخليها  تشتغل بالبيت .. دوام وتدوام وتتخرج وتتعين بعد شتريد بس تأشر ومهرها شكد تريد تدلل وهدية الزواج سيارة شرط الصبح تكعد تستلم السويج .. بعد شنو بخاطرها شتريد اكثر ؟ بس خل تأمر واني علي انفذ .. وسيف يبقى عد امي هي متدوخ راسها بي .. اني اريدها الي .. مرتي وتهتم بيه اريدها بس تجي تنور البيت بجمالها ودلالها مرايد منها شي اكثر ..

امي من سمعت هالكلام بليلتها اجت كلتلي كتلها :
خيولي .. بطران هذا .
امي :
ليش بطران ؟ كال شي غلط ؟ رجال اسم وصيت ومنصب وفلوس وعز ودلال وجمال شتردين اكثر من هيج ؟ منو بعمرج عدها سيارة ؟ منو زوجها مخليلها خدامة ؟ منو يسوي لزوجته هالشكل بس حتى تقبل ؟ انتِ البطرانه ماما ..
آمنة :
غثيث .. وعنده ولد .. وشايف نفسه .. وعنده تصرفات صبيانية .. مدري شلونه .
امي :
الولد عند امه هو كال .. وحقه يشوف نفسه ليش ميشوف نفسه شناقصه شعايزة كافي الهيبة شفتي من دخل علينه بالبدلة العسكرية شلون يجنن .. بعدين شنو هاي التصرفات الصبيانية بالله متفهميني ؟
آمنة :
مو شفتي شلون يفتر وراي بالكاميرا حتى مااستحى من امه ولامن ليث ومنج ولا من اخته ابد عبالك مراهق ..
امي :
غيرج تتمنى هذا الاهتمام هذا دليل الحب الرجال يحبج مبين عليه لو ميحبج جان مااتعهد بكل هالسوالف حتى تقبلين يكدر بس يإشر تقبل بي بنات عائلات احلى واغنى واجمل منج ..
آمنة :
ومنو مانعه ؟ خل يروح يشوف غيري .. مااحبه .
امي :
لعد تحبين منو ؟؟
آمنة :
مااحب احد .. اريد اكمل دراستي يالله افكر بالزواج وهالسوالف .. بعد وكت بعدني صغيرة .

راحت امي وخلتني افكر بهالورطة هذا شلزك ..
نص الليل رحت للحمام ودك التليفون شلته :
الو ؟

اجاني صوت كريم كأنما شارب كلي :
الووو .. أمونه .. شلونج ؟
آمنة :
منو ؟
كريم :
بسرعة نسيتي صوتي !! كريم .. كريم آآنيي ..
آمنة :
شكو كريم ؟ صاير شي بهالليل ؟
كريم :
لااا لاا ماكو شي .. بس حبيت اسمع صوتج .
آمنة :
تسمع صوتي ؟ يعني هسه انت داك تليفون بهالليل والناس نايمة علمود تسمع صوتي ؟
كريم :
اريد ... اريد ..
آمنة :
شتريد خلصني ؟
كريم :
اريد اعرف جوابج ... خالتي كلتلج لو لا ؟
آمنة :
كلتلي وجوابي هو لا .. اريد اكمل كليتي وبعدين افكر بالزواج ..
كريم :
ليش ؟ ليش هالشكل ؟ كملي كليه عندي اني ماعندي اعتراض .. وشتريدين اني موافق مقدماً ههه ..
آمنة :
مااريد شي ومااريد اتزوج هسه هذا كل مابالموضوع ..
كريم :
اخاف علمود هذا ... شسمه ؟ نسيت اسمه ... المهتلف الدكتور الوياج ؟

كتله باستغراب :
منو ؟ اي دكتور ؟ اي مهتلف ؟ انت شتخربط ؟
كريم :
ههههه .. ههههه .. صدك اخربط هههه لا مو لان شارب شوية يمكن ... المهم هذا فؤاد مدري شسمه .. علموده يمكن ..

نشف دمي وبقيت ساكته كلي :
تره اني مراقبكم .. مراقبكم كلش زين ... شعندج وياه ؟ هاا ؟ هذا واحد مهتلف .. واني حاس وراه شي .. عوفيه يولي ... بس الزم عليه شي الا اخيسه بالسجن ... هههه او اعدمه .. شتكولين ؟؟

يبست بمكاني .. مكدرت ارد عليه سديت التليفون بوجه ورجعت لغرفتي ..
خلصت الليل افكار اشكال والوان ..
احتاريت شسوي .. هذا بس لا يعرف شي عن فؤاد والشلة ؟
بس لا يعرف بيهم عدهم نشاط ممنوع ..
ثاني يوم من داومت خلصتها بجي بالكلية .. حاولت احجي ويه فؤاد بس ماادري ليش خفت احجي وياه بصراحة بس لمحتله ومفهم ..
جنت خايفة حتى اكوله اني ادري بيك وادري بنشاطك ..

بعدها بقيت بالبيت تلث تيام مداومت ..
لاليلي ليل ولانهاري نهار ..
الصبح انام والليل كله كاعده وابجي ..
لافؤاد مبطل من هالحزب ولا اني اكدر اساعده ..
واخاف هذا يلزم شي عليه ويذبه بمصيبه ؟؟
شلون بيج ياآمنة ؟
اخاف يتصل على ابوي ويحجيله ؟؟
لو خاف يحجي لغيث لو ليث وشنو راح يكون موقفي كدامهم بهيج حالة ...
الله ينتقم منك .. شتريد مني مراقبني ..
حسبي الله عليك الله لايبارك بالساعة الشفتك بيها ..

ثالث يوم اخذتني امي هي وغيث للدكتور لان ماعندي حجه ليش مااداوم ؟؟ وليش ابجي وحالتي حالة ؟؟
جذبت عليهم وكتلهم عندي الم بأسناني ..
بالليل قبل لاانام شجعت نفسي :
شبيج آمنة صدك جذب ؟ هاي انتِ القوية هيجي من كلمة هيجي خفتي وضعفتي واتراجعتي ؟ شلون تخافين ؟ انت المثلج متخاف .. بعدين اذا تخافين وتتخلين عن شجاعتج تكدرين تتخلين عن فؤاد ؟؟
لا ولايمكن .. مستحيل .
ثاني يوم داومت عادي ومحجيت لالفؤاد ولا لغيره على موضوع كريم ..   )
.
.

( في مديرية الامن )

شلون اني نسيت هو ضابط بالامن ؟
شلون مااجه على بالي اخلي بابا يتصل عليه حتى يجي ..
لا .. لا ..
هسه افتهمت ..
كل اللي ديصير بسببه !! بسب كريم !!
كريم هو الي جاب فؤاد .. وبنفس الوقت جابني هنا حتى يخوفني ..
اي .. هو ..
لهذا السبب جان خايف هذا الدخل وسألني شبيج وشمحتاجه .. خايف من كريم .. مو من ابوي ..
وذاك القبله كله هم كلي خليها هنا .. منو كله غير كريم ..
حقير ...
حقير ...

من شافني كريم ظل يصيح على اساس اتفاجأ بوجودي هنا وماعنده علم او خبر على اساس اني غبية واصدك تمثيلك :

لك حيوان .. شنو مخليها هنا ؟ ليش مخليها هنا ؟ اصلاً منو كلكم تجيبوها ؟ بكيفكم ؟ بسيطة .. بسيطة اذا مخليتكم تشبعون دك مثل المطايا .. بسيطة .

فتح ايديه وهو يصيح :
مي .. مي جيبولها بسرعة ..ايا حيوانات .. اني الكم .. شنو علاقتها الدكتورة جايببها هنا وحاطيها ويه الخونة والمجرمين ؟
خلص لتبجين آمنة لتبجين .. اني اروايج بيهم .. اغبياء يعتقلون الناس البريئة المالها ذنب على مزاجهم .

دار على فؤاد كله :
كله منكم يا خونه .. يا عملاء .. اصبرلي بس شوية اذا مخليت المسدس بحلك مو بجتفك .. الا انظف البلد من امثالكم .

اباوع لفؤاد ودموعي تصب .. كوه فاتح عيونه .. ياربي راح يموت شسوي .. شلون يااللهي ..
جابولي كلاص مي دفعته .. اني بيا حال هسه .. العطش يهون ..
بس فواد دينزف .. دمه هيج يتصفى وهمه ولاهامهم الموضوع ..

آمنة :
عفيه لتخلوه ينزف اكثر راح يخلص دمه .. عفية داووه .. عالجوه .. انطوني اني اعالجه بس لتخلوه ينزف ..

صبت دموعي واني اتوسل بي وفؤاد اهز راسه ميريدني احجي شي عنه .. ميريدني اتورط ..
شفته بس بقيت مصرة وظليت ابجي حيل :
عفيه .. عفيه .. الله يخليك .. لخاطري .. لخاطري شتريد مني اسوي اسوي شتريد مني اكول راح اكول بس لا تأذوه ..

كام وكف ودار على فؤاد كله :
منو هاي ؟

فؤاد:
مااعرفها سيدي ..

رجع دار علي كلي :
هو ميعرفج انتِ ليش تدافعين عنه واحد خاين مالج كل علاقة بي هذا اليوم اوعدج ينعدم وتتعلك لشته بالشارع حتى يصير عبرة لكل كلب يفكر يخون الدولة .
آمنة :
آني اعرفه .. حتى لو هو ميعرفني اني اعرفه .. ومو خاين مو خاين .. ممسوي شي والله ... ساعة السودة الاجه يخطبج آمنة ساعة السودة ..

ظليت ادك على رجليه وابجي  ..
الضابط كريم :
هااا !!! هيجي طلع الحجي !!

دار على فؤاد  :
طلعت جنت رايح تخطب آمنة ؟ هههههه لا يا كلب .. ولك منو انت وشحاسب نفسك ؟

دار علي كلي :
رفضتي مو ؟ رفضتي ؟

باوعت لفؤاد شفته يأشرلي بعيونه كولي اي ..
بقيت ساكته وابجي رجع سألني :
احجي دكتورة ؟
رفضتيه مو ؟؟

قبل مااجاوبه اندك الباب ودخل واحد عسكري :
سيدي ........

عرفت ابوي اجه .. ارتاحيت ..اتوقعت راح اخلص واخلص فؤاد ..

الضابط كريم :
هاا .. ياالله يالله جايين ..

دار علي  :
يالله كومي .. اتعذبتي اليوم وانرعبتي بما فيه الكفاية يالله امشي هاي ابوج اجه هسه بس لا يزعل علي عباله اني كتلهم يجيبوج لهنا ههههه .

اخذني من ايدي  وطلعوني  واني عيوني ظلت على فؤاد لحد مطلعت ..
امشي وملتفته ليوره على فؤاد لحد مغاب عن عيني ...
هاي جانت آخر مرة شفته بيها ..

اخذني كريم لغير غرفة وبقى يرزل بالموجودين لان جابوني لهنا ..
بقى كل شوية يختفي شوية ويرجع يكعد يمي ويبرز عضلاته كدامي ..
كل شوية يجيبولي جاي لو مي واني اهز راسي مااريد ..
وكل شوية يدز احد يجيبلي اكل لو يروح يجيب فاكهة ..
اني بيا حال وهذا يكمز كدامي :
شسوولج ؟ شسوولج بس كولي واني اليوم اطيح حظ حظهم .. اني الهم .. بسيطة .. ازوعهم دم .. كلهم راح احيلهم للتحقيق .. بس انتظري وشوفي ..

نفس الحجي كل دقيقة يعيده راسي داخ واحسه يأذيني من الوكعه ..
لزمت راسي بأيدي رأساً كعد كبالي يم رجلي فززني :
راسج يوجعج ؟ اجيبلج براستول .. دقيقة .. ابو جوواااد ..
ابو جواادد ..

صوته مزعج ويصيح بصوت عالي كتله :
كافي .. مااريد شي .. مابيه شي ..
كريم :
والله دمي ديفور .. شلون اتجرأوا وجابوج لهنا ؟؟ شلون ؟ ميعرفون انت منو ؟؟ لو ميعرفون انت بت عمي ؟؟؟ بس وين يرحون مني ..
اني الهم ..

رجعت دموعي نزلت من اتذكرت حالة فؤاد شلون جانت .. عيونه مورمة من الضرب وجرحة ينزف ..
ساعة السودة العرفج بيها آمنة ..
ساعة السودة ..
كريم :
لتبجين .. وعيونج ابجيهم دم ..

كتله بتوسل وصوت ناصي :
عفيه كريم بس وصيهم على فؤاد .. عفيه جرحة ينزف خاف يموت ..

صارت عيونه بكصته كلي :
وانت شكو بي هذا الخاين النكس ... يولي جلب وفطس ..

مشى خطوتين ورجع دار علي ويأشرلي باصبعه كأنما يهددني :
مالج علاقه بي .. هذا واحد خاين وراح ينعدم .. افهمتي ؟؟
آمنة :
مو خاين مو خاين والله مو خاين .. والله فقير والله .. كريم الله يخليك لخاطري ساعده ..
كريم :
كافي هسه اسكتي .. استكي بالاول خليني اروح اشوف شلون اكدر اخلصج واطلعج منا .. يافؤاد .. يانعال ..

راح وخلاني كاعده بمكاني وحدي ودموعي عشره عشره ..
بقيت هواااي ماادري شكد وهو كل شوية يجي حتى يعرفني انه هو جاي يحاول ينقذ حياته ويتوسل باليسوه والميسوه حتى يساعدني وينقذني .. كل شوية يجي يسمعني هالموشح وارجع اعيد عليه نفس الكلام ..
وكل مره يصير عصبي ويظل يصيح ويغلط ويرجع يختفي ..
مرت ساعات واني مرعوبة وخايفة ومرت ابالي افكار تخوف ..
يمكن صار العصر او المغرب وماكو خبر لا عن فؤاد ولا ابوي واخواني ..
رجع كريم يتوسل بيه حتى اكل بس اني مالي نفس وعيوني احسها نشفت من البجي حتى دموع مبقى بيها ..
خشمي مسدود ، وراسي صدع من البجي ..
نعست حيل ومااكدر انام اخاف اوكع ..
واخاف تغفى عيني ويصير بفؤاد شي واني مااعرف ..

خليت اديه اثنينهم عالمكتب وخليت راسي على ايدي وغمضت عيوني ..
غلبني النعاس وغفيت ماادري شكد ..
شوية وكمزت من حسيت بأيد على راسي ..
كريم :
على كيفج اسم الله لتخافين .. اني عدلت شعرج ..
مااسويلج شي لتخافين ..

بقيت ساكته وكشيت وكعدت عدل ..
جاب بيده قمصله عسكرية وخلاها على جتفي :
هانت هانت هسه بس خل يوقعون على الاوراق واخذج للبيت .. انت وين وهالناس الزبالة وين ..

مجاوبته كال :
انت اميرة مكانج مو هنا ولا ويه هيجي ناس انت مكانج بقصر وعندج خدم وحشم وتعيشين بدلال .. شنو هالحيوان هذا تحجين وياه ..

تأكدت هو وره الموضوع ..
حاولت ابرئ فؤاد بلكي الله يهديه ويصدك ويطلعه :
احنه مجرد اصدقاء ... مابيني وبينه شي ... الولد حباب ومؤدب وماادري بي جان ناوي يتقدملي .. اتقدملي واتصوب بيومها بس اني اصلا رفضت ورجعتله خبر ..
كريم :
اي ؟؟
آمنة :
اي .. كتله اني ماافكر بالزواج هسه ..
كريم :
يعني بس اصدقاء ؟

هزيت راسي اي واني ابلع ريكي ..
كريم :
اكيد ؟

هزيت راسي اي واني اجاوبه :
اي .. اكيد طبعا اكيد .. اني اريد واحد من مستواي .. وهو اهله ناس على كد حالهم ..
كريم :
اي ..عفيه عليج .. تفتهمين .. عفيه هيجي اريدج تعرفين مصلحتج .. واحد مهتلف هذا مو من ثوبج ولامن مستواج ..

هزيت راسي اي وطاحت دمعتي على خدي كلي :
خلاص .. خلاص بعد راح تخلصين من هالحثالات ... حقج تبجين ماالومج هذا يشوه سمعتج بعدين واحد معيدي ابن معيدي من تحجين وتمشين وياه متحصلين غير بس الاذية ..

ظليت ابجي حيل وهو اتخبل .. ظل يصيح وكل شويه يضرب المكتب لو يدفر الكرسي :
ليش تبجين ؟؟؟ لييييش ؟؟
تبجين عليه ؟؟؟؟ كولييي ؟؟

ظليت ارجف من الخوف بس حاولت اسكت حتى اكدر احجي كتله :
لااا .. ابجي على بابا ... ماادري وين صار كلي جاي وراج ولهسه ماكو ....

هدأ شوية وصدك ..
جاب الكرسي وكعد بصفي :
لتخافين .. منين تخافين مو هاي اني يمج كاعد وعايف شغلي حتى متخافين .. شحده اللي يمس شعره من راسج ..

سحب المسدس وخلاه كدامي عالميز :
الا اكتله خلاص اللي يتدنالج ..

هزيت راسي اي واني امسح دموعي ..
اصبعي ظل يصل علي لان وكعت عليه مساع ..
آمنة :
اريد اي شي اشد اصبعي ديأذيني ..
كريم :
اصبعج ؟ شبي ؟
آمنة :
وكعت من الكرسي مساع وانضرب راسي واصبعي يمكن انكسر ..

رجع نفش ريشه يمي ويستعرض بطولاته ..
اختفى دقايق ورجع اول مدخل للغرفة اجه واحد للمره الثانية كله انه ابوي موجود بره ينتظر من الصبح ..

هالمره كريم طلع يستقبله ..
دخل ابوي وغيث واركان ابن عمي ..
ماادري ليش حسيتهم اتفاجأوا من شافوني بس محجوا شي كأنما اتداركوا الموقف وغيروا الموضوع واجوا كبل حاوطوني ..
ابوي حضني واني بجيت ..
حضنته واني كاعده .. رجليه حسيتها متشيلني ..
ابوي :
لتبجين بابا خلص .. ابو سيف متكفل بالموضوع ليش تبجين ..

حسيت ابوي يريد يمدح كريم حتى يكسبه بجانبنه .. يمكن ابوي مثل احساسي .. يمكن حاس انه كريم وره الموضوع ..

غيث واركان اخذوا كريم على جهة يحجون وياه بس بعيدين مااسمع شيكولون ..
ابوي :
شسوولج ؟

هزيت راسي ماكو شي .. رجع ابوي حضني وباس راسي ..
مسحت دموعي وكتله :
بابا .. فؤاد ..

اتوسلت بي بعيوني حتى يسوي شي ..
ابوي :
بابا احنه بيا حال هسه .. خلينه نخلصج من الموت هسه وبعدين فكري بغيرج ... خو مكلتيلهم تعرفيه ؟
آمنة :
اذا ميطلع فؤاد مااطلع ...
ابوي :
مو وكت لعب هسه .. الدنيا مكلوبه بره والاعدامات بالجملة منو بحال فؤاد هذا هسه ؟ ياروح مبعدج روح .. من الصبح واحنه لازمين الباب حتى يخلونه نفوت ونشوف اتصالات والف واسطة يالله هسه خلانه نفوت ...

رجع كريم سكتنه فأبوي كله :
هاا ابو سيف ؟ شنو الاخبار ؟ شوكت نكدر نطلع امونه ؟
كريم :
هسه بس دقايق .. اعتبر الموضوع منتهي .. كم امونه عدنه ..

ابوي ابتسم جذب وكله :
هههه اي بعد هي تمون عليك .. هي على اعتبار خطيبتك ..

انصدمت .. وكريم ابتسم ابتسامة شعرضها وحسيته مشايلته الكاع :
طبعاً طبعاً .. ثواني بس ..

راح ماادري وين يركض درت على ابوي كتله :
لتسوي هيج بابا .. تدري بيه مااريده ..

رد علي ابوي بعصبية وصوت ناصي :
تدرين اذا مقبلتي شراح يصير ؟؟؟ تدرين لو لا؟

بجيت كتله :
ادري .. ادري ... بس مو بيدي مااتحمله ..
ابوي :
كل احنه نروح بيها ... اني يجوز ميكدرلي بس راح يسوي اي شي حتى يأذيني وراح يأذيني بيج وبااخوانج .. تنعدمين ويجوز غيث وليث ينعدمون وياج ... فكري بعقلج وعوفي العواطف خلينه نخلص من هالمصيبة ..

بلعت ريكي كتله :
اذا اوافق تطلع فؤاد ..
خزرني كلي :
شسالفتج لج ؟؟ شعندج ويه هذا فؤاد ؟ ليش دتلحين ؟
آمنة :
هذا شرطي .. ومو بس فؤاد .. فؤاد والوياه .. كلهم غازي ودريد والبقية كلهم يطلعون يالله اقبل ..
ابوي :
تتشرطين بعد عبالج السالفة بسيطة .. اعدام هذا .. اعدام .. تردين تعدمين اخوانج ؟؟؟
آمنة :
لو يطلع لوما اطلع .. وروح ماما الاعز من روحي اذا متطلع فؤاد اكول اني وياه ..

قبل ميحجي ابوي رجع اخوي وابن عمي وكريم ..
سكتنه ...
كريم :
اجيبلكم جاي ؟
ابوي :
لا لا ميحتاج قابل احنه خطار .. بس هذا الولد فؤاد وينه ؟؟

اركان ابن عمي وغيث اخوي التفتوا على ابوي مستغربين بس محجوا شي ..
اركان الظاهر ماعنده خبر شفت غيث يشاوره وهو يهز براسه ..
كريم هم استغرب وجاوب ابوي :
هناك .. بالغرفة الاخيرة .. ليش ؟
ابوي :
مو هو الولد فقير ومؤدب وزميل آمنة .. واهله خوش ناس ..
كريم :
هو مو جاي خاطب آمنة ؟
ابوي :
هاا !! اي بس آمنة مقبلت واحنه هم مقبلنه .. بس بعد آمنة تعرفها انت حساسه متتحمل تشوف زملائها متأذين ومتساعدهم ..
كريم :
اي .. بس هو خاين للقيادة وللعراق ..
غيث :
ابو سيف .. الولد بضمانتي ..
كريم :
اني خايف لا يرجع يضايقها .
غيث :
ميضايقها .. اخذ درس اليوم وبعد ميعيدها ..
كريم :
مو هاي بيها مسؤولية ..
غيث :
وانت كدها ..

اتدنه اركان على كريم وكله :
معقولة اول طلب تطلبه منك آمنة وترفض ؟
كريم :
لا لا ارجوك .. اني طلبات آمنة عندي اوامر بس هذا خاين واني اريد مصلحتها ..
اركان :
صحيح تريد مصلحتها ماعدنه شك بهالكلام بس الولد مظلوم .. وانت رجل حقاني متقبل بالظلم مو هيج ؟؟

انحرج كريم وكله :
اي طبعاً منو يحب الظلم .. احنه نمشي حسب القانون ..

بعد اخذ وعطا وروح وتعال اخذهم يشوفون فؤاد بالغرفة الاخيرة ..
خلوني وحدي واني ادعي ( يارب فرج عنه يارب .. يارب اهدي كريم وخليه يطلع فؤاد .. يارب خلي ابوي يتوسطله ومينساه ويساعده يارب ... يارب فدوه اروحلك ساعده .. ربي دخيلك شسوي .. شسوي .. ) ..

وره شوية رجع كريم هو وغيث ..
كريم :
اي طبعاً لخاطركم .. لعد لخاطر منو ..احنه اهل وجيتكم لخاطر جيتكم هاي ولخاطر امونه مااكدر اكول لا ..
غيث :
والنعم منك .. انت الرجل المناسب في المكان المناسب ..
كريم :
هسه انت اخذ آمنة وديها للبيت وخل ترتاح وتغسل وتنام ولو هي مااكلت اي شي اليوم .. حاولت وياها بس عنيده ..
غيث :
خايفة اكيد ..
كريم :
لا ازعل منك .. تخاف واني موجود .. المن موجود اني هنا بعد .. غير علمودها كاعد يمها من اجيت لهسه حتى متخاف ..
غيث :
حساسة هي حساسة ..
كريم :
اي صحيح .. لاحظت هالشي ..

اتدنه غيث يمي :
يالله آمنة خل نروح للبيت ..

حاولت اكوم بس مكدرت ..
آمنة :
مااكدر .. رجليه متخشبه ..
كريم :
من الكعده عالكرسي .. طبعا كل هذا تعب عليج اصلا بس الحمدلله كدرنه نتحرك ونخلصج بالوقت المناسب ..
غيث :
على كيفج شوية شوية ..
آمنة :
مااكدر ..

دنك غيث شالني خطيه وكريم فتح باب الغرفة وطلع ويانه للسيارة ..
حضنت غيث وخليت راسي بصدره وصبت دموعي ..
كعدني غيث كدام يمه وسد الباب ..
سلم على كريم وطلعنه ..
اول متحركت السيارة كتله :
غيث ..... شراح يسوون لفؤاد ؟

غيث بقى ساكت ..
بجيت حيل كلي بعصبية :
كاافي ... كافي شنو هالوكاحة هاي ؟؟ شعندج وياه هذا ؟ ليش تبجين عليه ؟ واحد خطبج ومصارت شنو اول وحده انتِ ؟
آمنة :
ماابجي على خطوبة والله .. ولاعندي شي وياه بس ابجي لان الولد ماله ذنب .. هاي كلها سوالف كريم كله من كريم ... هو يريد يخلص منه لان عرف خاطبني ...
غيث :
وهو كريم شمدريه هذا خاطبج ؟
آمنة :
كريم مراقبني حتى بالكلية .. اي شي يصير اي احد احجي وياه اي واحد يسلم علي معناها عندي وياه شي .. ابتليت اني بكريم خوما ابتليت ..

سكت غيث واتنهد بعدين كلي :
هسه زين من قبل يخلصج ابوي اجه يموت من الخوف تدرين لو لا .. لو صايرلج شي جان ابوي راح بيها ..
آمنة :
لتخلوه .. غيث لخاطري .. لخاطر اختك .. اذا تحبني صدُك لتخلي فؤاد ينعدم .. عليك بداعة ماما .. اذا ماما الها خاطر غيث ..
غيث :
افتهمنه .. افتهمنه .. على اساس نكدر على كريم احنه ..
آمنة :
لخاطري غيث .. والله شتريدون اسوي بس طلع فؤاد ..
غيث :
هسه عود الله كريم .. ابوي واركان بقوا يتفاوضون ويه كريم ويحاولون يقنعوه ... انت بس اهدأي وهسه نوصل غسلي وارتاحي واني هسه اخذلج منا اكل حتى تاكلين وبعدين نحجي ونشوف شراح يصير ...

وكف غيث يم مطعم نزل جاب دجاجة مشوية ورجع ..
وصلنه للبيت دخل السيارة للكراج وكلي نزلي ..

نزل هو الاكل دخله للمطبخ واني مسحت وجهي المبلل بالدموع ونزلت على كيف لان احس راسي كله يختض وثكيل ..
وصلت لباب المطبخ فتحت الباب على كيف ايدي توجعني واصبعي لهسه يصل علي ..
اجه غيث فتح الباب عني بس اني بديت احس الدنيا تظلم ..
عيوني غوشت والكاع تفتر وتدور جوه رجلي ...
لزمت غيث حيل كتله :
دخت .. مااشوف ..

رأساً غيث لزمني واني فقدت الوعي ..
وعيت بعدين شفت نفسي بالمستشفى ...
ابوي وغيث وليث واركان كلهم يمي ..
ابوي :
هاا بابا .. شلون صرتي ؟

هزيت راسي زينه ..
دنك ليث باس راسي كتله :
راسي يأذيني ..
ليث :
انتِ مضروبه ؟ احد ضاربج على راسج ؟
آمنة :
لا .. بس وكعت وانضرب راسي والتوى اصبعي ..

مديت ايدي حتى اراويه اصبعي شفت كانونه ومغذي بأيدي ..
ابوي :
الحمدلله على سلامتج .. طلعتي من الموت بأعجوبه ..

درت على ابوي ودمعت عيوني ومبين بعيوني سؤال واحد وهو عرفه :
هذا الولد طلع ... ارتاحي ونامي .. لتخافين ..

نزلت دموعي بللت شعري وكتله :
بروح ماما ؟

هز راسه ابوي كلي :
بروح ماما .. نامي بابا نامي .. انت تعبانه جسمج تعبان لااكل ولاشرب ونفسيتج تعبانه .. ارتاحي ..
اركان :
لا .. خل يجي الدكتور يشوفها بالاول .. خل يفحصها مادام كعدت ..

راح اركان يصيح الدكتور واجه الدكتور رأساً حولني عالاشعة اخذوا لراسي اشعة ولايدي بس الحمدلله ماكو شي بعدين من خلص المغذي طلعنه للبيت ..
اركان راح لبيتهم واني وابوي وغيث وليث لبيتنه ..
دخلني غيث شايلني لغرفتي ..
خلاني على جربايتي وكلي :
لتنامين اكلي شي بسيط حتى لو لكمتين ونامي ..
آمنة :
مااشتهي ..

دنك يمي كلي :
الولد وطلعوه .. شبيج بعد ؟
هزيت راسي كتله :
مابيه .. بس احس بتعب مو طبيعي .. ولهسه احس نفسي بكابوس ...
غيث :
ميخالف .. اكلي شوية تره احنه هم وياج من الصبح على لحم بطنه وابوي لهسه لاماكل شي ولاشارب علاجه .. ابوي كلبه ميتحمل وانوب يترك العلاج .. اكلي شويه لخاطره ..

سكتت .. مااكدر اعترض بعد ...
صبوا العشا واجه ليث اخذني للصالة اتعشى وياهم ..
كوه اكلت كم لكمة وبدا النعاس يسيطر علي لدرجة مااكدر افتح عيوني ..
اترخصت منهم ورجعوني لفراشي ..
ونمت ...
.
.
.

وبكيتُ في غيابك..
كما لم أفعل من قبل
بكيتُ من كل الحواس
بكيتُ كأني لا‌ أبكي
بل أذوب دفعةً واحدة ، وأمطر ..💔💔💔
.
.
صباح الخير ..
عرفتوا آمنة شلون قبلت بكريم ؟؟
يعني اهلها يعرفون هدف كريم من الي صار فخيروها لو تعيش ويعيشون اذا قبلت بكريم لو تنعدم وينعدمون وياها .. 😭
بس آمنة قوية ... بحياتي ماشفت هيج شخصية ..
بقت مصره لو فؤاد لو ماتطلع بدونه ..
عود شوفوا الفيديو 😭😭😭
لايك وتعليق وخمس ملصقات فضلاً وليس امراً 🥰