دراويش

دراويش ٢٤

#دروايش
بقلم #روز_الفياض
ح٢٤
.
.
.
وهو الصوت لو ينجاس .. احضن صوتك واغفى ..❤️
.
.
.
صدمتني آمنة من كالت اخوها انقتل معرفت شجاوبها ..
آمنة :
انقتل لان حزبي ... رغم هو مجان مأذي احد ابد .. بالعكس دائما جانوا يساعدون الناس بس هذا طريق الحزب .. مادام الناس بجهه والسلطة بجهه معناها نهايته الاصطدام وميروح بيها الا الفقير ...
فؤاد :
تقصديني يعني ؟
آمنة :
اني احجي بصورة عامة .. بس اذا انت شايف هالكلام يشملك فهذا مو ذنبي ..
فؤاد :
ذنب منو ؟
آمنة :
ماادري .. بس اذا تتذكر اني من زمااان حذرتك من هالطريق ..
فؤاد :
من زمان شوكت ؟
آمنة :
قبل ... من جنه بعدنه صغار بالكلية ..

حسيتها مسيطرة .. مثلما هي دوم مسيطرة وشخصيتها قوية ..
تحجي وتلمح للماضي بدون اي كلمة تدلل عليه ..
دائما ذكية ..
فؤاد :
قبل من جنه بالكلية كان اكو عدنه نوع من السذاجة مجنه نعرف شلون نتصرف ولاجنه نعرف الناس شنو ولاجنه نعرف شي اسمه حقد ولاغل ولا مصلحة ..
آمنة :
فؤاد .. اني هسه بالعيادة ومااكدر كل شوية افتح التليفون ارد عليك مااريد اتعطل عليك كلما يدخل مراجع .. ممكن ارد عليك بعدين لان هواي اكو حجي غامض بيناتنه محتاجين نوضحه ..
فؤاد :
اتمنى ..
آمنة :
شنو ؟
فؤاد :
نوضحه ؟
آمنة :
معناها من اخلص عيادتي راح نتواصل ان شاءالله واكو موضوع اريد اخذ رأيك بي .
فؤاد :
راح اكون بالانتظار .

سديت التليفون واني احس نفسي مرتاح .. اكو شعور بالانتعاش احس بي من احجي وياها ..
وكلي لهفة لموعدنه بعدين ..
ياترى شتريد توضح ؟ اكو هواي امور اريد منها توضحها بس هي شنو اللي تريد مني اوضحه الها ؟
وشنو هو الموضوع اللي تريد تاخذ رأيي بي ياترى ؟
.
.
كرشفة من فنجان قهوة تنعشين حواسي ..💞
.
.

نزلت يم ابوي لكيت عدنان زوج جنان عدنه كعدنه نسولف شوية بعدين اجوا البنات كعدوا ويانه حنان وميسون وجنان ..
سألت عدنان :
اكو بيت بشارعكم اريد اشتريه متعرف شكد سعره ؟
عدنان :
يابيت ؟
فؤاد :
بيت مقابلكم بيت ابو غيث ..
عدنان :
مااعرفهم والله بعدنه منعرف الجيران .. بس مومشكلة اسألك عليه واشوف بيش يردونه ..
فؤاد :
اي والله ياريت ..
جنان :
منو كلك عليه ؟
فؤاد :
دريد ..
جنان :
علواه تشتريه اذا سعره زين وتصير يمنه ..
فؤاد :
الله كريم .. خل نشوف سعره واحتمال ابيع جزء من الارض .
جنان :
ياارض ؟
فؤاد :
اللي اشتريتها بفلوس التعويض ..
جنان :
ياصلاوات .. اي زين سويت من اشتريت بيهن عقار احسن ميبقن بدون فايدة ..
فؤاد :
الحمدلله ..
عدنان :
لانك طيب .. والله وعلى نيتك الله رزقك ..
ابوي :
اي والله اني هم كتله انت على نيتك ..
فعلا وعلى نياتكم ترزقون .
فؤاد :
منريد شي بس نسأل الله حسن الخاتمة .
عدنان :
لا عمي لا .. شنو متريد شي لازم نزوجك بعد .
فؤاد :
لادخيلك ههههه بعد التوبة ..
عدنان :
لاشنو التوبة شنو قابل اول واحد يتزوج وميتوفق .
فؤاد :
الله كريم ..

حاولت اتهرب من الموضوع مالي خلك بعد شي اسمه زواج ومالي خلك اتناقش ويه احد بهالخصوص .

انتظرت رسالة آمنة على نار ..
بقيت كاعد لنص الليل بس ماكو شي ..
نعست ونمت بعدما مر الوقت بطيء ومزعج وكئيب ..
اقسى شي هو الانتظار ..
.
.
اقسى انواع الانتظار هو انتظارك لاشياءٍ تعلم انها ربما لن تأتي ابداً ..
.
.
اختفت آمنة ..
متجرأت اراسلها ..
وسيطرت على عقلي وتفكيري جملة وحده :
( اكيد اجتمعت مع كريم .. اكيد اجاها لمصر .. او يجوز هي راحتله لعمان ؟؟ اكيد لان بيناتهم ولد مهما صار يبقى اكو شي مشترك بينهم دائما راح يجمعهم وهو سيف .. ومهما كان مستوى المشاكل والخلاف بينهم واضح انه همه متعايشين ويجوز تحبه والدليل زواجهم مستمر ) .
الف يجوز ويمكن وماذا لو .. خطرت على بالي وكلها تدور حول علاقتها بكريم ..
مر يومين او تلاثة وجنت رايح لدريد حتى انهي موضوع الحزب لان خلص مااكدر اعمق انتمائي اكثر ويجوز ارجع لامريكا ..
بالطريق اتصلت بيه حنان :
الو فؤاد .. الحكنه ..
فؤاد :
الوو .. ها حنان شكو ؟؟
حنان :
حمودي انخطف ..
فؤاد :
شنووو !!!
حنان :
وهو رايح للمدرسة طابكة عليهم سيارة هو وصاحبة وماخذين حمودي ...

مكدرت استوعب بسبب بجي حنان سديت التليفون وطلبت من السايق يستدير ويرجع للبيت ..
وصلنه نزلت اركض لكيت الجيران ملتمين عدنه سامعين صوت ميسون تصرخ ..
لكيت ابوي يبجي وفراس جاي بالطريق جان بالدوام وحنان هم بالدوام الظاهر ميسون مخابرتها وكايلتلها ..
فؤاد :
شصاير ؟
ابوي :
ياحمودي ياحبيبي .. ياحبيب جدو ..
فؤاد :منو كلكم ؟

رد علي حجي جواد جيرانه كال :
هذا ابن ست وجدان المعلمة جان واكف وياه يردون يعبرون الشارع وهو اجه كال اجه يركض خطية حتى وجه اصفر ..
فؤاد :
بلغتوا الشرطة ؟
ابوي :
لا مسوينة شي اني عاجز وهاي البنية بس تبجي على ابنها لاتعرف تروح ولاتعرف تجي ..

اتصلت على فراس :
الو .. ها فراس وينك انت .
فراس :
جاي جاي بالطريق .
فؤاد :
لتجي للبيت بالاول روح للمركز بلغ الشرطة ..
فراس :
يمعود شتسوي الشرطة كل شي متسوي الله وكيلك حتى لو يعرفون الخاطف يخافون يلزموه .. يخاف من عشيرته مو هو شطيح حطنه غير هالعشاير ..
فؤاد :
على كيفك .. اهدأ .. اهدأ شويه وان شاءالله ماعليه شر ..
فراس :
فؤاد .. اتصلنه على دريد على محمود همه خليهم يتحركون اني مااكدر اسوي شي جسمي كله يرجف ...
فؤاد :
وهو كذلك ..

سديت التليفون ويه فراس واتصل دريد :
الو
فؤاد :
الو السلام عليكم
دريد :
وعليكم السلام .. جا شني عمي انت وينك ؟ صار ساعة كاعد متانيك ..
فؤاد :
اتصلوا علي من البيت حمودي ابن فراس مخطوف ..
دريد :
شنووو ؟؟؟
شوكت ؟ وشلون ؟ ووين جان ؟

حجيتله الموضوع كال :
هسه اخلي الشباب يمشطون المحافظة كلها .. لاتخاف والله نجيبه لو من حلك السبع لاتخافون ..
فؤاد :
الله كريم .. والله امه خطية حالتها تكسر باب الگلب وفراس حالته حاله وميعرف شيتصرف شيسوي كلي خابر لدريد هو يدوره ..
دريد :
الله يساعده والله الضنا غالي ..
فؤاد :
بعد مااوصيك
دريد :
شتوصيني قابل توصيني على ابني .. صدك جذب ..

رجعت يم ابوي خفت عليه وشويه واجت حنان من الدوام من الباب تصرخ وانوب اتكابلت هي وميسون واشتغل البجي والنوح ..
طلعتلهم :
ام محمد .. حنان .. صدك جذب .. ذكروا الله ان شاءالله مابي شي ليش البجي ..
ميسون :
يمه وليدي .. اريد ابني .. اريد وليدي ..
فؤاد :
صلي على محمد .. ان شاءالله اليوم لو باجر يرجع لتخافين وبدل البجي كوموا اتوضوا وادعوله يرجع بالسلامة ان شاءالله ..

زادت حنان بالبجي وعلا صوتها درت عليها بعصبية كتلها :
لج حنان !!!

اشرتلها على ميسون ليروح يصير بيها شي ومناك ابوي صحته على كده ميتحمل هلكد ضغط وصدمات ..
اجه فراس بس ساكت محجه ولاشي بس يطلع للباب ويرجع يفوت جوه يطلع للباب ويرجع يفوت جوه ..

بهالاثناء اجو اهل ميسون امها وابوها ..
اني جنت واكف بالحديقة سلموا علي وفاتوا جوه ..
رديت السلام وبقيت بره ..

وره ساعتين تقريباً جنت اصلي ودك تليفوني خلصت شفت آمنة متصله ..
مالي خلك هسه احجي ويه اي احد لان عقلي من التفكير راح ينفجر مااعرف شفكر ..
منو الي خطفة ؟ وشيريد ؟ وليش ؟
وشلون نرجعه ؟ وشوكت نلكاه ؟

دكت التليفون هالمرة محمود :
الو
فؤاد :
الو
محمود :
هاا فؤاد .. السلام عليكم
فؤاد :
وعليكم السلام
محمود :
جا خويه انت اتصل بيه وكلي تره صار كيت وكيت .. جا انه اخوك مو عدوك .. جا مثلما خابرت دريد كول ادك على محمود واكله بلكي يكدر يسوي شي ..
فؤاد :
لا والله دريد هو اتصل بيه اني مااتصلت عليه لان هو جان منتظرني امر عليه للمكتب بس اتأخرت ونسيت اتصل بي بسبب عالخبر ..
محمود :
هاا .. شني هالخبر هذا ؟ شوكت هالحجي ؟ بيش الساعة صار ؟ وين صار ؟

حجيتله المعلومات اللي اعرفها كال :
مو خوش خبر والله .. وينه وينه فراس داطينياه خل احجي وياه شوية ..

دخلت انطيت التليفون لفراس حتى يحجي ويه محمود ..
انتبهت على ابو عذراء صافن علي غلست ..
خلص فراس كلام مع محمود وانطاني التليفون وطلعت من يمهم ..
بقيت كاعد بره يم الحراس منتظر خبر ..
بقينة للعصر مخبوصين لااكل لاشرب بس ساكتين ونحاول نهدأ ميسون وابوي ..
فراس نوعا ما كان متماسك الى ان ظلمت الدنيا طلع وكف بالباب اشوفه من الشباك يمسح بعيونه .
طلعت وراه كتله :
فوت يااخوك اتوضى وصلي واذكر الله .. ماكو شي ان شاءالله لتخاف عليه ..
فراس :
الدنيا ظلمت ... هو يخاف من الظلمة .. افكر بي هسه ياترى وين خاليه .. بغرفة بيها ضوه لو غرفة ظلمة ..

بجه .. حضنته وبجيت وياه ..
بقينه يومين منعرف اي شي عن حمودي  وميسون لا اكل ولاشرب وكل شوية تتخربط وتوكع .
جنان بقت يمنه حتى هي وحنان يصبرون ميسون ويهتمون بالبيت والجهال ..
ثالث يوم دك على فراس رقم غريب وهذا الشي المتوقعينه واللي بلغونه بي الشرطة انه اذا اتصل رقم غريب جاوبوا لان احتمال يكون الخاطف او احد افراد العصابة ..
بعدما جاوب فراس عالتليفون كان توقعنه بمحله اتصلوا سمعوا فراس صوت حمودي وبعدين كلوله :
اذا تريد ابنك يرجع .. جيب سبعين ورقة .
فراس :
سبعين ورقة ؟ منيلي سبعين ورقة منين اجيب ؟
الخاطف :
بعد مو مشكلتنه هاي .. هاي مشكلتك انت تدبرها .. تريد ابنك يرجع دبر السبعين ورقة ..

وسدوا التليفون ...
فراس ظل يدك على راسه ..
فؤاد :
اهدأ يااخي شبيك .. اذا انت هيجي تسوي شخليت لامه .. شيصير بيها من تشوفك انت هيجي منهار ؟!
فراس :
يردون سبعين ورقه منين اجيب فهمني ؟؟!
فؤاد :
يااخوك صلي على النبي شالقصة لو ابيع روحي مااخلي ابنك ... انت بس شوية صير قوي .. اذا مو لخاطر زوجتك لخاطر ابوك ...

كعد فراس بالحديقة عالكاع يبجي وحاط راسه بين رجليه ..

اتصلت على دريد كتله :
اريدك تشوفلي شراي للارض .. بسرعة كون اليوم تحصل وباجر ابيع واستلم بيش ميكون السعر مو مهم حتى لو بخسارة ..
دريد :
ليش ؟ شكو ؟

حجيتله الموضوع وكتله :
حاليا مجوه ايدي هيج مبلغ ولازم ابيعها اليوم قبل باجر ..
دريد :
عمي صدك جذب .. تبيع الكاع علمود سبعين ورقة ؟ جا عمي الصحبه المن اذا بهذا الوكت ماتفيد .. الكاع ماتبيعها واعتبر الفلوس بجيبك وانه بالليل اجي واجيبلك السبعين ورقة وان شاءالله ماتحتاجهن ان شاءالله يكضونهم ويلعنون والدي والديهم ..

بالليل مر علينه دريد وجابلنه سبعين ورقة وراح ..
نمت يم ابوي بغرفته حتى اراقب حالته خاف يتخربط وضعه الصحي بسبب التوتر والضغط ..
كعدت رحت للحمام الساعة تقريباً بالثنتين ونص ( ٢:٣٠ ) ..
سمعت صوت ميسون بالمطبخ تحجي بالتليفون :
احلفي مو هو؟ احلفي .. احلفي مو هو ..
كتلج احلفي ..
..............
ميسون :
مالي علاقة .. اريد ابني ... اذا طلع هو الخاطف ابني ياعذريه والله اشرب من دمج ودمه ..

سدت التليفون واني احس نشف دمي ..
معقولة عذراء الها ايد بالموضوع ؟
معقولة وصلت بيها المواصيل تخطف ابن اختها ؟
معقولة حبيبها الشفيه هذا مستواه ؟؟!!!
اذا صدك هالكلام فاني جنت بورطة جبيرة بس الله يعلم شكبرها ..
ومن طلكتها الله نجاني منها ..

طلعت ميسون من المطبخ انصدمت من شافتني واكف كبالها وحاولت تتصرف طبيعي :
هاا بعدك كاعد ؟
فؤاد :
ومنو يجيلنه نوم بهالوضع .
ميسون :
اي والله .. خطية فراس توه نام ..

رادت تتعداني وتروح للغرفة بس اني كتلها :
ام محمد اذا تسمحين اريد احجي وياج بموضوع ؟

دارت علي كالت بارتباك :
خير؟
فؤاد :
خل نكعد بالديوانية احسن ..

بقت ساكته واني سبقتها للديوانية ..
اجت وراي كالت :
شكو ؟
فؤاد :
اني سمعت كلامج هسه بالتليفون ويه عذراء ..

بقت مخلوسة محجت ولاحرف وظل وجهها ينطي الوان ..
فؤاد :
انت اختي مثلما فراس اخوي .. وحمودي يشهد الله ابني ومعزته يمكن اكبر من معزة فراس .. ولو اتطلب الامر انطي روحي بداله انطيها ومااقصر .. بس مااكدر اسوي شي وحدي .. الشرطة هنا وجودها مثل عدمه واني اعتمادي كله على جماعتي بالحزب ولحد الان محصلوا ولاخيط يكدر يوصلنه اله ... واحنه منضمن انه راح يكونون صادقين وياخذون الفلوس ويرجعون محمد ... احتمال يقتلوه  لاسمح الله ... فاللي اريده منج اذا تردين ابنج يرجع سالم مابي شي .. تساعديني .. انت لازم تساعديني حتى ارجعلج ابنج ..

ظلت تبجي كتلها :
ام محمد .. البجي ميفيد محمد .. احجيلي الصدك حتى اكدر اساعده .. وثقي انه الكلام اللي راح تحجيه راح يبقى بيني وبينج والله يشهد ..

بقت متردده وخايفة بعدين كالت :
اني شاكه بهذا اللي يحب عذراء ..
فؤاد :
اممم .. منو هو ؟ وليش شاكة بي ؟
ميسون :
هي قبل .. قبل من جانت توها متخرجة من الكلية .. اتقدملها ولد بس ابوي موافق عليه .
فؤاد :
اممم .. ليش ؟
ميسون :
كللها انت خريجة وشاطرة وذكية وحلوه والف واحد يتمناج شلون انطيج لواحد ماعنده شهادة ومترقن قيده مرتين مدري تلاثه وميشتغل واهله حالتهم حاله وبمنطقة بعيدة بالارياف على اساس ومن سألنه عليهم طلعوا من غير محافظة وجايين هنا كاعدين ابيت حواسم ( تجاوز ) واخوانه يكبسلون وابوهم متوفي وبس الام مبتليه بيهم وبطلايبهم ومكسراتهم ..

هزيت راسي واتنهدت كتلها :
افتهمت ..
ميسون :
والله اني ماادري بيها عدها تواصل وياه والله العظيم وداعت جهالي لو ادري مااقبل تخطبها .. بس اتفاجأت من انت جبت تليفونها ذاك اليوم وشفنه الرسائل ..
فؤاد :
صادقة .. اني ماعندي شك بيج ابداً .. بس انت هسه شفتي شي ؟ سمعتي شي خلاج تشكين بيها وبي ؟
ميسون :
والله شكلج ياخوية .. اني اليوم كله افكر بالرسائل القريتها بتليفونها والشيطان يصورلي هو وره  الموضوع  .. خابرت عليها نكرت وتكلي انتِ اتخبلتي .. يجوز صدك اني اتخبلت اشك بأختي .. بس والله كلبي ماكلني على وليدي ماادري شسوي ..

رجعت تبجي ..
فؤاد :
استغفر الله واتوب اليه .. وحسبنا الله ونعم الوكيل ..
لتبجين ام محمد .. ان شاءالله يرجع .. اني هالكلام راح اعتبر نفسي مسمعته منج مااريد اسوي خلاف بينكم انتِ وفراس وخصوصا احنه ممتأكدين من شي .. هذا كله مجرد كلام مبني على ظنون .. يعني هواء في شبك ..
لتخافين وخليها على الله ..
ميسون :
بس مو تزعل مني والله العظيم اني مجان عندي علم .
فؤاد :
لا لا بالعكس اني مزعلان من احد .. قدر الله وماشاء فعل .. الحمدلله على كل حال .. بس مع الاسف عليها والله المفروض منها انسانة مثقفة وواعية وفاهمة ..

بقت ساكته كتلها :
روحي نامي وارتاحي .. انتِ تعبانه ..
ميسون :
تصبح على خير .
فؤاد :
تلاكي الخير ..

راحت ميسون لغرفتها واني بقيت كاعد اضرب اسداس بأخماس ..
انتظرت الصبح على احر من الجمر .
اتصلت بمحمود مع اول خيط ضوه وجان كاعد كتله :
نكدر نطلع اسم صاحب الخط اللي اتصل بينه ؟
محمود :
اي .. نطلعه .. اكو احد اتصل بيكم ؟
فؤاد :
اكو رقم البارحة اتصل بفراس وطلبوا سبعين ورقة ..
محمود :
ورديلي الرقم برسالة واعتبر الموضوع منتهي ..
فؤاد :
محمود .. خاف محمد يروح بيها ؟؟؟
محمود :
اذا رجعلك بي زلغ هالشارب مو على رجال ..
فؤاد :
والنعم والله  ..

موقف محمود كسر حاجز الجليد والبرود البيني وبينه اللي صار نتيجة موضوع التعويض ..
للظهر رجع محمود اتصل بيه كلي :
عرفناه ..
فؤاد :
منو ؟
محمود :
واحد مهتلف .. بيتهم بالاطراف ..
فؤاد :
لزمتوه يعني ؟
محمود :
لا اليوم راح يراقبونه يشوفونه وين يروح ووين يجي .
فؤاد :
محمود الوكت مو بصالحنه هن يومين مهلة قبل التسليم .
محمود :
افه عليك .. انه اخلي ابن اخوي يصيرله شي .. شحدهم يسووله شي .
فؤاد :
امه وابوه راح تخبلون ..
محمود :
يومين بس .. بس يومين اصبرلي ..

صعدت صليت بغرفتي ودعيت ربي يرجعه سالم معافى لامه وابوه .. ونذر علي بعد ابطل من شغلة الاحزاب واعتزلها تماماً بس يرجع حمودي لاهله ..

بيوم تسليم الفلوس نفس الرقم اتصل على فراس وحدد مكان وزمن التسليم ..
المكان كان سوق والزمان الساعة اربعة العصر ..
طلبت من فراس انه اني اسلم الفلوس كان عندي فضول اشوف هالشخص ..
بالاتفاق مع الشرطة وجماعة محمود تمت مراقبة المكان من كل الزوايا ونشر عناصر بزي مدني بكل مكان ..

وصارت الساعة بالاربعة ..
وكفت اني بالركن اللي هو حدده وبجيبي ظرف الفلوس ..
مرت الدقائق بقمة البطئ ..
غير القلق والخوف ..
بقيت واكف منتظر وشوية وشفت دراجة نارية عليها اثنين جاية باتجاهي ..
وصلوا يمي خففوا السرعة الى ان اتوقفت ..
اثنيهم ملثمين ولكن شفت عيونهم ..
نفس العيون ..
كلي الكاعد كدام :
انت ابو محمد ؟
فؤاد :
بلي اني ابوه ..
كلي :
وين الفلوس ؟
فؤاد :
ابني وين ؟
جاوبني :
موجود .. من نستلم الفلوس ونحسبهن ويطلعن كاملات نتصل بيكم نكللكم وين تلكونه ..
فؤاد :
واذا موفيتوا بوعدكم ؟
جاوبني باستهزاء وعصبيه :
انت جاي تتفاوض وياي ؟ لو جاي تطيني الفلوس ؟ اني احدد الخطة شلون تمشي مو انت ..

هزيت راسي كتله :
اكيد ..
جاوبني :
يالله وين الفلوس ؟ بسرعة .

مديت ايدي بجيبي حتى اطلع الظرف وفجأة من بين الناس طلعوا جماعة محمود والشرطة ولزموهم ..

حاولوا يشغلون الدراجة ويشردون لكن وجود الناس في طريقهم اعاق هروبهم وسهل مهمة القاء القبض عليهم ..

اخذوهم للمركز وبعد التحقيق والضرب اعترفوا بمكان محمد ..
راح فراس ويه جماعة محمود والشرطة للمكان وفعلا لكوا محمد ..

اتصلت بحنان :
لكيناه ..
حنان :
لكيتوا محمد ؟؟
فؤاد :
لكيناه وهسه جابوه واجوا ..
حنان :
كلللللللللللل ووووووششششش كللللللللللللووووووشششششش ..

اشتغلت الهلاهل بسلامة حمودي حنان وجنان والجيران ..
وصلنه للبيت لكينه دريد جاي قبلنه وذابح ذبيحتين على سلامة محمد ..
ميسون بس دخلنه اجت تركض كتلها :
وراي وراي جايين .. قرة عينج ام محمد ..

دقايق ووصلوا ..

الجيران ظلوا يضربون اطلاقات نارية وجماعة محمود كلها اجت ..
انسد الشارع من السيارات ..
وانترس البيت ذبايح ..
فراس من فرحته كال :
اليوم هاي الناس كلها عشاها هنا ..

راح للمطعم وطلب اكل عبالك مال عرس ..
اهلنه واقاربنه كلها اجت ..
حتى البيت مابي مكان واحد يتحرك براحته ..
بعد العشا كاعدين نشرب جاي ومحمود كاعد يمي كتله :
شنو مصير العصابة ؟
محمود :
جهنم وبئس المصير ان شاءالله اكيد ينحبسون ... همه اخوان دريت انت ؟
فؤاد :
والله ؟ محد كلي ..
محمود :
اي اخوان .. عركجيه .. سر... ..
فؤاد :
زين عندي رقم ثاني اريد اعرف صاحبه منو ... تكدر ؟
محمود :
رقمن ؟
فؤاد :
هو اني لو اعرف رقمن اسألك ؟
محمود :
ههههه هم صدك .. اي تدلل وديلياه واعرفلك المن .
فؤاد :
بس اريده بسرعة ... وماريد احد يعرف بالسالفة .
محمود :
اعتبره تم .

ثاني يوم اتصل بيه محمود كلي :
تجي ؟
فؤاد :
وين ؟
محمود :
اخذك للتحقيق ويه ذوله المطايه .
فؤاد :
اي يالله اذا نكدر نفوت للتحقيق ياريت ..

مر علي محمود واخذني بالطريق كلي :
انه ماردت اكلك بالتليفون .. بس همه حققوا وياهم وطلع واحد منهم يعرف اهل مرتك ...

حسيت وجهي ظل يصب مي من الخجل والفشلة ..
محمود :
احجي بعد لو كافي ؟
فؤاد :
كافي .
محمود :
علمود هاي السالفة انت طلكتها ؟

اتحسرت وهزيت راسي كلي :
جلبه بت الجلب شتريد من الله بعد ماخذتلها طبيب صيت وسمعه وناس طيبين وعايفته وراكضه على هذا ابو الوصخ المكبسل !!!
فؤاد :
بس جاوبني .... الها ايد بالموضوع لو لا ؟
محمود :
لا .. جا لو الها ايد والله حتى لو على ذمتك الا اخليهم يسحلونها للمركز ويطيحون حظها ..
فؤاد :
شكال ؟
محمود :
شيكول بعد .. جا غير هي الثوله مطيته كل المعلومات عندك ..
على ابو عمه جاي من امريكا وبالحكومة عده فلوس ..

بقيت ساكت لكن اتمنيت الكاع تنشك وتبلعني ..
حس بيه محمود كلي :
الحمدلله خلصت منها ومن اهلها ... هاي ماتستاهلك ..

هزيت راسي وبقيت ساكت ..
محمود :
لاتضوج .. ولاتتحسر .. ولاتسكت وانه اخوك .. انت تاج راسها تسواها وتسوه عشيرتها ..
فؤاد :
والحل ؟ اختها طيبه وزوجة اخوي .. لا اكدر احجي ولااكدر اسكت ..
مثل بلاع الموس صرت ..
محمود :
بس هاي لازم تتأدب .. مادام اختها شايلة اسم اخوك هاي باجر عكبة  خاف تسوي مصيبة وتگصر رگابكم ..

كلمات محمود اذتني لكن مااكدر ارده لان اللي تكون بهالغباء كل شي متوقع منها ..
محمود :
خليها علي ..
فؤاد :
شتسوي ؟
محمود :
مالك شغل انت خليك بعيد جنك ماتدري بشي .. انه اخليها تتأدب واخلي ابوها يخاف منكم خوفة الحية ..

بقينه كم يوم مشغولين بالخطار والناس الرايحة جاية بعدها اتصل بيه محمود :
جبناها هي ابوها للمركز .. طيحنه حظها .

رغم انه الي بيني وبينها انتهى ومااحمللها اي مشاعر عدا الاشمئزاز لكن هم حزت بنفسي من كال طيحنه حظها ..
محمود :
كلت رزاله تسوه حياتها .. خلوها بالمركز ماتسوه فلس الضابط نخلها نخل بالرزاله وانوب خلص منها اندار على ابوها .. كله انت وين نايم وماتدري ابتك مصاحبه واحد عرگجي ومكبسل وطايح حظه .. انت ابو انت .. بتك خلت راسكم بالطين ..
فؤاد :
حسبنا الله ونعم الوكيل ..
محمود :
انه وصيت الضابط كتله كللهم لخاطر نسيبكم سابقاً الدكتور ماراح نذكر اسمها بالتحقيق ولا راح نجرجركم بالسجن والمحاكم ..
فؤاد :
كون يفيد .. والله تصدك .. اني بهاللحظة مسكور خاطري على ابوها .. هاي نتيجة الدلع والدلال ..
محمود :
ويطبه حمس .. خل يعرفها على حقيقتها خل يتندم على فؤاد ..
فؤاد :
يمعود يتندم لو ميتندم .. مو مهم .. الحمدلله من خلصت منها والاهم الحمدلله من رجع حمودي سالم ومابي شي ..
محمود :
مو كتلك ارجعه ..
فؤاد :
والله وكفوا ..
.
.
.
رحت لدريد ومحمود جان هناك كعدنه سولفنه وحجينه بعدين فاتحتهم بالموضوع وكتلهم اني راح اترك الحزب وعالاكثر راح ارجع لامريكا ..
بالبداية محمود اعترض وحجه لكن بعدين اتفهموا وسكتوا وكلولي براحتك .. الله يوفقك ..

رجعت للبيت حسيت بعد اللي صار وجودي بالعراق بي خطر على افراد عائلتي .. اذا مو خطف علمود الفلوس فمكن علمود عداوة او منصب او تصفيه او او او الى آخر الاحتمالات ..
مااتمنيت في يوم من الايام افكر بالرجعة لامريكا ..
ولا اتمنيت اعوف ابوي وخواتي واخوي ..
لكن الظاهر هذا الافضل الي والهم ..
بالليل رحت حجيت ويه ابوي وكتله :
بطلت من الحزب .. ارتاح حجي ..
ابوي :
اييييه ... الله يريح كلبك ان شاءالله ..
فؤاد :
هههه .
ابوي :
عفيه عليك .. انت طبيب لاتنسى هذا الشي مهنتك مهنة انسانية وشرف ..
فؤاد :
الله كريم .. بس اني  بعد مااكدر ابقى هنا ..
ابوي :
لعد وين تروح ؟
فؤاد :
ارجع لامريكا احسن ... اذا ابقى تتأذون .. وجودي احتمال يشكل خطر علي وعليكم .. وحتى لو ردت ابقى مااكدر اشتغل ولااتحرك خاف انخطف .. زين الى متى ابقى كاعد بالبيت ؟ اني هسه عندي حراسة لكن بدون الحزب ماعندي حراسة منو يحرسني ويحرسكم ؟؟؟

بقى ابوي ساكت حسيته ضاج .. لكن لامفر ..
.
.
.

‏مازِلت أودُّ أخبارك بالمزيد .. بأشياء
خبأتها في صدري تتعلقُ بك وحدك
أهمّها إنني لم أُستطيع حب شيء كما أحببتك.
.
.
.
#صباح الخير
شلونكم شخباركم
شفتوا بلاوي عذيره ؟؟😤
شفتوا ثول عذيرة ؟😤
شفتوا غباء عذيرة ؟😤
خطية ميسون ..😩
موقف محمود ودريد فدشي 😍
هاي الاصدقاء الصدك
شفتوا شسوه محمود بعذيره وابوها 😂
واخير بطل فؤاد من الحزب 💞
توقعاتكم شراح يصير بعدين ؟؟