دراويش

دراويش ٢٢

#دراويش
بقلم #روز_الفياض
ح٢٢
.
.
.
حائرٌ كنهرٍ لايعرفُ لماذا يركض ..
.
.
ابوي:
انت تعرف شكد متداينة ؟
فؤاد :
شكد ؟؟

اتنهد ابوي وحسيته خايف يحجي كتله :
احجي حجي هي خربانه خربانه عالاقل حتى مااحس نفسي ظلمتها بعدين ..
ابوي :
الدلالة تكول عليها مليونين ..

كل احنه حسينه بالصدمة :
مليونين !!!
وين ودتهن ؟ شمشتريه ؟
ابوي :
ماادري الدلالة جانت تريد تحجي بس هي اجت تركض نزلت انطتها فلوس وسكتتها حتى تروح ..
فؤاد :
افففف .. استغفر الله واتوب اليه .. ادري ياحجي ليش ساكت ؟ يعني تعرف اكو شي وكلتلك المره هلكد عليها دين ليش ساكت ومحجيت ؟
ابوي :
ردت احجي بس خفت تصير بينكم مشاكل بسببي ..
فؤاد :
بسببك ليش قابل انت المتداين لو هي ..

حسيت قبق راسي راح يطير من الصداع ..
بس حاولت اهدأ لان مااريد اضوج ابوي ..
فؤاد :
منو يندل بيتها هاي الدلالة ؟ حنان تندليه ؟
حنان :
لا والله مااعرفها ولااندل بيتها ..
فراس :
اني ادورلك عليها .. ارتاح هسه انت عوفك من هالسوالف ..

منين ارتاح واني كلما اتذكر اسلوبها وحجيها اشتعل واطفى ..
بقيت يومين مالي خلك واحس نفسي تعبان ..
راح من بالي سيف نسيت موضوعه ..
من اتحسنت شوية نفسيتي صعدت ادور على نقالي ماكو يمكن نسيته فوك من اخر مره من صارت المشكلة ..
فعلاً .. صعدت للغرفة لكيته عالميز ولكيت تليفون عذراء هم ناسيته ..
خليت تليفون عذراء بالمجر واخذت تليفوني لكيت هواية اتصالات من ارقام غريبة مااعرفها اغلبها دولية..
ردت انزل دك التليفون هم رقم دولي ..
بقيت اباوع .. بالبداية مجاوبت بس بعدين انكطع ورجع دك جاوبت :
الو .. نعم ؟

الصوت متقطع ومو واضح ..
فتحت باب السطح يمكن اسمع من يحجي :
الوو ؟ الوو؟

هدوء ماكو جواب ..
انقطع الخط .. ردت انزل من السطح رجع دك نفس الرقم :
الووو ؟

اجاني صوت لثواني معرفت منو :
الو .. الو ..

بعدين حسيت هذا صوت آمنة جلدي قشعر وبقيت ساكت مكدرت احجي ولاكلمة ..
رجعت كالت :
الووو الوو دتسمعني ؟ عفيه اريد احجي ويه ابني سيف الله يخليك اني امه  ..

بلعت ريكي واستجمعت شجاعتي ورديت عليها بدون ماابينلها شي :
الو ..
اسمعج .. اسمعج ..
اني مو يمه حالياً بعيد ..
آمنة :
الله يخليك صارلي يومين اتصل على هذا الرقم محد يجاوب والله راح اموت من الخوف على ابني شتريدون انطيكم بس تركوه والله ماعندي غيره .. هو شنو ذنبه اذا ابوه جان بالامن هو طفل مراهق ..

سمعت صوت بجيها انعصر كلبي حاولت اهديها واني حاس بالمها لان ذكرتني بأمي ..
فؤاد :
لتخافين .. مابي شي .. محد سواله شي .. راح اكللهم يطلعوه بس لتخلينه يرجع للعراق مره ثانية .. العراق خطر .
آمنة :
الله يخليك طلعوه والله فقير وماله ذنب اخذوني آني بمكانه وطلعوه هو اخذوني آني ... اريد ابني منك ..
فؤاد :
ان شاءالله يطلع .. لتخافين محد اذاه مااخلي احد يأذيه اطمئني ..
آمنة :
لعد ليش صار يومين متجاوب عالتليفون ؟ عليك الله اذا بي شي كول لتلوع كلبي على وليدي .. والله ماعندي غيره والله ..
فؤاد :
مابي شي بس اني جنت تعبان والتليفون مو يمي .. لتخافين كتلج مااخلي احد يأذيه .. احنه ناس دراويش مو مثل ممتصورة .. احنه مو مثل كريم ..

مجاوبتني بقت ساكته .. اسمع صوت بجيها اللي صار اعلى كسرت كلبي ..
حاولت ماانقهر عليها واكطع الخط بس مكدرت .. كانما منوم مغناطيسياً ..
بعد فترة صمت من جانبي وتزايد بكائها كالت :
فؤاد ..... ابداعتي لتأذي ابني ..
مو ذنبه ابوه مو خوش آدمي ...

من شدة الصدمة وخرت التليفون وبقيت واكف وصافن وضاغط عالتليفون بقوة .. بس صوتها ودموعها اللي علقت براسي شسويلها ؟؟؟

رجعت التليفون على اذني سمعتها تتأكد اني عالخط :
الوو ؟ فؤاد ؟ الوو ؟؟؟

جريت حسرة جبيرة وكتلها :
لتخافين آمنة .. كتلج احنه مو مثل زوجج ..

رجعت تبجي كالت :
لخاطر المعروف اللي سواه ابوي وياك فؤاد ... اريدك تخلص ابني من الموت ..

صرت عصبي كتلها :
كتلج احنه مو مثل كريم الكلب .. ابنج راح يرجعلج ..

هي هم صارت عصبية كالت :
لا ميرجع .. ميرجع .. انت متعرف شي .. متعرف اي شي ..
فؤاد :
شعرررف ؟ شعرف ؟
آمنة :
اذا انت وجماعتك تركتوه غيرك ميتركه .. ابني ابوه عادم اوادم تفتهم شنو عادم اوادم ؟؟ مأذي ناس بكد شعر راسه ... فهمتني ؟؟؟
فؤاد :
ههه .. ههه .. هو هذا الشي المااعرفه ؟ اني اكثر واحد اعرف هالكلام ..
آمنة :
اني اخذته وسافرت حتى ميدفع حياته ثمن لاخطاء ابوه .. وهسه رجع من وراي .. رجع للموت برجليه ... المن اني انهزمت واتغربت ؟؟ المن ؟؟ رجع حتى يشلع كلبي ..
فؤاد :
اخطاء !!! كولي جرائم .. كولي مصايب .. كولي بلاوي ..
آمنة :
آآآه ... آآآه ... شتريد مني الدنيا بعد .. شتريد مني ...

كلما اقاوم احساسي ومشاعري وانكسار كلبي عليها دموعها تهزمني ..
اتجمعت الدموع بعيني واني اسمع بجيها على ابنها .. اتذكرت دموع امي من اخذونه الامن اني وابوي وفراس ..

اتنهدت ومسحت دموعي :
اهدأي .. باجر يطلع ابنج .. خلاص .. لتبجين ..
آمنة :
عليك الله فؤاد تطلعه .. حلفتك بالله .. عليك بروح والدتك تطلع وكون سالم مابي شي .. اني والده .. ام يافؤاد ام وابني ماادري وينه صار ايام مخطوف ..
فؤاد :
يرجعلج ان شاءالله .. لخاطر اثنين ابوي وابوج ..

سديت التليفون واني صافن ومتعجب وممصدك ..
هاي آمنة نفسها اللي جنت احجي وياها !!
اووف يازمن .. شفتحت من دفاتر قديمة ..
دخلت بدلت ملابس وطلعت اشوف سيف ..
وصلت نزلت ركض اتطمن عليه فتت للغرفة اللي هو بيها ملكيته ..
نشف دمي ..
صحت عليهم :
وينه ؟؟  وين سيف ؟؟

رد واحد مااعرفه كال :
دكتور بالحمام .. بالحمام هسه يجي ..

كعدت عالكرسي انتظره يجي واني افكر .. اني ليش متغير وتصرفاتي متغيرة كأنما اني مو فؤاد القديم ..
شبيك فؤاد ؟ انت الغربة وسنينها وتعبها مكدرت تغيرك ... ليش هسه تغيرت من رجعت ؟؟
ليش تخلي غيرك يرسملك طريق انت مراغبه ولاهاويه ؟؟
ليش تصير قاسي وتنسى فضل اهلها عليك ..
حتى لو هي قبلت بكريم بس ابوها واخوها انقذوا حياتك وحياة ابوك واخوك ..
لتصير ناكر للجميل ..
لان انت تعرف كلش زين انه محد جان يتجرأ يساعدك ويطلعك حتى لو جنت بريء محد يعرض حياته للخطر علمود احد بذلك الزمن ..
بس ابوها سوااها ..
جازف بحياته وسمعته واسمه وسلامته وسلامة عائلته وسواها ..
لتخلي افكار محمود تغيرك .. محمود انت شفته عنده استعداد ياكل حق غيره .. يرسم بعقله حقوق وادوار مموجوده حتى يحلل لنفسه الحرام ..
هذا مو ثوبك ..
انت مو بحاجتهم انت شغلك موجود وتكدر باي لحظة ترجع وتعيش حياتك مثل مامضى ..
هو قابل شكد باقي بالعمر .. مابقى بالعمر كد اللي راح ..

دخلوا سيف كعدوه مقابيلي عالكرسي ميدري هو اني موجود ..
اشرتلهم يطلعون برا ..
فؤاد :
شلونك سيف ؟

كمز ممتوقع احد موجود بالغرفة ..
سيف :
الحمدلله زين ..
فؤاد :
شخبارك ؟
سيف :
منيلي اخبار .. اني حتى مااعرف صبح لو ليل ..
فؤاد :
امك اتصلت تسأل عنك ..

رد علي بلهفه :
صدك ؟ صدك امي خابرت ؟؟
فؤاد :
قبل ساعة تقريباً ... كتلها زين وراح يطلع ..

بجه .. كتله :
مشتاقلها ؟
سيف :
اي والله عمو ... مشتاقلها ...
فؤاد :
ماالومك .. اني مشتاق لامي صار اكثر من اربعطعش سنة مشايفها ..
سيف :
صدك راح تطلعوني ؟
فؤاد :
صدك ..
سيف :
شوكت ؟
فؤاد :
اول جاوبني .. انت ليش اجيت لهنا ؟
سيف :
كتلك اجيت علمود ابيع البيت ..
فؤاد :
ههه .. وبعته ؟
سيف :
لااء .. ملحكت ..
فؤاد :
ليش تبيعه ؟
سيف :
ماما كالت نبيعه علمود دراستي .. اصلا بعد منكدر نرجع هنا .. المن باقي ..
فؤاد :
وين واصل انت بالدراسة ؟
سيف :
السنة الجاية ادخل جامعة ..
فؤاد :
اممم .. ابوك ميجيكم لمصر ؟ ميجي يشوفك انت وامك ؟
سيف :
لا .. ميعرف احنه بمصر ..
فؤاد :
معقولة ؟ ليش ؟

حرك جتفه وكال :
هيج .. مشاكل يعني ..
فؤاد :
اجيت عن طريق الاردن ؟
سيف :
لاا .. سافرت من مصر لسوريا واجيت من سوريا للعراق بالسيارة ..
فؤاد :
ليش عن طريق سوريا ؟
سيف :
لان ابوي وجماعته مال الامن والبعث كلهم بعمان وعدهم عيون ويراقبون وكل شي يعرفون اول بأول واذا اروح لعمان راح يعرف ..
فؤاد :
انت مو جوازك مزوره ؟ شلون يعرف ؟
سيف :
هو مو غبي حتى يعرف انه هي سوتلي جواز ومستمسكات جديدة .. لعد شلون طلعت .. واضحة انه سوته متوفي او خلت اسم شخص ثاني على اساس ابوي بمكانه .. بس يكدرون يعرفرني عن طريق اسمها بالمستمسكات اذا همه اذكياء .. ممكن يخلون احتمال هي اوراقها نفسها واسمها نفسه بأوراقي ..
فؤاد :
وليش هالدوخة والمجازفة ؟.. من البداية لو طالعين وياه مو احسن .. واذا على زواجه على امك يعني شغلة ضراير فهذا المفروض موضوع قديم وهم في بعض الاحيان الغاية تبرر الوسيلة ..
سيف :
يعني شلون الغاية تبرر الوسيلة ؟
فؤاد :
يعني امك تتحمل زوجة ابوك علمود سلامتكم وعلمود ابوك ..

سكت شوية بعدين كال :
بعد ... مو هي مو شغلة مرت ابويه .. امي يعني وابويه على خلاف من زماان .. يعني مو هسه ولاعلمود زواجه .. لا من الاول ..

ابتسمت باستهزاء كتله :
وشجابرها عليه ؟ جان اتطلكت ..
سيف :
بعد .. هي هم تخاف منه جانت .
فؤاد :
تخاف منه ؟ اي .. هم حقها .. هو ماله امان ..
سيف :
بعد يعني رتبة بالامن مو شوية .. وجان يهددها بأهلها ..
فؤاد :
صوجها .. هي شافته قبل وشافت اخلاقه .. شلون قبلت بي ؟ هي اختارت منصب ورتبة وصيت .. هذا الحصلته ..

بقى ساكت كتله :
محجتلك امك شسوه بيه ابوك ؟ شسوه بيها ؟ شسوه بزملائها بالكلية ... محجتلك اكيد .. شتحجي وشتكول بعد ..
سيف :
هي شعليها ...

اتنهدت وكتله :
يالله .. راح وكته هالحجي .. واني وعدتها اطلعك ..
باجر اخليهم ياخذوك ويوصلوك لسوريا .. ومناك انت ارجع ..
سيف :
لا ميحتاج بس طلعني منا واني اروح ..
فؤاد :
لاا .. مااريد يصيرلك شي واتحمل اني ذنبك .. امك خايفة عليك ... ابوك هواية مأذي ناس واحتمال ميرحموك ..
ارتاح اليوم ونام زين حتى باجر تطلع ان شاءالله ..

عفته واتوجهت للباب اريد اطلع كلي :
عموو .. مكتلي شسمك ؟
فؤاد :
شتسوي بأسمي ههه ؟
سيف :
حتى اذا وصلت لمصر احجي لماما عنك وعن اخلاقك  ...
فؤاد :
تعرف .. تعرف اني منو ميحتاج تحجيلها ..

عفته وطلعت وصيت عليه وكعدت عالمكتب اتصلت بدريد كتله :
هذا الولد اريد اطلعه .. كافي مالنه شغل يمه .. ابوه نذل حتى لو عرف مراح يجي ولاراح يسوي شي علمود ابنه .. شذنبه يتحمل نذالة ابوه ..
دريد :
بكيفك .. بس شوف محمود خاف عدهم شي ثاني وياه ..
فؤاد :
شعدهم ويه ولد مراهق زغير ؟؟ ماعدهم شي باجر راح اطلعه وانتهى شنو احنه عصابه خوما عصابه ؟؟
دريد :
لا مو عصابة ان شاءالله ..
فؤاد :
اريد مجموعة تاخذه توصله لسوريا ويتأكدون طار لمصر ويرجعون ..
دريد :
وعليمن مدوخ راسك بي .. عوفه وهو يروح يولي لاهله ..
فؤاد :
لاا مااريد يصيرله شي واشيل ذنبه .. امه خابرتني تبجي وتتوسل خايفة عليه ..
دريد :
امه ؟؟ آمنة ؟؟؟
فؤاد :
اي آمنة .
دريد :
هاا .. وشلون عرفت رقمك ؟؟
فؤاد :
خليته يتصل بيها من رقمي ويطمنها .. كسر خاطري ..

بقى دريد ساكت بعدين كلي :
فؤاد انت كلبك رهيف وماتتحمل الوضع والجاي يصير هنا اعرفك انه .. اللي تشوفه صح سوية ..
فؤاد :
تمام ...
دريد :
انه راح اجيك هسه ونتفق شلون وشوكت ومنو يطلع وياه ..

بعدد مرور ساعة اجه دريد وكعدنه حجينه واتفقنه عالموضوع وهو انه يطلعون اثنين ويه سيف لسوريا ويتأكدون من سفره لمصر ويرجعون ..
ثاني يوم تم الاتفاق ..
بقيت على تواصل مع الشباب اللي طلعوا وياه طول الطريق وعلى حسب توفر شبكة ..
الى ان وصلوا الى الحدود السورية ثم انقطع الاتصال لعدم توفر شبكة ..
اليوم اللي بعده اتصلوا بيه الشباب من سوريا بعد محصلوا شريحة سورية وكالوا انه همه اليوم راح يتوجهون لدمشق علمود يحجزون لسيف رحلة لمصر ..
بعد مرور يومين ثانية اتصلوا بيه من المطار قبل رحلة سيف بساعة لان سيف راد يحجي وياي كلي :
مااكدر اروح بدون مااشكرك انت انقذت حياتي وراح ابقى اتذكرك دائما واحجي للناس عن موقفك وشهامتك وياي ..
فؤاد :
ميحتاج تشكرني ولا تحس بالامتنان .. اني رديت لامك جميل قديم .. في يوم من الايام ابوك جان ناوي يعدمني وجدك انقذني من الاعدام ..

سكت شوية بعدين كلي :
مرات افكر ليش اني من دون الناس ابوي هيجي .. بس من اجيت للعراق عرفت مو بس اني هذا حالي ... بس الحمدلله اكو ناس مثلك ومثل جدو الله يرحمه ..
فؤاد :
جدك متوفي ؟ شوكت اتوفى ؟
سيف :
قبل الحرب بفترة بسيطة ..
فؤاد :
الله يرحمه .. يالله بابا روح .. اتوكل على الله ودير بالك على نفسك وعلى امك .. ولترجع بعد لهنا ..
سيف :
ان شاءالله .. مع السلامة .
فؤاد :
مع السلامة ..

اسبوع واني احس اللي صار حلم او فد شي من نسج خيالي .. لاحجيت ويه آمنة ولاشفت ابنها .. اكيد هذا حلم ..
في يوم اجه فراس وحسيته ضايج كعد يمي بالديوانية ميحجي كتله :
شبيك ؟
فراس :
ماكو شي .. بس عود اتصلت بميسون حتى ترجع .. متقبل ..
فؤاد :
ليش متقبل هي شعليها بعذراء ؟
فراس :
والله ماادري .. تكول غلطتوا على اختي وعلى ابوي ..
فؤاد :
قابل احنه اللي رحناله للبيت وغلطنه عليه واتهجمنه عليه لو هو اجه هاد علينه ..
فراس :
بعد اني كتلها براحتج .. بس بعد مراح اتصل لان اني مغلطان وانتِ مو طرف بالموضوع ليش تخلين نفسج طرف ..
فؤاد :
يالله ميخالف طول بالك خليها بعد شوية وهي بعدها تمل وتضوج وترجع ..
فراس :
وهو هيج ..
فؤاد :
الله يهديها .. كل الخراب من ابوها ..
فراس :
خيولي .. نسيت اكولك تره اني سألتلك على هاي الدلالة ..
فؤاد :
اي ؟
فراس :
يكولون بيتهم مناك يم المدرسة مال الولد الاعدادية ..
فؤاد :
وين صايرة ؟
فراس :
مدرستنه قبل بالاعدادية اللي داومنه بيها ..
فؤاد :
ها ها ..
فراس :
خل تجي وياي حنان حتى اوصلها الها تدخل هي الها تشوف شكد عليها عذراء شكد متداينه وارجعها ..
فؤاد :
خوش حجي ..

وره شوية اجت حنان من الدوام وحجيت وياها كالت :
اوكي العصر نروح .
فؤاد :
سوي نفسج جاي تسألين حتى تدفعين الدين اللي عليها .
حنان :
اي اي اعرف راح اسري نفسي جايه حتى اعرف شكد الدين حتى نسدده ..
فؤاد :
عفية عليج ..

العصر راحوا حنان وفراس لبيت الدلالة واتأخروا ..
اذن المغرب صلينه اني وابوي واجو ..

فؤاد :
بشروا ؟
فراس :
شنبشر .. هاي سالفة مينعرف راسها من ساسها .
فؤاد :
شكو ؟
فراس :
طلعت متداينة المليونين فلوس كاش ..
فؤاد :
فلوس كاش ؟؟ وين ودت هالمبلغ ؟؟ اني جنت انطيها شهرية بس متصرفها تكون اجمع .. كلت ميخالف يجوز تريد تشتري قطعة ذهب عاجبتها .. ومن تريد اي تجي تاخذ مني متصرف من شهريتها ..
بعد هاي الفلوس المن اخذتها من الدلالة ؟!!!!!!
فراس :
والله ماادري بس هالبنية طلعت لغز ..
فؤاد :
لاحول ولاقوة الا بالله ..

ابوي يقرا قران لكن يسمعنه .. من خلص كال :
تتذكر بيوم عرسك من كعدت وكتلك حلمت بأمك عاتبتني وكلتلي غير تكلي حتى اشوفله عروس؟؟؟
فؤاد :
بلي كتلي حلمان بامي ..
ابوي :
كتلها شفناله عروس اختاريناله بنيه وعجبته كلتلي منو العروس كلتها عذراء بت ابو ميسون كلتلي اهووو هم هذولة ...
فؤاد :
يعني مراضيه عليهم ؟
ابوي :
سبحان الله هناك وكلبها حاس باللي راح يصير .. اني بوكتها محجيتلك كلت يمكن يكون مجرد حلم وعسى ربي يوفقك ويسخرها الك ...

حسيت ابوي ضميره يأنبه على اللي صار فكتله :
اللي صار صار يابه .. كل شي قسمة ونصيب وهذا امر مكتوب من رب العالمين ( قل لن يصينا الا ماكتب الله لنا ) ..
ابوي :
ونعم بالله ..
فراس :
ونعم بالله .
.
.
.
ثاني يوم رجعت حنان من الدوام واني جنت متمدد بالغرفة فوك واقرا كتاب ..
دكت الباب كالت :
فؤاد كاعد ؟
فؤاد :
فوتي حنونه .. كاعد ..

دخلت كعدت يمي كالت :
اتغديت ؟
فؤاد :
الحمدلله رب العالمين اتغدينه اني والحجي عاشت ايدج على هيج باميا ..
حنان :
الف عافية .. باجر من تكعدون للصلاة هم كعدوني حتى اسويلكم برياني قبل لا اروح ..
فؤاد :
لا لتسوين .. كملي نومج وكعدي على موعدج روحي لدوامج .. اني باجر اسوي الغدا ..
حنان :
ههههه شنو تسوي الغدا صدك جذب ..
فؤاد :
ليش تضحكين ؟ مستغربة يعني ؟ لعد اني هناك منو يطبخلي ؟ لعلمج كل شي اعرف اسوي حتى البرياني اتعلمت اسويه باجر اني اسوي البرياني وانتو تتغدون من ايدي ..
حنان :
والله عمي خوش اخو انت مدللنه هههههه لعد شبيها مدام عذراء تتمندل علينه ..
فؤاد :
لتذكريني بيها وابوها ..
حنان :
شلون مااذكرك لعد اني المن جايه .
فؤاد :
خير ؟
حنان :
راسلتني اليوم الفگر بت الفگر حتى متتصل بس ترمش لو تدز مسج ..
فؤاد :
شتريد ؟
حنان :
تكول بابا سأل يكول الطلاك باطل لان اني حامل ..
فؤاد :
هاي العايزة بعد .. تريد ترجع تسع شهور تتمضيك براس فؤاد بحجة الطلاك باطل !!!
لا مو باطل هذا الحجي تضحك بي على غيري .
حنان :
على كيفك لاعلى كل شي تصير عصبي .. كلامها صحيح يعني هي القت علينه الحجة هسه اولا هي حامل وانت تعرف وثانيا هم بلغتنه اخاف مندري انه بهالحالة الطلاك باطل ..
فؤاد :
ساعة السودة من ترجع ، ولا كتلج مو باطل حنان الحمل مايبطل الطلاق لاتخبليني وترفعين ضغطي ..
حنان :
اسم الله عليك يااخوي شبيك هيجي متشائم ؟
فؤاد :
خليني ساكت حنان .. اني شايل بكلبي هواي وساكت لخاطر فراس وحتى ابوي مينقهر وضغطه يتأثر ..
حنان :
الله كريم لتفكر بعدين توكع وتتمرض وضغطك يتأثر خليها عد اهلها تتأدب ومنا لحدما تجيب الله كريم ..
فؤاد :
لو تجيب هسه عشرة مااريدها بعد .. كرهتها ..
حنان :
الله يساعدك .. حقك بس لتقهر روحك محد يستاهل شيريد يصير يعني تطلكها وتنطيها مؤخرها طززز ..
فؤاد :
يعني هي مستحت هسه من راسلتج بعد كل اللي صار ؟؟ والله بحياتي مشايف هيج بشر بلاكرامة ولااحساس ..
حنان :
لا اني كتلها .. واذا حامل يعني ؟ تتوقعين بعد كل اللي صار يرجعج مثلاً ؟
ترد علي تكولي على اساس اني ميته عليه .. خل يطلك بس حقوقي كلها اخذها مادام هو العايف من حقي المؤخر والغرفة بكل محتوياتها ..
فؤاد :
وقحة .. حتى بهالوضع همها المؤخر والحقوق والفلوس .. مثل ابوها بالضبط ..
حنان :
اووي دفعة مردي وهو شرجي ولاتنغث ..
فؤاد :
اني مقهور على هالطفل الي راح يجي شنو مصيره ؟ وشلون هاي راح تربيه وهي فاقده التربية .. فاقد الشيء لايعطيه ..
حنان :
ربك يسهل .. منا لحد متجيب مدري ميتين مدري عدلين هههه .
فؤاد :
لاحول ولاقوة الا بالله .. ياخوفي تسمع كلام ابوها وتنزله ..
حنان :
ثوله ..تسويها ..
فؤاد :
افه عليج حنونه اني كلبي مقبوض وانتِ تزيديها علي تكولين تسويها .
حنان :
هههه اسم الله ماكو شي ان شاءالله لتظل تفكر التفكير يمرض والله شوف شكلك شلون اتغير عن اول مااجيت جان وجهك يخبل هسه ذبلان وضعفان ..
فؤاد :
هاي عود ترفعين معنوياتي مو ؟ هههه .
حنان :
هههههه راح اخليك تنتحر هههه ..

بعدها حنان ظلت تراسل ميسون حتى تقنعها ترجع لان فراس اشتاق لاولاده وميريد يروح لاهل ميسون وميسون تكول الا يجي يعتذر من ابوي ..
فراس يكول اني لاغلطت ولاحجيت ليش اروح اعتذر ؟
بقينه محتارين ..

بعدها حنان من حجت ويه ميسون ميسون كايلتها انه ابوها شرطه اني وفراس نروح نعتذر من عنده ..
حنان راده عليها وكايلتلها :
فؤاد ميريد يرجع عذراء ..
حنان :
شدعوه عليه .. شنواول واحد تصير بينه وبين مرته مشكلة ؟
حنان :
جان كلتيلها هالكلام بدل  مراحت جابت ابوها وسوالنه مشكلة وقصة ..
ميسون :
براحته عيني ميريدها محد جابره خل ينطيها حقوقها ويطلك ..
حنان :
بمناسبة حقوقها ياترى فلوس الدلالة المليونين منو يسددهم هي تسدد من حقوقها لو هم احنه نتورط ؟
ميسون :
يا مليونين ؟
حنان :
سألي اختج ام الحقوق هي تحجيلج ..

بعد ايام رجعت ميسون متصله بفراس كايلتله عذراء ناسيه تليفونها يمكن بالغرفة لان هنا دورت عليه ماكو وتدك عليه مغلق ..
من كلي فراس اتذكرت كتله :
موجود فوك .. لكيته قبل مدة وخليته بالكنتور يمكن ماادري وين من اصعد ادوره ..
فراس :
اي نزله حتى امر اذبه عليهم .. وهم اشوف الجهال ..

صعدت دورت التليفون لكيته طافي ..
خليته عالشحن حتى يشحن ..
نمت كعدت العصر فتحت تليفوني لكيت عندي مسج ..
فتحته اتفاجأت مسج من آمنة :
( احيانا يرزقك الله معرفة اناس تقضي نصف عمرك متسائلاً لماذا عرفتهم ثم يحدث امر بعد سنوات فتدرك ان الله جعلهم في طريقك يوماً لان وجودهم نعمة من اكبر النعم في حياتك حتى وان كانوا غائبين ..
شكرا لانقاذك حياة ابني )

ظليت صافن عالرسالة ماادري كم مرة عدت قرأتها ..
يمكن خمسين مره .. شوية ..

بقيت محتار اجاوبها لو اسكت ؟؟ هي مره متزوجه .. واني هم متزوج ..
حاولت اقاوم رغبتي بعدم رد الجواب لكن فشلت ..
كتبتلها :
( لاشكرا على واجب .. اني رديت الجميل مو اكثر .. ) ..

بقيت كاعد بالفراش منتظرها ترد ..
مرت ساعة كاملة وهي مردت ..
طبعاً مترد .. ه متزوجة .. ومهما صار كريم زوجها بالنهاية وانت رجال غريب من الماضي ..

نزلت شربت جاي شفت فراس يبدل كتله :
دقيقة خل اروح اجيبلك التليفون فوك بقى عالشحن ..

صعدت لكيت تليفون واصل مسج من آمنة كاتبتلي :
( واكثر من الجميل .. )

مفهمت شتقصد ..
بقيت متحير بقصدها بعدين كتبتلها :
شنو اكثر من الجميل ؟

جاوبتني :
خليت سيف ميعصالي امر ههه .
فؤاد :
الله يحفظه الج ..
آمنة :
سبحان الله سنين انت بعيد عن العراق من طلعت اني انت رجعت ..
فؤاد :
يمكن هيجي احسن .. يمكن لو كنا في نفس المكان راح نكره بعض ..
آمنة :
ليش نكره بعض ؟
فؤاد :
لان انتِ اختاريتي كريم .. اتزوجتي كريم .. واني عندي ثار وياه شتتوقعين تكون النتائج ؟؟
آمنة :
اختاريت الخيار الوحيد المتوفر كدامي بوقتها .. مجانت اكو اختيارات ثانية ..

ضجت من تبريرها الواهي ..
مجاوبتها ..
اتذكرت تليفون عذراء انزله لفراس ..
شفته مخلص شحن شغلته ..
اول ماشغلته اتفاجأت بكم الرسائل اللي وصلت ..
اخذني الفضول وفتحت اول رساله مرسلها بدون اسم فقط رقم !!!
.
.
.

هواي اشتاقلج .. بس استحي احجيها ...💘
.
.
.
#صباح الخير حبايب مشتاقون ❤️
شلونكم شخباركم ؟
شفتوا فؤاد شلون خلص ابن آمنة ؟😍
شفتوا المصكوعة عذيرة شمسوية ؟👌
شفتوا ميسون شلون ماتقبل ترجع الا يعتذرون للافندي ابوها ؟😐
شراح يصير ويه فؤاد ؟
وشراح تسوي عذراء ؟
وشنو موقف ميسون ؟
توقعاتكم وارائكم
لايك وتعليق فديتكم 😍😍😍