دراويش

دراويش ١٠

#دراويش
بقلم #روز_الفياض
ح١٠

- گلبَك المـآبي محنّه ، شينّفع ويآه العتب 🖤!

وانطلقت بينه السيارة كانت سيارة حمل بالخلف محمل بيها جت ( علف للحيوانات ) .
سألني الرجال اللي كان اسمه ابو علي :
منين انت عمي ؟
فجاوبته عادي كلي :
من ياعمام ؟
فؤاد :
منين تتوقع ؟
ابو علي :
لا مو مال اتوقع لاتخاف هاي معلومات نحتاجها خاف باجر عكبة اهلك او احد من كرابتك يجي يسأل عليك حتى نكللهم يابه ابنكم وصلناه لفلان مكان .

بقينه نسولف واني اباوع من الجامه عالخراب الصاير بالبصرة بسبب الحرب بيوت ومدارس وبنايات كلها مهدمة ..
عبرنه على جسر وشفت نسوان هواي كل وحده على راسها جدر جبير تارسه بي مي اتذكرت من جنت اروح اشوف آمنة ومحمود يجي يشوف تغريد بحجة المي ..
دمعت عيوني ومتجرأت امسحها ..
جنت احاول اشبع عيوني من كل منظر نمر عليه يمكن تكون هاي اخر مره اشوف هالاشياء ويمكن تكون اخر مره اشم هذا الهوا ويمكن تكون اخر مره احس بنفسي مو غريب ..
الله بس اليعلم بعد شكد اكدر ارجع واشوف اهلي وناسي ..
اذا كان مكتوبلي ارجع في يوم من الايام ..
مسافة طويلة لكن محسيت بيها اول مرة احس الطريق خلص بسرعة ..
وصلنه لشارع عام عريض سايدين ومن بعيد اكو دبابات امريكية ..
ابوعلي :
يالله عمي .. اتوكل ..
هذوولاااك الامريكان هناك ذيج السيارات روح عليهم يم السيارات وهمه بعد شوف شيكلولك ..

جريت نفس واحس نبض كلبي مسموع ماادري ليش الخوف اعتراني يمكن لان مجرد خطوات فقط هي اللي تفصلني عن الغربة واذا مشيتها راح تفصلني عن اهلي وناسي وبلدي ..
وراح اكون وحيد لحدما الله يشاء وابدي اتأقلم ..
سلمت على ابو علي واتشكرت منه وانطيته مبلغ بسيط ورحت ..

مشيت بخطوات مهزوزة ومترددة الى مكان تواجد السيارات اللي تحمل اوتقل اللاجئين ..
الجنود الامريكان واكفين مسلحين واكو امامي خط طويل من الناس يخضعون للتفتيش ثم يتم توزيعهم على السيارات وتسجيل اسمائهم .
صعدت باحدى السيارات بعدما اتفتشت خوفا من انه اكو حامل لسلاح وتم تسجيل بياناتي من اسم وعمر وغيرها ..
كعدت بمكاني وجنطتي بحضني وصفنت عالناس اللي جاي تصعد بالسيارات اللي شارد بحده واللي شارد هو وعائلته واللي شارد هو واصدقائه .
المكان اللي بصفي فارغ وره شوية صعد ولد كعد يمي شفته مثل حالتي كاعد وبعيوني حجي واسئلة .. الحيرة والخوف مبين على وجهه يباوع عالناس وهو ساكت حتى من كعد بصفي مسلم ..
الله اعلم شنو من هموم شايل .
اتذكرت امي انطتني سبحة ومصلاية مديت ايدي بالجنطة طلعت السبحة التهي بيها واذكر الله ..
بديت اسبح واستغفر على نية الفرج ..
احرك خرزات السبحة مرة يمين ومرة يسار الى ان تتعب ايدي واخذ السبحة بايدي الثانية وهكذا ..
حسيت بالتعب خصوصا انه نومي صار يومين مو بوضعه الطبيعي واحس مااخذت كفايتي من النوم وجسمي كله يأذيني من المشي صار عدة ليالي امشي مشي متواصل ..
ارهقني التعب والتفكير اخر شي كلت خليها على الله شيريد يصير اكثر خلص اني هسه تحت حماية القوات الامريكية ومااكدر اتراجع اذن من هاللحظة اني بغربة ولازم اتحمل ..
توكلنا على الله ..
خليت راسي عالشباك وغمضت عيوني وغفيت بدون ادنى تفكير محسيت الا من مرت السيارة عبر طسه بالشارع ..
فتحت عيوني اكتشفت انه اني تعبان لدرجة محسيت بالسيارة من اتحركت ومشت ومن شدة التعب رجعت غفيت بدون اي حركة ..
ماادري شكد بقيت نايم وشكد استغرق الطريق لكن اتذكر جنت اغفى وافز واشوف نفسي بعدني بالسيارة سبحان الله فعلا النوم سلطان لو ماخذيني للاعدام بذيج الساعة مراح اهتم على كد منعسان وهمي النوم فقط ..

تم نقلنه من الاراضي العراقية الى مخيمات في المملكة العربية السعودية ..
تم تقسيم اللاجئين الى قسمين قسم العوائل اللي تم توطينهم في مخيم رفحاء اللي يقع في صحراء الربع الخالي ويبعد تقريبا ( ٢٠ ) كيلو متر عن مدينة رفحاء والعزاب تم نقلهم الى مخيم الارطاوية واللي يقع ايضاً في صحراء الربع الخالي شمالي السعودية ويبعد عن الحدود العراقية مايقارب ال ( ٢٥٠ ) كيلومتر ..
اما مخيم رفحاء فكان يبعد عن مخيم الارطاوية مسيرة يوم .
...............

عندما اعود بذاكرتي الى تلك الفترة ينتابني شعور مزعج بالقهر والظلم والتعاسة ..
ايام اتمنى ان تمحى من ذاكرتي ..

.................

المخيم كان عبارة صحراء تحتوي على خيام لاتكاد تقي من حر الصيف التي تتجاوز درجة حرارتها في بعض الاحيان ( ٥٦ ) درجة .
تم تقسيمنه وتوزيعنه على الخيام الموجودة وموزعة في مساحة كبيرة في الصحراء والمسيجة بسياجين من الاسلاك الشائكة لمنع خروج او هرب اللاجئين .
الحياة جانت جدا صعبة في غاية الصعوبة صعوبة التأقلم مع الحر الموطبيعي وجو الصحراء الجاف القاسي واللي في بعض الاحيان يتحول الى رياح قاسية محمل بالغبار ..
بالاضافة الى صعوبة التأقلم مع العزلة اللي كان يعاني منها اللاجئين .
كنا معزولين عن العالم بصورة شبه تامة محرومين من ابسط مقومات الحياة بالاضافة الى بعض المضايقات اللي اتعرضلها البعض اللاجئين من جانب بعض القائمين والمسؤولين والعساكر السعوديين الي كانوا مشرفين على المخيم .
كثير من الاسباب والتراكمات والصدمات حدثت للاسف الشديد حتى وصل الامر لاطلاق النار الحي على اللاجئين في المخيم ووفاة عدد من اللاجئين خلال فترة وجودهم في المخيم .

خلال سنتين كنت بيها في مخيم الارطاوية اتعرفت على بعض الشباب من مختلف محافظات العراق ومن مختلف الفئات فالبعض كانوا طلاب جامعيين مثلي وبعضهم كانوا موظفين من مهندسين واساتذه واطباء وادباء وتجار وغيرهم وحتى ان نسبة كبيرة من اللاجئين كانوا ينتمون الى الفئة العسكرية واصحاب رتب عالية في الجيش العراقي لكنهم كانوا ممن ثار ضد السلطة وبعد قمع الانتفاضة لم يكن هنالك من خيار امامهم سوى طلب اللجوء .
اتذكر كان منهم جنود عاديين وضباط كبار برتبة لواء وآمر فوج وغيرهم .
باختصار كان مخيم رفحاء جمهورية مصغرة للعراق ..
من ضمن الناس الي اتعرفت عليهم كان ولد اسمه عقيل من اهالي محافظة المثنى .
عقيل كان معلم وحبيته اكثر من اتعرفت عليه حسيته يشبه ابوي بشخصيته مو بس لان معلم ولكن لان حنون بحزم .
عقيل كان خاطب بنت خالته من صارت الاحداث لكن اخوها كان منتمي لاحد الاحزاب لذلك تم اخذ عائلة خطيبة بالكامل وتم اعدامهم ومن ضمنهم خطيبته وتعليق جثثهم امام الماره في ساحة المنطقة اللي كانوا شباب المنطقة يلعبون بيها كرة ..
فؤاد :
لاحول ولاقوة الا بالله وانا لله وانا اليه راجعون .. البقاء لله.

بجى عقيل كال :
جنت احبها من جنت جاهل ومتانيها سنة وره سنة ربيتها على ايدي لحدما شبت وصارت مرة وكيفت من خطبتها واطونياها ... تالي راحت بليلة ظلمة ..
فؤاد :
الله يساعدك .. الله يساعدك ..
عقيل :
لميت هديماتي واجيت كلت لاهلي رايح بعد المن ضال انه هنا شسوي منين ماادور اشوفها كبالي واتذكر شلون رحت اركض حافي من كالوا الجوارين بيت خالتك علكوهم بساحة المنطقة معدومين ..
رحت اركض مااهتميت الكزاز الشكك رجلية وانه اركض بالشارع عبالي الكاها عدله ..
وصلت لكيتهم كلهم معدومين وحتى البيت هدموه بشفل ...
صرخت غلطت سبيت بس الناس ماخلوني سكتوني ورجعوني للبيت ..
فؤاد:
حسبنا الله ونعم الوكيل ... الله يصبرك ويعينك ..
عقيل :
شيعيني .. ماتكلي شيعيني .. وشيصبرني ... آآاخ نار بكلبي احس ماتطفى .
فؤاد :
ربك يبردها ... كل هاي الناس جاية هنا لان عدها قصص تشبه قصتك بفد شكل من الاشكال والماعنده قصة عنده قصة وطن راد يدافع عنه وانخذل وخسر كل شي ...
كل احنه بنفس المركب تره خلي عينك بعين الله على كولت امي ..
ربك يمهل ولايهمل ..
كل هالناس اللي راحت والي اتبهذلت واللي اتشردت الها حوبة وحوبتها يم الله جبيرة بس كول حسبي الله .
مثنى :
حسبي الله ونعم الوكيل .. حسبي الله ونعم الوكيل ..
قصة عقيل خلتني احمد الله واشكره انه محد اتعرض لعائلتي والله سخرلي اهل آمنة حتى يطلعون ابوي واخوي ..
صرنه اني وعقيل اصدقاء حيل جنت اشوف بي اصدقائي اللي مااعرف مصيرهم وجنت احجيله عنهم مرات ويكولي :
حقك تنقهر عليهم وتفكر بيهم هيج صحبان يستاهلون هذوله ناس طيبة وخيرة الله يجمعك بيهم ان شاءالله .

خلال وجودي بالمخيم واللي استمر مايقارب السنتين احنه الشباب حاولنه نقتل الملل بالقراءة ماكو كتاب موجود بالمخيم مقريته نستعير كتب من بعض ونقرا وبالليل نسمع الراديو او نستمع الى الكاسيتات اللي البعض جالبها وياه وكنا نحاول بيناتنه نصنع مناسبات ونحتفل بيها  نلقي شعر او نغني او ناكل من غير السوالف والذكريات ..
عانينه بالمخيم من حرارة الجو اللاهبه صيفاً وبرودته شتاءاً ظروف الحياة كانت جدا صعبة بالمخيم لدرجة انه تم اغلاق مخيمنه مخيم الارطاوية او مخيم العزاب ونقلنه الى مخيم رفحاء مع العوائل .
المفروض انه كانت الظروف في مخيم رفحاء افضل لكن استمر وضع الخيم رغم وجود عدد قليل من البيوت اللي جدرانها مبنية لكن سقوفها كانت من الصفيح .
كان المخيم مقسم الى مربعات حيث يتكون من ( ١٧ ) مربع ( ١١ ) مربع منها تتكون من ( ٨ ) خلايا وكل خلية تتكون من ( ٣٠ ) منزل من الخيم على اعتبار كل ( ٣ ) خيم هي منزل .
وماتبقى من ال ( ١٧ ) مربع هي ( ٦ ) مربعات تتكون من ( ٨ ) خلايا وكل خلية تتكون من ( ٢٨ ) بيت جدرانه من الطابوق وجدرانه من الصفيح او التنك او غيرها وكل بيت يتكون من ( ٣ ) غرف .
ومرت الايام بطيىة مملة كئيبة في المخيم العديد من حالات ومحاولات الانتحار حدثت بسبب سوء المعاملة اللي كان الاغلبية يعاني منها من القائمين على المخيم .
حالات عديدة من الاعتقالات والتعذيب بدون وجه حق للاجئين لمجرد مطالبة البعض ببعض الاحترام وعدم الاهانة او المطالبة ببعض الحرية لان الكثيرين ملوا من الحبس في المخيم بالاضافة تعرض البعض للضرب واطلاق النار الحي لاعتراضهم على السياسة المتبعة مع الافراد .
المسؤولين عن المخيم كانوا يلجأون للعنف في صد اي اعتراض او مطالب وكانوا يتعمدون الى قطع المي عن اللاجئين لفترات طويلة قد تصل الى اسبوع ..
بالاضافة الى محاولة البعض منهم الى اهانة الرجال والاعتداء على النساء ومداهمات للبيوت بين فترة واخرى وحملات تفتيش كانت نتنهي بالعبث بممتلكات اللاجئين وتدميرها وايضا سرقة المضوغات الذهبية اللي كانت تعود لبعض اللاجئات .
وكان ايضاً توجد مجموعة من اللاجئين المتمردين اللي يسوون مشاكل كل فترة
اسوء ايام ..
واتعس فترة ..
استمر الوضع هيج من سيء الى اسوء حيث تم تسليم بعض العوائل والافراد الى القوات العراقية عن طريق الحدود .
رغم الاعتراضات والمطالبات والتنديد والرفض استمرت القوة المسؤولة عن المخيم بأهانة اللاجئين ومحاولة استفزازهم .
كان الجامع هو ملتقى للجميع لتداول الاخبار عن العراق وعن وضع المخيم .
كانا نكدر نسمع كلام المسؤولين عن المخيم عن استخدامهم اللاسلكي للتخاطب فيما بينهم على تردد ال ( fm ) نكدر نلتقط اشارتهم ونسمع الي يكولوه .
شفنا العجب العجاب في مخيم رفحاء وكنا ننتظر ليل نهار تقديم اسمائنه للامم المتحدة حتى يتم توزيعنه بين الدول ونبدي حياتنه .
كانوا يوزعون علينه ملابس جديدة واكل فاخر وفرش جديد لمن يكون احد من مكتب الامم المتحدة مبلغهم بنية زيارته للمخيم حتى يصدكون انه احنه عايشين بنعيم وفعلا كانوا يصدكون .
بدت الناس تحاول تأقلم نفسها لان منعرف لشركت باقين محجوزين هنا فبدأ البعض يزرع مثلا حديقة صغيرة قرب بيته حتى يستفاد منها وبدت الناس تسوي مشاريع بسيطة اللي يفتح دكان واللي يبيع خضرة واللي يبيع ملابس واشياء بسيطة بالاتفاق مع بعض القائمين على المخيم .
سنتين عبالك مو سنتين عبالك عمرين .
الصبح احاول امارس حياة طبيعية وبالليل كان ملاذي من الذكريات صلاة الليل والكتب .
ساعات نكعد اني وعقيل نتذكر ونتحسر على شبابنه ومرات نكعد نتساءل عن احوال اهلنه من بعدنه لكن كل مرة ينتهي حديثنه بذكرى خطيبتة المتوفية او ذكرى حبيبتي المستسلمة وغالبا ماتنهي حديثنا الدموع ونأوي الى فراشنه نشعر بالالم والحسرة والضياع .
سجادة الصلاة من امي كانت ومازالت رفيقة دربي كانت تمثل امي بالنسبة الي .
مرت ليالي احضنها وانام واتخيل بيها ريحة امي .
اتمنيت هواي يرجع الزمن بيه وارجع طفل حتى ارتمي باحضانها واحس بالامان والاطمئنان ..
عقيل :
اكلك فؤاد ؟
درت عليه كتله :
كول .
عقيل :
ابو سرور تعرفه اللي اخذت منه كتاب ( ...... ) ؟
فؤاد :
امم .. اعرفه شبي ؟
عقيل :
عنده بنية حلوة صحيح زغيرة بس يعني مصيرها اول وتالي تتزوج .
فؤاد :
اييي ؟؟؟
عقيل :
شرايك تخطبها ؟
باوعتله كتله :
المن ؟!!!
عقيل:
لابوي .... الك بعد المن .

ضحكت .. كتله :
تحجي صدك؟
عقيل :
اي ورح خالي شبيك اول وتالي تتزوج انت قابل تبقى هيج .
فؤاد :
ههههههه خو كول لنفسك هالكلام انت اخطبها واتزوج ليش اني ؟
عقيل :
اني ويني ووين الزواج ... ولك هو اني شوكت نسيت حتى اخطب واتزوج ..
فؤاد :
يعني اني النسيت ؟؟
عقيل :
انت وضعك غير ... انت البنية مو كد حجيها وموقفها وموقعها البنية استسلمت وخانت العهد .
فؤاد :
استسلمت اي لكن خانت لا ... لان اني جنت اكوللها عيشي وانسيني .. رغم مرات احسها خيانة لكن ارجع اكول الحقيقة توجع وهاذي هي الحقيقة انه هذا الصح .. تصرفها صح .. فكرت بنفسها ونقذت نفسها وعاشت ونست ..
عقيل :
جا شمالك ياحظي ماتنسى انت هم ؟
فؤاد :
اتمنى انسى ... اتمنى ..
عقيل:
هسه شكلت ؟
فؤاد :
بشنو ؟
عقيل :
ولك على البنية بت ابو سرور .

رجعت ضحكت حيل وكتله :
اتغطى ونام الظاهر هالايام تنام مكشف متتغطى زين هههههه لك هو احنه وين والزواج وين احنه مساجين  خالينه هنا تحت الاقامة الجبرية ووينه وين الزواج مو كاعدين بخيم ههههههههه والله عندك سوالف .

فر ايده وطبك المخده جوه راسه ونام معجبه الكلام ..
عقيل شخص بسيط بتفكيره ومشاعره اللي يحس بي يعبر عنه واللي يفكر بي يكوله ماعنده تكلف انسان تلقائي عفوي .

بقينه اني وعقيل شبه منعزلين عن الاخرين حتى نحاول قدر الامكان نتجنب المشاكل رغم انه اي مشكلة تصير داخل المخيم عواقبها تشمل الكل .
لو اريد احجي عن اللي شفته خلال سنتين بقائي في المخيم يمكن راح  احتاج سنوات .
اتذكر لمن كنا في مخيم الارطاوية كان عددنه ( ١٧ ) الف شخص محبوسين في داخلة محاطين بصفين من الاسلاك الشائكة بارتفاع ( ٤ ) متر ..
مخيم ممعروف ومحد يكدر يوصله وكلمن يحاول الهرب منه يموت بالصحراء .
وفي يوم زار مخيم الارطاوية وفد من المعارضة ومن ضمنهم كان شيخ معروف بالوقت الحالي وكان ضمن الوفد واحد يقيم في لندن واخوه في الارطاوية سواله قصة وراد يطلعة ..
فكان اكو جندي من منطقة الاحساء اتعاون معانه واحضرلنه كاميرا ودخلها عن طريق تنكر المي بالتعاون مع سائق التنكر الهندي وقمنه بتصوير المخيم والاوضاع بالمخيم وحالة اللاجئين والتعذيب والالم اليومي اللي نعيشه بسبب تعاسة الظروف حتى نرسلها لمفوضية شؤون اللاجئين ويشوفولنه حل ونخلص لكن كانت المشكلة في كيفية ارسال هذا الفيديو او اخراج الفيديو من المخيم .
اخر شي فكرنه انه نفتح عليه الفلم او الشريط ونلف الفلم على عجلة الحقيبة بعدما حفروا العجلة .
وفعلاً هذا ماحصل والحمدلله نجحت الخطة ووصل الفلم الى قناة البي بي سي وتم عرضه رغم انه كان بي ضرر لكن المهم انه بثوه وعرف العالم انه اكو الالاف الناس تموت بالصحراء .
بشر ممحسوبين  عالبشر في طريقة معيشتهم او التعامل معاهم .
حدثت داخل المخيم ( ١٨ ) حالة انتحار .
حر الشمس يشوي شوي من غير البرد الموطبيعي بالشتا يكص الضلوع كص ..
وبسبب الازدحام كان البعض يجبر على النوم وقوفاً بالخيم .
وكانا موزعين كل ( ٥٠٠ ) شخص النه (٥ ) حمامات .
بعد الضجة الاعلامية الي حصلت اجه وفد من الامم المتحدة وشافوا الوضع على حقيقته وانصدموا بالواقع المزري .
على اثرها قرروا رفع الخيام ونقلنا فوراً وبنفس الليلة الى مخيم رفحاء .
بدت الوفود تجي وتزور المخيم لاخذ نزلاء رفحاء الى بلدان اللجوء وكلمن وحظه ..
بدا السفر الى دول اللجوء من سنة ( ١٩٩٣ ) واستمر حتى سنة ( ١٩٩٩ ) .
والحمدلله اني ومثنى كنا في الوجبات الاولى اللي انفتحلها باب اللجوء الى امريكا بالاضافة الى اخرين .
العدد الاجمالي للاجئين بالمخيم كان اكثر من ( ٣٠ ) الف لاجىء مايقارب ال ( ١٠ ) منهم ذهبوا الى امريكا .

......................

هنا افقت من اعاصير الذكريات اللي تحملني كل مرة من واقعي ووضعي الحالي وتنقلني الى عالم مرات كثيرة فكرت انه ممكن يكون موجود فقط في خيالي ..
قسوة وشدة هاي الذكريات وكمية المرار الي بيها يخليني اشك بنفسي عشت كل هالتجارب وحدي ..
معقولة اتخيل ؟؟
اتنفست الصعداء واني اشوف الطائرة تحط على ارض الكويت بأمان وحسيت بنبضات كلبي تتسارع كأني طفل كان ضايع من اهله وهسه لكاهم ..
مااشد الانتظار وماااقساه ..
كل سنوات البعد والانتظار بكفة وهالساعات الباقية اللي تفصلني عن رجوعي لاهلي وناسي بكفة ثانية تماما ً..
اتمنيت عندي جناح واطير ..
شيصبرني لباجر حتى اروح ..
اروح هسه ؟؟ ياترى اكدر ؟ اخاف افاجئهم بجيتي ؟
اخاف من الصدمة ابوي ميتحمل خبر رجوعي بعد كل هالسنوات ؟
اخاف اني مااتحمل ..
والحل شسوي ..
نزلت من الطائرة ومااعرف ليش خنكتني العبرة او يمكن لاحساسي بقرب المسافة من العراق حسيت بكل انواع المشاعر ..
بعدما استلمت الحقائب انتظرت استاذ محمد وعائلته حتى اسلم عليهم ..
سلمت عليهم وتبادلنه الارقام ووعدته بالزيارة ان شاءالله .
استاذ محمد :
اعتبر دا وعد ؟
فؤاد :
هههه ان شاءالله .
استاذ محمد :
بس المرآدي عاوز اشوف المدام .
فؤاد :
اي مدام اني ممتزوج ؟
استاذ محمد :
اه طبعاً مانه عارف انك مش متكوز ههههه بس أصدي المره الگيه لما اشوفك لازم تكون متكوز وتگيب المدام معاك للكويت عشان نأوم بالواگب معاكو .

ابتسمت وكتله :
الله كريم .. الله كريم ..
اذا الله شاء .
استاذ محمد :
يارب .. بس انت أول يارب .

ضحكت على كيف وكتله بأسى واني اتذكر آمنة واحس الكلمة طلعت مو من كلبي مجرد فقط كلمة لسان حتى ارضيه :
يارب .
عانقني وعانقته وسلمنه على بعض ورحت بطريقي ..
اتوجهت لفندق سبق وحجزت بي قبل مااجي على امل انه ارتاح من عناء السفر قبل مااتوجه للعراق لكن اتفاجأت بنفسي ماارتاحيت مااكدر ارتاح واني بهالقرب هذا وكاعد منتظر ..
حاولت قدر الامكان انام لكن جافاني النوم ..
طلعت ونزلت من الفندق ورحت اتمشيت شوية واشتريت بعض الحاجيات لخواتي ولزوجة فراس وفراس ولابوي ..
مااعرف شنو محتاجين وشنو بنفسهم اتمنى السنوات الفاتت مااكون قصرت تجاهم مادياً عالاقل .
كنت ادزلهم الي اكدر عليه حتى ميحتاجون ..
قصرت على نفسي حتى مااحرمهم من شي .
اشتغلت ليل ونهار بالاضافة الى دراستي في سبيل مينقص عليهم شي ..
رغم هذا كان احساس بالذنب ياكل روحي دائما احس بالقصور تجاهم ..
اتمنى مااكون قصرت ..
اتمنى .
رجعت للفندق تمددت واتذكرت امي ..
بجيت ..
صرت قريب عليج يمه .. تدرين بيه ؟
تحسين بيه ؟
ياريتني متت قبل ماارجع واشوف البيت خالي منج ومن ريحتج ..
ياريتني متت ولارحت وعفتج مدفنتج بيدي يمه ..
سامحيني ..
سامحيني يمه ..

اخذني النوم بمكاني وموعيت الا على صوت الباب يقرع فتحته شفت عقيل اللي سافر قبلي ب ( ٣ ) ايام وبقى ينتظرني بالكويت هو وعائلته ..
حضنته وسلمت عليه وكعدنه نسولف عن الرحلة الطويلة المزعجة من امريكا للعراق رغم هو كان اذكى مني وحجز ترانزيت بدل الطيران المباشر ..

فؤاد :
شلون مطاوعك كلبك لهسه كاعد هنا ومتروح للعراق ؟
عقيل :
تصدك اذا اكلك خايف .
فؤاد :
من شنو ؟
عقيل :
ماادري احس هذا مو عالمي بعد اني عشت هناك واسست حياة اخاف هنا يأثرون علي ويخلوني اعوف كل شي وارجع ..
فؤاد :
العراقيين يتمنون يعوفون كل شي ويرجعون واني واحد منهم
عقيل :
فؤاد اقلها انت ماعندك عائلة انت بطرك روحك شتريد تسوي حر بس انه هالمرة المرمرة ماتقبل والله شنو اهلها كلهم هناك .
فؤاد :
ههههه لا بس حقها فعلا مو سهلة .. هسه لتفكر بشي خل نشوف وضعنه بالاول وشراح تصفى الامور وشنو موقعنه من الاعراب ونصفي امورنه وحساباتنه وبعدين نقرر .. لتشيل هم من هسه .. روح شوف اهلك واشبع منهم وخلي الباقي بوقته ..
خلي الباقي على الله .
عقيل :
ونعم بالله .
كلامك ريحني .. صح لازم ماافكر اكثر من اللازم ولازم انتظر واشوف الوضع شنو وبعدين الله كريم .
يالله كوم خل نروح ناكل انه جوعاان ومشتهي سمج شوي هنا وين نلكه سمج شوي يسوون بالفندق لو لا ؟
فؤاد :
السمج بس سمج اهلنه ماكو مثله .. خل اغسل وابدل وننزل اني هم حيل جعت رغم نعست بس همزين اجيت .

غسلت وبدلت ونزلنه اكلنه وكعدنه رتبنه خططنه رغم انه عدنه اجازة مفتوحة لحد منقرر شراح نسوي من نوصل ونرتاح ونشوف اهلنه ونشبع منهم .
اول مصعدت للغرفة طلعت المصلاية فرشتها ورحت اتوضيت رجعت كعدت عليها ودعيت ربي يطول بعمري حتى لو بس لباجر لحدما اشوف اهلي وازور قبرامي وبعدين يموتني ماعندي كل اعتراض بعد ..
صليت واتمنيت من الله يوفقني ويبرد نار كلبي اللي اشتعلت من يوم عرفت اللي مسويه كريم .
ياترى شنو اللي صار بعد ؟
وشصار وياج ياآمنة ؟؟
شمسوي بيج الوكت ياترى... شوكت اوصل واعرف الي صار بالضبط وارتاح ..
بس ياترى راح ارتاح لو اشتعل اكثر ؟؟؟
اوف ربي بعد كل هالعمر رجع باب المعاناة انفتح وكشف هواي شغلات الناس متعرفها ..
سبحان الله يمهل ولايهمل ..
.
.
.
.

اعذرني وداعتك مابيه شي يسوه
شتسوي بشر ينشاف بالكوه
شتسوي بشر من حجوا عنه وغاب
محد ظل ورا بالليل يتجوه...
مرات اليحب من ينلجم يرتاح
جا هي الجروح الفاهيه شتسوه
جا هي العيون ال ما تفز بالليل
وتبجي ع النسوهه عيون مو حلوه
وانا مشتاقلك..مشتاقلك
بس لازم اتناساك..
عرفتلهه وبعد م روحلك فدوه..

.
.
.
#صباح الخير شلونكم شخباركم الواتباد خبلني همزين نشر وخلصني المهم شرايكم بالبارت اعتذر اذا اكو اخطاء لان ماصارلي مجال اراجع البارت .
اللي شافة فواد برفحا مو قليل الله يساعده
المهم طلع وخلص
توقعاتكم ؟
ارائكم ؟
شراح يسوي من رجع للعراق ؟؟
😘😘😘 لايك وتعليق فضلا وليس امراً