اندروفين

٢٨ الجزء الثاني

‏لا ارُيدك انْ تكون حلماً يعبث بيّ ثم يتركني مبعثر اريدك ان تكون ليّ ، معي ، بيّ ، لإجلي ، للابدَ !💜

جاسم شاف القسيمهه...كانت بأسم ابوهو رشاد وجارتهم نورا…بقي يتذكر في كلام ريم!بتذكر لمن شاف ابوهو امبارح في وقت متأخر من الليل بتكلم وبضحك في التتلفون!....

ابوي معقولهه يعمل كدا!!طيب ياخ ليه م كلمنا!ليهه يعمل كدا ويدس مننا حاجهه زي دي!لا وكمان مع المرهه البتعتبرها امي زي اختها…عادي بكونو قاعدين قدامنا في البيت وبينهم في علاقهه ونحنا م منتبهين!!ليه كدا ياخ ليهه!…ريم…انا اذيت ريم بكلامي شديد…كنت قاسي معاها اسي ح تكون شاعرهه بشنو…لا وكمان قلتا ليها بتاعت الشقهه!انا متأكد ح تكون كرهتني بعد الجملهه دي!…انا قسيت عليها وكسرتا خاطرها بكلامي شديد…هي م بتحب تظهر ضعفها ودموعها قدام زول انا عارف...غالبا دموعها بنزلو وهي بتغسل وشها وبتكون قاصدهه عشان ماف زول يشوفها…ي رب انا اسي اعمل شنو!!خجلان اقيف قدامها…
…………………………………
مرت الايام وجاسم كل مرهه بحاول فيها يعتذر من ريم…وعلي قسوتو وفظاظتو معاها لكن م بقدر!خجلان شديد...وفي نفس الوقت كان متوقع انو ابوهو يعترف قدامهم بالحقيقه!وفضل مستنيهو بس بدون فائده!كان براقب ابوهو هو ونورا ومنتبهه علي تصرفاتهم شديد……

صحي الصباح بدري…لابس بنطلون كبدي غامق وقميص ابيض…نزل المطبخ عمل كبايهه قهوهه وقاعد في السفرهه ال في المطبخ…بفكر كيف يصالح ريم ويرجع علاقتو معاها زي الاول!…بعد مرور الايام دي كلها ح تسامحني ي رب!صحى بدري مخصوص لانو دي المواعيد البتتطلع فيها للجامعهه…خلص قهوتو…طلع من البيت…ركب العربيهه واتحرك…وصل قريب لبيت ريم …وقف في نفس الفسحهه الاتلاقو فيها آخر مره…وبقي منتظرها تجي…بعد نص ساعهه ريم جات…كانت لابسهه عبايهه رماديهه وشايلهه شيت في يدها وماشهه براحهه وزي السرحانهه كدا!…بقي يعاين ليها بالمرايهه…جات مارهه جمبو وهي م منتبهه انو جاسم قريب منها!....

جاسم: بس...ي مزه
ريم بعد سمعت صوتو عرفت انو دا جاسم💜...ومسكتها لهفه غريبهه ليهو وقلبها بدق سريع ...نفسها تعاتبو!بس كل م تتذكر كلامو ولهجتو ومعاها بتتغير…اتلفت عليهو…عاينت ليهو…وكملت طريقها...هو نزل من العربيهه…وبقي ماشي معاها…
جاسم:م نفسك اوصلك الجامعهه زي زمان!…طيب اشتغلتي كيف في الامتحانات…انتي م عارفهه انا قضيت الفترهه الفاتت بدون قوه راسك وتفاهتك كيف!!ريم!انا بتكلم معاك!
جاسم كان بتكلم وبسأل فيها...بس هي م كانت بترد عليهو!...بسرعهه جا وقف قصادها...
جاسم: انا بتكلم معاك خلاص كفايهه...ردي علي
ريم: انا بنفذ في الكلام القلتو لي...تاني م اشوف وشك!متذكرها الجملهه دي!وانا بعمل في الحاجه الطلبتها منها
جاسم(بتعب): ريم...انا آسف كنت غلطان...
ريم(بابتسامه): انا م زعلانهه منك…ولا بكرهك…بس كلامك كان حار ي جاسم ياخ!
جاسم(بصوت واطي): عارف...عشان كدا عايز اعتذر ليك…كنت بحاول كتير اجي واقيف قدامك واعتذر ليك بس م كنت قادر...كنت خجلان من الكلام القلتو...واتهمتك اتهام كعب وعارف طول عمرك ما ح تنسيهو بسببي...بس دا ابوي ي ريم في النهايهه! وانا اكيد ما كنت ح اقبل الكلام القتليهو...جربي ختي نفسك محليي!وانا عرفت الحقيقه...ابوي طلع متزوج نورا بالسر
ريم(بصوت مخنوق): انت هل تفتكر انو انا ممكن أذيكم انت وسلمي بالطريقهه دي!بقدر اقيف قدام وشكم واقول ليكم اي حاجهه...او امشي وانشر الكلام بين الناس!جاسم انت م كنت واعي لنفسك وانت بتتكلم معاي…بتتكلم معاي زي كأنك م بتعرفني…بتتكلم وكأني وحده غريبهه وكعبهه عايزهه تأذيكم!والدليل انك بتقول لي انتي قايله ابوي زيك ي بتاعت الشقهه!

جاسم واقف بعاين لريم وما قال ليها اي كلمهه...كان شاعر بالذنب...وهي بتتكلم معاهو بصوت مخنوق....
ريم: كنت قاصد شنو بالجملهه دي انت!ليه تقول كدا!
جاسم(بصوت واطي): انا شفت رسالهه في تلفونك…بالصدفهه...لمن جيتيني في المكتب...جات رسالهه في تلفونك مكتوب عليها ح تجيني في الشقهه ولا لا!انا استغربت منها وانصدمت شديد...
ريم(قاطعتو): رساله!رساله شنو!!
جاسم: الرقم كان غريب
ريم: ههه الرقم كان غريب!يمكن الرسلها دا قاصد وحده تانيه بس اترسلت لي انا بالغلط! بس طوالي جريت ولصقت الغلط فيني انا!جاسم دا شنو !معقوله انت بتفكر فيني كدا!! تحب اوريك تلفوني وتفتشو براك!ولا ح تقول لي م محتاج لاني بثق فيك!دي ثقتك!
جاسم: ريم خلاص كفايهه...خلينا نرجع زي اول...وانا آسف
ريم: زي اول!جاسم انت م ملاحظ نفسك متغير كيف من جيت من دبي!انا قلتا ليك الكلام دا كتير....انا تعبت من عصبيتك فيني في ابسط حاجهه...تعبت من فهمك الغلط لي...م كنت بزعل لمن تكورك وتعصب فيني علي قدر زعلي اسي لاني حاسه بيك متغير...صدقني لو كان زول تاني قال لي جملتك دي م كنت ح ازعل ولا ح اعبرو...بس انت!زعلت عشان انت اكتر واحد بتعرفني بس ما قادر تفهمني!...جاسم زح لي انا إتاخرتا وعندي امتحان بعد اذنك
..............................
ريم اتخطت جاسم...مشت ركبت المواصلات واتحركت علي جامعتهاا...م كانت حابهه تتكلم معاهو كدا...بالعكس!نفسها تعاتبو وتبكي وتقول ليهو انت ليهه قلتا كدا فيني!هي ضعيفهه قدامو وكان ممكن تسامحو طوالي♡بس م قدرت تعملها لانو آذاها بكلامو...بالرغم من كدا كانت حابه يرجع الزمن لورا وتقبل اعتذارو....اما جاسم مشي ركب عربيتو...كان مضايق!وزهجان...م عارف هو مالو!واجعو كلام ريم شديد...رجع بيتهم...بقي واقف مسافهه وقاعد جوهه في العربيهه...نزل من العربيهه...مشي لبيت نورا...دق الباب وفتحت ليهو هي.....
نورا: اوووو...ي هلا والله.. جاسم...دي شنو المفأجاه الجميلهه دي الليله!
جاسم:ههه انتي شفتي حاجه

نورا استغربت من رد جاسم ليها!وبقت تعاين ليهو بنظرات إستغراب كدا!!جاسم دخل جوهه الصالون طوالي وقعد في الكرسي وبعاين ليها بنظرات باردهه!.....
نورا:كيفك!
جاسم: تمام
نورا: جاسم انا بعمل لي في قهوه تشرب معاي!
جاسم:لا شكرآ...اصلا م قاعد هنا كتير انا...داير اسألك سؤال!
نورا: اتفضل
جاسم: انتي امي عملت ليك شنو حاجهه كعبهه!
نورا(بعد سكوت طويل): م فهمت عليك!
جاسم: خالتو نورا...انا م بعرف اللف والدوران ودغري شديد...بالجد كدا ما خجلتي وانتي بتجينا كل يوم في بيتنا ونحنا م عارفين انو في علاقهه بينك وبين ابوي!يعني بتجينا عشان تشوفي ابوي ال هو راجلك
نورا(بتوتر): دا شنو الكلام البتقول فيهو دا!!
جاسم: هههه اهدي ...التوتر لزومو شنو اسي! اتصلي علي ابوي خليهو يجي ...في النهايهه هو راجلك برضو
نورا(بصوت عالي): واتصل عليهو انا ليهه!انت ولدو اتصل عليهو انت
جاسم(بعد سكوت طويل): اوك...راحتك
نورا(بصوت عالي): جاسم انت م طبيعي ولا شنو!اتفضل اطلع بره بيتي وابعد انت وافكارك الغريبه دي..وابوك لو سمعك بتقول كدا ما ح يخليك

جاسم ضحك ضحكهه خفيفهه...شال تلفونو ولسهه كان قاعد واتصل علي ابوهو وكلمو انو يجي في بيت نورا....رشاد استغرب شديد من طلب جاسم..كان في الاول متردد انو يمشي ...بس جاهو قلق!...طلع من الشركهه...ركب عربيتو واتحرك علي بيت نورا...جاسم قاعد بمنتهي البرود وخالف رجلينو وبعاين لنورا ال كانت متوتره وظاهر فيها ...ابوهو بعد ساعهه جا....بقي قاعد في عربيتو مسافهه ومستغرب في تصرف جاسم!

جاسم: م كان نفسي اقعد كتير هنا...بس لازم احسم الموضوع دا
نورا: موضوع شنو ي ولد انت مجنون!

جرس البيت رن...كان دا رشاد...نورا مشت تفتح الباب...فتحتو...رشاد بقي بعاين ليها انو في شنو مالو جاسم!وهي متوتره...رشاد دخل علي الصالون ونورا وراهو...لقي جاسم خالف رجولو وببتسم ليهو....
جاسم(بابتسامه): اهلين ي ابوي
رشاد(بنبره حاده): الجابك هنا شنو!وعامل كدا ليهه!!
جاسم: جيت اقعد مع مره ابوي...عيب!
رشاد(بصوت عالي): جاسم
جاسم: براحه براحه...ليه العصبيهه دي يعني!!انت عملتا شي غلط لا سمح الله يعني!
رشاد: جاسم قوم علي حيلك خلينا نتناقش في البيت
جاسم: لا...عشان احسم الموضوع دا هنا انا الليلهه...شوف ي ابوي انا م جاي الومك ولا اخونك في النهايهه انت م عملتا شي غلط...
رشاد(قاطعو): جاسم اسكت..واطلع قدامي..واوعك تتكلم معاي بالطريقهه دي تاني انت ناسي نفسك بتتكلم مع منو ي ولد!

رشاد كان هايج شديد في جاسم...شايف انو ولدو زي البزل فيهو وهو م متقبل الفكرهه دي وكانت رده فعلو عنيفهه!....
جاسم: انا ما ح اطلع من هنا زي م قلتا ليك قبل م اخلص من الموضوع دا ...لانو انا بسببك ي ابوي غلطتا اكبر غلط في حياتي وما عارف اصلحو حاليآ كيف!
رشاد(بصوت عالي): انا م عندي شغلهه باغلاطك فاهم!…وللمره الالف م تتكلم معاي كدا
جاسم(ببرود):وين العيب في انك تتزوج تاني وتالت ورابع!في النهايهه ربنا حلل ليك الحاجهه دي...انا م بلومك ولا جاي اعمل دراما هنا! ولا في مبرر لانفعالك دا اسي غير انك م كلمتا امي بالحاجهه دي واستغبيتنا كلنا...لا وكمان نورا...اقصد خالتو نورا...انت كنت جادي معاك قبيل في سؤالي...امي عملت ليك حاجهه كعبهه!...بتجي في بيتنا عادي وعندك علاقهه مع ابوي ونحنا م عارفين!المانع شنو انك كان تكلميها!ههه م كانت ح تقتلك يعني!علي الاقل كان تعملي حساب للعشرهه البينكم

رشاد ونورا ساكتين...م قالو حاجهه لجاسم...نورا واقفهه ورا رشاد ومنزلهه راسها...ورشاد واقف بعاين لجاسم بنظرات حادهه مدا وما فتح خشمو معاهو!....جاسم قام من الكرسي ووقف قصادهم....
جاسم: ابوي...لو عندك ذرهه احترام لامي..امشي وريها انك اتزوجت نورا...م عيب بالمناسبهه!في النهايهه حلال عليك...العيب انك تدس من امي وتستغبيها!دا عيب شديد للاسف...ي ريت توريها الليلهه كمان…واذا م بتقدر انا ح اكلمها
رشاد(بنبره حاده): نظام بتهدد فيني!
جاسم(ضحكهه خفيفه): ابدا…بس عشان اذا انت م بتعرف حقوقك اتجاه امي اكلمها انا وما نكون استغبينها الاتنين…يلا سلام....

جاسم طلع من بيت نورا...وخلاهم الاتنين قاعدين...مشي بيتهم...دخل غرفتو وكان مضايق شديد...بقي تفكيرو كلو كيف يصالح ريم

ريم وصلت الجامعهه...دخلت قاعهه الامتحانات ...كان آخر امتحان ليها...امتحنت...م كان عندها نفس تقعد ولا تعمل اي شي...اعتذرت من صحباتها...وطلعتت...كان سامي مستنيها برهه♡ويطمن كيف امتحنت!...واقف متكل في عربيتو لابس قميص لاكوست باللون الاسود والبيجي وبنطلون اسود♡كان انيق شديد♡…ريم طلعت من الجامعهه ..ومشت علي ناحيهه المواصلات ...سامي شافهاا..بقي ينده ليها باسمها...بس هي م سامعاهو...وهو استغرب!...ركبت المواصلات وح تتحرك خلاص...هو قطع الزلط وجا لحقها...ركب جمبها...هي قاعدهه علي جهه الشباك...اتلفت عاينت ليهو واستغربت!....
ريم: سامي!!...ي ولد ..الجابك هنا شنو!
سامي: انتي
ريم: انت مجنون ي ولد وعربيتك!
سامي: برجع ليها ...م إشكال يعني
ريم(بتضحك): وحات الله م طبيعي انت!!...يعني واحد عندو عربيهه مع جونا الزفت دا البخليهو يركب مواصلات شنو!
سامي(ضحكه خفيفه): فعلا انا م طبيعي ....انتي مالك!
ريم: مالي!!ي ولد انزل انت مجنون ...الحق عربيتك
سامي: ياخ م شغلتك...هاا م جاوبتيني! مالك!واوعك تكذبي وتقولي م عندك شي
ريم: مضايقه شويه بس يعني عادي ماف شي خطير
سامي(بعد سكوت طويل): جاسم!
ريم(بابتسامه): مشاكلنا الفترهه دي كترت صح!
سامي: جدآ...انا م عارف منو هو الغلطان..وما ح اسألك من المشكلهه واضغط عليك...بس لو كان هو غلطان م تلوميهو ي ريم...لانو لمن يكون زهجان ومعصب بقول اي حاجهه...وما بكون قاصد يآذيك بالكلام
ريم: طيب لو انا كمان عندي حصه في المشكلهه دي!
سامي: م حنك...حتي لو الاتنين غلطانين..عاتبو بعض..عادي..بس م تسمحو لمشاكلكم دي تأثر عليكم

ريم سكتت مسافهه...بتفكر في كلام سامي...انو في النهايهه هي كمان غلطتت لمن اتكلمت عن ابوهو كدا...وفي النهايهه هو ابوهو..وما بكون قاصد القسوهه الاتكلم بيها دي معاها...وموضوع الرسالهه دا سوء تفاهم..بس بتسأل انو هي م لقت رسالهه زي دي في تلفونها!شافهاا وين جاسم!...طلعت تلفونها من شنطتها وبقت تفتش في الرسايل..بس م لقت الرسالهه!...سامي بعاين ليها وهي ماسكهه تلفونها♡...طلع كيس تسالي ووجدعو ليها....
سامي: ي بت...ارمي الحياه دي ومشاكلها ورا ضهرك...اصلا م بتستاهل
ريم: اممم بالله...البسمعك اسي ي المصلح الاجتماعي انت م بقول انو دا سامي وهو مضايق ومكتئب
سامي(بضحك): انتي دايرهه تشغليها لي ولا شنو!توعديني انك ح تفكري في كلامي دا!
ريم(بابتسامه): طيب
سامي: شاطره...اها الليله آخر امتحان كيف!
ريم: الحمد لله

سامي بقي يتكلم مع ريم كتير وهي ساكتهه بتعاين ليهو...
ريم: سامي...انت ليه بتعمل كدا!...يعني لمن اكون مضايقهه انت بتجي كدا فجأه!وبطلعني من ضيقي دا
سامي: م تقولي زي كأنك دواء وخلصيني😂
ريم: انت جاده...ليه بتعمل كدا!وكمان اسي جيت وركبت معاي بس عشان تعرف المضايقني شنو!
سامي: اااه...اولآ عشان عارف انتي إنسانه مهمشه وماف زول شغال بيك شغلهه ي ام جضوم...وتآنيا لانو انا م بحب اشوف زول مضايق وانا م قادر اعمل شي
ريم: مهمشه!انزل سرعهه يلا م ناقصهه حركات ناس طوال انا😂
...............................
سامي نزل من الهايس...وآشر لي ريم بيدينو وودعها...وهي كانت مبسوطهه💜..(شعور سمح لمن تلقي زول بحاول يعمل اي شي عشانك انت...انت وبس💜..علي قدر م بتحس انو التصرفات دي غريبهه آحيانا! ♡مرهه في واحد قال انو لهفهه البدايات م حب!وال م غاص معاك في بحر مشاكلك وهمومك وشافك وانت مطفي م حباك♡وبالجد حب وكون مع الزول البشوف ضيقك وهمومك ومشاكلك اكبر هم بالنسبهه ليهو💜)

في جهه تانيهه......
جاسم قاعد في غرفتو...راقد في السرير وخاتي يدينو تحت راسو...رشاد كان قاعد تحت هو وسلمي وعفاف ومعاهم نورا...اعترف ليهم بأي شي...وعلاقتو مع نورا...سلمي كانت مصدومه في ابوها...بس عفاف م ادتهم اي ردهه فعل!كانت طبيعيه جدآ....سلمي بعد كلام ابوها ظلعت غرفتها...وبتتذكر في طريقهه كلامها مع ريم...وانو ريم كيف كانت بتحاول تهديها وتشرح ليها بس هي م سمعتها!...قررت انها تصالحها...شالت تلفونها ورسلت رسالهه في القروب العملتو انو عازماهم الليلهه عزومهه بسيطه في مطعم قريب ليهم♡كانت خايفهه انو ريم م تقبل...وم قادرهه تتكلم معاها ويحسو الاتنين بالاحراج!طلبت من رغده تلح علي ريم وتحنسها عشان تجي.....

رغده: ياخ ي ريم...عليك الله خلينا نمشي...ماشايفهه سلمي بتحنس فينا كيف!وكلمتنا بالاسم واحد واحد
ريم: رغده...انا م قادرهه...تعبانهه ياخ..م صدقت الامتحانات انتهت وارتحت منها
رغده: م عشان الليله كان آخر يوم لازم تمشي يلا ياخ...علي الاقل عشاني...يلا ي مزه...عشان اوريك البيب بتاعي ...م نفسك تشوفيهو!
ريم: لالا كان كدا خلاص
رغده: بت كلبوبه خلاص😂
ريم:هههه صحي الشغل معاك كيف!
رغده: تمامات...قربت انتهي من فترهه التدريب...يلا ي زفتهه ياه ح نتأخر
............................
ريم ورغدهه جهزو نفسهم ...وطلعو بعد استأذنو من اهلهم...ركبو امجاد ووصلو المطعم...كان الجو حلو والشمس نزلت... شويهه ونسمهه برد كدا...دخلو المطعم...ديكورو بديك احساس انك في خيمهه..مكيفهه وفيها شاشات...وفيها اصايص اشجار متوسطه كدا...وتربيز زي السفر...شافو من بعيد جاسم وسلمي وسامي...مشو ناحيتهم...سلمي وقفت قدام ريم وحضنتها♡ريم ابتسمت ...سلمي طوالي مسكتها من يدها وجرتها لبرهه وهم ضحكو فيها....
سلمي: ريم انا آسفه
ريم: هههه وانتي من متين راقيه كدا!
سلمي: م تتافهي...حني علي عايني لي بعتذر ليك كيف!انا م عارفهه مالي !ليه اتكلمت معاك بالطريقهه ديك!
ريم(قاطعتها): لانو ابوك...وانا لو مكانك م بتحمل زول يتكلم عن ابوي كدا دا الطبيعي...عشان كدا انا كنت غلطانه ...وانا المفروض اعتذر
سلمي: ههه وربنا كشف لينا الحقيقه طوالي
ريم: آسفه
سلمي: ها الحماره دي...ازعل لشنو انا!!حتي بتصدقي امي م زعلت ابدآ بالعكس رده فعلها كانت طبيعيه!انا اتوقعتها تكون زي النسوان السمعت بيهم يعني...يحردو الحياهه دي زاتها بمجرد م رجالهم يتزوجو عليهم😂
ريم(بتضحك): انا متأكده انك ح تكوني من النسوان ديل بعدين...بس بالجد حاجهه حاره هي
سلمي: اي...هي بس زعلت من نورا لانو م قالت شي...ههه استغبونا هم الاتنين...بس يلا م علينا...حدث ما حدث😂المهم اسي صافي ي لبن♡!
ريم: قشطه♡........

ريم وسلمي دخلو جوهه المطعم...قعدو بتونسو...بس ريم ساكتهه وجاسم بعاين ليها وهي حاسهه...وسامي ملاحظ ليهم...
جاسم(بصوت واطي): ريم .. ريمي♡

ريم بتعاين لسامي ال كان منتبهه معاهم...وابتسم ليها...هي اتذكرت كلامو القالو ليها قبيل عن جاسم♡وابتسمت تلقائيآ اول م اتذكرت كلاموو....
جاسم: عروستي♡
ريم: داير شنو!
جاسم: دايرك تسامحيني...م داير شي والله...م تخلي حاجهه تفرقنا...ولا تسمحي ليها اصلآ...انا جاسم..حافظك وفاهمك...تتذكري لمن كنتي بتتشاكلي مع اولاد الحلهه وانا بجي بدافع عنك...تتذكري لمن ضربوك بالكوره في راسك!ههه وانتي قعدتي تبكي...ولمن شفتي عجلتي واصريتي تركبي فيها وانا الوقت داك شميتك وخليتك تركبي وبعدين وقعتك!...لمن الطيب سيد الدكان كان بشاكلنا ونحنا صغار ومره مشينا انتقمنا منو جمبنا ملعقهه وختيناها في الارض عشان تتطلع فيها نملهه...وفعلا طلعت ومشينا براحهه وهو نايم..فتحت ليهو الجلابيه بفوق وختينا النمله جوهه ضهرو وهو قام يتنفض!😂طيب متذكرهه لمن كنا بنلعب عريس وعروسهه..كنت بتمشي طربتي ملايه فيك وتعمليها فستان!وانا البس العمه بتاعت ابوي والفها في راسي!بنعمل نفسنا عرسان عايزين يجرتقوهم هههه...واحلي شي لمن انا اكذب في حاجهه وانتي تجي تهولي الموضوع وتتطلعيني كافر عديل اذا ما استغفرت سبعهه مرات ههه كنتي بتحدديها لي بالعدد عديل وبتقولي اذا استغفرت سبعهه مرات ربنا كدا بسامحك ههه كنتي شافعهه مسطوله

ريم بتعاين لجاسم وبتبتسم♡كل الذكريات دي كانت بتمر عليها اثناء م جاسم بقول فيها وبتذكرها....
سامي: انتو جادين ختيتو نمله في ظهر الراجل!😂
ريم: اي ههههه
جاسم(قرب منها): هاا تسامحيني!
ريم: استغفر الله...اي اسي ح ابكي واعمل دراما واقول ليك مسامحاك لكن تاني م تبعد مني..انت عوير ي ولد!
جاسم: ريم التي احب😂♡

كان بتونسو...جاسم فرحان انو هو وريم اتصالحو ...نفس الشعوور عند ريم♡...فجأه كدا وهم بتونسو حست جاسم بعاين ليهو ...وهي اتلفت عليهو ولقتو مبتسم...هزت راسها وبتضحك نظام مالك!...مسك يدها..وهي اتوترت شديد ويديها بردو♡وسامي بعاين ليهم وبحاول يدس غيرتو عليها بتعابير وشو المصطنعهه في اللحظهه دي♡(وهل يوجد اعظم من حب يولد بشراسهه الغيره!♡)...جاسم شال الخاتم ال كان في اصبعهاا...وقرب من ريم...
جاسم: انا الليله عايز اخطبك!رأيك شنو!ولا اقول ليك م عندي شغلهه برأيك..ابيتي ولا قبلتي م بهمني اصلا♡
سلمي: اوووباااا😂هي لكن تخطبها بخاتمها هي!
جاسم: انا وهي واحد اصلا...المهم لازم تعرف انها لي♡
سلمي: ي ولد لا...م عرفتك لكن😂رأيك شنو ي سامي!

جاسم ...مسك يدها...شال خاتمها ولبسو ليهاا في يدها اليمين♡..كانت لابساهو اصلا في يدها الشمال...
جاسم: خلاص كدا انا خطبتك♡

ريم قلبها كان بدق سريعع..وبدت ترجف ويدينها بردو زيادهه...حست فعلآ انو جاسم عندو مشاعر اتجاها!بدت تتذكر كلامو لمن جا من السفر وتلميحو ليها بقصهه كونان وانو هو عارفها بتحبو♡بكلمه عروستي♡بسلامو وكلامو معاها♡بلمسهه ايدو ليها♡...بقت تتبتسم تلقائيآ ..فرحانهه نفسها ترقص وتغني...كانت عايزهه تعترف ليها بمشاعرها...بقت شبهه متأكده انو جاسم بريدها💜....
قعدو اتونسو شويهه ...طلبو اكل...وقعدو ياكلو...جاسم كان متقرب لي ريم شديد♡سامي مركز معاهم شديد...كان متوتر...بهز في رجلينو...ولع سيجاره وبقي يشرب فيها بسرعهه...خلصو..دفعو الحساب وطلعو...كان واقغين بودعو بعض...

سلمي: قول لاختك الماسورهه دي اليوم كان سمح بدونك
سامي: هههه لو م صحبتها اتصلت عليها ضروري كان جات معاي
.............
جاسم(بصوت واطي): ريم
ريم: اها
جاسم: رأيك شنو نتلاقي بكرهه في نفس المكان دا !!
ريم: ليه!
جاسم: دايرك في موضوع...مهم
ريم(بابتسامه): موضوع شنو المهم دا!
جاسم(قرب منها): بكرهه بتعرفي..اسي م يينفع اقولو هنا عشان هو خاص شويه
رغده:يخواني ارح انا نعست ...ريم اطلعي قدامي ي مرض

ريم ورغدهه ودعوهم...جاسم كان بهمس ليها عشان م تنسي موعدهم بكرهه...كانت حاسهه نفسها طايرهه عديل💜...سلمت علي سامي...م كان عايز يفك يدها لحظهه السلام دي♡...بعد ودعوهم.. مشت ركبت هي ورغدهه ترحال.. ورجعو البيت...ريم اول م رجعت...مشت غرفتها...غيرت ملابسها...وبدت تغني وترقص برراها💜اختها مستغربهه فيها!ورغدهه بتضحك...م كانت بتتكلم مع زول وبتعمل في عمايلها ديك وآخر انبساطهه💜😂...
سوزان(بتضحك):مالك ي بت!
ريم: م ينفع اكلمك اسي ي بيب..اي شي حلو في وقتو💜
سوزان: الله يديم الحلوو دا عليك♡
......................
في جهه تانيه......
جات داخلهه علي غرفهه اخوها.. لقتو ماف...لقت علبهه صغيرهه كدا...فضول منها فتحتها...كان في خاتم...شالتو وبقت تشوف فيهو...كان فيهو حرفين(g.r)💜....

ريم قاعدهه في غرفتها.. فاتحهه الدولاب وبتختار ليها في لبسهه عشان تلاقي جاسم بكرهه...اختارت تلبس البنفسج..اللون البحبو هو💜فستان سادهه فيهو حزام في النص ...بنفس اللون...وطرحهه مورده♡...وطلعت ليها شبط ملون ...بعد جهزتتهم...رقدت في سريرها وهي فرحانهه ومتحمسه لبكرهه.. نامت وهي بتفكر فيهو♡...الصباح صحت بدري...لقت رسالهه من جاسم محتواها(ريمي♡نتلاقي الظهر..)...كانت متوترهه شديد...وبتجهز في نفسها...كلمت اختها انها تتحجج ليها قدام امها بأي حاجهه...سوزان فرحانهه لفرحهاا هي♡...ريم جهزت نفسها ...طلعت...ركبت المواصلات..ووصلت المطعم..نزل ودخلت جوهه...لقتو قاعد...لابس قميص كحلي غامق وجينز غامق♡...مشت ناحيتو...سلمت عليهو وقعدت...
جاسم: الاخرك كدا شنو ي بت!بعدين مالك سمحهه كدا هههه
ريم: اممم متحمسه للموضوع الخاص العايز تحكيهو لي دا!
جاسم(ضحكه خفيفه): واضح انك متحمسه شديد

جاسم بقي ساكت مسافهه وبعاين لريم...وهي بدت تتوتر..وتفرك يدينها.. وتضحك براها..جاسم رجع لورا في كرسيهو و بمشي يدو في لحيتو ومبتسم...ريم حست انو في زول واقف وراها...نفس الزول دا جا وقف قدامها!كانت رغده!....
يتبع....