اندروفين

١١

جاسم وريم طلعو علي البيت...جاسم مضايق ومتنرفز شديد من الحصل وبسبب الضرب مع مدثر اتجرح في طرف خشمو..وريم ساكته وبتعاين ليهو وعيونها مدمعه لانو اول مره جاسم يتنرفز فيها كدا للدرجهه دي وحست بشعور غريب وم معروف هو شنو بالظبط.....

ريم: جاسم

جاسم(بنرفزه): في شنو؟

ريم: اتجرحت في خشمك

جاسم: م شغلتك

ريم: جاسم انت ليه بتعاملني كدا اسي!!...يعني انا القلتا لي مدثر تعال واعمل كدا مثلا؟وبعدين اانا م حبيت اكلمك بحاجه بخصوص موضوع مدثر لانو انا عارفاك كويس..وحبيت انهي الموضوع براي بدون م تتدخل انت

جاسم( بصوت عالي): انا بتكلم في انك بتكذبي علي...كان ممكن م تغالطني لمن كنت بتكلم عن مدثر ولمن بقول ليك خاتي عينو عليك... انتي بدافعي عنو!...وبعدين م تقولي لي انو انتي حاولتي انك تنهي الموضوع براك وتحسميهو لانو انا عارف الاولاد الزي مدثر ديل بفكرو في شنو وعايزين شنو منك!فهمتي؟

ريم: طيب م تكورك فيني

جاسم: انتي اسكتي مني..عشان م اكورك فيك

جاسم وريم طول الطريق ساكتين وم بتكلمو مع بعض نهائي..جاسم وصل ريم علي البيت ...نزلت من العربيه وم اتكلمت مع جاسم ...جاسم نزل بوراها وناداها....

جاسم: ي بت...اقيفي...امسحي دموعك دي

ريم: اسي موقفني عشان امسح دموعي!

جاسم: اي...امسحيها وخشي لاهلك عادي والموضوع دا انسيهو خلاص وم تفكري فيهو كتير ومدثر دا تاني حسك عينك تقربي عليهو

ريم: اها وتاني في شنو؟

جاسم: امشي يلا

ريم وقفت عاينت ليهو مسافهه وعيونها مدمعه ...طوالي مشت دخلت البيت وخلتو واقف بعاين ليها لحد م دخلت البيت...وبعديها اتحرك...اول م دخلت البيت مشت طوالي غرفتها لقت اختها سوزان بتنوم في ولدها ...

سوزان: ي بت مالك جايه مكفرنه كدا في شنو؟

ريم: ماف حاجهه

سوزان: في شنو قلتا ليك اتكلمي سرعه

ريم( بزهج): ياخ قلتا ليك مافي حاجهه م تزهجيني عليك الله

سوزان: دا علي اساس انك م زهجانهه اسي...وبعدين تعالي هنا انا قبيل اتفاجأت لمن شفتا سلمى جاتنا بس م حبيت اقول ليها حاجهه كنت قايلاها ماشه معاكم

ريم: سلمى جات هنا؟

سوزان: اي ...وحتي قايلاك مشيتي الرحلهه مع جاسم واول م اتكلمت معاهو الولد فجأه زهج وقفل التلفون في وشها..في شنو هو بالظبط !مالك انتي وجاسم!

ريم: يعني ريم هي الكلمتو

سوزان: انتو وجاسم اتشاكلتو صح؟