اعظم ما قيل في الحب💜..عندما قال رسول الله "إنما فاطمه بضعه مني يؤذيني ما آذاها ويغضبني ما اغضبهاا💜"...
جاسم واقف بعاين لام لوتس باستغراب في رده فعلها اول م شافت بتها...البت واقفهه ورا جاسم وبتعاين لامها بنظرات حاده ...جاسم سلم علي امها ومشى طوالي ..حس بيهم م طبيعين!.....
.................
---(بصوت عالي): دا شنو العملتيهو دا؟؟انتي مجنونه ي بت وعايزه تجننيني معاك مش كدا
---(ببرود): م تتكلمي بصوت عاالي نحنا في الشارع
ام لوتس واقفهه في الشارع وبتتكلم معاها بصوت عالي ...وهي بتعاين ليها ببرود ...اتخطت امها ودخلت البيت...امها دخلت وراها وزرعت الباب شديد ...وبتكورك فيها....
---(بصوت عالي): استني هنا انا بتكلم معاك
---: دايره تعرفي شنو؟؟عايزا تعرفي ليه انا ضربت الراجل التافهه داك مش؟
---(قربت منها): انتي دايره تعملي لي مصيبه صح!بالجد انا بقيت م بقدر اتحملك لا انتي ولا مرضك ...انا جبتك معاي هنا عشان تبعدي من المشاكل هناك وافتكرت انك ح تتغيري وتهدي شويهه ..بعد العمله العملتيها مع الدكتور دي اتأكدت انك ماشهه للاسوء ...فهميني ليه عملتي كدا !
---: اذا انتي زهجانهه مني للدرجهه دي وم قادره تتحمليني كان تخليني بكون احسن لانو الصراحهه وجودك معاي اسي زي ابوي زماان هههه يعني وجودكم الاتنين اخير عدمو الصراحهه
امها قربت منها زيادهه...وبتتكلم بغضبب شديد ....
---: ابوك! م تجيبي لي سيرتو ..كلمتك ميه مره اوعك تجيبي سيره ابوك
---: ااااه انا...عارفهه انو الحاجهه دي صعبهه عليك...م قادره تتقبلي انو ابوي خلاك ومشى عرس وحدهه تانيه...انا م عارفه انتي ليه زعلانهه!!يعني واحد كان معيشك عيشه زي الزفت وبعنف بتك ...المفروض انك تكوني فرحانهه انو اتخلصتي منو!!مش في النهايهه انا بتك برضو وعايزا مصلحتي ! بعدين ياخ خلينا نكون واقعيين انتي وابوي الخليتوني انسانه مجنونه وم نصيحه صح؟
---(بتتنهد): ضربتي الدكتور ليه!!عارفه بسببك اسي هو راقد في المستشفي وعملتي ليهو مشكلهه كبيره واحتمال تأثر علي نظرو ..مرتو جات وبقت تسأل فيني الحصل شنو!دا غير الفضيحه السببتيها لينا في العمارهه والناس كلها بدت تسأل وم عارفه اقول ليهم شنو!
---: عادي ...ان شاء الله يموت
كلام االبت استفز امها شديد...هاجت فيها شديد وقربت تضربهاا كفف....
---: هه عايزا تضربيني عشان الانسان التافهه دا...انا م فارق معاي يموت ولا يعمى ولا يتحرق لانو بستاهل الحاجه الحاصله معاهو...والانسان الكنتي عايزا تضربني عشانو دا بحاول يتقرب من بتك القدر اولادو وبعمل حركات م تمام معاي وما انا بس مع كل البنات ...بتك الكانت بتقول ليك م عايزا تشوف خلقتو ولا تتكلم معاهو وانتي اعتبرتيها مجنونه وكايسه مشاكل بس م اكتر وعشان همك كلو تتخلص من مرضها دا بأي طريقه ان شاء الله تكون غلط وعلي حسابها شخصيا ...دايره تتخلصي منها ومن مرضها بأي طريقه عشان هي عبئ عليك
---(باستغراب): انتي بتقولي في شنو!!
---: السمعتيهو
---: ليه م كلمتيني بالكلام دا!!
---: وانتي من متين بتسمعي لي!حصل مره قلتي لي انتي دايره شنو!نفسك في شنو!المضايقك شنو!قلتي لي تعالي ابكي ساي وخليني اضمك بدون م تقولي شي حتي!حصل!هههه ياخ دا الغريب حس بي اكتر من امي ...خلاني احس اني انسان اخيرا بضايق وبفرح ...بتصدقي اني بقيت بحكي لجاسم حاجات م حصل مره قلتها ليك انتي زاتك!
---: انتي بتقولي في شنو؟
---(عيونها مدمعه): اي بقول ليهو حاجات انا م حصل مره قلتها ليك...تصدقي انا بقيت اكره اقعد في البيت ..بحب اقعد معاهو اكتر ي امي ...اداني الحنيه ال م لقيتها في ابوي ...ولا حتي امي ال كان مرضي بالنسبهه ليها عبئ كبير ....جاسم حسسني انو ما ح يحاربني عشان اخطائي بالعكس هو ح يحارب اخطائي معاي ...بقولو البت بتشعر بالامان الحقيقي الامع ابوها ...لكن ياخ والله انا م شعرتا بيهو الا مع جاسم ...انتي عارفه هو حاجه كدا من ربنا وانا ح اتمسك بيها...لكن في مشكلهه...انك قبيل كنتي هايجه قدامو وعايزا تتكلمي عن موضوع الدكتور ...واكيد هو اسي ح يكون خاتي حاجهه في بالو وبفكر في الحاصل..ودا كلو بسببك
---: امشي ابلعي حبوبك...انتي باين عليك تعبانهه...امشي ارتاحي وبكرهه بنشوف نحل الموضوع دا كيف
البت بقت تعاين مسافهه بنظرات حادهه لامها...قربت منها ....
---: جاسم م مفروض يعرف حاجه عن مرضي ولا عن الموضوع دا تمام
---: طيب امشي
---: زابط
.....................................
قاعدهه في غرفتها ...زهجانهه شديد وصاره وشهاا....ماسكهه تلفونهاا وبتقلب فيهو...جات اختها داخلهه عليهاا.....
سوزان: هوي قومي الغدا يلا
ريم: م دايره
سوزان: بسم الله...مالك ان شااء الله خير!!جيتي من السوق مبسوطهه اسي مالك مدبرسه كدا!
ريم: عااااادي اول مره تشوفي ناس منفسنيين
سوزان: عندك قدره تتافهي حتي وانتي مدبرسه😂مالك ياخ ...انطقي
ريم: بضرب لجاسم من قبيل انا م عايز يرد علي
سوزان: اسي دا موضوعك!فارغه...بكون مشغول يعني...قومي ارح ياخ ..في زول برفض الطقهه عشان الهناي م رد عليهو...بالمناسبهه رغده جايه بعد يومين خلاص
ريم: جمييل 💜ربنا يوصلها بالسلامهه
.................................
في غرفتو...فاتح التلفزيون بحضر في كورهه...فجأه سرح وبقى بفكر في لوتس...ليهه امها كانت هايجهه كدا!!وباين عليها غضبانه علي بتها شديد!وهي اول م شافتها ملامحها اتغيرت ...باين انو في حاجهه...اسألها!ياخ انا مالي ...ليه بقيت عايز اعرف اي حاجهه عن البت دي!!ههه شكلي م ح اقدر اتأقلم علي عدم شوفتها وهي معصبه وبتشاكل في ضبان وشها لمن اسافر ....بتكلم في سرو وبقول الكلام دا ومبتسم💜شال تلفونو ولقى كذا مكالمه من ريم...داير يرجع ليها ...تلفونو رن وكانت لوتس....
جاسم: ي سبحااان الله ...كنت بفكر فيك اسي
---(مبتسمه): جد! خير ان شاء الله
جاسم: لالا ياخ خير اكيد ...خايف بكرهه تفشليني قدام اهل صحبي وتتطلعي الحاجات م سمحه😂
---: شفيف انت بالمناسبهه...وطلبت مني اعملهم ليك ليه😒
جاسم: عشان داير اشوفك بكرهه ...بس💜
البت سكتت مسافهه بعد كلام جاسم...جاسم اتنهد وكمل كلامو...
جاسم(بصوت واطي): داير اشوف بكرهه بسمتك الحلوهه ديك💜تتذكري اللوتس وكلامنا عن جمالها داير اشوفك بكره زيها...داير اطلعك من جو الكآبه بتاعك دا صراحهه ...اسمعي هوي ي بت اظبطي القهوه والكيك بكره فاهمه !
---(ضحكه خفيفه): طيب
جاسم: في واحد طلع موكب في شمبات ومتحمس ي زوله وماسكاهو الروح الثوريه ديك...اثنااء ما هو بصور في اللايف بتاع الموكب بكل الحماس ال في الدنياا قال وزي ما قالت الفنانه ريهانا شمباات لايك اديموند😂💜
لوتس بقت تضحك شديد...وجاسم بسمع في ضحكتها ومبسوط انو بقدر يخليها تتبسط💜......
جاسم: اهاااا بكرهه لاازم تظبطي الحكايهه ....عايزين نخلق اجوااء سودانيه بكرهه ليهم وكدا...هههه لو كنت طلبت من ريم انها تعمل كيك كانت خربتو ..الغبيه ههههه
---: انت بتتكلم عنهاا كتيير ...واضح انها غالييه عليك شديد
جاسم(بابتسامه): جدا 💜...يلا يجميلهه بس تخلصي بكرهه اتصلي علي عشان اسوقكك
---: تمام
...................................
قفلت من جاسم ....رقدت في سريرها وبتمشي يدها في شعرها...ومبسوطه وعيونها فيها لمعهه💜...صحت الصبااح بدري ....جهزت نفسها وطلعت بدون م تكلم امها ....ومشت السوبر ماركت...اشترت مساند متوسطهه بالالوان حلوهه شديد...وصحانهه مزخرفهه بالكحلي والابيض للكيك...دفعت الحسااب وطلعت...شايلهه الاكيااس بيدينها الاتنين ووبدندن في الشارع براها ...وصلت البيت ...لقت امها قاعدهه في كرسي وبتشرب في قهوه .......
---: مرقتي وين كدا من الصباح؟
---: هههه ليه ما باين من الحاجات الشايلاها كنت وين!
امها سكتت وبتعاين ليها ومستغربهه في تصرفاتها!...ختت الاكياس في الصالون ...وطلعت غرفتها...غيرت ملابسهاا ...رفعت شعرها لفوق...ومشت المطبخ ...بدت تحضر في الحاجاات ...كانت بتغني...امها جات وقفت عاينت ليها ومشت...لوتس اتلفت عاينت ليها وضحكت وكملت شغلها.......
..................................
في الصالون ماسك اللابتوب وشغاال فيهوو....جات اختو قعدت جمبوو...مدت ليهو كبايهه شااي...بتعاين ليهو ومبتسمهه...قبل عليها وصر ليها وشو....
سامي: مالك ي بت!
يقين: اممم انت المالك ي اخوي؟من امبارح مفرهد كدا 😂
سامي: جيتي عشان تتطلعي ميتيني اسي مش...قومي امشي شوفي جامعتك ي بت
يقين: م عندنا محاضرات ي حلو االلييلهه ...سامي انا قررتا حاجهه
سامي: اها
يقين: قررتا اخيرا ...اطبخ ليك انت وابوي االليله
سامي: اووووبااا الليله ي مستشفي الحوادث جاك زول 😂ي بت انتي في زول قال ليك نحنا مستغنين عن نفسنا ...طيري كداا
يقين: عواليق...ابقى راجل بعدين اكل منو
سامي: الشغلهه دي ليها ناسها ي مزه انتي..خليك في مكياجك والسوق والبرامج دي...صحي علي سيره السوق اها امبارح كيف!خميتي السوق كلو وجيتي طبعاا
يقين: دا كلام!بتك ي محمد...والله كان يوم درسيس وكدا..غيرنا جو شويهه خصوصا لي فتره م كنت بلاقي سلمي ...وصحبتها ظريفه شديد هههه بس هرتنا باللون البنفسج
سامي: بنفسج!
سامي رفع عيونو من اللابتوب ال كان مندمج فيهو...وبقى بفكر في ريم...اتذكر اول م شافها يوم الحفلهه وكانت لابسهه بنفسجي💜كان لايق شديد عليها💜.....
سامي(مبتسم): اصلا هي بتحب البنفسج
يقين: وانت من وين عرفت ي اخوي
سامي(بضحكه خفيفه): دايما كانت تلبس بنفسج في كل مره بلاقيها فيها هههه ...حتي لو لبستها مافيها بنفسج لازم الحلق او الاسوره تكون بنفسج
يقين: ههه ذكرتني الملوك والنبلاء في المجتمعات الاوربيه زمان ...والامبرياليه...كان مولعين باللون دا لدرجهه كان رمز ليهم ...حتي انو عملو ليهو قوانين كماليه يحظر فيهو كل الافراد انو يلبسو ملابس باللون دا ..م عدا الافراد المقربين للعائله الملكيه بس هم البلبسو اللون دا ...اللون دا بالنسبهه ليهم كان مقدس وبرمز للروحانيه ...بعتبرو لون الآلهه او الناس المنحدرين من نسل الآلهه
سامي: صح...عشان كان بقولو انو الاكتشف اللون دا الإله ملكارت هرقل ...كان بتمشي مع حبيبتو الحوريه تيروس في شاطئ ...وهم بتمشو شافو ليهم صدفه حلوهه كدا اسمها الموريكس ...الكلب بتاعهم حاول انو ياكل الصدفهه دي واللون الفيها اطبع في خشمو...تيروس لاحظت للون وعجبها ....بقت تلح علي الإله هرقل عشان يصنع ليها من اللون دا فستان ...وهو امر انو يجمعو الصدف دي كلها ويستخرجو منها اللون ...ونفذ رغبهه حبيبتو 💜
يقين: هههه ياخ ديل في عهد ملك ااااا اسمو نيرون تقريبا ...كانو فارضين عقوبهه الاعدام علي اي زول ببيع او يلبس ملابس باللون البنفسجي...كان دليل للعظمه والهيبه عشان كدا بلبسو الكرادله في كنايسهم الكاثوليكيه الرومانيهه
سامي: والله ياخ ...ي بت ...قرايتك للفنون م طلعت ساي😂.....
سامي اثناء م بتونس مع اختو....جاسم اتصل عليهوو...اختو قامت عشان يتكلم براحتوو معاهو.....
سامي: ي جن...كيفكك ياخ
جاسم: ي مرض...قلتا لي عارف بقصهه زواج معتز وشيمااء الفجائيه دي وما بتكلمني ...اصبر ياخ بس خليني اجي السودان
سامي: رووق المنقهه ياخ ههههه ...اصلا الموضوع م مهم يعني وما مركز فيهو كتير
جاسم: ي مان كيف يعني م مهم...والله انا مستغرب ودايش عديل م فاهم في شنو ....سلمي اتصلت علي ولب ادتني الخبر...م ملاحظ انو في شي غريب...الحاصل شنو بين الاتنين ديل!انت عارف حاجهه عن الموضوع دا
سامي: هههه ح يكون ال في بالي وبالك من زمان ..بس كنا عايزين نتأكد
جاسم: يااخ ..معتز التافه...بالرغم من وساختو دي...بس كونو اسي يجي يعرس المسكينه دي ويسترها حاجه كويسه وتتحسب ليهو
سامي(بتنهد): صح
جاسم: كويس انو الموضوع اتحسم...لانو ريم راسها يابس ..م عارفها لشنو كانت عايزا تتدخل في الموضوع دا!
سامي سكت مسافهه اول م جاسم جاب سيرهه ريم...م كان حابي يقول ليهو اي شئ بخصوص تدخل ريم في موضوع معتز وشيمااء.........
سامي: اهاا انت ح ترجع متين؟ح تحضر العرس ؟
جاسم: م فاضل لي كتير نص تلاتهه ايام بالكتير واكون معاكم يعني ح احضر العرس...بس في حاجهه عايز اعملها هنا اول
سامي: شنو؟
جاسم(ضحكه خفيفه): خليها لقدام احسن ........
جاسم فضل يتونس مع سامي شويتين...بعديها قفل منو...وبدا يجهز نفسو عشان يمشي للوتس...لبس بنطلون شاي بلبن وقميص زيتي غامق💜........
في جهه تانيه......
في غرفتهاا . قاعدهه قدام المرايه بتسرح في شعرها وبتدندن...لابسهه فستات ابيض وجكت جينز غامق ...شعرها كيرلي...ولفت طرحهه ملونه حولين رقبتها...ولبست شبط راقي شديد💜...نزلت تحت المطبخ وبتتفقد في الحاجات واذا ناقصها حاجهه...وقفت تعاين في شباك المطبخ وتشوف اذا جاسم جا ولا لا...بعد نص ساعهه جاسم جا وضرب بوري...اول م شافتو فرحت شديد ومشت سرعهه فتحت الباب ...نزل من العربيهه ...خت يدينو في جيوبو ومبتسم....
جاسم: هل انت جاهزون ي اصدقااء
---: هاي هاي كابتن😂
......................
مشت سرعه لملمت الحاجاتت ...وطلعتهم وهو بساعد فيها...ختاها في الضهريه ...امها حاولت تنبها انو م تتأخر وترجع بدري.. بس م اشتغلت بيها وطلعت طوالي!...بالرغم من انو م عاجباها طريقه بتها..بس مرتاحهه انو بتها شبهه بتطلع من حالاتها وقت تشوف جاسم ..ومبسوطه بروقتها....
جاسم: شايفك جبتي معاك حاجات اضافيهه...كان تكلميني وم تتعبي نفسك بجيبها انا
---: ماف تعب...فكرتا فيها آخر لحظه وكدا
جاسم(بضحك): بتمني الليله م يجيني تسمم
---: من اسي اوعك تمد يدك علي الحاجات العملتها
جاسم: لا ياخ اصلا ح تكون حلوهه زي م انتي طالعه الليله
---: م تشاغل ي زول والا اسي اخليك تنزلني
جاسم: الحق علي الوسيط الافريقي القال لينا نعتني بيكم ياخ ههههه
جاسم ولوتس وصلو...نزلو الحاجات وبدو يرتبو فيها...المكان كان راقي وهادئ شديد واحلي شي ريحهه البحر 💜اثنااء م كانو برتبو في الحاجات...جا صاحب جاسم واخوهو العيانن وشويهه اولاد وبنات معاهم...سلمو علي بععض ..وبتونسو شويهه...جاسم كان بضيف فيهم...لوتس مشت تجيب القهوه جاسم لحقها ...وبدا يساعدها ...
جاسم:ريم لو كانت هنا م ح تقتنع بالقهوه دي وتقدمها الا تشمم الناس ريحتها اول..مسطوله ياخ😂
---(بصوت واطي): ريم ريم ريم ..اي شي ريم ...دا شنو ياخ!
جاسم: هووي يلا ارح ..سرعه...
......................
---: بالججد يااخ م كنت متوقع انو تطلع راقي كدا ي جاسم ...الحاصل عليك شنو ي اخوي ههههه
جاسم: الشغل دا كلو بصراحهه كدا شغل لوتسي💜
---:اممم لوتسك قلتا لي
البت خجلت شديد بعد م جاسم قال عنها لوتسي💜عاينت ليهوو ونزلت راسها...قعدو في الارض وبتونسو...اخو صاحب جاسم كان بتكلم عن مرضو....
---: لازم تكون مؤمن انو انت ح تتعافي من مرضك...انا عندي اقتناع انو المرض الحقيقي بجي من مرض الروح.. اذا روحك تعبانهه جسمك ح يتعب
جاسم: بس لازم يكون عندك محفز يخلي عندك امل انك ح تتعافى...زول يديك دافع عشان تتحسن عشانوو..ويحارب معاك مرضك....
البت قاعدهه مدنقره راسهت وبتسمع في كلام جاسم ومبتسمه...اثناء م هم قاعدين ومندمجين في الونسه المطره بدت تصب والجو كان حلو جدا💜بقو بلملمو في حاجاتهم سرعهه سرعهه...صاحب جاسم مشى ومعاهو اصحابو...جاسم ولوتس دخلو حاجاتهم سرعهه في الضهريه وركبو العربيهه...جاسم طلع تلفونو وحاجاتو ختاها قدامو...البت بتضحك وبتهبش في شعرها ..بتحاول تنشف فيهو...جاسم بقى بعاين ليها...البت اتلفت عليهو وهي مبتسمهه..جاسم لاحظ انو في خصلات من شعرها في خدها الشمال...قرب منها وزح ليها الشعر من خدها وهي بتعاين ليهو بدهشهه..........
اول شئ انا آسفه جدا ياخ علي تأخير الحلقات م بقصدي والله وعارفه انكم اتشحتفتو شديد فيها.. م افترااء مني والله بس ظروف م اكتر ولازم اكون في نفسيه كويسه عشان اقدر اكتب حاجه تعجبكم..بس الغلط غلطنا لانو نزلنا الروايه وهي م تامه..آسفه شديد والله ويا ريت تقبلو تقبلو اعتذاري❤
ملحوظهه....
الروايه ح يكون فيها جزء تاني ح ابدا فيها طوالي ان شاء الله بنفس الاسم💜
نتلاقى باكر