ريم حست انو راسها تقيل ذي كانو زول ضربها في راسها وقفت مسافه...جاسم انتبهه ليها....
جاسم: مالك ي بت
ريم: دا العواليق الكان واقف من قبيل هنا دا ياخ ...عمل لي صداع
جاسم: حبيبي انا عسولي انا العصبي دا😂
ريم: عان م تتافهه معاي😂
جاسم: اركبي ارح طيب عشان تحكي لي الحصل شنو!
هم في العربيهه...ريم منفعله شديد في الكلام وبتوصف الحصل بيدينها😂جاسم بضحك فيها...
ريم: خليك جادي ولو يوم واحد في حياتك ي انسان
جاسم: انا م فهمتا منك ولا شي😂اول شي اهدي واتكلمي واحكي الحصل برواقه ...تانيا امسكي يدينك عليك لانو وانتي بطيري فيهم كدا ممكن تعملي لي عاهه مستديمه في وشي😂شيلي نفس واحكي براحهه
ريم: ياخ انا م بعرف...انا انتبهتا للزول دا وهو بتكلم بطريقهه م حلوه مع البت وبتكلم بأعلي صوت ومره يضحك شغل استفزاز يعني..وبعدين م اشوف الا دفر البت ووقعهت في الارض
جاسم: انتي عارفهه انو الزول دا بكون ولد عمي
ريم: هه ولد عمك؟!صدمتني الصراحهه لمن قلتا انو ولد عمك...لانو اهلك م كدا ...اوك هم مغتربين وم حصل قعدتا معاهم واتعمقتا في علاقتي معاهم شديد..بس علي قدر البعرفو انهم ما بالفظاظه ال عند ولد عمك دا
جاسم: كدي ارح ننزل هنا ناكل وبنتكلم....
جاسم وريم وقفو في مطعم...طلبو اكل...وبتناقشو....
جاسم: طيب انتي م سمعتي اي حاجهه كدا ولا كدا من كلامهم دا
ريم: لا
جاسم: تقريبا انا فهمت القصهه
ريم: القصهه شنو؟
جاسم: معتز دا واحد لعبنجي ساي...من بت لي بت....وبعدين شيماء دي بت مسكينه وعلي نياتها شديد..ومعتز خبيث بكون جرجرها كدا ووهما انو هو بريدها ...وطبعا لمن زهج ولعب زي م عايز داير يتخلى عنها...وم بستبعد انو كان غاشيها انو ح يتقدم ليها
ريم: معقوله الانسان دا حقير للدرجهه دي!
جاسم: واكتر كمان...اصلا هو السبب الرئيسي في مشاكلي مع ابوي...علي العموم انا م بخلي الموضوع دا وح اشوف نهايتو شنو
ريم: ااه كدا كويس...جاسم عايزا اسألك سؤال
جاسم: اسألي ي بتي
ريم: عماتك رجعو السودان ولا لسه؟
جاسم(بإستغراب): لا لسه م رجعو...ليه السؤال؟!
ريم:ساااي مافي شي ...بس حبيت اسألك وكدا ....اها طيب هم م ناوين يرجعو
جاسم: ماف سبب بخليهم يرجعو...وخصوصا انو رجالهم برا وشغلهم كلو برا
ريم: ايواااا
طيب يعني اذا دي م اختو دي منو؟!!وبعدين الطريقهه ال كان ماسكها بيها ويعني استغفر الله...انا بعمل في شنو...احتمال قريبتو خلاص ...احسن شي اني م افكر في الموضوع دا كتير وادخل نفسي في حته ضيقه
جاسم لاحظ ل ريم شردت بقى بعاين ليها مسافهه وببتسم ..طقطق ليها باصبعينو...
جاسم: شارده وين ي بت 😂
ريم: فيك
جاسم: اشردي فيني لسه اي...انتي لاقيه واحد زي يباريك بخلقتك دي
ريم: عواليق
جاسم: ههه بالله سوزان وولددها كيف؟
ريم: ااااه كويسين الحمد لله
جاسم: في شنو؟
ريم: شنو؟؟
جاسم: اول م جبتا ليك سيره سوزان ملامحك اتغيرت...كل مره بجيكم في البيت واشوف سوزان بجيني احساس انو في حاجهه...وم حابي اتكلم ...صح نحنا واعدين بعضنا نحكي اي شي لبعض...برضو م ح اضغط عليك عشان تحكي لي
ريم: سوزان واحمد ح يطلقو...يعني حاسه باختي مجهجه شديد...وولدها صغير لسهه وم عارفهه تعمل شنو...
جاسم: غريبه!ياخ انا كل م اشوف الاتنين ديل واشوف التفاهم والثقه البيناتهم بتكيف ليهم عديل..بس يمكن الشي دا لخير
ريم: ي ريت يدو نفسهم فرصهه ياخ
جاسم: دي حياتهم وم مفروض ندخل فيها...هم عارفين مصلحتهم وين...واذا هم شايفين انهم م قادرين يكملو مع بعضهم ماف داعي للمكابره ...عارفه ليه لانو طول الفتره ال هم بكابرو فيها دي بكون اي واحد فيهم ببني مشاعر مزيفهه اتجاه التاني ...والحكايه مع مرور الزمن ح تكون ممله للاتنين وح تبدا المشاكل ال م ليها نهايه
ريم: انت طلعتا عميق جدا😂💜
جاسم: وانتي لازم اي شي جادي تقلبيهو تفاهه😂
ريم بقت تعاين لجاسم مسافهه وبتبسم ليهوو...جاسم عرفها لانو اول م تجي تطلب منو حاجهه بتعمل حركات...
جاسم: م تعملي لي حركاتك دي قولي دايره شنو ؟
ريم: انا وصحباتي طالعين رحلهه جبل اوليااء وكلها يوم واحد وكدا .....
جاسم( قاطعها): متأكده انتي وصحباتك بس؟!!
ريم: ااااا ...اي انا وصحباتي
جاسم: لا
ريم: جاسم في شنو مالك انت ؟
جاسم: اول شي اتعودي م تكذبي علي...انا متأكد مدثر ح يكون ماشي معاكم و ما براهو بس متأكد
ريم( بصوت عالي): جاااسم...انت مشكلتك شنو مع مدثر والمعاهو...وبعدين يعني انا ماشهه عشان صحبااتي م ماشه عشان مدثر ولا غيرو وانا اصلا م عندي بيهم شغلهه
جاسم(بنظره حاده): لا
ريم: جاسم انت م ملاحظ انك بقيت مستفز...وبعدين كل م اقول ليك حاجهه انت لازم تعارضني فيها ...بسببك وبسبب تحريشك لابوي بقى م بخليني اطلع مع صحباتي ....انت ليه انسان عارض كدا
جاسم مكتف يدينو وبعاين لريم وفي وشو ابتسامه بارده...ريم هايجهه وبتتكلم بيدينها 😂...ووالناس ال في المطعم كلهم بقو يتفرجو فيهم ويضحكو...
جاسم: ماف ليك طلوع اترزعي في البيت شوفي ليك قرايه يلا
ريم( بصوت عالي): انت قايل نفسك منو اصلا...اخوي ولا ابوي ولا راجلي وانا م عارفهه ...بطلع وح تشوف ما علي كيفك ...وبعدين...
ريم قبل م تتم كلامها ...جاسم شال حبه من البطاطس الجمبو وحشرو ليها في خشمها وبضحك 😂ريم نطط عيونا وكانت عايزا تنفجر فيهو عينها لمن بقت تغمز براها ...بس لقت كل الناس بتعاين ليهم ...لمت نفسها عليها واكلتا في حنانها غايتو😂
جاسم: بالله البطاطس دا كيف؟..انا شايف ملحو كتير ....كتير مش كدا آآآآ طيره😂...عايني انا شايف نقوم من هنا كفايهه الفضيحه الاتفضحناها قبيل بحسك العالي دا...اسي تقومي تنفجري فينا وتجعري البسكتك تاني منو وريني😂
ريم: يسكك كلب
جاسم( بصوت عالي): ي اهل الخير ...انا والله البت دي م بعرفها نهائي😂
ريم وجاسم طلعو من المطعم...طول الطريق كان بكاوي فيها😂...
جاسم: ماف طلعه ي ريم ...وكلامي دا آخر آخر مره اقولو وانا جادي كويس
ريم: طالعه
جاسم: وحلاتي المنفوش دا...عامله كدا زي ابو القنفذ😂
ريم: انا قلتا ليك قبل كدا الصبر جميل 🙂
جاسم: جميل ولا سعيد
ريم: واهه🙂
جاسم: مزاجك نعكرو ليك اي والله ....ابوك نحرشو ليك اي والله...مرقتك نخربها ليك اي والله
جاسم وصل ريم البيت..وهو مشى علي بيتو...اول م وصل .. سمع ابوهو رشاد بكورك مع امو وطوالي مشى ليهم....
رشاد: انت وين كنت ي استاذ ؟؟م جيت الشركهه ليه الليله؟
جاسم: اول شي السلام عليكم....اناجيت الليله الشركهه وانت م جيت وقعدتا استنيتك كتير...وامي م عندها ذنب عشان تجي وتكورك فيها بالطريقهه دي دا طبعا اذا م انت كنت قاصد وعايز مشاكل
رشاد: اتكلم معاي كويس ي ولد
جاسم: انا شايف نفسي انا بتكلم كيف...بس انت ومع احترامي ليك بقيت م بتراعي لطريقه كلامك مع امي وطوالي في مشاكل معاها وم اكذب عليك احيانا بشعر انك قاصد الحاجهه دي ...وعلي العموم قبل م تهاجمني انا اسي شوف معتز الولد المثالي الملائكي بالنسبه ليك بعمل في شنو !
رشاد: انت بالذات م تتكلم عن معتز ولا تجيب سيرتو في لسانك...وحضرتك بعد م طلعتا من الشركهه مشيت وين...عند ريم ولا شنو ؟
جاسم: ايواا
رشاد: وانا اقول جايب الاخلاق والسلوكيات الجميلهه دي من وين ههههه....مش مفروض بعد كدا البت دي واهلها تنساهم ...وضعك بقى غير افتكر
جاسم: امي انا طالع غرفتي
رشاد: انا بتكلم معاك
جاسم: م ح ارد ليك لانو نقاش زي دا ح يجر شديد والله ..سلام...
يتبع.....