جاسم وامو بتناقشو في موضوع زواجو من ريم...وسلمي كانت ساكتهه وبتعاين لاخوها....
جاسم: امي...انتي نسيتي انو انا لحدي الان م كونتا نفسي كويس...بعدين الخلاك تفكري انو ريم اكتر وحدهه مناسبه لي شنو؟؟
عفاف: مش انت اسي ح تمسك شغل ابوك ...والحمد لله وضعنا كويس ...بعدين انا م قلتا ليك عرسها اسي...انا اقترحتها ليك وعايزاك تفكر فيها مستقبليا بس م اكتر ....وكفايهه انو نحنا بنعرفها وبنعرف اهلها وعاجباني شديد والله
جاسم رجع لورا في الكنبهه ال هو قاعد فيها ويمرر يدو في لحيتوو وببتسم ....
سلمي: اوووبا...مالك ي اخووي قمتا تتبسم 😂
جاسم: بطلي نقهه ...وامشي نومي عشان بكره جامعتك ي مزه ولا انتي نسيتي !
سلمي: اووك...بس ي ريت تحافظ علي بسمتك الكساره دي لمن تقابل ريم بكرهه😂💛
جاسم : ي بت طيري عشان م اشلتك
جاسم طلع فووق غرفتو ....شال تلفونو ولقي مكالمات من سامي...رجع ليهوو....
جاسم: لقيتك متصل علي كذا مكالمه !مالك ي خوه....رجعتا المجنونه دي بيتها ؟
سامي: ااي رجعتها...بس طول الطريق كانت بتتكلم عنك ...ياخ انا غرتا عديل😂
جاسم: زي رشا دي بتنفع معاك والله امسك فيها قووي بس😂وبطل كل يوم والتاني ناطي من بت لي بت
سامي: انا البنفعو معاي امثال ريم...ريمي💜
جاسم: ساامي...ابعد نزواتك ولعبك دا كلوو من ريم ...تمام!
سامي: غرتا ولا شنو؟😂
جاسم: ابدا بس ريم م زي باقي البنات البنعرفهم نحنا...عشان كدا برضي زول يقرب عليها ....ي اخووي الليله شايفك اندحتا معاها شديد
سامي: ذنبي شنو انا اذا قلببي مال ليها طيب😂💜
جاسم: ثبتو بمسامير عليك الله ....يميل في اي حته تانيهه الا دي😂
سامي: صحي...سامعك قبيل كنت بتتكلم انك م عايز حفلهه التخرج ال في الجامعهه وعايز تبدا شغل طوالي ..دا شنو النشاط الفجائي دا ي عمك!
جاسم:حاسس اني ضيعتا سنين من عمري بسبب اني كنت زول طايش وعايش الحياه دي لابعد الحدود ...يعني عايز اكون جادي شويهه...ح انزل الخدمه في الشركهه طوالي وبعدين ابدا شغل رسمي
سامي: اممم ...خطوه كويسهه احسن تلحق نفسك الصراحهه...لانو شايف معتز بتعامل في الشركهه دي كانها حقتو هو براهو
جاسم: دا يصبر لي ...الانسان دا حقير جدا ...عكس عمي...احيانا بستغرب انو كيف واحد بطيبه عمي يكون عندو ولد زي معتز !
سامي: معاك حق...واصلا وجودك في الشركهه بريح ابوك وبريحك كمان من المشاكل معاهو
جاسم: اااااه ...ان شااء الله ...طيب ي حبيب نتلاقي بكرهه
سامي: ظابط ...سلم لي علي ريم ههههه
جاسم: سامي اقطع وشك
.........
في الصباح وهي نايمهه سمعت صوت زول عاالي ...صحاها من نومها ...قبل م تقوم من السرير سمعت رنين تلفونها....كان في رسايل كتيره بتجيها ورا بعض...شالت تلفونها عاينت ليهو لقتو جاسم...
عارفك راقده مفنقلهه لسهه في سريرك...وشعرك منكش..وحالتك بالبلا...وعيونك مورمه...لا وكمان امبارح ساله لسانك فيني وبتقولي لي تعال بدري عندي محاضره وانتي طيره سااي....انا اللليله م جاييك امشي براك الجامعهه ....بالمواصلات اتلتلي الليله...اصلا لو م سلمي معاك في نفس الجامعهه م كان ح اوصلك ولا ارجعك ي حلوه...عارفك حاليا بتشتمي فيني من الاعماق 😂....لكن شنو البريدك بعذبك...وانا بريدك💜
ريم بتقرا في الرسايل وبتبتسم💜اختها لاحظت ليهاا....
سوزان: دامنو البخليك تتبسمي قدر دا من صباح الرحمن...الابتسامه للضريس ي يمه ...اديني ابتسم معاك
ريم بقت تعاين لاختها ..قربت عليها ...مدت ليها يدها زي كانو عايزا تديها حاجهه ....
سوزان: مالك ي بت...دا شنو؟!
ريم: امسكي الابتسامهه دي
سوزان: تفاهتك دي م بتخليها انتي😂...عليك الله الرسل الرسايل دا منو؟
ريم : اااااه ...جاسم
سوزان: تااااني....تاني جاسم...ريم انتي م عايزا تسمعي كلامي...انتي ليه راسك قوي وناشف كدا؟!!
ريم:ابلو ليك بمويه يعني!...صحي دي منو ال كانت بتتكلم بصوت عالي كدا بره !
سوزان: دي جارتكم الجديده دي نسيت اسمها
ريم: فاطمه...مالا؟!
سوزان: راجلها عرس فوقها
ريم: طيب...عادي يعني م فاهمه وين المشكلهه !يعني الشرع حلل ليهو كدا هي ليه معترضه!بعدين انا م عارفهه ليه كل النسوان كدا من م راجلها يعرس وحده تانيهه تتغير كدا وتعمل مشاكل!
سوزان: صح الشرع حلل ليهو كدا واكيد م بكون قصدهم يعترضو علي حكمه ربنا....لكن بيني وبينك هي حاجهه صعبه
ريم: انا م شايفاها صعبهه وعاديه جدا
سوزان: م بشعر بالوجع الا صاحبو ...انتي عشان م مجربه الكلام دا...لكن الحقيقه لمن تريدي زوول شديد وتكوني معاهو فجأه يخليك ويعرس وحده تانيهه بتحسي زي كأنك فقدتي جزء من روحك....لانك خاتهه في راسك انو الزول دا ليك انتي وبس....وصدقيني حاجهه حاره تشاركي الزول البتحبيهو مع زول تاني💔..زي الاتسرق منك ...حتي لو معزتك في قلبو باقيهه وم اتغيرت لكن كونو وحده تانيهه تخش حياتو دي صعبهه والله ....دي اسمها الغيرره الزوجيهه انتي لسهه شافعهه لكن لمن تضوقيها ح تشوفيها كعبهه كيف ههههه
ريم: ايوااااا ...طلع عندنا احلام مستنغامي هنا والله...جبتي العمق دا كلووو من وين ي بت؟😂
سوزان: طيري عشان تلحقي محاضراتك ي بت
...............
ريم جهزت نفسها وطلعت عشان تلحق محاضراتها....ركبت المواصلات وكانت في زحمهه شديد ووقفو في استوب ساعهه...فجأه تلمح ابو جاسم رشاد وكانت معاهو مره وكأنو طالعين من محل مجوهرات او ملابس المهم طالعين من حتهه...وبضحكو مع بعض ورشاد خاتي يدو في كتف المره وهي تضحك...ريم استغربت من التصرفات دي وكانت بتفكر...قاطع تفكيرها صوت الكمساري الطلب منها القروش.....
دا شنو دا!!دي منو المره دي!!ياخ انتي كمان نضفي دواخلك وصفي النيه كدي احتمال دي اختو...طيب يعني لو اختو اكيد جاسم ح يجي يكلمني انو عماتو جو السودان ...اصلا عمو رشاد مستحيل يعمل حركهه م تمام!....
يتبع....