💕💕💕💕💕💕💕الفصل الرابع عشر💕💕💕💕💕💕💕💕💕💕
انهى ياسين محادثته الهاتفيه والتفت لحورية قائلا:عندى ليكى خبر حلو
حوريه: خبر ايه؟
ياسين:خالتك جت البيت وهى دلوقتي قاعده مع ماما
حوريه:بجد . طيب يلا بسرعه نروح لها
ياسين:طيب أهدى نخلص بس وهنروح هى هتقعد معاكى يومين واكيد هتبات معاكى اليومين دول فى اوضتك
حوريه بابتسامة ونظره لحنين الماضي :صح . تعرف انا نفسي انام فى حضنها زى زمان من لما بابا اخدنى وحرمنى اروح لها وانا منمتش فى حضنها . بس النهارده مش هسيبها لازم انام فى حضنها .
نظر لها ياسين نظرة حنان وفرحه لرؤيتها سعيده ومطمئنه
حوريه: بتبصلي كدا ليه؟
ياسين:ابدا اصل شكلها وحشاكى اوى
حوريه:طبعا. تعرف لما كان بييجى الشتا كنت دايما بروح انام جنبها واحط رجليا بين رجليها عشان ادفى اصل انا بسقع جدا ومش بدفى بسهوله حتى لو اتغطيت
ياسين:طيب ولما سيبتى خالتك كنتى بتعملى ايه في الشتا
حوريه:هتصدقنى لو قولتلك كنت بنام وافضل سقعانه جدا . بس كانت اوقات كتير داده امينه بتيجى وانا نايمه واصحى عليها الاقيها ماسكه رجليا وبدفيها بس طبعا كنت برفض واتخانقت معاها كذا مره بس هى كانت بتقولى أن ماما كانت زيي كدا وهى كانت بتعمل معاها كدا وكمان كانت تقولى انتى بنت بنتى لأنها كانت بتعتبر ماما بنتها وكانت دايما تاخدنى فى حضنها على ما انام
ياسين:شكلها طيبه جدا الداده امينه
حوريه :جدااا
ياسين بخبث:امممم طيب انتى النهارده بتقولى هتنامى فى حضن خالتك
حوريه:طبعا
ياسين بخبث :يابختها
خجلت حوريه ونظرت إلى الناحية الأخرى
ياسين مستغلا خجلها الذي يعشقه : طيب لما خالتك تمشي بعد الفرح بما اننا خلاص قربنا ندخل عالشتا هتنامى ازاى
حوريه:عادى زى ماكنت بنام عند بابا
ياسين:اه بس داده امينه مش هنا عشان تاخدك فى حضنها قبل ماتنامى
حوريه نظرت اليه بعيون دامعه ثم اخفضت رأسها أرضا فشعر ياسين بحزنها وعندما حاول التحدث مره اخرى فاجأته بردها قائله: عادى ماهى ماما هدى موجوده
ابتسم ياسين وشعر بسعاده لكلماتها وحبها لوالدته التى أخبرته أنها تحب حوريه وتتمنى احتضانها
ياسين بخبث مازحا:عادى انا برده فى الخدمه ثم غمز لها بطرف عينه
نكزته حوريه فى كتفه بخجل فانطلقت منه ضحكه رجوليه ثم اقترب منها وامسك بيدها
حوريه:استنى يامجنون انت هتعمل ايه حد يشوفك
ياسين:وايه المشكله مش مراتى ؟
حوريه: بالمناسبه انا شيفاك بقيت بتعمل حاجات غريبه واخدت عليا جدا تحت مسمى كلمة مراتى دى انت استغليت الظروف ولا ايه
ياسين بحزن وغضب :استغليت الظروف ؟ الكلمه دى بقت تتقال كتير بس لازم تعرفي انى مش استغلالى ولا عمرى هستغلك
حوريه:انت زعلت انا مقصدش بس انت يعني زودتها ثم تخبط جبهتها بيدها ايه اللى انا بقوله دا انا اقصد يعنى من لما كتبت الكتاب بتستعبط وبت... ثم اغمضت عينيها قائله بص بقا انا لما بتوتر بخبط وبنيل الدنيا
كان ياسين يقابلها بنظره استغراب من كلماتها وتوترها ليرد قائلا : خلاص يا حوريه انا مش هقرب منك تانى خالص وبعد كدا لازم يبقا بينى وبينك امتار واحنا بنتكلم
حوريه:ايوه طبعا لازم يبقى فى حدود انت ازاى بتقرب منى كدا وبتحضنى كمان وتبوسنى
ياسين:تفتكرى بعمل كدا معاكى ليه؟
حوريه :اكيد عشان....
ياسين بغضب : عشان بستغلك صح . قوليها ماانتى قولتيها قبل كدا .
يلا انا خارج ثم تركها وخرج من الغرفه لتبدل ملابسها
ولكنها تحدثت مع نفسها قائله:ايه اللى انا بعمله دا بس
وبعد وقت قليل خرجت له قائله:يلا بينا
ياسين: يلا عشان تشوفى لو فى حاجه تانيه
حوريه:لا مش جايبه حاجه انت مش شايف انت عامل ازاى وانا مش همشي معاك وانت كدا
ياسين: بغضب يعنى عيزانى اعملك ايه انتى مش عيزانى اقرب منك ومش عاجبك انى ابعد عنك.
حوريه:انت كمان بتزعقلي خلاص خليك بعيد عنى احسن
ياسين وهو يزفر بحنق:انا مش عارف انتى كل شويه بحاله معايا ليه وازاى كل دا ومش فاهمه
حوريه:انا مش جايبه حاجه يلا بينا
ياسين:يلا ثم ذهب بخطوات سريعة ثابته وهى خلفه فاصتدمت بفتيات يسيرن بجانبها فردت قائله:أسفه وهى مازالت تخطو خطوات سريعه
فهتفت إحدى الفتيات :مش تفتحى ياغبيه انتى
وقفت حوريه مكانها ثم التفتت لها قائله:انتى بتقولى لمين ياغبيه ؟
الفتاه:ليكى انتى طبعا ماشيه عاميه
حوريه:بت انتى بقولك ايه انا عفاريت الدنيا بتتنطط فى وشي احترمى نفسك واتكلى من هنا يلا
الفتاه:ايه دا انتى بيئه اوى
حوريه :يابنتى اقصرى الشر وخلى يومك يعدى احترمى نفسك يا قطه واتكلى يلا من قدامى بدل ماامسكك ارزع ديماغك فى الحيطه
الفتيات الأخريات:انتى مجنونه انتى بتتكلمى معها كدا ازاى ؟
حوريه:والمفروض اكلمها ازاى أن شاء الله .
تعالت أصواتهم ليقترب ياسين الذي كان يقف بعيدا يتابع ما يحدث فيتدخل قائلا :خلاص حصل خير .
فتهتف الفتاه قائله:ياسين ايه دا انا مش مصدقه نفسي ثم اقتربت منه تحتضنه وهو مازال واقفا متجمدا لا يبادلها سلامها
ثم ابتعدت عنه قليلا قائله بغرور :دا ياسين باشا الجبالى يابنات اللى كنت بتحكيلكم عنه مروه اكبر بيسنس مان فى البلد وبضحكه صفرا قائله ومطمع كل البنات طبعا بس هو سينجل ومش راضي يرتبط
ثم تنظر لحورية التى تقف تتابع مايحدث بغضب وقلبها تتغلغل به الغيره
الفتاه :انتى واقفه كدا ليه خلاص خلصنا روحى حصل خير زى ما ياسين قال يلا روحى شوفى انتى كنتى راحه فين
حوريه:ياسين قال حصل خير امممم . طيب يلا بينا يا ياسين ثم أمسكت بيده .
الفتاه تحاول فك تشابك يدهم قائله:يلا بينا يا ياسين على فين وبعدين انتى بتمسكى أيده انتى تعرفيه؟
حوريه :وسعى ايدك كدا وياريت متبقيش تلمسي اللى ميخصكيش
الفتاه: انتى تقصدى ايه؟
حوريه:جوزى اللى حضنتيه من شويه
الفتاه باستغراب ودهشه لتحدق بعينيها قائله :انتى تقصدى أن ..
حوريه:امممم أن ياسين باشا الجبالى يابنات اللى بتحكيلكم عليه مروه دا يبقى جوزى وانا مراته حبيبته وكل البنات اللى بيحاولوا يوقعوه فى شباكهم دول يدوروا على غيره عشان اللى تفكر تبص لجوز حوريه الجبالى تبقى لعبت فى عداد عمرها
الفتيات ينظرن لها باستغراب ثم ينظرون لتلك الفتاه
الفتاه موجهة حديثها لياسين :دا حقيقى ياياسين انت اتجوزت
حوريه:اه والله ياحبيبتى اتجوزنا اجيبلك القسيمه تتاكدى . وبعدين هى مروه اللى بتحكيلكم كل حاجه عن ياسين مقالتكوش على اخر الاخبار . تؤ تؤ غلطانه . بس كويس احنا فيها عقبالكم فرحنا الخميس .
ياسين: عن اذنك يا دينا يلا بينا ياحوريه
تحتضنه حوريه بذراعها قائله :يلا بينا يا قلب حوريه .
نظر لها ياسين باستغراب محدق عينيه بدهشه ثم ذهبا سويا إلى اتجاه السياره وكان ياسين يشعر فرحه لشعورها بالغيرة وحديثها عنه وتحذير الفتيات وامساك يده واحتضانه وأكثر ما أسعده عندما أخبرت الجميع بزواجهم ونسبت نفسها باسمه واسم عائلته
حوريه:مالك انت بتبصلي كدا ليه؟
ياسين:اصل انتى لما بتتحولى لقطه شرسه وبتخربشي بتعجبينى اوى دا انتى كلتيهم
حوريه:ما انا بقا هفضل اتخانق مع دبان وشى طول ماانا ماشيه بسبب حضرتك كل ما تشوف واحده تحضنك وتبوسك
ياسين:وانتى ايه اللى بيدايقك ؟
حوريه بقلق وتوتر :اا انا ابدا انا عشان شكلى بس قدام الناس ازاى ابقى مراتك وتفضل تحضن فيك قدامى
ياسين:عادى يعنى هى مكنتش تعرف انك مراتى
حوريه بقلق وتلعثم :هه انا اصل. يعنى هى اكيد هتعرف انى مراتك وبعدين هى مين البت اللى شايفه نفسها اوى دى ؟
ياسين:دى تبقى بنت خال محمد وياسمين وتبقى صاحبة مروه جدا تقدرى تقولى كدا هما الاتنين نسخه واحده
حوريه تهمهم بحديث مبهم تتحدث مع نفسها قائله :انا حظى مش بيوقعنى غير مع الأشكال دى هو ناقصه
ياسين:انتى بتقولى ايه؟
حوريه:هه . لا ابدا
ياسين:امممم .طيب يلا اركبي العربيه عشان نرجع البيت. ثم ركبوا السيارة متجهين إلى الفيلا
حوريه:ياسين كنت عايزه اقولك انى اسفه
ياسين:على ايه ؟
حوريه:يعنى انى اتكلمت معاك كده وقولتلك الكلام دا انا مقدره اللى انت عملته عشانى و...
قاطعها ياسين قائلا:ابدا مفيش حاجه انا عارف انى اتخطيت حدودى معاكى فى الاول والاخر انتى كده كده عايزه تطلقى منى لانى ماليش الحق انى اقرب منك
حاولت حوريه أن تنفى حديثه ولكنها خجلت وترددت وساد الصمت بينهم كانت تفكر فى حديثه وينقبض صدرها تريد الحديث معه ولكنها ترددت وهو أراد أن يخطفها بين أحضانه يعبر لها عن مدى حبه وتمسكه بها بالرغم من عدم تأكيده من حبها له وظل يفكر فى حديثها وتصرفها مع تلك الفتيات خصوصا دينا وظل يخفى ابتسامته كلما تذكر عنف حوريه
وبعد وقت قصير وصلت سيارة ياسين ال. الڤيلا لتخرج منها حوريه سريعا تجرى نحو الداخل تبحث عن خالتها منال لتجدها تجلس مع هدى تتحدث فجرت عليها حوريه واحتضنتها أمام الجميع
منال:حبيبتى وحشتينى أوى
حوريه:انتى كمان ياخالتو وحشتينى انا فرحانه اوى انك جيتى
ثم ابتسمت لهدى قائله :دى خالتو منال بعتبرها ماما هى اللى ربتنى ثم التفتت بنظرها الى منال قائله:ودى ماما هدى متختلفش عنك فى حاجه ياخالتو بحبها اوى وهى كمان بتحبنى ومدلعانى جدااا هههههه
هدى:انتى اللى طيبه يا حوريه وكمان رقيقه ولازم تدلعى
يهتف ياسين عند دخوله من الباب قائلا:جدااا رقيقه جدا بصراحه
كشرت حوريه بين حاجبيها لترد منال قائله :شكلك عملتى حاجه يا حوريه
حوريه:ابدا ياخالتو
منال:امال ياسين بيقول كدا ليه
دخل ياسين وألقى التحيه وسلم على منال وهتف قائلاً:بنتك مسكت اربع بنات كانت هتاكلهم
هدى :ليه اكيد فى سبب
حوريه:اه والله ياماما هى شتمتنى الاول بنت قليلة ادب ومش عندها حدود ثم انجرفت فى الحديث بدون شعور قائله :وكمان بتحضن الاستاذ وتبوسه
هدى :اممممم قولتيلى عشان كدا بقا
حوريه بقلق:هه لا ياماما متفهمنيش غلط
هدى :وهو انتى لما تغيرى على جوزك حبيبك فيها غلط
توترت حوريه ونظرت أرضا فهتفت هدى قائله : وبعدين ياياسين انت ازاى تسيبها تحضنك كدا قدام مراتك وتسيبها تشتم مراتك وتزعلها
ياسين:اسيب مين ياماما دى كلتهم هما عرفوا ينطقوا منها وهى نازله كلام انا معرفتش اتكلم منها
هدى :لا ياياسين برده . وبعدين هى مين دى اصلا اللى بتحضنك دى ؟
ياسين:دى دينا بنت خال محمد وياسمين
هدى : اممم دينا هى دينا تسيب محمد وتلف على ابنى هى مش كانت اتجوزت البت دى
لتنطق ساره :ماهى أطلقت ياماما
ياسمين:انا طول عمرى مش بحبها دينا بنت خالى ابدا ولاد خالى كلهم مملين مفيش غير عاصم بس هو اللى كويس
هدى :لا عاصم هو فى زيه المهم خلينا فى موضوعنا صالح مراتك يا ياسين
ياسين:هو انا كنت زعلتها عشان لصالحها
حوريه :ايوه زعلتنى
هدى :ايوه زعلتها هى زعلت مش انتى زعلانه
حوريه :اه زعلانه
هدى بخبث :تعالى خد مراتك فى حضنك وصالحها
حوريه:لا . لا انا خلاص مش زعلانه
ياسين بخبث:لا زعلانه. وانا لازم اصالحك انا عمرى مااقدر ارفض طلب لامى
جرت حوريه خلف منال التى كانت تضحك كثيرا ليذهب إليها ياسين سريعا يحتضنها ويحملها لتصدع ضحكات الجميع يصفقون ويطلقون صافورا فيذهب بها باتجاه الحديقه يجلسها على أحد المقاعد ويقترب منها
حوريه بقلق:انت هتعمل ايه؟
ياسين:مش انتى اللى قولتى انك زعلانه وطلبتى انى اصالحك ؟
حوريه:انا لا . انت مش قولت انك مش عايز تقرب منى تانى
ياسين:انا قولت انى مش هقرب ؟
حوريه:ايوه
ياسين:لا انتى اللى مش عيزانى اقرب
حوريه:وانت ؟
ياسين:انا . انا
اقترب منها كثيرا ليلتقط شفتيها فى قبله ناعمه
حوريه وهى لاتحتمل الحديث من شدة توترها ودقات قلبها المتسارعه :ياسين
نظر ياسين بعينيها مجيبا :هممم
حوريه: ايه رايك فيا؟
ياسين:كان القمر نزل وقعد جنبي
حوريه:بجد يعنى اتحب
ياسين:الحب دا قليل عليكى والعشق دا اقل حاجه تتقدملك
حوريه:اول مره اسمع كلام عنى ويدخل قلبي اوى كده
ياسين;بس انتى بتسالى ليه ؟
حوريه:يعنى تفتكر لما انت تطلقنى حد هيرضي يتجوزنى
ابتعد ياسين عنها سريعا ينظر لها بغضب :هو دا اللى انتى بتفكرى فيه فرحنا بعد يومين وبتفكرى فى الطلاق والجواز من غيرى
عموما يا حوريه هتلاقى كتير بس الفكره مش فانك تلاقى وأنه هو يحبك الفكره انك تحبيه وتكونى سعيده معاه
حوريه:طيب وانت
ياسين:انا ايه؟
حوريه:لما نطلق هتتجوز مين ؟
ياسين :مفكرتش فى حد طول ماانتى معايا ولا حتى فكرت فى حد قبلك
حوريه:انا يعنى كنت عايزه اقولك
ياسين:عايزه تقولى ايه يا حوريه قولى
حوريه:كنت عايزه اقولك أن انا هو يعنى. انت هتسيبنى لغيرك ؟
ياسين:انتى عايزه ايه ؟
حوريه:عايزه افضل عايشه هنا فى البيت دا مع ماما هدى وساره والاء وياسمين
ياسين: مش فاهم
حوريه بابتسامة رقيقه:يوم الخميس هقولك
ياسين بسعاده انسته كل ما فعلته وقالته:طيب براحتك اللى تشوفيه
همت حوريه بالوقوف فوقف ياسين هو الآخر فاقتربت منه لتقبله فى وجنته قائله بهمس :تصبح على خير
ابتسم ياسين واقترب منها ليبادلها بقبله من شفتيها قائلا :انا متوقع جدا أن يوم الخميس دا هيكون اجمل يوم في عمري
حوريه:هيكون اجمل يوم فى عمرنا ثم ابتسمت له وذهبت سريعا تتركه فى سعاده وفرحه يتذكر كل ما حدث بينهم
فى إحدى الكافيهات تجلس مروه مع دينا
مروه :بقا هى قالتلك كدا؟
دينا:ايوه دى بنت شكلها مش سهله .وضاع عليكى ياسو يا ريرى حب العمر بنك المدخرات اللى كنتى سيباه للزمن تحبي وتكلمى وتعملى اللى نفسك فيه وفى الاخر عايزه اتجوز ياسين
بس اهو راح
مروه:هو مين دا اللى راح وحياتك انتى هرجعه وهيطلقها والجوازه دى ماهدوم متنسيش اننا الماضي واول حب
دينا :ومتنسيش برده ان هى الحاضر و البت حلوه ومش اى حلاوه
مروه:طيب اسكت بقا
دينا:دى بتقول فرحهم الخميس
مروه:ايوه ياستى وجايب لها مصمم يعملها الفستان بس ابقى قابلينى لو لبسته لازم ابوظه وأبقى اشوف هتلبس ايه
دينا:هتعملى ايه ؟
مروه : بعدين تعرفى بس لازم ابوظهالهم ومش ههنيها بيه
دينا:جدعه مطلعتيش خيبه زيي وسييت محمد ابن خالى لالاء
مروه:انتى اللى هبله فعلا بس انا مش زيك ياماما دا انا مروه
فى غرفة هدى تجلس مع منال يتحدثون
منال:انا مش مصدقه اللى شفته دا الاتنين شكلهم بيحبوا بعض وحوريه شكلها غيرانه عليه
كويس اننا خبينا عليهم انك عارفه كل حاجه بس انا خايفه يكون ياسين مشدود لها كد اليومين دول ولما يعرف انك عارفه كل حاجه يسيبها
هدى: بالعكس ياسين مستحيل يسيبها
منال:بجد عرفتى ازاى
هدى:هو اللى قالى ياسين عرف كل حاجه انا حكيتله وهو مكنش مصدق ووعدنى انه مش هيسيبها وهيفضل معاها وأنه لازم يخليها هى اللى تطلب منه دا
منال:بجد الحمد لله متعرفيش انا كدا مرتاحه قد ايه
هدى:قوليلى سلمى بنتك عامله ايه ؟
منال:كويسه الحمد لله كانوا ناويين يسافروا برا مصر بس قعدوا عشان الفرح وهييجوا أن شاء الله يوم الفرح أن شاء الله
هدى :ربنا يهدى سرهم يارب سليم جدع وابن حلال
منال:آمين يارب . بس قوليلى امال فين الاء مش باينه
هدى:الاء فى اوضتها بتكره تنزل هنا من كلام ام محمد اللى كل شويه تسمعهولها ولو منزلتش الاء هى بتتحجج وتطلعلها
منال:ياسلام وانتى سكتالها ليه؟
هدى:يعنى هعملها ايه طالما محمد بيحب الاء وكويس معاها خلاص وهو بيرد ويجيب حق مراته من غير مشاكل يبقى انا مالوش لزوم اعمل مشكلة وهو اللى هيتظلم فيها دى برده مهما كانت أمه وهيزعل علشانها
منال:عندك حق طول عمرك عقلك كبير ياهدى
بس ياهدى انا قلقانه من عامر ومراته وخايفه يبوظوا الفرح ولا يعملوا حاجه اكيد زينات دلوقتي بتاكل فى نفسها ومش هتسكت
هدى: متقلقيش مش هيقدروا يعملوا حاجه ياسين مامن كل حاجه
منال:ربنا يبارك له ويحميه يارب
فى فيلا عامر البرهامى
يجلس عامر فى غرفة مكتبه يراجع بعض الاوراق وهو يوفر بضيق
لتدخل عليه زينات قائله:مالك ياعامر ؟
عامر:انا مش عارف ايه اللى بيحصل معايا دا. الشركه بتقع والديون بتكتر وبعدين هى ايه شركة z&Tاللى روحتى خدتى منهم تمويل المخازن واندينا ليهم ب6مليون دول
سلمى جابلى الملف النهارده انتى من امتى بتتصرفي من غير علمى
زينات بقلق:يعنى انا غلطانه انى بنقذ الشركه قبل ما تخسر العملا بتوعها؟
عامر :والديون هعمل فيها ايه ؟
زينات :هنبيع وهنسدد ياحبيبي أن شاء الله
عامر:ازاى بس وانا حاسس ان فى حد بيبوظلى الاتفاقيات كلها اللى بعملها وبيلغيها زمش عارف مين بس اه لو يقع فى ايدى كنت فرمته
ابتلعت زينات ريقها من الخوف والقلق
ثم تهربت من الحديث قائله:ياسين الجبالى بعتلك دعوه للفرح يوم الخميس بيتعامل كانك غريب وبيدعيك زى اى حد
عامر :يتعامل زى ما يتعامل ياسين دا هو القشايه اللى هتنجدنى وانا لازم اروح لحوريه واتقن دور الأب الحنين عليها لحد ماتخليه يعملى اللى انا عايزه
زينات بمكر:دا هو مش قشايه دا جبل هو اللى هيرفعك فوق بس لو انت قدرت تقنع بنتك وترسم عليها دور الندم
عامر:هيحصل
زينات تحدث نفسها بصوت لم يسمعه غيرها وعينيها يخرج منهما فحيح الحقد والكراهية:تتعلق بيه ياحبيبي ولا منه بس طول ما انا وراك شركتك هتفضل واقعه وهاخد منها واحط فى شركتى . مع تامر وحوريه دى انا مش هسيبها بس اخلص منها وبعدين اخلص منك