الزنبقة السوداء

الحلقة 56

اشوية وانشر بعد بارت

شكراً لكل من سأل عني  سوا بالخاص
او بالتعليقات شكراً اصدقائي  الحمد لله حالياً
احسن بس لحد هسه ماتعديت الوعكة  الصحية
حاولت اضغط على روحي واختمها الكم اعرف صارت مُملى بس والله  شسوي موبيدي    المرض اخذ حيلي 💔

داليا _ المسلم
الزنبقة السوداء
حلقة _56_

قيصر

بوية اشون كاعدين هنا الوضع كلش موزين  وهاي
البزل كامو الي يكتلو يذبو بيها انه شفت الكم عرصة
يمنه  بيعو هذا البيت وهناك اشترو  بعد مالكم ضلة
هنا

ثائر
- هاي هيه عمي  من باجر اعرض البيت  للبيع
بس كون ايجيب سعر

- ايجيب ايجيب شدكولين أم ثائر

- والله حجي  شيودينا هناك كاعدين هنا ومستقرين

- كام ابوي  ونفض عِباته
انه ماشي وانتَ بوية ثائر اعرض بيتك للبيع

- خله وطلع   وثائر راح وياه ايشوف العرصة واستلمتني عَمتي

- كله من وراج  انتِ ساس البلا انتِ تروحين
هناك يم اهلج وكلتي لاابوج  وقنعتي انه شيوديني
هنك يمهم واكابل جهركم واكعد اريد اطبن اطلع
كل احجاية وابوج دز علية لاتطلع لا اطب

- وانه شلي دخل  لا رايحة و لا كايلة الهم وانتن
شعدجن تفترن.

- مآسي  انتي علينا وحك الله من شفناج ما شفنا الخير  ولا لفانة

- التفتت الها.  وضحكت من كل كلبي
ليش عيني ياخير الماشفتي لازم
جنتي  معبيته بكواني  وانه  طيرته  والله يالله
هزيت ايدي  من شفتكم وانتو فكورر بس همستها همس  عفتها   وشلت  ابني  ودخلت  لغرفتي

بليل من اجه ثائر راح لاامه  وترست راسه
طب عليه

- اشبيج وياه أمي آماسي ليش معيطة عليها

- ذبيت  مهيمن بكاروكة  وكمت  وين انه معيطة وين
مادكلي انتَ ليش اصدك بيهن ودوم  عليه
ليش ماتسمع مني ليش ما اشوف الحق من الباطل بعينك

- اسكتي اسكتي  عيب مرة جبيرة باريها
شوفيني بيها  مو تذليها وتعيطين عليها هل المرة
سكتت مرة الثانية ماتعرفين شسوي

- شتريد اسوي سوي ثائر انه ماغلطانه
عفته ونمت

ضل الايام كلها زعلان عليه. عادي صارت عندي
شكد  داريته شكد اهتميت بيه هو  صخرة من
ثلج كلشي مايصير بعينه

كملت شهري وهمات جبت ولد سما  ثائر 
همام  وصارو مسؤليتين. ودوامي نقلته للروضة
ورجعت عاملة تنضيف  واخذهم اثنينهم  وياي
وارجع مشي   بعد و لادتي بهمام انباع البيت

٢٠ مليون  عشره اخذنا العرصة بيها. وعشرة
ابوي كال انطوها للمقاول يبنيها. وصدك  خذها
المقاول وانه لميت غراضي ورحت يم اهلي
همات رجعت للبراني كعدت   اثنين جهال
سبحان الله همات صادف شته  والحمام برا بعيد
اشوية عن البراني. وعمتي بس تونون كلت كلبي
ثائر يرجع من الدوام كبل للبيت انزيد نكمل بساع

شهر والمقاول  صعد للبتلو  او وكف 
سالت ثائر ليش

- ايريد فلوس بعد منين اجيب اله

- صفنت عليه وخذيت نفس بقهر اخذ الغرفة وبيعها
وانه سويت سلفة براتبي  كالت  البنية انطيها الج
ثاني اسم   كمت فتحت الكنتور وطلعت عليه
الذهب مالتي. بيها اربع ابتوت من ابوي
وكلادة مال عرسي وكردانة امي خذتها الي
ومحابس اثنين وتراجي زوجين هااك  اخذه بيعة

ثاني يوم خذا باعة  واستلمت السلفة  وباع الغرفة
جمعهن وخذاهن اله   وكملنا البيت بالف ياعلي

٣ اشهر ضكت المر صح بيت اهلي بس متقيدة كلش
مااخذت راحتي طبعاً  بهاي الاشهر كلها
سِميه تجي ساعة وتروح تخاف من ابوي ماتبقى

كمل لبيت ورحت انضفة حتى نحول الغراض
دخلت  وثائر وراية وخواتي ويايه اجن
اعاين  لاكاشي لا صبغ لا بيتونة لا ماي  لا كهرباء 

- شنو ثائر چا هذا شباني  مادكلي بس وكفنا
الطابوكات وبس  شال الكرك ويلم الوصخ

- شسويلة  آماسي ماشوفين كليوم وكال  بعد ماخلص  شسويلة انه اداينت من صديقي وراح اسوي الماي  والكهرباء   سكتت وكنبصت بنص

الغرفة  وخليت ايدي على راسي. شناكل
شنطي للجهال   منين انجيب انوب سويت سلفة
بفلوسي الراتب مالتي 

دنيا وكفت على راسي
- كومي كومي  آماسي كولي يالله  احنا كلنا مانعوفج   من مصرفي  انه اتكفل حليب وحفاضات
الجهال مالج شغل كومي

حولنا غراضنا  وخلينا جينكو  او بواري
للبيتونة وفرشنا الكاع لا يلون ورتبت البيت هدومي بسلات خليتهن  ورتبت وضعي انتقلنا بيه مايبعد
عن اهلي غير كم بيت   الصبح جهالي اذبهم يم
اهلي واروح للدوام   النا اسبوع  كاعدين   

طبتنا سِمية ادك وتلطم

اتلكينها. هي وجهالها عمتي كالتلها اكعدي شمالج

- يمة رجلي راح يطلكني

ثائر
- ليش سويتي  من مصيبة

- ماسويت  و جلب ويستاهل الصار بيه

- غير نعرف  شصاير

-  قبل شهر نزلت اجيبلة غده  وصعدت باب الغرفة مفتوح مالتنه  اشوية واسمعة يحجي ويه بنية ويكللها
انه اخبج وسوالف مزوجين وتواعد وياها 
ياخذها ثاني يوم بليل ريشرد لان هو خاطبها من اهلها ومانطوها اله. لان مزوج 

انه من سمعت شاطت روحي خذيت  بليل خذيت رقم صديقة هذا خوش ولد خابرته ونخيته يروح لااهلها
ويكلهم راح بتهم تشرد وياه رجلي

عاط بيها ثائر
- لا يالله ادري رين عقلج من سويتي هجي

- راح الولد وخبرهم  كاضين بتهم وصالخينها صلخ
وحتى ومكسرين رجليها ومكرميها 

وثاني يوم اجو دكونا. وصار فصل وكعدا وفصلونا
بفلوس ونسدت السالفة. ليش مو راح لصديقة
وكض عليه المسدس وجابا للبيت وضل يتهدد عليه
يكتله وكتلة كسرا تكسر. تالي صديقة وشه بيه

وهو طرد الولد وكضاني ماخله مكان بيه صاحي
كسرني تكسر وطردني كالي  ورقتج تجي وراج

كامت تسب وتغلط عَمتي بيه
- انعل ابو لابو. اكعدي هنا واسكتي ولا تروحين ولا توصلين اله خلي يولي الخايس

- انطينا مجال يمة ترى هيه  همات غلطانة اشون
تخابر صديجة ودكله. مو عيب  ليش ماحجت وياه
رجلها  او واجهته. على العموم صلي هنا والبيت بيتج
وشوف اشون اصير

- وضلت يمنه  سميه غير تحترم روحها وتكعد
لا  كل ماروح للدوام وارجع اسمعها تحجي وياه
عمتي

- ماتكعد بالبيت  بيتها اولى بيها تشتغل بيه
وتربيه جهالها

- طبيت عليها شايطة مالج شغل انتِ فهمتي لهنا
وتحترمين روحج انه ما ذابة جهالي عليج
انتِ حيري  بجهالج  انطيهم تربيه وصخين جسرين
ابدال ماحايرة اسوين مشاكل

عاطت عمتي عليه وتخربطت وضلت ادك وتلطم
بتي ماترديها بتي مظلومة مهيونة محد الها

اجه ثائر وصارت عركة شكبرها كمشني
وضربني  ثائر اخذني سحل من شعري
لغرفتي  بس انه ماسكتت كمت شلت جهالي ولبست عِباتي وردت اطلع   كضاني  ثائر وحضني

لا اطلعين  اكعدي  آماسي  شوفي  الجهال  اشون
يبجون الف مرة  كلت الج مالج شغل بيها

- اي مالي شغل حتى كعدا ماكعد وياها  كل ماطب واطلع  الكاها تحش براس عَمتي عليه شعدها تشتغل شعدها تفتر هيه شلها دخل ليش انه  وين مودية
راتبي كلي

- خلاص آماسي مالج شغل بيها اكعدي ولا اطلعين
عيب الناس شدكول  تطرد بحماتها  وماتريدها

- ذبيت عِباتي وخليت جهالي وكعدت. طلعت
سويت اكل الي  ولـ ثائر ولو هو ياكل ويه امه واخته

ثاني يوم واسمهعا تخابر مرت حماتها. لان هيه
عدها تيلفون مشتريلها رجلها  وجان اسمعها تعيط
امه دكلها شكو ولج اشبيج

- يمة رجلي انسجن صديقة  الكتلة مشتمي عليه عرد هو خاطفة ذابة بتهمة اربعة ارهاب  وانسجن يايمة
راح رجلي

- ضخام الضماج راح الرجال شسويتي ولج شيطلعة بعد راحح

- انه  عفتهن يدكن ويلطمن خذيت جهالي ورحت لبيت اهلي وديتهم يم أمي  وكتلها على رحل سِميه

وطلعت  لدوامي  ثائر جان بايت هناك خفر
من وصلت سولفتله خذا اجازة  زمنية وراح 
كملت دوامي ورجعت لكيت خالتي بيداء  ابيت اهلي
جاية عليه لان كاعدا ابيت عود   جايبة الي فضل
سلمت عليها والجهال بحضنها  مكعدتهم

- اشونج خاله حبوبة اشونها

- كلنا زينين الحمدلله  ولج شنهاي مصيبة حماتج
ردت اروح بس امج مارضت  المعزاية اشون هيج
دهرت زلمتها هل الدهيرة فلك الفلكها مو نسوان مصيبة
الله وطاحت علينا

- خلها تولي من السانها كليوم مشكلة عيالها صايحين الظيم منها  انوب سجنت رجلها خلها اتخم براحتها لا صداد ولا رداد خو ثائر مايكللها على عينج حاجب وراح تكعد  على كلبي

- اكلج مالج شغل بيها البارحة خالتج غيداء دكول
فاتحين دورة  بالحلة اربع اشهر وينطوج شهادة معلمة
ليش ماتروحين

- خاله شفايتلي واخلص من هاي شغل العاملة
تعبت وعلي ينهد حيلي بس جهالي اشون  يرادلي
مصرف 

- مالج شغل كل ماصاريفج انه وخالتج غيداء نتكفلج
كل مصاريفج وجهالج خليهم هنا عد امج
ها امونة تقبلين

- يااا چاا اشون اخليهم بعيوني بس كون آموسه
ترتاح اي والله يمة احسلج وافلوس السلفة انه اشيلها
منج لا اشيلين هم

- وصدك الله سهلي  وقنعت ثائر الي حاير بمصيبة اخته. ما كال شيء كالي روحي لميت هدومي وغراضي ورحت للحلة عد بيت عمتي   فوزية
الي استقبلتني  عادي ماكشت بوجهي

ذبيت كل ثقلي على الدراسة كل شهر يجي ثائر ايجيب الجهال اشوفهم  وياه وخالتي بيداء اجيبلي مصرف  والحمد لله كملت اربع اشهر  الي كل ليله ياخذني الحنين لجهالي اشبع بجي  وانام

ذبيت كل حملي للدراسة وطلعت اولى على الدورة مالتي  الحمدلله ونجحت خابرت ثائر من الارضي
لان ماعندي تيلفون 

واجه خذاني.  وصلنا لبيت اهلي اخذ الجهال
طبينا الفرع كراسي منصوبة وهوسه  عرس

- ثائر عرس منو هذا

- عابر ابن بيت سيد ابراهيم
- حسيته ضربني بخنجر بنص كلبي  من كال اسمه
كضيت ايده ودخلنا  لبيت اهلي وعيني على بابهم
الله يهني ويسعدا  شكد دعيت الله يطلع من بالي وعقلي  بس مو بيدي. حبه مدفون بداخلي
جوات كلبي وكله من ورى ثائر الي ماحتواني
ولاهتملي  يمكن بس اول ايام زواجي وبعدها
صار هو والماكو سوه.

- طبيت سلمت على اهلي لكيت ابوي. شكد اتمنيت
بذيج اللحظة اقتص منك يا قيصر ياظالم  عمرك
مانصفتني لو كل اهتمامك هسه مايغير
جرح كلبي الي خليته اثر بيه سلمت عليهم وخذيت جهالي  ورجعت للبيت اول مافتحت الباب
جتني جيفة وريحة خيسة. دخيل الله. اشون
تكدرن تعيشن بنص الحاوية البيت مكلوب وصخ
قذر حال الظيم حاله  وجهالها يتنطون جنهم قرودة
حسيت كل طاقة ماعندي   انداريت اله

- شنو اختك هنا بعدها  مارجعت  لبيتها
- اي هنا   رجعها عمي  ضلت شهرين وتعاركت ويه
حمها وطردوها

- خوش انت البيت مافوته رجعني لبيت اهلي
مالي طاقة اخدم  واعارك احد  هو سكت كالي

- روحي ماكاضج انه

- خوش ثائر خذيت جهالي بعدني واكفة بالباب
طلعت رجعت لبيت اهلي. طبيت والدمعة بعيني
بعدهم اهلي على كعدتهم

شكو وشكو  وشبيج  ابوي كال

- خير آماسي بوية شجاج

- ماجاني بوية انه رجعة مارجع لـ ثائر ولا اريد
ارجع للبيت الي بيه سِميه كافي ضوكني المر
وانوب راح تكابلني العمر كله مارجع سويلي حل
مو انتَ تكفلتهم.

- انه مامتعاجز منج ولا جهالج اكعدي واسكتي
هنا البيت كله الج  وخله يولي هو واخته

كعدت   ورجعت اداوم   بالروضة
كل تعبي. راح  مالت الدورى يكلولي مامعترف بيها
كمت اجمع راتبي  لا امي ماتخليني اصرف للجهال فلس واحد كله ابوي يجيبلهم كلشي 
ابوي حيل تعلق بهمام حتى ينام بحضنه وين مايطلع هو وياه ياخذا

يوم ورى  يوم
واسبوع  يجر اسبوع ثائر من باب البيت  مالت اهلي ماعبر ولا سأل على جهاله ولا كال  ماتو تمرضو

اتلث اشهر ماكو هو  بيوم اجتي علينا ام ابراهيم
كعدت وضلت اسولف على مرت عابر جايفة موشي
متعبته بس هو مباريها وساكت
سالتني وانتي اضلين زعلانة

- بيبي انه رجعة مارجعلة تعبت من امه واخته
كعدا وياهن ماكعد ابد

- چاا اشون انتِ ساكته وهو ساكت اضلون هجي
لا مايصير  انتِ شتردين  اخته مالها مكان غيركم
عيالها ذبوها كالولها انتِ سبب سجن ابنا وطردوها

- اي خله يقسم البيت. الهن المطبخ وغرفة عَمتي
وانه الهول وغرفتي وخله يجفني شرهن ماكدر
بيبي ماكدر اكعد رياهن ماينجرعن حياية  كل ساعة
لادغاتني وهو ابن امه كله يدافع الهن مالللىت
روووحي والله مرات تجي ابالي احرك روحي من يعاركني لو هو دومه من جهتي متخذ الوضع
الصامت

- خلاص  انه انتظر ابوج يجي ونحجي رياه انه
وامج  يدز  عليه  ويكلة شرطج

وصدك ضلت يمنه لما اجه ابوي واخوتي
وكالتهم على اقتراحي ابوي دز على ثائر وكاله
طلكها. ماتفيدك هيه وجهالها 

- ثائر لا عمي انه ماطلك بس آماسي ماتريد اختي
وين اوديها لا عيالها تريدها لا هيه تريدها اذبها
بالشارع

- لا موذبها بس تجي تسال عمل مرتك جهالك
شوف شروطها الي يريد بيته يعمر ياثائر
مايسوي سوايتك  ليش تسكت  بوية
انه لليوم ماشوفك غير حالك حال الولد الله شاهد
بكد ما احب ولدي احبك ودوم اشوف بيك اخوي احمد الله يرحمه ومن شلت آماسي وانطيتها الك كلت وليدنا
ويصونها وانه ادري بامك واختك حياية وتغاضيت عنهن وسكت شوفنها الظيم  ولا شافت راحة وسكتت

كلت لو تديت عليهن شدكول الوادم عليه چا
يتيمات والهن احد وحجي قيصر يتهدد عليهن
رسكتت وعفتهن يدوسن فوك راسها

جا برية غير انتَ بالمقابل تعدل ادير بالك عليها
كلي قصرت  وياك هيه بشيء فد يوم

- لا عمي لليوم  ماشفت منها قصور

- خوش چاا شنهي عيبها وتتركها هجي
على العموم الحجي مابي كل فايده  اسمعني
تريدها ترجع   تكض  بيتك  وتقسمه  المطبخ وغرفة امك الهن والباقي الها ادكول. لا خلاص بوية طلك
وخلها تولي. بس تنسى عدك ولد ولاتجي ولاتسال
عليهم بعد ابد  وتوقع تنازل بيهم وكلماً يروح بطريقة

حجة عمي ياسر
- لا ابو ضرار مو هجي الحجي لا خوية ثاير همات
ابنه وحتى لو هو غلط الله يعينه عليه ضغط  الي تريده يصير  هو همات ايريد مرته وجهاله

- خلاص عمي التريدة ايصير اقسم البيت وامري
لله

- اسبوع واجه اخذني ثائر للبيت طبيت قاسمه
والهول يصفر طبيت للغرفة لا فراش لا سلات الهدوم
مكومات بالكاع  انداريت اله سكت

ترى كل الغراض انه اشتريتهن ثائر من راتبي والخمسين الي ابوي ينطيهن الي ليش هيجي كانسات البيت ليش 

- انه اخذلج شتريدن

- ضحكت منين تاخذلي.  رحت لميت حصيرة تعبانه
فرشتها ونومت جهالي. ونمت هو نام ليغاد. من عندي
نمت  وبعالم الرؤيا

جاي امشي وطريقي كله جكيك مدري اشواك
التفت منا ثائر ومنا ابوي ومنا امي واهلي
وعمتي  وسِميه يمشن  كدامي  بس عكس مشيتي يعني وجهن عليه ويرجعن ليورى  رفعن ايدهن ونزلنها
وجان اشوف خفاش  بس جنه وحش اجه ولزك بضهر
وملخة اتملخ ردت اخلص  روحي منه ماكدرت
وخله اضافره نبتهن بضهري  من الوجع
عطتتتت وفزيت من النوم. بس شنو الوجع
احسه بعده بضهري ضليت اتلفت. والخوفة بكلبي

عاينت ثائر نايم  على ضهره
. كمت ورحت. 
فتحت ايده هو فز ضل يعاين عليه  مددت بصفه
وخليت وجهي بصدرة وانه الخوفة بيه. همس باذاني

- اشبيج آماسي 
- همست خايفة احضني ثائر  هو ضمني بحضنه
حيل  وضل يبوس بيه حسيته صدك مشتاق الي
بس شيء بداخلي ميت من ناحيته  استسلمت اله
ونطيته حقة

——،،،—،،،،،،——-،،،،—-

ثاني يوم  اجت  أمي  وشافت حالي وتروح واجيب
صينية ريوك اليه وافراش لجهالي  وطباخ زغير ودبة غاز 

كالتلي
- اكلج اكو وحده تريد اسافر وعدها غراض
انروح انشوفهن واخذي منها  التردي

- يمة  خاف غاليات  
- مالج شغل انه انطيج لو عزتي   هنا كلهن رخيصات  لان مستعملات امشي ماطول اليوم عطلة خلي جهالج يم رجلج

- صدك لبست عباتي ورحت وياه أمي  وصلنا لبيت
المرية  شفت غراضها خذيت منها. كامنتر   وطباخ  جبير  وكم بطانية جدد  وقنفات اثنين ورجعنا للبيت

كل شهر كم اخذ حاجة للبيت رتبته وعدلته
كل الي يطبلي يتعجب رغم مابسيط  ثائر
يتغزه ويندار يمهن مايجيني بس وكت النومة

رحت اغسل لـ مهيمن حبيبي صار عمره
٣ سنوات  وهمام سنتين

نزعته ملابسة ودخلته للحمام خلص وجاي اغسلة
من مديت ايدي انصدمت من الشي الي اتلمسته

وللحكاية بقية .............