الزنبقة السوداء

الحلقة 55

داليا المسلم
الزنبقة السوداء
حلقة _55_

كضيت وقت الدوام. صاحتني الفراشة
جاي ايوزعون  بسكت مساعدات. رحت وياها
استلمت. اعاين عليه يابس  جنه احجارة. لميته
وخليته بالجنطة  يالله احسن من ماكو.

مثل كليوم خلص الدوام بين تعب وركض ورى
الجهال  رجعنا مشي وصلت للبيت وهمات تحزمت
شغل  لكيتها  عَمتي مسوكة لبتها. ومسويات اكل. ضليت اعاين عليهن  الجداري فارغة والاماعين مكوامات

ومامخليات النا غده. انه ميته جوع ولا ريوك
اندك الباب طلع ثائر فتحها ودخل ورا أمي
وعمار شايل جداري  اكل

اتلكيت أمي ودخلتها لغرفتي لان هنه طابكات
بابهن كعدت

- اشونج حبيبتي بطنج اشونها

- الحمدلله زينة. البنات اشونهن

- كلهم زينين. هاي جبتلج غده البارحة ابوج سوه
عِزيمة وشلت حصتج  اليوم فرغو اخوتج  وجابانا
عدي  اشوية ويرجعلي  هاج هذا ابوج دزاها الج

- خذت ايدي وخلت  بيها افلوس  يمة  ماريد 
عندي خير من الله

- لا اخذيهن ابوج شابع قهر عليج ايكول شتريد
خله ادكول  كل حجية  وكال انه كسرت ركبتها  وذنبها
بركبتي

- يمة ماحتاجة  مشكورين وانه زينه والله
اكلج باجي حسنه اشونها

- زينة رفعور رحمها. وعمليتها انتفتحت ورجعت
سووالها عملية ثانية

- اكلج هيه صدك طارحة

- لا جذب  وينه  ابوج بنجر  من زمان ضلت تضحك
السكر  ماخلى  بيه شيء  لاحامل ولا هم يحزنون هيه  وكاعدا   وكايمة تنزف جنتها كالتلي
بس مدري شجرالهن ويكولن هجي. مايستحن  والله
ولميعة اتعد واصف على ابوج بتي ماتت وبتي راحت
والهم كتلها وانتَ مو بحالها

- الله يشافيها  وشدعوه عليها لميعة ماتستحي  ليش
الهم كاتلها شو شغل ابوي كله بيدهم القاصة بيد
ضاهر بعد شيردون  ماله وحلاله كله عدهم

- يردون البيت الكاعدين احنا بيه. ايكلوله شمعنى مكعدهم. ابيت شكبرة شكده واحنا بيتنا ١٥٠ متر
وابوج كلما يتعارك وياي يكلي حرامات بيج البيت يجي يوم واطلعج منه

- الله كريم يمة  شسوين ماخذتي طبعة

- لا خذت طبعة والله  صاير لو يحجي كل الحجي
مااجاوبة ابد مليت منه اكله روح لهناك  ليم حسنه
بيتك ومرتك مايرضى يكلي مااعرف. ابات بغير مكاني والحجي على راسي 
يالله انه اكوم اروحن هم يالله   اجه اخوج صوت الهورن مال سيارته.  سلمينه على عَمتج  وحماتج

- يوصل الله وياج
سلمت عليهم وراحو  الايام تمشي بساع على الناس
بس انه تمشي بعوز وقهر رحت للدكتورة وطلع
عندي فقر دم وصل دمي  لل٥ كمت ادوخ ورجلية
تخدر  مرات بليل اطكني الجوع اكوم اطلع
البسكت  الي جبته من الروضة 
وانكعة  بماي  واكله  امي جابتلي
دبس  ادكلي اشربي شرب

عمتي كالت لثائر

_ اخذني استلم الراتب مالتي
- خليها باجر يمة

- لا اليوم اريد  اروح  البيت  اختك  مالها خلك

- وصدك.  راحت  استلمت راتبها واجت ما مخلية
ما مسوكة لبتها  ومن الصبح طلعت الها انه
كلت اتريك خبزة  ودبس اجيت ادور على القوطية
ماكو من رجعت من الدوام لكيتها راجعة 
سألتها

- عمة ماشفتي قوطية الدبس

- اي خذيتها لبتي 
- ليش عمة غير مالتي اكل منها

- يالله يمة چا هيه هل الوحده اخيت زلمتج حسبالي
انتي اتلفين ودزيلها  هسه انه شماخذتلها

- ادزلها  من يصير عندي تدلل  بس انتِ غير همات تعينين ابنج

- عاطت وضلت تلطم انه ماعين ابني انه موزينة
انه موخوش مرية  بعت بيتي  وجيت لخاطركم
بلهيمة  وساكتة وانه موخوش ادري بروحي

- عفتها تحجي وتدعي ورحت لغرفتي اريدها
بس تسكت ماكو 

—-،،،——،،،——،،،،——-

- وصلت  للثامن. امي قنعت ثائر واجت اخذتني يمها

- كلشي يصير عمة هيه عدها فقر دم حاد  وعلى ساعة تولد وين تاخذها  بليل  ولاعندك سيارة
ولا شيء هوا عمك واخوتك كلهم عدهم سيارات

- قبل ثائر ولميت عراضي ورحت ضلت أمي
اداري بيه  وتشوي  تكة ومعلاك واسويلي شربت برتقال  ابوي ايطب ويطلع يسأل عليه
مرات اشوف بعيونة وتضرته  الندم بس بعديش بعد شنو

كمت اضرب ابر الحديد بس كون دمي يرتفع
وماكو
اكلت شهري  وماكو طلوكة خابرت خالتي
بيداء كالت خلها تجي هنا يمنه  خوش دكتورة
وصدك  اخذلي  اجازة  ثائر مال ولادة  من الروضة
أمي وابوي خذوني  للديوانية. ورحت 

بوجهنا للدكتورة. شفت ابوي حط افلوس بيد
أمي وكاللها انه اروح من اجيب اجي عليجن
خله وراح. الدكتورة. كالت

- اضربج  ابر يالله اصير عندج اطلوكة.  كبل للمستشفى

- يعني شنو دكتورة ولادة عندي

- لا ماما ماعندج ولادة بس اسويلج ولادة  اصطناعية
لان انتي من النوع الي مايصير عدهن طلوكة
اذا مو ابر.  هاي ورقة دخول  للمستشفى هسه بوجهج 

طلعنا لبيت جدي دكينا الباب شكد مشتاقة الهم
لبيتهم لجدتي. فتحت الباب خالتي  فضة  بوسناها
ودخلنا  لكينا جدتي نايمة وايدها ملفوفة

- ضربت صدرها أمي يايمة شمالج
دنكت عليها وحضنتها

- مابيه حبيبة تعورت اشوية بايدي وهسه احسن

التفتت عليه
- هلا جده آماسي اشونج تعاي احبج

- دنكت بستها وكعدنا يمها  ضلت امي  تبجي
على جدتي. اجت خالتي  غيداء   اعاين الها صايرة
تخبل. سلمت علينا وكعدت 

- اشونج خاله زوجج اشونه وياج

- دنكنت وحجيت بتنهد  انكول زين
- ضحكت ادكولين زين والله محد دمر مستقبلج ودمرج غير قويصر البلا

صاحت جدتي
- غيداء يمة اسكتي ندري ادرسين قانون جا اشون
اطبقي علينا

- ضلن يضحكن وانه حجي خالتي يفتر بدماغي اي
كله من ورى ابوي او لو فكرت ازعل يمكن هو يردني
لـ ثائر  على ابو ابن عمج وعيب

اجت خالتي  بيداء وطلعنا ماشفنه مرت خالي حسين
بس. مرت خالي علي 

بيبي كالت لاتروحن خلنها للصبح  كومي اتمشي
لبست خالتي بيداء عِبايتها وخذتني مشيت الشارع
روحه جية. اتلث مرات

ورجعنا لليل وصار عندي  وجع جانت كلهن كاعدات يحجن على مرت خالي حسين  

- دفعت امي على التنور وشكت ايدها

- لطمت أمي صدرها
يااا ياجلبة ليش 

- والله خية مايردنها  انه جنت بالدوام وغيداء
بالكلية  وعلى من رجعت وشفت أمي طايحة بالفراش
وتون محد كاللها شبيج شيوجعج. كضيتها  نعلت
اهلها. وطردتها. خذاها حسين وراح  وداها لهلها

غيداء
- خلها تولي  الجلبة  ماغز التعب  بيهم تالي هيحي
نسوانهم جلبات ويكوفون وياهن  انه هسه ماحجي لا ويه حسين ولا عِلي

ردت  أمي  الهن
- ميخالف ماطول أمي زينة. يبقون اخوتنا
خطية محسن عينجن علين ترى كلش فقير

- بيداء
شزينة  يمعودة غير خذيتها للمستشفى اشوفها
بس اتعيط. تالي طلعت عدها ذبحة ياخية إمي
كلش تعبت مو مثل قبل

- انه استمعلهن وكمت اتلوى  كمت وكفت
وصحتن اخخخ بطني.  كاملي مخروعات
كضتني أمي

- شمالج يمة شيوجعج

- بطني يمة بطني توجعني.

غيداء - تعاي حبيبة تعاي مددي وهسه اصيرين
زينة

- خاله ياااززينة بطني موتتني ارررريد اجيببب
ياانام اخخخ. انخبصن وخالتي غيداء دكلهن بس تنام
يروح الوجع. وبيداء دكلها البت  راح اجيب يانوم
يالبطرانة 

خذاني خالي محسن وامي وخالتي بيداء

وصلنا للمستشفى  بين الفحوصات والدخولية
دخلني لصالة الولادة طبعاً الصرف كله من أمي
انه ماكو  ولا قرش  عندي  خللي مغذي وساعة وصارت عندي طلوكة متت  موت. ضلين  من الظهر لليل انه اطلك  احس الدنيا ضاكت بيه منا لما جبت
اشاهدت  وسمعت  صوت ابني  
ساعة  ونمت بعد  مادريت منا  لما وعيت 
انه بالغرفة وأمي  يم راسي صحيت

وجابتلي خالتي ابني  اعاين عليه يخبل  وسمين
كل خد شكبره ولا جنة متت جوع وتعب بيه
اخذته لحضني وبسته.

امي علمتني اشون اطلع صدري  ورضعته 
احس روحي انخلطت وياه روحه هو ويرضع
شيء جديد  عليه جنه لعابة. أمي كالت

-  يمه اموسه شراح اسمين هذا الحلوة

- ضليت امسح على خدة الترف  يمه اسمي
مهيمن حلو 

- هاا ورجلج يعرف  شراح اسمي

- يمه ماتفرق عندا  سمي مهيمن  حلو انه اريده
كمل خالي اجرات الخروجية وطلعت للبيت
اتلكتني جدتي طايرة من الفرح  فارشتلي 
خذت مني ابني  ونومتني

—-،،،،——،،،——،،،،،———-

اول ايام  من كمت اداوم ابقي  مهيمن يم عَمتي
اسبوع وكبت  العيطة ماتريده ومابيها حيل الى

كمت اخذا وياي اشيلة واروح. للدوام  رغم
ثائر وياي بس مايشيله ابد. يكول عيب شنو انه وشايلة وأمشي

ضليت اروح وارجع للدوام  وهو وياي

بيوم  جنت اغسل ارضية الروضة وجاي امسح بيها
دخلت  دنيا وياها صديقاتها اثنين    اجت تركض عليه

- هاا  اماسي هنا انتي 

- اي والله شعندج هنا شسوين

- لا اجيت  ويه  شيرين اختها هنا مس ومرت عليها
وخري انه اكمل بدالج

- لا لا عوفيها لاتدمر هدومج. صاحت على صديقاتها
الي جانن واكفات  بالباب

- شيرين  سميرة تعالن نساعد آماسي

- شيرين رفعت ايداها وتحجي  بتكبر
لا حبي هذا شغل  العاملات وهذا شغلها

- انه دنكت اكمل شغلي ودنيا  احسها راح تنفجر من القهر  ماهتمت الهن كضت الماسحة مني
وضلت تنشف بالكاع وياي  كملتها  وسلمت عليه
وطلعت. بس انه الحصرة ضلت بكلبي
اشون تعيرني  كلت يالله ميخالف الشغل مابي عيب

اجت مس جديدة حبابة. كعدنا سوالف انه وياها

- انتي شمخلصة دراسة اماسي
- انه خلصت سادس ادبي والله

- يعني عندج شهادة
- اي عندي ومعدلي  بالثمانينات همات

- خوش اكو مدرسة  المجاهد تعرفيها
- اي يم بيت اهلي

- هاي  محتاجين بيها كاتبة ليش ماتروحين تقدمين
الهم احسلج من هاي الشغلة

- ضليت اكلبها براسي  اي  والله ليش لا
وصد ثاني يوم خذيت ابني ورحت لبيت اهلي
خليت مهيمن  عد  أمي  وخذيت فايل ورحت للمدرسة

استقبلني المدير وقدمت الفايل

- اي تفضلي  اختي

- استاذ  انه  عدي شهادة سادس وهاذا الفايل
ماتي  وامر التعيين ماتي صدر  عامل خدمة
بس كل الي بلولاية  مثل شهادتي يشتغلن كتاب
تستقبلني عدكم كاتبة لو لا
خذا الفايل وكلبة

- اي ليش لا نستقبلج وانه محتاج همات كاتب هنا
من باجر باشري بدوامج

- كمت منه  اشكرت وطلعت رجعت لبيت اهلي
خذيت  مهيمن ورحت للبيت. مشي. من وصلت
مثل كليوم شغل ومناوشات  عمتي وبتها

من اجه ثائر كلت اله ماحجى كالي بكيف
هو همات بكيفي  اتفقت انه وياه ماكو جهال
بعد كتله ناخذ احتياطاتنا انت ماريد  بعد جاهل

٦ اشهر صار عمر مهيمن  وماعرف اشون حبلت
وهمات منا ابني الي اربعة وعشرين ساعة اغسل
وابدل ومنا عمتي والبيت وبتها ومنا 
ثائر الاخرس  ومنا الوحام
دمررني الليل كله رأسي بالمغسلة اتقيئ

كمت اداوم بالمدرسة. صدفة لميت الكتب وطلعت
من  غرفة المعلمات  صار بوجهي  عابر
رفعت راسي وصفنت ابوجها. حسيت صارت عندي
وغزات  بكلبي  

- اشونج آماسي
- رديت بتلعثم وخجل الحمدلله انتَ اشلونك
شو اليوم هنا

- والله جاي اطبق هنا. انتِ هنا كاتبة مو

- هزيت رأسي اي  صارلي ست اشهر
من تعينت

- تمام اي شيء تحتاجي انه هنا
- شكراً الك عفته ومشيت بس  حسيته عيونه
تراقبني   وصار كل  يوم هو  بوجهي  خاف  اتناسيته  رجعت كل  جروحي انفتحت  والطامة 
الكبرة إهمال  ثائر اليه   الي  هو والماكو سوا
خلاني ارجع  افكر  بعابر

مرات احس المدير عيونة عليه  من ابقه وحدي
بالمكتب هو يدخل ويطبك الباب ويضل ايسولف سوالف
ماصخة مابيها معنى. ...

انها اتركة  واكوم لو يفتح الباب عابر بحجة عندا
شيء وياي  وهو يخلي ويطلع

من رجعت للبيت  كلت اخلي ثائر يدورلي غير
مدرسة يليل كاعدين  ارضع مهيمن مميات
الي الله يوفق امي ادزلي كارتونات حليب
لو دنيا تجمع من مصرفها وتشتري اهدوم
لمهيمن وحفاضات....

اكول ثائر اريدك تنقلني بغير مدرسة  ماريد
هنا

- ليش خوش مدرسة وقريبة على اهلج اقلها تخلين مهيمن يم امج

- بس انه  مامرتاحة والمدير حقير او موخوش

- وشلج شغل بيه  كملي شغلج بسكوت ومالج شغل
بااحد

- سكتت شحجي بالله هذا شحجي وياه وشفهما
هسه  كلت اسكت احسن مامنه فايده

ثاني يو بالدوام  بنهايته لميت غراضي وجاي اطلع
دخل المدير وطبك الباب. المشكلة مابقى احد
كلها طلعت

- حجيت بخوف وعيني على الباب نعم
استاذ اكو شي يباوعلي بنضرات مقرفة من فوك ليجوى وعيونة تتجول على كل تفاصيل  جسمي
حسسني انه عريانة. سحبت عِباتي  ولميتها على نفسي   لان انه  البس تنورة  وقميص   فجانت العِباية مفتوحة اشوية

رد عليه ونضرتة نكسة
- لا بس اريدج ترحين ويايه للديوانية انروح
للمخازن انجيب كتب  او نجي 

- بس استاذ انه ما كايلة لزوجي  ولا اهلي يدرون
لان ابني عدهم لو اتأخرت راح يضل بالهم  وبعدين
انه مو شغلي هذا وانتَ اشون ترضاها اطلع وياك
او  وحدنا لو شافنا احد شيكولون  عليه تريد
ابوي يذبحني  والناس تحجي عليه وانتَ تعرف
مجتمع الشنافية

- هاي شبيج  محد يدري بس انه وياج  نروح 
واخذج  بسيارتي  الخاصة  وبلا حجي زايد. يالله
حضري روحج

- هو كام يتقرب عليه. انه ضليت ارجف 
هاذا اشبيه شيريد    انفتح الباب ودخل. عابر
وعيونة بكصته

- خيرر استاذ ترى الكل طلع ليش حاجز آماسي هنا

- هو ارتبك لا بس اريدها تمشي وياي للديوانية انجيب كتب وغراض محتاجهن للمدرسة

- لا تركها ماتروح انه امشي وياك وين تريد خلها تروح هذا مو شغلها

- لا  الا هيه ويعاين عليه بنضرات مقرفة
ضل هو وعابر يتلاوون بالكلام التفت  عابر عليه
وكالي اطلعي لاتبقين هنا.

- انه همات لميت غراضي وطلعت والرجفة بيه
صخام بعينك ناظم شتريد مني

مريت لااهلي خذيت ابني ورحت للبيت 
ولا حجيت ولا جبت طاري لااحد.

وضل استاذ ناظم   يرشقني بالكلام.  لو نضراته
الطايح حظها. كام اكثر الاوقات عابر يجيب كتبه
ويجي يمنه يكعد 

فديوم جنت واكفة احجي ويه المعلمات ماحسيت
بس على لزمة من عكسي وسحبني عليه
درت وجهي ولنه استاذ. ناظم اجه عابر يركض

وسحبة وتعارك وياه انه  اتمنيت الكاع تنشك وتبلعني
انفضحت بين المدرسات  وبعض اباء الطلاب  وحده منهن صديقة سِميه

كمت ابجي من الفشلة. رحت لبست عباتي ولميت  غراضي  وطلعت اركض  صاحني
عابر طلع يركض وراية

- اكفيييي آماسي اكفيييي

- وكفت والتفتت اله هاا شتريد عفية شتريد مني

- اسمعي تسحبين اوراقاج ومن باجر ترجعين
للروضة الجنتي اداومين بيها لاتبقين بعد هنا
باجر انه لو خلصت التطبيق منو يوكفلج ترى هذا
النذل مايتركج بحالج 

- ان شاءالله  تركته ورحت  بس هو شدرا انه جنت
اداوم بالروضة مريت لبيت اهلي  خذيت مهيمن
أمي جلبت بيه  كعدت يمها حجيتلها على المدير

- خلي عينج بعين الله شسويلة اذا هو عينه نكسة
لاتحجين  لـ ثائر  فهمتي
- اي انه اكوم اروح 
- ضلي اتغدي وروحي
- لا ماكدر لازم اروح   يمعودة هسه البيت
وصخ وهو كاتلة الجوع

سلمت عليها وطلعت
طول الطريق العبرة لازمتني بصدري
حضنت ابني ولفيت عِباتي ليش  مكتوب
عليه اكضي عمري كله بالتحرش  ماشفت
شيء بحياتي حلوة  لا من شبيت عشت مراهقتي مثل
البنات ولا من عرست عشت عروس وتدلع كل هذا
ماشفتى والدور الزلمة هو والماكو سوه

سلمت امر لربي ومسحت دموعي
وصلت للبيت ومثل كل يوم ماكو شيء جديد
خدمة زائد خدومة يساوي نكران 

اسبوع انه ماداومت  سويت روحي مريضة بيوم
العصر كاعدا العب بابني وثائر كاعد يم امه  واخته
وانه وحدي  اندك الباب  سمعت صوت ابوي  دخل وصوت ثائر  صاحني

رحت سلمت عليه وخذيتلة ماي هاي اول مرة
ايفوت النا  خذيتلة ماي وكعدت يمه 

وللحكاية بقية .........💔

ءءء