زواجك بالاكراه وعلاجك قدري ( صكر الصخرة)

الفصل السابع والعشرون

الانسان صعب يصدك انه جان عايش طول عمره بكذبه جان يحسها حقيقه .. وحقيقه مؤلمه ومره وظالمه الى ابعد الحدود
سنين وصكر عايش وهو ينفذ اوامر عمه ان كانت عاديه او سيئه لكن مع هذا جان ينفذها .. جان هو الايد الي تمسح كل القاذورات الي عمى جان داخل بيها .. صحيح مجان يأذي انسان بريئ او يأذي مره او طفل كل الي قتلهم وخلص عليهم جانو يستاهلون الحرك حتى ..
لحد ماقابل الدكتوره هند وتحولت كل حياته.   مبقى الوحش الي بالحكايه وانما تحول الى امير تعشقه هند بكل سلبياته واجابياته
....

الاصوات اتعالت بين هند وصكر .. وطلعو الي بالبيت على اصواتهم .. مكدرو يداخلون بيناتهم جان صكر مثل البركان الي انفجر ودايحرك اي شي يمر عليه.   وهي صايره مثل العاصفه محمله مطر تحاول تطفي هذا البركان ..
كالت هند ... اني كلت الي عندي يالصكر وانت ادرى بعد .. اذا اتريد تكمل بهالطريق اعتبرني مموجوده

صكر ... اشحدج تتحركين خطوه من اهنا ..فهمتي ..

هند .. ماتكدر تغصبني على اي شي .. فكر انت بينا ..فكر بعائلتك .بامك باختك .. فكر بابنك الي جاي ..

صكر .. اني اعرف شلون اتصرف مااحتاج تعلميني ..

صاح على رضا .. مد ايده اله ..وهذا معناها ( السلاح)
شال رضا السلاح وخلاها بيده .. والتفت وراد يطلع وهي وراه .. سحبت همين هي سلاح من عند واحد من الحرس وصاحت ..

هند .. اذا رحت راح اطلع من حياتك مثل ماكتلك .
وهي اتخلي السلاح على راسها ... وحليمه صاحت وحنين صرخت .. اندار عليها .. خله السلاح على كلبه هو هم وكال

صكر .. يلا .. اضربي وانت شايله روحين .. اني ميهمني ..هسى اقتل نفسي ماهتم .. لكن انت ..

هند ..لاتروح ولا مكان ..خلي هالمرة تصفيه الحسابات بيد الشرطه

صكر .. اعقلي هند .. وادخلي للبيت وخليني اشوف شغلي

هند وهي لساتها مصوبه على راسها كالت ..لاتروح

صكر ..هند اسمعي الكلام

هند ..لاتروح .. لاتعوفنا انا وابنك

صكر مكدر يقاوم اكثر ..من شاف دموعها تنزل وصوتها كام يرجف نزل السلاح الى مصوبه على صدره .وذبه على الكاع ..وهي هم سوت نفس الشي .. باوعت بيه وهي ترجف ..حظنته بكل قوتها
لما راح رضا بسرعه واخذ الاسلحه من قربهم ..وبسبب الضغط الي تعرضت اله حليمه وكعت من طولها .. صرخت اهنا حنين وكالت ..

حنين .. يمى .. صكر هند الحكوني ..امي اغمى عليها ..

راحت هند تركض اتشوف شبيها حليمه .. جست نبضات قلبها من ايدها .جانت كلش ضعيفه .. صاحت على صكر .يشغل السياره حتى يودوها للمستشفى ..
خلوها بالسياره وكبل للمستشفى .. وحنين طلعت ويا رضا بالسياره وراهم ..وفرحه خابرت على علي وكالتله وطلع كبل على المستشفى ..
حنين بين خوفها على امها .. وخوفها على ابوها بعد ماخبرتها حليمه بكلشي ..مجانت مصدقه ..وجانت اتريد واحد يخبرها انه كل الي داتسمعه مو حقيقه .. شلون ابوها الي كبرت بحضنه وهو شيخ عشيره جبير والكل تحسبله الف حساب .. يطلع مجرم
شلون ابوها الي جان يسوي مشاريع خيريه ويدعم الارامل والايتام يطلع متستر على مجرم .. ابوها الي اذا انكال اسمه في اي مجلس تنفض كل المشاكل الي بيه ..يطلع هو راس كل البلا ...

وصلو للمستشفى دخلوها طوارئ وبعد فحوصات واشعه ..طلع الطبيب من غرفة المريضه وكال

الطبيب .. سوينا كل الفحوصات الازمه .. وبصراحه اكو شي طلع بالتخطيط مال الدماغ

هند .. خير شطلع دكتور ِ

الطبيب .. مع الاسف ..عدها تومر ( سرطان بالدماغ ) ِ
صكر انصدم ..حنين حطت ايديها على حلكها ممصدقه .. وعلي نزلت دموعه بدون ميحس .. كال

صكر ... يعني شلون سرطان ..

الطبيب .. سرطان .. بس الحمد لله ببدايته ولسى صغير .. راح انسويلها كل العلاجات المطلوبه واذا تمشي عليهم راح يصير تحسن بنسبه جبيره وتعيش

هند .. يعني .. شراح اتسوي حاليا

الطبيب .. راح نعطيها علاجات اتساعد على تصغيره ..وبعد شهرين انشوفه بالاشعه لو صغر راح اسويلها عمليه ونشيله .. بس لازم تمشي على العلاج والا العكس

علي .. لا لا اكيد راح انخليها تمشي عليه .. من وين اجاها هذا ياربي ..

هند .. حظره الطبيب نكدر ندخللها ..

الطبيب ..اي .. بس لازم متتاخرون..وياريت واحد واحد مو كلكم .. راح اخليها يومين واطلعها بعدين ..وانت يادكتوره هند تعاليلي بعدين من يصير عندج مجال المكتب حتى افهمج اكثر ..

هند هزت براسها موافقه .. وعلي دخل هو اول واحد دايشوفها ..
اندارت هند على صكر ولزمت ايده وكالت .
هند . لاتخاف .. مدام انطاها ادوية عاديه معناها حالتها مو صعبه .. واني راح احجي وياه بعد ..

صكر .. اوكي .. اروح انزل للاستعلمات علمود التسجيل وهالسوالف ..

ماحجت شي ..تعرف انه يريد يتهرب ..وهاي طريقته بالحياة الشي الي يمس قلبه يتهرب منه ..
راحت اتقربت من حنين وهي جانت كاعده وتبجي .. باوعت بيها وميحت دموعها وكالت ..

هند .كافي تبجين ..امج راح اتصير زينه اوعدج ..لكن لازم انت هم اتصيرين قويه حتى تتقوى بيكم ميصير تبجين كدامها لو تحسسيها انها ضعيفه

حنين .. بس تتوقعين امي اتصير زينه.   هذا سرطان ..وشكد ماتو بيه الناس

ابتسمت هند وكالت .. ام سكر مره قويه هواي ..ماشفت بقوتها .. وانا متأكده انه راح اتحارب واحنا كلنا وياها مراح انعوفها .. بس هي تحتاجج اكثر وحده بينا ..

حنين ... راح اسوي اي شي حتى اتصير امي زينه .. بس ياهند ابوي شراح يصير منه

اتنهدت هند وكالت .. هسى خلي انشوف امج وبعدين انفكر بابوج زين .. كلشي ناخذ خطوه خطوه . 

بطلعة علي من غرفة امه ..اشرتلها هند انه تدخل حتى اتشوفها .. وكالت لعلي بعد مدخلت حنين

هند .. شلون اتشوفها

علي .. ماادري ..وكانه خلال ساعات بين عليها المرض .. تعبانه ووجها اصفر

هند .. ميخالف .. بس لازم اتكونون اقوياء من اجلها .. وهي راح اتصير قويه اذا شافتكم بجانبها .. الي مرت بيه هالفتره مو قليل ..

علي .. والله ماادري شكلج ..
اندار براسه يدور على صكر وكال .. وين صكر لعد

هند ..هسى يجي نزل للاستعلامات علمود التسجيل ..شفت من دخلنا مسجلنا لان جنا مستعجلين ..

علي .. اي زين .. لعد اروح تجيب فرحه هسى ظل بالها ..خلي تجي وتشوفها ..

هند .. اوكف ارجع وياك حتى يبقى شبل يمي .  ادخل اشوف امك ونروح ..

علي .  اي زين ..
..............ه

لما الطبيب طلع من غرفة حليمه واعطاهم الموافقه بانه يدخلون ويشوفوها ويطمنون عليها ..دخل اول واحد علي ..
جانت هي متمدده وشكلها تعبان.  بس من شافة ابنها ابتسمت . اجا اتقرب عليها .. ومسك ايدها وباسها وكال

علي .. سلامات ياام صكر .. هيج اتخوفينا عليج يمى

حليمه .. فديتك يايمى ..يابو قلب الحنين اسمع مني كلمتين ياابني ..

علي .. خير يمى امريني

حليمه .. ارجع للصخره .. واستقر اهنا ..اخوك محتاجك تسنده اذا تبعد عنه مراح تكدر هند وحدها عليه .. يحتاج رجال يوكف وياه ويرجعه للطريق وانت ماكو غيرك يساعده .. الي مر بيه مو قليل ولازم انت هم توكف وياه

علي .. بس يمى انت تعرفين .. اني من زمان نيتي استغل ابغداد .. ماريد ابقى اهنا

حليمه ..ابني اهنا مدينتك كاعك وعرضك . اهلك واختك .. خليكم متجمعين اهنا لاتتبعثرون.  فكر ياابني واتخذ قرار الرجعه .. اريدكم حوالي اذا صابني شي

باس راسها وكال .  لاتكولين هيج .. انشالله ايصير الي ربنا كاتبه ..

وطلع بعد مابوسها مايريد يتعبها .. ومن طلع هو دخلت حنين ..من شافتها كبل كامت تبجي بحضنها.  وحليمه اتبوس بيها وتمسد على شعرها .. الام حتى باضعف لحضاتها من يوكعون اولادها بحضنها اتصير قويه .. شالت راسها حنين وكالت

حنين .. يمى ليش هيج يصير بيج ..لازم تنتصرين على هالمرض .. لازم تتعالجين وتخلصين منه بساع

حليمه .. يابنتي كلش من الله حلو والحمد لله ..بس اريدج توعديني بشي

حنين .. شنو ..

حليمه ..انه انت اتكونين قويه .. واتجمعين اخوتج لو شمصار بينهم .. اريدج انت السلسله الي تخليهم دوم مع بعض .. افتهمتي

هزت رأسها حنين وكالت .. بس بدونج مااكدر اسوي شي.لازم تبقين وياي واتعلميني بعد

حليمه . واني وياج ..مارحت مكان ..وكلنا اعمارنا بيد الله

حنين .. لاتكولين هيج .. يمى اني كلش احبج

حليمه. اني هم ابنيتي وحيدتي ..

حضنتها بقوه ومسحت دموعها وطلعت .. حتى تدخل هند ..جانت هي اقوى وحده بينهم . باوعت بحليمه وابتسمت وكالت

حليمه .. ااااه ياهند اااه يابنتي

هند .. شبيج ام صكر .. ليش الاااااه

حليمه .. لاني تعبت ..من كلشي تعبت .. والحياة اتوديني واتجيبني مثل ماتريد..مابقيت ذيج حليمه القويه الي مايكسرها شي .. كسرتني الدنيا يابنتي

هند .. لا بعدج قويه ولازم اتكونين قويه لخاطر ولدج ..واحفادج

حليمه ابتسمت من شافت هند اتخلي ايدها على بطنها لما كالت احفادج .. وكالت الها

حليمه .. ضيعنا الفرحه بحملج وماانسعدنا بالخبر مثل الاوادم .. ظلت الحسره بالهلهوله بجيته . 

هند .. ما مهم ..بعد اكو هواي وقت حتى نفرح ..اهم شي انت صحتج ..

حليمه .. سمعي هند .. خليج يم صكر لاتعوفيه ابد .. والبيت الي تكولين عليه هذا عشنا راح يحبه صكر ويهتم بيه .. لاتبعديه عن اخوته وقربيهم من بعض .. انت غيرتيه من دخلتي كلبه واني فرحت بيكم الله اليعلم شكد .. صكر صعب اني ادري لكن بحضنج يرجع طفل ... ويا ابنه الي راح يجي راح يرجع طفولته ..

هند .. بوجودج ..كلشي راح يصير بوجودج ..انت بس اهتمي بنفسج واخذي ادويتج بانتظام ..والعمليه الي راح يسويها الدكتور بعدشهرين راح تخلصبن من الورم .. اهم شي تمشين على تعليمات الطبيب .. زين

طبطبت على ايديها وكالت ..الله كريم .

بوستها هند وطلعت جان علي ينتظرها علمودترجع وياه للبيت .. حتى يجيب فرحه لانها اتريد تطمن على حليمه ..
جان واكف صكر بالممر من شاف هند تقدم عليها وكال

صكر .. ها .. شلونها

هند .. روح شوفها .. صكر امك تحتاجك .. انسى كل الي فات .. لانك الوحيد الي راح اتخليها تستمر ..لانك انت الي ناقص بحياتها .. امك مالها اي ذنب وجانت ضحيه مثلك .. اسمعها ولو مره راح تفهمها

صكر .. ماراح اتبطلين ولاتتعبين .. راح اتضلين هيج عنوديه وراي وراي .

هند ابتسمت ورفعت ايدها اليسار وكالت .. داتشوف هذا المحبس الي بيدي انت ملزوك بيا هيج مثل مااني ملزوكه بيك .. يعني مراح اكف عنك

صكر .. زين .. راح ادخل اشوفها .. وانت راجعه للبيت مو ..

هند هزت براسها ب اي .. بوسته من خده وهمست باذنه وكالت .. اني اثق بيك ياصكر
وراحت ويا علي راجعه للبيت ورجعت حنين وياهم لما صكر لح عليها ترجع ..
دخل هو للغرفه مال امه ..من شافته كبل كامت كعدت ... صكر مو مثل اي واحد من ولادها لانه جان مجافيها سنين طويله ..
اتقرب منها بتوتر وكال

صكر .. شلونج ..

ِحليمه .. زينه ..اذا انت زين

صكر .. اي الحمدلله .. كال الطبيب انه راح تصيرين زينه قريبا .. يعني لاتخافين . انشالله ماكو شي

هو يحجي وياها ..لكن ميباوع بعيونها .. وحتى يتلعثم بمخارج الخروف كد التوتر عالي الي دايحس بيه .. فكالت امه

حليمه .. باوع بعيني. احجي ياابني .. خليني اشوف نفسي بعيونك .. خليني احس اني امك وانت ابني ..

رفع عينه بتردد شاف امه تبجي .. وهو هم دمعت عيونه .. وكال

صكر .. مو وكتج ابدا تتمرضين .. الكل يحتاجج وخاصه هسى هند حامل وماعدها لاام ولااب .. اتريدلها ام اتعلمها ..

حليمه .. بس اني ماجنت ام زينه .. لانك ماصحتني يمى من زمان ..

صكر مكدر يجاوب ..العبره خنكته .. حس انه هو ظلم امه مثل ماظلمته الحياة .. لو كان سمعها مره ممكن مجان صارت هالفجوه الي بينهم .. كالت

حليمه .. تدري ..لو اسمع منك يمى مره لخ .  خلي اموت وراح اكون فرحانه ..

صكر .. لاتكولين هيج .. مراح اتموتين ..لاني مااسمح الج ..

حليمه .. بس شنو فايدة الحياة اذا ابنك ميعتبر امه ام .. ياابني لو سمعتني مره .جان عذرتني ..

صكر .. عوفج من الي راح خلي يولي ..هسى الاهم الي جاي

حليمه .. وشنو راح يفرق .. بعد ناقصني صوتك يصيحلي يمى .. .. اااه ياابني ياصكري لو بس مره سمعتني جان عذرتني

صكر لاول مره بعد سنين لزم ايديها ..هي مجانت مصدقه الي ديسويه جانت ردت فعلها جامده وكانه داتحلم وخايفه تصحى من الحلم .. باوع بيها وهي دموعها داتنزل بدون توقف وكال ِ

صكر .. مايحتاج لاتحجين بعد ولاتبررين .. لان صكر القديم راح بعد ميرجع والي كدامج صكر جديد نكث عنه الريش القديم وبرد اظافره وجددهم .. ومنقاره الي صدى من الصمت كسره وطق مكانه واحد جديد .. واول كلمه راح يكولها .. هي .يمى .
اي يايمى .. انا الي اشتاقيت اكولها واسمع نفسي من اصيحج بيها .. اااه يايمى شكثر مشتاق لحظنج ..

رجع صكر طفل بعمر 12 سنه .. رجع لحظن امه وهو يشهك بالبجي ويصرح يايمى .. وهي تحظن بيه وتشمه جنها مقطوع عنها التفس وهسى كادره تتنفس

جانت هاي اللحظات من اكثر الاوقات حميميه بين الام وابنها .. الام ماتتعوض ابد والابد مكانة جبيره ..وصكر خسر ابوه وهو طفل لكن كسب امه وهو رجل عدا الثلاثين من عمره ..
واخيرا حليمه سمعت الكلمه الي اشتاقت الها بعد سنين .. والجرح الي بقلوبهم راح يلتأم مع بعض ..
.................

في بيت الشيخ جاسم ..كانت سميه واولادها كاعدين ديحجون شلون يكدرون يساعدون اخوها ..او يخففون الحكم عليه .. واذا اتحاكم شلون وشكدراح اتكون المده .. وبعدين اجو بعض من اقاربهم حتى يواسوهم بالي صابهم.   لان شكل المصايب مداتفك عنهم .. شي ورا شي ..
جانت يمامه كاعده وحدها بالغرفه بعد مخلصو عشا .. ادباوع من الشباك على برى .. صوت السيارات الي اتروح وتجي والناس وضحكات الاطفال.   وهي صافنه .. دخل اخوها عليها .  وهي من سمعت صوت الباب التفتت .. دخل سامر بابتسامه وكال

سامر .. اكدر ادخل ..

يمامه .. طبعا .تعال .
خلت ايدها على القنفه كاشاره انه تعال اكعد يمي
اتقرب منها سامر .. بوسها من راسها وكعد يمها .  باوع بيها جان وجهاوشاحب وعيونها ذبلانه فكال

سامر .. تحسين نفسج مريضه لو شيى .لان وجهج تعبان

يمامه ..لا ..ابدا . بس تدري التغب مال الايام الي مضت وخالي انقهرت عليه كلش

سامر .. يعني مو مقهوره على سجاد ..

يمامه .. بلي مقهوره عليه ..بكل الاحوال هو ابن خالي قبل ميكون زوجي .. يمكن جنت اخبه كابن خال بس مو كزوج .. لكن ماجنت اتمنى اله الموت وخاصه بهالطريقه

سامر .. اني اسف ..

يمامه .. ليش تتأسف ياخوي

سامر ..لان ماوكفت بوجهم لما زوجوج وانت مارايدتيه ..

يمامه ..وانت وين جنت تعرف اريده او لا .. هي قسمتي هيج ..واني راضيه ..

سامر .. ادري بيه جان موزين وياج .. جنت حاسس انه جان يأذيج .. بس انت محجيتيلي شي ..

يمامه .. انسه .. كلشي راح وانتهى ..واني راضيه بلي كتبه علي رب العالمين. . هسى المهم ..خالي شلون ..راح يبقى بالسجن ..

سامر .. والله ماادري .. صحيح هو غلطان .. بس مراح انعوفه ..راح نحاول نستانف اذا سجنوه هواي .. حتى علي الي سلمه هو ..دايحاول يسوي شي ويا المحامي

يمامه .. الله كريم .. اكول سامر

سامر .. كولي خيه عيوني ا لج

يمامه .. جيب حنين فد يوم يمنا ..اشتاقيتلها..وامي مثل متعرف متخليني اروح الهم  .. علوا لو يرجعون يعيشون ويانا

سامر .. انشالله .باجر امر الصبح ولو رادت تجي راح اجيبها .. بعد تردين شي لا

يمامه .. سلامتك ياخوي ..

وطلع سامر من غرفه يمامه .. وخابر على صكر دايسال عليهم مجاوب .. جان مشغول. . دك على علي.   جاوب

سامر .. الو علي ..هاي وينكم ..اشو ادك على صكر ماكو مشغول ..

علي .. والله ياسامر ..شويه مشغولين ..امي اتخربطت بالمستشفى

فز سامر لما كال هيج ..وطلع كبل لبرى دايروح يشوفها ..فكال

سامر . باي مستشفى ..اني رايح اشوفها ..

علي .. اي .. هي بمستشفى ( ...) وصكر يمها .. واني والبنات رجعنا .. وراح اخذ فرحه واروح انشوفها

سامر ..اوكي اني طلعت رايح الها ..

وبهيج سامر هم طلع دايروح يشوفها ..

بعد يومين طلعت حليمه من المستشفى ..والكل حواليها صكر ومرته .. علي ومرته وابنه ..حنين .. سامر ..رضا ..الكل فرحان بخروجها كاعدين وملتمين جان سامر جايب غدا من برى وكعدو اتغدو .  ولما خلصو غدا سوت هند جاي ووزعته حنين .. فكال علي

علي .. بما انه امي صارت زينه .. فاني لازم نىجع لبغداد .. وباجر انشالله طالعين .. اتأخرنا اصلا على موعدنا .

حليمه انقهرت وكالت .. لو ترجع ياابني .  كافي متغرب

صكر .. والله اني من راي امي .  ارجع ياخي. اهنا هم اكو شغل هواي ..

علي .. اذا ارجع ..لازم تكمل القضيه الي اشتغلت عليها .. يعني بعد ميصدر الحكم .. راح اروح اقدم النقل .. ومن يطلع راجع الكم .  لان فرحه هم حابه تعيش اهنا

صكر .. اي خلاص لعد .  من باجر راح ادور عاى بيت جبير لكلنا حتى انعيش بيه وندور عروس لرضا ونزوجه كافي ..لاني وعدته

حليمه ابتسمت وكالت . اي واخيرا راح نفرح .. لعد عجلو بالشغل .خلونا نفرح بيكم يا رضا انت وسامر ..

ابتسم سامر ..وجان عينه على حتين وكال .  والله الي رايدها بعدها تدرس .. خليها تخلص وبعدين

الكل اتعجب .. تاري سامر عينه على وحده ومخبي .. كال صكر ... الله الله ..ياثعلب انا اكلك ومتكلي

ضحك سامر وكال .  اني اصلا مجنت اعرف احبها هسى يلا حسيت

علي كال .. اي زين على الاقل حسيت . 

والكل ضحكت على كلامهم ..
سافر ثاني يوم علي .. وبدت حياتهم ترجع شويه شويه .. صكر حاول يشثف بيت بالمواصفات الي رادها بس ماكو ..فقرر يشتري ارض ويبنيها
راح يبني بيت كلش جبير حتى يسعهم هما وجهالهم الي راح يجون .  وراح يبني مشتمل همين لرضا لانه ميريد يبعد عنه هو الاخر بحسبه اخوه.  
المحاكمه مال الشيخ ماشيا .. كل اسبوع ايروح سامر ياخذ امه يوديها حنى اتشوف اخوها . قرر انه يبيع البيت وينطي نص حقه لسميه والنص الثاني يصرفون على المحامي مالته ..سلم الشركه بتوكيل منه ومن يمامه لسامر
اما صكر فعاف شغله القديم وفتح شركه استيراد وتصدير المود الكهربائيه هو ورضا .. وجان عندا شركه مال نقل هم شغلها زين .. حالتهم ممتازه.  
اما عن هند ..فقررت تفتح مركز طبي واديره هي بنفسها .. وجانت تنتظر علي وفرحه يرجعون ..لانها اتريد من فرحه توكف وياها بالمركز. حنين بدت مدرستها وداتدرس سادس
الاوضاع عاديه جدا ..

بعد شهرين ..
الكل واكف ينتظر الطبيب يطلع من غرفة العمليات الكل اعصابها مشدوده .. صحيح قبل متدخل حليمه الى غرفه العمليات الطبيب اكد الهم انه نسبه نجاحها راح اتكون 80 بالمئة لكن مع هذا جانو متخوفين ..
3 ساعات والطبيب جوا بغرفه العمليات .. خلصت الساعه 4 ..انفتح الباب .. طلع الطبيب مبتسم .كال

الطبيب .. الف مبروك العملية نجحت .. والورم كله انشال . وامكم بخير جدا .. تحتاج 24 ساعه راحه ..بعدين تكدرون اتشوفوها .. هسى راح انحولها على الغرفه واطمأنو زال الخطر

شكرو الطبيب ..والابتسامه على وجوهم كلهم ..
بقو طول النهار وياها ماعوفوها رغم انه هي جانت نايمه .. للعصر رجعو ..
جان علي وصكر كاعدين برى ..الهوا بدى يبرد والشتا على الابواب فجان دايكول

علي .. بردت والله ..

صكر ..اي .. مراح ترجع قبل الشتا ميجينا زين ..

علي .. دااحاول يااخي .  شسوي مو لعبه هي .  قوانبن ونمشي عليها

صكر ..اي اي عيني .. شلونه شبل ..مجبتهم هالمره

علي ..متسوي ياصكر.   باجر راح ارجع وبس تعب طريق .. بس اشوف امي واسافر ..ولما يظلع امر نقلي راح ارجع

صكر ابتسم وكال .. يلا بلكي يكون البيت هم خلص لذاك الوكت

علي .. شبقالك صدك بيه

صكر ... ه اي والله بعد الطابق الثاني والنشتل مال رضا يعني بعد اهواي

علي ... انشالله يخلص بسرعه .

سكت صكر .. راديساله على محكمه الشيخ جاسم.  لان يعرف الاسبوع الجاي النطق بالحكم. . بس مراد يجيب بسيرته ..
حس برجفه بارده كال
صكر .. خلي ندخل . بردت ..لاتتمرض

علي .. اي والله بردت .. يلا خلينا ندخل ..

دخلو استقبلتهم هند بالجاي .. كالت

هند..ها اشو دخلتو ... سويتلكم جاي كلت كاعدبن برى يدفيكم

صكر .. عاشت ايديج .. جيبي نشربه اهنا .. وين حنين من اتعشينا وماكو

هند .. طبت لغرفتها ..عدها امتحان باجر داتدرس

علي .. اي زين خليها لعد ..

اخذو الجاي من ايدها وكعدو بالصاله يشربون جايهم ..وصكر مشال عينه من هند .. كل مابطنها داتكبر شوي كل ماجمالها ديزيد .. دخلت بالسهر الثالث ..ولسى ميعرفون شنو جنسيه الطفل ..كالتلها الطبيبه الي تراجعها انه يبين اكثر بالرابع والخامس
حياتهم هدأت بعض الشي لكن لازال صكر الي من يعصب ميعرف طريقه وين ..
.................

جانت سميه كاعده بالهول تتفرج على التلفزيون وياها بنتها كاعده بصفها .. لما دخل سامر من برى جان اكو جماعه رياجيل جايين عليه ..
لما دخل التفتت امه عليه وكالت

سميه .. خير سامر .. شجان يريد منك الشبخ هادي وابنه مهند

سامر دنك راسه .. جان بين المتردد والخايف وكال

سامر .. جايين علمود يمامه ..

باوعت يمامه باخوها وكالت .. لويش ياخوي شكو عدهم وياي .

سامر .. رايديج لابنه مهند .. تدرين خطيه مرته ماتت بالولاده العام الماضي .. ورايدج مره اله وام لبنته ..

سميه .. كبل كبت وعصبيه وكالت .. ليش بنتي شناقصها ازوجها لارمل ها . بعدها ورده بعز شبابها.   كوللهم مااقبل ..وبعد مصارلها جم يوم طالعه من الاربعين مال زوجها . شلون يجون ويخطبون

سكت سامر .. مجاوب .. بس سمع يمامه اتكول

يمامه .. اني موافقه ..

رفع راسه سامر ممصدك .. وسميه اندارت عليها وعيونها مفتوحه شوسعهم وكالت

سميه .. انت مخبله شنو موافقه . اتريدين اتخلين الناس تحجي ايكولون مصدكت مات رجلها وتريد تتزوج ...لو اتريدين اتصيرين مربيه لولاد العالم .. ماانطيج

يمامه .. يمى ..ليش هيج اتفكرين .. طفله صغيره ومحتاجه ام .. واذا على الارمل ..اني هم ارمله وجناحي مكسور .واذا على حجي العالم ميخلص ويريدولهم حجه جتى يحجون ... مو زوجتيني غصب واني مجنت رايدته .. بس مهند ابن الشيخ هادي سامعه عنه انه خوش رجال وطيب وخايف الله .. شدكول ياخوي

سامر باوع بيها وكسره بعيونه وكال ..
سامر .. والله اذا على مهند فخوش رجال والنعم من تربيته .. ومقتدر والكل تشهد بيه الرجال مهندس وحالته زينه وراح اتعيشين بخير وياه .. وهذا قرارج

يمامه ردت وكالت .. خلص لعد .. كوللهم اني موافقه ..
اندارت على امها وكالت .. اني موافقه يمى ولاتدخلين بحياتي ..ادخلتي مره ودمرتيني وانصحج من هسى بحياه سامر هم لاتدخلين

باوعت بيها سميه ..مجانت مصدقه الي داتحجيه بنتها .. عيونها دمعت من شافت الكسرة والقوه بنفس الوقت بصوت يمامه .. هسى يلا حست انه ضلمتها لما زوجتها يجاد الي مجان يستاهلها وهي تعرف انه مجان رجال قد المسؤليه ..
باوع بيها سامر وكال
سامر ... خلص باجر اكللهم خلي يجون يخطبوها رسمي .. وخلي يكون بعلمج اولاد الشيخ جاسم راح يكونون اذا صارت القسمه .. خوش
رادت تحجي مخلاها ..عافها وطلع لغرفته .. ظلت هي اتباوع يمين ويسار. . تاليها راح تصفى وحدها اذا بقت هيج ..
...............

صحت ثاني يوم حليمه.   والكل جان حولها لما فتحت عيونها .. الكل جانت ابتسامتهم حلوه هلى وجوهم لما شافو امهم بخير ..
علي سافر ذاك اليوم راجع لبغداد .. بعد ماطمأن على امه ..
بقت يومين همين وطلعت . اول الايام جانو ميخلوها تتعب ولاتشيل شي ثقيل . وبعدين صارت احست ورجعت طبيعيه ..
اتجمعو كلهم على مشيه يمامه يوم اجو خطبوها بيت الشيخ هادي لابنهم مهند .. مجانو حتى عازمين الناس بس بيناتهم .. صحيح مجانت سميه وحليمه يتحاجون. بس المره ماقصرت ويا يمامه .. وحنين فرحت الها .. اجو الناس واتفقو على كلشي وراحو .
وكامو البنات بعد ماطلعو الناس ينظفون ويعزلون .. جانت هند كاعده بعد مغسلت المواعين .. فاجت يمامه اتقربت منها وكالت

يمامه .. انا اسفه ..

اندارت هند بابتسامه وكالت ..ليش تتأسفين ِ

يمامه .. لهواي اشياء .. اولها على وفاه اخوج على ايد الي جان رجلي .. وثانيا لاني مجنت زينه وياج لما اجيتي وصرت وحده من عدنا

هند .. ههه ولاديرين بال .  اذا علمود اخوي رعد فمو ذنبج .. وثاني شغله اني نسيت اصلا .. الانسان دائما يتغير .. واني اتمنى الج حياة سعيده بلكي الله يعوضج

يمامه ..انشالله ..

اجت حنين من برى ومن شافتهم كاعدين ويسولفون ويضحكون .كالت

حنين .. اتسولفون بدوني .. هاي وحده عليكم

جرتها هند من ايدها وكالت .. تعالي متصير الكعده حلوه بدونج ..
وكعدو سويه ايكمولون سوالف ..وشنو يلبسون وشنو يشترون مع انه مراح يسون عرس ولا شي .. بس العقد والدخله افد يوم ..وقررو بعد شهر ..

💞💞💞💞💞💞💞💞💞💞💞💞💞💞💞

ممكن البارت مال باجر يتأخر لان ماكاتبه ولاحرف صار عندي ضرف ومكدرت اكتب انشالله مااتأخر اذا اللع اراد