زواجك بالاكراه وعلاجك قدري ( صكر الصخرة)

الفصل العشرون

في بعض الأحيان يكون الشقيق أفضل من أن يكون بطلاً خارقاً. مهما كان العمر، يبقى الأخ الكبير هو الأب الثاني لأخته. وجود الأخ في حياة الفتاة هو حضور لصديق أبدي، ورفيق أول للطفولة، وصخرة تستند إليها عندما تكبر.( مقتبس)
........................

بداخل البيت الي جانت العصابه مختبيه بيه سجاد جان موجود وياهم .. حاط على وجها لثام حتى لااحد يتعرف عليه بذيج المنطقه وجماعة اسماعيل مايعرفوه غير اسماعيل بس وجانو يحجون بينهم ويكولون ..

سجاد . هاي الفلوس جبتها ولازم تبتعدون قدر الامكان ..لان من الصفحتين انتو مهددين ان كان صكر او الشرطه

اسماعيل .. اي خلاص وصلت الفكره ..طالعين من باجر الصبح ..

سجاد ..اي زين ..

شويه واندك تلفون اسماعيل ..جاوب ومن سمع الحجي من الشخص المتصل قلبت الوان وجهه واندار على سجاد وكال. .

اسماعيل .. شِكِلنا مراح نفلت ..صكر والشرطه اهنا

سجاد جاوب مهبوط .. شنووووووو... لك اطلع اطلع بسرعه .. ودير بالك ادا لزموكم اتجيب طاري ..

وقبل ميطلعون من البيت .. جان صكر يدفر الباب ويطب ..وهما يتراكضون من الباب الخلفي... سجاد جان ملثم وانهزم اما الباقي فلا ..
وبدت المطاردة بين صكر والشرطه ضد العصابه وسجاد الي ميعرفون بيه ..
اتصادمو رعد وصكر بنفس النقطه وهما دايركضون ورا افراد العصابه .. فكال رعد .

رعد ..اشجابك اهنا وشلون عرفت ..

صكر .. مايخفى علي شي يابو الشباب.

رعد .. شكلك مشتري الي بالمركز همين

صكر .. مو وكت هالحجي لاينهزمون ..خلي ننقسم نصفين احسن ..

رعد ..واني هم اكول هيج ..

وفعلا كل واحد منهم لزم جهة ..من سوء حظ سجاد جان الي وراه رعد وصكر وسامر والبقيه كل واحد صار ورا واحد منهم .. صكر صوب واحد .. وسامر صوب واحد ..وراس العصابة لسى ماانلزم .. وبين ما صكر سلم الي اتصوبو للشرطه كمل ورا اخر واحد دايشوف وين صار .. وبين الختلات واحد على الثاني وضرب لحد ماخلصت طلقاته كدر يكمشه
كعده على الارض وخلا المسدس براسه ..وهو دايكول ..

صكر... منو الي وراك .منو دازك حتى تقتل الدكتوره. .
بالبدايه محجا شي ..لكن بعد مضربه صكر على وجهه كال

اسماعيل ..بلا ضرب راح احجي ..

وجان ديكول اسم الشخص لكن اجتييله طلقه براسه كبل خلته ميت على الكاع . التفت صكر يمنى ويسرى ماكدر يعرف من وبن جايه ..التقى بسامر الي كال

سامر .. ها .. محجا شي هالكلب

صكر ..لا ..لازم الي وراه ميريدنا نعرفه

سامر .. وشلون هسى الي اتصاوبو هم حالتهم خطره. .

صكر .. بعد اكو واحد الاخ .. جان وراه رعد ..

رعد ضيع الي وراه والي هو سجاد ..وبهيج سجاد يكدر يقضي على اسماعيل كبل ميحجي اي شي . ..
وبين ماهو دايريد يبعد ..مايشوف الا رعد بوجهة ..

رعد .. واخيرا لزمتك .. ذب سلاحك

ذب سلاحه سجاد ..لكن مو من النوع الي يستسلم
سجاد التفت عليه ..راد يقاومه لان ضربه ووكع المسدس من ايده .. وبقو يتعاركون حتى ميخليه يوصل لمسدسه .. ليش ميوكع اللثام من على وجهه ورعد يشوف وجهه ...
رعد انصدم جان وجهة ميتفسر جيف انه سجاد هو راس الحيه ..
وبسبب هذا الي صار كدر للحضات سجاد ان يسرق المسدس ويصوب على رعد ويطلق طلقتين باتجاهه ..على اثر هذا الصوت يركض صكر وسامر الى مكان الي اجا من الصوت .. ويشوفون رعد متكوم بدمه وماكو احد حواليه ..
يركض صكر الى رعد .. يجسه لسى بيه حياة يصيح سامر على الشرطة الي جانت منتشره بكل مكان ..

سامر .. وينكم .. يمعوده الضابط رعد اتصاوب .. اتصلو بالاسعاف ..

صكر .. لاتصيح ..اتصل انت بالاسعاف بسرعه. يلا خلينه نلحك عليه .. الطلقتين ابطنا ..يجوز ميقاوم

سامر . فعلا .. يلا راح اتصل ..

وصكر جان ديحاول بخلي رعد ميفقد وعيا ..لكن رعد جان دينزف اهواي دم ..
بعد نص ساعه تقريبا كدرت سيارة الاسعاف توصل مووحده انما ثلاثه .. اخذو رعد وصعد وباه صكر ..وكال لسامر ..انه يلحكه ..

سجاد بعد مضرب رعد واصابه ..كدر ينهزم بطريقه وكانه كل حظوظ العالم سقطت عليه في تلك اللحظه ..وكدر يخلص منهم بعد مالتهو ب اصابة رعد. حتى صكر وسامر مااهتمو انه يشوفون منو الي اذاه وانما فقط حتى يلحكون عليه. لايموت.
لكن المشكله الي جان يفكر بيها سجاد انه اذا مامات رعد يعني راح يكتشفون حقيقته. هو مخاف من الي انصابو البقيه لانه جان ملثم اصلا من جان يحجي وياهم ومجان شايف واحد وجهه غير اسماعيل لانه اتعامل وياه لوحده واسماعيل قتله. فبقى فقط رعد اذا حجا راح تكون نهايه سجاد. لامحاله ..

وصلو للمستشفى وهم يسابقون الريح ... المستشفى نفسها الي تشتغل بيها هند . جان طول الطريق صكر يفكر بهند والي راح يصير بيها لما اتشوف او تسمع عن اخوها انه اتصاب.
نزلو من سياره الاسعاف وخلوها على السديه وجانو اطباء الطوارئ بانتظاره دخلوه بسرعه على العمليات
بين ماصكر واكف ينتظر مرت هند من ذاك الممر من لمحته عبالها جان جاي علمودها. ابتسمت وراحت يمى وكالت.

هند .. لازم مظيع طريقك. لو شنو ..اني مااشتغل اهنا. .

اندار صكر من سمعها تحجي وياه. وجانت عيونه تحجي اشكال والوان .. هي كبل انتبهت عليه لانها صارت تعرف تقرا عيونه وكالت بعد مااختفت الابتسامه من وجها.

هند .. صكر. شكو . شصار. احجي.

جاوب صكر بتردد وكال .

صكر ... هند .. رعد

هند ... شبيه رعد. . صكر احجي شبيه اخويه ..

صكر .. رعد اتصوب. .ونقلوه لهنا ودخل للعمليات .

اهنا والمستشفى كلها سمع صوت صرختها على اخوها جانت حتوكع لزمها من خصرها وانتكت عليه. وهي تبجي وماتكول غير رعد اخويه. .لا اخويه.
شالها بالكوه صكر ودخلها لاقرب غرفه بعد ملتمو الاطباء والممرضين وعرفو بحالتها.
بعد دقائق ..كالت ..

هند. .. لازم ادخل للعمليات وياهم ..ماعوفه ..شلون وحده نايم واني مو يمى .

صكر ... هند الاطباء وياه انت شتسوين يعني اكثر.

هند ..لا لا ..مستحيل ..ماعوفى ولكم هذا الي بقالي من هالدنيا . لازم ادخل ..

خلال ثواني وكانه هند الي جانت حتموت بجي على اخوها . مسحت دموعها ..وكفت على حيلها ..طلبت اطب لغرفه العمليات وسمحولها .. لبست ملابس الخاصه بالعمليات وطبت ..وظل صكر ينتظر .. جان سامر همين وياه ..
دخلت هي للعمليات ..شافته شلون دايحاولون يطلعون الطلقات .. وحده اجت قريبه من المعده والثانيه بالكبد .. استأصلو جزء من الكبد لكن حالته مو مستقره ابد مرتين وهما بالعمليات نزلت ضربات قلبه ..جان نازف اهواي دم وحطوله بطلين ... وهي وياهم لازمه روحها متدري شلون .
لحد ماخلصت العمليه ..هي سدت الجرج وخيطته وطلعوه طلعت هي وراه جان تعبانه كلش نفسيا اكثر منها جسديا .. بس التفتت شافت صكر واكف ينتظر ..كبل راحت وبدون اي كلمه .. خلت راسها على جتفا وسحبت نفس عميق .. حظنها هو وكانه دايحاول يسحب كل الالام الي داتحس بيها ..كل الحزن الي هي داتشعر بيه على اخوها .. ضمها اله وكال ..

صكر .. انت تعبت صار شكم ساعه ..امشي ارتاحي بغرفتج ..

هند هزت راسها بلا. . لكن هو اصر عليها ..اخذها لغرفتها ..جان سامر دازه صكر للبيت بعد ماشاف اتأخرو بالعمليات .. وبقى هو بس ..
دخلها للغرفه مالتها كعدت على القنفه جان اكو وكعد وياها ..اتنهدت وكالت ..

هند .. خايفه كلش يالصكر ..خايفه على رعد ..تتوقع يصير زين

صكر .. طبعا ..طبعا يصير زين ..رعد انسان قوي وعنيد ..انشالله يصير زين .. بعدين انت جنت وياهم بالعمليات واعرف عن تجربه ..احجي ..

ابتسمت من داخل حزنها وكالت .. انت الي اتكول هذا الحجي وهو حالف يدخلك سجن .

صكر لزم ايديها بحنيه وكال .. خلي يصير زين .وانا راح انتظره يدخلني للسجن .. بس انت هسى لاتفكرين بشي ..تعالي ارتاحي ..

هند ..مااكدر اريد اروح اشوفهه...

صكر .. ارتاحي فد نص ساعه ..واصلا الدكاتره يمى ..واني اهنا ..لاتخافين ..

هند .. انت بس لاتعوفني ..

باوع بيها صكر ..عرف شكد هي محتاجته .. كال الها وعيونه بعيونها ..
صكر ... اني اهنا ..ماعوفج ابد ..

اتمددت شويه على القنفه جان اكو جرارجف للاطباء الي يباتون بالمستشفيات ..اخذ واحد وخلاه عليها وسد الباب وطلع ..
راح يسال على حال رعد كالوله بعد ممعدي مرخله الخطر لان اتعرضت اعضائه للتلف وممكن تتأزم حالته لكن ماكو شي بعيد عن الله ..
بعدين اتصل بسامر دايشوف شنو اخبار الي انصابو ولزموهم فجان رد سامر انهم طلعو من العمليات وينتظرون ان يصحو حتى ياخذو اقالهم ..
............................

رجع سجاد للبيت بسرعه وجان كانه دايحاول يخبي شي ..دخل بسرعه للبيت وكان قد الامكان يخفى حتى لااحد يشوفه .. وصل لغرفته طب بسرعه نزع هدومه كلها .. جان ديغسل ايديه وجهه كلش زين ..لان من اطلق النار على رعد جان من مسافه قريبه وطفر دمه عليه .. لهذا جان دايحاول يتخلص من اثار الدم الي صارت على جسمه وملابسه ..
وبين ماهو بالحمام ..طبت يمامه للغرفه ..باوعت على ملابسه نازعهم وقبل متشيلهم صاحت بصوت.

يمامه .. سجاد ..انت اهنا ..يمتى رجعت ..

وبين ماهي تحجي هو طلع بسرعه ..وهي داتشيل الهدوم ودادور بيهم شافت اثار الدم .. شالت راسها شافته دايباوع بيها .. كالت ..

يمامه ..هاي شنو سجاد ..دم .من وين ..

سجاد اخذهم من ايدها .وذلهم بالحمام وسد الباب .. راح يمها تقرب ولزم ايرها قوي جان حيكسرها وكال

سجاد .. اذا سمعت انه انت حجيتي بالي شفتيه لاحد ..لو كلمه وحده راح تتكسرين تكسير .. انت لاشفتيني ولاتعرفين شي .. والي اكلج عليه يتنفذ فهمتي ..

هي من شافته هي محجت شي غير بس اتهز برلسهه موافقه على حجيه ..بس شكت انه الي متورط بيه سجاد شكله شي جبير .. عافته وطلعت ..راحت غسلت ايديها .. شوي وتسمع حليمه تحجي ويا سامر وتكول ..

حليمه .. لا ... شداتحجي ياسامر صدك .. منو ضربه وشلونها هند ..

سامر ..مانعرف منو مصاوبه ..وهو هسى طلع من العمليات كالي صكر ..وهند شلون حالها ..اذا اخوها بين الحيا والموت ..

حليمه .. ياربي ..خطيه .. شوف ابني اروح ابدل وديني اروح اشوفها ..خطيه الله يعلم بحالها ..

سامر ..زين عمه ..انتظرج ..

ويمامه تسمع ..ظربت على صدرها .. اكيد هذا رعد الي دايحجون عليه ..لايكون سجاد هو الي ضاربه .. رجعت للغرفه ..وسدت الباب لكته دابخلي هدومه بعلاكه نايلون .. كالت هي

يمامه .. الي ضاربه رعد مو الضابط اخو الدكتوره .

بعد مكملت كلامها ..اجاها راشدي خلها توكع على الكاع ..بعدين رجع شدها من شعرها وكال ..

سجاد ..اني مو كتلج نفس ماريد منج ..ولج انت تردين اتموتين مو ..

يمامه .. عوفني انت واحد حقير ..واني اكرهك .. اذا عرف صكر راح اتموت بايديه ..

سجاد ..هههه ضحكتيني ..ولج اني بفيديو واحد اكدر اخليه يعيش كل ماتبقى من حياته بالسجن ..اذا سمع كلمه وحده صكر ..ماتلومين الا حالج .. عود روحي زوريه بالسجن ..لان ماكو دليل علي .

يمامه .. انت واحد ....

وقبل متكمل همين رجعها برلشدي لاخ طلع دم من حلكها دفرها وطلع مثل مادخل بالختله .. اخذ الهدوم مالته وحركهم بمكان بعيد .. وطلع راسا للمستشفى يروح يكمل الي سواه ..

لما صعدت حليمه حتى اتبدل ملابسها داتروح انشوف هند وتسال على اخوها .. دخلت على حنين لغرفتها شوف شداتسوي ..كانت حنين متمدده على الجربايه ومهمومه لان والدتها عرفت بالي صار بينها وبين طلال ..وعاقبتها .. لما دخلت حليمه للغرفه فزت حنين وكالت ..

حنين .. ها .. جيتي اتكملين علي بعد

حليمه .. سكتي ولج .. شوفي راح اروح للمستشفى يم مرت اخوج اشوفها لان اخوها اتصاوب ..حسج عينج تطلعين من الغرفه فهمتي ..

كامت حنين على حيلها وكالت .. شنو شصار لاخوها .

حليمه .. متصاوب وراح اروح واشوفه ..مثل ماكتلج اتسوين. .

وسدت عليها الباب ونزلت ..وظلت حنين بغرفتها .مقهوره على حالها ومقهوره على هند والي صابها. .
اخذها سامر لمرت خاله وراح يوديها للمستشفى ..بالظريق هي خابرت على جاسم وداتحجيله ..لكن هو مااهتم كثير بالامر .. لكن شك بالموضوع .. اتصل هو الاخر على سجاد وكال ..

جاسم .. سجاد وينك ..

سجاد ..اني يم المستشفى الي تشتغل بيها الدكتوره

جاسم .. ليش شكو عندك اهناك ..

سجاد .. جاي اكمل شغله ..

جاسم .. لاتكلي انت الي صاوبت رعد .

سجاد .. هاي شلون عرفتها بويه.

جاسم ... ولك ادري بيك .. شلون صار الموضوع احجي ..

سجاد ... بين مجنت داانطي الفلوس لاسماعيل وجماعته .ماحسينا الا الشرطه وصكر ابراسنا وبين مدانهرب حاصرونا .كتلت اسماعيل لكن رعد كمشني ردت اخلص نفسي منه اتعاركنا وعرف انه انه الي ورا العملية مال اخته .. وبهيج صاوبته حتى اقتله لان لو عرفو يعني اني وانت انروح بالرجلين ..

جاسم .. انت كل شغلك غلط ..وتكلي ليش اعتمد على صكر . وهسى هو ما مات يعني بيها مجال يكشفك ..

سجاد .. ماراح اخليه لعد اني ليش مرابط اهنا .. راح اكمل عليه

جاسم ..شوف ياسجاد ..ماترجع للبيت الا والشغله خالصه والا اكتلك بيدي فهمت .

سجاد .. لا ..ماارجع الا ومخلص على كلشي .. بس يطلع صكر من المستشفى وسهله ..

وسدو التلفون على امر احقر واغبر من الي قبله .. شغلتهم بس ينهون على العالم بطرق احقر مايكون.

وصلت حليمه للمستشفى ..جانوصكر كاعد برى يم غرفه هند .. لما شاف امه اجتي عصب ..

صكر .. شعندج اهنا ..

حليمه .. شلون ماتريدني اجي ..ومرت ابني الله الي يعلم بيا حاله .. شلونها ..

صكر ..نايمه جوا .. خليتها ترتاح ..

سامر .. شلونك انت ياصكر. مامحتاج شي .. وشكالو الاطباء على رعد

صكر واكف وايديه ورا ضهرا وكال . لا مكالو شي غير حالته صعبه .. والله كريم ..

حليمه .. يمى وليدي ..روح ارتاح اني ابقى يم هند

صكر .. لا ..ماعوفها ..وانت رجعي ..اخذها سامر وعينك على البيت ..

سامر ... لايظل بالك ..

حليمه .. اني ماروح الا لما اشوف هند واطمأن عليها وبعدين ..

صكر ..اي اوكي ..اكعدي اهنا لمن تصحى ..

وكعدت حليمه .. اخذ صكر سامر وابتعدو شويا ودايتشاورون .. كال صكر لسامر ..

صكر .. لازم نعرف منو الي اطلق عليه النار .. وقلبي دايكلي واحد قريب من عدنا .

سامر .. ياصكر واني هم دااشم ريحه مو طيبه .. واعتقد خالي اله يد بيها .. وسجاد هالايام ملازك ويا خالي 24 ساعه ..وهمسهم ميخلص

صكر اتنهد وجر نفس وكال .. والله اذا طلع شكنا بمحله .. محد يخلصهم من ايدي .. المهم خلي عينك عليه ..زين

سامر .. ماشفته طول اليوم .. واحس حتى ويا يمامه مو زين ..بس هي ماتحجي ..

صكر ..على كل .. خلينا نشوف وين راح نوصل وياهم ..
رجعو ووكفو يم حليمه ..
جانت بالغرفه هند نايمه وتحلم ..
شافت نفسها لسى بغرفه العمليات وداتطلع الرصاصه من جسم رعد . وفجأة يتوقف قلبه وتنتهي حياته ويموت .. فزت مرعوبه وعلى صوتها دحل صكر .. من شافها هيج ترجف كبل حظنها وهو يردد الها

صكر ..خلص ..لاتخافين .جنت تحلمين ..اني اهنا ..اني اهنا .. اني يمج .. اخوج لسى عايش

وراه دخلت حليمه وسامر .. وجانو دايواسوها ويخففون عنها .. بقو شويا .. ورجعت حليمه ويا سامر .. وبقى صكر وياها ..
راحت هي شافت اخوها لسى مثل ماهو ..لزمت ايده وهي تبجي وكالت ..
هند .. ياخوي .. اني من بعدك ماراح اكدر اعيش. كوم واصحى لاتخليني وحدي لانك دوم جنت وياي وتدعمني .. صرت انت امي وابوي وصاحبي وعزوتي ..

باسته من راسه وطلعت .. جان واكف صكر يستمع الها .. من طلعت اخذها من ايدها وجرها اله وباس راسها هو هم .. واخذها بالكوه وداها للكافتريا مال المستشفى .. جانت مماكله شي من الصبح ..
بذيج اللحظه ..دخل سجاد للمستشفى .. راد يسوي روحه انه دايسال على رعد كون هو نسيبهم .. فكالوله انه لسى بحاله خطره .. راح باوع للمكان الي هو بيه وشاف الوضع شلون حتى اذا يرجع مره لخ يكدر يخلص عليه قبل ميصحى ..
.........................

صبح الصبح سجاد نايم بالسياره قرب المستشفى .. وصكر ويا هند معافها لحظه ..ورعد مثل ماهو ماكو اي تغير بحالته ربما للاسوء ..
الساعه 8 .. جانت راجعه هند من غرفه رعد لما تلكاها صكر .. وكال

صكر .. لازم ترجعين شويه للبيت ترتاحين .. على الاقل اخذي حمام وغيري ملابسج ..

جاوبته بثقل وتعب وكالت .. مااكدر اعوفه اهنا وحدا

صكر .. هو مو وحدا .. مداتشوفين جايبين حرس اثنبن شرطه موكفيهم بالباب ..والاطباء اهنا مدايقصرون .. امشي وياي وسمعي كلامي. مااكدر اشوفج داتذبلين هبج كدامي واسكت ..

ابتسمت هند شبه ابتسامه من داخل حزنها وكالت. .

هند .. لاتخاف علي . اني هم عنيده مثل اخوي .. لكن راح اسمع كلامك واروح اخذ حمام .. لان من صدك محتاجته .

جرها لحظنه بعدين طبت للغرفه اخذت غراضخا ووصت الممرضات على اخوها. وطلعو .. من شافهم صكر دايطلعون من المستشفى جان هو لسى كاعد .. انتهز الفرصه .. من ابتعدو طلع هو من سيارته وراح باتجاه المستشفى دايكمل خطته الحقيرة. لكن مو بسهوله لان الشرطين الواكفين اباب غرفه رعد ميتحركون بسهوله من كدامها ..

وصل صكر للبيت .. اندار شاف هند غافيه على الكرسي ... وكف السياره وباوع بيها. جانت تعبانه طول الليل مكدرت تغفى .. لمسها من خدها .. وكام يحجي ويا روحه وكال ..

صكر .. لو تدرين انت شكد قويه. لو تعرفين شكد قوتج هاي داتأثر بالي حولج وبيا انا بالاخص ..عنادج الي مارضخ لي خلاني استسلم الج .. وقوفج بوجهي خلاني ماخاف عليج من اي شي لكن مع هذا وجودج بقربي دايأذيج .. اخاف في يوم اكون انا سبب تعاستك

خلا ايده على كتفها وصاح اسمها بصوت ناصي حتى تصحى وفعلا صحت على صوته يناديها. جان ديكللها انهم وصلو للبيت . نزلت والتعب امبين على كل جزء بيها .. جانت حليمه صاحيه تلكتها تسال عن اخوها ..وحلسم همين ..لكن سالها ببرود عادي جدا ..
حجت وياهم شوي وصعدت لغرفتها ..
رادت اطب للحمام مكدرت .. اخذها هو طببها ..رفضت اول الامر انه هو يساعدها لكن اصر انه يسبحها ..جانت حتى متكدر ترفع ايدها من التعب ..
كعدها بالحمام .. وملى البانيو مي وكان هو يفرك ايديها واكتافها بالصابون والماي الحار يساعدها حتى. يرتخي جسمها .. بعدين كامت نشفها ولبست ملابسها .. هي بدون وعي راحت واتمددت على الجربايه واخذتها النومه ..جانت تمشي وكانه جسد بلا روح لهالدرجه اصابه اخوها مأثره عليها ..
من شافها نايمه عافها ..كال اخليها ساعه اتنام وبعدين اصحيها ..
لكن هي بعد ماغفت نص ساعه فزت متخوفه وتلتفت حواليها جان اتشوف كابوس .. كامت على حيلها بسرعه ونزلت .. جانت حليمه كاعده بالمظبخ ويا نضال وسميه .. نزلت هند مرعوبه وادور على صكر.

هند .. وين صكر.

حليمه ..يمى اسم الله عليج شبيج بنيتي

هند .. خاله ..وين صكر ..خلي يجي اريد ارجع للمستشفى اشوف اخوي

حليمه .. صكر برى ويا رضا .. هسى اصيحه ..

هند .. لا ميحتاج اني اروح ..

وفعلا طلعت هند بسرعه واتصيح باسمه ..التف عليها .ومن شافها هيج مرعوبه خاف ..

صكر .. شبيج هند. ليش كعدتي ..

هندتحجي بعصبيه وتكول ..انت شلون اتخليني انام .. لازم ارجع للمستشفى

صكر .. هسى اوديج كلت تاخذين راحتج شوي ..

هند ..اخذت راحتي وزايد ..اخوي بين الحيا والموت واني اهنا نايمه .. رجعني حالا ..

صكر ..اوكي .. نصي صوتج .وصعدي .. وانت رضا دير بالك مثل ماكتلك

رضا هز براسه. . وصكر اخذ الدكتوره وطلع .. اندارت عليه هند وكالت ..

هند .. شعندك انت ورضا ..

صكر ..ماكو شي

هند .. شلون ماكووشي ..ومن شفتوني سكتو. . تعرف شي عن شغله رعد ومحبي علي

صكر .. لا مااعرف ..

هند .. لاتخبي علي ياصكر ..

صكر ... كتلج ماكو شي .. واذا اعرف اروح اكول للشرطه مو الج ..

هند اتعجبت من رده وكالت .. شعجب راح اتصير. اصحاب ويا الشرطه ..

صكر. لان هسى هدفنا واحد ..نعرف منو صاب اخوج ..

ورجع سكت لحد ماوصلو للمستشفى .. هي مصدكت راحت داتشوف اخوها .. جان واحد من الممرضين واكف داينطيه ابره بالمغذي .. اجت عليه ركض وكالت..

هند ..هاي شداتسوي ..

الممرض محجا شي .. لكن دفع هند وطلع بسرعه .. صكر جان واكف بعيد شوي يحجي ويا واحد من الاطباء .. لما شاف هذا يركض ..وهند صرخت . بدا يركض هو هم وراه .. الممرض جان حاط ماسك على وجهه هو يركض وصكر يركض وراه. وبين ممر لممر وبين غرفه لغرفه ..وجان يذب كدامه غراض اتعثر صكر مرتين ..وكدر هذا الممرض ينهزم
اما هند ..فكبل رفعت كل الاجهزه من عليه وشالت المغذي من ايده لان شكت بيه . وكامت تسال الشرطه الي واكفه .. من يمتى وهو اهنا هذا الممرض . فكالولها انه هاي ثاني مره يدخل للغرفه . هي اتخبلت. ورجعت لاخوها داجيكه ماكو ثواني وبدا جهاز الي مربوط على صدره يطلع صوت .. ينزل ضربات قلبه لحد ماصفرت ..
حاولو ينعشوه مافاد .. صرخت هند صوت رج كل المستشفى ..بالكوه طلعوها من الغرفه ..وغطو الاطباء وجه رعد .. مات رعد .. ومااحد كدر يعرف منو الي قتله ..

وصل الممرض لسيارته الي جان راكنها قرب المستشفى وحرك بسرعه .. لما ابتعد باوع بالمرايه بعد ماشال الماسك من وجهه وكال

سجاد .. وهاي خلصت من رعد .ومحد راح يكدر يكول انه انت الي ضربته. اتخوفني بذكائك يارجل .
( فلاش بالك )
بعد ما هند وصكر طلعو من المستشفى راجعين الصبح للبيت .. سجاد دخل للنستشفى حتى يخلص على رعد قبل ماممكن يصير زين ويكشفه .
كدر ياخذ هدوم مال ممرضين وماسك مال مستشفيات ..بدل بالحمام وطلع .. جان جايب وياه ابرتين مال معدن الزيبق الي تركيزه كلش عالي .. وهذا يأثر على القلب ويخليه يوكف .. ممكن يشتغل بحينه وحده بس ..لكن هو راد مايخلي شي محتمل انه ميتشغل ..
وبهيج دخل اول نره بحجه انه ممرض محققو وياه الي واكفين على الباب .. وفرغ اول ابره بالسيلان الي معلك ابيد رعد .. بعدين ورا ساعه تقريبا دخل فرغ الثانيه .. ولكن بدقائق وراه دخلت هند وصار الي صار .. لكن على مايبدو جانت اول ابره كافيه ان تقوم بالواجب وتقتل رعد ...
..................

مات رعد ..جانت من اقسى واكثر اللحظات انهزاما لهند .. حست انه الدنيا خلاص كلها اضلمت كدام عيونها . صحيح هي قويه لكن قوتها مكفتها حتى اتجابه هذه الفاجعه الي اصابتها .. ماتركها صكر لحظه وحده وجان جنبها هو وامه واخته حتى سامر ورضا .. اما البقيه فجانو بعيدين نوعا ما رغم العزا الي قام بيه صكر لاخو زوجته . اجتي العالم من كل ناحيه وصوب ..حتى علي هو وزوجته جانو موجودين بالعزا. .
الفراق جان كلش صعب على هند. فقد اخر شخص بعائلتها ... صكر كان متخوف وتعبان اكثر منها ..كان يشك انه عائلته او احد افرادها هو السبب ..كان متخوف لايكون زواجها منه ودخولها كاحد افراد عائلته خلاها تخسر بالاول والاخر اخر واحد من اهلها .. وهذا الشي الي كان مأذي صكر اكثر شي وهو يشوف الحزن والانكسار العميق بعيون هند المرأة القويه الي ماخضعت ابدا اله ...