الزنبقة السوداء

الحلقة 41

الزنبقة _ السوداء
داليا _ المسلم
حلقة _41_

أماني

- وصلنا  للشنافية  طبينا. لمنطقتهم او حارتهم  همه ايسموها لان كلهم كرايب مابيهم غريب  بس احلى شيء   ولد عم  جدي  ابو حقي   هنا  ٧ بيوت
بيت  السادا  قيصر كالي  واحنا بالسيارة
سولفلي عليهم

وكفنا يم بيت  صفنت عليه

قيصر - هاذا البيت انزلي يالله

- نزلت ونزلت الجهال  نزلو الولد اجاني 
نعمان سلم عليه  وراح اينزل الغراض  قبل لا ادخل صار بوجهي سعيد  من شافني. عود شنو خجل 

- اشونج ام آماسي  خوية ،،

- يحجي ويتلفت  بخجل  اعاين عليه كبران صاير عمرة  ١٨ سنة وجها خاط    ( الشوارب ) هلا بيك   اشونك عمتي اشونها

- بخير اسلم عليج

- الله يسلمها عفته ودخلت  انه والجهال  قيصر كالي فوتي بالمطبخ لما نكمل تنزيل الغراض

اعاين البيت  غرف داير بس  اشون الداير هما بيوتهم هيجي اتلاث غرف ومطبخ  وصحيات وبنصهن الحوش
كملو الولد  تنزيل الغراض

طلعت صحت لقيصر
- قيصر جيبلي الطباخ خاي اسوي غدا للجهال
وبعدين ابدي  ارتب  الغراض

- عوفي  هسه ابدي رتبي  البيت  ام ابراهيم بيت السيد  جيرانة راح اجيبلنا غدَا
( زوجها  ابو ابن عم جَدِي )

عافني وراح للغرفة
بديت ارتب  بالبيت جريت  البوفية  وقيصر  فتحلي الصراير  وضليت ارتب بالفراش   وقيصر راح ايشد الغرفة  بين ما كملت   الغرفة مال الفراش  ونداريت للغرفة  لكيته مكمل الكنتور هو والولد  فتحت الجنط

ورتبت الهدوم  وفرشت الغرفة   والجهال خبلوني  بس
ايهوسون  اندك الباب  وقيصر  صاح على الولد

- سعيد روح افتح الباب

- راح سعيد  اشوية وفات علينه  بيدا الصينية

ذبها بالكاع
- أكلكم  هاي بيت  سيد ابراهيم  العجوز بالباب جابت هاي الاكل  وتريد اسلم على أمونة

انداريت عليه
- عليه  ...!

- اي  تريد اسلم عليج  هز راسه  وكعد ياكل

- خوش راح اطلعلها  عدلت ثوبي وطلعت  عليها واكفة بنص الحوش  مره  كصيرة سمينة  لابسة  شيلة بيضة  تلكيتها

- هلا بيج حجية نورتينا فوتي تفضلي  حضنتني
وباستني

- يمة هلا بيج وبريحة خالي حقي هلا بيج. اشونج يمة  چا نورتي الشِنافية  اليوم 

- منورة بيكم حجية  تعاي فوتي تفضلي 

- لا لا خليها غير مرة

- ادنت عليه و همست يم اذني 

- شجاباج يا يمة هنا  عقلج وين  جان من جيتي

اماني - وخرت منها وضليت صافنة بوجها ردت احجي طلع قيصر سلم عليها وراح للحمام
خفت يسمعني.  كتلها خالة چاا اشون غير اتبع زلمتي  تعاي فوتي  اشرتلي  بيدها

- لا لا  بعد روحي  غير مرة كملي تعزيل تحتاجين ادزلج البِنَات  يعاوننج

- لا الله يسلمج وعلي خلصت ماضل شيء ومشكورا على الغِدا 

- الف عافية يمة

- ودعتها وسديت الباب ورجعت  وكلماتها خوفني
ودخلن الريبة بكلبي ( قلبي )

يومين انه ارتب البيت   يالله  كملت

نسوان اخو محد اجتني  لان مرته  ياسر اخت زوجت احمد اخوهم الجبير وبنات خالة حسنه. اكيد  واكفات ويه حسنه

قيصر  كام من الصبح ايروح  لبيت حسنة مو بعيد علينا براس الفرع  والمغرب يجي يعني ريِوكة وغِدَا يمها وعِشا يمي

حضرت العِشه وكملت  الجهال نعسو عشيتهم ونومتهم
وانتضر قيصر يجيني وماكو  لبعد المغرب طبلي
تلكيته حضرتلة الحمام  سبح  وصبيت العِشه

كعدنا ناكل

بدا ياكل سألني
- چاا وين الجهال

- نامو  خطية من المغرب نومتهم  رفع راسه وباوعلي
ليش شكو شعندج شو بس انتِ  خليهم ايونسونج

- لا والله. شسويلهم اذا نعسو وكامو يبجون
سكت وباوعلي صفح ضايج  ماحجيت وياه كمل وكالي جيبي الجاي بالغرفة

شلت الصينية ورحت  غسلت الإماعين وسويت الجاي ورحتلة  خليته اله على الميز شو  هذا صاح بيه

-  بعد وكت بعد نامي  شكو جبتي هسه ،،!

- انداريت  ومدتت  بصفة  وحضنته خليت رأسي على صدرة  اشبي حبيبي ليش ضايج 

حسيته برد  وسكت كام يدخن  
- مابية  بس انه بعت اللوري  واشتريت سيارة  (اوام ) ومن باجر اطلع بيها سفرات لبغداد لسامرا للموصل  اخاف اروح ممنوع تعبرين الباب حدج بيت السادا وبس خوش  واوصي عمامي عليج عود

- هزيت راسي بصار وحضنته حيل كتله قيصر حيل مشتاقتلك كلش انتَ صاير كلش بعيد عليه  رجع ورث الجكارة وضل ايدخن

- تعبان انه أمونة  كلش  الحجي  واللغوة زارفة رأسي 

- منين كلي  شنو الحجي   سكت وضل ايدخن

- لا يظل ابالج ماكو شيء

- حضن وجهي وضل يبوس بيه  بشوق ولهفة
ومرات. يبتعد اشون واحد يكش

- اشبيك قيصر بيه ريحة انه ،،!

- لا ورد ريحتج بس انه مابيه تعبنان اريد انام

- عفته ماحجيت  اخذني  لصدرة وحضني بقوة
ونام 

ومر  شهرين  طول إلايام   على كعدتي بالشنافية قيصر ايروح للشغل  او من ايرد  ايروح بوجها لبيت حسنه وبليل يجيني. مرات يسوك  ايذب المسواك  بالباب  ويبوس الجهال ويروح

انت العِصريات  اروح لبيت  سيد ابراهيم  واعوف الجهال يلعبون ويه  جهالهم  السيد   بس عدي
صغير  توا يتخطة واخافن عليه ينطك  شيخلصني من ابوه  بس بيت السيد اروحلهم  جنت كاعدا اسولف ويا العلوية   عدها ٦ حموين  كلهم كاعدين بهذا الداير الي مأجرلي  بيه قيصر  كلمن غرفتين اله ومطبخ وبنص حوش الهم كلش جبير بية. زيتونة كلش كلش جبيرة  عمرها قديم ومسوية في بالحوش

من ايروح ايكلي أمن لان همه يمج وكلها تدري بيهم خوالج  جانت الهم سمعة قوية بيت  السادة  والناس  كلها  تخاف  منهم محد  يندك  باالي  يرجعلهم 

جتني بت العلوية

- عيني أم  عِدي هاي  ام البيت الي مأجرين منها ام جاسم  اجَتَكم وتريدج  بالباب

حجت العلوية
-كومي يمة شوفيها  اكلج

- كمت وكضت ايدي وكالتلي

- ترى هاي اصير بت خال حسنه

- اشون لطمت خدي يا ياخالة اخاف اتأذيني

- لا لا تخافين هاي عاشتلها سنتين بااطراف بغداد
ويه بتها وعودن  شنو تثقفت  ما اطك تستحي
روحي  يمة شوفيها  شتريد

- كضيت عِدي وعدلت عِباتي ورحت صحت آماسي
جيبي اختج وامشي وراية    طلعت للبيت  لكيتها واكفة يم الباب   اعاين عليها  تنطي شبها لحسنه
وسمره  طوخ    وشايلة جنطة جوا العِباية
عود شنو انه مثقفة  شوفوني

وكفت يمها  وسلمت عليها  باوعتلي من فوك ليجوى
وكالتلي

- يااا  چاا انتي الي اخذتي رجل بت   عمتي  ام ضرار  وتأشر بصبعها  عليه من فوك  ليجوى   بالله اشبيها أم ضرار  وخذاج انتِ عليها  وكسرها والله وسفة اي والله  ماخفتي من ربج  من هجمتي بيت

- انه سكتت شحجي وياها  فرت ايدها  وعدلت جنطتها  أم جنطة  ومشت راحت  انه سكتت عنها
طببت البنات وطبكت بابي  ذبيت عِباتي

.
.
.
.

ودخلت  للهول  وكعدت الجهال تعاي آموسه  اكمشي  عدي  لا يطيح. عفتهم ودخلت للغرفة واشوف غراضي مطشرة  بالكاع كلهن هدومي. نصهن مشككات
والصور نصهن ماكو. ملات عرسي   عزا العزاني

منو سوا هيجي بيه ليش  فتشت  غراضي ادور على فلوس قيصر  همزين ضامتهن بنصدوك  ومقفول  ماملعوب بيه  انه عرفت منهن.  هذا الملعوب سكتت ولميت هدومي وعدلت الغرفة 

للمغرب. كملت شغلي والعِشا طب قيصر  جان ابيت حسنه  تلكيته   جان سابح ولابس دشداشة  بس معقجة كلش  ماحجيت وياه. الله يساعدك

راح كعد يم الجهال. وصاحهم
- هلا بيج تعاي دنيا  تعاي بعد ابوج

- وكفت فوك راسه متعشي  لو اصبلك

- لا متعشي. اكلج اليوم اجت أُم جاسم ،،!

- كعدت يمه اي اجتي  وسولفتلة شكالت

- ميخالف مالج  شغل  بيها  محروك كلبها  على بت
عمتها   اجت  اتريد الاجار انطته الها

- قيصر انه ماخذيتك من احد ولا ردت اهجم بيت
انتَ ليش ماتوكفن عد حدهن  ترى وعلي. لعبت روحي كلش  جا ايحسسني انه هجامت ابيوت  وبايكت بوك

- كافي اسكتي خليهن يولن  من غيرتهن يحجن هيج نسوان شيسكتهن  لا وانوب كلهن  كرايب  اكعدي.
وسكتي مالج شغل بيهن

- كمت وكفت طكت روحي. ترى ماصايرة هاي قيصر
رحت جبت اهدومي المشككات وذبيتهن كدامة

شوف اليوم شسون من رحت لبيت السيد طكت روحي وطلعت  يمة العلوية اشوية من رحعت لكيت ملابسي مشككاتهن والصور نصهن ماكو

كعد يدخن وصافن عليه
- خاف بزونة وكالبه  الغراض ميخالف اقفلي الباب من تطلعين انوب  مو بس باب الحوش  هاي بزون مخرمشتهن

- صفنت ابوجها. قيصر مكص مكص  شوف
كمت اشيلهن بيدي واطرشهن  بالكاع
شوووف مكصكصات

دفع ايدي وطشرهن بوجهي  عاط بيه. لميهن وسدي حلكج لا اكوم اشكة  الج كافي  جاي اكلج  اسكتي

- سكتت عنة ولميتهن بعلاكة و وطلعت ذبيتهن بالزبالة
ورحت للغرفة كعدت ابجي اختنكت كلش مشتاقة لاامي لااخوتي خواتي  اجتني آماسي حضنتني ومسحت دموعي

- يمة لاتبجين  انه احبج

- حضنتها  ماابجي حبيبتي ماابجي عدي وين

- يم ابوي جاي ايلعبة  ودنيا همات يم ابوي
- خوش  تعاي اصبلكم عِشه

عشيت الجهال ونومتهم وهو اجاني جنت اشر هدوم
غسلت كم هدمه ليش ايضلن للصبح ويصير بيهن ريحة   جنت واكفة  اشر  بيهن ماحسيت بس الحضنة مالته  وهمس يم اذني

- لاتبجي كافي  انتِ ليش  اضخمين  الامور  كتلج سدي  الموضوع  وخلاص  تعاي  عوفي  الهدوم

- كملتهن  روح  هسه اجي  وراك. عافني  وفات
كملت  ودخلت  لغرفة  الجهال  ذبيتلي  وسادا بصفهم ونمت  ضليت  اعاين على  جهالي  اشون  بيه
لما انتُ  وعلي ولا  اضل عدا   تعبني ابوكم  حيل
خذتني النومة  انه وغافية حسيت بقيصر نام وراية
سحبني بحضنة  وخلاني على ايده ضل يبوس بيه
دفعتة وردت اخلص روحي منه  قيصد ايدي بحضنة
وهمسلي

- ليش تعوفيني   وحدي مو تدرين  مااعرف انام اذا انتِ  مو يمي  شحجينة  احنا امونة شسويلهن كليلي اروح  اعارك  نسوان  هاي  فرغن كيدهن بالهدوم  خل يولن  باجر اخذج لبغداد عناد بيهن  وشتردين اخذلج  هاا عايل وياج 

- سكتت ماحجيت  حضني وضل يبوس
همستله قيصر الجهال نايمين مايصير عيب وحرام  وخرر   ولا جنة  يسمعني  سحب ثوبي  مني

——————-

الصبح كعدني  من وكت 

قيصر
- كومي بدلي للجهال وبدلي اليوم ننزل لبغداد

- يعني صدك تاخذني

- اي صدك  على شنو اجذب عليج فضيني

- صدك كمت غسلت وحضرت اله  الحمام ورحت كعدت الجهال  وغسلتلم  وبدلتلهم وركض ركض سويت ريوك  هو طلع  بدل  واجه  تريك  وانه رتبت  البيت 

لميت  جنطة هدوم  النا وطلعنا  لبغداد. وانه مامصدكة
راح اروح لبغداد  كلش مشتهية ازور الكاظم ابو طلبة بعد عيني

.،،،،،،،،،،،،،،،،،،،،،،،،،،،،،،،،

أُم جاسم
يبو وين صرتي  يحسنة دهرر 

انفتح الباب
حسنة
- هلا هلا بخيتي أم جاسم هلا هلا فوتي تفضلي

- وينج صار ساعة ادك  بالباب   شنهي نايمة

- اي والله   كسرتها هاا شوية  تعاي تعاي
خية اكعدي هنا

- اكلج لا اريد اروحن  مو مال كعدا  البارحة مريت لبيتي الاجرته  للمسعدا ام الدواير ( الدوائر)  ضرتج
ولج هاي المفلوكة  زينة بيها بركة بس مبينة ملعبة
وبرعة  لفت الزلمة الها....

- خلها تولي تلف الزلمة شني  وربج اذا مادولابتها
اصبريلي  كلها  خليتهم  يحفرولها چاا انه حسنه
اذا مالبستها فضيحة. واخليها صدك  الناس اصدك
بيه  كح.........

- چاا خوش ايطبخا ستين مرض ام الرجولة

- صدك اكلج جبتي الوصيتج عليه لو لا ...!!

- اي خية هاج فتحت الجنطة وطلعت جيس ملفوف
هاي الامانة من أمج 

- جيبيها خية شكد ضليتي هناك بالنجف

- اسبوع شبعت زيارة وتونست  وجيت  اسبوع الجاي اروحن لبتي  اشوفنها  اكلج چاا وين ولدج ماكو

- مااعرف  تريكو وطلعو يلعبون  لو يم بيت عمهم لو شوف وين

- ياا خية لا يضيعون مايهتهم

- ماعليهم شيء خلهم يولون هما وابوهم ابتليت انه
هو يعرس وانه مبتلية بخلفتة المخالفة

جاي احجي  واسمع عياط اباب البيت
كمت ياا يخية  ياام جاسم هاي الولد  بس لا تعاركو
طلعت اركض  واشوف  ولد واكف  ومفجوع راسه

.............

أماني
- قريب المغرب وصلنا  لبغداد انه ماندل  شيء بس اعاين  البيوت شحلاتهن  والعماير. السيارت. الشوارع نضيفة تبرك برك. المحلات  تخبل  الناس  شكولها  خلو  ونضيفة  اعاين من  جامة السيارة

هاي الي  لابسة  تنورة  وقميص كصير  وزلمتها لابس
قاط  الي  لابسة  بنطورن  جارلس  وقميص  عريض
لو  النفانيف   والشعر اخر الكصات  والله فكرت اكص شعري  عدي قلقني بس يبجي

اكلك قيصر ماوصلنا

- اي ما ضل شيء راح انطب الكاظمية شوفي
هاي  بغداد  شكد حلوة  

- اي تخبل بغداد من هاي ابوي الله يرحمه جان كل مدة وغاط لبغداد ثاريها ماتتيه ابد

صدك وصلنا للكاظم  خلة سيارته  بالكراج  ونزلنا خذانا لفندق. قريب على الأمام من شفت  قبة الكلظم بعد  عيني  صابتني قشعريرة  بجسمي  من الفرح 

دخلنا  لفندق الكاظمية  حجزنا قيصر  خذا الجناسي مني   وكمل  حجز الغرفة  شال الجنطة وصعدنا
وانه احس روحي بحلم

دخلنا للغرفة  سراير اثنين   كعدو  الجهال على سرير
اكلك قيصر انه الجهال  وين انومهم

- هاي بطانية افرشيها وخلي وسادا ونميهم انه فايت اسبح  وبدل والجهال مارضو ينامون

- كوم انروح انزور  غسلت بساع وللجهال وبدلنا
ونزلنا   ليل  والجو حلو  والشوارع تخبل. والاضوية مالات الأمام تزهي. دخلنا زرنا وصلينا 

كعدنا بالساحة  احس روحي ردت شكد دعيت الله يسهل معاملة امي ويحفظ اخوتي وقيصر يهدي علينا دوم

- كومي نتعشى خطية الجهال جاعو

- طلعنا دخلنا المطعم  نزلنا كباب. يخبل طعمة
وكلاصات لبن.

وطلعنا افترينا الاسواكة مالتهم تخبل احلى من اسواكنا  قيصر  لزم ايدي  وكالي

- تعاي انطب للصايغ اخذلج حلقة  هو جان شايل
عِدي وانه كايدا البنات  خذالي حلقة
جانن نسوان كدامنة يشترن ذهب   كلش عجبني شعرهن.  كلت الصبح اكل لقيصر. ايوديني   للصالون واسوي شعري. خذالي حلقة  وكالي شتردين اخذي

- لا ماريد كافي هاي هواي. دفع الحساب وطلعنا
دعيت الله يبقى هيجي وياي مايتبدل

فوتني لمحل مالت ملابس

- ياله عوفي البنات يمي وروحي اتخيري شتردين اخذي

خذيت ملابس نوم وخذيت ثوابة اربعة ماخليت بنفسي شيء 

اعاين النساس كلماً عليه بروحة چاا شبيكم انتُ  يااهل الشنافية تاكلون الوادم

ثاني يوم توسلت بقيصر  أكصن  شعري
كالي اكطعج
اتكطع واربطج  بالسيارة واسحبج وعلي  هذا الصالون  اتفوتين  تحفين مدري شنو. وطلعين

ضلينا يومين وبالثالث رجعنا  طول الطريق انسولف
على الناس  والبيوت كلش حلوة بيوتهم

طبينا  للشنافية  وانه روحي  انكربت  وصلنا  لبيتنه
توا قيصر وكف   السيارة   واجه ابنه ضاهر الجبير
يركض

- بوية بوية وينك 

نزل يركض قيصر وانه ورا  عاط على ابنه شكو اشبيكم  ولك

- بوية هاذا ضاهر طك صديجة وفجع راسة من
البارحة  علمود  الدعبل  وكضو كطعوا  واحنا كطعناهم. وأمي طلعت تعيط وتغلط عليهم  انفضحنا بوية وعلي

- وانتَ وين جنت عن اخوك يا الثول ...!

- انه جنت يم بيت عمي بوية هو ينكض  اشو النهار كله  دايح  من  انتَ تطلع  مايلفي للبيت  بوية الوادم هدو علينا  وأُمي طيحت روحها  عادو رجعو  وعافونة

- دمشي كدامي انعل ابَوُكَم لا ابو اُمَكَم

أماني
-  شمر  المفاتيح علية   مالات البيت وخذا ابنه  وراح  لبيتهم  انه فتحت الباب. ودخلت  الجهال  وفتت  للبيت  ورجعت  نزلت الغراض  ودخلت سديت  بابي

دخيلك  ربي شنهو  هل الولد  كل رحمة   محمد ما بوجها  فاتو  الجهال  للهول  ذبيت عِباتي  وبديت انضف البيت

دخلت انضف  الغرفة واشوفها  كلها رماد الفراش
والكاع   اخترعت  من المنضر  باوعت  للسكف
عداي  ما واكع منه  لا مابيه  شيء

ياا هذا عجاج يمكن صاير. نكتت  فراش الجرباية
وبديت انضف   يم الباب  شفت صمة اضافير مالت حِيوان حيل خفت    لميتهن وذبيتهن بالزبالة

لليل نومت الجهال وانه مددت اعاين على التلفزيون
انتضر بقيصر وماكو. هسة يجي هسة ماكو
خذتني النومة  للصبح
فات قيصر واحنا نتريك  صبح علينا وكعد

- هلا بيك متريك لا ،،!

- اي تريكت  بس حضري  الجنطة مالتي
باجر أمشي للوحدة التحق

- صار كعد عُدي  بحضنة وضل  يدخن

- اكلك قيصر شصفت سالفة ابنك
خذا نفس بقهر وذبا

- والله انعل ابو  لا ابو اليوم  الشفت وجها بيه  حليناها هذا  الولد كلش  موزين  شسويلة  كليلي سوالي مشكلة. من جنت مكعدهم  بالنجف  وهمات  فضحوني  فضيحة  و يه  الجيران شيلتهم  للشنافية  وين اكبرهم بعد  خرب بحضي

ضليت اصبر بيه  كلت بكلبي  هاي تربية
بت عمك حايرة بس  بالقال والقيل
ومتيها خلفتها

ثاني يوم مشى قيصر للدوام. الصبح
كاعدا  اغسل اماعين  بالحوش
والجهال تلعب يمي. اغسل وابجي
جنت حيل مشتاقة لهلي  قيصر وعدني من يجي ياخذني ليهم    الباب اندك ونشمر  من جواته
ضرف  راحت آماسي تركض جابتة  ونطته الي

فتحتة. واشوف صوري ملات العرس مكصكصات
صور قيصر ماكو. بس صورتي وياهن ورقة
اشكال الفشاير والغلط بيهن

كحبة ساقطة.  جم زلمة 
نمتي بحضنة كبل قيصر  ووووووووو
كلام مايلبس  عليه ثوب   تحلمين تاخذين
قيصر بس الج  اخوج الكواد ليش عفتي
جان خوش يشتغل .....
وينه صديجج الي يدخل  للبيت
من ايروح زلمتج 

ضلت لشتي ترجف من الحجي هذا عمري كله
ماسامعة  مثلة بحياتي. شعر راسي وكف
دنيا تعت بثوبي

- انطيني حِلاوة ماما اريد حِلاوة

- ولج انه بياحال  تعاااااي آماسي اخذي اختج
انطها التريدا
جريت عِباتي وانه ارجف  رجيف
من الحجي. آماسي انه هسه اجي لاتفتحين الباب لااحد فهمتي هزت رأسها
طلعت وطبكت  وراية   ورحت شايطة لا أم ابراهيم
وانه دموعي تكت  دكيت الباب طلعت مرت حماها

- اشونج خالة وين العلوية ام ابراهيم

- يا يا  يمة شمالج تبجين تعاي تعاي دخلي جوا
امشي  اشبيج يمة 

- اريدن  اروح لبيت ام ضرار واريدها تمشي وياي
خاله  شوفي شسوو وشمرولي
خذتهن من ايدي وعاينت بيهن
كضت ايدي

- تعاي يمة تعاي 

- كعدتني بالحوش وكالت لبنتها اصيح العلوية
اجت وشوفتها وقريتلها الورقة 
كاللي

- كولي يالله من كيدهن  الكاتلهن  عوفيهن
من غيرتهن  انتِ اشرف منهن كلهن امهات السحورا
خية معروفات شنهي هنه  امهات خيسة حتن محد
ايطق جيفتهن امهات الصنان

- ضحكني  وانه ابجي اشون  ايكضن خشومتهن
ويحجن بجيفة حسنه 

- كومي روحي لبيتج ولا تنفهين الها وتنزلين لمستواهن
كومي  زلمتج يحبج ويودج  لوما يحبج ما يبات كل الايام يمج  عبن شنو ما يكدر يفاركج

ام موسى كالت
- هاي يايمة مو اول مرة كل مرة ايذبن  الج وبنتي مو تلعب بالدرب. اشوفهن  واجيبهن النا انه
اكضهن واحركهن حريكة واخلي الفروخ يشخون عليهن

- ضحكت وام ابراهيم كامت تضحك سلمت عليهن
وبوست رؤسهن  ورجعت للبيت

وستمرت مناوشات حسنة ليه  يوم
زبالة الكة باالباب
لو خيس ايطشون من فوك السطوح  لان  بيت
ياسر بعد بيت عن بيتي  ومنه يصعدون
وبصفي بيت عم  قيصر بس كلش ولدهم مو خوش
من اطلع لبيت السيد
ايذبولي حجي كلش ماصخ وفاسد وانه اسكت وابلعها

رجع قيصر او لوكلت اله. يتعارك وياهم واصير مذابح
ويلطخني زايد مو ناقص 

خذاني قيصر لبيت أهلي

- الج يومين بس  والثالث من غبشت الله يمج
فهمتي 

- بس قيصر  صارلي اربع اشهر شنو يومين وعلي
مشتاقة الهم

- هذا العندي مااكدر افوت البيت وانتِ  مابيه
فهمتي

- سكتت شسويلة بعد وصلنا لااهلي ذباني ورجع
بس كالب خلقته كلش. حتى ماي   ماشرب

سلمت على البنات وعِلي بعد روحي  رد من الدوام
والعصر ايروح للشغل أمي ماكو

- وينها أُمي بيداء وين راحت

حجت بيداء بقهر
- خذت حسين  وراحت للكاع  بنت هي وعِلي
غرفة هناك بنص كاعها وكعدت بيه

- يايمة لطمت صدري. صخام بعينهم انداريت لعلي
كاعد يتغدا. اشون عفتها عِلي اشون

- مارضت  امونة شسويلها. هناك كلهم عمامها
ماعليها شي بنيتها الها بنص كاعها   وبيت عمة
بسعادة عاونوني  تكعد بالنهار يمها وبليل اخوة
عمة بساعد ايكضون الها حراسة. ونطوها
دفكة  وهيه تعرف ترمي بيها  وعمة بسعاد ماتركتها ابد حتن  تنام وياها

- ياااا  چاا صدك ،،،!

- وعلي رمت  جوات ابن عمها خمس جيلات
هزمته. خايبة المشخاب كلها تحجي بسباعيتها اسبوع الجاي تروح عدها جلسة حكم الكاع بحيل الله ترد الها  حتن المحامي  خذت الوكاله منه

- الله  كريم  بالكي الله  وترتاح وعلي أُمي
جابتها كله تعب بتعب  واحنا همات مثل حظ أمي

ضليت ليلتين عد اهلي تمنيت اشوفن أُمي حيل
مشتاقتلها وصدك ثالث يوم من غبشت الله  جاني قيصر. يهف  خذاني للشنافية  

مرت سنة وأُمي كسبت قضيتها  على ولد  عمها
بنفسها واكفة كدام الحاكم. وحاجية سالفت الكاع وهيَ عدها مستندات   ونطاها حكها الحاكم

وتنفهو  اهلي شوية وباعو الكيعان وتقسمت  هيَ وخواتها......

وانت كبرو جهالي   وقيصر  كله رأسي على الحبالة
توا  عدي سنة ونص مدري شعجب  خلناي اوصلة
لهل عمر ابدون حبالة وحبلت  وكيف قيصر

بيت  ياسر عدها ٨ ولد  اصغرهم طهرو  ورحت ويه
قيصر الهم   بعد الغدا. كاعدين كلنا  
يشربون جاي. وانه كاعدا. يمي بس مرت ياسر
كلهن ليغاد مني. ويتباوعن الي بكره وحقد

كال ياسر انه جنت احبن وحدا. من  الديوانية
كلش  وصلت  حد الزواج.  بس من رجعت  وشفت
ام زهير  كلت  الماياخذ  من ثوبة  هذا مو اصيل
لاتزعل  مني ابو  ضرار

( عذراً للالفاض  نقل  المشهد بحذافيرة الكم )

ردلة قيصر
- لا شزعل شوف هسه أمونة 
جانت زربة  على علوة. شوفها  هسه صارت وردة

- انه من حجة هيجي   احتركت حرك وانه  كاعدا وكلهم كامو يضحكون من كل كلبهم انه دنكت   اكض بعباتي. امردها مرد وارد افلها  من ايدي  حيل هضمني سكتت شريد احجي  ضليت  ساكته ومدنكة رأسي  

وجلبو  بيها  ويضحكون كمت وكفت  اترخصت منهم
وخذيت جهالي وطلعت   ومن عبرت بابهم طاحت دموعي  نعميت من البجي حدما وصلت البيت

بس طبيت وهو طب وراية. سحبني من عِباتي
وعاط بيه

- بت القنادر وين عفتيني وطلعتي تركضين ...

- سحبت عِباتي منه وعطت بيه عووفني اكرهك تعرف شنهي اكرهك. انتَ حسبالك الرجولة تضحك على مرتك وتقلل  قيمتها  كدام  اهلك  يعني انتَ رجال

كضني وكطعني تكطع دفعته حيل الطش بالحايط وركضت للغرفة دخلت وقفلت الباب

وهو اجه فلشة تفلش افتحي بت الجلب انعل ابوج
لا الجاباج  عليه

- عطت بيه من ورى الباب وانه ابجي
انه مادزيت عليك انتَ لزكت بيه  ولا تغلط على ابوي
والله لو عايش ابوي  جان ماخلاني يم ناس زفرة مثلكم  فلش الباب تفلش  وغلط غلط 
وتالي راح اسمع صوت
عدي يبجي  وبعدين سكت

اشوية وفتحت الباب. لكيت. آماسي كاعدا على طابوكة واختها يمها ومخلوسات يبجن ابدون صوت
ركضت عليهن حضنتهن وضليت  ابجي

كومن  فوتتهن للغرفة وكعدت. وين  عدي

اماسي ردت خذا ابوي يمة وياه  وسبانة وطلع

بليل نومت البنات  ونمت يمهن وهو ماكو مارجع راسي احسة طاك من الضرب مالتى  سمعت
الباب انفتح  ونوب  فات للغرفة نزل عدي وراح  لغرفتنه   جاني عدي. نعسان. حضنته ونمت

واسمع صوته ايصيح عليه من الغرفة وليل  وهدوء
وبيتنه مكشوف  غطيت الجهال وكمت ردت اقفل الباب
مال الغرفة وهو حط رجلة ودفعها

كض ايدي وكالي اشششش ابدون صوت  اطلعي  سحبني من ايدي ومشيت  ورا

طبينا للغرفة وطبك الباب  اندار عليه وطكني
براشدي احسة عوج فجي  انه ما حجيت بس رفعت رأسي وضليت اعاين بوجها وابجي بسكوت

- بت الجلب هاي حتى بعد ما دكولن مو رجال
زلمة  وغصبن على الخلفج  او لو مو حبلة جان ضربتج
دفرة طلعت الجاهل من خشمج  امشي انطمي هنا
لو طلعتي. احركج حرك

- سكتت ورحت نمت بالكاع. اجه عتني من ثوبي
وكومني  وذبني  على الجرابية

- هننننا هنننا انطمي

- انطميت ونمت   الصبح كعدت لكيته ماكو كمت طلعت  شفته كاعد بالحوش والجهال بحضنة

ما صبحت عليه رحت سويت ريوك. تريك وطلع بسكوت
دنيا كضت وجهي

- ماما  ليش اوووا  بوجِهَج  من ابوي مو

- لا مومنه كومن روحن العبن يالله  كملت شغلي
ودخلت اسبح عفت الباب  مفتوح اشوية مال الحمام
ومديت راسي اباوع للجهال بالحوش بالي يمهم

واشوف ابن ابن عمه واكف على السطح ويتباوعلي 
ويغمزلي عاط  عليه

- انزلج اجي اليف الج  غزال الشنافية  

- طبكت الباب  ولطمت وجهي صخام بعيني ان شاءالله   شلت الطشت على رأسي  ودرته
وجريت  ثوبي البس بيه وهذا مستمر يصيح عليه
دخيلك ياعِلي ابو الحسن. انقذني راح يفضحني
والناس شدكول عليه

حسيت الباب اندفر وانه البس

مشيت خلف اغلال الزمان ..
يشدني ليذبحني قربان لحسناته ..
و أي حسنات هي ماهي غير سيئات..  
مربوطه تسحبني لوكر الافاعي وتعلم ان سمومهن قاتلات ..
قلي فقط .. اي ذنب كان ذنبي ..
اي جرم كان جرمي ..
ذنب حبك لي لستَ انت من تدفع كفارته انما انا من دفعت وسأدفع مابقى لي من ايامي قربان
ولماذا الآن...
عندما يسقط القوي تكثر سكاكينه .. وانا قد مات قوتي مات سندي مات وتدي مات وتري مات مات
رباه .. رباه .. اهكذا يكون نصيبي والقدر
قيصري .. حكمت على امانيك بالقتل بالسم البطئ  مع سبق الاصرار والترصد
رُفعت الجلسة
شكراً  يا  صاحبة اجمل احساس للخواطر

zainab_alnajar

وللحكاية بقية .........،