الزنبقة السوداء

الحلقة 40

اسسسفة على التأخيرر  😘😘😘😘❤

الزنبقة _ السوداء
داليا _ المسلم
حلقة _40_

أماني
.....  لبست عِباتي وطلعت ورا
لكيت  حسنة  كاعدا  بالصدر ومترندحه  ( كاعدا )  براحة وذابة العِباية من اجتافها ولابسة  كوستم  احمر نارري   جنها فسيفس نافخة روحها

صعدت ليورى سلمت عليها اشونج حسنه  ردت عليه

ابـ
-هلا

- وسكتت صعد  قيصر  وشغل السيارة وطلعنا
طول الطريق ايباوعلي بالمراية مال السيارة  ماعرفت افسر نضراته ويستغفر الله  انه هم سكتت وخليت رأسي على الجامة احس  البرودة  تريح  رأسي

وصلنا للحمزة  ضليت اباوعلة  شو هنا جايبنا قيصر شكو

- انزلي وانتِ  ساكته فضيني

- لميت عِباتي ونزلت حتى جنت لابسة مكرم السامع نعال لاستيك بيتي  مال عِلي  هو وحسنه يمشون كدامي وانه وراهم بس احس روحي ذايبة  والدوخة
خذت رأسي  طبينة للحمزة بعد عيني 

كبل يم الشباك جان  الدنيا  الضهر وماكو احد بس الكيم  وكاعد ليغاد  وكف قيصر يمنى
وكالنا

- يالله هذا الامام كدامجن واثنينج تحلفن  ما مسويات الي سحر فديوم من الايام احلفي أمونة وانتِ وراها حسنه

- انه ضليت صافنة عليه شبيه  هذا يا سحر  يالله احلف وعلى شنو انه ساكته  ادنيت يم الشباك ولزمتة كتله  ( في ذمة الناقل ) 

وحك هذا الحمزة ابو حزامين  انه ياقيصر
مافديوم سويت سحر الك لو اصلاً ماشية بهذا الدرب
عليه  وعلى عافيتي  وعيوني   واهلي وخواتي

هو ضل صافن عليه وخرت وكف ليغاد  كال لحسنه

- يالله أمشي احلفي انتِ الثانية هاي أمونة حلفت

حسنه - اي اي بس اروح للحمام  فدوة غديلك  راح اذبن من رأسي بعد مابية 

- طلعت تركض للحمامات راحت وانه دخت فرد نوب
ردت اوكع بس كمشت الشباك سندت روحي عليه ضلينة ننتظر هاي الجلبة ماأجت   بطت. قيصر كالي

- تعاي نطلع بيج لو اسندج شبيج وجهج اصفر
دايخة

- بعدت ايدا مني ومشيت بعيد عنه  من طلعنة  جان اكو صبات رحت كعدت عليها  ودنكت رأسي وضليت أبجي على حظي الاسود على بختي الاعوج  هو ايروح  ويرجع  ويباوعلي صفح

تالي وكف فوك راسي وكالي
- امونة اجيبلج ماي  ،،،!

- هزيت راسي بالنفي مابية احجي وياه ابد كلش كرهته كلش ولا مدي اشوف خلقته بعد  حقير. انتَ تعرف وين اولي  او وين اروح  وهو يعرفني كلش زين
مااعرف هاي السوالف  ولا ربيت  ابمحيط عندنا هاي السوالف

عافني وراح. للحمامات  واجتي وياه  اقذر خلق الله
الي قدري انربط   وياها

النكسة  تتموع وسوت روحها   دايخة ومبيها تمشي
وصلو يمي مدري شراد يحجي  كمت كبلهم ورحت مشيت ليم السيارة وانه جسمي باد فردنوب  كمت اترنح بمشيتي  عاط هو

- شبيجن  هسه انه اكض منو انتِ ذيج

- يحجي ويه حسنه الي سوت روحها خربانة  ولا التفتت الهم  وصلت ليم السيارة هيَ صحت الغول القاهرني  امبينة ذيج او وينها  جذابة وهو اماشي جذبها  ولا كاللها ارجعي احلفي

فتح البوب صعدت او وكلت آمر لربي وتحسبت عليهم اثنينهم  احس جسمي مشت بيه الصخونة  ودخت
وهو  يعاين عليه من الجامة صاحني 

- اشبيج أمونة  بوية ...؟!

- مارديت عليه  وصلنا  للبيت بساع فتحت الباب ونزلت  هو نزل راد يكمشني دفعته  رجع  على السيارة بس سكت ماحجى ابد  فتحت الباب ودخلت  وطبكته وراية   وهنا بعد ماقاومت نزلت دموعي  طلعت أُمي  تركض  عليه سندتني ودخلتني

- شصار يمة  كولي وين خذاج مكسور الركبة  هو والحية الجباها  وياه 

دخلتني للهول
- فرشن الفراش البنات الي انه بساع  ذبيت روحي بالفراش  وبعد ماادري  شصار  ويننننن  وكعدت  صاير الليل  وأمي مكابلتني  وتبجي والبنات  كاضات جهالي  ويبجن  حلكي جاف  فدنوب  اتلمست ايد أمي هي  وخرت شيلتها  وصاحت

- يمة بتي صحت  أمونة يمة شجرالج ،،،!

حجيت بصوت واهن
- مابية عيني انتِ شبيج ليش تبجين يمة  ،،،،،

- وج يمة بيداء جيبي كلاص ماي ،،،،،

- حضنت  رأسي وسندتني شربت ماي ورجعت مددت
يمة منو خلالي كانونة  

- وج يمة من وصلتي من  خذاج مضعوف البخت ورديتي  بس دخلتي هنا غابت روحج   ضليت ادك والطم شكيت ثوبي نفس مابيج وصوفرتي  كركم  صرتي

- غيداء هيَ وتمسح  دموعها أمونة مثل وجه ابوي   من صار  اصفر  من تخربط الله يرحمة  حسبالنا متي  امي شكت هدومها وطلعت بالشارع تعيط
الحكولي ياناس ياعالم بتي ماتت  ماتت  اجت مرت خلف   راحت للشارع على  وحده سستر  جابتها   خطية  واجت  تركض  فاتت فحصتج  كالت  هاي من الصخونة متخربطة صايرة بيها حمة نفاس  مدري شكتبت  بورقة وعِلي جابالاج العلاج وهي شكلت مغذي وضربت بيهن ابر

- رجعت مددت وخليت ايدي على عيوني الحمدلله
مابية شيء لااحد يبجي كافي. انه من الصبح مالي خلك ومصخنة  مو صوج  قيصر ولا شيء
راحت أُمي واجت بيدها صينية شوربة

- كومي بعد حيلي وعيني رمي عضامج سوتلج بيداء من الصبح شوربة على كسور بالكي تفيدج تغذيج راحت روحج حبيبة

كون عساها  بعافيتهم  ياله اكعدي

- يمة  وعلي ماريد مااشتهي  دفعت الاكل ودرت وجهي اجت  آموسه وكعدت يم رجلي وتباوعلي خايفة
تعاي حبيبتي لاتخافين  مابية شيء تعاي اجتني حضنتها  التفتت  لبيداء  چاا وين دنيا

بيداء- نومتها  من   عشيتها شبعت ونامت ولا سألت عليج بس هذا عويد شلشنا  يبجي عليج  ماي وشكر ومافاد بيه

- شذرة
كومي بعد أُمج خطية وليدج وراج رضاعة

- كعدت وبديت اكل امي كالت للبنات روحن نامن انه يمها. عافنة وطلعن  والولد راحو نامو  بالبراني

- يمة أمونة  وين وداج  قيصر 

- ذبيت الخاشوكة وصفنت على أُمي  وداني ايزوني
كالي شفتج بالحلم مريضة  وحسنه مصرة تجي ويانه
حتى اسلم علية وتباركلي بولادتي

صفنت أُمي بوجهي وسكتت  كالت الله يهدي سركم

- ماحجيت لااني ادري بيها  لا حولة ولا قوة
وحتن لو تعاركت ويه قيصر او وتالي راح اتردني
هيَ كافي عليها  الي هيَ  بيه ومنا حمل اخوتي
بلعت غصتي وسكتت وسلمت أمري لربي

تالي صفنت
- أمونة اضمين عليه ليش يمة كليلي وين وداج لا دكليلي زورني ومدري شنيء احجي

- دفعت الصينية ولزمت ايدها  يمة حتى لو اكلج
شراح اسوين كليلي اشو احنا لا حولة ولا قوة
انتِ يالله حايرة بضيمج انوب انه اجي اتزعل فوكاها

نفضت ايدها مني
- اي اوكف بوجها شنو مات حقي تنوكلين  لو شنو
انعل ابهاتهم وعلي بس هذا مات ابوج راح يستفرد بيج وانتِ ساكتة اله

- حجيت ابيأس لان ادري أُمي راح تزعل لو اضل ساكته

خذانه  للحمزة حلفنة   وكال احلفن ما مسوياتلي سحر

- اي وانتِ حلفتي يحظي مو  زلمتج هل الاغبر دفع كفارة مال الحلفان لا

- ماعرف يمة ماعرف 

- منها  طحتي  وج يمة  باجر انطي انه كفاة الحلفان لا يصير ببنياتج شيء شكول وشحجي
حسبي الله ونعم الوكيل بيهم اي والله  وكلي امرج لربج. يايمة

لاتعاتبي ولا تحجين الله موجود هذا زلمتج
مضروب براسة منهن وعلي وكولي أمي كالت هاي هيَ
سولة سحر وخبلنة عليج

خذت الصينية وكامت انه همات كمت غسلت ورجعت اتمددت  نمت  اشوية وفزيت على عدي  كَعَد يبجي  سحبته ارضعة

سمعت الباب يندك .،،،،،،

جنا نايمين بس انه كاعدا ارضع بعدي ويمي دنيا شبعت نوم  جنت نايمة بالهول  وأُمي راحت للغرفة راسها يوجعها من الضوء  طلع عِلي فتح الباب ورجع وياه قيصر

فات سلم وبيدا  جياس فواكه وحلويات  ومسواك ذبا
بالمطبخ  ذب الحلويات يمي وكعد  بصفي خلة  دنيا
بحضنة ويبوس بيها

اندارلي
- اشونج  أمونة  وشبيها ايدج  مخلية كانونه  شنو رحتي للدكتورة

- بعدت روحي منه لا بس جنت مصخنة من الصبح ومن خذتني زادت حالتي  وجتي سستر صديقة جيرانة  خلتلي كانونه وضربتني بيها ابر  صرت احسن

باعولي بنضرة ندم
- زعلانة عليه  ..؟!

- باوعت بعيونة  لا مزعلانة  تدري  ليش  لان ادري زعلي مراح يسوي شيء انتَ   اشوف حسنه مضلومة
وهذا الشيء مطبوع ابالك  فهاي شغلة منتهين منها
لا اعاتبك ولا تعاتبني  كلبي خلص بعد ششوف منكم قيصر كلي ششوف

سكت ورد  كال

-  انه محضرلج مفاجئة بس اصيرين زينة مو شرط تطلع الاربعين  اريد اخذج سفرة اونسج ادري انتِ تعبانة  من وفاة ابوج الله يرحمة ومنا ولادتج  انه همات اريد اطلع وياج  اشعندي غير أمونة انه

- سكتت عنة ولا اريد اسمع صوتك ولا طايقتك
خذا عدي مني وضل يبوس بيه ويشم بيه. كمت رحت جبتله فراش وفرشتله بالبراني يم الولد

راح نام اخذ دنيا يمى وأموسه متعلقة  ابيداء كلش
تحبها

كضت أيام نفاسي  وقيصر كل يوم يجي يبات يمنى ما بات يوم واحد بالشنافية. انه عندي عادي حتن  لو بات هناك مايهمني    بس هو مايرضى يكلي عيني ماتغمض اذا مو اشوفج وانام 

جنة كاعدين الضهر نتغدا  وقيصر كالي حضري روحج نمشي باجر للشمال  انه كيفت سفرة وللشمال
كتلة مو باردة

- لا هسه الجو يخبل وينزل الثلج شوفي
اصلاً لو نزل الثلج ايصير دفو كلش حلو

وصدك هيات نفسي والجهال أُمي كالتي خلي آماسي
يمنى ودنيا وروحي بس كلبي مانطاني وقيصر همات ماقبل تالي أُمي قنعته وبقيتهن  يم البنات

وطلعنا للشمال. خذاني  لشقلاوة  وبعدين  طلعنا
للشمال ضلينا اسبوع ورجعنا   اسوكت مناك عسل وجبت كرزات جان هذا الشيء بس بالشمال  وعدنا غالي  وجبت  كالات  (شحاطة محاكة بالسنارة ) لااخوتي 

هو خذا بس لجهالة غراض وملابس  وحلويات

رجعنا  وهو ذباني  وراح للشنافية  بليل رجع كالب الوجه. عادي تعودت انه عليه من يجي كالب الخلقة
وبعدين ايفك

- حضرتلة العشا وخليته يمى كعدنا  نأكل
ماكدرت اسكت  بعد

- اشبيك  قيصر ليش ضايج ،،،!؟

- دنك كمل اكلة  وهز راسه بالنفي  ماكو شيء
لا دوخين  بالج   صدك اكلج  هذا ابن عم  أبوج
فتح كهوة  هنا بالديوانية  صارلة اتلاث  اشهر من انتقلو  خلي عِلي ايروح  يشتغل وياه. انه نسيت اكله

- ياا شيتغل عِلي مو جاي يدرس  دخل معهد صناعة

- اي شكو منها من يرجع ايروحلة  انه كتله ابن حقي
الله يرحمه ايرد يشتغل كال خله يجي  ونسيت اكله لانه خطية وصاني  ادورلة شغلة

- حيل انقهرت  ضليت اعشي البنات ولاجت الدمعة بعيني عليه  ثاري ايدور شغل  ومايكول لاأمي   سودا بوجهي عليه 

عِلي كلش فقير  قيصر خاف مايدبرها ....!

- لا بوية شنهي  تحجين هيجي والله سبع شوفي اشون معدل لاتخافين عليه  وانه همات ماقصر وياهم ان شاءالله

- لا أمي ماترضى دكول عيب  وديري  بالج  تخلين قيصر   ينطي  للولد  وعلي  تزعل  قيصر   اسبوع الجاي اتروح  للمشخاب  ادكول  ادور حلالي من عمامي  المن ضال  عدهم

ضحك بستهزاء
- خايبة صارلهم  سنين. يزرعون  ويحصدون  ويدارون  بيها ولا ذكرو امج وخواتها فرد يوم
كل عقلج  ينطوها حكها  بهل السهولة  شوفي شراح ايسوون   بيها  الا مايدولبوها  وهذا  زلمت خالتج  شهدا  اغم  وخواف  هسه  خالاتج مايكضن  ضهر أمج واذكريني

- چاا وجميلة هسه ادور حك بناتها ...!

- اي چاا خوش اخذ ليل وجيب العتابة وشوفي عود

ثاني يوم ذباني قيصر يمهم وراح للشِنافية
امي كالت راح أمشي  للمشخاب اشوف كاعي او ورثي  خذت عِلي  وراحت   انه ضليت  ابيت اهلي

قيصر راح للدوام  ورجع 
ولكة  أُ مي ماكو  وانه  لازم  اضل عدهم  ضاج

- ادري اشون  اعرفهم  وبعدين البيت فارغ  قيصر انضل  هنا بين متجي  أُمي

- تعبان أمونة  ماصارت عيشة  هاي يم  اهلج  كلج
لااهلج  ميصير  هيجي  اكلج  النهار الهم  واليل  الي  امشي  ابيتنة  هذا حسين  رجال  ومحسن  رجال  بعد شكو. انه  تعبت  تعرفين  شنو   تعبت.
راح اروح   للشنافية  ومن  تكملين من  اهلج  ارد زين  عافني  وراح

للبيت  ومناك طلع  للشنافية  شسويلك  أعوف اهلي وخواتي  من تجي  مامقصر وياك  بس  شسوي
خما أعوفهم   تايهين عفته  يروح ،،،،،

لليل واجه  جنت  افرش للبنات انومهن  وخواتي يقرن
بالغرفة   طلعت

صحت منو

-،قيصر انه افتحي

- فتحت الباب هو واكف  من شافني باوعلي صفح  ضحكت وهو همات ضحك  وفات 

دخل وهو يحجي بزعل
- شسوي لعيني الماتخذ نوم الا بحضنج  الله بلاني بمره حقيرة 

- حضنت ايدا ودخلنا ليجوى كتله انه مو حقيرة حشايه   هو فات للهول وانه رحت جبتله فراش  من النضدة الي باالغرفة

بيداء - شنهي المن هذا لازم اجاج  بضحك عمو غاصر

- ضحكتني   دهرج ولج تحيرين شسمي مرة قاصر مرة غاصر لو   قصقص  وعلي لو يسمعج يزعل

- وزعلتهم  جيبي آموسه يمي  وروحي لقوقو

- الرعنة ضلت تضحك والجهال يضحكون عليها

- عفتها وطلعت  فرشتله  يمي  وهو ايباوعلي 
على شنو تزعل ماادري  ذب هدومة  وتمدد   نوم دنيا وآموسه همات بحضنة  ويحجي وياهن

- بوية ابوجن المضلوم نومنة  ترى محد  بحاله
مضلوم مهموم حال الضيم حاله الناس كلها متريدا

- سحبت أموسه  من عندا عاط بيه ويننن ماخذتها

- لاتعيط اشبيك بيداء تريدها تنام يمها

- اي اخذيها حتى بناتي اخذوهن احرموني منهن
مكفاهم ماخذين امهم انوب جهالي

- استغفر الله شحجي وياك  وديتها ورجعت اله
كعدت بصفه وضل يحجي على شغلة
وانه وياه استمعله   تالي كالي

- أمونة  حبيبتي  ترى انه تعبت  من هذا حالنا

- ليش اشبيه حالنا ،،،!؟

- انه مشتت بين  ذاك البيت وبينكم  ارحمي بحالي
لو انتِ همات عليه اصيرين

- قيصر من الاخير انه من الديوانية ماطلع خوش
مااطلع  ماتريدني عوفني  وروح لذيج مرتك ....
اذا تعبان من عدنا

كعد وندار عليه  وحجى بعصبية
- اي انتِ هذا الفالحة بيه حصرة ماحجينة  وكلتي عوفني  والله لعبتي روحي من روحي وحك هو الحسين
اكلها احبج مااكدر بلياج  ادكلي عوفني  خرب بحضي

- سكتت عنة ماحجيت شيء هو همات دار وجها
ونام ونوم  دنيا بحضنه  وضل بتافف لما نام

الصبح  تريك وطلع ماحجى كلمة وحده 

أمي للضهر ردت تعبانة وتناهد  بقهر تلكيناه
كعدت ارتاحت

- سألتها  ها يمة شسويتة  شحصلتي

- غطت وجها وضلت تبجي شسوي يايمة شسوي
ماكلين حكي لما العالم شهدت وياي  رحت لبيت عمتي بسعادة الله يطول عمرها  وخذيت ابوها  شايب  دك صدرة وحزم ولده  واخوها  الجبير صاير شيخ
ورحت كلولي  مالج  يمنى كاع  بس بنات كافل

او لو كبرن  يجن ننطيهن  حكهن هاي  المفلوكة
جميلة مدري  شمتفقه وياهم  القهرني  نكرو حكي
وخيرهم  كله من كاع  ابوي

تعاركت وياهم وباجر اروحن اشوف محامي احطه
عليهم وعلي ما اسكت منهم انه هاي اليتامة شنطيم
منين اجيبن الهم

- عِلي
بسج يمة انه كلفت صديجي  ايشوفلي شغل وراح انه همات ادور. شنو قابل  اعوف اخوتي  انه اعيشكم
لا اشيلين هم

أماني
- اي صدك  قيصر  ايكول  ابن عم ابوي  جاي صارلة شهرين هنا ومفتح  كهوة  كلش جبيرة   ومحاجي عليك  كايلة خله يجي اشغلة

- شذرة مشت دموعها اي هذا جابر الله فاتحها عليه
بس شايل حقارة الناس كلها  بس همات يهون احسن ماتروح تشتغل عد ناس مانعرفهم العصر يمة روح وشوف

- وصدك العصر  راح عِلي  ومحاجي جابر  مشغلة
وكام من  يرجع من المعهد ايروح  للكهوة يشتغل

مرت سنة وابوي دارت السنة مالتى سوينا ثواب ورحنا زرنا ورجعنا امي كلش انتهت من البجي  يومين عيَ تبجي وتنعي

بهاي السنة  باعت البيت وخذت واحد اصغر منه بمنطقة الجمهورية

ويمهم الكراج  قريب تصعد منا الجنود وتنزل منه
انه همات شفت بيت قريب عليهم ونتقلت وياهم

قيصر ماكال شيء  ظلينا على حالنا ايروح بالنهار للشنافية واليل الي

بيوم جمعت ذهبي كله وكاله قيصر  ليش ماتخذا تبيعة وتشتريلنا  كاع

قيصر
- اي والله اكو عرصة  بالشنافية اشون مكان
كلش حلو جيبي  وانه اجمل عليهن

- شنو هنا ماكو بالديوانية بس هناك

- أمونة هناك بعيد على اهلي وعمامي لاتخافين وكاع لكطة حرامات تروح

-  قنعني وسكتت خذا رغم هو ماعايز يكدر ياخذلي بس كلت ميخالف  المن اريدا احسن ماضل بالاجارات

راح اشترها وتكاتب بس سجلها  بأسمة سكتت كلت ميخالف زلمتي مو غريب

أُمي  المحامي الي كلفته  نص افلوس البيت كضتهن عليه  مشة باوراقهم  لساها ماكاسبة قضية  الكاع   اخير شيء المحامي كالالها بس هذا الشهر واخذ حكج بحيل الله خالاتي ماعاونها زلمهن مارضو  يخافون من المشاكل

ضلت أمي وحدها تلوبح منا ومنا اجتني  كالتي

- يمة أمونة انه  ما اضل معتمدة على شغل عِلي
سودا بوجهي نكض وحدا. من باجر  اطلع للكراج
ابيع جاي انه وحسين

من سمعتها هيجي كالت كمت وكفت وفرت دمعتي
يمة اشون تشتغلين  يمة  .....

- اششش اسكتي راح يمة راح العز والدلال ويا
احبابي ماضلي احد أمونة   كوم لحم بركبتي منين اجيبلهم  عوفيني بحالي يمة

العصر   خذت فضة وراحت للسوك. جابت
استكاين واماعينهن  وخواشيك   وقوري جبير
وطباخ زغيروني  انه كلساع واريد ابجي

عليها وعلى  هضيمتها  ولد عمها المفروض  يؤكفون  وياها  كضت سنين تاكلون بحلالها  وكلما جانت ادكل لا ابوي ايكلها ماتروح  ماطولني اشم الهواِ ما تاخذيه الج هذا للوكت ضميهن

قيصر ما كال شيء لانه يعرف  ماتاخذ برايه  حزم غراضة ومشى للجيش

عِلي سكت من شافها مصرة على رائيها. طلع للشغل
بليل من رد   مقهور. ومأيس   والدمعة بعينة

صبتلة غيداء عشا  وبيداء خذت هدومة تغسلهن
انه كعدت يمة أُمي كملت صلاتها  واجت

- ها يمة عِلي شبيك  ليش مهموم

- ذب حصرة بقهر وكالنه
يمة ابن عم ابوي طردني  من الشغل

- ياا انه لطمت صدري   ليش مشعول الشيب ليش ..!

- ايكلي اريدك الصبح همات تجي كتله عندي دوام معهد بعدلي سنة مااكدر  كالي بطل  شيفيدك المعهد

رديتله
- الله  لا ينطي بالزايد منه  خله يولي ...!

أمي ردت عليه
- لاتنقهر يمة  الله كريم خله يولي انه ادري بيه متفق ويه ولد عمي خله  يولون حسبي الله عليهم هاي ام خلف كالت زلمتها. يشتغل بالاورزدي   ويردون
موضفين  من باجر  تروح  وياه  واشتغل هناك احسلك ولا منيت ذوله المايخافون الله

- سكت  عِلي   وكاللها صار يمة تدللين

صدك ثاني يوم. راح وباشر با الاورزدي  مال الديوانية

وامي طلعت من الغبشة خذت الغراض وراحت
للكراج  ماترد  منا للضهر مهدودا  والتعب ماخذ كل
حيلها

وعلى هل المنوال  مشى حالهم  جانه رمضان  همات تطلع ادكول  خطية يجون جنود او موصيام  يتريكون
تسلك جدر بيض لو  جدر باجلة ويه الجاي ريوك

وتخبز صفطة خبز انه مشكلتي ما اعرف للخبز
بس مرات ادولج الها العِجين   لو اشيللها القبق
كمت اتعلم اشوية اشوية 

اول شهر  عِلي من استلم راتب  جاب  بدلات لا آماسي يخبلن  وهدوم لعدي

كعد وفتح العلاليك
- شوفي  أمونة هاي  هدوم للجهال وشهر  الجاي اجيب  لااخوتي  بس هذا ثوب لفضة حلو يلوكلها
وهذا حذاء لـ محسن

- حضنته  وضليت  آبجي حيل انقهرت من شفته
يجي تعبان وعلاليك منا ومنا شايل  شفت بيه
آبوي من اجيبلنا 

يتعشى ويكعد  يقرأ  مرات ادخل اشوفه  نايم على كتبه  اسحبهن واغطي  واطلع

لو يكلي آمونة عدهم اماعين وغراض تخبل كم
اجمع  وانطي خطية كلشي اوصي ايجيبه الي لميت كوم اماعين وجداري ماخليت حتن افراش كمت اوصي يشتريلي منه لانه رخيص  نص عن السوك

مرات اساعد  اهلي مرات بس أُمي  تزعل ودكلي  امانة الله عليج ممنوع  اتمدين ايدج وتنطين فد شيء للولد

ماترضى

انه  تعبت حيل من وضع اهلي كتلني القهر عليهم
أُمي  الي  مرات  اباوعلها  مو أُمي لا  شكلها تفير كلش  كليوم تشبع  بجي   ياله اتنام انه  ادري بيها. تذكر  ابوي  

نزل قيصر  وجاني  هل المرة كاطع دماغة كلش
على الشيلة للشنافية

كاعدين كلنا نتعلل  وأمي همات كاعدا
جان هو يدخن  او وجها ما يكصة  السيف
باوعلي وكالي

- أمونة  انه اجرت بيت الج هناك  بـالشنافية 

- انداريت عليه شنو شتحجي قيصر وين اشيل

-مانبقى بعد هنا. ترديني يابت الناس لو لا  وهاي كدام امج واخوج انه ماضل هنا مااكدر  تعبت من الروحة  والردة  انه البيت اجرتة  وباجر اتلمين غراضج وتمشين وياي  ماترضين براحتج ضلي هنا

- كام وكف انه رايح للبيت  ترحين وياي. لو لا

- باوعت لا أُمي هزت راسها عود كومي آمشي
وياه كمت لبست عِباتي  ورحنا. اول ما دخلنا للبيت انهد بيه

- قيصر
انتِ شنو امشي انه  بكيفج اسمعي كلمة ورد غطاها باجر تمشين ويايه هذا اخر كلام وياج وكومي من هسه تلمين الغراض  فات للغرفة وانه لحكتة  سحب جرجف
البوفية  وكوم  بيه  الفراش  ولمهن وسواهن صرة
جبيرة عاط بيه امشششي طلعي بعد واحد

- رحت فتحت البوفية وسحبت جراجف  وكام. يجمع بيهن الفراشات  كلهن وانه وياه  الملم 

- أمشي روحي  للمطبخ لمي غراضج ياله روحي 
لا اصفنين ابوجهي

طلعت كعدت عدي بحضن  آماسي ورحت للمطبخ
جان جايب صنادك  الظاهر من الصبح محضر روحه
وذابهن بالبيت.  سحبتهن  وضليت الم بيهن
وابجي وهو كلساع وعايط بدينا  ومخليها تبجي

للساعة التلاثة الصبح وانه المم  وياه  ومن افوت منه
يدفعني  ايكلي لاتكعدين اريد الصبح كلهن اشيلهن
كملت صار الفجر رحت توضيت وصليت شبعت بجي على السجادة ودعيت الله  ما اطيح مصايب
عليه هناك بين عمامه واهلة الي سمعت اخوه ياسر

همات راجع للشنافية  مرته اصير اخت مرت احمد المات ويصيرن بنات خالة حسنه  خفت حيل يلتمن علية ويسون حزب النار ويحركني  بحقدهن

كملت لميت السجادة  وكمت  وكفت اباوع  الغراض كلها
مطلعهن   بالطارمة  وهو  امدد  بالكاع
والجهال همات فرشتلهم  جرفف ومخاد  ونومتهم

ضليت واكفة بالباب وصافنة عليه كلش  تغير قيصر
مو هو ابد. ابد 

رحت مددت يم الجهال يمكن غفيت ساعاتين كعدت على صوت عدي يبجي  وهو همات كعد  باوعلي وكام لبس ملابسة  وراح  غسل   ورجع انه ضليت ارضع بعدي

- كومي انروح نتريك ابيت أهلج وهمات ودعيهم
خاطر  من اخلص تحميل الغراض ارجع اخذج

- ماحجيت شيء  كمت لبست عِباتي ولملمت  باقي الغراض وطلعت  وداني  ذباني بالباب ورجع للبيت

متفق وياه ابو اللوري  واخوته همات نعمان وسعيد يجون يعني طابخ السالفة ومخلص كلشي

- دخلت للبيت لكيت أُمي ما طالعة ولا عِلي ينتظروني اجي. اول ما دخلت  ضليت ابجي نهضمت اشون راح افارك اهلي وحدهم كلش صعب  الفراك

حسيت نفس حساس من عرست بس ذاك جان اهون لان ماجنت  اعرف نفسيتهم الوصخة  وناس
الحقد  مايهم و تارس كلوبهم

حضنت أمي وكتلها. لميت الغراض وقيصر  راح ايجيب اللوري ويجي

ماحجت شيء  سكتت وضلت  تبجي 

كام علي وكف
- خوية أمونة  لاتعوفينة. وعلي هناك يستفردون بيج وياكلنح اكل  ضلي  هنا  خلي يعوفج انه اعيششج
وروح ابوي المحالف بيه مااعوفج  تعتازين  شيء
لا دكولين حملج جبير واحنا معتازين  غلطانة

- لا بعد اختك وكلبها لاتكطع گلبي ( قلبي )
المرة تبيعت الرجال وانه. واجبي اتبع زلمتي
ادري بيك ماتقصر وسبع  واخو خيتك. بس ماكدر
بعد هاي هيَ

تريكنا وسبحت الجهال وبدلتلهم  وضليت كاعدا انتضرهم عِلي راح عليهم كال اعونهم  هو وحسين

للضهر اجاني قيصر. فات سلم على أُمي والبنات وشال الجهال وطلع  غصيت من البجي على أُمي العافتني. وفاتت للغرفة. بوست البنات هنه  يبجن وانه ابجي  وصيتهن على أُمي ونفسهن وطلعت

لكيت قيصر  مصعد البنات واكف بالباب شايل عدي

نزل عِلي من اللوري  وكف يمة وضل  يبجي كسر
خاطري. يمسح دموعة  بردن  قميصة
عود حتى لا اشوفهن. حضنته  وصيته على امي والبنات. وبوست حسوني
ورحت صعدت. جانو الولد صاعدين. بالوري
سعيد ونعمان

صعدت ويه قيصر وعيني على اخوتي يعاينون عليه
ودموعم تنزل بحركة   ومشت

بينا السيارة كدام اللوري   وخذتني  الدنيا  لناس ومكان جديد   شراح اشوفن. بيها  واشون راح اعيش بيها

وقيصر كالب وجها  ولا صد عليه ابد وانه دموعي امسح بيها واطيح

اليوم اكتب لكم
ولكن لم أدري في الغد أين سأكون
هل سأظل اكتب للجميع عن كل ماهو جديد
أم سيكتب عنى القدر وأنا فى المنفى البعيد
إلى متى سنظل بين الحيره والألم
إلى متى سنظل نودع مالانحب وداعهم
إلى متى سنظل بين الجرح والعتاب
إلى متى سنظل نحاسب أنفسنا على شيء ليس بأيدينا  دائما نكتب عن الرحيل عن الوداع عن الانتظار
عن الألم عن الجرح ..
متى سيأتي اليوم الذى نكتب فيه عن السعاده والفرح
متى سيأتي اليوم الذى يمر بنا وننتظر يوم جديد يسعدنا
رفقا بنا أيها القدر رفقا بنا أيها البشر
رفقا بقلوب تحطمت رفقا بقلوب اذيقت العذاب والألم
رفقا بعيون باتت تنزف دما وليست دموع
رفقا بقلوب باتت تنزف أنين وصراخ ولم يسمعها
من البشر  فهل ياترى يوجد بشر  ام ......

وللحكاية بقية .........