زواجك بالاكراه وعلاجك قدري ( صكر الصخرة)

الفصل الحادي عشر

قد تكون قاتلي .وقد اكون لك حياة
...............

صوت الطلقه الي صابت ضهر صكر ..صابت كلب هند .. الصدمه الي جانت على وجهها من شافته يوكع بالكاع جانت كفيله بانه ينزاح كل الكره والنفور والمشاعر الموحشه من قلبها ..ويجي مكانه الخوف عليه مو منه ..
بدون اي تفكير من انه ممكن تتصاوب هي هم .. رجعت عليه تركض حتى اتكون يمى .. وصلت وقعدت بالكاع وخلت راسه بحظنها وهي تجيك جرحه .. رفعت راسها شافت الذيب جاي هو هم يركض بعمر رجال ب70 سنه وكالت ..

هند ..الحكني ياعمي الذيب ..لازم انوديه مستشفى ..

الذيب .. يلا .. اروح اجيب السياره .. انت شوفي شلونه ..
راح الذيب يجيب السياره .. وهي تحجي ويا صكر وتكول ..

هند .. اتماسك صكر لاتخاف راح انوديك للمستشفى ..

صكر جاوبها بصوت ناصي وكال .. هذي فرصتج لازم اتعوفيني .. وتهربين وتخلصين روحج مني

هند ِ. بدون حجي .. لاتستهلك طاقتك ..

وبين ماهي تحجي وياه اجا الذيب بسيارته ..شالوه بالكوه لان هو كلش ثقيل ..خلوه بالسياره . وطلبت هند جنطتها وتلفوناتهم من الداخل جابهم الذيب .. هو طلع يسوق وهي كاعده يمى وحاظنته .. كال الذيب بخوف

الذيب .. اتحمل بويه . هسى اوصلك للمستشفى .. دكتوره شلونه جرحه

هند .. داينزف اهواي .. لازم تسرع ..

الذيب .. دااسوق باقوى شي ..

همسلها الصكر بصوت تعبان ومختنق وكال ..

صكر .. انت شلتيني وخليتني بالسياره ..

كالت هي ..لا الذيب ..( بس الحقيقيه هي شالته )
وجانت تمسح بشعره بايديها وكلبها يرجف عليه

صكر .. لويش معفتيني وانهزمتي ... هذا احسن وقت الج .. جان خليتني لحد ماموت .

هند .. اني دكتوره ..وشغلتي لازم احاول اساعد الناس واحيهم مو اكتلهم ..

وسكت هو وهي سكتت لكن جانت عينها عليه وعينها على الطريق اتشوف يمتى توصل ..

بذيج الاثنان من كعدو الكل الصبح وشافو الحراسة زايده والوضع ميطمن .. ولما عرفت حليمه صكر مراجع وبايت هو ومرته برى البيت ومو بشقتهم ..كلبها وجعها .. وكامت ادك على صكر وميجاوب .. ادك على هند نفس الشي اجا جاسم للصاله شافها بس اتروح وتجي .. كال

جاسم .. شكو شبيك يابعد هلي ليش متوتره

حليمه .. من ليلية البارحه واني شاكه اكو شي مخبيه علي ... وهسى الصبح الكه الحراسه على البيت زايده .. لا وابني ومرته ماكو من اابارحه .. وبنهم جايم تعرف ومكايلي ..

جاسم .. لاتخافين البارحه بالليل خابرني هو يم الذيب .. ويجوز بعدهم نايمين بعدها السبعه الصبح

حليمه .. لا ياشيخ قلبي مامرتاح .. بيهم شي ..

حاول جاسم يهديها مفاد .. دك هو على صكر ماكو .. دك على الذيب هم ماكو .. هذا وكع بقلبه حيره هو هم. .. شويه ويندك تلفونه من عدوان ..جاوب وكال. .

عدوان .. البقيه بحياتك .. هذا اول خبر الك والبقيه جايين ..

جاسم .. ولك ياناقص ..شداتحجي عليمن ..ياول

عدوان .. صكر .. وزوجته ..

مكدر يجاوب جاسم وكع التلفون من ايده اجت حليمه .. تركض عليه داتشوف شبيه ..

حليمه . شكو جاسم ..احجي ..ابني بيه شي .. يمعودا احجي ..

جاوب بكل برود مثل الشخص الي مابيه روح وكال
جاسم .. صكر ..مات

هو هيج كال ..وهي عاطت والصرخه وصلت لاخر جار .. طلعو الكل على صوتها وهي تلطم وتبجي حتى سميه الي ماتحبهم بجت على بجيتها .. بس حنين ظلت اتردد وتكول اخوي مايموت ..اخوي مايموت .. وهي بس اتخابر وكانه صارت مثل الاله ... كلما يدك يدك ويفصل ترجع اتخابر ..
بعد ساعه هيج .. اندك تلفون حنين ..جانت هند .. كامت حنين من مكانها كمزت ..وكالت هند دادك ..
شالت التلفون وكالت

حنين .. الو ..هند .. انتو وين اخوي وين ..

هند .. لاتخافين اني زينه ..واخوج اتصوب وداننقله للمستشفى الي اشتغل بيها .. كوليلهم لاتخافون ..

جاوبتها مثل مو المصدق وكانه واحد جان صدق ميت ورجع عاش

حنين .. اي زين الف الحمد لله ..هسى نجي عليكم

سدت التلفون وحليمه تنتظر منها الحجايه وكالت

حنين ..اخوي عايش بس متصاوب ..وراح ينقلوه للمستشفى مالتها ..

جاسم .. يلا امشو خلي نلحكهم

حليمه ..يمى وليدي يمى بيا ولابيك .. ياربي

الكل صعدو بالسياره ماعدا سميه ويمامه .. يمامه رادت اتروح امها مخلتها .. على الاساس اتصير هوسه ..
الكل وصلو قبل ميجيبون صكر .. بقو اكثر من نص ساعه واكفين بالشارع ينتظرون .. شويا وسامر لمح سيارة صكر والذيب يسوق .. كال

سامر .. هاي اجوي ..

ركض رضا جوا ..صاح الاطباء والممرضين يجيبون سديه حتى ينقلوه لان بحاله خطره .

اجوي الممرضين يركضون. نقلوه من السياره وخلوه على السديه .. اجت حليمه اتباوع بابنها مثل المخبله ..اندارت على هند وكالت

حليمه .. اريد ابني منج .. رجعيلي. ابني مثل مجان .اني بختج وكعت ..

هند .. لاتخافين .. الي اقدر عليه راح اسويه ..

دخلت هند وياه للمستشفى وهي اتفكر وتكول ..
(( شدااسوي اني .. راح اطب اخلصه من الموت وهو مهددني بالموت .. وليش خايفه هيج عليه .. صدق لاني طبيبه وهذا شغلي لو شي ثاني .. ماخفت هيج الا لما جان مصوب السلاح بوجهي .. ياربي انطيني القوه ))
وصعدت لغرفه العمليات ..ومقبلت اي واحد يسويله العمليه الا هي .. مع انه مو اختصاصها لكن مقبلت بس وافقت يجي واحد من الاطباء يشرف هو ..

بين ماهو بالعمليات الكل برى جان على اعصابه واكثرهم سجاد ..لان هو السبب بالي صار .. في مكان ما جان يانبه ضميره وفي مكان ما جان خايف على روحه ..
شوي ويدخل رعد صاير عصبي .. وكف يحجي ويا جاسم ويكول ..

رعد .. وين اختي .. شلون يصير كل هدا ومحد بخبر الشرطه .. ماكو قانون بالبلد ..

جاسم .. اهداء .. اختك ابخير وهي داتسوي العمليه لزوجها ..

رعد .. ش هدأ الله يخليك .. انتظر علما المره الخ تجي الرصاصه بيها . وين جنتو وطلعتولنا باليانصيب

جاسم .. دااكلك .. اختك مابيها شي .. والي سوه هيج هذا شغلك لازم تعرف منو

رعد .. ليش مبلغتو ليش اسمع من المستشفى

جاسم .. خلي انشوف ابنا شيصير منه وبعدين انبلغ .. بعدين احنا بيا حال هسى .. شوف حضره الضابط ..هذا شغلك واني احترمه .. بس مو كل مره تجي هيج تتهجم .. ترى ميصير على الاقل احترمنا احنا نسايب

مكدر يجاوب على كلامه .. لكن كال .. من يطلع من العمليات خبروني .. اني رايح ..

قبل ميطلع رعد من المستشفى مر على ربى .. سلم عليها وكال

رعد .. السلام عليكم دكتوره

ابتسمت ربى وكالت .. اهلا حضرت الضابط

رعد .. انشالله اتكوني بخير .. بس رايد منج شغله ضروريع

ربى .. بعيني كول

رعد .. الله يسلم علينج .. اريد منج اتخلين عينج على اهل صكر .. ومن يطلعوه من العمليات تنطريني خبر اخاف ميكولولي .. وعينج على هند همين حاولي تعرفين منها فد شي ..

ربى .. تدلل راح احاول ..

ابتسم رعد وكال . مشكوره .متحتاجين شي ..

ربى ردت بخجل .. لا سلامتك ..

وطلع وعافها ..
اما علي مجان يعرف لان محد خابره . وجان ملتهي بقضيه شغله والترتيبات الي دايكملها .. وبين ماهو دايملي شويه اوراق .. سمع صوت فرحه تصرخ شكلها راح تولد ..

فرحه .. الحكني علي .. ماي الراس طق .. راح اولد

علي ... اي هسى ..يلا .. البسي شي على هدومج وراح اخذج ..يلا حبيبه لاتخافين

فرحه .. الم كلش قوي علي ..مجنت متوقعه اجيب هسى

علي .. ديلا ليش هي بيدنا كلها بيد رب العالمين المهم اتكومون اثنينكم بخير

كام على حيله واخذها ووداها للمستشفى ... الدنيا هيج واحد يولد واحد يموت ..لكن هند جانت اتسوي المستحيل حتى صكر الي جوا ايديها ميموت ويعيش مع انه المكان الي اتصاوب بيه كلش خطير قريب جدا من العمود الفقري يعني اي غلط ممكن اقل شي يتشل ..
........................

في مكان جان مثل الحقل بيه زرع اخضر حلو وخضاره يرد الروح . واكو مكان مثل النبع مال مي .. شافه من بعيد صكر راح دايشرب عطشان .. بس اتقرب منه النبع اختفى وصار مثل ارض رمليه جافه .. استغرب الي صار ورفع راسه ..يشوف ابوه جاي وديتقرب عليه .. ابتسم اله بس عيونه تدمع وكال ..

صكر .. سامحتني بويه

هاشم .. على شنو ابني اسامحك ليش انت شمسوي

صكر . يعني لاني مو لايق بابن الشيخ هاشم

هاشم .. يابني انت وحيدي .. بس خليها ابالك ..الي يباوع على ايدك انطيه شماعندك ..والي يباوع على قلبك هم انطيه من قلبك .. والي يبتسملك رد البسمه.

صكر .. مافتهمت بويه شنو قصدك

هاشم ..راح تفهم بويه .. وهسى اروح وانت ارجع من وين ماجيت ..

صكر. بس بويه اريد اجي وياك .. بعد مالي عيشه اهناك

هاشم .. لاتكول هيج اكو كومه ناس ناطرينك ..وخاصة ذيج الحلوة عينها عليك ..

اندار صكر يشوف منو ... واندار على ابوه يلكاه مختفي ..

بذاك الوقت جانت هند اتخيط بالجرح بعد ماطلعت الرصاصه ..وجانت حالته مستقره ..

بالممر الي جانو داينتظرون بيه .. جان سامر صاير اعصاب نار والارض مداتحمله .. راح هد على خاله وكال ..

سامر. يعني معقوله متعرف منو سوا هيج بصكر ..

جاسم .. ماكو غيره .هو عدوان ..حسابه وياي ..بس اطمن على صكر ..

سامر .. لاخليك .. هذا حسابه يمي .. خلي يطلع صكر ..وانا اله .الا اشوف وين خاتل واخلص عليه

جاسم .. اهدأ خلي نطمن على صكر ..ومشوف شيكول وبعدين .. لاتنسى عيون الامن علينا مفتوحه مداتخلص منهم ..

سامر . زين .. خلي انشوف ..

بعدين ثواني والكل يندار على الباب الي ينفتح وتطلع منه هند وراها صكر امدد على السديه مخلص العمليه .. الكل اتجنع حواليه وهي طمتنهم انه هو بخير. ستة ساعات طولت عمليته لحد ماخلصت وهي جانت هلكانه .. خلوه هو بغرفه خاصه ..وهي ربى اجت عليها .. لزمتها من ايديها تعرف شكد تعبت ..اخذتها ودتها للغرفه مال اطباء حتى ترتاح

ربى .. تعالي اتمددي شويه ..واني اروح تجيك عليه وعيني عليه .. اخذي راحتج هلكتي ..

هند .. بس اغمض عيوني نص ساعه كلش كافي..

ربى .. درتاحي .. وهسى ارجعلج ..

خلتها اتمددت على الجربايه ..وهي طلعت ...
جاسم كال لاكل امه يرجع للبيت مالهم داعي مدام هو طلع وحالته مستقره ميحتاج الكل اهنا وتصير هوسه ..وفعلا الكل راح بعد مطمنو عليه
اما سجاد .. فطلع وحده .. شال تلفونه وخابر جمال ..

سجاد .. انت الي صوبت صكر ياجمال

جمال .. لا مو اني ..ولو جنت اتمنى اسويها واخذ بثار ابني .. بس بشر مات لو بعد

سجاد .. لا مامات .. لعد منو الي سواها .

جمال .. عدوان .. ليش متعرف ..لو ابوك مخبرك .روح اساله وهو يكلك ..لو انت اخر من يعلم كالعاده

سجاد .. اذا جان صار بصكر شي جنت اكتلك بيدي

جمال .. شنو هالحنيه النزلت عليك مو على الاساس تريد تتخلص منه

سجاد .. اي بس مو اقتله ..بكل الاحوال هو ابن عمي ..

سد التلفون ماراد يطول بالحجي .. وبعدين كام يفكر منو هذا عدوان وليش مكايليه عليه ...

بالطريق جانو راجعين .. حليمه كالت لحنين ..

حليمه .. حنين .. خابرتي علي . كتيله على اخوج ..اشو ماكو هو .

حنين ..لا والله مكتله ..من الرعبه نسيت وانثولت

حليمه .. يمى خابريه .. شو هذا ليمتى يظل يبتعد هيج ..

حنين .. زين ..هسى ادك عليه ..

دكت حنين على علي مره مرتين مجاوب .. جان هو ملتهي بمرته داتجيب ومجان منتبه للتلفون اصلا
من وصلو للبيت اتلكتهم سميه ويمامه جانت عيونه حمر من البجي عليه كالت سميه

سميه ..ها بشرو شصار بصكر .

حليمه ..الحمد لله .جنتي قامت بالواجب.

سميه ..اي زين الحمد لله على سلامته ..

حليمه . شكرا حبيبه ماتشوفين شر ..

وبعدين طبو كل واحد لغرفته .. بس حليمه متحملت ..بس سبحت ورجعت للنستشفى وداها رضا ..قلب الام ميتحمل تبقى بعيده عن ابنها ..
بذيك الاثناء .. جانت هند داتشوف كابوس انه هي داتسويالعمليه لصكر بس صكر مات اثناء العمليه وفزت مرعوبه .. كامت بسرعه على حيلها جتى اتروح اتشوفه وتطمأن عليه ..
فحصت عيونه وجريان السيلان والدم بايده ..بعدين اخذت السماعات وخلتهم على قلبه جان تسمعهم برثم بطيئ ومنظم .. حست بشي غريب وهي تسمع نبظات قلبه . وكانه اتأكدت انه صكر عندا قلب وينبض جانت تعتقد انه مو مثل باقي البشر شكد مجان بارد وعصبي .. ولااراديا ..شالت السماعه من عليه وخلتها على كلبها لكن قلبها جان يدك سريع وكانه يريد يطلع من مكانه .. بذيج اللحظه اتأكدت انه صكر يعنيلها شي .. شنو هو ماتدري لكن دكات قلبها وهي بقربه وخوفها عليه كل هذا بيه معنى ..

بالبيت جانت نضال داترتب السفره علمود يجون يتعشون مماكلين شي من الصبح هما .. رتبت وحضرت وصاحتهم كلهم اجو. الي اشتع
هى اكل والي مشتهى ظل كاعد صافن .. شويه واندك تلفون جاسم .. شافه جان عدوان ..كان من السفره وطلع بعيديحجي وياه .كال

جاسم .. شنو جاي تطمن على صكر

عدوان .. اي ..فلت مني هالمره ..يلا مصار شي ..انكررها مره لخ شكو ورانا

جاسم ..حسك عينك اتمد ايدك على واحد منهم. لااخليك تندم

عدوان .. اي .. انت محجيتلهم اني منو. لو خايف

جاسم ..اني مااخاف .. وتاليك طلقه براسك

عدوان .. اي لحد مايجي ذك اليوم اني اكون مخلص على كل عائلتك ..

وسده جاسم من عصبيته ذب التلفون بالكاع واتفلش .. اندار شاف نضال بوجهه كالت

نضال .. احنا كلنا متهددين مو . كلنا جهالك ونسوانك وحتى اختك مو.. بيا مصيبه وكعدتنا جاسم.

جاسم .. نضال مو وكت هالحجي .. ماكو شي .. وخري ..

لزمته من ايده وكالت .. شوف ياشيخ ..صارلي سنين وسنين ساكته وبالعه المر ومااحجي واكول الشبخ زين وممقصر لاوياي ولا ويا ابنه .. ويحترمني حتى لو ميحبني .. بس لحد مااعرف ابني ممكن يموت ويروح مني .. مثل مدايصير هسى وانصاب صكر وجان حيموت ..فلا .. كلشي ولا ابني

جاسم .. نضال ..كتلج ماكو شي لايظل بالج راح تنحل

نضال .. جاسم ..لو تحجيلي ... راح اكوللهم كلهم الي بالبيت .واعرف بكل الطرق منو هو وشيريد .

لزمها من ايدها ودخلها جوا للغرفه مالتها وسد الباب .. كعد على الجربايه وكال ..

جاسم .. اتريدين تعرفين ..زين راح احجيلج ..لكن لو طلعت كلمه منج ..ماتلومين الا حالج

نضال .. احجي .. ولاتخاف .

جاسم .. قبل اكثر من 37 سنه جنت احب وحده ابنيه ابجمالها ماكو بكل الصخره .. حبيتها حب محد عرف بيه ..ولاكدرت اكول لاحد .. جانت من تمر من كدامي كلبي يرفرف لو بيدي افرشلها الكاع ورد حتى لاتخطي على الارض لكن شاء القدر انه اخوي الجبير جان عينه عليها ولانه اكبر مني راح وفاتح ابوي بالموضوع وماكذب خبر خطبا وانطوها ..وانر مكدرت احجي واكول همي غير لصاحبي عدوان .. وهو شكد جان يكلي احجي وكول بس اني مكدرت مردت اتصير مشكله ..وهيج اتزوج هاشم من حليمه .وحبلت بصكر . لكن ظل كلبي يحبها ..كلت اتزوج بلكي اكدر انساها والتهي بحياتي مثل ماهي مو على بالها اصلا ..واتزوجتج ..
بعدين بدا شغل اخوي يصير زين وجان نفس شغل عدوان وبدا شغل صديقي يخرب لان كل التجار اتحولو من عدوان لهاشم جيف هو جان يحب يساعد ولسانه حلو وقلبه طيب ..وعدوان بعكسه تماما . فد يوم اجا وجان كلش عصبي وكال ..

عدوان .. ياخي اخوك راح يخلينا نكعد على الحديده ميصير هيج

جاسم .. شنسوي ..احجي وياه يشاركنا شتدكول

عدوان ..لا ماريد .. خلي يوكف تعامله ويا نص التجار ونصير نشتغل بالنص

جاسم ..بس ماعتقد يرضى ..

عدوان .. انت كله وشوف ..

كتله وهاشم عند ومرضى يشتغل هيج. وبقى على ماهو الى مافد يوم جاي عدوان دايتهجم على اخوي ويكله انت خربت بيتي خربت شغلي. ومن هالسوالف. وبلكوه طلعته من البيت ..
لكن بعد جم يوم صارت الحادثه مال اخوي. اجا واخد صوبا ومات ..اني شكيت بعدوان ..لان قبلها بليله اجا يمي وجان سكران وكلي حجي خلى الشيطان يلعب بعقلي ..

عدوان .. لو اخوك يموت ..مثلا .. وانت تتزوج مرته واني يىجع شغلي مثل مجان ..مجانت الدنيا اتصير حلوه

صرت عصبي عليه وكتله .. شهالحجي اكتل اخوي علمود مره ..صدك تحجي . اعذرك لانك ضايج وسكران لو انت صاحي جان شبعتج كتل .
عفته ورجعت للبيت ..وثاني يوم صار الي صار. بس اني محجيت ومكلت انه ممكن يكون عدوان واني اشك بيه .. سكتت وصرت شريك وياه بالجريمه . لان فكرت اذا احجي ممكن مرته متصدكني وتعتقد انه اني كتلته وحتى مااكدر اتزوجها بعدين والباقي تعرفيه. لكن هو انلزم بتمة التهريب وجانت اكثر من قضيه وانحبس اهواي . وهسى جاي ينتقم متي عباله اني الي بلغت عنه بوقتها.

اتنهد جاسم وجر حصره وكال .. وهذا هو كل السر يانضال .. اتصدكيني لو لا ..

نضال جانت ساكته متعرف شتجاوب ..وحست روحها ولاشي بالنسبه لجاسم كل هالسنين جان قلبا من البدايه مو الها .. واتزوج حليمه لانه جان يحبها من زمان مو لانه جانت مرت اخوه ومو علمود ابن اخوه ..

نضال . . لاتخاف ياشيخ سرك ابير. بس اسالك سوال واحد .. انت اجا يوم وحبيتني ..ولو كد نص حبك لحليمه

سكت الشيخ ودنك راسه وكال . بالبدايه. اتزوجتج حتى انسى .. لكن بعدين حبيتج واحترمتج لان شفتج شكد انت انسانه طيبه وبسيطه وبنت اصل ..

ابتسمت نضال وكالت ..يعني بكل الاحوال محبيتني مثل محبيت حليمه .. بس يشهد الله علي اني ماعشكت غيرك .. ولااراح. ابيعك بيوم ..

باس راسها ..وضمها لصدره وطلع يدخن برى ويحرك جكاره مثل مداتحترك روحه ..
.........................

صبح الصبح جانت حليمه كاعده طول الليل بصف غرفه صكر ميخلوها تدخل ورضا كاعد قريب منها ماعافها .. وهند اتروح وتجي طول الليل اتجبك صكر. من صار الفجر جانت حليمه غافيه. وصحت على صوت رضا دايكوللها

رضا . ام صكر .. شدكولين ننزل ناكل شي من الكافتريا ..حتى عشى متعشيتي ..مماكله شي مثل اوادم مو زين الج وعلى صحتج

فتحت عيونها بثقل وتعب وكالت .. اي بويه اجي .. اشرب جاي واصحصح . بس ماكو شي جديد عن صكر .

رضا ..لا مستقره حالته ..والدكتوره كل شويا تروح وتجي ..وحتى اهل البيت كل شويا مخابرين ..

حليمه .. زين لعد خلي ننزل ونصعد شويا لاخ بلكي يكون صاحي.

وفعلا نزلو هما بطلعة هتد اتروح اتشوف صكر .. طبت للغرفه تفحصا .. ليش مايبدي يصحصح ومن فتح عيونه وشاف نفسه بالمستشفى مكدر يكعد ابمكانه راد كبل يكوم ..ولان الجرح بعدا جديد وماثر على العامود الفقري فمجان يكدر يحرك رجليه بحريه . هي من شافته هيج دايريد يكوم وشال من ايديه الكانونات.. صاحت عليه وكالت

هند . شداتسوي اتخبلت انت .. بعد مصارلك جم ساعه طالع من العمليات

صكر ... اني ماانام مستشفيات . هسى اطلهيني واطلع

هند ..ميصير .. لازم اتصير زرن على الاقل فد اسبزع عمليتك جانت كبرى

صاح بيها ولاكانه جان كاعد من بنج ..وكال ..

صكر ... كلت اطلع يعني اطلع ..يلاااااااا

هند .. والله صدك انت مريض نفسي واني ابتليت بيك ..

صكر . حسابج بعدين ..بس خلي اطلع ..

وبين ماهي جابتله كرسي متحرك .. ولبس ملابسه وكعد داتطلعه واجوي امه ورضا ..استغربو من الي ديسويه وكالت امه

حليمه . يى هند شديصير اهنا اشو صكر كام وداتطلعون ..

هند..ساليه ..ميقبل يبقى ..

صكر .. محد الا علاقه ..اني ماابقى اهنا . امشي رضا رجعني .

رضا .. بس ياخوي

صكر .. رضااااا ___ صاح عليه بصوت عالي رج المستشفى ..

حليمه مناقشت بعد تعرفه من يصير عصبي .. وهيج طلعوه وردو للبيت .
بالطريق رضا خابرهم حتى يحضروله فرشه بالصاله ميكدر يطلع وينزل بالدرج .. وكلهم استغربو شلون راجع بهالسرعه وهو بعدا مفاكه المخدر ..
...............

دخل علي للغرفه الي بيها فرحه والصغير الي اجا نور حياتهم .. دخل وهو كل شوق يشوف زوجته وهي حاضنه ابنه .. طب ولما شافهم ابتسمت فىحه بعد كل التعب الي شافته بالولاده وكالت

فرحه .. تعال يابو شبل .. شيل ابنك .

ابتسم واتقرب منها. انطته ااصغير. شاله خلاه بحظنه وبوسه وشم ريحته وجان يكول

علي ..الحمد للع على سلامتج يالغاليه وسلامه شبل ..

فرحه ..الله يسلمك ويخليك ..

علي .. شكدوته ياربي كد كفي صغير

ضحكت فرحه وكالت .. لعد شعبالك .يجون كبار ..

علي.. الله يحميه ويخليج اليه ..

فرحه ..ويخليك سالم النا ..

باس شبل ..وانطاه لامه ترضعه .. وهو كال .. راح اروح اتصل بصكر وابشره ..

طلع تلفونه .. شاف كومه اتصالات .. باوع بفرحه وكال .. هاي شنو كومه متصلين عليه اهلي ..خير انشالله بس لاكو شي .

فرحه ..دخابرهم شوف لايكون بيهم شي .

ودك علي على صكر ..مجاوب . رجع دك على امه ..جاوبت بس جوابها خوفه لان كبل جانت تبجي

حليمه .. يمى وليدي وينك .انت

علي .. خير يمى شبيكم اشو داكين علي اهواي ..

حليمه ..يمى اخوك اتصاوب وجان بالمستشفى والله ستره . وانت ماكو مدجاوب .. وين صرت خليت بالنا يمك همين

علي . ماكو شي علي اني بخير بس جنت مشغول مشفت التلفون .. وهسى شلونه صكر اكدر احجي وياه

حليمه ..خلي اشوف .لان خلوه بالصالون وطلعونا ومرته كاعده يمى ..

راحت داتشوف اذا يكدر يحجي ويا اخوه .. وطبت وبيدها التلفون ..سالت اذا يكدر صكر يحجي ورا علي ..اشرلها صكر بيده .. ( جيبي التلفون )
انطت التلفون وطلعت ..
جاوب هو بصوت ناصي وهادي

صكر .. ها خويه ..

علي .. سلامتك خويه .. ماتشوف شر ..بيا ولا بيك

صكر . . على هذا الحجي يول .. انت شلونك .. والي يمك شلونهم ..

فهم علي انه صكر يسال على زوجته فكال
علي .. اليوم فرحه ولدت شبل .. وانت صرت عم ..

صكر .. اي زين .. كافي عاد تعال خلي انشوفكم

علي .. جايك اخويه بس تطلع فرحه من المستشفى اجيبها ونجي ..

صكر .. زين .. انطيك لامك كمل حجي ..

علي ..الله وياك .خويه ..

اخذت حليمه التلفون وطلعت .. وبعدين اجت هند جايبه الادويه وياها الي لازم ياخذهم وانطتله اياهم ..من اخذهم اجت عينه بعينها .. ظل يباوع بيها وكانه غرق بيها اخذ الحبايه من ايديها وشرب وهو لازال عينه بعينها ...