زواجك بالاكراه وعلاجك قدري ( صكر الصخرة)

الفصل السابع

تبدأ اكبر قصص الحب لوعة عند اكثر لحظات الكره فالمثل يقول .. ماحب الا بعد عدواة قد تكون حقيقه فعلا ..
..................

جانت هند محبوسة تقريبا بالشقه مال صكر ..ماتطلع ومتفوت الا باوامر منه .. وحتى لما يروح هو لشغله يبقى رضا يراقبها .. مره مرتين راحت للمستشفى علمود الطفله الي سوتلها العمليه ومجان يبتعد عنها هو لحظه .. وهسى هي كاعده يم الشباك واتباوع عل الرايح والجاي جانت العصريه هيج .. لما سمعت صوت الباب ينفتح ..وطب صكر. باوع بيها شلون كاعده .. هي كبل عدلت نفسها .. وكال .

صكر .. بماوانه جنت كلش حبابه هالجم يوم .. راح اهذج ونطلع نتعشى برى ..

ابتسمت هي لان راح تطلع ..ووكالت .. وحدنا .

جاوبها صكر وهو داينزع قميصه وكال .. اي لعد اتريدين احد ويانا .. لو اكعدج بالبيت ومنطلع .

هند .. لالا ..مو قصدي .. هسى ابدل ..

جانت هالطلعه وكانه واحد حررها من حبس انفرادي جانت بيه .. او هي فعلا جانت محبوسه ومتطلع الا باوامر منه ..حتى الحجي متحجي الا باوامر منه .. بدلت هي بالحمام .. ولما طلعت جان هو مبدل ومخلص ..
اتعلمت هند لو صارت عصبيه وعصبت وصيحت راح يكون وياها كلش قاسي .. لكن لو هدئت ممكن مايإذيها .. لحد ماتشوف الها فرصه تتخلص منه ..

اهذ سويج السياره ونزلها ونزل ..
صعدو بالسياره ووداها مطعم للعوائل راقي وهادئ .. جان مسوين بيه بحيره صغيره اصطناعيه والمنظر كتنه حقيقه وحلو ونفه .. كعدت هو وهي ..واول مشافوه كاعد اجا عليه صاحب المطعم شخصيا وكال ..

صاحب المطعم ..اهلا شرفتنا استاذ صكر من زمان انت ماكو ..

صكر . مشاغل الحياة ..

صاحب المطعم .. انزللكم من نفس الطلب الي تحبا .

صكر .. اي اذا ممكن .. لشخصين ..

صاحب المطعم .من عيوني ربع ساعه وكلشي جاهز ..

ابتسمت هند وكالت . هم اكو ناس يحبونك وتحجي وياهم عادي مو بالصياح ..

صكر .. على حسب الناس . اكو مايجون الا بالقوه واكو لا ..

مردت عليه .. اهو ظل صافن بيها ..وكانه محلوه زياده .. جمالها ماشاف منه قبل .. فكال الها ..

صكر .. من يمتى ردت اتصيرين طبيبه .. اقصد من يمتى حسيتي انه ممكن اتصيرين طبيبه

هند .. من توفى امي وابوي ..بحادث ومجان اكو طبيب يسعفهم .. وهيج قررت اصير طبيبه ..

حك انفه بتوتر وكال ..الله يرحمهم ..

رجعت هي كالتله ..وانت شنو حلمك ..مجان عندك حلم ..

جاوبها صكر وكال . لا ..

هند .. ممعقوله .. شنو مجنت طفل وتحلم ..

سكت مجاوبها وسرح بذكرياته ويا ابوه
( فلاش باك )
جان الشيخ هاشم يسوي طياره من ورق لابنه صكر وهو عنره ثمانيه سنين. وجان صكر يساعد ابوه بيها ويعلمه شلون تنصنع ..
جانت الضحكه على وجه صكر مثل الي ديسوي شي محد مسويه من قبل والحماسة الي هو بيها ولا كانه اكو طفل مطير طياره او راح يطير طياره ..
ابتسم ابوه وكله ..
هاشم .. يلا اخذها ..واركض سريع لحد ماتبدي الطياره تعلي .. وبعدين ظل انطيها الخيط لحد ماتوصل لمكان عالي ..
وكام صكر سوا مثل ماكال ابوه وعلت هالطائره الي صنعوها سويه كلش عالي ..
كال صكر لابوه وهو كل امال واحلام .. اني راح اصير ظيار لما اكبر ..بويه

جاوبه الشيخ هاشم وكال .. وانت اسمك صكر ..تستاهل تفتر كل العالم بس اهم شي ادير بالك على امك واخوتك اذا صار عندك بالمستقبل اخوه ..

قاطعت هند ذكرياته وكالت ..

هند .. اي صكر ..وين سرحت. لازم داتحاول اتلفقلك سالفه حتى اتبين انه انت جنت طبيعي من جنت صغير لان مستحيل واحد مثل جان حتى بطفولته طبيعي ..

مجاوبها .. يعرف اتريد تستفزه . شويا واجا الاكل .. جان سمك مشوي ويا مقبلات .
اكلو لحد ماشبعو .. بعدين رجعو للشقه ..
من دخلو للشقه جانت ظلمه رادو يعلكون الضوا ومجان يعلك فكالت .. هند .

هند .. اشو ماكو كهرب ليش .. والجيران عدهم ..

صكر .. لازم صار عطل شي .. خلي انزل اشوف ..

سد الباب وهي كعدت بالعتمه متشوف شي الا من الاضويه الي برى .. شويه وصعد صكر ..فتح الباب وطب ..كال ..

صكر .. هسى يتصلح شويه ويجي .. طاكه يمنا الكهرب .. ميطول ويصلحوها ..

هند .. اي زين خلي تجي بسرعه ..

كال صكر باستغراب .. لاتكوليلي اتخافين من الضلمة

هند .. لا مااخاف ..

هي تحجي ومتوتره ..فراد صكر يختبرها .. جان اكو ورقه بيده صغيره ..جعصها وذبها عليها .. هي من وكعت عليها فزت ..وراحت كبل لزكت بصكر ..
لزمها من خصرها حاضنها وهي تصرخ واتكول طفر علي شي حشرة ماادري ..شنو . وهو دايظل يباوع بيها وعلى حراكاتها وعطرها الي دايتنفسه .. ماسيطر على نفسه وباسها من شفتها .. هي بين ماهي خايفه ومذهوله من الموقف الي وكعت بي وبين صكر الي دايبوسها .. قبل بعدتا منها ... وبنفس اللحظه اجت الكهرباء... جان وجها ميتفسر وهو همين .. بس هي صارت كلش عصبيه منه وكالت ..

هند ..ليش ..ليش بستني .. مو هلى الاساس زواجنا بس على الورق ..مو على الاساس اتزوجتني حاى لاتقتل اخوي . ها ليش هيج اتسوي .. لاتتقرب مني مااسمحلك انت صحيح قاسي وظالم وانسان صعب ..بس لاتصير حيوان وتمشب خلف رغباتك لانك وعدتني انه ماتلمسني .. وشلون تكدر تتقرب على وحده ماتحبها وجنت حتقتلها ..

هي تحجي وهو حتى مكدر يباوع بيها .. قربها منه كل يوم يخليه يتعلق بيها زايد ..وهي تكره اكثر عن اليوم الي قبلها ..
ابتعدت عنا وطبت للحمام تغسل وجها وفمها من البوسه متريد لي اثر منه عليها ..
ورا مطلعت .. هو اجا واتقرب عليها خافت لايسوي شي رجعت لوا .. بس هو كاللها .. اعذريني مجان قصدي .. وعافها وطلع ..
وهي كعدت على القنفه تبجي لحد مانامت ..
اما هو فمجان عندا غير الشارع يفتر بيه حتى يضيع وقت لحد متنام ويرجع هو همين للشقه ..
جان يفكر انه مشاعرا داتتغير اتجاهه وهو ميريد يضعف ابدا كدامها .. يريد دائما اتشوفه انه رجل بارد ميخاف من شي .. لكن هي داتغير بيه اشياء بدون ميحس
.............................

طلع هو كالعاده قبل ماتكعد .. جانت ايامهم عاديه جدا .. هي تهتم بالبيت الي كاعده بيه مو لانها تهتم بيه كبيت زوجها او بيتها لكن فقط لانها حاليا عايشه بيه .. تطبخ لنفرين ..ترتب البيت اصلا كلش صغير ويتعزل بسهوله .. جانت اتنظف حتى الشي النظيف فقط حتى تقتل يومها ..وخاصه هي مداتروح للمستشفى بحجه اجازه لانها عروس ..

سوت الها ريوك لكن اكلت كلش قليل ..الثلاجه مليانه كلشي بيها ..لكن هي متشتهي هواي اشياء .. مرات تصفن بيه وتفكر بصكر ..ساعات موسوى ..مرات اتشوفه كلش حنين ومران يصير اكثر المجرمين قساوه .. وهذا الي خلاها تحتار شلون تتعامل وياه .. من ثاني يوم عرسهن وهي مراحت لبيت اهله ولا شايفه احد غيره .. وكل ماتطلب منه يوديها يم اخوها يكول بعدين مو هسى عندي شغل .. وهند اشتاقت اهواي اله .. مرات اتخابره لكن متحجي وياه هواي لان منبه عليها صكر وحتى كاميرات اكو بالشقه ..يعني بكل الاحوال يعرف كل حركاتها ..
جانت الساعه 11 الصبح لما اندك تلفونها .. باوعت جانت ربى .. فتحته وحجت وياها ..

هند ..هلو ربى شلونج حبيبتي ..

ربى ..هلو هند مشتاقتلج هوايه .. شخبارج انت ..يمتى ترجعين ..

اتنهدت هند وكالت ..والله ماادري ..انشالله باقرب وقت ..شلونها المستشفى والله اشتاقيت لكلشي بيها

ربى .اي مثل ماهي ماكو شي جديد .. اكول هند

هند . كولي عيوني ..

ربى .. اكدر تجي ازورج .. لان من تزوجتي واني اريد اجي اهنيج واجيبلج هديتج صارلها شكد من اشتريتها .. ِ

جاوبتها هتد وكالت .. ياااا ...مو عيب .. احنا اكو بيناتنا هدايا .. بس حبيبتي تعالي يمتى متحبين ..

ربى . اوكي لعد ..اجيلج ورا الغدا بس دزيلي العنوان ..لان انا اليوم اووف

هند .. اي مو تدللين .. ابعيني . اني هم اشتاقيتلج ..

وهيج اتفقت هند وربى انهم يلتقون . فدزتلها العنوان ..وللضهر اجتي ربى يم هند .. ولما عرف رضا انه ربى جايه يم هند كبل انطى خبر لصكر ..

جان صكر طالع يجب الابتوب الي محمل عليه كل المعلومات الي اتسربت من مكتب عمى الشيخ وصارت بيد جمال علمود يهددا حتى يتنازل عن الانتخابات ...اندك تلفون صكر

صكر .. ها شكو .

رضا .. صديقه الدكتوره عند يمها .. كلت اكولك ..

صكر ..اوكي .. خلي عينك من تنزل شوف يمتى .. اني بس اخلص اجي ..

وسد التلفون وهو يتأفأف .. ويكول . بسيطه يادكتوره هند .. تكسرين كلمتي وتعزمين الناس بدون ماادري .. الا اخليج تتندمين على الوحده الي انت بيها ..

وهو بالطريق وصل للمكان الي المفروض الاب توب موجود اهناك .. ركن على صفحه جان بيت صغير .. سحب المسدس من خاصرته ..وكان شوي شوي يدخل للبيت .. لحد ماكدر يلزم واحد من الموجودين . حط المسدس براسه وساله سوال واحد بس ..

صكر .. وين الاب توب .

اشر الولد على خزنه بزاويه الغرفه .. كام صكر سحب الولد ووداه ليم الخزنه .. وكله .. افتحها .. جاوب الولد وكال .. المفاتيح مو يمي ..يم ساهر .

صكر ..ومنو ساهر وينه .

الولد .. ساهر الن جمال .. وهو برى هسى يرجع ..

صكر صدق بالولد لان امبين كلش جبان وخاف على روحه بشرط اعترف بدقيقه بكلشي .. حبسه بوحده من الزوايه .وكعد ينتظر ساهر .. نص ساعه هيج سنع صوت. واحد يفتح الباب بالمفتاح ..اتحضر صكر وهو رافع سلاحه. .. طب ساهر للبيت .. ولما اندار شاف صكر اكباله وبيده المسدس .. ساهر كال .

ساهر .. منو انت وشرايد ..

صكر .. افتح هاي الخزنه .. بيها شي يخصني ..

بحركه فجائيه طلع ساهر مسدس من ورا ضهره ..وراد يصوبه على صكر لكن صكر جان اسرع وهو اطلق الرصاصه. ولقرب المسافه اجت قريبه من كلبه وكبل وكع ميت .. ودمه اتناثر بكل مكان .حتى على صكر ..
راح اتقدم عليه فتش بجيبه طلع المفاتيح فتح الخزنه .. اهذ الاب توب . وبعدين اخذ الولد الي جان حابسه وخلاه بصندوق السياره .. دك على سامر وحجاله شصار ..

صكر .. تعال وياك واحد من رجالك .. لازم نتخلص من جثة ساهر ..

سامر .. اذا عرف جمال انت الي قتلته مراح يعوفك .

صكر .. يستاهل مو بس رصاصه الف . مثل هذا واحد خسيس ويستاهل الموت ..كم واحد ادمن المخدرات الي يدخلها للبلد .. هسى عوفنا ..تعال بسرعه قبل لايجي واحد من جماعتهم لاني لازم اوصل الاب توب لعمي حتى يجيكا لايكون ناقص شي

سامر .. جايك اني .. طلعت روح ولادير بال ..

وطلع صكر للمكتب لعم جاسم .. اخذ الابتوب وانطاه اياه .. ضحك العم وكام راح حظنه ..وكال ..

جاسم .. محد يسويها غيرك ..مايجيبها الا رجالها. .من هيج اني معتمد عليك بكلشي . والنعم منك

صكر .. ماسويت شي .. بس هالمره دير بالك اكثر ..

فتح جاسم الاب توب .. وجيك الي بيه لكه كلشي مثل ماهو .. ماكادرين يفتحون اي وحده من الملفات. وكل تهديد جمال طلع فاشوش ..
راد يكوم صكر يرجع للشقه ..فوكفه جاسم وكله ..

جاسم .. ابني .. اريدك انت وسجاد تلزمون الشركه هاي بالنص .. شدكول ..

ضحك صكر وكال .. عمي ..اني وسجاد مستحيل نشتغل ويا بعض ..انت تكدر تنطيه الشركه بالعوفيه عليه .. اني شغلي زين ممحتاج شي ..

جاسم .. بس ياابني ليش انتو هيج ..

صكر .. اساله اله مو الي اني ماعندي مشكله ويا احد ..

سلم عليه وطلع ..مو من عوايده يبرر لاحد او يدافع غن نفسه يم احد .. ولهذا مبقا يناقش اكثر .. بالطريق خابر رضا

صكر .. ها .. شالاخبار .. بعدها صديقتها يمها .

رضا .. اي . .. لالا دقيقه .. هياتها نزلت .. طلعت صديقتها

صكر .. زين ..اني جاي ..

بالوقت الي جانت الدكتوره ربى يم هند .. جانت اتحاول تعرف منها شلون اتزوجت وليش بهالسرعه .. فهند مكالتلها شي ..ونفس الحجي الي حجتا لاخوها .حجتا لهند .. لكن بالحقيقه انه ربى جايه لموضوع اخر ..
( فلاش باك )
يوم الي جانت هند مختفيه ورعد يدور عليها .. كان سائل كل الناس الي تعرفهم ومن ضمنهم ربى .. وبوكتها ربى كالت .

ربى .. استاذ رعد .. هند خلص الشفت مالتها وكالت راح ارجع للبيت .. اتسوك واروح .. لانها جانت حتى داتسويلك مفاجئه بالاكله الي اتحبها ..لان ذاك اليوم حتى طلعت من وكت علمودك ..

رعد .. زين مكالت شي ..لاخ ..مشفتي شي غريب وياها ديصير .. عادتا وين اتروح من تطلع .

ربى .. صدقني ..جانت كلش طبيعيه وعادي ... اني خايفه عليها .. اذا مو مثلك اكثر .. هي الوحيده الي حسيتها صديقتي اهنا ..مع انه مااعرفها الا لمده قصيره ..

رعد .. زين .. اذا سمعتي اي شي اتصلي بيا .. وهذا رقمي ..

انطاها رعد الرقم وبقو على تواصل جانت هي اتخابره حتى تعرف اخبار هند ..لحد مااتوضح كلشي .. لكن رعد جان طلب منها انه تتواصل ويا هند وتصير اكثر مقربه منها ..بلكي يكدر يلكى ثغره ويعرف الحقيقه ..وهيج صارت علاقه ربى ب الضابط رعد اقوى ..
( نهايه الفلاش باك )

من اجتي ربى يم هند ..حست هند شويه بالراحه وكامت تتنفس بحريه وكانه جان اكو حجره طابقه على نفسها .. فسالتها ربى بطريقه غير مباشره عن حياتها ويا صكر ..لان رعد جان مفهمها انه اكو شي مو طبيعي بعلاقتهم ..وزواجهم السريع دايشك بيه ..وهو الهامه اختا ويريد يخلصها منهم ..

ربى .. اي ..احجيلي ..شلونه الزواج وياج

هند ضحكت باستهزاء وكالت .. اي زواج مثل كل الزواجات . امت احجيلي شلون الشغل ..

ربى . عادي .. مثل ماعفتيه . بس يكون ترجعي بسرعه مفتقدينج والله ..

بعدين اتلفتت داير مدايرها وكالت.

ربى .. اكول هند. اشو هالشقه شكلها غريب ..

هند . اي موديل غربي ..
ِ
ربى .. اي عيني هيج 24 ساعه كدام هيونج هو هههه مو بالله

ضحكت هند وكالت ..اي ..

بعدين رادت ربى اتروح للحمام ...شوفتلها هند وينه ..
وبين ماربى بالحمام ..شافت تلفون ربى دايدك والاسم طالع ..( الضابط رعد ) اتفاجئت بالاسم وكامت اتفكر ليش اخوها يخابر صديقتها واهنا افتهمت كلشي ..
من اجت ربى مبتسمه شافت هند عاقده حواجبها .. كالت .

ربى.. ها شبيج ..

ِهند .. شعندا اخوي وياج ليش يخابرج

ربى... ماكو شي ..
اتوتر ربى من سالتها هند .. بعدين كالت ..

هند .. شوفي ربى .. اني دااسوي كلشي علمود محد يكدر ياذي اخوي ..وانت جايه لهنا بخطه من عندا ..لاتسون شي يخليكم بخطر ..

ربى .. اهااا يعتي تعترفين انه هذول الناس خطرين .. احجيلي هند احنا انريد انساعدج واخوج منقتنع باي شي ..

هند .. اذن مثل مالعبتو علي ..هاي مهمتج انه انت تقنعيه واتخليه يبتعد عن صكر وجماعته .. مااريد اخسر اي واحد احبه ..

ربى .. بس هيج ميصير .. وكانه مسجونه انت ..حتى شغلج متروحي ..واخوج متشوفيه ..

هند .. باعي ربى .. البيت كله كاميرات مراقبه .. لحسن الحظ بس صوره تلقط مو صوت ..واني مكعتج بمكان ميكدرون يشوفون وجهنا حتى ميكدرون يقرون شفايفنا ..استري علي وعلى روحج .

ربى .. هاي شنو عبالك داامثل افلم اكشن .

هند .. اي لعد ..خليها ابالج ..ومثل مفهمتج زين .

ربى .زين وامري لله

بقت شويه وسوت الها جاي ومعجنات .. سولفو شويه عن المستشفى وطلعت ربى ..
بعد مطلعت بشوي وصل صكر .. اول مطب كال

صكر .. صايره تاخذين قراراتج لحالج .لازم انطيتج عين اهوايه ..

هند .. شوف مدام انت تعرف كلشي ..فماراح ابررلك ..بس خلي ابالك ..انت مراح تكدر تسجني اهنا فهمت ..ولاراح تكدر تخليني اخضعلك ..

صكر . زين يابنت الناس .. امشي وياي ..

هند ..وين ..راح اتوديني تقتلني .. وتتخلص مني ..

صكر ..لا راح اوديج لمكان تتمنين لو بقيتي وحدج اهنا ..يلا ..

اخذها وطلع .دايوديها لبيت اهله . اهناك الكل عيونهم عليها .. ومراح تكدر بعد تتحرك براحتها ..
بالطريق جان هو يشغل اغاني وهي اتطفيها .. متريد تسمع اي شي وهو موجود وكانه الاغاني الي ديسمعها تحكي عنهم .. بعدين اندار عليها وكال ..

صكر . تردين اتروحين اتشوفين اخوج .. واتجيبين غراضج من اهناك ..

التفتت عليه هند ممصدقه انه راح يوديها اتشوف اخوها كالت بدون تفكير ..

هند ..اي ..ياريت . بس عجب طلعت منك ..

صكر .. لسى ماتعرفيني يادكتوره ينرادلج سنين حتى تتعرفين عليا ..

هند .. الله لايقدر ابقى سنين وياك .. انشالله اتخلص منك باقرب وقت ..

من عصبيته وسمع هيج منها شحط السياره وكف بريك سريع واندار عليها وكال ..

صكر .. مراح تتخلصين مني حتى الموت .. ولو اروح جهنم اخذج وياي .. فهمتي .. وهسى صيري حبابه واريد ابتسامتج من اذن لاذن . رايحين يم اخوج ولازم يتأكد احنا ليلنا ونهارنا نفس الشي من الحب الي بينا ..

وحرك السياره وراح كمل طريقه لبيت اخوها ( بيتها قبل متتزوج )
.....................

في مكان اخر بمدينه اخرى .. راجع علي من الجامعه ..ومبقاله غير ايام فقط ويتخرج .. رجع للبيت الي كان مستأجره ..وللمرإة الي كان متزوجها ومحد يعرف بيه ..
دائما كان هو الشخص الوحيد الي قدر يطلع من قوقعه عائلتهم ..ويدرس بالجامعه ااي رادهه ويعيش الحياة الي هو يشوفها صحيحه ..
دخل للبيت تلكته فرحه بابتسامتها الحلوه .. وبطنها شكبها كدامها. اخذت من ايديه علاليك المسواك..وكالت

فرحه .. الكوه

علي .. الله يكويج .. شلونج يانور عيوني وفرحه حياتي ..

فرحه ضحكت وكالت .. شلوني مداتشوف شوي وانفجر ..

علي . مبقا شي .. اني وانت نخلص ..وننتقل لبغداد ..

فرحه .. اي دانتظر بفارغ الصبر .. بس همين بعدك محجيت لاهلك فد شي عن حياتنا ليمتى علي هيج ..

علي .. بس اتخرج احجيلهم كلشي ..المهم انت هسى اتكومين بخير وسلامه واشوف ابني وبعدين تنحل

فرحه ..اني خايفه لايرفضوني ويرفضون ابنك ويقاطعوك ..

علي .. مثل ماانت ماعندج احد .. ومقطوعه من شجره وصرت اني اهلج ..عود اني هم اصير مثلج ذاك الوكت ..

فرحه .. الله لايقدر وتصير مثلي .. اني اعرف شنو احساس اليتيم وماعنده اهل وسند .. بد بسببك خليتني احس بطعم الامان وكفتك وياي ماانساها ..

على ..هاي شنو .. اشو قلبنا فلم هندي . اني زوجج مو اي احد . هدى يلا عوفينا شطابخه اليوم ميت جوع ..اريد اتغدى وانام شويه حتى اكوم اقىا لاخر امتحان ..

فرحه .. اممم مدويه باميا وتمن على لحم عضم. يجنن

علي .. ديلا صبيلنا اروحلج فدوه ..

فرحه .. هسى دقائق بين ماتغسل ايديك يحضر الاكل ..

طبت فرحه اتصب الاكل وهو دخل يغسل ايديه .. مبقاله شي وينتهي الدوام ..ومثل ماوعدا رئيس للقسم راح يعينوه ابغداد .ومعاملته تقريا كملت بس يحتاجون شهاده التخرج ..

جان علي يشتغل بالاضافه الي المصروف الي ينطوه اياه اهله وهيج كدر يعيش هو وزوجته بامان بدون مايمدون ايديهم لاحد ..كما انه فرحه اتخيط ملابس وجانت قبل متحبل تشتغل بشي بسيط لكن تركت الخياطه من عرفت نفسها حامل ...
اتعرف علي .على فرحه بضروفها الصعبه ماكدر يتركها للشارع ..اخذها ينى ..لكن خاف من حجي الناس فعقد عليها وصارت زوجته وبمرور الايام حبو بعض وحبلت منه وراح تجيب ولد .. صارلهم متزوجين سنتين ..ولحد الان اهله ميعرفون شلون ومنو هي فرحه ..

بالنسبه لسامر فلما راح يتخلص من جثة ابن جمال مشاف اسهل من انه يحرك البيت حتى يبان مبدئيا انه حادثه حريق مو قتل ..وعلى الاقل يلتهي جمال بهالحادثه ويبتعد عنهم .. وفعلا كام وهو وشويه شباب يثق بيهم وحركو البيت ..ظلو اهناك لحد مااتاكدو انه كلشي احترق نهائيا ..
لكن جمال الي بعد مسمع انه البيت الي جان متخبي بيه ابنه محروك ..اتخبل وانهار وشك بانه ممكن يكون لجاسم وصكر علاقه بالموضوع ..
وتأكد اكثر بعد مابين التقرير الاول للحادث انه الحريق متعمد فزاد الشك بكلبه .. ومقبل يسوي العزا الا ياخذ بثار ابنه من عشيره صكر وتوعد الهم واحد واحد نسوان ورياجيل ..

بهذا الوقت جان صكر وهند رايحين لبيتها .. فخابرت اخوها ومن شاف اتصالها قلبه وجعه على اخته ..رد بسرعه ..

رعد .. روح اخوج .. شلونج

هند .. حبيبي اخويا .. انت شلونك وينك ..

رعد .. راجع للبيت ..

هند ..اي زين ..لاني جايه ..

رعد .. صدك تحجين ..واخيرا راح ترجعين . ليش مكتيلي جان اني اجيت اخذج

هند جانت حطك الدمعه من عينها لكن لزمت نفسها وكالت .. جايه اني وصكر ..علمود اخذ هدومي .

خابت امال رعد لما سمع انه صكر هم جاي وياها ...لكن على الاقل راح يشوف اخته . كال .

رعد . هلا بيكم ياعمري ..تعالو ..

وصل صكر لبيت هند بنفس الوكت جان رعد همين واصل .. رادت تنزل بسرعه ..لزمها من ايديها اندارت عليه ..باوعز بيه وهو يبتسم ..فهمت شنو اباله .من دون ميحجي ..كالت ..

هند .. لاتخاف ..راح اتصرف طبيعي. ..

عافها ونزلت .. ركض حظنت اخوها وكالت ..

هند ..اااااه ياخويا شكد مشتاقه الك .. سامحتني لو بعدك ..

رعد .. واني هم اشتاقيتلج .. واكدر مااسامحج انت الي بقيتيلي من امي وابوي . فوتي البيت اشتاقلجك همين

طبت هي للداخل وهو ظل يباوع على صكر ..كله اتفضل ادخل خوما راح تبقى واكف برى هم عيبه بحقنا طب ولو ابد ماارتاحلك ..

ابتسم صكر ..محجا شي ودخل ورا هند .. كعدو بالصاله ..جابتلهم هند قهوه .. وهي دخلت اترتب اغراضها وتتذكر كل قطعه شنو جانت بالنسبه الها صور كتب حتى هدوم ..
اما صكر ورعد من جانو بالصاله .. كاله رعد ِِ

رعد .. شوف ..انت اتزوجت اخاي الوحيده وامنا بهذا .. مع اني ماجنت ابدا اتمنالها واحد مثلك ..

ابتسم صكر بخباثه وكال .. تدري هذا القسم من الحجي جنت منتظره منك ..يعني نصيحه وهيج. كمل بالله

رعد .. داتستهزء مو .. شوف واسمع زين ..لو شفت اختي تبجي كبالي وانت السبب ماتلوم الا حالك ماافكر وافرغ مسدس براسك .. انت هم اخ وعندك اخت وفد يوم راح تحس بهذا الشي واتمنى من صدك اتحبون بعض واتزوجتو واطلع اني الغلطان .

صكر .. لايظل بالك يم اختك .. اختك بعيوني ِ..

اما هند فجانت بغير عالم ..جانت بعالم ذكرياتها ويا اخوها والاحلام الي جانت تحلمها وهي تطلع من بيت اخوها عروسه
........................

ياريت لو تسولي دعم وتنشرون القصه يمكم بحساباتكم حتى يشوفوها اصدقائكم همين واكون ممنونه منكم .. حبايبي الحلوين