إعتذر للي عبالهم هذا بارت بس للاسف موبارات راح اناقش بي كم شغلة يمكن عند البعض مهمة ويمكن لا المهم احجي بكل شي بما اني صرت ملكة ونزلت الواتباد وعفت المتصفح🙂🌚 .
ببداية الرواية كتبت"مقتبسة عن قصة حقيقية"
آني ماگلت حقيقية ١٠٠٪ ولاكلت هاي من خيالي
كل اليسألوني أگللهم حقيقية مع خيالي وأتوقع كلمة "إقتباس"حيل واضحة ، واذا اكو موقف حقيقي ١٠٠٪ ومااغير بي شي مثل موقف نور وخالد انبهكم
القصة حقيقية خلي نكول بنسبة ٨٠٪ والباقي خيالي بي يلعب دور بتفصيل الأحداث وروايتها لان افتقر لبعض المعلومات المهمة .
هسة شنو شتردين؟
الي أريدة اولاً ابين حقيقة القصة حتى تبطل الشكوك تدور ، اكو هواي يشككون بالقصة ويكولون ماكو هيج وماكو هيج فلان شي ولان اگُللهم مع خيالي ميصدگون بس عادي هسة اعترفت الكم بكل شي رغم اني منبهه بالبداية واتمنى تكون العبرة وصلت .
هسة نجي لثاني نقطة ..
صارتلي فد غلطة جبيرة بالقصة بسبب تحريفي لشغلة مهمة إلي هيَ سالفة الاعمار .. حاولت اصلح هالغلط بس صلحت الغلط بغلط وصارت مصيبة؟ والي قاري الرواية اول مرة بالبداية كلش راح يعرف عن يا اغلاط .
بس الاعمار مطلوب مني اوضحلكم الغلط الصار .
بالبداية اعمارهم جانت بالاربعينات بس بسبب غلط بالتواريخ والسنين مني صديقتي نورا ناصر نبهتني اني مكبرة اعمارهم زيادة عن اللزوم فصححتها بغلط ثاني بالحساب ومانقصت الاعمار وصارت بالخمسينات وكذلك بسبب غلط مني بالسرد بماضي نور .
هسة كعدت وحسبت وية صديقتي زينة بالرياضيات عكسي"فاشلة"بالرياضيات والحساب ودائما ارسب بي
فالاعمار كالتالي ؛
خالد عمره ٤٩
نور ٤٧
مر على زواجهم ٢٥ سنة (الي قارين سابقا جنت مسويته ٣٠ سنه💔💔)
هُشام عمره كما هو ٢٠ (طالب طب مرحلة ثانية)
زين ١٦ (رابع علمي)
حُسام ١٥ (ثالث متوسط)
سارة ١٣ (ثاني متوسط)
بسبب هالاغلاط الصادرة مني بسبب قلة تركيزي وصعوبتي بالحساب وبسبب فد علة بيه براسي خطات بالحساب وماعالجت المشكلة بس هسة حليتها
هسة حتسالون معقول نور ماحاجيتلج؟
لا كل شي مضبوط بس اني تلاعبت بالاعمار كلت احسن وصار غلط ومسحتة ورجعت كُل شي😬💔
وراح اعدل البارتات الاولية واصحح الغلط واحطهن قيد التعديل .. اتفقنا ؟ اتمنى متزعلون مني ولهالسبب حبيت انبهكم على هالنقطة وتعذرون عدم تركيزي
هاي نقطة .
النقطة الثالثة بعض النقد راح اجاوب عليه
لاني بالغالب اريد اركز عالرواية اكثر واصب عليها حيلي من الرايح والجاي وماراح اتواجد للرد على استفساراتكم وشكوكم .. ما اريد اغلط اكثر من هيج وارتب الاحداث اكثر
هواي معترضين على العائلة يگولون شلون عائلة مثقفة وابوهم دكتور وحجيهم هيچ ؟ وخصوصاً زين الحاقدين عليه
الثقافة موضوع تختلف من شخص لآخر وكل عائلة ومفهومها للثقافة بس هذا موموضوعنة هسة
اولاً لو تلاحظون الكلام دائما ديكون بين الاخوان فقط ، ولان سارة ذاك اليوم بالسيارة جانت وياهم شفتوا هشام شلون عصب على زين وكبت العيطة بس زين ميسكت
كذلك لمن زين حجى لامه هذاك الحجي ذاك اليوم .. زين شخصيتة منحطة وسيئة للمرة الالف داكولها والعائلة اعتادت عليه ماعدا الاب .. ويمكن هذا حرق للبعض بس لازم اخلص من شدة زين واكللكم تعرض للتعنيف من قبل ابوه بسبب اخلاقة المنحطة بس هم مافاد بي لذلك تأقلموا وياه .. وبهيج نكون خلصنة من موضوع زين ورجاءاً لاوحدة تحجي بي بعد لان هواي وضحت وهواي نقد عليه
ويكون ببالكم نص الشباب خنكول موكلهم حتى المؤدب بيهم يفشر ويسب ويغلط بس كدام الشباب مو الكل مثل زين وهشام ، واني قررت احط كلام زين المنحط بمواقف مضحكة ولطيفة تخفف حدة اجواء الغموض والدراما الي بالرواية .. ولهنا اريد نقفل سيرة هالموضوع بعد إتفقنا؟ .
واضيع على نقطة زين انو مويعني لتحجون ولتنبهوني على ثغراتي بالرواية لوهيج لا لا لا أبد شنو الي ببالكم شنو الي دتلاحظو عليه هفوات إحچوا إنقدوا الكم حرية النقد بس الشخصيات إلي بالقصة ماتكدرون تنقدوها لان هاي هية صفات الشخصية وموبيد الكاتب والكاتب دايما يسعى لبرز صفات هالشخصية حتى وان سيئة هذا مطلوب منه .
هسة آخر نقطة ونسد الموضوع .
باعو المشاهدات على كل بارت حيل عالية توصل لل١ك بس دالاحظ حتى الفوت والتعليق مو بكد المشاهدات ؟ واني مومن النوع الي يطلب تفاعل ويهدد اني راح اكمل الرواية اول وتالي بس هالشي شوي يهبطني مرات فاتمنى تراوني وجهات نظركم تعليقاتكم عالقصة على الافعال الشخصيات احب اقرة نظرياتكم وتعليقاتكم خصوصا على موضوع خالد ونور لان ببالي فدشي😬اتمنى بس تشاركوني آرائكم وفقط ، والي دائما يكتبون وجهات نظركم حتى حساباتهم حافظتها واحس بالوحشة من ماالكى اسمائهم بالاشعارات وبعضهم صارو صديقات الي .
لغيت هواي؟ أعتذر اذا ازعجتكم واعتذر اذا البعض يمكن يشوف هالملاحظة موهادفة بكيفكم وشكراً لقرائتكم .
وان شاء الله البارت الجاي طويل وصادم وشخصية جديدة راح تجي وتدخل الساحة وتقلب الموازين😗
نلتقي بخير ..