تعليقك يعكس اخلاقك مع احترامي لجميع الراقين
┈┉┅━❀. 🍃🌸🍃. ❀━┅┉┈
الزنبقة _ السوداء
داليا_ المسلم
الحلقة_ 1_
سامحني لأنني احببتك فقط...!
من دون مُقابل اردك حياة لوردتي
فاصبحتَ انتَ حلمً.....
واكتسيت السواد لـ زنبقتي منك
فصارت
زنبقة سوداء
كما قلت لي. ذات يوم انتِ
زهره الزنبقة
النادرة تعيش وحيدة وتموت
وحيدة إعصار يحتل روحي
متى يهدأ اعصاري
ياقاطفي اضننت اني عودي سينكسر
بخبثك وغدرك لا هيهات أن انكسر
سأخُبرك شيء
انتَ وزماني كلُ ما تجبرتم
تجبرتُ أنا أيضا ً
اخبركم بصوت مملؤ بـ الشموخ
انا حواء هي التي
تهزم زمانها
ولن يهزمني اي زمان وكل يوم أزيدُك
طغيان
داليا المسلم
~~~~~~~_____~~~~~~~
الستينات ......... گــراج الـنـجـف الاشـرف
الساعة ٢ ظهراً
الجو حار والشمس عامودية. وضجيج الكراج
وعرباين الملبس او عرباين الجرك الحار
وناس تصعد بالدق وناس تنزل منها
ابوي يمشي وأنه وإمي ورىٰ نمش ورى
انه شايله دبة ماي وجيس تمن عنبر ماخذينه لبيت خالتي وإمي شايلة علاكة بيها قوطية دهن حر اوجيس المغلي
(سمك يجفف على الهواء الطلق بعد تغليفه بالملح
ويسما بالمسموطة)
سيد محيسن يمشي ويعدل بالشطفة مالته
ولاف البشت جوا ابطه
يحجي وهو. يمشي سريع والحر اخذ مأخذا منه
يالله ام شذر عجلي عجلي راح يفوتنا باص الدق عجلي بويه. شذرَة يا الله
شذرَة _ انه وامي نمش بساع. ورى ابوي بالجن يلحك بالباص
صعد ابوي قبلنا واحنا صعدنا ورا
بـ الباص رايحين للعمارة لبيت خالتي
العلوية مريضة مالها خلك
خذينا مجان. بـ الاخير . كعديت انه ابصف الكزيزة (جامة السيارة ) وخليت دبت الماي ابحضني.
لان امي كل اشوي تعطش ادكول. حلكي يجف التفتت اتنوع للناس من الكزيزة ورديت اشوف امي. اتون وابوي كلساع
يباوع علية اخافن وجي طالع ايخاف عليه
عبن يكلي يابويه حسنج حسن انكريزية وانه
اخافن عليج
امي كلساع وذبت حصرة كتلها القهر من ودانا خالي حمود خبر خالتي وكال مَريِضَة
عمن شني هو يودي. زرع للعمارة وتمن عنبر
ويمر. لخالتي كل مدَه
.
.
.
.
خالتي مزوجة سيد ابن عمها وعاشو غاد بالعمارة بعد ماجانو عايشين بالنجف. احنا اصلنا سادة من النجف ديرة علي
چدي معروف ابو امـي بالنجف.
(سيد من بِيتِ الموسوي )
امي خذاها ابن خال ابوها سيد محيسن وماخلف بس انه
.
.
.
وخالتي خذها سـيد محمد ابن عمـها حباها حـيل وخذاها خلفت منه اثنين ولد وبنت
البت سهامة البجر بس ترملت من وكت خطية رجلها اندعم ومات وضلت. حداي خالتي وماقبلت اتعرس
.
.
والثاني ولد اسمه حقي . اااه ياحقي
.
.
عشگ صباي احبنه حيل. من رحت سبع فدوات
لـطوله معالم حقي طويل والشعر جوزي مدري اشكر والعيون صفر. والوجه ابيض. جنه حَــلـيِــب
.
.
بس عيبة. خشمة يابس. احسنه متكبـر حيل عبن شني هو. مثغف ودارس. فأابوي يكول هو نشمي ويساعد الناس بس عيبه يشوف النـاس همج رغم هو يساعدهم . ويكضي حوايجهم وعندا سيارة جديدة ومرات يروح بيها للبصرة هناك يلتقي
بصدقانة المثقفين أو يروح بيها للكويت
.
.
وانه . اگلك يـا بويه. حگه. عبنا گمر بليلة. مخنوكة بغيم وينورها بضواه
مرات امـي اسولفلي ادكلي خالتي بشبابها
حلوة حيل حيل ولو هي بعدها حلوة
وامي هم حلوة
بس شني خالتي احلى وانه ايشبهوني بيها امـي وابوي يكلولي انتي شبيهت . خالتج فـضة وخالتي حيل تحبني وتودني وكلما تجينا. دكلي انتي اخذج جنة الي . واني احلم بذاك اليوم الي
اروحن يم خالتي هما كاعدين بيت حلو وجبير وبالمدينة با العمارة الكحلاء ومو مثلنا كاعدين بـقـريـة وبعيدة بالمشخاب بس بيتنا مرتب وحلو احسن من باقي اهل القرية بعد بيت سيد محيسن
انا مادرست بالمدِرسة بس حافظة قرعان ابوي. يكعدني ويحفظني ويعلمني اقوال النبي
. (صل الله علية وسلم )
وعاني صوت امي من صفنتي
ام شذرة: يالله شذرة يمة. چا شبيج بلدتي امشي نزلي يالله هزيت راسي وسأليت امي چا وصلينا يمة
..........
_اي وصلينا. يالله
نزل ابوي وامي وانا وراهم
مشينا منا لساعة احس اريولي. جزعن من المشي
ام شذرة: چا شنهي ابو شذرة ماوصلينا تعبيت
ابو شذرة: هاي وصلينا هذولاك بيتهم يالله عجلن بوية لا ضلن تحجن عيب صوتجن الطريج بي زلم تمشي -......
والله صدك اشوية مشينا لانه بيت خالتي
وكفنا يم الباب دكينا الباب. ربع ساعة وابوي يدك بالباب عاين من فوك الباب
سيد محيسن _ چا شنهي اشو البيت هدوء لاحس ولا شي بس لا مسافرين وانا اخوك يا دشـر
ام شذرة _ لا ياخوي
(تعبير احترام للزوج وليس لااثبات الاخوه )
شنهي منهو يكول. خلنا نتناهم هنا راح اكعدن هنا ريولي ماتن (رجليها توجعها)
شذرة _ شويااا وانفتح الباب من جوا وصوت مشي باوعلي ابوي. وكالي . هاا. هذول. طلعو كومي يامرة كومي على امي وطلعتنا سهامه فتحت الباب
وعيونها غركانا دموع ...........
ام شذرَة_ اسم الله چا شبيح يمة سهامة ليش اعويناتج حمر
سهامه_ هلا هلا خاله فوتاو تفضلو تفضلو
مابية والله بضحك جنت بالحمام والصابون. فات بعيوني هلا هلا عمي فوتَو تفضلو
السيد_ هلا بنيتي اشونج عافيتج
سهامه _ الله يسلمك تفضلو تفضلو هلا شذرة هلا خيه
شذرة_ حبتني وطبينا ليجوا خذت مني دبة الماي
وجيس التمن
شذرَة_ لا عوفيه انه ادخَلها ويايه
سهامه _ لا حبيبة جيبيها فوتي حبيبتي فوتي
شذرَة _ فات ابوي للديوانية. وامي راحت للحمام
ام شذرَة_ اني ادخل للحمام روحو جوا جدامي
شذرَة_ اكلج خية چا وين خالتي
سهامة _ هاي حبيبة دخليلها للحجرة امدداة
شذرَة _ جا خوش ذبيت عبايتي وشلت البوشي من وجي دخليت عليها من شافتني عدلت كعدتها
العلوية _ هلا شذرَة يبعد روحي هلا بهل الطول
يمك وأنه أكول ريحة هلي هفت اعضاي عدالي
الهوا حالها ليه
دنكت وحظنتها. بوستها وكعديت يمها على جربايتها اشونج خاله بعد روحي شبيج مريضة من ودانا خالي حمود وكال مريضة واحنا بالنا يمج وامي اتمرضت عليج من القهر
العلوية_ اي والله. جنت ممروضة لجن هسه. لا
صرت زوينة من دخلتو عليه
هي وتكرصها من خدودها
اشونج ولج صايرة فلعة كمر زايدة حلا
شذرَة_ دنكت راسي وضحكيت بخجل صليت
اتباوع للحجرة مال خالتي بيها ريحت محنة دافية من حنان خالتي وعطرها يخبل مسج وعنبر اوبخور حيل ريحته طيبه. جربايتها جوزية تلمع والمندر مفروش ابو الحياكة والكنتور. ابو البوب الجام وفاصل بينهن جرارت والمسجل على ميز الجرباية ويمه قرعان
خالتي. والسجادة والتربة هي وجها ابيض حيل
وتحس السكينة والراحة تبث بث من معالم التجاعيد
الي مرسوم ب اوجها. اتحسها كل خط من وجها
يحجيلك. قصة مرت بيها. بزمن من عمرها
كامشة السبحة وتسبح وتتباوع لوجي . بفرحة
ممزوجة براحة وأنه اعياين لكل مجان بالحجرة
شفت دشداشة حقي معلكة بالتعلاكة. جن روحي ردت
من عاينت ليها
دخلت امي وهي اذب عباتها من شافت خالتي متمددا على مندرها. ثغبت بقهر وحضنتها وضلت
تنحب عليها
ام شذرة_ ياخية يابعد رويحتي. شچاج اجي وماتتلكيني جا خذيتي روحي من دخليت للبيت وماشفتج. واكفة بـ الباب
العلوية _ يااخية بسج. بسج چا هاي انه جدامج
شوفيني مابية شي والله بخير بس العمر هم الى حوبته ردت رويحتي بدخلتج. عليه
فأتت سهامه شايلة صلاحية الماي
هاج خاله شجاج وجج اصفر. هاي العلوية بـ خير وبركة. شوفيها وردت خديداتها من شافتكَم
ام شذرَة_ ياخية جا حقي ماكو شنهي مسافر
شذرَة _ شربت امي ماي وأنه هم شربيت وعيوني
تتباوع للباب من اذكر طاري. احس كليبي يخفج
خفج عدالك عندا جنحان ويرفرف يسولفن وأنه
ماخذتني الصفنة وبالي. يم ذاك المثقف ابو خشم اليابس وعاني صوت سهامة
بدغة من الخاصرة. وضحكة بمكر
سهامة_ هلا خايبة شذيرة ( تعبير عامي للشذرة)
چا وين وداج بالج يمفلوكة. عدالي راح تنامين من الصفنة حجت بضحك
شذرَة _ هااا لا لا خية بس دايخة من الطريج
(الطريق) وصفنيت ضحكت بخجل منها
سهامة_ بالله كومي وياية انزهب العشة عيب سيد محيسن ضل وحده بالديوانية التفتت للعلويات
مادكومن. يم السيد عيب وحده كاعد
ام حقي _ ياخية بالجن حقي اليوم ايرد صارله
اسبوع
ام شذرَة_ بحيل الله يرد ان شاءالله
والله انه حيل مشتاقتلة صار هواي ماشايفته
شذرة _ كمت وياَ سهامة واحس روحي خدرت
من طاري حقي التهيت وياها احضر العشة
والاماعين صارت الصلاة مال الغروب
وانطك باب الشارع رفعت راسي اتنوع من كزيزة
الشباك انفتح الباب طلاكتين ولانه حقي
يمة يمة عدالي هلال العيد سير علينا اااه
ياهواَ المحبو شمسوي بينا
.
.
.
يمة وين اضمن رويحتي احسن خديداتي وجرن نار
من المستحة وكلبي يخفج خفج جنه عندا جنحان يتمركصن حسيت اعضاي تتراجف رحت اركض للجدر اكلب بي
عدالي يدخل من المطبخ ماكو مافات طلعت سهامة
تركض بفرح للطارمة هو دخل سيارته واسمعه
يحبنها وسلامهم حار. خجليت جنا الحبة (البوسة)
صارت بيه
اشوية وفاتت سهامة بيدها اجياس صوغات
دولابني فشليت وانه اتنوع للباب وهو ماكو
سهامة _ خايبة شبيج صفنة تاخذج وصفنة توديج
وتركص بحواجبها الها بضحك هذا ابو الحقوق
جا توا فات ليم ابوج. راح اودي الغِراض داخل
واجي ليج نصبن العِشة زين ياالفاهية ردي
شذرة_ چا خية سمعيت والله سمعيت غيراً اتفطن
لحجيج واشوف شدكولين روحي وديهن راحت وعافتني
وانه ادولابت تتدوهنت لابيه اشيلن صحن لابية
اكمش خبزة شجاج يغمة يطمة صحصحي عيب لايسمع ابوي شكولن عود. غير يذبحني ياا هو ابوي شدرا هوووو
خلني اصبن. صبينا العشه وانه استحي اطلع
يمهم اكل كعديت بالمطبخ وسهامة كعدت على واهسي
ضليت انكش بـ الاكل
سهامه _ چا اشون أنه لفيت الصحن كله كليته
وانتِ لساج تتنوعين بلكمتج خايبة اكلي اترسي بطنج
الي الج الج محد يأخذا
شذرَة_ لا وابو الايتام ماانه يوعانة بس هيج
كعديت لخاطرح
سهامه_ همممم خوش خلي اكوم اسوي جاي
ترى عمي محيسن كال خل شذرَة تشطف البشت
والدشداشة مالتي
شذرَة _ خوش هساع اكون اشطفهن
كمت خذيت هدوم ابوي ذباهن على الدرج رحت
دخلت للحمام. والله انه احسن جسمي يحتاج اتسبح
وفتحيت الطرنبة وخليت الطشت مال الصفر جبير
شحلاته اكبر من مالتنا ويلمع لمع ترسته ماي
وذبيت هديماتي علكتهن سبحيت وخلصت
جانو مخلين بالحمام مراية طريلة تلمع لمع يمة شفت روحي ضليت صافنة. هاي منهو انه ياعع يمة يمة جني البدر جني العافية كل الحسن وحقي شايل خشمة علية كصايبي جنهن الشمس من ذكرت
اسمه غطيت وجي استحيت حسيتنه يباوعلي يبو يبو
بساع لبست هديماتي وشطفت ملابس ابوي
وطلعيت من الحمام صار ابوجهي حقي يم المغسل
واكف ردت اخرن من طولي ضليت مسهيا بوجها
حقي _ جا شبيج شفتي جني هز ايده ودار وجها
وراح
شذرة _ من كال هيج رجعيت للحمام وانه احسن
الموت واكف يفتر على راسي من الخجل ياا انه
حاجني كالي بس هو شكال ماسمعيته رحعت مديت راسي من الباب ماكو طلعيت ركض للمطبخ
سهامه واكفة اسوي جاي خية وين اشرن هديمات ابويي
سهامة _ فوك حبيبة اصعدي بالسطح
شذرة _ خوش صعدت فوك فجيت باب السطح
شريتهن او نزليت بس شنهو ركض خافيت لايلاكيني
ابو الحقوق وين اختل مديت راسي للحجرة مال خالتي
كاعدات هي وامي يسولف. رحت يمهن
خالتي _ والله ياخية اريدن اطلب منج طلب بس كون ما ترديني
ام شذرَة _ كولي يبعد روحي حا انتِ تأمرين امر
موش تطلبين
خالتي _ سالمة خية اريدنج ضخر ليه اكلج انه اريدن
اخطب منج شذرَة لحقي هاا شدكولين
امي _ ياع ياع خية كبعي واخذيها جا هي من الصغر وانتِ حاجزتها وانتِ تدرين. شكد يتخطبون ليها بس
ابوها كال ماطولن حجت بيها العلوية ام حقي هاي هي
ماصير مهرة لغير حقي
خالتي _ ابفرح خوش چا اكومن احاجي للسيد
كامت خالتي وراحت هي وامي للديوانية يم ابوية وحقي. اشوية وسمعت هلهولة. انه شصار بياَ
احسن هاي هي. فاتيت للجنة بعد انه راح اصيرن لحقي انه
.
.
.
.
سهامه_ كومي ولج تعاي ابوج يصيحج
شذرة _ خذاني الخجل عضيت الشيلة مالتي
اشون اشون ادخل وحقي كاعد هناك استحي
والامير استحي
سهامه _ ولج امشي عيب حقي مايشوفج كاعد
بعيد مايعاين عليج
شذرَة _ مشيت وراها فاتت جدامي وانه كتلاني الخجل
دشيت داخل كعديت ابصف امي وانه مدنجة
ابوشذرة _ بوية شذرة بنيتي خالتج مساع طلبتج
مني عروس لحقي شنهو رايج انه ماجبرنج كولي
تردين يو لاع هذا ابن خالتج نشمي ومنا وبينا
وسبع واخو خيته وماتلكين احسن منه. وانتِ بعد
الج راي شدكولين وياج
شذرَ_ بوية بوية ابوي يتحجة وياية هيج وكدامهم
احسن فقدت النطق اي انه من النوع الحيل خجولة
حيل ماحجيت شي كمت طلعيت ركيض بخجل
رحت لحجرة خالتي وانه اتنوع للباب عدالي يلحكني حقي ههههه يدور مني الموافقة
.
.
.
.
.
ام حقي_ هاا اها هاي العَروُس موافقة ماعدها
راي بعد رايك يا ابو شذر شنهي يحقي ماتحجي
دكول كوم برس راس عمك
حقي _ وهو يباوع لاامه بغضب ضحك بتصنع
وكام مشكور عمي ماتقصر حباه براسة وحب خالته وكعد وكال. بس هساع اني ماا ازوج بعد
خلها تكبر بعد فرد سنة اثنوين
ابو شذرَة _ بوية البت اذا نخطبت بعد شنهي كعدتها
والوادم تاكل وجه اهلها. ليِش وليِش ماتزوجت
وليش لساعها والبت عمرها ١٨ سنة هاي بعد حكها زواج وان جان البت مفروضة عليك هاي جدام امك وخالتك. انتَ وليدي. تبقى ودمي ولحمي ماتنجبر
على شي. البت ما واكف نصيبها لاع كفيلك
ذاك حماي الحمة كل اسبوع يتخطبوها مني
اثنوين اتلاثة وانه عبن شني العلوية من هي عمرها
١٢ سنة تحجت بيها وكالت بس يخلص علامة
حقي يتزوجها وانه اريدنها الي وجنتي
عادك انه. انطيتها الها
وكلت ما اكسر كلمتي اوعدي ليها بس
هنا اذا انتَ ما هاوي البت لا بالله محد يجبرنك
عليها والي تريدا يصير ونبقى اهل
.
.
.
.
حقي _ تبشرت عيونة بفرح لان. اجه من هواء
هل الكلام
كال بفرح خلاص عمي الي صار ونكال قبل
......
شذرَة عبر ايام السنين
هل تعرف رئيتُ فيك الجنة وحلم السنين
وقلت لهم هذا حصاد العمر من العشق
والحنين
فما رائيتُ منك غير الصد الحقير
تجسيدا انتَ عن خلاصة
من حقارة جميع البشر
فلا نزلت من جماَل التكبر
ولا رئيت فيك حنين
البشر
بقلمي
<~~~~~~>
يتبع ............
السلام عليكم اشونكم. عائلتي الثانية مشتاقون
اريد رئيكم بالقصة وطريقة السرد اذا اشوفونه
محلو ارجع للبغدادي مع العلم القصة من الجنوب
انطوني رئيكم هذا البارت نزلته تصبيرة منا لبعد العيد هاي اذا عودنك مانزلت اليكم.
لان من اشوف التفاعل مراح اصبر هههه لبعد العيد
القصة. راح اتكون محورها ثلاث فصول
وللحكاية بقية ....
لاتنسون النجمة او تعليقاتكم الجميلة
...