قلت لي أمل أنا ح اقوم امشي البيت عشان ساجد منتظرني هناك ، قالت لي مرت ابوك كويسه! قلت ليها والله الايام دي مقطعه قلبي جنها داك كلو راح منها تحسي بيها زبلانه زبلانه كده ، كل همها بس بقى ساجد حتى سامي ده ما مدياهو حقو بس بمشي المدرسه و برجع يلقى امو مرات بتبكي براها في الغرفه قالت لي والله الجنا حااار يا سندس ، قلت ليها الله في بس خلاص اقوم امشي قالت لي دقايق ما تلبسي عبايتك مستعجله على شنو انتي ! قلتا ليها ساجد يابت قالت لي ياخ بكورك ليهو بالحيطه يجي يقعد معانا يعني تفوتي و تخليني برااي! قلت ليها طيب يا امل ناديهو ، قامت تكورك ليهو بالحيطه سااجد ساااجد تعال اقعد معانا قال ليها مافي زول في البيت انا بحضر في التلفزيون قلتا ليها شفتي كلمتك اني مافي مع مرادي و ملاك في المدرسه قالت لي انا بجيبو يازوله خليك قاعده ، لبست توبها و مشت دقت ليهو الباب جابتو في يدها وقفلت باب شارعنا ، انا بالجد كنت مرهقه و تعبانه ملصتا عبايتي لابسه بنطلون اسود و بلوزه كوبيه💜 ماتامه كم بس شفونه طويله من ورا و قصيرونه من قدام ، فكيت شعري بس ورقدتا بقيت بخلخل فيهو لحدي ماجات هي و ساجد داخلين الغرفه ، قعد جنبي بقى بعمل في شعري زي ما انا بعمل ، ما كنتا عامله ولا نقطة ميكب غير فازلين في شفايفي بس قلت ليهو ساجد كنت بتحضر في شنو قال لي بن تن 😍 قلت ليهو خلاص امشي خلي امل تفتح ليك التلفزيون ، مشى ليها فتحت ليهو التلفزيون و جات قعدت معاي في الغرفه بعد دقايق تلفوني اتصل لقيتو رياض! قلتا ليها اوووف ياخ الولد ده ما ح يهدا! مش طردني و قال لي في الاحسن منك ! هسي مالو معاي ! عاينتا لي امل سااكته قلتت ليها انا مش بتكلم معاك! مابتردي مالك ؟ قالت لي سندس ممكن اقول حاجه بس ما تزعلي قلتا ليها قولي ! قالت لي انا اتكلمت مع رياض , قمتا من سرير مخلوعه قلت ليها شنووو!!😳😳 قالت لي و وصفتا ليهو بيتكم و هسي بكون وصل قلتا ليها انتي جنيتي😳 قالت لي عليك الله ما تفضحينا و امشي شوفيهو وصل ولا لا ، قلت ليها حسابك معاي بعدين هسي ح البس عبايتي و ح امشي لي اختي و كدي توصفي ليهو بيتها تمام! قامت وقفت و قالت لي سندس كدي اهدي و ماتفوري و صلي على النبي قلتا ليها عليه الصلاة والسلام زحي من طريقي بس ، قالت لي عشان ساجد ارجعي الشغل بعدين الولد ده ظلمتيهو كدي بس حاولي اسمعيهو و لو مره بقول شنو ! تعالي اتفصمي فيني انا ما مشكله لكن ما تخسري شغلك ساي عشان عناد بس, كلام امل اقنعني شويه قلت ليها كدي طيب اشوف ده هو ، طلعت بي لبسي وشعري زاتو 😂😂💔 ونسيت اني ما عامله ميك اب فتحتا باب الشارع لقيتو واقف فعلا بي عربيتو بداية الشارع بقيت واقفه بعاين ليهو بس هو جوه العربيه و بتصل علي و ما نزل ، و اولاد الحله مخلوعين من العربيه و بنات الجيران الجنبنا بقطعوا و شغاله تحلف لي اختها وحاات الله ده وزير😂😂 ماعرفتا اضحك ولا اعمل شنو شمارات تقيله شديييد بس الحمد لله لحدي ما هو رفع راسو شافني من بعيد واقفه في باب الشارع دور عربيتو و جا لحدي الباب ، نزل قال لي السلام عليكم قلتا ليهو وعليكم السلام فضل يعاين لي كده وبتبسم و انا ما مدياهو اي تعبير في وشي بس بعاين ليهو بجديه قال لي عايز اتكلم معاك و بما انك ما رديتي اتضطريت اعمل كده قلت ليهو ما مشكله سامعاك قول ! عاين لي باستغراب يعني ما ح ادخل ولا اتفضل ! قلتا ليهو معليش قاعدين بنتين برانا و زي ما شايف الحله كلها هسي بتتفرج فيك فما ح اقدر اقول ليك اتفضل ، قام اتلفت يمين شمال لقى ما شاء الله اي باب في الكلاكله مفتوح عشان يتشمشر ! حسيت بيهو اتضايق مني و من ردودي ، جات امل قالت ليهو السلام عليكم و سلمت عليهو و قالت ليهو اتفضل ياكابتن طوالي اتلفتا حمرتا ليها قال ليها لالا انا هنا مرتاح ، هي عاينت لي برضو بتحمر يعني عيب عليك البتسوي فيهو ده ، تاني كررت ليهو اتفضل يا كابتن معقول انت ضيفنا ، قال ليها لالا شكرا ليك انتو براكم و ما صاح ادخل البيت و مافيهو راجل قالت ليهو قلت ليك انت جيت بيتنا و ماصاح ما ندخلك و بعدين معانا راجل ياخ 😂 كوركت لي ساجد يا ساجد تعال ، قام جاها جاري عاين لي رياض ، و رياض نزل شالوا فوق اهلا اهلا بالولد الجميل راجل البيت ، انا بس كنت بحمر لي امل و شاماها و هي شاماني ، ساجد قال ليهو اتفضل يا عمو قام ضحك 😂😂 قال ليها ده اخوكم ! قالت ليهو ده اخو سندس الصغير , انا بنت جيرانهم امل نحنا جيران من كنا صغار بيت سندس اللصق لينا بالحيطه ده ، قال ليهو اتشرفنا يا باشمهندس و ساجد حباهو طوالي عاين لي بره لقى العربيه السمحه واقفه قال ليهو انت عريس سندس ! طبعا امل اتفقعت من الضحك و رياض زاتو ضحك ، انا لو ماعامله فيها زعلانه كان ضحكتا ساعتها😂😂 لانو ساجد متعود يشوف بنات الجيران لمن يجوهم ناس بي عربيات معناها ده عريس جايي يتقدم ف طوالي ختا في بالو ده عريسي ، قالت ليهو امل لالا يا ساجد و انزل من الضيف و قول ليهو اتفضل ، رياض قال ليها لا ياخ خليهو انا ما متضايق منو قالت ليهو اتفضل ياكابتن عليك الله ، هو كان مستنيني انا اقولها ليهو عشان كده قلتها ليهو اتفضل يا كابتن ، حتى بعد كده قام دخل بي رجلو اليمين وقفلنا الباب و نزل ساجد امل دخلتو صالونهم و دخلنا كلنا الصالون جابت ليهو عصير ليمون و مويه و ختتو قدامهم قالت لي ساجد ارح نواصل مسلسلنا طبعا عشان تخلينا برانا زي تعارف العرسان لمن يجي يتقدم ليك عريس واهلك يخلوك براك معاهو في الصالون ، هو مواجهني بكرسيهو و و مشبك يدينو في بعض لابس ساعه خطييره💜 و جزمه بنيه قميص ابيض و بنطلون بيجي ، امل لمن جات طالعه بالباب بقت بتأشر لي بيدها احساس عسل عسل😂😂 قربتا اضحك فيها ، هو بالجد كان بفتن بلحيتو 😭 قلت ليهو اتفضل اشرب العصير شرب جغمه واحده و رفع راسو عاين لي ، شكلو كان مستغرب لأني قابلتو من غير ميكب! انا الموضوع ما كان فارق معاي لأني اللحظه ديك كنت شايفاهو حاجه كعبه بس ما اكتر ، قال لي كيفك! قلت ليهو الحمد لله كويسه و سكتا بقيت بهبش في اسورتي و بعاين في الارض ، قال لي ما كنتي عايزة تقابليني ! قلتا ليهو بصراحه ايوه ما كنت عايزه ارد على مكالماتك قال لي من حقك طبعا ، قلت ليهو عايز تقول لي شنو ؟ قال لي ما ح اعتذر لأنو اي اعتذار ما ح يرجع زعلتك الحصلت قدام الناس ، قلت ليهو طيل جيت لي شنو ! قال لي جيت عشان ما عايز اضيع موظفه زيك , قلت ليهو في الاحسن مني و انت عارف ب كده ؛ قال لي اسف قلت ليهو انا ما منتظره منك اعتذار لكن انا ما ح اقدر ارجع الشغل تاني قدام البنات قال لي البنات عارفين الحصل كلو , قلت ليهو برضو انا ما ح ارجع قام سكت و ضحك و شتل كبايه الليمون و شرب منها قال لي بت جيرانكم بتعمل ليمون ظابط قلت ليهو شكرا عاين لي في عيوني نظراتو كانت حنينه المره دي😭💜 عيونو براها بتسحر الزول و عندو نظرات ريده كده بتحسس الزول بالحب طوالي ، قلتا ليهو مالك ! قال لي مالي! قلتا ليهو بتعاين لي كده ليه! قال لي لو قلت ليك حاجه ما ح تصدقيها ! قلت ليهو قول ح اصدق ، قال لي انا غير اختي لينا ما حصل شفت بنت من غير ميك اب نهائيا ، قلت ليهو طبعا لأنو المشغلهم كلهم باربي خصوصا الساحره ميعاد قام ضحك تاني قال لي طيب لو رجعتي الشغل و كنتي المشرفه مكان ميعاد ح توافقي ! قلتا ليهو المشرفه😍 طبعا عرض ما بتفوت و مستحيل كنت اتعاور و ارفضو ، قلتا ليهو ح اوافق بس عندي سؤال قال لي أسألي، قلت ليهو انت بتحنس اي وحده بتطلع من الشغل لو افترضنا انك غلطتا في حقهم مثلا يعني بصراحه ح تمشي لي اي وحده و ح تراضيها ! قال لي و هو بتبسم انتي في رايك شنو ! قلت ليهو ده سؤال ليك و قلت لي أساالي معناها ح ترد علي ! قال لي طبعا و اكيد لا ، قلت ليهو طيب لي جيت لي هنا! قال لي لأنك مميزه قلت ليهو في شنو ! قال لي سؤال واحد و رديت عليهو ما تسأليني كتير ، و قف على حيلو شايل مفتاح عربيتو و قال لي بكره الساعه تسعه صبتحاً تكوني جوه الوكاله و لو إتأخرتي دقايق ح اخليك تعملي لي القهوه بنفسك جوه مكتبي ، قمتا وقفتا على حيلي و قلت ليهو تمام😂 قال لي اتصافينا ! قلت ليهو تمام متصافيين بعد ماكان طالع من باب الصالون جا راجع لمن كان عايز يطقشني قال لي سندس عايز أسألك صحي ، اخوك ساجد ليه اطرافو بنفسجيه ! قمتا سكتا قال لي سندس ! ما تقولي لي انو عندو ثقب! قلت ليهو ااي للأسف عندو و الحمد لله ، بعدها ما قال كلمه بس كان ظاهر في وشو انو زعل و لمن شافني اتضايقتا مجرد ماقلتا عندو و دموعي عايزة تنزل طوالي سكت قال لي ربنا يشفيهو و طلع للحوش كورك ليهو يا راجل البيت ! ساجد جاهو جاري ، نزل ليهو في الارض عاين ليهو في عيونو و قال ليهو لو ما كنت جوه البيت يا راجل ما كان دخلتا ، قال ليهو ساجد و هو بتبسم تعال لينا تاني قال ليهو لكن اختك بتطردني قام ستجد عاين لي سندس ما تطردي عريسك 😂😂 انا وامل بس كنا بنعاين ليهم بتكلموا ، قال ليهو رياض يا بطل انت كنت بتحضر في شنو ! قال ليهو بن تن قال ليهو وعندك ساعه زيو ! ساجد قال ليهو لالا سندس قالت بتشتري لي وحده لمن تجيب قروش تاني ، قام رياض ابتسم و طلع ليهو مية جنيه من جيبو قال ليهو دي عشان الساعه بتاعت بن تن تجيبها من السوق و تنتظرني لمن اجيكم تاني ح العب معاك ظابط ! قال ليهو ظابط قال ليهو كفك طيب😊 ، بعدها رياض قام على حيلو كنت مبسوطه من تواضعو قدمتو لباب الشارع عاين لي بيتنا وعاين لي و ابتسم قال لي متتأخري بكره ! قلت ليهو حاضر كابتن 😂😂 قال لي مستعدون يا اصحاب😂😂 قلت ليهو شايفاك يا كابتن متاابع قال لي عندي زي ساجد ده تلاته واربعه بنات ، عندي اختين كبار متزوجات و عندهم اطفال لا حول الله ازعاج زي الازعاج ، قمت ضحكتا قلت ليهو طيب يا كابتن قال لي سندس قولي لي رياض بس و بكرن متتأخري قلت ليهو طيب ،، و بعد الوصايا دي جا الصباح و الساعه تمنيه يادوب صحيت من نومي .. مسافة اقوم واجهز وصلتا الوكاله الساعهه تسعه و نص 😂😂 عامله شعري كيرلي مغير شكلي توتلي و كحل خفيف و قلوس شفاف ، البسطه ظاااهره في وشي كانت سلمتا على نيرمين الكانت مبسوطه بجيتي شدييييد 😍 و البنات كلهم ردوا لي السلام باحترام شديد استغربتا منهم! كانوا بباركوا لي المنصب الجديد و انتي بقيت مشرفتهم و من مباركاتهم عرفت انو رياض وصل قبليني و كلمهم اني ح اكون المشرفه بعد ده ، و انا وصلتا بعديهو😭 ختيت شنطتي و بي ادب مشيت دقيت ليهو باب المكتب 💜💋
يتبع