عندنا عرس أختي في البيت و نحنا وضعنا ماقدر كده ، ناس بسيطين شدييد أبوي شغال عامل في مصنع بلم الطوب للبنيان و بوديهو جوه موقع البنيان ده شغلوا الخطيير يعني الدايما أمي مسمعانا جملة أبوكم شقيان عشانكم و إحنا اساسا قاعدين في بيت مالك المصنع زاتو أدانا ليهو بدون أيجار صدقه ولا كرم منو ما بعرف المهم قاعدين فيهو ،، أنا ما معترضه على قسمتنا دي ولا إرادة ربنا بس حالنا ماعاجبني نهائيا الحاجه المزعلاني كمان إنو أمي برغم أبوي العرس فيها و جاب ولدين من مرتو الجديده لسه بتحترموا و شايفاهو خلاص أعظم راجل في الدنيا! .. غايتو بس الله مصبرني على أجواء بيتنا ده أنا ما برضى الحقاره وأمي مسكينه ياخ شديد لا بتهش ولا بتنش 😿💔 وطبعا عشان هو ابوي محترماهو لكن ما قريبه منو زي ماقريبه من امي يمكن لانو هو زاتو ما النوع البصاحب و كده هو صعب و متحكم في البيت و ده اذا جانا اساسا اغلب وقتو مع مرتو الجديده و اولادو اما امي وانا و اخواتي الاتنين مرادي و ملاك ما بجينا كتير ،، الليله عرس مرادي و البيت جايط من الصباح الجيران بنضفوا في الخضارات و الاهل بنضفوا في البيت و الفطور في النيران خلاص قرب ينتهي .. ملاك دايما في حالة نقاش مع امي بتقول ليها اقري انتي ممتحنه للثانوي و هي مابتحب القرايه جنها تحشر نفسها في امور الكبار و قعدات النساوين و شمارات الحله .. مرادي في الكوفير الجنبنا بشارعين بس كوفير بسيط شديد و ست الكوفير مكياجها زي وشها .. عريس مرادي من اهلنا ولد خالة أمي إسمو عمار عندو دكان في الحله الجنبنا ببيع فيهو باسطه بي لبن للعشاء بالمساء و بالصباح بسوق ركشة راجل جيرانا وبتقاسم معاهو القروش ..
غايتو على حظها الضارب جابت عريس ضاارب زيها 😂😂💔 و في البيت في أنا سندس الوسطانيه سمراء سمار فاتح كده عيوني كبار و شعري طويل ناعم غايتو خالتي بتقول لي إنو الوساخه بتطول الشعر و انتي مع جامعتك دي ما بتمشي فيهو مشط عشان كده طال .. اخر سنه لي في الجامعه طبعا عشان عارف ظروف ناس البيت و هم ماخلو مرادي تتم قرايتها فأنا اصريت ادخل الجامعه بنسبتي 💜 شاااطره شديييد و ذكيه و جميله جدا .. اولاد الحله كلهم معجبين بي بس لأنو امي عارفاني شايله فكرة العرس بتقول ليهم سندس دايره تتم جامعتها .. في الجامعه برضو أولاد الدفعه على غير ناس الدفعه دايرين طريقه يصلوا لي بيها .. أنا ما عايزة زول منهم يعرف وضعنا كيف في البيت عشان كده مفتريه ورافعه قزازي عليهم لأنو لو هم دخلوا بيتنا وشافوني عايشه كيف في الخرابه ديك خلاص منظري حيتخرب قدام الناس .. ماعزمتهم لي عرس اختي أساسا قلت ما اوريهم الا بعد العرس يخلص انو اختي عرست حتى لي البنات في القروب بتاعنا .. ملاك جاتني جاريه قالت لي سندس امي قالت ليك ركبتي الانوار في الشارع قلت ليها اي ركبتها تاني في شنو ! قالت لي شنينه أم قرينات قلت ليها أمشي غوري من وشي قبل ما الطشك كف بي لئامتك دي .. ختت يدها في نصها ووقفت لي وقفة الإبريق وقالت لي كان مره أهبشيني قلت ليها والله ياملاك ما تغوري من وشي قدام الناس أوريك ليهو .. قامت جاريه بعد حمرتا ليها اتلفتا لقيت عمتي بتعاين لي من فوق لي تحت قالت لي إنتي ناويه بتين تلحقي أختك ! قلت ليها ما ناويه والله لسه قالت لي أحمد ولدي قال خلاص العرس بعد ده والكلمه كلمة ابوك .. قلت ليها والله داك ابوي يلقى ليههو بت يعرسها لي ولدك .. وقفت على حيلها قالت لي صحي والله نادر ما عرف يربكن كلكن من اختك الللئيمه ليك انتي يا الشايفه روحك على شنو مابعرف .. شايفه روحك على ولدي من جمالك الفايت حدو ؟ ولا من العز العايشه فيهو ! ولا تكوني عشان ح تتخرجي خلاص قايله نفسك بقيتي شي ! .. ما بتسوي حاجه لا انتي ولا اخواتك ولا امك محاسن زاتها اصلو كان منها نفعه ما كان جاب ليها ضره اخوي ، اخرك سواق ركشه يا سندس زيك زي اختك .. كتمت كلامها و دخلتا جوه طوالي شلتا المكنسه بكنس في الغرفه و ببكي وبقش في دموعي لو ما مره كبيره كان سمعتهاا لكن عشان قدر امي وعرس اختي كتمتها جواي و سكتا بعد فرشتا الغرفه طلعت شلتا هدومي ومشيت للجيران .. ابوي جا داخل بعد العقد قعد جنب عمتي طوالي فتحت معاهو سيرة العرس انا و احمد قال ليها بس خليها تخلص الجامعه وانا بديكم ليها ..و انا مع جيرانا ناس امل ضرب لي في التلفون ولد دفعتنا سامر طبعا لأنو هو زاتو دايرني ما مدياهو فرصه للكلام الكتير و مافاضيه ليهو عشان ما أديهو أمل ساي و يعشم فيني أنا لابتاعت حب لا كلام فارغ دخلت الجامعه دي عندي هدف معين وخلاص سلم علي و كان عايز يعرف غبتا ليه من الجامعه قلت ليهو عندي عرس و إتخلصتا منو سريع و قفلتا منو التلفون .. لبستا فستان شايلاهو من صحبتي شده لونو اسود و كبيت لي قزازه بيبسي فلفلت بيها شعري و عملت مكيتج بسييط و طلعنا للخيمه في الشارع .. كنا شايلين جلوس من الجيران خاتينو ومزيننو بي انوار .. بدينا نوزع العشا في صحانا الورق و البارد القزاز .. الفنان كان من اولاد الحله سكران يقول كلمه و ينسى باقي المقطع💔🐸 غايتو لمن جات مرادي نازله من عربية ولد عمتي زااتو احمد الامو عقربه ديك زفوهم ودخلوا قعدوا .. غايتو كان يوم متعب اهلنا قعدوا معانا بعد العرس اربعه ايام كده لازم يكملوا اكل العرس الفضل و يمشوا .. بعد نسفوهو كلو حتى اي زول لملم حاجاتو ومشى طبعا الا عمتي الفقر قاعده هي و بتها داخله و طالعه بتها تعاين لي السمينه ام كرش الحاسده ام شعر مقطع .. تعاين لي بحقاره كده يعني إنتي لاقيه أحمد وييين عشان تفتري علينا كمان وانا عشان فلهمتهم دي مابياااهم .. طبعا هي نديدة مرادي و متزوجه ليها سنتين و نص أها ما بتقدر تمسك الكلام في خشمها لقتني ماسكه تلفوني قفلت الباب و جات قعدت مقابله لي في السرير قالت لي انتي كيف تقلي ادبك على امي! قلت ليها بتين ؟ قالت لي تقولي ليها ما بعرس احمد .. ضحكتا وقلت ليها وكده يعني قليت ادبي عليها؟ قالت لي امي دي كلمتها مسموعه هنا على كل الناس ساامعه ماعشان وحده لسه ماقامت من ارضها تتلائم معاها قدام الناس .. قلتا ليها سبحان الله الأم ما عندها احترام و البت تتبلى على خلق الله قالت لي احترمي نفسك أحسن ليك .. عاينتا ليها وضحكتا قلت ليها الاحترم نفسو منو ! ما تخليني عليك الله انكت ليك الجواي .. وقفت وكتفت يدينها وقالت لي بالله انكتي عليك الله .. وقفت على حيلي مبتسمه لي اخر ضرس رجعتا شعري بي يدي و يدي التانيه ختيتها في كتفها و قلت ليها المفروض يتعلم الإحترام الزيك يا فالحه ، الزوله البتعمل علاقه مع راجل تاني و هي متزوجه ! و تستغل سفر راجلها للولايات و تمشي لي حبيب القلب .. سبحان الله عايزة تعلمني انا الاحترام زوله زيك ! خليت وشها أحمر و منفوخ زي الطمام ..
يتبع
