انا نفسي يكون عندي بيت بي إسمي ، بس ما اقعد فيهو انا و نفسي تكون عندي عربيه بس ما أسوقها انا و نفسي أكون متحرره من اي مسؤوليات ، عاين لي باستغراب قال لي امانيك كلها قروش ! و الحاجات المتمنياها عايزة تديها لي منو!! اذا ما حتقعدي في البيت ولا حتسوقي العربيه ، قلت ليهو مش قلت ليك ما حتقدر تعملها لي ! قال لي انتي جاوبي على سؤالي اول ، عاينتا ليهو جوه عيونو و قلت ليهو لأنو الدنيا ما بتسوا شي من غير القروش اي انا متمنيه حاجات ماديه بس ما لي لأهلي ، قال لي طيب عرفنا انك عايزة اهلك يترفعوا فوق و بالمناسبه دي حاجه جميله منك شديد ، طيب المسؤوليات الإنتي بتقصديها شنو اذا اعتبرنا انك لقيتي البيت و العربيه و امنتي لي اهلك اي شي عايزنوا ، قلت ليهو لمن اتزوج ما عايزه راجلي يحس بي انو اتزوج وحده ح تشتغل و تنضف و تطبخ ليهو و تخدمو لأني مستحييل اكون زوجه مثاليه ، قال لي يعني عايزة تتزوجي لكن راجلك ما يسألك من حقوقو صح ! قلت ليهو بالضبط كده .. قال لي و حتعيشي مرتاحه كده! قلت ليهو مافي زول بحب القيود , متخيل لمن الوحده تطلع و ترجع بمزاجها و مافي زول يتحكم فيها ماشه وين ولا جيتي من وين ! متخيل لمن اقوم ممن الصباح و احقق احلامي و شريكي يكون متفهم الحاجه دي ، ضحك و قال لي والله انتي عجيبه شديد و صريحه كمان ! البشوف وشك البريء ما بقول تفكيرك بعيد كده ، قلت ليهو انا بشبه سيدات الاعمال و متأكده اني ح اكون في يوم واحده منهم ، قال لي والله ان شاء الله زوله طموحها عالي كده ح تصل للدايراهو ، بالإضافه لي كده انتي جميلهه💜 و الجمال بخدم حاجات و رغبات كتييره ، قمتا ضحكتا و قلت ليهو انت فهمتا غلط انا ما النوع ال كده ، انا نفسي اصل للدايراهو بس ما بالجمال بالعقل و بس ، قال لي طيب و الحريه الكنتي بتقولي دايراها ! قلت ليهو ده ما بعني اني اكون متاحهه للجميع ! انا ح اكون لزول واحد و الزول ده ح يكون راجلي ، ما عشلن قلت نفسي اكون متحررة معناها ح اتنازل عن احترامي لنفسي ، قال لي العفو انا ماقصدتا شيء كعب بس ما فاهم متحرره دي بالضبط ! قلت ليهو ياخ ما ح تفهمني ما علينا ، انت ما حققت لي طلباتي و انا ما ح اعمل ليك الطلبات الأنا ما بعرفها ، ف عشان كده ح اقوم امشي ، لميت تلفوني و بقفل في الشنطه هو و كان بعاين لي ، قال لي اول مره شفتك فيها جاني احساس قوي انك متميزة ما بتشبهي بنات الزمن ده ، جاني احساس انك عفويه و بسيطه و بريئه ملامحك ما كانت جميله بس ! ملامحك كانت نقيييه شديييد ، اعجابي بيك الأول اتغير هسي بعد سمعتك بتتكلمي عن امنياتك ما ح اقول ليك امنيات سخيفه ، لكن شغفك البتتكلمي بيهو عنها ده غلط ! مافي زول بصل لمبتغاهو بالطريقه الأنا شايفها في عيونك دي ، كأنوا البتتكلم بت تانيه ما سندس ، ملامحك ما متقبله الكلام البتقوليهو ده خليني انا ، مالك ! انتي زعلانه من شنو ؟ ، كنت مقبله يساري و انا بقفل في الشنطه وبسمع فيهو و هو يميني مدياهو ضهري ، ما عارفه ليه بعد كنت قويه استسلمتا لي سؤالوا ده ، كان نفسي اقول ليهو صحبك السبب ، الكلام كان كتيييير جواي بس ما داير يطلع ، بكيت ، بكيت تاني لأول مره بعد وفاة ساجد ابكي عشان سبب تاني ، بكيت زعله على العملوا معاي رياض و لا زعله على الدبله الشفتها ! و لا اني بحبو و ماقادره اغش نفسي اكتر و اوهمها اني نسيتو , زين ما سألني نهائيا خلاني بكيييت و قام من جنبي دخل المكتب ، بعدها انا انشرحتا في البكا براي في مكاني ، كان بعاين لي من جوه المكتب ببكي ، خلاني بعد اتفشيت قدرتي و جا ما سألني عن السبب نهائيا ، كان حاسي بي مجروحه من حاجه و بحاول اظهر اني قوية ، بعد بكيت جا قال لي قومي اوصلك قمتا معاهو لأنو مافي مواصلات و الوقت إتأخر ، ركبنا العربيه و هو كل ما نقيف في استوب يعاين لي سرحانه في الشوارع و الزحمه ، سألني سندس انتي حبيتي! ما عارفه ليه سألني السؤال ده بس ردي ليهو كان لا ، سكت مني شويه و تاني سألني مقتنعه بالحب المن بعيد ! ضحكتا و قلت ليهو هو اذا من قريب و الناس متأزمين من بعيد ح يكون منو نفعه! قال لي و هو مبتسم ، انتي عارفه في وحده كانت مكانك و الوكاله مكتملهه لمن رياض اتصل و قال لي انتي محتاجه شغل مشيت البنت الكانت قاعده لوكاله تانيه ، و خليت مكانها فاضي ليك ، اتخلعتا😳 قلت ليهو و عملت كده ليه !؟ قال لي ما لأنك محتاجه شغل بس لأني كنت محتاج اشوفك كل يوم و اتصبح بي وشك ، قلت ليهو زين! قال لي ما تستغربي الشعور ده بادي من زمممن من اول مره شفتك فيها ، و من ايام البكا الكنت بجي هناك عشان اشوفك بس من بعيد .. ماعارف ليه اتعلقتا بي شوفتك تقريبا بقيت شايفك في حالاتك كلها ، فرح حزن ضحك صره زعله ، كل تعابيرك بقيت حافظها ، سكتا ما عرفتا ارد ليهو بشنو ، وصلنا البيت و انا ماكان عندي رغبه انزل كان بعاين لي منتظرني انزل و انا كنت بفكر اكلموا ! و لا اسكت ؟ ، ماقدرتا احكي ليهو عن رياض، و ماكان عندي رغبه انزل من العربيه و هو كان لسه بعاين لي عيوني و حواجبي و وشي ، قال لي انا حاسي بنفس احساسك الهسي قلت ليهو شنو😳 قال لي ماعايزك تنزلي ، ابتسمتا و قلت لبهو معليش سرحتا قال لي برضو ماتنزلي قلت ليهو زين ! و بدون اي سابق انذار مسك يدي ختاها في خدو اليمين و قال لي انا دايرك ، اتخلعتا من الموقف شديد و اتوترتا فتح باب العربيه بس و نزلتا سريييع وصلت البيت و انا قلبي بضرب من الخوف .. ماعارفه لي خفتا ! ما تبسطتا لمن سمعتو قال لي دايرك ! ولا لأني حاسه بيهو استعجل ! طيب قال انو معجب بي و من زمان مركز معاي؟ و طيب رياض ! لو عرف بي رياض ! كنت متوتره و مشوشه ماقدرتا استقر في مكان ، اتحومتا و خيطتا البيت ماشه جايه باكل في ضفوري و لسه ما قادره استقر 😭😭💔 يمكن دي فرصه جاتني! كان بإمكاني ارفض زين طوالي و انا متأكده من شعوري و اني ما عندي ليهو حاجه ، بس ماعارفه ليه اترددتا كتير ، لبستا توبي و بي ليلي داك مشيت لي امل قعدنا في السرير في الحوش حكيت ليها كلامنا الحصل كلو ، قالت لي سندس ليه ما طوالي وريتيهو؟ قلتا ليها في حاجه منعتني ، قالت لي عاجبك ؟ قلت ليها لالا انتي بتقولي في شنو كمان 😒 قالت لي طيب انتي متأكده من مشاعرك اتجاه رياض ، امشي هسي شيلي تلفونك و احكي ليهو الحاصل و هو ح يتفهم ويشيلك من راسو طوالي قلتا ليها انا ماعايزاهو يشيلني من راسو قالت لي سندس😳 قلت ليها امل انا ما عايزاهو يشيلني من راسو اي ، قالت لي سندس اوووعك تعملي البفكر فيهو انا ، عاينتا ليها و سكتا قامت من السرير وقفت قدامي صاره لي والله والله تكوني ناويه تلعبي بود الناس ده ما ارحمك و ما ح اخليك ، برضو عاينتا ليها وسكتا قالت لي سندس😡😡 انا بتكلم معاك مشاعر الناس مالعبه ، قلت ليها و مشاعري لعبه صح ؟ قالت لي ما تخلطي الامور قلتا ليها ما تكوركي وتنفعلي راسي براهو واجعني قالت لي بكورك ابعدي من زين عشان انتي عارفاني كووويس بمسك التلفون و بحكي ليهو اي شي ، مديت ليها تلفوني وانا صاره ليها قلتا ليها اتفضلي ! ، قالت لي سندس 😡 قلتا ليها امل مش انتي الكنتي بتقولي لي فكري في اهلك ، اهلك و بس ؟؟ قالت لي اي قلتا كده لكن ما بالطريقه الإإنتي ناويه عليها دي ! قلتا ليها انا هسي ما عندي اي مشااعر اتجاه رياض البمنع شنو اني اوافق بعريس زي زين ؟ قالت لي و لو نفس القصه اتعادت مع زين قلتا ليها ما ح تتعاد قالت لي ليه؟ قلت ليها لأنو انا ما متمسكه بي زين و انا اي زول بتمسك بيهو بضيع مني ، قالت لي خلي كلامك الفارغ ده و انسي الفكره وقفتا على حيلي وقلت ليها ما حانساها و انا عرفتا هسي ردي حيكون شنو لزين ، تصبحي على خير و مشيت بيتنا ، لقيت زين متصل لي اربعه مرات و مرسل مسجات اعتذار عن العملو في العربيه و انا بقرا فيهم هو اتصل تاني ، رديت عليهو الووو ، اول حاجه قالها لي المسجات دي كانت عشان تردي بس لكن صدقيني انا ما ندمان على العملتو و لو الموقف اتعاد ح اعمل الحركه دي مره و مرتين و الف ، انا دايرك ياسندس دايرك شديييد ، قلت ليهو زين انت عايز تصل لشنو ؟ قال لي ليك ، قلت ليهو بي ياتو فهم ؟ قال لي قصدك شنو ؟؟؟ قلت ليهو انا بفهم حاجه واااحده بس للريده ، البيت و بابو دايرني بتعرف ابوي و بيتنا ، قال لي سندس يعني من كلامك افهم انك موافقه علي ! قلت ليهو بتعرف ردي بكره , قفلت الخط و هو قفل الخط مبسوووط شديييد ، اتلاقينا الصباح في المكتب ما مشيت بملابس الشغل لابسه فستان اناناسي و جكت الجينز النص ، شبط بني بي سيور و فاكه شعري ميك اب رهييب ، انتظرتو في المكتب لحدي ما جا لقاني بره مافي دخل جوه و عطرو سبقو بالدخول لقاني قاعده في مكانو وخالفه رجلي و بلف بالكرسي لمن شفتو في الباب ابتسمت ليهو صباح الخير ، اول حاجه قالها ياحفيظ💜 عايز يدخل وهو بعاين فيني اتعتر قمتا ضحكتا فيهو قال لي تضحكي ! قلت ليهو لكن انت ماتعاين قدامك 😂 قال لي ياخ انتي لخمتيني ، ختيت يدي متمحنه و قات ليهو لو انا عايزة اطلع مع مديري برانا ممكن اخد اذن منو ؟ ابتسم ياخ💜 قال لي و لو مديرك وافق لكن بشرط الطلعه تكون ليوم كامل ، خجلتا و قلت ليهو انت مابتشبع من شوفتي! قال لي لا ، قلت ليهو طيب قوم ارح مسكتو من يدو قومتو لمن وقف كان بعاين لي بنظرات حنيه انا ما حصل شفتها في زول ، قال لي ارح ، ركبنا العربيه و سألتوا اها حنمشي وين ! قال لي الخضره و الماء و الوجه الحسن قلت ليهو شنو ؟؟ قال لي انتي الوجه الحسن و الخضره و الماء في توتي , قلت ليهو ايوااا طلعت ما هين والله يامديري قال لي ما تعايني لي كده ياخ رغم مشاغلاتي دي انا زول مسكين والله قلتا ليهو اي اي ظاااهر😂😂 .. وصلنا توتي. قعدنا في المعديه الكانت لافه في البحر فطرنا سمك ، كان بحكي لي عن ايام الجامعه و بعدها لمن اشتغل و حكى لي عن امو و ابوهو و اختو الوحيده ، كنت بسمع فيهو و ما قاطعتو .. ماعارفه كيف الوقت مرا سريع و رجعنا البيت ، جنب باب الشارع سألني قبل ما انزل الخميس الجاي كيف؟ قلت ليهو مافهمتك ؟ قال لي اهلك كلميهم و انا الخميس الجاي
