قال لي ممكن اقول حاجه لكن ما تفهمي غلط ! قلت ليهو اتفضل ،قال لي انا شفتك في مكان ؟ شكلك ما غريب علي حاسي اني شفتك قبل كده .. قمتا ابتسمت وقلتا ليهو ايوه شفتني في جامعة السودان الغربي في البورد بتاع كلية لغات قام ضحك قال لي ذاكرتك قويه شديد ماشاء الله ، بقلبي عايزة اقول ليهو في وحده بتشوفك بتنساك ! بس ابتسمتا وسكتا ، قال لي بتقري هناك ؟ قلتا ليهو ايوه حاسوب .. قال لي ايواا انا عندي اختي الصغيره بتقرا هناك لغات فرنسي جيت مره واحده بس لما شفتيني هناك كان مفروض الاقيها هناك ، لكن ماعندي علاقه بالجامعه قلت ليهو قريت وين طيب! قال لي المستقبل قلت ليهو ماشاء الله ، قال لي شفتي يا .. قلت ليهو سندس😊 قال لي انا اسمي رياض ياسندس .. شكلك بت مسكينه كده وهااادئه ذكرتيني اختي لينا ، عايز اقول ليك لو احتجتي لي حاجه في المطار او عايزة تسافري عندنا وكالة برضو بتاعت سفر قام مدا لي الكرت بتاع وكالتهم اسمها البيسان قلت ليهو بابتسامه ان شاء الله قام ابتسم تاني ياخونا😍😍 قال لي وصلنا شارع المطار على فكره انا ماشي كافوري لو في سكتي بوصلك انتي ساكنه وين ! " بالله اقولها كيف دي ؟ اقول ليهو ساكنه الكلاكله كيف بس🐸 " قلتا ليهو لالا مافي نفسي سكتك انا ساكنه كيكي سيتي، عاين لي مستغرب 😳 قلتا ليهو الكلاكله ، الولد بقى بضحك ضحك لمن رجع للكرسي ورا فكا يدو من الديركسون و قال لي كيكي سيتي لكن ، مديت ليهو يدي قلت ليهو شكرا ليك .. قال لي عفواً و اهو بعاين جوا عيووني ، استغربتا انو هو بالجرأة دي! بعاين لي جوا عيوني كده ، عرفتا انو ماااهين من الوقت داك بس لكن عجبني شدييد 💜 سلمتا عليهو ومشيت في شنطتي الكرت بتاع الوكاله و هو مشى في طريقو .. الشارع كلو ماشه وبفكر في نظرتو يمكن لانو يادوب عاين لي ملامحي كويس ، ركبتا المواصلات و نزلتا في شارع البيت اتذكرتا العبايه بس جريت للزقاق البلبس فيهو و طلعتها دايره البسها كده حسيت بي يد مسكتني من رقبتي ، قلبي وققع قبل ما اشوف ده منو 😭 سمعتا صوت ابوي بقول لي الليله بربيك البسي وارح قدامي سريييع ، لبستا العبايه وانا برجف من فوق لي اخر ضفر و مشيت قدامو وانا بفكر ح يعمل فيني شنو 😭 لفى بي شارع بيت رشيده ما بيتنا ، فتح لينا الباب ساجد اخوي لمن شافني فرررح بطريقه ياخ😍 قال لي سندس جايه تبيتي معانا ! طبعا ابوي الوقت ده بس عيوني شرااار احمر قال بي ساجد نادي اخوك من الاوضه لمن نادى سامي وطلع بره دخلني الاوضه وقفل الباب علينا قال لي كنتي وين! قلتا ليهو كنتا في الجامعه والله يا ابوي قال لي كنتي وييين بصوت عااالي قلتا ليهو والله كنتا في الجامعه بس ضربني كف حاار وياريتو لو كف واحد بقى بكفت فيني يمين وشمال وبسأل فيني بغضب كنتي وين قلتا ليك كنتي وين ! و انا ردي واحد كنتا في الجامعه .. قال لي بتكذبي كمان وبتطلعي هدومك في الشارع قدام الناس ، تاني مافي جامعه سامعه ماافي جامعه تاني .. و هو لسا بضرب فييني وانا ببكي و بكورك رشيده جات جاريه بتدق في الباب بره افتح يا عباس عليك الله افتح الباب " لدرجة مرت ابوي تحن وترأف علي من الدق ! " لمن فتح الباب وطلع هاايج بره .. جا ساجد بعاين لي من ورا الباب ، مرميه في الارض و دموعي نازله مطر و الكحل سااايل من عيوني و مالي وشي وشعري منكوووش شديد 💔😭 وبتخنق و جسمي كلو مضرب و فيهو علامات دموم ، رشيده جات مدت لي يدها قومي قلتا ليها زحي مني بكواريك قامت طوالي طلعت تشوف ابوي مشى وين .. ساجد جا داخل حته حته يمكن لانو كان خايف اني انهرو زي امو وقف قدامي وبقى بعاين لي في سكات وانا بعاين ليهو وببكي ماقادره اتكلم .. لمن مدا لي يدو ختيت يدي فيها وقمتا شويه شويه نفضتا التراب براحه لانو جسمي كان مورم من الضرب و لفيت الطرحه و طلعت ساجد وسامي كانوا بعاينوا لي بس .. مشيت بيتنا الطريق كلو ببكي دقيت الباب فتحت لي ملاك لمن شافت منظري خافت ، قايله في زول اعتدى علي ولا عمل فيني حاجه بقت بتكورك لي امي ، امي امي الحققي بتك .. ما قدرتا اقيف لمن امي تجي ، راسي بقى ماشايلني وجسمي حسيت بيهو تقل شديد وملاك شايفاها طشاش طشاش بس ، جيت واقعه في الارض على جبهتي امي لمن وصلت بقت بتصرخ هي و ملاك ، و بصحوا فيني ما صحيت حتى بالمويه البارده ، ناس امل سمعوهم بالحيطه بكوركو جو جاريين بالباب امل وامها و اختها اماسي كلهم ماقدرو يشيلوني جابوا كرسي وختوني وبقوا بشيلوا حبه حبه لمن دخلوني جوا و رفعوني للسرير ، امل قالت لي لي ملاك اجري جيبي لي جهاز الضغط من بيتنا واماسي جيبي تلج سريع .. وبدت تفك العبايه لمن بتفتح فيها لقت هدومي مليانه ترااب و يديني مورمه و شي اخضر و شي احمر و وشي ورماان و كلو علامات طبعا انصدموا كلهم لما شافوا جسمي كلهم خلاص ختوا في بالهم حاجه وحده بس .. امي دي طوالي قعدت في السرير الجنبي وبقت بتكورك و تعزي لمن خالتو بهجه ام امل بقت بتسكت فيها و هي زاتها بتكورك معاها وتبكي ، امل كانت مصدومه بس وبتعاين لي ماقادره تستوعب انو انا معقول ! .. لمن جو ملاك و اماسي لقوهم بسكلبوا كده هم زاتهم فهموا نفس الفهم وبقوا ببكوا مع ناس امي .. لحدي ما انا صحيت براي😂😂 لقيت الناس جنبي و ببكوا ! طبعا زي الزول المخدر لمن يفوق بين صاحي و نايم بس انا كنت كده ، قلتا لي امل اديني مويه قامت جابتها لي وجات شربتها و بعدها اتقلبتا في السرير وانا بعاين لي امي بتبكي . قلتا ليها انا كويسه ما تبكي ، لمن لقيت ملاك واماسي وخالتو بهجه كلللهم ببكوا 😳 قمتا على حيلي من السرير اتكيت في راس السرير قلت ليهم مالكم ! امي قالت لي العمل فيك كده منو ؟ ماختيت في راسي الموضوع داك كلو كلو .. و خجلانهه اقول ابوي قدام الناس قلتا ليها ده حادث بس ضربتني ركشه .. الحاجه الخلتهم يظنوا كده انو انا كنت ببكي و بحكي و انهرتا بالبكا فجأه كده امي جات قعدت مكان امل و عاينت لي قلتا ليها ابوي ضربني😭 طبعاً احساس الناس الكانوا ببكوا كلهم سكتوا وقشوا دموعهم و خالتوا بهجه قالت لي بفرحه كمان الحمد لله و امي برضو الحمد لله 😳 بقيت مستغربه الناس ديل جنوا 😳 طبعا بعد الحمد لله دي فهمتا انهم كانوا خاتين انا مالي😒.. طوالي امل وامها واختها رجعوا البيت بعد امل قاست ضغطي ورسلت لي مع ملاك عصير و سندوتش جبنه حاامضه .. امي قالت لي طيب قومي استحمي والبسي قميص وتعالي ، مشيت و سرحتا شعري لفيتو كعكتين وانا لسه ببكي وبعاين لي نفسي في المرايه الكدمات والاثار! حتى وشي ياخ 😭 .. جيت قعدت مع امي بعد اكلتني وشربتني العصير حكيت ليها ابوي عمل فيني شنو و وريتها انا كنت وين و سجى قالت لي شنو بس مافي زول غير عارف بعمايل سجى ..
مروا اسبوعين مامشيت الجامعه ماعشان ابوي بس عشان الجروح وكنت نازله اخر امتحانات لي في الجامعه .. ايمان كانت عارفه الحاصل لي شنو يوم السبت ضربت لي قالت لي ح اجيك يوم الاحد الصباح اجيب ليك الشيتات عشان التلات نازلين كنا اول جلسه قلتا ليها طيب ، جا الاحد وايمان جاتني بكتلة شيتات كويس انو اثاري كانت شويه خفت وبقت ما باينه شديد زي اول .. دخلت وقعدت معاي ما جابت لي سيرة الضرب او كده بس ختت لي الشيتات و قالت لي في موضوع عايزة اقولوا ليك قلتا ليها قولي ، قالت لي سامر امبارح ضرب لي تلفون ياسندس الزول ده بحبك عديييل وبمووت فيك 😍 ياخي يموت ويتقدم لي اهلك انتي فقر كده مالك ! الولد وضعهم فوق و كويس وفي وحده لاقيه الزمن ده ولد صغير شاب يكون دايرها بالباب عديل ! .. قلتا ليها عليك الله اقفلي سيرة الموضوع ده انا لابهمني سامر ولا حب سامر اساسا شايلاهو من راسي من زمان قالت لي حرام عليك انتي بتكسري خاطروا كده قلتا ليها ياخي عليك الله الفيني مكفيني ان شاء الله هو زاتو يتكسر ماهاميني في شي 😒 قالت لي والله ياسندس بقيتي صعبه شديد ياخ ولا كأنك صحبتي البعرفها 😳 ..
عدت فترة الامتحانات علي صعبه شديييد كنت ماره بي ضغط نفسي شديييد تفكيري كان في ساجد الحيحصل ليهو شنو ؟ و في ابوي المن الوقت داك بقى براقبني من بعيد ماشه وين وجايه من وين اساسا اشترط على امي انو يخليني امتحن بس تطلع الساعه كده وتصل البيت الساعه كده ماكنت بتأخر في الجامعه ولا عندي طريقه اساسا اشم هواء في الشارع ، كانت فتره مخنووقه شدييد .. الحاجه الوحيده الكنت مبسوطه ليها انو عمتي وقفت الزن على ابوي في موضوع احمد والسبب سجى طبعا اقنعتها كيف مابعرف👌 الموضوع ماكان داخل راس ابوي وكان شاكي ومتأكد انو انا السبب ورا رفض احمد " عمتي قالت لي ابوي انو احمد قال بشوف سندس زي اختو " سجى كانت ورا الاقناع ده بس ما بهمني اتخلصت من احمد كيف عموما هسي بعد النتيطه تطلع واشيل شهادتي مافي عريس ح يقيف لي عارض في وشي .. طلعت النتيجه و كنت جايبه معدل عالي جدا اتخرتا بي تقدير جيد جدا .. ما انتظرتا كتير للشهاده و بديت في اجراءاتها طبعا مرمطة ناس جامعه السودان في الشهاده 💔 ما بتخلص ولا بتتغير لازم الواحد يموت قبل و بعد الشهاده حتى يتخرج من الجامعه دي .. اها بعد فرحتي بالشهاده الطلعتها دي ما لقيت مكان زاتو انزل فيهو الخدمه الوطنيه 💔 السودان ده عايش على حاجه واحده اسمها الواسطه بس لو ما عندك واسطه في كل مكان اقنع من الحياه فيهو .. عاطله اربعه شهور في البيت الخدمة المجانيه دي ما دايرين يشيلوني فيها ! غايتو بلد غريبه خلاص كان جيت تخدمها ما يخلوك 💔😂 والاربعه شهور بقت سته شهور ، قربت روحي تطلع من الروتين اليومي شغل البيت و النضافه و القهوه مع ناس امل الضهر كده .. بس كل يوم نفس اليوم الا الايام كانت بتفرق عند ساجد 💔 الكانت حالتو ماشه متدهوره اكتر و اكتر 💔 و كنت بشوفو بتعب قدامي .. مرات بمشي اقعد معاهو و مرات بجيبو البيت بقت علاقتنا قويه شديد انا وهو 😊 دي الحاجه الكانت مصبراني على العطله ..
اما مرادي ف كانت اساسا بتحب حياة البيت والمطبخ و عندها كده خلاص حققت اعلى انجاز ليها ، كنت بمشي ليها مرات عشان اساعدها لانها حامل و عشان احس اني غيرتا جو الا الروتين هو نفسو عندنا وعندها هي ، كنت بتكلم معاها انو انا لازم القى لي زول يساعدني والمشكله اهلنا كلهم تعبانين طبعا هي محطمه للآمال و كانت بتحبطني كل البهمها ياخ كان عرستي ماكان اخير ليك من قعاد البيت ! و انا بتكلم معاها اتذكرت الكابتن رياض😍 بس قمتا على حيلي ودعتا مرادي سرييع سريييع ،، وجريييت البيت الكرت خاتاهو فوووق في الرف الاول من دولابي المكسر😂💔 بس طلعتو و ضربتا الرقم بتاع وكالة البيسان 💜
يتبع
