الحب الابدي

٢٣

#الحب_الابدي
-٢٣-

طلعت لأقرب صيدليه الحمدلله لقيت فيها بنت اديتها الحبوب قلت ليها عندي الحبوب دي اتلخبطت علي عايزه اعرفها حقت شنو ادتني ابتسامه وقالت لي دي حبوب منع الحمل طبعا اتخلعت 😱 قلت احتمال سمعتها غلط قلت ليها حبوب  شنووو قالت لي منع الحمل ولسه مبتسمه قلت ليها انتي متأكده قالت لي متأكده لو انتي ما مقتنعه ممكن تسألي صيدليه تانيه ولأ دكتور قلت ليها العفو كويس انها شافت الحنه في يدي عشان ما تظن فيني سوء 😅 بس كلامها نزل علي زي  الزلزال كيف يعني حبوب منع الحمل معقول سمر بتبلعها طيب الجابها في دولاب حسام شنو والحبوب ما جديده شايلين منها بتكلم بقلبي كده لقيت تاني في صيدليه دخلت لقيت ولد وبنت قاعدين الولد قال لي عايزه حاجه يا مدام قلت ليهو لا شكرا عايزه استشير الاخت دي في حاجه البنت بعد انتهت جاتني اديتها الحبوب وسألتها وللأسف طلع كلام الاولي صااااح واتصدمت للمره التانيه لانو كان عندي امل كلام الاولي يطلع غلط رجعت البيت والهم علي راسي قدر الجبل دخلت لقيت سمر قاعده في الصاله قالت لي لقيتي الحبوب قلت ليها حبوب شنووو 😳 قالت لي حقت الصداع طبعا نسيت الكذبه قلت ليها لااا لقيت الصيدليه قافله وسمر بتحضر في التلفزيون  وانا بفكر اسألها من الحبوب دي ولأ لاااا طيب لو سألتها ح تقول لي الحقيقه قلت اجرب قلت ليها سمر انتي عندك حبوب بتبلعيها استغربت قالت لي حبوب 😳 حبوب شنو قلت ليها اي نوع من  الحبوب قالت لي لااا وشكلها كانت صادقه ما بتكضب قلت ليها تمام قالت لي لييه بتسألي قلت ليها طيب حسام ما قاعد يديك حبوب قالت لي انتي الليله قصتك شنو مع الحبوب قلت ليها اول ردي لي قاعد يديك قالت لي بري ولا حبه قلت ليها إتزكري قالت لي والله ما بديني بس بديني نص كبايه عصير وقالتها لي بخجل نظام دايره تغيظني الهبله 😒 وماعارفه المصيبه .. كده اتأكدته اذا الحبوب جايبها حسام عشان كده كل مره بقول لي 33 شهور وح اطلقها قطعت افكاري قالت لي بس ما قلتي لي بتسألي لييه قلت ليها بس عشان لو عندك حبوب بتبلعيها تكلمي حسام يجيبها ليك ودخلت غرفتي ومن الصدمه مسكني صداع 😓 قلت طيب اواجهه حسام كيف لو دسيت منو الحبوب دي وسكته  اكييييد ح يشتري وحده جديده عشان كده لازم اواجهو وفضلت افكر اني اواجهو كيف يا ربي اضرب لـ هديل اكلمها تاني قلت دي اسرار مافي داعي بعدين هي زاتها بتكرهه سمر ح تقول لي تستاهل 😅 وفضلت افكر لحدي ما حسام جا  راجع من الشغل قابلتو عادي كأنو مافي حاجه ونحن قاعدين في الغدا سمر قالت لي شجن الصيدليه هسه بتكون فتحت خلعتني الحيوانه حسام قال لي صيدليه شنو 😳 وقبل ما ارد سمر قالت ليهو قبيل شجن مشت الصيدليه ولقتها قافله 🙂 الحيوانه فهمتها بس عايزه تكلم حسام اني طلعت وما عارفه ده لمصلحتها حقو ارجع الحبوب مكانها عشان حسام يبلعها ليها وبعد الـ 3 شهور يطلقها واتفكا منها 😒 حسام قال لي مشيتي لشنو 😳 قلت ليهو مشيت اجيب حبوب صداع اكسترا قال لي طيب هنا عندنا في الدرج قلت ليهو اي ما كنت عارفه  قال لي وهسه بقيتي كيف قلت ليهو لا خلااص خلاني قال لي بقيتي تصدعي طوالي لازم نمشي الدكتور نشوف من شنو وسمر طبعا زعلانه في اهتمام حسام بي لأنو هدفها كان تفتني معاهو وتعمل خلاف بينا بس حصل العكس 😌 قالت ليهو  الصداع عادي احتمال من هوا المكيف لم يكون شديد ومباشر في الوش بصدع بالزول حسام قال ليها احتمال وانا اديتها ابتسامه 😊

المسا قاعده في غرفتي واليوم كان علي سمر حسام جا داخل فتح الدولاب وشغال يفتش تحت الهدوم قلب الدولاب فوق تحت قلت ليهو بتفتش في شنو 🙂 قال لي ما في حاجه مهمه بقلبي قلت ليهو فتش لبكره ما بتلقى الحبوب طلع وجا راجع يفتش قلت ليهو انت كلمني عايز شنو احتمال اساعدك قال لي عايز سماعه التلفون كضاب يا انت 😅 قلت ليهو هدي ليها في التربيزه قال لي خلاص  خليتها وطلع بعد عايزه اواجهو قلت اخلي لـ بكره اصبحنا الصباح بعد حسام طلع الشغل جاتني سمر قالت لي يعني يا شجن امس عشان قلت ليك حسام بديني كبايه عصير تمشي تحرشي انو تاني ما يعملها لي 😒 بس غلطانه انا البحكي ليك اسرارنا طبعا انا اتخلعت من كلامها 😳 قلت ليها والله ما حصل قالت لي طيب  لييه امس النهار حكيت ليك والمسا ما عمل لي العصير وما تقولي لي صدفه قلت ليها والله ما عندي علاقه وبعدين قبل ما تتهميني امشي شوفي ولأ خلاص ما في داعي 😏 قالت لي لااا تمي كلامك قلت ليها سمر خلينا متفقين وعايشين زي الاخوات احسن ليك ولي ولـ حسام 🙂 قالت لي لقيتي حسام بقى يميل لي عشان ح اجيب ليهو الجنا عايزه تفرقينا 😒 طبعا كلامها ضربني في الوتر  الحساس من الزعل قربت اقول ليها موضوع الحبوب بس اتمالكت نفسي قلت ليها يا بنت ما تنسي انا الخطبتك لـ حسام يعني بكامل ارادتي وما في زول جبرني لو ما انا ضفرو ما كان طلتيهو وابسط حاجه لو خيرنا حسام بينا الاتنين انتي عارفه الـ ح يخسر منو عشان كده خليك واعيه وما تخربي بيتك 😊 وانا  الزمن ده كلو لم ساكته ليك ما خوف منك بس لو انا اتكلمت انتي الخسرانه وعشان خاطر راحة حسام عشان كده لمي الدور احسن ليك 🙂 بعد كلامي ده  بلعت لسانها وجرت غرفتها تبكي ضميري أنبني من كلامي معاها دخلت ليها في غرفتها لقيتها راقده وتبكي قلت ليها سمر انا اسفه والله ما كان عايزه اقول ليك كده بس انتي الجبرتيني بإستفزازك لي لكن والله انا من جوه قلبي بتمني انك بالجد تجيبي بيبي ويتربي في عزكم وعشان تسكت قلت ليها اول ما تحملي وقبل تلدي انا ح اتفصل من حسام وح تكونو احلى اسره طبعا خبر انفصالي ده خلاها تهدأ وتسكت االحيوانه 😒 

صحباتي اتصلو علي قالو لي جايينك لكن تعالي لينا عند ناس امك قلت ليهم مش عندي بيت تعالو لي فيهو قالو لي يا زوله انتي عارفه هناك مع سمر ما بنجيك عشان تقعد تتونس معانا بتجينا عند ناس امك ولأ ما بتجينا 😒 قلت ليهم امري  لله بجيكم طبعا حتي هديل لم تجيني بتقعد تتونس معاي في غرفة النوم عشان ما تقعد مع سمر فكرت اكلم سمر تمشي معاي عشان يتصالحو كلهم مع بعض وفعلا كلمتها في الاول رفضت قالت لي هم ما عايزني بس اقنعتها وضربت لحسام شلت منو الاذن مشينا اول ما دخلت وسلمت عليهم سلمو علي بالاحضان قلت ليهم اتأخرت عليكم قالو لي قاعدين لينا ساعه مع خالتو 😓 قلت ليهم بس  جبت ليكم معاي مفاجأه قالو لي شنو قلت ليها ادخلي يا سمر طبعا في اللحظه دي كلهم صرو وشهم 😒 وسلمو عليها باطراف يدهم واي وحده شالت شنطها قالو ماشين بقيت احنس فيهم 55 دقايق ما تموها معاي انا احنس وامي تحنس لحدي ما وصلنا الباب قلت ليهم انا هسه جاياكم من هناك عشان تمشو 😠 قالو  لي لو جيتينا براك كان قعدنا ولو نحن عايزنها كان جيناكم في بيتكم بس جيناك هنا عشان ما نشوفها وانتي جبتيها معاك يلا اشبعي بيها 😒 امي قالت ليهم يا  بناتي اقعدو مع بعض واتصافو والحصل حصل وكل شي قسمه ونصيب رهام قالت ليها والله يا خالتو لو بتك جنت ورضت تديها راجلها وتعيش معاها عاااادي بعد العملتو ده نحن ما بنرضي تقعد في وسطنا وتكون صحبتنا 😏 وطلعو حتي هديل طلعت معاكم التقول دي ما مرت اخوها 😅 رجعت لـ سمر لقيتها بتبكي  حنسناها انا وامي سكتت ضربت لحسام يجي غاشينا من الشغل امي قالت لـ سمر ما تزعلي يا بتي والله انتي وشجن بالنسبه لي واحد طال ما انكم متفاهمين وصحباتك مصيرهم يرجعو ليك العصر حسام جانا طلعنا اول ما جيت اركب في العربيه حسام فتح لي الباب بقدام وحمر لي ركبت قال لـ سمر المره الكبيره بتكون زي الام ليها احترامها قلت ليهو هووووي ما تقول علي كبيره 👆😠 قعد يضحك قال لي خلاص المدام الاولي وهمس لي والمتربعه في قلبي 😍 وسمر  الكلام ده في قلبها اتحركنا في الطريق حسام قال لينا اليوم كان كيف نطت سمر الحيوانه بدل تقول ليهو تمام وظريف وتسكت حكت ليهو الحصل كلو 😒 قال ليها ده نتيجه الصدمه عشان اتصدمو بزواجنا ودي ردة فعلهم  طبيعي يعملو كده عاين لي وابتسم 😉 و

 وصلنا البيت اي واحد دخل غرفتو دخلت غرفتي ولسه في  راسي موضوع الحبوب قطع تفكيري حسام جا حضني من ورا قال لي صحباتك قاسيات لحدي الان ما سامحوها لـ سمر 😅 قلت ليهو ما تقول عليهم قاسيات 😠 قال لي خلاص بقول مخلصات للصداقه قلت ليهو اااي كده وانت الاولاد خلاص اتقبلو الوضع قال لي والله يومين ما بتكلمو معاي لحدي ما وريتهم الشروط حتي صالحوني وفي الاخير سموني الحاج متولي 😅 انتي زاتك كلمي  البنات بالشروط قلت ليهو كيف يعني اكلمهم اقول ليهم حسام معرس سمر بشروط موقف سمر ح يكون شنو قال لي ح يكون موقفها بيييش وقعد يضحك قلت ليهو حسام  فكاني ودخل اتحمم وجا طالع ما لقيت لي مقدمه اعملها للحبوب طوالي طلعتها ليهو حسام دي شنو 🙂 قال لي شنو قلت ليهو الحبوب  دي حقت شنو وما تقول لي ما حقتي ولأ ما بعرفها لاني لقيتها في دولابك قال لي دي مسكن للآلام قلت ليهو متأكد قال لي اااي 🙂 قلت تماااام اصلا انا كنت  بفتش لنوع الحبوب ده فكيت وحده عايزه ابلعها نط من السرير خطفها مني قال لي انتي هبله بتبلعي ساااي 😠 قلت ليهو مالك مش قلت لي مسكن قال لي اااي  لكن ما بتنفع معاك قلت ليهو حسام دي الحبوب الكنت بتفتش ليها امس المسا صح 😒 قال لي لااا قلت ليهو يعني ما كنت عايز تدوبها لـ سمر في العصير سكت  ما رد ومسح شعرو بيدو ودنقر راسو قلت ليهو لييه يا حسام انت كل مره بترتكب ذنب اكبر من القبلو في حق سمر وانا قلت ليها سمر دي مسؤولتي اهلها أمنوني ليها انا قبلك قال لي طيب اعمل شنو انا اصلا رضيت بالوضع ده وكنت متصبر ومستحمل قلت لمدة 3 شهور وكل حاجه تتصلح وما قربت عليها قلتي كده ماصح وحرام عليك اديتها حقوقها بس فكرت في الحبوب قلت ليهو عارف ذنبك ده اكبر من الاول سومي والله انا ندماااانه اكتر منك بالعرس ده بس متصبره ومنتظره البيبي ده اكتر من سمر ده املي الوحيد قال لي انتي مفتكره حتي لو جا ح يكون عندو طعم ولأ ح اكون فرحان بيهو 😓 قلت ليهو حبيبي  استغفر ربك ما تقول كده تعال رقدنا قلت ليهو سومي عليك الله تاني ما تعمل كده قال لي طيب بس انتي اوع تكوني بلعتي منها قلت ليهو لااا بس حتى لو بلعت معاي ما بتفرق اصلا ممنوعه من الحمل طبيعي 😔 حضني عليهو حبيبي  ما تقولي كده ربنا كريم سكت مسافه وقال لي طيب لو جبت طفل ح تكوني مبسوطه وتعتبريهو طفلك رفعت راسي قلت ليهو بجد 😍 هز لي راسو اااي قلت  ليهو انت احلى سومي والله قال لي يا بكااااشه يلا نومي ده سؤال ما اكتر 😘

اصبحنا الصباح بعد حسام طلع الشغل واثناء ما بنشرب في الشاي سمر قالت لي شجن امس طلعت من غرفتي ماشه اشرب مويه سمعتكم بتتناقشو انتي وحسام ان شاء الله خير 🙂 طبعا سألتي وكانت شمتانه والحيوانه ما عارفه النقاش  بسببها قلت ليها لا خير قالت لي واتصالحتو عشان متوقعه حسام يجيني وما جا قلت ليها اطمني انا وحسام ما بتعدي دقيقه ونكون زعلانين من بعض طبعا مع مرور الايام انا وسمر بنعامل بعض معامله الضرات وكلها مغارز 😅