وعدت سنه وانا وحسام علاقتنا بقت معروفه في الجامعه وكان سندي كأخ قبل خطيب ولأ حبيب كنت برجع ليهو في اي قرار اتخزو ما قصة خوف بالعكس من ناحييه ثقه عشان ما كان عندي اخ ارجع البيت واستشيرو 😍 وكنت متأكده انو حكيم في قراراتو حتي لو رفض اعمل حاجه كان بقنعني بالسبب وطول السنه العدت ما اتجاوز معاي الاحترام حياتنا كانت نقيه ..
يوم عندنا رحله في الجامعه مع كل الدفعه والرحله كانت جبل اولياء حسام قال لينا انا و هديل مافي مشي 😑 حنسناهو ما نفع كان مصر علي قرارو بس وعدنا انو يعوضنا بدل الرحله بعد اقتنعنا انو ما ماشين جات سمر قالت لينا انتو بالجد ما ماشين الرحله قلنا ليها اااي قالت لينا لييه 😳 هديل قالت ليها والله كان نفسنا نمشي بس دي تعليمات جات من القياده العليا قالت لينا منو قلنا ليها حسام قالت لينا الله يعينكم بعد يومين لقتني في الاستراحه قالت لي شجن انتي جاده ما عايزه تمشي عشان كلام حسام 😞 قلت ليها ااي قالت لي انتي عويره هديل بعزرها مسكينه ما عندها مفر غير تسمع كلام اخوها و ولي امرها بس انتي ما مجبوره عندك اهلك وحسام دبله ما ملبسك ليها كيف تسمحي ليهو يتحكم فيك ما تخليك هبله وتعوديهو من هسه علي كلمة حاضر ونعم خلي عندك شخصيه وافرضنا ما كان من نصيبك تكوني ضيعت حياتك بسببو وبعدين حسام فضل ليهو بس سنه في الجامعه متوقعه يكون متعلق بيك لسه لم اختارك احتمال عايز يكمل معاك سنين الجامعه بس ما معروف بعدها المنتظرو شنو غايتو دي نصيحه مني ليك كأخت ويلا بتمني نتلاقي يوم الرحله ودعتني ومشت وانا بديت افكر في كلامها وبصراااحه اثر علي والشيطان لعب دورو وقررت اكلم اهلي اشوف رايهم فعلا وصلت البيت العصر بعد الغدا غسلت العده وعملت الشاي سريع سريع مسافة امي وابوي مجتمعين سوا ختيتو في التربيزه امي قالت لي غريبه شنو النشاط ده قلت ليها الواحد اصلو ما يساعدك يعني😒 قالت لي والذوق ده جبتي من وين ان شاء الله قلت ليها اجرتو من صاحبتي 😅 قالت لي لو ما قطعت لسانك ما برتاح جيت قعدت جنب ابوي قلت ليهو يا ابوي خليك شاهد قال لي با بنت ما تدخليني بينكم وانا اشيل واتظااارف معاهم عايزه امهد للموضوع بس ما عارفه افتحو كيف قلت لابوي يااااخ طولنا من الطلعه امي قالت لي من قبيييل كان تجيبي من الاخر قلت ليها اي والله زمان كان اولاد خالتي بخططو للرحل وبنطلع كلنا بس هسه بقو يغنجو براهم 😏 ابوي قال لي طيب المطلوب شنو قلت ليهو بصوت حنين والله يا ابوي ناس الجامعه عاملين رحله قال لي تمااام ماشه يعني قلت ليهو يا ريت 😔 قال لي ما عندك مشكله ماشين وين ومتين ؟؟ قلت ليهو ماشين يوم الجمعه الجبل قال لي جبل شنو 😳 قلت ليهو جبل اولياء نطت امي قالت لي شنووووو 😱 لا والله تنسي الفكره ابوي قال لي لااا الجبل بعيييد زي ما قالت امك انسي قلت ليهو عليك الله يا ابوي وافق انتو ما واثقين فيني امي قالت لي واثقين فيك بس ما واثقين في الطريق قلت ليها يا امي القدر ده محل ما انتي قاعده بجيك قالت لي بطلي فلسفه وما في مشي طبعا انا مركزه مع ابوي عشان هو الوحيد البقدر يقنع امي قلت ليهو عليك الله يا ابوي وبعدين ما دفعتنا بس الجامعه كلها ماشه يعني يرضيك اليوم التاني يجو يحكو جنبي بالرحله وانا اقعد مكسوره وساااكته جنبهم عليك الله وافق 😭 قال لي طيب بتجو الساعه كم قلت ليهو والله بدري قال لي وماشي معاكم دكتور من الجامعه ولأ طلبه براكم قلت ليهو اي ماشين معانا اساتذه قال لي تمام بس ما تتاخرو طبعا نطيت في رقبتو قلت ليهو انت الزيك منو 😍 قال لي طيب براااحه خنقتيني عايزه تقتليني امي قالت ليهو ده شنو يا صلاااح 😠 يعني وافقت استحاله تمشي وكمان للجبل لاااا استحاله دي بتي الوحيده 😒 قال ليها يعني انا العندي غيرها خليها التمشي وبقي يقنع فيها الحمد لله وافقت دخلت غرفتي فرحانه شلت التلفون عايزه اضرب اكلم هديل اتراجعت قلت هديل ح تكلم حسام وحسام ح يقول لاااا ويا قول سمر ما عندو علاقه بي عشان كده احسن اسكت وامشي الرحله من سكات اليوم التاني كالعاده مشيت الجامعه وعدا اليوم عااادي بس ما جبت سيره الرحله جنب حسام و هديل .. سمر سألتني جنب هديل انو غيرت رأيي للرحله قلت ليها لاااا ما ماشه جيت راجعه البيت وبديت اجهز للرحله يوم الجمعه قمت من الصباح اتظبطه وطلعت ابوي وصلني الجامعه ولم اطمن انو في اساتذه ماشين معانا قلت لابوي ده شنو بتعاملني زي الماشه رحله في الروضه قال لي بتي الوحيده وما عايزاني اخاف واطمن عليها قلت ليهو ربنا يخليك لي 😘
دخلت ولقيت الناس علي وشك تتحرك وانا كنت متحمسه سمر جات سلمت علي قالت لي عرفتك ح تكسري حنك حسام وتجي بعدين اولاد شنو البنسمع كلامهم ابتسمت ليها ☺ بس بعد زكرتني حسام ما عارفه لي جاني شعور الخوف قالت لي اقنعتي حسام كيف قلت ليها ما اتناقشت معاهو تاني قالت لي يعني ماعارفك جايه 😳 قلت ليها لاااا قالت لي واعيه يا صحبتي 😙 وطول الطريق امي وابوي مشغلنها لي تلفونات يقفل ابوي تضرب امي
والعكس لحدي ما وصلنا وسمر ما فارقتني وطول الوقت كانت بتجيب لي سيرة حسام بنتكلم كده و ماسكه التلفون حسام اتصل علي بقيت بعاين للرقم وغالبني ارد والخوف اتملكني سمر قالت لي ردي عليهو عاااادي وكأنو مافي حاجه وما تجيبي ليهو سيره الرحله كأنك في البيت شلت التلفون ومشيت مكان هادئ رديت عليهو قال لي من قبيل وين من الخوف قلت ليهو ح اكون وين يعني قاعده في البيت 😒 قال لي يا بت انت مجنونه عارفك في البيت قصدي ما رديتي علي التلفون سريع قلت ليهو كان بعيد اها داير شنو قال لي يعني الا يكون في سبب عشان اسمع صوتك قلت ليهو لاااا ماكده. .. دي اول مره كنت عايزاهو يقفل الخط بسرعه في بنت اسمها سلمي نادتني بأعلي صوت شجن سريع منتظرنك بقلبي قلت وااااي وقتي في شر اعمالك يا شجن 😢 قال لي دي منو البتناديك دي قلت ليهو بت خالتي يلا ح اقفل بعد ده قال لي طالعين مكان قلت ليهو لااا بس عايزاني في المطبخ قال لي اهااا بتعرفي تطبخي يعني قلت ليهو لااا قال لي الحاله هسه فرحت قلت مرتي بتعرف تطبخ طبعا بعد ما قال لي مرتي قربت اعترف ليهو بالحقيقه بس مسكت نفسي قلت ليهو حسام اقفل بعد ده قال لي برجع ليك بعد الصلاة قلت ليهو لااا لم انتهي برجع ليك انا قال لي خلاااص منتظرك قلت ليهو تمام وما صدقت قفلت الخط رجعت للشله واليوم كان جميل بس خوفي كان شايل جزو من فرحتي 😕 وطول الرحله كل مجموعه بياخدو صور وسيلفي بس انا رفضته اني اتصور الأ في اللحظه الاخيره قبل ما نتحرك سلمى اصرت علي انها تتصور معاي بعد وقفنا للصوره نادت ولد اسمو ايمن دفعة حسام قالت ليهو الأ تجي تتصور معانا وختتني امام الامر الواقع جا وقف جنبها قالت ليهو لااا اقيف جنب شجن بهناك عشان الصوره تظبط قال ليها دي حسام ممكن يقتل فيها وقعد يضحك 😅 قالت ليهو امممم ظريف وانا طبعا مخلوعه وساااكته وفي نفس اللحظه خايفه ومتوتره بس من شنو ما عارفه سلمى اخدت السيلفي بعد أيمن مشي مننا قلت ليها عليك الله امسحي الصوره قالت لي انتي عويره الصوره ما فيها حاجه وبعدين ده تلفوني مافي زول بشوفها قلت ليها وعد قالت لي وعد واتحركنا وصلنا الجامعه والحمد لله خف التوتر حبه اتصلت علي ابوي يجي يسوقني وبالرغم من اليوم جمعه كنت متوقعه حسام يظهر لي في الجامعه في اي لحظه من شدة الخوف ابوي جاني ورجعنا البيت سلمت علي امي قالت لي حمدلله علي السلامه قلت ليها الله يسلمك قالت لي دي اخر مره قلت ليها ما عندك مشكله 😘 من التعب طوااالي علي غرفتي اتحممت وصمت التلفون ونمت ما صحيت الا الصباح وكـعاده عين مفتحه وعين مغمضه فتحت التلفون لقيت ديشليون مكالمه من حسام ومكالمات من هديل نطيت من السرير واصلا السبت اجازه رجعت ليهو قال لي من امس ما فضيتي عشان ترجعي لي صاااح 😒 قلت ليهو كنا مضيوفين قال لي عشان كده صوتك تعبان قلت ليهو اي وفضلنا ندردش مع بعض وقفلنا رجعت تاني السرير امي جات داخله قالت لي امس صايعه والليله نايمه يابختك قومي قلت ليها خمسه دقايق واقوم طبعا الخمسه دقايق جرت لم صحوني للفطور 😅
فتحت الواتس لقيت مية رساله من حسام من امس كلها عباره عن شجن ردي شجن انتي كويس بتصل عليك رديت رسلت ليهو رسايلك صدعت بي قال لي حيوانه غلطان انا الخايف عليك بتونس معاهو جاتني رسايل من هديل قالت لي يا بت الحكايه شنو ما بتردي قلت ليها هدول خفت علي 😍 قالت لي بري البخوفني عليك شنو عارفاك نصيحه وشي ما بجيك بس حسام جنني بـ اضربي ليها اضربي ليها قلت ليها يسلم لي سومي قالت لي الله الله الله طبعا شغاله اتونس معاهم الاتنين مره ارسل لحسام ومره لهديل كتبت ( وبعدين لو ما خاف علي حبيبي الـ ح يخاف علي منو ) عايزه ارسلها لـ هديل رسلتها لـ حسام قال لي بس حبيبك حيوانه انا خطيبك وراجل المستقبلي 😠 بعد قريت الرسايل عاينت للاسم لقيتو ده حسام ما كضبت قفلت التلفون خااالص اول ما فتحتو اتصل علي رديت قال لي مالك قافله التلفون وما رديتي علي رسايلي قلت ليهو حسام ممكن نغير السيره دي قال لي يا بت انا بس رديت علي رسايلك قلت ليهو والله في الحقيقه جاتك بالغلط كنت بكاوي في هديل قال لي يعني انتي وهديل بتقطعو فيني وعاملين علي عصااابه الله يقدرني عليكم 😒 رديت ليهو وانت لاقي 😏 اتونست معاهو قال بعد ده نومي عشان بكره ما تتأخري وتطردي من المحاضره رسلت ليهو وش صاري 😠 وقفلت الواتس
اصبحت الصباح ونفس الروتين بس المره دي وانا ماشه في الشارع لم قربت علي الظلط لمحت عربيه حسام قلت اكيييد بتشبهو مافي سبب بجيبو الصباح لم وصلت حسام نزل من العربيه وأشر لي مشيت عليهو قلت ليهو الجابك شنو من الصباح 😳 قبل ما يسلم قال لي اركبي نتناقش في العربيه بدل الشارع بعد ركبت فضل ساكت بس وشو ما كان مطمن قلت ليهو ما رديت علي وبعدين هديل وين عاين لي بعين تكفي عن الرد 😒 قال لي شجن يوم الجمعه كنتي وين ؟؟ بقلبي قلت السؤال ده هسه داعيهو شنو يا ربي عرفني مشيت الرحله طيب عرف من وين وامس اجازه ولأ يكون عايز يختبرني ساااي قال لي شجن ساكته مالك م
ا سمعتيني ولأ عايزاني اعيد سؤالي 😠 يوم الجمعه كنتي وين ؟؟ بلعت ريقي وقلت ليهو كنت في البيت هز راسو قال لي في البيت صح وسكت قلت الحمد لله نزل من الظلط و وقف العربيه طلع التلفون وفتح الصوره فيها بس انا وايمن قال لي طيب فسري لي دي شنو لم كنتي في البيت اهاااا ايمن جاكم في البيت واتصور معاكم صح في اللحظه دي حسيت بروحي اتشليت 😰....