ﻳﻮﻡ ﺍﻟﺠﻤﻌﺔ ﺩﺓ ﻓﻲ ﺑﻴﺖ ﺍﻟﻌﻤﺪﺓ ﻛﻤﺎﻥ ﻣﺒﺎﻟﻐﺔ ...ﺍﻟﻀﻴﻮﻑ ﺍﻛﺘﺮ ﻣﻦ ﻛﻞ
ﻳﻮﻡ ...ﻣﻦ ﺍﻟﺼﺒﺎﺡ ...ﻭﺍﻧﺎ ﺍﺻﺮﻳﺖ ﻋﻠﻰ ﻧﺎﺱ ﺧﺎﻟﺘﻮ ﻋﻠﻮﻳﺔ ﺍﻧﻲ
ﺍﺳﺎﻋﺪﻫﻢ ﻓﻲ ﺍﻟﻤﻄﺒﺦ ...ﻗﻠﺖ ﻟﻴﻬﻢ ﺧﻼﺹ ﺍﺭﺗﺤﺖ ﺍﺳﺒﻮﻉ ﻛﺎﻣﻞ
... ﻗﺎﻟﻮﺍ ﻟﻲ ﺧﻼﺹ ﺍﻧﺖ ﺍﻋﻤﻠﻲ ﺍﻟﺸﺎﻱ ﻭﺍﻟﻘﻬﻮﺓ ..ﻭﻭﺭﻭﻧﻲ ﺍﻇﺒﺘﻬﻢ
ﻛﻴﻒ ... ﻃﺒﻌﺎ ﻣﺎ ﺷﻐﻞ ﺗﻘﻴﻞ ...ﻟﻜﻦ ﺑﺮﺿﻪ ﺍﺧﻴﺮ ﻣﻦ ﻗﻌﺪﺓ ﺍﻟﺨﻤﺎﻟﺔ
ﺳﺎﻛﺖ ...
ﺍﻟﻠﻴﻠﺔ ﻋﻤﺮ ﻭﺷﻴﺦ ﺍﻟﻄﺎﻫﺮ ﻣﺎ ﺟﻮﻧﺎ ﺍﻟﺼﺒﺎﺡ ﺯﻱ ﻋﺎﺩﺗﻬﻢ ﺻﺒﺤﻮﺍ ﻋﻠﻴﻨﺎ
...ﻋﺸﺎﻥ ﻛﺎﻥ ﻣﻌﺎﻫﻢ ﺿﻴﻮﻑ ...ﻟﻜﻦ ﺑﻌﺪ ﺍﻟﻔﻄﻮﺭ ﻭ ﻫﻢ ﻃﺎﻟﻌﻴﻦ ﻋﻠﻰ
ﺻﻼﺓ ﺍﻟﺠﻤﻌﺔ ﺟﻮﺍ ﺩﺍﺧﻠﻴﻦ ﻟﻴﻨﺎ ... ﺷﻴﺦ ﺍﻟﻄﺎﻫﺮ ﺯﻱ ﻋﺎﺩﺗﻪ ﺑﺎﻟﺠﻼﺑﻴﺔ ..
ﻋﻤﺮ ﺑﺮﺿﻪ ﻛﺎﻥ ﻻﺑﺲ ﺟﻼﺑﻴﺔ ﻭ ﻃﺎﻗﻴﺔ ... ﺍﻟﺠﻼﺑﻴﺔ ﻗﺼﻴﺮﺓ ﻭﺍﺻﻠﺔ ﻧﺺ
ﺳﺎﻗﻪ ..ﺯﻱ ﺣﻘﺔ ﺍﻧﺼﺎﺭ ﺍﻟﺴﻨﺔ ... ﻭ ﻻﺑﺲ ﺗﺤﺘﻬﺎ ﺑﻨﻄﻠﻮﻧﻪ ﺑﺘﺎﻉ ﺍﻟﺮﻳﺎﺿﺔ
... ﺗﻜﻮﻥ ﺟﻼﺑﻴﺔ ﺷﻴﺦ ﺍﻟﻄﺎﻫﺮ ﻭ ﻃﺒﻌﺎ ﻋﻤﺮ ﺍﻃﻮﻝ ﻣﻨﻪ ﺷﺪﻳﺪ ..ﺭﻏﻢ ﻛﺪﺓ
ﻛﺎﻥ ﺷﻜﻠﻪ ﻗﻴﺎﻓﺔ ...ﻭﺍﻟﻄﺎﻗﻴﺔ ﻇﺮﻳﻔﺔ ﺟﺪﺍ ﻣﻌﺎﻩ ...ﺍﻟﺪﻗﻦ ﺷﻜﻠﻪ ﺧﻔﻔﻬﺎ
ﺷﻮﻳﺔ ..ﻟﻜﻦ ﻟﺴﺔ ﻗﺎﻋﺪﺓ ... ﻃﺒﻌﺎ ﻗﺎﻝ ﻣﺎ ﺟﺎﺏ ﻣﻜﻨﺔ ﺍﻟﺤﻼﻗﺔ ﺑﺘﺎﻋﺘﻪ ﻣﻌﺎﻩ
.. ﻳﻜﻮﻥ ﻗﺼﺎﻫﺎ ﺑﻤﻘﺺ ﻭﻻ ﺣﺎﺟﺔ
ﻟﻜﻦ ﻣﻨﻈﺮ ﺍﻟﺠﻼﺑﻴﺔ ﺍﻟﻤﻘﺼﺮﺓ ﺧﻼﻧﻲ ﺭﻏﻤﺎ ﻋﻨﻲ ﺍﺑﺘﺴﻢ .. ﻭﺣﺎﻭﻟﺖ
ﺍﺿﺎﺭﻳﻬﺎ ﻟﻜﻦ ﻫﻮ ﺷﺎﻓﻬﺎ ...ﻭﻛﺄﻧﻪ ﻋﺮﻓﻨﻲ ﺑﻀﺤﻚ ﻟﻴﻪ ..ﻻﻧﻪ ﺟﺎﺀ ﺟﻨﺒﻲ
ﻭﻗﺎﻝ ﻟﻲ ﺑﺮﺍﺣﺔ ( ﺍﺿﺤﻜﻲ ﻛﻮﻳﺲ ...ﻳﻮﻣﻚ ﺑﺠﻲ ..ﻭﺑﺎﻟﻤﻨﺎﺳﺒﺔ ﺷﻴﺦ
ﺍﻟﻄﺎﻫﺮ ﺍﺗﺒﺮﻉ ﻟﻲ ﺑﻘﻤﺎﺵ ﻭﺣﺎﻟﻴﺎ ﺍﻟﺘﺮﺯﻱ ﻗﺎﻋﺪ ﻳﻔﺼﻞ ﻟﻲ ﻓﻲ ﺟﻼﺑﻴﺔ
ﺟﺪﻳﺪﺓ ﻭ ﻗﺪﺭﻱ ... )
ﺍﻧﺎ ﻧﺰﻟﺖ ﻳﺪﻱ ﻣﻦ ﻭﺷﻲ ﻭ ﺿﺤﻜﺖ ﻟﻴﻪ ﻓﻲ ﻭﺷﻪ ﻭﻗﻠﺖ ﻟﻴﻪ ( ﻣﺎﻟﻪ ؟؟
ﺗﻤﺎﻡ ﺗﺘﻬﻨﺎ ﺑﻴﻬﺎ ﺍﻥ ﺷﺎﺀ ﺍﻟﻠﻪ ...)
ﻭﺍﻧﺎ ﺑﺘﻜﻠﻢ ﻣﻊ ﻋﻤﺮ ﺟﺎﻧﻲ ﺧﺎﻃﺮ ﻓﺠﺄﺓ ﻛﺪﺓ ﺍﻧﻲ ﺑﺘﻜﻠﻢ ﻣﻌﺎﻩ ﺑﻄﺮﻳﻘﺔ
ﻋﻤﺮﻱ ﻣﺎ ﺍﺗﻜﻠﻤﺖ ﺑﻴﻬﺎ ﻣﻊ ﺷﺎﺏ ﻏﻴﺮﻩ ... ﻣﻨﻔﺘﺤﺔ ﻣﻌﺎﻩ ... ﻛﺄﻧﻲ ﺑﻌﺮﻓﻪ
ﻟﻲ ﺳﻨﻴﻦ ... ﻣﺎ ﻋﺮﻓﺖ ﺳﺒﺐ ﺍﻟﺤﻜﺎﻳﺔ ﺩﻱ ﺷﻨﻮ ... ﺩﺓ ﻋﺸﺎﻥ ﻃﺮﻳﻘﺔ
ﺗﻌﺎﻣﻠﻪ ﻣﻌﺎﻱ ﺑﻄﺮﻳﻘﺔ ﺍﻳﺰﻱ easy ﻭﻫﻈﺎﺭﻩ؟ ﻭﻻ ﻋﺸﺎﻥ ﺍﻟﻤﻮﻗﻒ
ﺍﻟﺼﻌﺐ ﺍﻟﻤﺮﻳﻨﺎ ﺑﻴﻪ ﻣﻊ ﺑﻌﺾ ؟؟ ﻭﻻ ﻋﺸﺎﻥ ﺍﻟﺤﺎﺟﺎﺕ ﺩﻱ ﻛﻠﻬﺎ ؟؟؟
ﻏﺎﻳﺘﻮ ﻣﺎ ﻋﺎﺭﻓﺔ ...
ﺍﻻﻳﺎﻡ ﺍﻟﺒﻌﺪﻫﻞ ﺑﺮﺿﻪ ﻣﺮﺕ ﻋﻠﻰ ﻧﻔﺲ ﺍﻟﻤﻨﻮﺍﻝ ...ﻭ ﺍﻟﺮﻭﺗﻴﻦ ... ﻭﺍﻧﺎ
ﻣﺎ ﻋﻨﺪﻱ ﺷﻐﻠﺔ ﻓﻲ ﺍﻟﺒﻴﺖ ﻏﻴﺮ ﻋﻤﻞ ﺍﻟﻘﻬﻮﺓ ﻭﺍﻟﺸﺎﻱ ﺑﺎﻟﻨﻬﺎﺭ ... ﺑﻘﻴﺖ
ﺍﻋﺮﻑ ﺍﻇﺒﻄﺘﻬﻢ ﻛﻮﻳﺲ ...
ﺑﺮﺿﻪ ﺑﻤﺸﻲ ﻃﻮﺍﻟﻲ ﺑﻴﺖ ﻧﺎﺱ ﻧﺎﺩﻳﺔ ... ﺗﻘﺮﻳﺒﺎ ﻳﻮﻣﻴﺎ ...ﺑﻌﺪ ﺍﻟﻔﻄﻮﺭ ﺍﻭ
ﺍﻟﻌﺼﺮ ﺍﺗﻮﻧﺲ ﻣﻌﺎﻫﻢ ﻭ ﺍﺷﻮﻑ ﺗﺠﻬﻴﺰﺍﺗﻬﻢ ﻟﻌﺮﺱ ﺍﻣﺎﻧﻲ ... ﻃﺒﻌﺎ
ﺍﻟﺘﺠﻬﻴﺰﺍﺕ ﻣﺴﺘﻤﺮﻳﻦ ﻓﻴﻬﺎ ﻋﺎﺩﻱ ... ﻭﺣﺎﺟﺎﺗﻬﻢ ﻛﻠﻬﺎ ﺗﻘﺮﻳﺒﺎ ﺟﺎﻫﺰﺓ
... ﻋﻠﻰ ﺍﺳﺎﺱ ﺍﻧﻪ ﺍﻭﻝ ﻣﺎ ﺍﻟﺸﻮﺍﺭﻉ ﺗﻔﺘﺢ ﻭ ﻧﺎﺱ ﺍﻟﻌﺮﻳﺲ ﻳﻘﺪﺭﻭﺍ ﻳﺠﻮﺍ
ﻃﻮﺍﻟﻲ ﺡ ﻳﻌﻤﻠﻮﺍ ﺍﻟﻌﺮﺱ ....
ﺍﻟﺘﺎﺧﻴﺮ ﺩﺓ ﺍﻣﺎﻧﻲ ﺑﺲ ﺷﺎﻓﺘﻪ ﻓﺮﺻﺔ ...ﺯﻱ ﻣﺎ ﻗﺎﻟﺖ ﺗﺸﻴﻞ ﺍﻟﺪﺧﺎﻥ
ﻛﻮﻳﺲ ﻭ ﺑﺮﺿﻪ ﻋﺎﻳﺰﺓ ﺗﺸﺘﻐﻞ ﻓﻲ ﺷﻌﺮﻫﺎ ﺯﻳﺎﺩﺓ ... ﻗﺎﻟﺖ ﻳﻄﻮﻝ ﻭ
ﻳﻐﺰﺭ ﺯﻳﺎﺩﺓ .... ﺍﻧﺎ ﺍﻧﺪﻣﺠﺖ ﻣﻌﺎﻫﻢ ﺷﺪﻳﺪ ﻓﻲ ﺍﻟﺒﺮﺍﻣﺞ ﺩﻱ ...ﻗﺎﻋﺪﺓ
ﺍﺧﺘﺮﻉ ﻣﻊ ﺍﻣﺎﻧﻲ ﺧﻠﻄﺎﺕ ﻟﻠﺸﻌﺮ ﻭﺍﻟﺠﺴﻢ ...ﻭﻫﻲ ﻃﻮﺍﻟﻲ ﻣﺎ ﺑﺘﻌﻤﻞ
ﺣﺎﺟﺔ ﺍﻻ ﺗﺎﺧﺪ ﺭﺃﻱ ﻓﻴﻬﺎ .... ﻭ ﻧﺎﺩﻳﺔ ﺑﺮﺿﻪ ﺗﺎﺧﺪ ﻓﻲ ﺭﺃﻱ ﺗﻨﻈﻴﻢ ﺍﻟﻌﻔﺶ
ﻳﻜﻮﻥ ﻛﻴﻒ ﻳﻮﻡ ﺍﻟﻌﺮﺱ ﻭ ﺗﻔﺮﺵ ﻳﺎﺗﻮ ﻣﻼﻳﺎﺕ ...ﻭ ﺗﻄﻠﻊ ﻳﺎﺗﻮ ﻋﺪﺓ
ﻟﻠﻀﻴﺎﻓﺔ ﻭ ﺍﻟﻌﻘﺪ ﻭﻛﺪﺓ ...
ﺍﻭﻝ ﻣﺮﺓ ﻛﺪﺓ ﺍﺣﺲ ﺑﻨﻔﺴﻲ ﺭﺃﻳﻲ ﻣﻬﻢ ﻟﻠﻨﺎﺱ ﻛﺪﺓ ﻭ ﺑﻘﺪﺭﻭﻩ ... ﺍﻧﺎ
ﺫﺍﺗﻲ ﻟﻤﺎ ﺍﺳﺘﻐﺮﺑﺖ ﻓﻲ ﻧﻔﺴﻲ ..ﺩﻱ ﺍﻧﺎ ﻣﺂﺏ ﺍﻟﻤﺘﺤﻔﻈﺔ ﺍﻟﻤﺘﺮﺩﺩﺓ ﺍﻟﻤﺎ
ﺑﺘﻌﺮﻑ ﺗﻌﻤﻞ ﺣﺎﺟﺔ ﺑﺮﺍﻫﺎ ؟؟؟ ﺣﺴﻴﺖ ﺍﻧﻪ ﺛﻘﺘﻲ ﻓﻲ ﻧﻔﺴﻲ ﺯﺍﺩﺕ
.. ﻭﺍﻧﻲ ﺯﻳﻲ ﻭﺯﻱ ﺍﻟﺒﻨﺎﺕ ﺍﻟﻤﻠﺤﻠﺤﺎﺕ ﺍﻟﻜﻨﺖ ﺑﺤﺴﺪﻫﻢ ﺯﻣﺎﻥ ﻓﻲ
ﺍﻟﺠﺎﻣﻌﺔ ...
ﻋﺸﺎﻥ ﻛﺪﺓ ﻳﻮﻡ ﻋﻠﻰ ﻧﺺ ﺍﻻﺳﺒﻮﻉ ﻛﺪﺓ ﻟﻘﻴﺖ ﻧﻔﺴﻲ ﻣﻦ ﻏﻴﺮ ﻣﺎ ﺍﺷﻌﺮ
ﻗﻠﺖ ﻟﺨﺎﻟﺘﻮ ﻋﻠﻮﻳﺔ ( ﺧﻠﻮﻧﻲ ﺍﻋﻤﻞ ﻟﻴﻜﻢ ﺍﻟﻌﺸﺎﺀ ﺍﻧﺎ ﺍﻟﻠﻴﻠﺔ ...) ﻃﺒﻌﺎ
ﺍﺧﺘﺮﺕ ﺍﻟﻌﺸﺎﺀ ﻋﺸﺎﻥ ﻏﺎﻟﺒﺎ ﻣﺎ ﺑﻜﻮﻧﻮﺍ ﻓﻴﻪ ﺿﻴﻮﻑ ﻛﺘﺎﺭ !!!!! ...
ﺧﺎﻟﺘﻮ ﻋﻠﻮﻳﺔ ﺿﺤﻜﺖ ﻭ ﻗﺎﻟﺖ ﻟﻲ ( ﻛﺎﻳﺴﺔ ﻟﻠﺸﻘﺎﻭﺓ ﻣﺎﻟﻚ ؟؟؟ ﻣﺎ ﺍﺻﻠﻬﺎ
ﺭﺍﻳﺠﺎﻙ ...ﻭﻻ ﺍﻧﺘﻮ ﻳﺎ ﻧﺎﺱ ﺍﻟﺨﺮﻃﻮﻡ ﺑﺘﺸﺘﺮﻭﺍ ﺍﻻﻛﻞ ﺟﺎﻫﺰ ؟؟؟ )
ﻗﻠﺖ ﻟﻴﻬﺎ ( ﺍﺑﺪﺍ ﻣﺎ ﻓﻴﻬﺎ ﺷﻘﺎﻭﺓ ﻭﻻ ﺷﻲ ﻭﻻ ﺧﺎﻳﻔﻴﻦ ﺗﻀﻮﻗﻮﺍ
ﻃﺒﻴﺨﻲ ؟؟؟ ﺍﺧﻮﻱ ﺍﻻﺻﻐﺮ ﻣﻨﻲ ﻣﺎ ﺑﻴﺎﻛﻞ ﺣﺎﺟﺔ ﺍﻧﺎ ﻋﻤﻠﺘﻬﺎ ﺑﻘﻮﻝ
ﺑﺘﺴﻤﻢ (!!!
ﺧﺎﻟﺘﻮ ﻋﻠﻠﻮﻳﺔ ﺿﺤﻜﺖ ﻭﻗﺎﻟﺖ ﻟﻲ ( ﺍﻫﺎ ﺑﺘﺪﻭﺭﻱ ﺗﻀﻮﻗﻴﻨﺎ ﺷﻨﻮ
ﺍﻟﻠﻴﻠﺔ ؟؟؟ )
ﻗﻠﺖ ﻟﻴﻬﺎ ( ﺡ ﺍﻋﻤﻞ ﻟﻴﻜﻢ ﻛﺒﺴﺔ ﺍﻟﺴﻌﻮﺩﻳﻴﻦ ..ﻳﺎﻫﺎ ﺍﻟﺒﻌﺮﻑ ﺍﻋﻤﻠﻬﺎ
... )
ﺧﺎﻟﺘﻮ ﻋﻠﻮﻳﺔ ﺿﺤﻜﺖ ﻭ ﻗﺎﻟﺖ ﻟﻲ (ﻋﺎﺩ ﺍﺻﻠﻜﻢ ﻳﺎﻟﻨﺎﺱ ﺍﻟﻤﺮﺑﻴﻴﻦ ﻓﻲ
ﺍﻟﺴﻌﻮﺩﻳﺔ ﺩﻳﻞ ﺟﻨﻜﻢ ﺍﻟﻜﺒﺴﺔ .. ﺣﺴﺔ ﺍﺳﻤﻬﺎﻥ ﺑﺘﻲ ﻟﻤﺎ ﺗﺠﻲ ﻃﻮﺍﻟﻲ
ﺍﻭﻻﺩﻫﺎ ﻳﻘﻮﻟﻮﺍ ﻟﻴﻬﺎ ﺳﻮﻳﻬﺎ ﻟﻴﻨﺎ ....)
ﺍﻟﻤﻬﻢ ﻣﺸﻴﺖ ﺟﻬﺰﺕ ﺣﺎﺟﺎﺗﻲ .. ﺍﻟﺮﺯ ﻋﻨﺪﻫﻢ ﺑﺎﻟﺸﻮﻻﺕ ﻓﻲ ﺍﻟﻤﺨﺰﻥ
... ﻭ ﺍﻟﻠﺤﻤﺔ ﺭﺍﻗﺪﺓ .. ﺍﺻﻼ ﻛﻞ ﻛﻢ ﻳﻮﻡ ﺷﻴﺦ ﺍﻟﻄﺎﻫﺮ ﺑﻀﺒﺢ ﺧﺮﻭﻑ
ﻳﺸﺘﻐﻠﻮﺍ ﻣﻨﻪ ﻟﻐﺎﻳﺔ ﻣﺎ ﻳﺨﻠﺺ ﻳﻀﺒﺢ ﺗﺎﻧﻲ ...
ﻃﺒﻌﺎ ﺍﻧﺎ ﺍﻟﻜﺒﺴﺔ ﻓﻲ ﺍﻟﺴﻌﻮﺩﻳﺔ ﺑﻌﻤﻠﻬﺎ ﻟﻨﺎﺱ ﺑﻴﺘﻨﺎ ﻟﻜﻦ ﻛﻤﻴﺔ ﺑﺴﻴﻄﺔ
.. ﻭﻫﻨﺎ ﻻﺯﻡ ﺍﻛﺘﺮ ﺍﻟﻜﻤﻴﺔ ﻋﺸﺎﻥ ﺍﻟﻌﺪﺩ ﺍﻛﺘﺮ ...ﻏﺎﻳﺘﻮ ﻣﻘﺎﺍﺩﻳﺮﻱ ﺍﻟﻘﺎﻋﺪﺓ
ﺍﻋﻤﻠﻬﺎ ﺿﺎﻋﻔﺘﻬﺎ ﺗﻼﺗﺔ ﻣﺮﺍﺕ ...
ﺧﺎﻟﺘﻮ ﻋﻠﻮﻳﺔ ﻭ ﺧﺪﻳﺠﺔ ﻭﺍﻗﻔﺎﺕ ﻣﻌﺎﻱ ﻳﺴﺎﻋﺪﻭﺍ ﻓﻴﻨﻲ ...ﻏﺎﻳﺘﻮ ﻇﺒﺘﻬﺎ
ﺗﻤﺎﻡ ...ﻭﻟﻤﺎ ﻏﺮﻓﻨﺎﻫﺎ ﺯﻳﻨﺘﻬﺎ ﺑﺎﻟﻔﻮﻝ ﺍﻟﺴﻮﺩﺍﻧﻲ ﻭ ﺍﻟﺨﻀﺎﺭ ...
ﺷﺎﻟﻮﺍ ﻟﻠﺮﺟﺎﻝ ﺍﻟﻌﺸﺎﺀ ﻭ ﺍﻧﺎ ﺧﺘﻴﺖ ﻳﺪﻱ ﻓﻲ ﻗﻠﺒﻲ ... ﻳﺎ ﺩﺍﺏ ﻣﺨﻲ
ﺟﺎﺀ .. ﺣﺴﺔ ﺍﻧﺎ ﺍﻟﻤﺸﺒﻜﻨﻲ ﺷﻨﻮ ؟؟؟ﺣﺴﺔ ﻟﻮ ﻣﺎ ﻋﺠﺒﺘﻬﻢ ﻭﻻ ﻣﺎ ﻗﺪﺭﻭﺍ
ﻳﺎﻛﻠﻮﻫﺎ ... ؟؟؟
ﺧﺎﻟﺘﻮ ﻋﻠﻮﻳﺔ ﻧﺎﺩﺕ ﺍﻣﻬﺎ ﺣﺎﺟﺔ ﺍﻟﺴﺮﺓ ﻭﻧﺎﺱ ﻧﺎﺩﻳﺔ ﻭ ﺍﻣﺎﻧﻲ ﻳﺠﻮﺍ ﻳﺘﻌﺸﻮﺍ
ﻣﻌﺎﻧﺎ ... ﻭﺍﻟﻠﻪ ﻗﻌﺪﻭﺍ ﻳﺸﻜﺮﻭﺍ ﻟﻲ ﻓﻴﻬﺎ ﻭﻗﺎﻟﻮﺍ ﻟﻲ ﺍﺣﺴﻦ ﻣﻦ
ﺍﻟﺒﺘﻌﻤﻠﻬﺎ ﺍﺳﻤﻬﺎﻥ ... ﻭﺍﻧﺎ ﻣﺎ ﻋﺎﺭﻓﺔ ﻛﻼﻣﻬﻢ ﻣﺠﺎﻣﻠﺔ ﻭ ﻻ ﺻﺤﻲ ..؟؟؟
ﺍﻧﺎ ﻋﻦ ﻧﻔﺴﻲ ﻗﺎﻋﺪﺓ ﺍﻛﻞ ﻟﻜﻦ ﻣﺎ ﻗﺎﺩﺭﺓ ﺍﻗﺮﺭ ﺍﻟﻜﺒﺴﺔ ﺣﻠﻮﺓ ﻭﻻ ﻻ
..ﺍﺻﻼ ﻟﻤﺎ ﺍﻃﺒﺦ ﺣﺎﺟﺔ ﻣﺎ ﻗﺎﺩﺭﺓ ﺍﻋﺮﻓﻬﺎ ﺣﻠﻮﺓ ﻭﻻ ﻻ ...ﺍﻟﻤﻬﻢ ﺍﻧﻬﻢ
ﻛﻤﻠﻮﺍ ﺍﻟﻐﺮﻓﻨﺎﻩ ﻟﻴﻬﻢ ﻛﻠﻪ ... ﻭﺑﻘﻴﺖ ﺧﺎﺗﺔ ﻳﺪﻱ ﻓﻲ ﻗﻠﺒﻲ ﻣﻨﺘﻈﺮﺓ
ﻳﺠﻴﺒﻮﺍ ﺻﻮﺍﻧﻲ ﺍﻟﺮﺟﺎﻝ ..ﻭﻟﻤﺎ ﺟﺎﺑﻮﻫﺎ ﻭﻟﻘﻴﺘﻬﺎ ﻓﺎﺿﻴﺔ ﺣﺘﻰ ﺍﺗﻨﻔﺴﺖ ...
ﺧﺎﻟﺘﻮ ﻋﻠﻮﻳﺔ ﺗﻀﺤﻚ ﻗﺎﻟﺖ ﻟﻲ ( ﻣﺎ ﺷﺎﺀ ﺍﻟﻠﻪ ﻋﺠﺒﺘﻬﻢ ﻗﺸﻮﺍ ﺍﻟﺼﻴﻨﻴﺔ
ﻗﺶ ...ﺑﺨﺘﻮﺍ ﺭﺍﺟﻠﻚ ﻳﺪﻙ ﻃﺎﻋﻤﺔ ...) ..
ﺍﻟﺼﺒﺎﺡ ﻟﻤﺎ ﻋﻤﺮ ﻭﺷﻴﺦ ﺍﻟﻄﺎﻫﺮ ﺟﻮﺍ ﻳﺼﺒﺤﻮﺍ ﻋﻠﻴﻨﺎ ﻋﻤﺮ ﻗﺎﻝ ﻟﺨﺎﻟﺘﻮ
ﻋﻠﻮﻳﺔ ( ﺍﻣﺲ ﺍﻟﻌﺸﺎﺀ ﻛﺎﻥ ﻏﺮﻳﺐ ﻛﺪﺓ .. ﻣﺎ ﺯﻱ ﻃﺒﻴﺨﻚ ﺍﻟﺠﻤﻴﻞ
ﺍﻟﻤﺘﻌﻮﺩﻳﻦ ﻋﻠﻴﻪ ...) ﺷﻨﻮﻭﻭﻭﻭ؟؟؟
ﺍﻧﺎ ﻧﻄﺘﺖ ﻋﻴﻮﻧﻲ ﻭ ﻋﺎﻳﻨﺖ ﻟﻴﻪ ...ﻛﺎﻥ ﻣﺒﺘﺴﻢ ﻭﺑﻌﺎﻳﻦ ﻟﻲ ...ﺧﺎﻟﺘﻮ
ﻋﻠﻮﻳﺔ ﺿﺤﻜﺖ ﻭﻗﺎﻟﺖ ﻟﻲ ( ﻫﻮ ﻋﺎﺍﺍﺭﻓﻚ ﻋﻤﻠﺘﻴﻪ ﺍﻧﺘﻲ ...ﻛﻠﻤﻨﺎﻩ ...ﺑﺲ
ﺑﺪﻭﺭ ﻳﻜﺎﻭﻳﻚ ...ﻋﺸﺎﻥ ﺑﺮﻳﺪﻙ ... ﻗﺎﻟﻮﺍ ﺍﻟﺒﺮﻳﺪ ﺑﻜﺎﻭﻱ ... ) ﺩﺓ ﻛﻼﻡ ﺷﻨﻮ
ﺩﺓ ؟؟؟
ﻗﻠﺒﻲ ﺷﺤﺤﺢ ﻭ ﻗﺎﻡ ﻳﻀﺮﺏ ... ﻭﻋﺎﻳﻨﺖ ﻟﻲ ﻋﻤﺮ ﺗﺎﻧﻲ ...ﻟﺴﺔ ﺑﻌﺎﻳﻦ
ﺑﺎﺑﺘﺴﺎﻣﺔ ﻭ ﻧﻈﺮﺓ ﻛﺪﺓ ﺧﻠﺘﻨﻲ ﺍﺭﺗﺒﻚ ... ﻭ ﺩﻧﻘﺮﺕ ﻭ ﻣﺎ ﻋﺮﻓﺖ ﺍﻗﻮﻝ
ﺷﻨﻮ ﻃﻮﺍﻟﻲ ﻣﺸﻴﺖ ﻣﻦ ﺟﻨﺒﻬﻢ ...
ﺳﺎﻣﻌﺔ ﺧﺎﻟﺘﻮ ﻋﻠﻮﻳﺔ ﺑﻮﺍﺭﻱ ﺗﻀﺤﻚ ﻭﻗﺎﻟﺖ ﻟﻴﻪ ( ﻳﺤﻠﻴﻠﻬﺎ ﺑﺘﺨﺠﻞ ﻣﻨﻚ
... ﻳﺎﻫﻮ ﺫﺍﺗﻪ ﻋﺸﺎﻥ ﺑﺘﺮﻳﺪﻙ ...) ﺍﻧﺎ ﻗﺮﺑﺖ ﺍﻗﻮﻡ ﺍﺟﺮﻱ ...
ﺧﺎﻟﺘﻮ ﻋﻠﻮﻳﺔ ﺩﻱ ﻣﺎﻟﻬﺎ ﺍﻟﻠﻴﻠﺔ ... ﺗﻘﻮﻝ ﻟﻴﻪ ﻋﺸﺎﻥ ﺑﺘﺮﻳﺪﻙ ؟؟؟ ﺍﺭﻳﺪ ﻟﻴﻪ
ﺷﻨﻮ ؟؟؟ ﻣﺸﻴﺖ ﺩﺧﻠﺖ ﺍﻻﻭﺿﺔ ﻭ ﻗﻌﺪﺕ ﻓﻲ ﺍﻟﺴﺮﻳﺮ ﻗﻠﺒﻲ ﻳﻀﺮﺏ
... ﻃﻴﺐ ﺣﺴﺔ ﻣﺎﻟﻚ ﻣﺮﺗﺒﻜﺔ ﻭﻗﻠﺒﻚ ﺑﻀﺮﺏ ؟؟؟ ﻋﺸﺎﻥ ﻣﺎ ﻣﺘﻌﻮﺩﺓ
ﻋﻠﻰ ﺣﺎﺟﺎﺕ ﺯﻱ ﺩﻱ ﻭﻛﻼﻡ ﺯﻱ ﺩﺓ ....
ﻳﻮﻣﻲ ﺩﺍﻙ ﻛﻠﻪ ﻣﺨﻲ ﺩﺍﻳﺮ ﻓﻲ ﺍﻟﻤﻮﺿﻮﻉ ﺩﺓ ...ﺑﻌﺪ ﺻﻼﺓ ﺍﻟﻀﻬﺮ
ﺧﺪﻳﺠﺔ ﺟﺎﺕ ﻗﺎﻟﺖ ﻟﻲ ( ﺭﺍﺟﻠﻚ ﺩﺍﻳﺮﻙ ...ﻭﺍﻗﻒ ﻟﻴﻚ ﺟﻤﺐ ﺑﺎﺏ ﺍﻟﺪﻳﻮﺍﻥ
... )
ﻗﻠﺒﻲ ﺗﺎﻧﻲ ﻗﺎﻡ ﻳﻀﺮﺏ ﺑﻌﺪ ﺭﻗﺖ ﺷﻮﻳﺔ ... ﻋﺎﻳﺰ ﺷﻨﻮ ﻳﺎ ﺭﺑﻲ ؟؟؟ ﻣﺎ
ﻗﺎﻋﺪ ﻳﺠﻴﻨﻲ ﻧﺺ ﺍﻟﻨﻬﺎﺭ ﻛﺪﺓ ... ﻣﺸﻴﺖ ﻋﻠﻴﻪ ... ﺍﺻﻼ ﺑﻘﻴﺖ ﻓﻲ ﺍﻟﺒﻴﺖ
ﺑﻠﺒﺲ ﺍﻟﺠﻼﻟﻴﺐ ﺍﻟﻄﻮﻳﻠﺔ ﺩﻱ ﻭﻣﻌﺎﻫﺎ ﻃﺮﺣﺔ ...ﺷﺎﻳﻔﺎﻩ ﻭﺍﻗﻒ ﺟﻨﺐ ﺍﻟﺒﺎﺏ
ﺍﻟﻔﺎﺻﻞ ﺍﻟﺪﻳﻮﺍﻥ ... ﻣﺸﻴﺖ ﻋﻠﻴﻪ ﻭﺍﻧﺎ ﺑﺤﺎﻭﻝ ﺑﻘﺪﺭ ﺍﻻﻣﻜﺎﻥ ﻣﺎ ﺍﻇﻬﺮ
ﺍﺿﻄﺮﺍﺑﻲ ... ﺡ ﻳﻘﻮﻝ ﺩﻱ ﺷﻨﻮ ﺍﻟﻤﺘﺨﻠﻔﺔ ﺩﻱ ... ﻳﻤﻜﻦ ﻫﻮ ﺍﻟﻬﻈﺎﺭ ﻓﻲ
ﺍﻟﺤﺎﺟﺎﺕ ﺩﻱ ﻋﻨﺪﻩ ﻋﺎﺩﻱ .. ﻟﻜﻦ ﺍﻧﺎ ﻣﺎ ﻣﺘﻌﻮﺩﺓ ﻋﻠﻰ ﻛﺪﺓ ...
ﻟﻤﺎ ﻭﺻﻠﺖ ﺟﻨﺒﻪ ﺳﺎﻗﻨﻲ ﻗﻌﺪﻧﺎ ﻓﻲ ﺍﻟﻜﺮﺍﺳﻲ ﺍﻟﺘﺤﺖ ﺍﻟﺸﺠﺮ ... ﻗﺎﻝ ﻟﻲ
( ﺍﻫﺎ ﺍﻟﻠﻴﻠﺔ ﻣﺎﻓﻲ ﺍﺑﺪﺍﻋﺎﺕ ﺗﺎﻧﻲ ؟؟ ﻣﺎﺡ ﺗﻌﺸﻴﻨﺎ ﻣﻦ ﻳﺪﻙ ...)
ﻭﺍﺍﻱ ﻣﺼﺮ ﻳﻔﺘﺢ ﺍﻟﻤﻮﺿﻮﻉ ﺗﺎﻧﻲ ..ﻗﻠﺖ ﻟﻴﻪ ( ﻣﺶ ﻗﻠﺖ ﻣﺎ ﻋﺠﺒﻚ ؟؟؟
ﺧﻼﺹ ﺗﺎﻧﻲ ﻣﺎﻓﻲ ﻟﻴﻚ ...)
ﻗﺎﻝ ﻟﻲ (ﻣﺶ ﺣﺎﺟﺔ ﻋﻠﻮﻳﺔ ﻭﺭﺗﻚ ﺍﻧﺎ ﻗﻠﺖ ﻛﺪﺓ ﻟﻴﻪ ؟؟؟ ) ﻭﺍﺍﻱ ...
ﺟﺎﺩﻱ ؟؟؟ ﺍﻧﺎ ﺑﺲ ﺩﻧﻘﺮﺕ ﺗﺎﻧﻲ ﻭﻣﺴﻜﻨﻲ ﺍﻻﺿﻄﺮﺍﺏ ...
ﻫﻮ ﺿﺤﻚ ﻭﻗﺎﻝ ﻟﻲ ( ﻋﻠﻰ ﺍﻱ ﺣﺎﻝ ﻣﺎ ﺍﻇﻦ ﺗﻜﻮﻧﻲ ﻓﺎﺿﻴﺔ ﺗﺎﻧﻲ ﻟﻄﺒﻴﺦ
..ﻋﺸﺎﻥ ﺡ ﺗﺸﺘﻐﻠﻲ ... )
ﺍﺳﺘﻐﺮﺑﺖ ﻭﺭﻓﻌﺖ ﺭﺍﺳﻲ ﺍﻋﺎﻳﻦ ﻟﻴﻪ ﻭﻗﻠﺖ ﻟﻴﻪ ( ﺍﺷﺘﻐﻞ ﺷﻨﻮ ؟؟؟ )
يتبع.....