ﻟﻤﺎ ﺻﺤﻴﺖ ﺗﺎﻧﻲ ﺻﺤﻴﺖ ﻋﻠﻰ ﺻﻮﺕ ﺍﺣﻤﺪ ﺍﻟﺼﻐﻴﺮ ... ﺍﺗﻠﻔﺖ ﻃﻮﺍﻟﻲ ﻋﻠﻰ ﻋﻤﺮ ... ﻛﺎﻥ ﺭﺍﻗﺪ ﻣﺘﻜﻞ ﻋﻠﻰ ﺍﻟﻜﺮﺳﻲ ﻭ ﻣﻐﻤﺾ ﻋﻴﻮﻧﻪ ... ﻳﻌﻨﻲ ﻧﺎﻡ !!!... ﻟﻜﻦ ﺍﻭﻝ ﻣﺎ ﺣﺲ ﺑﺤﺮﻛﺘﻲ ﻃﻮﺍﻟﻲ ﻓﺘﺢ ﻭ ﺍﺗﻠﻔﺖ ﻋﻠﻲ ... ﺳﺄﻟﻨﻲ ( ﻛﻴﻒ ؟؟؟ )
ﻗﻠﺖ ﻟﻴﻪ ( ﺍﻟﺤﻤﺪ ﻟﻠﻪ ... ) ﺍﻟﻌﺮﺑﻴﺔ ﻛﺎﻧﺖ ﻣﻘﺒﻠﺔ ﻋﻠﻰ ﺍﻟﺸﺮﻕ ... ﻭﻓﻲ ﺍﻻﻓﻖ ﺍﻟﺪﻧﻴﺎ ﺑﺪﺕ ﺗﻔﺘﺢ ... ﻣﻌﻨﺎﻫﺎ ﺍﻟﺸﻤﺲ ﺡ ﺗﺸﺮﻕ ﺑﻌﺪ ﺩﺓ ....
ﺍﺗﻠﻔﺖ ﻭﺭﺍﺀ ﻟﻘﻴﺖ ﺣﺎﺗﻢ ﻭ ﻣﺤﻤﺪ ﻧﺎﻳﻤﻴﻦ .... ﻧﺎﺩﻳﺔ ﻛﺎﻧﺖ ﺻﺎﺣﻴﺔ ﺗﺸﺮﺏ ﻓﻲ ﺍﺣﻤﺪ ﻣﻦ ﻗﺰﺍﺯﺓ ﺍﻟﻌﺼﻴﺮ ... ﺍﺑﺘﺴﻤﺖ ﻟﻲ ... ﻗﻠﺖ ﻟﻴﻬﺎ ( ﺻﺒﺎﺡ ﺍﻟﺨﻴﺮ ... ) ﻭﻋﺎﻳﻨﺖ ﻻﺣﻤﺪ ﻭﻗﻠﺖ ﻟﻴﻬﺎ ( ﺍﻥ ﺷﺎﺀ ﺍﻟﻠﻪ ﻣﺎ ﻋﺬﺑﻚ ؟؟؟ )
ﻗﺎﻟﺖ ﻟﻲ ( ﺑﺮﻱ ﻧﺎﺍﺍﻡ ... ﻫﺪﻱ ﺻﺤﻴﺘﻪ ... ﻭﺩﻳﻞ ﻧﺎﻣﻴﻦ ﻧﻮﻣﺔ ﺍﻟﻐﻮﻝ ﻛﻤﺎﻥ ) ﻭﺿﺤﻜﺖ ﻭ ﻫﻲ ﺑﺘﻌﺎﻳﻦ ﻟﺤﺎﺗﻢ ﻭﻣﺤﻤﺪ ...
ﺑﻌﺪ ﺩﺍﻙ ﺍﻟﻀﻮ ﺑﺪﺃ ﺑﻨﺘﺸﺮ ﺳﺮﻳﻊ ... ﻭﺍﻟﺪﻧﻴﺎ ﻓﺘﺤﺖ ... ﻋﻤﺮ ﻗﺎﻝ ( ﺑﻌﺪﻛﺪﺓ ﺍﺣﺴﻦ ﻧﺘﺤﺮﻙ ﻋﺸﺎﻥ ﻧﻜﺴﺐ ﺍﻟﻮﻗﺖ ... )
ﻧﺎﺩﻳﺔ ﺻﺤﺖ ﺣﺎﺗﻢ ..... ﻋﻤﺮ ﺷﻐﻞ ﺍﻟﻌﺮﺑﻴﺔ ﻟﻜﻦ ﻗﻌﺪﺕ ﺗﻌﻤﻞ ﻓﻲ ﺍﻟﺼﻮﺕ ﺍﻟﺒﺘﻌﻤﻠﻪ ﺍﻟﻌﺮﺑﻴﺔ ﻟﻤﺎ ﺗﻜﻮﻥ ﺍﻟﺒﻄﺎﺭﻳﺔ ﻧﺎﺯﻟﺔ .... ﺍﻧﺎ ﺧﺘﻴﺖ ﻳﺪﻱ ﻓﻲ ﻗﻠﺒﻲ ... ﻭﻗﻔﻬﺎ ﻭ ﺩﻭﺭ ﺗﺎﻧﻲ ﻋﻤﻠﺖ ﻧﻔﺲ ﺍﻟﺤﻜﺎﻳﺔ ... ﺍﻻ ﻓﻲ ﺍﻟﻤﺮﺓ ﺍﻟﺘﺎﻟﺘﺔ ﺣﺘﻰ ﺩﻭﺭﺕ ﻭﺍﻧﺎ ﺍﺗﻨﻔﺴﺖ ﺍﻟﺼﻌﺪﺍﺀ ... ﻭ ﺳﺎﻣﻌﺔ ﻧﺎﺩﻳﺔ ﺑﻮﺭﺍﺀ ﻗﺎﻟﺖ ( ﺍﻟﺤﻤﺪﻟﻠﻪ ... )
ﻋﻤﺮ ﺍﺗﺤﺮﻙ ﺑﺎﻟﻌﺮﺑﻴﺔ ﻟﻜﻦ ﺑﺮﺍﺣﺔ ﺷﺪﻳﺪ ... ﻟﻮ ﺯﻭﻝ ﻣﺎﺷﻲ ﺑﺮﺟﻠﻴﻪ ﻣﻤﻜﻦ ﻳﺴﺒﻘﻬﺎ ... ﻛﻨﺎ ﺍﻧﺎ ﻭﻧﺎﺩﻳﺔ ﻭﺣﺎﺗﻢ ﻣﺮﻛﺰﻳﻦ ﻧﻌﺎﻳﻦ ﻳﻤﻴﻦ ﺍﻟﻌﺮﺑﻴﺔ ﻋﺸﺎﻥ ﻧﺸﻮﻑ ﺷﺠﺮ ﺍﻟﻬﺸﺎﺏ ﺍﻟﻘﺎﻳﻢ ﺟﻨﺐ ﺣﻠﺘﻬﻢ .... ﻓﻲ ﺍﻟﻠﺤﻈﺎﺕ ﺩﻱ ﻣﺎ ﻛﺎﻥ ﻓﻲ ﺣﺎﺟﺔ ﺣﻮﻟﻨﺎ ﻏﻴﺮ ﺍﻟﻤﻮﻳﺔ ﺍﻟﺒﻨﻴﺔ ... ﻋﻠﻰ ﻣﺪ ﺍﻟﺒﺼﺮ ...
ﻣﺸﻴﻨﺎ ﻣﺴﺎﻓﺔ ﻗﺼﻴﺮﺓ ﻛﺪﺓ ﺍﻟﻌﺮﺑﻴﺔ ﺭﺗﺮﺗﺖ ﻭ ﺑﻄﻠﺖ ... ﻋﻤﺮ ﺣﺎﻭﻝ ﻓﻴﻬﺎ ﺗﺎﻧﻲ ﺯﻱ ﻗﺒﻴﻞ ﻛﻢ ﻣﺮﺓ ﺣﺘﻰ ﺍﺗﺤﺮﻛﺖ .... ﺍﻧﺎ ﺧﺎﺗﺔ ﻳﺪﻱ ﻓﻲ ﻗﻠﺒﻲ ... ﻣﺸﻴﻨﺎ ﺗﺎﻧﻲ ﺑﻨﻔﺲ ﺍﻟﺴﺮﻋﺔ ﺍﻟﺒﻄﻴﺌﺔ ... ﺍﻧﺎ ﻣﺮﻛﺰﺓ ﺍﻋﺎﻳﻦ ﺑﺎﻟﺸﺒﺎﻙ ﺍﻟﺠﻨﺒﻲ ﻟﻤﺎ ﺣﺴﻴﺖ ﻋﻴﻮﻧﻲ ﺣﺮﻗﺘﻨﻲ ....
ﻭﻓﺠﺄﺓ ﻣﻦ ﺍﻟﻌﺪﻡ ﺷﻔﺖ ﺣﺎﺟﺎﺕ ﺳﻮﺩﺍﺀ ﻣﻦ ﺑﻌﻴﺪ ... ﺷﺠﺮ ... ﻓﻲ ﻧﻔﺲ ﺍﻟﻠﺤﻈﺔ ﺣﺎﺗﻢ ﻛﻮﺭﻙ ﺑﺎﻧﻔﻌﺎﻝ ( ﻳﺎﻫﻮ ﺩﻳﻚ ﻟﻴﻬﻦ ﺍﻟﻬﺸﺎﺑﺎﺕ ... )
ﻭ ﻓﺠﺄﺓ ﻋﻢ ﺍﻟﻌﺮﺑﻴﺔ ﻧﻮﻉ ﻣﻦ ﺍﻻﻧﻔﻌﺎﻝ ﻭ ﺍﻟﻔﺮﺣﺔ ﻛﺪﺓ .... ﺣﺘﻰ ﺍﻻﻃﻔﺎﻝ ﻣﻌﺎﻧﺎ .... ﺣﺎﺗﻢ ﻗﺎﻝ ( ﺍﻟﺸﺎﺭﻉ ﺍﻟﺒﻮﺩﻱ ﻟﻠﺤﻠﺔ ﺑﺲ ﻗﺼﺎﺩ ﺍﻟﻬﺸﺎﺑﺎﺕ ﺩﻳﻞ .... )
ﻋﻤﺮ ﻛﺎﻥ ﻟﺴﺔ ﻣﺎﺷﻲ ﺑﻨﻔﺲ ﺳﺮﻋﺘﻪ ﺍﻟﺒﻄﻴﺌﺔ ﻭ ﻟﻤﺎ ﻗﺮﺑﻨﺎ ﺧﻼﺹ ﻧﻘﺎﺻﺪ ﺍﻟﺸﺠﺮ ﺍﻟﻌﺮﺑﻴﺔ ﺗﺎﻧﻲ ﺑﻄﻠﺖ ... ﻋﻤﺮ ﺗﺎﻧﻲ ﺣﺎﻭﻝ ﻛﻢ ﻣﺮﺓ ﻳﻘﻮﻣﻬﺎ ﻣﻦ ﻏﻴﺮ ﻓﺎﺋﺪﺓ ...
ﻓﻲ ﺍﻻﺧﺮ ﺑﻄﻠﻬﺎ ﻭ ﻃﻠﻊ ﺍﻟﻤﻔﺘﺎﺡ ﻭﻗﺎﻝ ( ﻣﺎ ﺡ ﻧﻀﻴﻊ ﻭﻗﺘﻨﺎ ﻓﻴﻬﺎ ... ﺍﺣﺴﻦ ﻧﻨﺰﻝ ﺑﺮﺟﻠﻴﻨﺎ .... ﺍﺻﻼ ﻣﺎ ﺡ ﺍﻗﺪﺭ ﺍﻧﺰﻝ ﺑﻴﻬﺎ ﻣﻦ ﺍﻟﺮﺩﻣﻴﺔ ... ﺍﺻﻼ ﻛﺪﺓ ﻛﺪﺓ ﻛﻨﺎ ﺡ ﻧﻘﺎﺻﺪ ﺍﻟﺸﺠﺮ ﻭﻧﻨﺰﻝ ﻧﻮﺍﺻﻞ ﺑﺮﺟﻠﻴﻨﺎ ... )
ﻋﻤﺮ ﻃﻠﺐ ﻣﻦ ﺣﺎﺗﻢ ﻳﻤﺪ ﻟﻴﻪ ﺷﻨﻄﺘﻪ ﻣﻦ ﺍﻟﻜﺮﺍﺳﻲ ﺍﻟﻮﺭﺍﺀ ... ﻛﺎﻧﺖ ﺷﻨﻄﺔ ﺿﻬﺮ .. ﺍﺩﺍﻫﺎ ﻟﻴﻪ ﻭﻋﻤﺮ ﻟﺒﺴﻬﺎ ﻓﻲ ﻇﻬﺮﻩ ... ﻭﻓﺘﺢ ﺍﻟﺒﺎﺏ ﺍﻟﺠﻨﺒﻪ ﻭﻧﺰﻝ ﺑﺮﺍﺣﺔ ... ﺟﺎﺀ ﻻﻓﻲ ﺑﻘﺪﺍﻡ ﺍﻟﻌﺮﺑﻴﺔ ﻭﻓﺘﺢ ﻟﻲ ﺍﻟﺒﺎﺏ ... ﺍﻟﻤﻮﻳﺔ ﻛﺎﻧﺖ ﻭﺍﺻﻠﺔ ﻟﻴﻪ ﻟﻐﺎﻳﺔ ﻧﺺ ﺳﺎﻗﻪ ... ﻃﺒﻌﺎ ﺍﻧﺎ ﺍﻗﺼﺮ ﻣﻨﻪ ﻛﺘﻴﺮ ... ﻣﺎ ﺍﻗﻮﻡ ﺑﺲ ﺍﻏﻄﺲ ﻓﻲ ﺍﻟﻤﻮﻳﺔ ﺩﻱ ... ﻛﻨﺖ ﻻﺑﺴﺔ ﺟﺰﻣﺔ .. ﻗﻠﺖ ﺍﻟﻤﻮﻳﺔ ﺡ ﺗﺒﻮﻇﻬﺎ ﻟﻲ .. ﻋﻨﺪﻱ ﺷﺒﺸﺐ ﻓﻲ ﺍﻟﺸﻨﻄﺔ ﻃﻠﻌﺘﻪ .. ﻋﻤﺮ ﻃﻮﺍﻟﻲ ﻗﺎﻝ ﻟﻲ ( ﻣﺎ ﺗﻠﺒﺴﻲ ﺍﻟﺸﺒﺸﺐ .. ﺍﺣﺴﻦ ﺧﻠﻴﻚ ﺑﺎﻟﺠﺰﻣﺔ .. ﺍﺳﻠﻢ ﻋﺸﺎﻥ ﻣﺎ ﺗﺘﺠﺮﺣﻲ ﻭﻻ ﺷﻲ ) ...
ﺩﺧﻠﺖ ﺷﺒﺸﺒﻲ ﺗﺎﻧﻲ ﻓﻲ ﺍﻟﺸﻨﻄﺔ ... ﻭ ﻋﻠﻘﺘﻬﺎ ﻓﻲ ﺭﻗﺒﺘﻲ ﻭ ﻧﺰﻟﺖ ﺑﺮﺍﺣﺔ ... ﺍﻟﻤﻮﻳﺔ ﺟﺎﺗﻨﻲ ﻓﻮﻕ ﺭﻛﺒﺘﻲ ﺗﻘﺮﻳﺒﺎ ... ﺑﻮﺭﺍﺀ ﺣﺎﺗﻢ ﻧﺰﻝ ﻭ ﻭﺳﺎﻋﺪ ﻧﺎﺩﻳﺔ ﻭ ﺍﻟﻌﻴﺎﻝ ﻋﺸﺎﻥ ﻳﻨﺰﻟﻮﺍ ...
ﻧﺎﺩﻳﺔ ﺷﺎﻟﺖ ﺍﻟﻜﻴﺲ ﺍﻟﻔﻴﻪ ﺣﺎﺟﺎﺗﻬﻢ ﺍﻻﺷﺘﺮﻭﻫﺎ ... ﺍﻻﺗﻨﻴﻦ ﺍﻟﻤﻮﻳﺔ ﻭﺍﺻﻠﺔ ﻟﻴﻬﻢ ﻓﻲ ﺭﻛﺒﺘﻬﻢ ﺯﻱ ... ﻋﻤﺮ ﻗﻔﻞ ﺍﻟﻌﺮﺑﻴﺔ ﻭﺍﻣﻨﻬﺎ ﻭﺑﻘﻴﻨﺎ ﻭﺍﻗﻔﻴﻦ ﻓﻲ ﺣﺎﻓﺔ ﺍﻟﺮﺩﻣﻴﺔ ...
ﻋﻤﺮ ﻗﻌﺪ ﺍﺗﻠﻔﺖ ﻭ ﺷﺎﻝ ﻟﻴﻪ ﻓﺮﻉ ﺷﺠﺮﺓ ﻃﻮﻳﻞ ﻣﻦ ﺍﻟﺠﺮﻓﺘﻬﻢ ﺍﻟﻤﻮﻳﺔ .. ﻭ ﺑﻘﻰ ﻳﺘﺤﺴﺲ ﺑﻴﻪ ﺍﻟﻤﻨﻄﻘﺔ ﺍﻟﺒﻌﺪ ﺍﻟﺮﺩﻣﻴﺔ ﻃﻮﺍﻟﻲ ... ﺑﻌﺪﻳﻦ ﺍﺗﻠﻔﺖ ﻋﻠﻴﻨﺎ ﻭﻗﺎﻝ ( ﺍﻟﺮﺩﻣﻴﺔ ﻋﺎﻟﻴﺔ ﺍﻟﻨﺰﻟﺔ ﻣﻨﻬﺎ ﺻﻌﺒﺔ .... ... )
ﺛﺒﺖ ﺍﻟﻌﺼﺎﻳﺔ ﺍﻟﺸﺎﻳﻠﻬﺎ ﻭ ﻧﺰﻝ ﺑﺮﺍﺣﺔ ﻣﻦ ﺍﻟﺮﺩﻣﻴﺔ ... ﺍﻟﻤﻮﻳﺔ ﻭﺻﻠﺖ ﻟﻴﻪ ﻟﻐﺎﻳﺔ ﺭﻛﺒﺘﻪ ... ﺑﺮﺿﻪ ﻏﺎﻳﺘﻮ ﻣﺎ ﻏﺮﻳﻘﺔ ﺷﺪﻳﺪ ... ﺑﻌﺪﻩ ﺣﺎﺗﻢ ﻧﺰﻝ ﻭ ﺳﺎﻋﺪﻭﺍ ﻧﺎﺩﻳﺔ ﻭﺍﻟﻌﻴﺎﻝ ﻳﻨﺰﻟﻮﺍ ﻫﻢ ﺫﺍﺗﻬﻢ ... ﻓﻀﻠﺖ ﺍﻧﺎ ﻓﻮﻕ ﺍﻟﺮﺩﻣﻴﺔ ...
ﻋﻤﺮ ﻣﺪ ﻟﻲ ﻳﺪﻩ ... ﻋﺎﻳﻨﺖ ﻟﻴﻬﺎ ﻟﺤﻈﺎﺕ ﺑﺘﺮﺩﺩ ... ﻋﺎﺭﻓﺔ ﻧﻔﺴﻲ ﻣﺎ ﺡ ﺍﻗﺪﺭ ﺍﻧﺰﻝ ﻟﻮ ﻣﺎ ﻣﺴﻜﺖ ﻓﻴﻪ ... ﺑﻌﺪﻳﻦ ﻟﻮ ﺍﺑﻴﺖ ﺍﻣﺴﻚ ﻳﺪﻩ ﻧﺎﺱ ﻧﺎﺩﻳﺔ ﺡ ﻳﻘﻮﻟﻮﺍ ﺷﻨﻮ ﻭﺍﻧﺎ ﻓﻲ ﻧﻈﺮﻫﻢ ﺯﻭﺟﺘﻪ ؟؟؟
ﻣﺪﻳﺖ ﻟﻴﻪ ﻳﺪﻱ ﻭﻣﺴﻜﻬﺎ .... ﺭﻏﻢ ﺍﻟﺤﺎﻟﺔ ﻭ ﺍﻟﻤﻮﻗﻒ ﺍﻟﻜﻨﺖ ﻓﻴﻪ .. ﻭﺍﻟﻤﺎ ﻣﻔﺮﻭﺽ ﻳﺨﻠﻴﻨﻲ ﺍﻧﺘﺒﻪ ﻟﺤﺎﺟﺔ ﺯﻱ ... ﻟﻜﻦ ﺍﺍﺣﺴﺎﺱ ﻳﺪﻱ ﻓﻲ ﻳﺪﻩ ﺍﻟﺪﺍﻓﻴﺔ ﺍﻟﻜﺒﻴﺮﺓ ﻛﺎﻥ ﻏﺮﻳﺐ ... ﻭ ﺣﺴﻴﺖ ﺯﻱ ﺍﻟﻤﺸﺖ ﻓﻲ ﺟﺴﻤﻲ ﻛﻬﺮﺑﺎﺀ ... ﻭﻋﺸﺎﻥ ﺍﺗﺨﻠﺺ ﻣﻦ ﺍﻟﻤﻮﻗﻒ ﺩﺓ ﺣﺎﻭﻟﺖ ﺍﻧﺰﻝ ﺑﺴﺮﻋﺔ ﻣﻦ ﺍﻟﺮﺩﻣﻴﺔ ﻋﺸﺎﻥ ﺍﻓﻚ ﻳﺪﻱ ﺑﺴﺮﻋﺔ ... ﻭﺩﻱ ﻛﺎﻧﺖ ﻏﻠﻄﺔ ... ﻻﻧﻲ ﺍﺗﺰﺣﻠﻘﺖ ﻭﻭﻗﻌﺖ ﻋﻠﻰ ﻋﻤﺮ ... ﻫﻮ ﻣﺪ ﻳﺪﻩ ﺍﻟﺘﺎﻧﻴﺔ ﺳﺮﻳﻊ ﻭﻣﺴﻜﻨﻲ ﺑﻴﻬﺎ ﻋﻠﻴﻪ ... ﻟﻮ ﻣﺎ ﺍﻟﻠﻪ ﺳﺘﺮ ﻛﻨﺎ ﺡ ﻧﻘﻊ ﺍﻻﺗﻨﻴﻦ ﻓﻲ ﺍﻟﻤﻮﻳﺔ ...
ﺯﺣﻴﺖ ﻣﻦ ﻋﻤﺮ ﺳﺮﻳﻊ ... ﻟﻜﻦ ﻓﻲ ﺍﻟﻠﺤﻈﺎﺕ ﺩﻳﻚ ﻛﻨﺖ ﻗﺮﻳﺒﺔ ﻟﻴﻪ ﺷﺪﻳﺪ ﻟﺪﺭﺟﺔ ﺣﺴﻴﺖ ﺑﻀﺮﺑﺎﺕ ﻗﻠﺒﻪ ﺗﺤﺖ ﻳﺪﻱ .. ﻭﺍﺳﺘﻨﺸﻘﺖ ﺭﻳﺤﺔ ﻋﻄﺮﻩ ﺍﻟﺨﻔﻴﻔﺔ ... ﺣﺴﻴﺖ ﺑﻨﻔﺴﻲ ﺯﻱ ﺍﻟﺮﺍﺳﻲ ﻟﻒ ﻭ ﺍﺗﺮﻧﺤﺖ ... ﻋﻤﺮ ﻟﺴﺔ ﻣﺎﺳﻜﻨﻲ ﺑﻴﺪ ﻭﺍﺣﺪﺓ ﻟﻐﺎﻳﺔ ﻣﺎ ﺍﺗﺎﻛﺪ ﺍﻧﻲ ﺧﻼﺹ ﺛﺒﺖ ...
ﺍﻧﺎ ﺑﺲ ﻣﺪﻧﻘﺮﺓ ﻭ ﻋﻠﻲ ﺣﺎﻟﺔ ﺷﺪﻳﺪﺓ ﻣﻦ ﺍﻟﺨﺠﻞ ﻭ ﺍﻻﺭﺗﺒﺎﻙ ... ﺣﺴﺔ ﻣﻤﻜﻦ ﻳﻘﻮﻝ ﺍﻧﺎ ﻗﺎﺻﺪﺓ ﺍﻧﻲ ﺍﻗﻊ ﻓﻴﻪ !!!!... ﺗﻠﻘﻰ ﺑﻀﺤﻚ ﻋﻠﻲ ... ﻭﺭﻏﻤﺎ ﻋﻨﻲ ﺭﻓﻌﺖ ﻋﻴﻮﻧﻲ ﺍﻋﺎﻳﻦ ﻟﻴﻪ ... ﻟﻜﻦ ﻣﺎ ﻛﺎﻥ ﺑﻀﺤﻚ ﻭﻻ ﺣﺘﻰ ﻣﺒﺘﺴﻢ ... ﻛﺎﻥ ﺑﻌﺎﻳﻦ ﻓﻲ ﻭﺷﻲ ﻭﻫﻮ ﺳﺎﻛﺖ ... ﻟﻤﺎ ﺷﺎﻓﻨﻲ ﻋﺎﻳﻨﺖ ﻟﻴﻪ ﻗﺎﻝ ﻟﻲ ( ﺗﻤﺎﻡ ؟؟؟ .. )
ﻫﺰﻳﺖ ﺭﺍﺳﻲ ﺑﺎﻻﻳﺠﺎﺏ ... ﺯﺡ ﻳﺪﻩ ﻣﻨﻲ ... ﻭﺷﺎﻝ ﻣﺤﻤﺪ ﻣﻦ ﺣﺎﺗﻢ ... ﻭﻗﺎﻝ ﻟﺤﺎﺗﻢ ﻳﺸﻴﻞ ﺍﺣﻤﺪ ﻣﻦ ﻧﺎﺩﻳﺔ ...
ﻋﻤﺮ ﻗﺎﻝ ﻟﻴﻨﺎ ( ﺡ ﻧﻤﺸﻲ ﻓﻲ ﺻﻒ ﺍﻧﺎ ﺡ ﺍﻣﺸﻲ ﻗﺪﺍﻡ ﻭﺍﻧﺘﻮ ﺍﻣﺸﻮﺍ ﻭﺭﺍﻱ ﻃﻮﺍﻟﻲ ﻓﻲ ﻧﻔﺲ ﺧﻄﻮﺍﺗﻲ .... ﻣﺎ ﺗﻠﻔﻮﺍ ﻣﻨﻬﺎ ﺟﺎﻱ ﻭﻻ ﺟﺎﻱ ) ﻭﻣﺪ ﻟﻲ ﻳﺪﻩ ﻗﺎﻝ ﻟﻲ ( ﺗﻌﺎﻟﻲ ﻭﺭﺍﻱ ... )
ﻭﺑﻘﻴﻨﺎ ﻣﺎﺷﻴﻦ ﻛﺪﺓ ... ﻋﻤﺮ ﺷﺎﻳﻞ ﻣﺤﻤﺪ ﻭ ﺑﺘﺤﺴﺲ ﺍﻻﺭﺽ ﻗﺪﺍﻣﻪ ﺑﻔﺮﻉ ﺍﻟﺸﺠﺮﺓ ﺍﻟﻄﻮﻳﻞ ﻭ ﻳﺘﺄﻛﺪ ﺍﻧﻪ ﻣﺎﻓﻲ ﺣﻔﺮﺓ ﻭﻻ ﺷﻲ ... ﻭ ﺍﻧﺎ ﻣﺎﺷﺔ ﻭﺭﺍﻩ ... ﺑﻌﺪﻱ ﺣﺎﺗﻢ ﺷﺎﻳﻞ ﺍﺣﻤﺪ ﻭﺑﻌﺪﻩ ﺍﺧﺮ ﺷﻲ ﻧﺎﺩﻳﺔ ... ﻣﺘﺠﻬﻴﻦ ﻋﻠﻰ ﻣﺠﻤﻮﻋﺔ ﺷﺠﺮ ﺍﻟﻬﺸﺎﺏ ﺍﻟﻈﺎﻫﺮﺓ ﻟﻴﻨﺎ ﻣﻦ ﺑﻌﻴﺪ ... ﻭﺍﻟﺒﻌﺪﻫﺎ ﻃﻮﺍﻟﻲ ﺣﻠﺔ ﻗﻮﺯ ﺍﻟﻬﺸﺎﺏ ....
ﻛﻨﺎ ﻣﺎﺷﻴﻦ ﺑﺼﻌﻮﺑﺔ ﻭ ﺑﺒﻂﺀ ﺧﺎﻳﻀﻴﻦ ﺍﻟﻤﻮﻳﺔ ... ﺍﻟﺸﻤﺲ ﻛﺎﻧﺖ ﺷﺮﻗﺖ .. ﻭﺭﻏﻢ ﺍﻧﻪ ﺍﻟﻮﻗﺖ ﻛﺎﻥ ﺑﺪﺭﻱ ﻟﻜﻦ ﻛﺎﻧﺖ ﻓﻲ ﺳﺨﻮﻧﺔ ﻭﻛﺘﻤﺔ ﻭﺭﻃﻮﺑﺔ ﻓﻲ ﺍﻟﻤﻜﺎﻥ ... ﺑﺴﺒﺐ ﺍﻟﻤﻮﻳﺔ ﺍﻟﻜﺘﻴﺮﺓ ﺍﻟﺤﻮﻟﻨﺎ ... ﺷﻌﺮﺕ ﺑﻌﺮﻗﻲ ﺳﺎﻳﻞ ... ﻭ ﺷﻌﺮﺕ ﺑﻌﻀﻼﺕ ﺭﺟﻠﻲ ﺑﺪﺕ ﺗﺘﻌﺐ ﻣﻦ ﺍﻟﺨﻮﺽ ﻓﻲ ﺍﻟﻤﻮﻳﺔ .... ﻟﻜﻦ ﻃﻠﻌﺖ ﺍﻱ ﺍﺣﺴﺎﺱ ﻣﻦ ﺭﺍﺳﻲ ﻭ ﺭﻛﺰﺕ ﻋﻴﻮﻧﻲ ﺑﺲ ﻋﻠﻰ ﻋﻤﺮ ...
ﻋﻴﻨﻲ ﻣﺎ ﺑﺘﺰﺡ ﺟﺎﻱ ﻭﻻ ﺟﺎﻱ ﻣﻦ ﺍﻟﻔﻨﻴﻠﺔ ﺍﻟﺰﺭﻗﺎﺀ ﻭ ﺑﻨﻄﻠﻮﻥ ﺍﻟﺠﻴﻨﺰ ﺍﻟﻘﺪﺍﻣﻲ ﺩﻳﻞ ... ﻓﻲ ﺍﻟﻠﺤﻈﺔ ﺩﻳﻚ ﻛﺎﻧﻮﺍ ﺑﺎﻟﻨﺴﺒﺔ ﻟﻲ ﺯﻱ ﺍﻟﻤﻨﺎﺭﺓ ﻟﻠﺴﻔﻴﻨﺔ ﺍﻟﻔﻲ ﺑﺤﺮ ﻫﺎﺋﺞ ... ﺯﻱ ﺑﺮ ﺍﻻﻣﺎﻥ ... ﻭﺍﺗﺬﻛﺮﺕ ﻟﻤﺎ ﺻﺤﻴﺖ ﺑﺎﻟﻠﻴﻞ ﺧﺎﻳﻔﺔ ﻭﻣﺨﻠﻮﻋﺔ ﻓﻲ ﺍﻟﻌﺮﺑﻴﺔ ... ﻛﻠﻤﺎﺗﻪ ﻟﻲ ﺍﻟﻬﺪﺗﻨﻲ ﻭ ﻃﻤﻨﺘﻨﻲ ﻭﺭﺟﻌﺖ ﻧﻤﺖ ...
ﺑﺎﻟﻠﻪ ﻛﻴﻒ ﻓﻲ ﻓﺘﺮﺓ ﺳﺎﻋﺎﺕ ﻋﻤﺮ ﺍﻻﻭﻝ ﻣﺮﺓ ﺍﻻﻗﻴﻪ ﻓﻲ ﺣﻴﺎﺗﻲ .. ﻭﺍﻟﻜﻨﺖ ﻗﺒﻴﻞ ﺧﺎﻳﻔﺔ ﻣﻨﻪ ... ﻭﻣﻔﺘﻜﺮﺓ ﺍﻧﻪ ﺷﺎﺏ ﻣﻦ ﺍﻳﺎﻫﻢ ﺑﺘﺎﻉ ﺿﺤﻚ ﻭﺑﺲ ... ﻛﻴﻒ ﻓﻲ ﻓﺘﺮﺓ ﺍﻟﺴﺎﻋﺎﺕ ﺩﻱ ﻫﻮ ﺑﻘﻰ ﺭﻣﺰ ﺍﻻﻣﺎﻥ ﺍﻟﻮﺣﻴﺪ ﻓﻲ ﺣﻴﺎﺗﻲ ﺑﻌﺪ ﺍﻟﻠﻪ ﺳﺒﺤﺎﻧﻪ ﻭﺗﻌﺎﻟﻰ ...
ﻭﺍﺧﻴﺮﺍ ﻭﺻﻠﻨﺎ ﺣﺎﻓﺔ ﻣﺠﻤﻮﻋﺔ ﺍﻻﺷﺠﺎﺭ ... ﺣﺎﺗﻢ ﻗﺎﻝ ( ﺍﻭﻝ ﻣﺎ ﻧﻄﻠﻊ ﻣﻦ ﺍﻟﺸﺠﺮ ﺩﺓ ﺑﻨﺸﻮﻑ ﺍﻟﺤﻠﺔ ... )
ﻭﺩﺧﻠﻨﺎ ﻭﺳﻂ ﻣﺠﻤﻮﻋﺔ ﺍﻟﺸﺠﺮ .. ﺍﺭﺗﻔﺎﻉ ﺍﻟﻤﻮﻳﺔ ﺑﺪﺍ ﻳﻘﻞ ﻛﻞ ﻣﺎ ﻟﻴﻪ .. ﻭ ﺍﻟﻤﺸﻲ ﺑﻘﻰ ﺳﺎﻫﻞ ... ﻭ ﺳﺮﻋﺘﻨﺎ ﻓﻲ ﺍﻟﻤﺸﻲ ﺑﻘﺖ ﺍﻛﺘﺮ ... ﻭﻃﻠﻌﻨﺎ ﻣﻦ ﻭﺳﻂ ﺍﻟﺸﺠﺮ ...
ﻭﻗﺪﺍﻣﻨﺎ ﻛﺎﻧﺖ ﻗﺮﻳﺔ ﻗﻮﺯ ﺍﻟﻬﺸﺎﺏ ....
يتبع.....