(Kyshie's POV)
"Mall?!"
Pagkatapos ng serimonya, nananghalian na kami sa canteen. 'Yun nga lang, minadali kami ni Ms. Stones sa pagkain dahil kailangan niya raw kaming kausapin. Nagkagulatan kami ng limang lalaki na makakasama namin sa Grand GES nang magkita kami sa harap ng opisina ni Ms. Stones. Ngunit, may mas nakakagulat pa palang utos ang principal sa'min.
"Oo, sa mall. Sabi ni Mr. Oh na samahan niyo ang mga bagong estudyante sa mall para mamili ng damit." ulit ni Ms. Stones kay Thristan na hindi sinasadyang magtaas ng boses sa opisina. Natameme kaming lahat sa pagbanggit ng pangalan ni Mr. Oh, patango-tango nalang sa mga paalala ng principal. Pagbigay niya ng pera sa amin, pinaalis niya na kami ng Light and Shadow High.
"Bakit ako nasasabik pumunta sa err... mall." nakangiting sabi ni Xapp. Kahit naman ako nasasabik din kasi wala pa saming nakapunta roon. Bigla nalang napuno ang imahinasyon ko ng maraming lollipop sa mall habang sumasakay na kami ng school bus. Hindi ko na napansin na nagpares na yung mga pinsan ko sa pag-upo namin.
"Mga traydor kayo." mapait kong bulong nung pagdaan ko sa kanila. Tinawanan lang nila ako kaya umupo nalang ako sa tabi ng lalaking may itim na buhok at brown na mga mata. Hindi kami nagkikibuan dahil syempre, nahihiya. Nang lumipas ang kakaunting segundo, napangisi ako sa sarili ko dahil naisip kong takutin 'tong katabi ko.
"Alam mong nababasa ko ang iniisip mo, diba?" sabi niya kahit nakatingin sa bintana at hindi sa'kin. Paulit-ulit nalang, napahiya ako at hindi nakasagot sa kanya. Paglingon niya, nginitian niya lang ako. "O sige, makikipagpalit ako, ha; para may matakot ka." maloko niyang binulong.
Pagtayo niya, doon ko lang naalala ang pangalan niya. Leon Deangelo.
"Boss Chance! Palit tayo! Tabi ako kay Nick!"
Chance?!
Nanlaki ang mga mata ko at saktong-sakto naman, paglingon ko, nakatayo na si Chance at nakatingin siya sa'kin. Umurong ako papunta sa tabi ng bintana bago siya umupo sa tabi ko. Buti nalang, wala siyang binanggit tungkol sa insidenteng nangyari sa canteen kaninang umaga. 'Di ko na kakayaning mapahiya pa ngayong araw.
Tahimik kaming bumyahe papuntang mall at sayang-saya naman ako makita ang nasa labas ng bintana. Bago palang kami dito eh; kumbaga, tour na namin 'to.
Sa pagtigil ng sasakyan, tumayo na kaming lahat para bumaba. Nabighani ako sa laki ng mall sa harap namin kaya naman hindi ko napansin na medyo mataas pala yung bababaan ko. Paglabas ko ng kanang paa ko, agad akong natapilok dahil wala pa palang sahig. Napatili ko, nakapikit ang mga mata ko. Inintay ko ang pagsemplang ko sa sahig ngunit may biglang kamay na inalalayan ako.
"Tsk."
Gulat na gulat kong tinignan si Chance bago ko inayos ang tayo ko. Tumango nalang ako bilang papasalamat sa kanya. Pagkatapos ng kahihiyan na nangyari (ulit), nakita kong ibinigay ni Nick ang kamay niya kay Xapphrina at inalalayan siyang bumaba. Napataas ako ng kilay, hinuhusgahan ang namumulang mga pisngi ni Xapphrina pagkatapos.
"Gentleman ka talaga, pre!" mapaglarong sabi ni Thristan kay Nick. Umirap nalang ako habang naglalakad kami papasok. Sa pagpasok namin, namangha ako sa dami ng tindahan sa mall. Nagtinginan kami ng mga pinsan ko sa tuwa bago kami sumunod sa mga lalaking kasama namin.
"Ngayon lang ba kayo nakapunta rito? Manghang-mangha kasi kayo." sambit ni Leon sa direksyon namin. "'Di kami taga-poblacion. Malapit kami sa bayan." sagot ni Xapphrina pabalik. Napataas siya ng kilay, naguluhan nang kaunti sa sinabi ni Xapp. "Edi san kayo nakatira?" diin niya.
"Sa bahay namin." maiksing sagot ni Callista, blanko ang mga mata. Napailing si Leon, hindi na tinuloy ang pagtatanong niya.
Dinala nila kami sa bilihan ng mga damit at nagliwanag ulit ang mga mata namin. Hinawakan ko ang malambot na tela, tuwang-tuwa dahil kakaiba siya kesa sa mga damit naming kupas na.
"'Pag magbabayad na kayo, lapitan niyo lang ako dahil nasakin yung pera." ulat ni Chance sa'min. Tumango lang kami bago kami tumingin ng mga damit.
Mabilisan kong hinablot ang mga coat, palda, at kung ano-ano pa. Masarap siguro magsuot ng mga ganito dahil hindi naman mainit dito sa Biringan dahil mataas ang lugar na 'to. Napangiti ako nang makita ko na magkakaiba kami ng mga damit na pinili. Komportable at maluwang ang mga kinuhang damit nila Josie at Xapp; si Luna naman ay mga skinny jeans at blouse; at kay Calli naman ay puro itim o puti.
"Bagay sa'yo 'yan!" narinig kong sabi ni Nick. Nakita kong sinamaan lang siya ng tingin ni Callista bago naglakad papalayo.
Pagkatapos naming magsukat at mamili, sama-sama na kaming nagbayad. Nag-abang ako sa likod ni Chance habang nagbabayad siya at parang nasagot ang lahat ng mga hiling ko nang makita ko na may pera pa siya sa bulsa niya. Tahimik at dahan-dahan kong sinungkit ang pera mula sa kanyang bulsa. "Makabili nga ng lollipop," naisip ko.
Tuwang-tuwa ako nang masungkit ko ang pera; pero naputol ang masasaya kong araw nang may humablot ng pera mula sa kamay ko.
"Hoy—!"
Bumusangot ako kay Thristan na may mapaglarong ngiti sa kanyang mga labi. Tinapik niya si Chance at ibinalik ang pera sa kanya. Mukhang hindi nagulat si Chance na nawalan siya ng pera; dahil tinignan niya ako at ngumisi.
Aba, gago 'to.
"Miryenda tayo! Tara sa food court!" masayang sabi ni Leon bago niya inakbayan si Nick at Christian. Sang-ayon naman ako na kumain kaya masaya akong naglakad kasama sila Xapphrina.
Sumakay kami ng escalator pababa at nalaglag ang panga ko sa laki at dami ng nagbebenta ng iba't ibang pagkain. "Wow!" ulat nila Luna at Xapphrina habang nagmamadali kaming puntahan ang sinasabi ni Leon na food court. Naglaway ako sa mga matatamis na pagkain kaya naman agad kong pinuntahan ang mga lollipop at iba pang candy. Takam na takam na ako nang malaman ko na wala nga pala akong pera.
"Chance!"
Napantingin siya sa'kin mula sa kabilang stall at inabutan ako ng pera kahit di pa 'ko nanghihingi. Sa bilis ng mga pangyayari, hindi na ako nakapagpasalamat nang maayos sa kanya. Nakita kong bumili silang lahat ng ice cream kaya ginaya ko nalang din sila. Nang makita ko na may cookies and cream, lalong kumulo ang tiyan ko. Tuwang-tuwa ako, bumibili ng ice cream sa isang baso.
"Ky, dito!" kaway sa'kin ni Luna. Nakaupo na silang lahat at ako nalang pala ang iniintay. Pag-upo ko, masaya ang lahat na kumakain ng ice cream; kahit si Callista na palaging nakaismid (lalong-lalo na 'pag may ibang tao) ay may maliit na ngiti sa mukha.
"Wala palang SEF dito 'no." panimula ni Thristan habang nagmamasid siya.
Strength, Endurance, and Fitness; SEF. Isa 'to sa mga strand ng Light and Shadow High. Nabasa ko sa binigay ni Ms. Stones na papel sa amin ang tungkol sa sistema ng pag-aaral doon at nalaman kong nahahati sa dalawang kategorya o track ang mga kapangyarihan ng mga estudyante. Ang unang kategorya ay ang Physical track kung saan nakadepende sa pangpisikal na katawan o elemento ang kapangyarihan ng isang tao. May dalawang strands ito at isa rito ang SEF kung saan ang kapangyarihan ay nakasalalay sa pisikal na kaunyaan ng katawan. Isang halimbawa ay ang super-strength.
"Ah, oo, apat na NEE lang nandito." sagot ni Leon, tinuturo sila Luna, Josie, Nick, at Christian gamit ang nguso niya.
Nature, Environment, and Elements; NEE. Ito ang isa pa sa mga strands ng Physical track at mapupunta ang isang nadaren o taong may kapangyarihan sa strand na ito kapag may kinalaman sa apat na elemento ang kapangyarihan nila.
"Tapos, anim na pala tayong nasa Non-physical track..." mapag-alam na sabi ni Xapphrina. Patuloy ang pagkain nila ng ice cream habang pinag-uusapan ang tungkol sa paaralan. Tinignan ko ang aking ice cream at nakitang lusaw na ito. Napapalakpak ako, sarap na sarap sa lusaw na ice cream. Mas gusto ko kasi pag ganun.
"Puro MCA naman kayo. Dalawa lang kaming MSP." ani ni Thristan, nakatingin kay Callista na kasama niya sa MSP strand.
Katulad ng physical track, may dalawang strands para sa non-physical track. Ang MCA o Mental Capacity and Application ang isa sa strands nito at ito ay para sa mga may kapangyarihan na may kinalaman sa utak, pangitain, o damdamin. Ang salitang, epekto, ang pinakaimportante sa strand na 'to dahil ang mga kapangyarihan dito ay nakakaapekto lamang ng utak, pangitain, o damdamin ng tao. Kapag MSP o Manipulation, Strategy, and Psychology naman, kontrol at kilos ang pinakaespesyal sa kanila. May kinalaman pa rin ang utak, pangitan, o damdamin dito kaya siya nahihiwalay sa pisikal.
"Marami na ba kaming 'di naabutan? Baka mahuli kami." mapag-alalang sabi ni Luna. Tumango si Josie sa sinabi niya at halata naman sa mukha ni Xapphrina na gusto niya rin malaman.
"Kakasimula palang din naming pumasok nung nakaraang dalawang linggo. Pero pag bago, syempre mahirap sa una." paliwanag ni Thristan. "Teka nga, tama na nga 'yang tungkol sa school." dagdag niya.
"Ikaw nagsimula ng usapang-school, 'tol." natatawang sabi ni Christian. Natawa kaming lahat, ubos na ang mga ice cream. Binuksan ko na ang isang lollipop na binili ko, agad-agad na sinubo ito.
"Uy, complementary colors yung buhok natin!" pangungulit ni Nick kay Callista. Tinitigan lang siya ni Callista kaya dire-diretsong sinalba siya ni Xapphrina. "Oo nga 'no!" pamamansin ni Xapp kay Nick. Nginitian ni Nick si Xapp bago sinabi na katerno naman ng buhok ni Xapp ang buhok ni Thristan.
Napansin kong nagsisimula na kaming mas maging komportable sa isa't isa. Nakaramdam ako ng labis na kasiyahan dahil dating nasa utak ko lang ang pagkakaroon namin ng iba pang kaibigan.
"Tara, punta tayo sa arcade!"