داز اسبوع على ابطالنا ميساء باقا فدار سمية و المختار هي و تواب ملي مشا غالي مبقات شافتو و كتحس براسها نيت مباغاش تشوفو كتحس بقلبها عامر من جيهتو اما ابتسام و ماجدة دارو بلاصتهم حتى هوما وحتى سمية ولفاتهم ابتسام نهار على نهار كتزيد تغرق فحب طه لي مغرقها حب و كلام زوين بطبيعة الحال علاقتهم لا تخلو من المضاربة و نكير اما شغف و سعد الدين رجعها الدار و عودات لأمينة كلشي لي قطعات ليها فقلبها و صبراتها مسكينة و داوات ليها جريحات ديال ضرب لي كانو فجسمها، شغف كتحاول تفاداه ما أمكن فحالا كرهاتو مبقاتش بغات تشوفو كاع ولا تهضر معاه من مورا داكشي لي دار ليها و فبالها فكرة وحدة هي انها خصها تهرب و تخرج من هاد الدار عاشت حياتها كاملة حرة مغتجيش حتى ليوم و تعيش مقيدة من طرف شخص مكيجيها حتى حاجة و مكتعرفوش.
.....................
نهار جديد و صباح جديد صباح ماشي فحال كاع صباحات بحكم صابحة فيه الحركة على غير العادة فالقصر الخدمات خارجين داخلين كيوجدو فالماكلة و كيقادو القصر خملوه كامل ليوما خاص كلشي يكون هو هداك.
كانت جاية عاقدة ححبانها بإستغراب وهي هازة تواب لي حتى هي مستغربة و نطقات ببرائة: ماما واش كاينة حفلة فدار
ميساء: معرفتش ابنتي
سمية كانت جايا خارجة من الكوزينة وهي مبتاسمة الفرحة واصلة ليها الودينين كيف شافت ميساء مشات لعندها ناطقة بلطف: صباح الخير بناتي زوينات
تواب بطفولة: صباح الخير جداتي سمية
ميساء: صباح نور خالتي
سمية: سيرو ابنتي لكوزينة قولو لبنات يوجدو ليكم الفطور (بحكم ميساء فاقت شوية معطلة من مور ما فطرو هوما و سالاو و نيت مبغاوش يفيقوها خلاوها على راحتها)
ميساء بفضول: خالتي شنو كاين ليوما شفت الحركة زايدة شوية
سمية بفرح و عينيها كيلمعو: ليوم غيجي ولد ختي عشرة سنين وهو فروسيا ملي ماتو واليديه ماجا المغريب و ليوم غادي يرجع توحشناه بزاااف
ميساء ببتسامة: الله يجيبو ليكم على خير
سمية بضحيكة بشوشة: الله يرضي عليك ابنتي
ميساء نطقات امين قبل متمشي رجعات وقفات قدام سمية ناطقة بتردد: احم احم
سمية بتساؤل: مالك ابنتي خاصاك شي حاجة
ميساء: خالتي بغيت نسولك واش كاينة شي خبار على ماما
سمية بلعات ريقها بتوثر: معرفتش ابنتي والله معندي حتى خبار
ميساء بقلق قلبها كتحس بيه شاعلة فيه العافية: عافاك اخالتي كولي لعمي المختار يقلب ليا على ماما راه مقدراش نصبر كنحس بقلبي واكلني عليها بزااااف
سمية حسات بغصة وهي كتشوف بنتها الوحيدة لي تحرمات منها سنين و نهار لقاتها مقدراش تعنقها و تشبع منها و تسمع من فمها كلمة ماما: واخا ابنتي دابا نهضر معاه و نتي غير فطري و اجي لعندي لجردة بغيت نهضر معاك
ميساء حركات راسها بالإيجاب و تمشات متوجهة الكوزينة لي كيف دخلات نطقات بصوت عالي باش يسمعوها البنات لي خدامين تما: الله يعاونكم البنات
كانو خمسة ديال البنات باقين صغار الا مرا وحدة لي تكون فعمرها ديك ربعين عام و هي رئيسة الخدم وهي نفسها لي نطقات بإحترام: امين الالة
ميساء حطات تواب فوق الكرسي ديال لاصال امونجي لي كاينة تما فالكوزينة خاصة الخادمات كياكلو فيها و نطقات وهي عاقدة حجبانها: ختي فوزية شحال من مرة هضرنا على لالة انا راه فحال بنتك
فوزية مبتاسمة من ضرافة هاد البنت لي جات فوقت وجيز و دارت بلاصتها بيناتهم بطيبوبتها و بساطتها و تواضعها: الله يرضي عليك ابنتي
ميساء متوجهة الثلاجة و نطقات وهي هازة يديها السماء: امين ياربي
خدات ميساء كيك ديال شوكولا و العصير ديال البرتقال من تلاجة و داتهم حطاتهم فوق البوطاجي و مشات هزات جوج طباسل و جوج فورشيطات و جوج كيسان من بلاكار سداتو و رجعات لفين حطات لكيك و العصير حطات داكشي فطباسل واحد ليها و واحد لتواب و العصير نفس شي كاس ليها و كاس لتواب رجعات داكشي لتلاجة و كلسات كتاكل هي و كتوكل تواب لي وجها كامل عمر بشكلاط كملو فطورهم و ميساء هزات تواب خارجة من الكوزينة وهي كتضحك معاها و كتهر فيها وهي كتموت بضحك: شهاد الوجه عامر بشكلاط اممممم شهاد الحلاوة فوق حلاوة
تواب كتموت بضحك حتى صوت ضحكتها كيتردد فالقصر كامل: ههههههههه صافي امامي هههههههه صافي
ميساء توجهات بيها الحمام لي مكانش بعيد بزاف على الكوزينة دخلاتها غسلات ليها وجها و يدياتها و مسحاتهم ليها و خرجاتها شادا ليها فيديها، فطريقها طلاقات ابتسام و ماجدة حتى هوما يالاه فايقين مبوقين: صباح الخير العروسات
ابتسام كتفوه باقي شاد فيها نعاس: الله يبارك فيك
ميساء بمزاح: فقتو بكري كون زدتو تعطلتو
ابتسام ميقات فيها: نعاس تابعانا عليه
ماجدة: ولاهيلا (نزلات عينيها لتواب لي كتضور فعويناتها الزرقين و نطقات وهي مبتاسمة) حبيبة مال هاد مك حاضيانا
ميساء: بعدولي من بنتي خليوها فتيقار
ابتسام جراتها هازاها كتبوس فيها جامعة ليها لحناك مع نيف كتشبع فيها بوسان: اسيري طبكي كالاك بعدولي من بنتي شكون يقدر يبعد على هاد الحلاوة
ماجدة: فين كنتي غادة
ميساء: غير لجردة خالتي سمية كالت ليا فطري و تبعيني لجردة بغات تهضر معايا على شي حاجة يمكن
ابتسام: غير سيري و خلي معانا تواب
ميساء حركات راسها بالإيجاب و عطاتهم بضهر متوجهة الباب زجاجي الشفاف لي كيخرج لجردة حلاتو و خرجات وكيف خرجات ضرب فوجها نسيم نقي مطير خصلات امامية من شعرها الذهبي الرطب لي ضافراه لور كتبان كيوت خاصة مع ديك الكسيوة الطويلة الوردية لي لابسة و صنيديلة بيضة كتبان فاتنة.
لمحات سمية كالسة مقابلة مع لابيسين لي كيف حسات بشي خطوات جايين ضورات راسها لجيهتها مبتاسمة بطيبوبة حتى شافتها وقفات حداها و نطقات بلطف: كلسي ابنتي
كلسات ميساء مقابلة معاها و هي شادة يدياتها قدامها: هانا اخالتي
سمية حنحنات وهي كتحاول تقاد افكارها المتضاربة فراسها و نطقات و اخيرا بنبرة جدية: بنتي غنهضر معاك فواحد الموضوع لي بعض الشئ حساس بنسبة ليك و يقدر يجيك صعيب و متقبليهش و لكن انا عارفاك قوية و غتقبلي هادشي لي غنكوليك
ميساء عقدات حجبانها بتساؤل: مفهمتش اخالتي
سمية: بنتي انا بغيت نكوليك بلي نتي ماشي بنت لالة خديجة البيولوجية
ميساء بقاو ملامحها هادئة مبانت عليها حتى ردة فعل كتبان فحالا سمعات شي خبر عادي و نطقات متسائلة: نتي منين عرفتي هادشي
سمية عقدات حجبانها مفاهمة والو: كيفاش واش كنتي عارفة
ميساء حركات راسها بالإيجاب: اه كنت عارفة ملي كانت عندي تسع سنين صارحاتني ماما بلحقيقة و بلي انا ماشي بنتها الحقيقية وهي غير مبرياني و سولاتني واش بغيت نرجع عند عائلتي البيولوجية ولكن انا رفضت
سمية: وعلاش رفضتي ابنتي مفهمتش
ميساء بتاسمات ابتسامة تعني الكثير و نطقات وهي سارحة بذاكرتها لبعيد: حيت كون كانو واليديا الحقيقيين و مكانوش غيديرو عليا داكشي لي دارت عليا ديك المرأة خدمات عليا فديور و ضربات عليا الكرفي عمرها خسرات ليا خاطري مسكينة كانت دايرة معايا فوق جهدها
سمية: واش مبقاش فيك الحال فاش عرفتيها ماشي ماماك
ميساء حركات راسها بالإيجاب: بقا فيها الحال و بزاف كاع بكيت و حسيت براسي نَكِرة مبقيتش عارفة راسي كاع شكون ولكن من بعد قتانعت بلي عائلتي الوحيدة هي خديجة بقيت معاها و بغيتها بزااااف عمرني عتابرتها ماشي امي بلعكس خيرها عمرني نساه و من تما مبقيناش جبدنا الموضوع كملنا حياتنا عادي
سمية بتردد: و إلى لقاوك عائلتك الحقيقية كيفاش غتعاملي معاهم
ميساء هزات كتافها: معرفتش والله معنديش فكرة نهائيا ولكن لي عارفة انه معندي تجاهم حتى احساس ناس مجهولين مكنعرفهمش تخلاو عليا وانا لحيمة صغيرة مستحيل يحاولو يقلبو عليا و انا وليت قد هاكا كون راه نساوني كاع واش كاينة فالوجود المهم لي كنفكر فيه دابا هو خاصني نلقا ماما ( شدات فيدين سمية بترجي) عاونيني اخالتي نلقا ماما عافاك انا معرفتش فين هيا البنات كيقولو ليا مسافرة ولكن انا حاسة بحاجة اخرى....
يتبع......❤️