يَرِمي بكلامهُ سهماً فَيُصيبنيَ
وينسى أيامٌ كَان بها يدارينيِ
أهذا الَذيِ كان مَنزلاً يأوينيِ ؟
أم انا الذيِ أعطيتُه كُل مافِينيَ
--------------------------------------------------------------
جَنات : لا فدوه لا تروح عوف الحشد انت ما محتاج شتسوي رايح للحشد .
حسن : الحشد الشي الوحيد إلي يريحني ، هسه عوفيني جنه أحس گلبي اشتعل ، أحس نار بگلبي اروح وارتاح من هاي الدنيا ماعندي حظ ابد جنت خايف احچي الچ وادري راح اخسرچ ، وهسه حچيت وخسرتچ ....
جَنات : تريد تروح حتى تموت ؟؟ تريد تذب روحك بالموت ؟؟ شايف هسه شصاير هناك يوميه بالاخبار اشوف شهداء
حسن : ماكو احلى من الشهاده شفايتلي اموت شهيد ولا أموتت بسكته قلبيه من القهر بفراشي ومحد يدري بيه..
جَنات : لا تأذيني والله ما اتحمل ، شيصير بيه تخيل
حسن : تنسيني اكو من ينسيچ ..
جَنات : اوك انساك وانت هم اكو من الينسيك ، تزوج وراح تعوضك عن كل شي وحتى اني..
حسن : ما راح ألگه نفسچ ، ولا راح احبها نفسچ ، ماأگدر اعيش ويه انسانه غيرچ ، وهم ماريد اضلم بت العالم وياي شنو ذنبها تعيش ويه واحد قلبه هاوي غيرها وهم وحيد ...
جَنات : زين هسه اني شلون راح ارتاح گلي واني ألوم بنفسي ،
حسن : لا بويه گتلچ كل ذنب ماألچ.
جَنات : حسن يروحي فدوه لا تأذي نفسك واذكر اني مهما صار وشكد ما ابتعد عنك راح تضل بالي وادعيلك دوم .
حسن : يرروحي اخخ شگد چنت اتمنى اسمعها منچ ، سمعت بس عگب شنو يلا المهم سمعت منچ شي حتلو اخر مره ..
جَنات : حسن ترة والله احبك اني بس مو نفس حبك إلي اني چنت اعتبرك مثل أخوي ،
حسن : ياريت لو بس احبك بدون اخوي ..
جَنات : احبك وحق داحي الباب ،
حسن : موتيني بعد شعلي گلبي نار
جَنات : مو ردت تسمع شي مني ....
حسن : وراح تضل هاي كلمتچ متربعه بنص گلبي
جَنات : بس اني اريدك تنساني وتكمل حياتك ..
حسن : جنه عوفي وتعاي نكمل حياتنه سوه والله صار ساعه اكابر واكول ماريد اجرحچ بكلمه تضوجچ بس كافي ما اتحمل ولچ نار بگلبي ودموعي يصبن وحدهن شلون اتخيل تعوفيني وترحين ..
جَنات: لا لا تبچي فدوه ما استاهل دموعك اني باع خليك قوي لا تضعف عليك الحسين ،
حسن : اني بدونچ مثل الطفل بدون امه ثلث اشهر احسب يوم يوم ارجع واحاچيچ ارجع ألگاچ وي غيري ..
جنات : تذبحني بهذا حچيك والله شبيدي ما تگلي شبيدي
حسن : عوفي منو هو هذا وياخذچ مني ما يستاهلچ والله ،
ما راح يحبچ بگدي ما راح يخاف عليچ مثلي ولچ والله چنت اخاف عليچ من روحي اخاف احچي شي اضوجچ بيه اخاف ، اگول انتِ ورقه بيضه نقيه ماريد ألوثچ خفت عليچ من روحي انوب يجي واحد ياخذچ بكل بساطه شلون أأمن ترحين يمه ؟؟
جنات : منين تخاف اكيد ما راح يأذيني ماأگدر اعوفه .
حسن : ما مرتاح والله تتأذين ليش ما تعوفينه تحبي؟
جنات : لا وين اعرفه حتى احبه ما صار شهر من أنخطبنه بس ماأگدر افهمني صعبه عليه شكول ألهم ،
حسن : كولي اي شي اقنعيهم ما ترردي وعوفي
جنات : اوك اوك هسه عوفك مني گوم اخذ علاجك ونام شوي واني افكر بالموضوع وبليل نحچي ،
دزلي صوره عيونه لونهن احمر مامبين شي منهن حتى اللون الأخضر من گد الحمار مختفي .
خفت احچي بعد شي وينقهر بزايد سكتت وگتله بليل نحچي
شنو نحچي اذيته اني اذيته كله بسبي ..
شلون افصخ الخطوبه علموده ،
بس اهلي شلون شنو اگول ألهم راح يقتنعون ؟
وإذا اجه خطبني شلون اقنعهم شكول ألهم منين اعرفه ؟؟
لا صعبه ماأگدؤ راح يتاذه اخاف عليه يجوز أأذي اكثر من اذيتي هسه مستحيل اخاطر بيه ، زين شلون اقنعه ينساني افضل شي هسه يعوفني .
اعوفه وما أراسله بعد بس هيچ راح اغدر بي ..
شسوي شسويي احس عقلي راح يوگف والله
تعبت من التفكير وراسي صار بي ألم مو طبيعي اخذت مسكن وحاولت انام بس هيهات ،
وين انام والف شغله ببالي شسويت بروحي اني بيا نار ذبيت روحي وشنو راح يصير وياي أكثر من هيچ أتحمل ذنب كسرة قلب شخص وهم يتيم لو بس اهله موجودين ما خفت عليه وعادي يكمل حياته وينساني ،
بس شلون هسه ينساني وهو وحيد ..
لحد اليوم اذكر كم مره حاول يكتل روحه واگعد اتوسل ساعه بيه يلا اقنعه على ما اخر شي خليته يوعدني ما يفكر يأذي نفسه بعد ..
ومن صار يدخن ويشرب أركيله ويسوي هواي اشياء ويكول بس هن يخففن عني ..
وحاولت مره مرتين ويا على ما ترك التدخين وكل شي وهم خليته يوعدني ،
يعني هسه من اروح راح ينسه كل وعده إلي ويرجع نفس قبل ويأذي نفسه وهو حتى التدخين مو زين عليه
هاي إذا ما أتأذه اكثر من قبل
مو سهله من يحب شخص ويتعلق بيه ويجي بكل سهوله يعوفه بس لو گايلي قبل احبچ چان مستحيل لو ادري ما اتزوج طول عمري ولا اكسر گلبه هيچ ..
حسن مو بس مجرد شخص عادي بالنسبه ألي صح ما احبه كحبيب بس اموت عليه بالنسبه إلي هو أله مكان بقلبي تعلقت بيه واحسه صار جزء من يومي بس ما فكرت فد يوم احبه لو أتزوجه چنت من اشوفه شگد متاذي اتمنى اروح يمه وأساعده بس ما فكرت احبه ..
لان ادري بأهلي وتفكيرهم ، اتخيل احبه ويجي يخطبني ويعرفون شنو راح يصير اكيد ما يخلوني عايشه ..
رجعت بذاكرتي باليوم إلي تعاركت وي اختي بـ 2017
وراحت گالت لأبوي أنو عندي فيس وما أقبل تشوف وياي بتلفون وگالت عندي شي بيه ..
چانت صغيره وما تعرف هذا الكلام راح يأذيني تسمع وتحچي بدون ما تفهم شنو يعني كلامه
ابوي عصب وضربني واني من حرگة كلبي بس طلع بره ركضتله ردت اخنگه لو ميته بيدي هم ما احس من عصبيتي طبيعي إذا أعصب افقد وما اشوف كدامي شي ..
وانقهرت لان چذبت عليه بس ردت اخذ حقي منها ومثل ما ضربني اضربها ،
بس امي چانت موجوده ودفعتني وخلتها وره ضهرها وضلت تصيح على ابوي يجي ،
حيل أنقهرت وهي تدري إذا اجه راح يرجع يضربني حسيت بوقتها مو اهلي ويكرهوني
تمنيت اموت ..
شفته راح جاب صونده واجه رجعت بكل هدوء گعدت على فراشي
گعد گبالي واني ابتسمت وعيوني كلها دموع بس اكابر وما أخليها تنزل توقعت راح يعوفني ويگوم بس شسوه؟
ضربني بالصونده وصاح بعلو صوته ،
ابو جَنات : ليش تضحكين؟
جنات : هههههههه شتريد ابچي ؟
ابو جَنات : ما عرفت اربيچ اني اليوم اربيچ من جديد اريد اشوف شلون تضحكين وشلون تجاوبيني لا تبچين عود ..
رفع الصونده وضربني على اديه كل قوته احس روحي شاطت من الأم بس كابرت وهم ما بچيت ومن گد ما تذيت ضحكت بكل قوتي وهو شافني اضحك وتخبل ..
رجع ضربني على رجليه وهم ضحكت وكل ما يضربني اضحك بحيث ماكو مكان بجسمي ما ضربني عليه بس وجهي وكل ضربه احسه اقوه من الي قبله الى ان خدر جسمي وضليت ما احس بشي كل ما يضربني يضرب اقوه من القبلها ..
ما ضليت احس بألم ..
وألي قهرني أخواني واگفين يباوعون وأمي هم ،
هيچ رخيصه عدهم ومحد ادخل
عود امي اجت تريد توخره عني
ابو جَنات: أليدخل ياخذ حصته هم ، اريد اربيها لان ما مربايه تضحك بتت الكلب تف عليچ وعلى تربيتچ تمدين ايدچ عليها واني موجود ليش لان حچت الحق انقهرتي مو ،
يحچي ويضرب بيه الى ان تعب وضل يلهث عافني وراح دار ضهره شرب ماي واني ضحكت بعلو صوتي
رجعلي ووگف گبالي
ابو جَنات : ليش تضحكين ليش يعني حماره انتِ كل هذا الكتل ما فاد بيچ؟
جَنات : شتريد تسوي سوي ما يهمني ومنا ورايح انسى عندك بنيه وانت مو ابوي ..
حچيت وردت ابچي حيل أنهضمت وجسمي أشتعل نار كل مكان بجسمي يأذيني بس ما اعرف شلون ضليت لازمه دموعي رغم نزلت كم دمعه ومسحتهن وضحكت حتى لا ابچي ما يدري بهذا تصرفه زرع الحقد بداخلي وخلاني اصير انسانه ثانيه ..
ما أكتفه بالسواه عافني وراح ومن ارتاح جاب تلفون واجه گال
:افتحي
هزيت ب راسي واني على نفس كعدتي لامه رجليه الصدري واباوع
احس جسمي صار قطعه من نار ،
هزيت راسي واجتني ضربه على راسي بكل قوته بحيث اذني انسدت فريت ركبتي ورجعت ثبت راسي وباوعتله بنضرات بدون خوف بعد إلي سواه وياي ما اضن اكو اسوء من هيچ شيريد اسوي يذبحني خلي يذبحني واموت ..
راح اخوي جاب التلفون وخلأه بأيده وتقرب يمي
علاء : افتحي
جنات : بأحلامك
ما چن عندي بي شي واخاف افتحه بس عناد بيهم وألي سواه وياي خلاني أعاند اكثر واكثر واريد اقهرهم واثبت ألهم مستحيل يجبروني على شي وشنو يردون يسوون ما يهمني
علاء :يعني ما تفتحينه ؟؟
ابو جَنات : تفتحه وغصبن عليها يلا لچ بساعع أفتحي ،
ما قبلت رجع جاب للصونده وضربني وگفت امي گبالي دفعها ورجع يضرب بيه
ابو جَنات: وهسه تفتحيه لو لا ؟ عندي استعداد للصبح اضل كاعد
جنات : ههههههه هاي قوتك للصبح ؟ عادي اني عندي استعداد اضل اسبوع گاعده هنا وأضرب شگد ما تريد وبكل قوتك .
ماأدري شنو حسيت بس بوقتها حيل مقهوره ما شفت رحمه منه ولا شفقه بعيونه ابد ، هذا مو ابوي مستحيل يسوي هيچ بيه بدون رحمه ..
چنت اشوفه انسان ثاني اني شايفه الاب ما يهون عليه يضرب بنته ويأذيها
اشو اني ابوي يضرب بيه إلي يگول عدوه مو بنته .
راح علاء جاب چلابتين واجه كعد گبالي وسحب ايدي ..
علاء : شنو رائيج بيا ايد ابلش بهاي لو هاي ؟؟
جنات : باليعجبك .
ابو جَنات :شجاي تسوي ؟
علاء :شسوي بابا اگطع اصابع ايدها ألي ما تقبل تفتح بيها التلفون الگباله خمس دقايق يا تفتحه يا اگطع كل اصابعها .
جنات : اعلى ما بخيلك اركبه ..
امي تخزر بيه وتجر بأاخوي تريد تبعده عني بس ما تگدر ألهم وحسيتها حتى هيه وياهم كرهتم كلهم وحقدت عليهم بذيچ اللحظة .
فوك الساعتين وهمه مگابليني يردون افتحه ولا قبلت
حسيت روحي دخت بدون اكل يومين وكل هذا ضرب عيوني بدت تنسد ورخت رجليه
رجعت راسي على كنتور بس مستحيل استسلم ألهم
سمعت امي وهيه تحچي .
ام جَنات : كافي راح تموت شنو تگول العالم عوفها تفتحه بعدين شوف وجه صار اصفر وجسمه ازرك راح تموت
ابو جَنات : طبها مرض خلي اخلص منها .
حسيت صارت ملوحه بحلگي عرفت صعد الضغط ،
عافوني وراحوا جريت روحي گوه وطلعت بره الحمام
غسلت وجهي بس مابيه حيل اوگف على رجليه بعد طحت بالكاع بس ما فقدت الوعي سحبت روحي يم التنور وصرت وراه حتى محد اشوفني
بقيت لنص اليل هناك اريد اغفه ماأگدر هاج الم جسمي عليه ومنين ما اريد انتچي يأذيني . حاولت بس ما گدرت متت من الألم وهم أنقهرت حيل على إلي سووا وياي هيچ اني مو مهمه عدهم ؟؟ بكل بسهوله أذوني اليگول كافره بأيدهم يمكن لو بيد داعش هم مو هيچ هم چان رحمو بحالي بچيت حد ما گلت بس حسيت روحي دخت
كمت اجر بروحي ورحت المطبخ فتحت ثلاجه اريد شي حبوب اسكن الوجع لگيت هواي حبوب بس ما اعرف مال شنو اخذت حبايه ما اعرف اصلا مال شنو شربتها وصفنت
ليش ما اشرب الشريط كله واموت واخلييهم يحسون بعذاب الضمير
اجيت اخذ بس فكرت راح أتحاسب اني هم هيچ روحي امانه عندي حرام عليه رجعته ودخلت الغرفه لكيتهم نايمين هيچ ألكم عين تغفه وما تدرون بيه شصاير؟ يعني لو ميته بره محد يدري بيه حقدت اضعاف حقدي عليهم وگلت لو يموت واحد منهم گبالي بعد ما اهتم .
سديت الباب ورحت بالغرفة الثانيه هن اثنين غرفه وحده اهلي ينامون بيه ووحده أحنة .
سحبت فراش ونمت عليه باوعت لعلاء نايم سبيته بگلبي ودعيت علية بحرگة گلب ..
الصبح يلا غفيت من الألم وهم ما حسيت بگد ما تعبانه ومتاذيه بس ما نمت هواي فزيت سمعت صوت خالي عدنه گعدت وره الباب ابچي
سمعته يسأل عني ويكلوله الحمدلله نايمه مخلصتها نوم
ويسولفون طبيعي اريد اشوف شلون زينه ،
طلعت الصاله وصار نضر الكل عليه وخالي اول ما شافني كام وكف اجه جرني ويسأل بخوف
: شبيچ ليش هيچ وجهچ عيونچ شبيهن خالي حاچيني بيچ شي ؟؟
باوعت لأهلي واحد واحد بحقد تأذوني وتجذبون
صدك لو گالوا
يقتلون القتيل ويمشون بجنازته
ذبيت روحي بحضنه ودموعي تصب واخيراً بچيت من كل گلبي وبحضن احد يحبني .
ضل يمسد على راسي بخوف ويسأل شبيچ
باوع لابوي وامي وسالهم شبيها ينتضر جواب من واحد منهم
جريت ايده وگتله
: خالي امشي نروح اريد اروح وياك ما ابقه هنا اذوني والله ماريد ابقه فدوه .
فيصل : تحچون شبيها لو شلون ليش هيچ حالتها شنو مسوين ألها ؟؟
أبو جَنات: ماكو شي خويه ، روحي جوه دخلي .
جنات : ما اروح اريد اروح ويه خالي ما ابقه يمكم دقيقه وحده بعد .
اجه يريد يجرني يدخلني للغرفه وجرني خالي وره ضهره ،
فيصل : شسالفه ابو علاء هو هيچ الحچي واكفه يمي وتريد تضربها ما توقعتها منك .
باوع لامي وحچه
فيصل : شبيها بنتچ شنو مسويه ؟؟
علاء : مو مؤدبه وأدبناها
فيصل : منو هيه إلي مو مؤدبه اشو ما تعرف تحچي أنتَ؟
ابو جَنات: عوفها ابو امير تربيه ما عدها وعدت تربيتها .
فيصل : شنو مسويه احچوا
أبو جَنات: أسألها هيَ .
جنات : خالي والله ما مسويه شي تعاركت اني ورهف
وچذبت عليهم تگلهم عدها فيس وماأدري وي منو تحچي
ابو جَنات : لو چذب چان فتحتي التلفون .
جَنات : خالي ما فتحته لان ضربوني واذوني وحقدت عليهم جيبه افتحه ألك واقسم ألك ماعندي شي بس مو ألهم افتحه ألك انتَ لا عبالهم اطخ راس ألهم .
علاء : ومن اگلك مو مؤدبه ما اصدك لسانه بطول النعال.
فيصل : ما حچت شي روح جيب التلفون .
راح جابه واجه فتحته الخالي وأنطيته بيده ،
خالي بكل ثقه اخذ تلفون وشمره بوجه اخوي
فيصل : فتش بي وإذا لگيت بي شي اني إلي احاسبها مو انتم .
فتش بي هواي اخذه وراح للأستقؤال وطول يلا اجه باوع لأبوي وگلة فارغ بس العاب بيه ،
باوع ألهم خالي
: حيف اي والله هيچ تسوون بيها
اشر على الغرفه وهز براسه فهمت يعني كومي بدلي واني ما گلت لا لبست عبايه فوك ملابسي وجريت علاگه حتى مو جنطه وخليت بيه قسم من ملابسي وطلعت .
ابو جَنات : ما ترحين رجعي جوه
ما حچيت شي صرت وره خالي استنجد بيه وأباوعله بنضره لا تخليني هنا فدوه ..
فيصل : اخذها كم يوم يمي ترتاح نفسيتها واخلصوا منها هم مو مأذيتكم ...
ام جَنات : أي خويه فدوه إذا ضلت هنا المشاكل ما راح تخلص خليها تروح ابو جَنات.
ما حچه شي طلعت ويه خالي وصعدت بالصدر وانفجرت بالبچي
سحبني لحضنه يمسح بـدموعي
فيصل : لا تبچين ما عاش إلي يبچيچ يولن خالي اني موجود اصلاً ما اخليچ ترجعين هنا بعد ضلي يم البنات حالچ حالهن .........
نجمة / يتبع
البارت هالمرة طويل وبالنسبة للبارت إلي قبلة فـ صار بي نقص باچر يتعدل أن شاء الله .
Inst:tiba.mahammed