وأخليك على نضرة شوگ تتحسر ،
وأراويك الوجوة شلون من تثگل .
--------------------------------------------------------------
جَنات : سكتت لبسني الحلقة واني لبسته الحلقة وأيدي ترجف اريد ألبسه ساعه اشتريتها أله بس ما جاي تنفتح بأيدي من گد رجفتي سحبها هو من ايدي طلع عليها نايلون شاله وفتحها وأنطانياها لبستها أله ،
امداني يعني ما شفت نايلون عليه هسه يكول فاهيه
ما بقه هواي خمس دقايق وطلع ..
شنو هاي عود چا والركص والاغاني وين هاي السوالف ، طلعت كلاوات بس بالمسلسلات .
خالته چانت گاعده يمي كل شوي تصلي على محمد بوجهي وتاخذ كحل من عينها تخلي ألي
تكول اخاف عليچ مِن العيون ما ترحم ..
حيل حبيتها وچان مبين عليها حبابه ،
اجن بنات هواي سلمن عليه وعرفن عن نفسهن بس ما حفظتهن لأن هواي .
اجت امه گالت
: يلا نروح للأستوديو علمود التصوير
راحت وياي امي وامه هم وخالته ،
صعدت بالسياره طلعت بس عيوني باوعت أله بالمراية ،
شافني اباوعلة غمزلي ،
جَنات : عزززه واني اكول فقير ويستحي ،
من وصلنه أجه يريد ينزلني لزم ايدي ، گال
أحمد : يلا عمرري .
مادري ليش فرحت بهاي الكلمه يمكن لأن اول مره اسمعها ،
نزلنه وضل لازم أيدي بقوه ألي يكول راح اشرد دخلنه غرفه التصوير وحدنه .
اجه شال البرنص من على راسي ، وضل صافن بوجهي حتى أستحيت .
أحمد : مو تگولين ما تباوعلي اشو هسه نزلتي عيونچ ،
ضحكت وما حچيت شي .
شوي واجت المصوره وهو صافن بوجهي ،
جَنات : أحم
انتبهتلة شفت الستره مو عدله عدلتها أله من وره ،
أخذنه كم لقطه وهو محتار وين يوگف من البدله منفوشة حيل چانت .
وكل شوي اغطي بـ صدري لو يصفن عليه ،
أحمد : احم هاي البدله حيل مستوره امة محمد كلها شافت مساع ،
جَنات : مو اختياري وحتى ما شفته ذوقكم هذا .
أحمد : مو ذوقي ذوق امي ما شفته ، اني اصلاً گتلهم اريده ردان .
سكتنه واخذنه كم لقطه بس اكو لقطه گالت المصورة
: بوسها ..
ضليت صافنه يعني ضروري ؟؟؟
المصوره : يمعوده هسه منين تستحين كم يوم وتصيرين مرته ،
غمزلي وضحك قرب وجه صار بوجهي احس تخربط وضعي كله ايدية محاوطه شعري ،
والبدله بيها فتحه من وره على طول الضهر بس خيوط بيه ..
احس ايده صارت على ضهري ويتلمس بيه ،
اريد اتنفس احس حتة الهوة انگطع عني ،
قرب وجه يم اذني وهمس
أحمد : ها عيني بيچ شي ؟
جَنات : هاا لا مابيه شي بس تعبت .
أحمد : خلصنه هسه نروح .
خلص التصوير ورجعنه للبيت وهم راحوا
وبدت الناس تروح البيت صار فارغ بس خالتي وبيت خالي دخلت جوه ردت ابدل بس خالو گال
:خلي نصور وياچ ،
واخذنة صور جماعية .
بيبي ضلت تبچي وعمي حضني وضل يبچي حسيت مو مهر عرس ورراح افارگهم
خلوني ابچي وياهم ،
بابا اول ما شافني دار وجهه
يگللهم
: هاي منين ؟
گلولة ؛ بنتك شسالفه ،
رجع صفن بوجهي
گال : لا چذب مو هي .
ضحكنة كلنه ورحت بدلت ملابسي ،
اجه بابا گال
: اجه العريس يريد يشوفچ ضلي هنا بالغرفه .
شوية ودخل أحمد اني مادري شبيه نزعت المستحه وكأنو شي طبيعي عندي كعد بصفي وباسني على راسي
مادري شبيه خليت راسي على كتفة وأبتسمت ،
أحمد : مرتاحه
جَنات : اي
أحمد : اكو شي ما عجبج اليوم بالحفله ؟ ادري كلشي صار بسرعه بس عندي دوام ، گوة اخذت أجازة كم يوم ..
جَنات : كل شي حلو عاشت ايدك
أحمد : وانتِ هم كلش حلوه
جَنات : يسلمو انت احلى
صفنت هذا هم رد يبووو ،يعني شريد اگول
أحمد : ماريد أتأخر زحمه من ابوچ محتاجه شي ؟
جَنات : لا بس شلون اتواصل وياك
أحمد : عندچ تلفون
جَنات : لا
أحمد :مو مشكله هذا رقمي نحچي من تلفون امچ على ما اجيب ألچ واحد ،
اخذت الرقم منه وگال
أحمد : راح اروح ..
حضني وباسني على خدي حركته چانت سريعه فـ فزيت ،
راح طلع واني رجعت گعدت ولزمت خدي .
دخلت امي وبسرعه شلت ايدي گتلها
جَنات : تعبانه اريد انام فدوه ،
أم جَنات : عاد اكلي شي من البارحة بدون اكل .
گمت وياها بابا جايب مشويات اكلت ورجعت لـ مكاني اريد انام بس صوت هوسه وجهال خالي
حسيت بطني أذتني ولعبت روحي ركضت بره وكلهم چانو بالصاله گاعدين شافوني طلعت اتقيئ .
أجو شافوني ،
ام جَنات : هاي شبيچ قبل شوي مابيچ شي ؟
جَنات : مادري بطني تأذيني ،
مرت خالها : يمه هاي عيون النسوان كله عيونها عليچ اليوم .
ابو جَنات : كومي بابا روحي نامي وارتاحي
كمت غسلت ودخلت لـ فراشي تذكرت أحمد
اخذت تلفون امي ودزيتله رساله
: هلو ، وصلت .
ما رد عليه فـ نمت ،
گعدت الصبح امي تگعد بيه
ام جَنات : لچ هذا الرقم منين ،
جَنات : يمه مگعدتني علمود رقم .
أم جَنات : اي غير اعرف منين
جَنات : شمدريني .
أم جَنات : ولچ شنو شمدريچ منو مراسل لعد ؟
واني نايمه مطفيه نسيت اصلاً أحمد ونسيت خطوبتي ،
فزيت گعدت باوعت لـ الرقم والحلقه بأيدي ،
وگلتلها بفهاوه .
جَنات : نسيبچ
أم جَنات : منين جبتي رقمه ؟؟
جَنات : يمه يمه ترا خطيبي صار واجه البارحه واخذته منه منين جبته يعني فدوه اريد انام .
أم جَنات : مو وكت نوم گومي البيت هوسه خلي نعزل .
اصلا طارت النومه گمت وأني ميته تعب عزلت وياها
بيت خالو تريگوا وراحوا .
رحت للتلفون شفتة راد برساله .
أحمد : هلا... اسف البارحه رجعت تعبان ونمت .
رديت عليه
جَنات : صباح الخير
أحمد : صباح النور باچر اجي ألكم
جَنات : هلا بيك
دزيتها وبعد ما دز شي ،
عفت التلفون ورحت لـ امي كتلها يريد يجي ،
ام جَنات : شعنده جاي البارحه المهر على الأقل خلي يصير اسبوع
جَنات : ماأدري ما حچيت شي ويا هاچ التلفون اقري .
انطيته إلها ورجعت تعبانه اريد أنام ،
لليل اجه بابا وامي گالتله ، گللها
: مو مشكله خلي يجي
صار ثاني يوم بليل واجه .
أحتاريت شنو ألبس بس ما حبيت ابالغ لبست لبس عادي وحطيت مكياج وطلعت .
ابو جَنات : شعدنه حاطه مكياج ؟؟ روحي مسحي .
گمت واني احچي وية نفسي يعني اول مره يجي يشوفني وما اخلي شي لوجهي ،
ما مسحته كله بس خففت منه .
شوية وأندك الباب راح اخوي فتح الباب وراحوا للاستقبال صاير منفصل عن البيت ،
اخذت ضيافه ورحت سلمت عليه من بعيد وگعدت ،
بقه ابوي يسولف وياه واني بس صافنه اسمع مر ساعه كامله واني كلمه ما حچيت ..
امي وابوي وجدي واخوي گاعدين يعني شنو أريد احچي وهو حتى ما باوعلي ،
شكد اضوج من احسه يتجاهل وجودي وما يباوعلي
شوية وابوي گال
: يلا اخذ راحتك عمي .
اشر لـ أمي واخوي وطلعوا ، ضل جدي يمنه
هسه جدي غير يگوم .
رحت گعدت بصفه وسألته
جَنات : شلونك ؟
أحمد : احم زين .
همس بصوت ناصي جدج هنا عيب ..
جَنات : ههههه واذا جدي ما يسمع ترة إله يلبس سماعه
شوي واجت اختي گالت لـ جدي امي تريدك راح وياها وضلينه وحدنه ،
انطاني هديه گتله
جَنات : شنو هاي؟
أحمد : افتحيها وشوفي ..
فتحتها چانت تلفون و وياة سيم كارت فرحت بيه تشكرت منة .
خليته على صفحه
شال المخده لي ابنيه وكال مو كأنو كاعده قريب هواي ؟
جَنات : ضحكت.. شسوي غير اخاف احد يجي
أحمد : ترا مرتي
مادري ليش فرحت ب كلمة مرتي ،
بعدني ما مجاوبته ودخل ابوي ،
رجعت المخده الي چانت ببينا وابتعدت شوي .
هو هم ما طول گال عندي دوام باچر ولازم اروح ،
ترخص وطلع ..
اخذت تلفون ورحت انزل برامج بيه لكيت بيه واتساب وحاط رقمه بيه ،
دزيتله رساله من توصل گلي
دز رساله وصلت أطمئني .
مر اسبوع واني علاقتي وياة رسميه ما اعرف ليش ما يحچي وياي هواي على كد السؤال ويروح.
ضجت هواي وضليت افكر اذا من هسه هيچ ليش ما افصخ الخطوبه بس اكول ماريد استعجل ،
ماأدري احس أسلوبه غريب وما مرتاحتلة بس ماريد اخرب لان ماعندي سبب مقنع يعني يجوز مشغول هاي الفتره او عنده ضروف ،
رجع وره اسبوع اجه بس ابد ما كدارت
احچي وياة ولا كلمه بابا جان موجود وما عافنه وحدنه فـ هو من شاف الوضع هيچ راح ،
ومن رجع راسلني
أحمد : شنو الوضع اليوم ؟؟
جَنات : ماأدري والله .
أحمد : يعني لا اكدر احچي وياچ وهم لابسه حجاب گبالي وهم لبسچ إلي يگول غريب عنچ ؟؟
جَنات : مو بيدي ترة اهلي ما يقبلون ألبس شي گصير وما يقبلون انزع الحجاب وهم ما يقبلون احط مكياج ..
أحمد : ترة ما يصير هيچ اني خطيبچ وبعد كم يوم زوجچ .
جَنات : ماكدر احچي شي ، نزوج واشبع شوف ..
أحمد : ماأدري ماريد المره ثانيه من اجي الوضع هيچ احچي وي اهلچ هم اريد اگعد يمچ اسولف وياچ
جَنات : ان شاء الله احاول
أحمد : مو تحاولين احچي وياهم حتى سلام من بعيد تسلمين عليه
جَنات : چا شلون اجي احضنك وابوسك گببالهم ؟؟
أحمد : شكو بيها ترة زوجچ ليش تحسسيني غريب .
جَنات : مو غريب بس استحي وهم اهلي ماعدهم هيچ شي ،
أحمد : مره ثانيه من اجي أنزعي الحجاب ولبسي تراك او كلابيه عوفي الفساتين .
جَنات : ان شاء الله
ختمت الكلام ويا وضجت حيل وانقهرت صفنت شلون اقنعه طبع اهلي هيچ مو بيدي
حتى اني ما عاجبي الوضع بس اذا خليت مكياج اترزل
هاي اول مره يفتح موضوع وياي وهيچ يسولف
مره اليوم وثاني يوم قررت ما اراسله ، يوميه اني ادزله رساله وهو ما يراسل ألا اني اراسل
ماريد ارخص روحي ، يريدني يراسلني ..
وفعلا ما راسلني ابد وهم چنت مريضه فلاونزه ومالي خلك شي ..
ثالث يوم يلا دزلي رساله جاوبته على گد السؤال
أحمد : شلونچ
جَنات : الحمدلله انت شلونك
أحمد : الحمدلله.
جَنات : دومك
أحمد : ماكو صارلچ يومين
جَنات : مريضه
أحمد : شبيچ سلامات گلبي
جَنات : ربي يسلمك فلاونزه ،
أحمد : اخذتي علاج ؟
جَنات : اي
أحمد : اگدر اتصل عليج
جَنات : اكيد
خليت الهتفون بـ أذني وفتحت خط .
سلمت عليه وضل يسألني شلوني واذا اخذ علاج لو لا .
شوي وگال
أحمد : اسف اذ ضوجتچ هذاك اليوم بس ترة حقي هم اريد اشوفچ واكعد اسولف وياچ .
جَنات : لا عادي ما ضجت بس مو اكو تلفون ونسولف بالنسبة إلي كافي بس اشوفك ونسولف براحتنه بالتلفون .
أحمد : اني ما احب اسولف بالتلفون وتشوفيني حتى ما اراسل ، لذلك اجي اريد اگعد وياچ ونسولف ..
لان سوالف التلفون ما تاكل عندي ،
جَنات : افهمك بس ما بيدي شي هذا تفكير اهلي وطبعهم ما عدهم هيچ شي شسوي ألهم حچيت وياهم وما قبلوا
أحمد : يعني ما يعرفون حقي اشوفچ ؟؟
جَنات ماأدري كل الي ببالهم خاف يصيرشي للبنية لذلك ما يعوفونه سوه .
أحمد : حاولي تقنعيهم هيچ الوضع ما يعجبني ..
جَنات : الله كريم
.أحمد : تردين اجي باچر اخذچ للدكتور ؟؟
جَنات : لا يسلمو جاي اخذ علاج كم يوم واصير زينه .
أحمد : مو تدرين هسه اجه مرض كورونا وخاف مصابه ؟
جَنات : لا ما طالعه من البيت اني وعادي متعوده بعد كل مناسبه اتمرض ،
أحمد : زين ديري بالچ على نفسچ كم يوم واجي اشوفچ
جَنات : هلا بيك
أحمد : يلا روحي ارتاحي باي .
سديت الخط ونمت وگلت بعد ابد ما اراسله خلي هو يراسل ويتصل ،
ثاني يوم دز رسائل سديت النت وگلت ما اجاوبه خلي شوية يحس بشعوري من اراسله وما يرد عليه ..
لليل گاعدين واني نايمه بفراشي مابيه حيل ،
دز رسائل لـ امي يسألها عني .
دزتلة بصمه گالتلة مريضه ماله خلك تلفون ،
أحمد : زين عمه اجي اخذها للدكتور شبيها ؟
ام جَنات : لا عمه مااكو داعي عدها علاج جاي تاخذ بيه ، فلاونزه عاديه تشرب ماي بارد ثلج والجو بارد .
أحمد : بهذا الجو وتشرب ماي بارد ؟
أم جَنات : اي شسويلها .
أحمد : عمه فدوه لا تخلينها بعد وهسه اني احچي وياها بس كوليلها خلي تفتح تلفونها .
أم جَنات : ان شاء الله
باوعتلي امي وگالت
سمعتي ؟ بعدين مو هذا تلفونچ يمچ ليش ما تردين عليه؟ اذ ما تردينه من هسه عوفي احسن .
جَنات : لا شسالفه يمه مادري مطفيه النت وما أنتبهت هسه احاچية .
وبگلبي گلت هو اني طفيته علمود لا احچي وياة ،
فتحت النت وصلتني رسائل منه دزيتلة رساله ؛
جَنات : اسفه ما منتبه للتلفون
أحمد : ضل بالي يمچ راسلت امج اطمئن عليچ عمري ،
جَنات : مابيه شي بس اذا تمرضت مالي خلك شي
أحمد : ليش تشربين ماي بارد ؟
جَنات : متعوده ما اعرف اشرب ماي حار ،
أحمد : منا ورايح تعوفينه صحتچ اهم من كل شي.
أحمد : باچر اجي اشوفچ وأسال امچ اذا تركتي لو لا .
جَنات : ان شاء الله اصلاً من تمرضت تركته .
أحمد : اممم ما فرحتي راح اجي ؟؟
جَنات : ههههه فرحت بس شلون اعبر بالكتابه عن فرحتي .
احمد : اتصل ؟
اخذت تلفون ورحت للأستقبال علمود الهدوء .
اتصلت عليه ..
أحمد : امم احچي خلي اسمع صوتچ
جَنات : شحچي ماعندي شي
أحمد : صوتچ تعبان .
جَنات : عادي
أحمد : ليش تحچين برسميه وياي ؟؟
جَنات : لان انتَ تحچي برسميه مو اني .
أحمد : ماريد تحچين هيچ وياي بعد شيلي الرسميه حياتي ..
جَنات : حياتي ؟ اول مره اسمعك تگولها
نجمة ، يتبع
Inst:tiba.mahammed