👑العمـــــــدة👑
♡..مجنــــون ليلـــى..♡
#التتمة 25
بقاو شي كيشوف فشي ..المشكلة كلهم فيهم الجوع ما واكلينش ..ودايرين عشا واحد ايتعشاوه كاملين كيف لعادة ..
ياسين:انا هاد الليلة انبات عند خالتي رقية وليلى
ليلى :كان شهوتي فدجاج المحمر ساعة صدقنا لا دجاج محمر لا عشا عادي كي الناس...نوضي أماما نوضي نهبطو وجدي لينا شي حاجة لعشا
وناضت وهو يوقفها صوت مها
رقية:غا عطي الراحة لراسك ليوم ماتقديتش ماكاين والو فالدار تا الخبز تقادات
ليلى رجعات جلسات:نباتو بالجوع ولا كيفاش
كنزة مازاال كتبكي وتمسح فدموعها وبصوت باكي:بسبااابك كون بقيتي متبتة كي الناس كون تعشينا الدجاج محمر ديما منكداها علينا
ليلى نايضة متيسة عاليها وهو يوقفها صوت بكر :راه دوييييت نعاود الهضرة
رجعات جلسات :وقلها تبعد مني
بكر كيدوي معاهم بجوج:المرة تالتة ماغاندويش غنطبق
ياسين:علاش ولدتو لبنات علاش ماكايجي منهم غا لمشاكيل وصداع الراس ها حنا بايتين بلا عشا تا كاس كروط مادرناهش ..قلنا راه انتعشاو مزيان
محمد :حنان جريني ندخل البيت نعس
يلاه اتنوض وهوما يسمعو الدقان بالجهد فلباب لتحت
حنان:اويلي شكون كيدق علينا هكا فالليل
ناض ياسين طاير طل من الشرجم مخنزر شكون هدا لي زغرتات عليه مو يفرع عليهم لباب ..بكر جالس ماتحركش من بلاصتو كيساين خوه يقولو شكون بانت ليه هاد الليلة مازال طويلة ومازال شي بنادم خاصو لعصى
ياسين شاف فبكر:لبوليس ابكر كيسولو عليك
ناضو كيتغاوتو ودغية حنان ورقية قلبوها بكة
حنان:الله ياربي على ولدي جاو يديوه
رقية :صافي تهنيتييي اتصيفطيه ااحبس
محمد :اسكتونا ونتوما قلبتوها بكة دغية..عيط لصاحبك البوليسي
بكر:مايحتاجش هدشي كامل ..هنا راجع
حنان شداتو من يديه كتبكي؛فيين غادي راه لبوليس هادو جاين يديوك ماغانقدش نشوفك عوتاني فلحباسات اولدي سظع من باك وعيط لصاحبك البوليسي
قرب وباسها على راسها:الوليدة راه هدا ولدك بكر العمدة عارف شكا ندير مسحي دموعك وسيرو تجلسو هنا راجع
محمد:صافي رجعو تجلسو خليوه قال ايرجع هي ايرجع
بكر بعد ومشا حل لباب وياسين تابعو
بكر:فين غادي
ياسين:معاك
بكر:بقة مع خوتك اصاحبي
ياسين:من نيتك اخويا باغيني نبقة فالدار كي لولية رجلي على رجلك بدينا بجوج انكملو بجوج
بكر مسح ليه على راسو:زيد زيد قدامي
وتمو هابطين حتى كيحسو بشي حد موراهم
دار وهو يلقاها هي:ونتي لاش تابعاني
ليلى:كيفاش لاش تابعاك ..باش نقولهم داك السكايري هو لي بدا اللول وبغة يتعدا عليا بغيتيني نبقة جالسة
بكر مسح على راسو وهو كيسوط:صبرني يا مولانا
ورجع شاف فيها:طلعي اليلى مانلقاكش مورايا
يلاه اينزل وهي تاني تبعهم وقف وشدها من دراعها:ماتجعرينيييش نصدقو دايرين الشوهة طلعي هنا راجع
ليلى:وايلا ما رجعتيش
بكر:تهناي مني نيت
ليلى:ودابة خلينا من هاد الهضرة ..خليني نهبط معاك يقدر تحتاجني
بكر:حاجة وحدة لي اديري طلعي وجلسي متبتة تا نرجع
بقات وقفة صفق بيديه:يلااااه
ليلى:اووووف هاهي طالعة
وطلعات لدار نيشان للشرجم لقات كنزة وحزرية شابقنها لتماك
كمل طريقو وحل لباب لقا كاع الحومة مجمعة ولبوليس ودنيا مقلوبة ودراري دلحومة مستفين وداك خونا واقف حدا البوليس بدماياتو كلو مفرشخ مشروك ليه لحنك مع العين وراسو مفتوح خاصو لغراز...وصحابو ضايرين بيه تهوما بدماياتهم
بكر:ياك لاباس شواقع هنايا
👑العمـــــــدة👑
♡..مجنــــون ليلـــى..♡
#26
لبوليسي:حنا لي جاين نسولوك قاسم للسيد راسو ومنوض الروينة ومازال كتسول
بكر قوص حواجبو ودوة بجمود:راك غالط واقلة حنا ماشي دهادشي
ياسين غير ساكت باغي يعرف خوه اش باغي يدير
نقز داك خونا بصوت تقيل:كيفاش ماشي دهادشي مشير عليا بقرعة للراس ونازل عليا بكررسي وكروشيات للوجه...هو هدا اشاف لي رون العرس وضربني انا وصحابي وزيد معاه لبرهوش دخوه تاهو
باسين نقز باغي يكير عليه:لبرهوشة هي ختك يا ولد لقح...
شدو بكر مرجعو اللور:ياسين هنينا اصاحبي
بكر قرب تا لوجه داك خونا خلاه يبلع ريقو خايف لدرجة رجع اللور تا كان ايطيح:شوف فيا مزيان ..مأكد انا لي درت هدشي كامل
خونا قلبو ضرب فلمية نطق بصوت متقطع:ن..ت
شاف فالبوليس وكمل:هو هدااا هدا هو لي ضربني وها الشهود لحومة كااملة شاهدة
بكر بصوت مرتافع كيشوف فدراري دلحومة:واش انا حضرت لشي عرس
دراري دلحومة بصوت واحد:لاااا ماشناكش
بكر:واش انا ضربت شي حد
دراري دلحومة:لاااااااا
قرب لداك خونا:شفتيني فاش شيرت عليك بالقرعة ولا شتيني حتضر معاك لشي عرس
بلع ريقو
البوليسي:جاوب اصاحبي
خونا:لا ولكن هو ماكد وهو لي ..
قاطعوه دراري دلحومة:ماشي هو...ماااشي هو ..كيكدب...وا لكدااابة...وااا لكداااااب
بقاو كيصفروو ويصفقووو جياهم الشخدة
بكر قرب للبوليسي وبجدية:واش نتوما دايرين راسكم فواحد سكايري جايب لكاو ماعارفش راسو من رجليه
طلات واحد لمرا من الشرجم:شوف اشاف الا العمدة مايديرهاش ..ماحضرش للعرس والليل كامل وهو فلبالكون خدام فداك لعجب لي كيتسد ويتحل
لبوليسي شاف فداك خونا :نت خاصك تربة ونديوك تبرد شوية فلبنيقة...طلعووه عليا هو وصحابو
وشاف فبكر:سمحنا صدعناك باينين لكولشارة من ولاد ناس
بكر هز راسو باه بلا تا كلمة وهو كيشوفهم كيهزوه فلفاركونيط وهو كيغوت:والله تاااا هوووو ..والله تاهوووو لي قسم ليا راسيييييي..والله تاهووو
ولاد لحوما كيغوتو ويصفرووو ويقلدوه بصوت واحد:والله تاهوو ....
ياسين كيضحك عارف خوه دمااغ وخطييير قرب ليه:بربي تا كاااين اخويااا
بكر مسح ليه على راسو:طلع طلع ..اتلقة واحد لفلوس فالمجر جيبهم واجي
بقة كيتسناه ..طلع جاب لفلوس وهبط:هاهوما شغا دير بيهم
بكر خدا منهم واحد المبلغ:عطي للدراري واجي تبعني
ياسين:يتووب عليك
خدا لفلوس ومشا :واا دراري وا عشرانيييي هاااا حلاوتكم
تجمعو علييه ولاد الحومة لي بلا ما يوصيهم وقفو معاهم وشهدو معاهم
ياسين:هاك نت قسم نت وصاحبك الغش بلاش النص بالنص....هاك نت وشووف عنداك تشري سيليسيوون ها ودني منك.....
دراري:لعز بيكم اي لعبة حنااا هنااا
فرق داك لفلوس وتبع خوه :فين غادي
بكر :نشوفو صحاب العرس
وصلو للدار خرج عندهم لعريس ديجا كيعرف بكر من لبعيد لقاه معصب وماراديش انه فركتو ليه العرس..ولكن مد ليه بكر لفلوس نسا لعرس وما جا منو ترونجا معاه ماشي خوفا منو ولا من الصداع.. لا حيت فعلا ترون ليه لعرس بسبابو ومابغاش يخليها هكاك على رقبتو ..
تمو راجعين وهو يوقفو لعريس:تسنا اخاي بكر جيتي تالهنا وما تديوش حقكم دلعشا
بكر :أ لا ..
قاطعو ياسين:مانقولولكش لا
مشا ورجع من مور دقايق بطبصيل الطوس فيه صبة زوينة بدجاج مدغمر وصاشية فيها لخبز ولمونادا خدا داكشي ياسين:الله يحفضك اخاي والله يكمل كلشي بلخير
بكر سبقو وياسين تابعو ايموت بالفرحة غير دخلو للدار سبقهم قبل يبداو فالاسئلة:كلشي داز مزيان بكر كيخرج راسو كي الشعرة من لعجينة وها لعريس براسو عطانا لعشا بقلب صافي وفرحان من لفوق
ليلى:الله شحال كنت مشهياه
وتجمعو كاملين فوق الطبلة كياكلو حتى من كنزة مسحات دموعها وتزاحمات مع خوتها كتاكل تاهي
ليلى قسمات واحد لفخد ومداتو لكنزة:هاكي ااممصيبة نتي كيعجبك لفخد
كنزة خداتو منها:المهم سمحيلي على قبيلة راكي عارفة لساني متبري مني
ليلى:تانتي سمحيلي على داك اانتفة
ياسين وهو كياكل:زيدو زيدو تسامحو تا تلقاو الدجاج طار بوسي ليها راسها بوسييي
ليلى كنجر فالدغميرة لعندها وتغمس وتاكل:هههههههه كولي كولي
بكر كيقطع من الصدر كيعجبو :كولي الوليدة مالك كتفرجي
حنان تنهداو شافت فمحمد:قرب تاكل صافي ماديش على الولاد الله يهديهم وصافي ما عندنا مانديرو
محمد شاف تا عيا وقرب :مسااخط نتوما ماتهنيتو حتى تعشيتو
كلشي بقة كيضحك وكملو عشاهم فجو زوين بحاليلا ماشي هوما لي كانو منوضينها قبيلة ...زعمة هاد العائلة اتبقة ديما هكا متماسكة وما كيأتر عليهم والو؟؟ ...
#يتبع_ارائكن🔥