👑العُــــــــــــمــــــــــدة👑

البارت 6💞

👑العمـــــــدة👑
♡..مجنــــون ليلـــى..♡
#6
دااز الوقت

كانت جاية هي وخوها تا وصلو لحدا صالون دار هاه وهاه بانولو دراري كيشيرولو يجي عندهم شاف فكنزة:دخلي شوفي واش صالون عامر ندخل
كنزة دخلات لقاتو خاوي وجالسين كيرتاحو لوقيتة دلغدا ايسدو ويمشيو يتغداو:ياسين ايدخل
وخرجات عيطات ليه:اجي راه خاوي
دخل لاح شكارة فوق لفوطوي:ملي تكونو غاديين لدار طلعوها معاكم
حورية:شوف خليك غا قريب تهبط ليناا الريدو
ياسين شاف فليلى متكية فوق لفوطوي وكتلعب بطليفونها ومازال بداك لباس وصدرها كيبان هز واحد لفوطة كبيرة ولاحها عليها :نوضي بغيتك
شافت فيه ورمات داك لفوطة:ولفوطة لاش
ياسين:جمعي علينا غا ممتلاكتك
وقفات كتفوه جاها نعاس:راك كبرتي معايا عاد انحشم منك اش بغيتي
ياسين:زعمة راه كبرنا
ليلى:مازال فعيني صغير
ياسين:نتي مامعاك هضرة ..المهم بغيت نصبغ شعري
بقاو كيشوفو فيه شحال طلقوها كاملين بضحكة وحدة
كنزة:ماواتاتك غا صباااغة واش من نيتك
جبد طليفونو كيوريهم شي تصاور:باراكة من ضحك داوي نيشان هانتوما شوفو ولات موضة ماشي شعر كامل غا شي نويطات بحال هكاا ..غا نبدلو ستيل شوية نضهشرو لباشاار ونتي اليلى لي اتصبغيليي عارفك كتصرعي صبايغ
حورية:واش بغيتي بكر ينحرك لا شافك صابغ شعرك
ياسين:سكتو غا نتوما وماعندو منين يسيق لخبار اصلا ماشي شي صبااغة غا شي لون هو هداك شنو قلتي اليلى ندوز عندك فلعشية
ليلى:صافي واخة دوز ولكن تا لجويه داك تسعود نكونو سالينا
ياسين:يتووب عليييك اختي لعزيزة شتي نتي راه مامنكش جوج حق الرب غا ضالمينك
تقادات فلجلسة:ايواا شكون عرف قيمتك
ياسين:اتانتي لي ماعرفك خسرك يلاه هاني خرجت ربع ساعة ونجي نسد ليكم لماحال
وخرج عند دراري دلحومة صحابو
كنزة:هاني مشيت عييت
ليلى:اجي لهنا اجيي
كنزة:مالك
ليلى وقفات وقربات لعندها:حطي داك صباغة ديال ضفران حطيي وانا كنقول فين كيمشيو ساعة نتي لي مكشطانا فيهم
كنزة:كي درتي شتيني اويليي ياك كنتي مركزة مع ياسين اربي سلامة
ليلى حلات ليها جيب شكارتها وخدات صباغة لي تماك:انا راه تاحاجة ماكدوز علياا ابب
وشافت فداك صباغة:و واخدة صباغة لخاصة بلكليان غالية شريتها ماحشمتيش
كنزة:تسلييم اختي تسلييم..ودابة عطيني غا نصبغ ونرجعها
ليلى:تحركي تقوديي ماشي نتي لي كتشريها
كنزة:عفاااك انلبس تريكو فنفس اللون
حورية:نتي غضبري عليها مع ماما
كنزة:ماغاتشوفهااش غا سكتيي..ليلى وا اري
ليلى:شديي وغتصبغي داابة هنا وتحطيها فبلاصتها وبربييييي وتولي تقيسي شي لعبة من لماحال نرجعو لياماتنا لعصى لمن عصااا
كنزة تفكرات داك نتفات لي كانت كضرب ليها :دابة اريييي
خدات صباغة وجلسات كتصبغ من بعد خرجات ومشات لدار..بقاو لبنات شحال تا جا ياسين شد ليهم لماحال ورجع عند دراري وهوما طلعو لدار
#التتمة

داز الوقت
كانو مجمعين فوق طبلة كيتغداو كامليين معاهم ليلى ورقية قررو يتغداو مجموعين شحال ماكلاو الحوت
حنان:هاد لمسخوط مازال مابان
كنزة:ورااه فينا الجووع واش انبقاو كنتسنااوه عيطلتوو مازال مابغة يجي خليونا الناكلو
محمد(الاب):غنتسناو خوك ابنتي صبري شوية
شويو شافوه داخل كيغنيي:كتغداو بلا بياا
محمد:فين كنتي من صباح
ياسين قرب وباس ليه راسو ويديه:سموحات الوليد نسيت راسي مع دراري
محمد تنهد:غسل يديك وجي تغدا
ياسين باحترام:هي لولا
مشا غسل يديه وجلس كيتغداو مدة قصير وهو يشهق:نااري نسيت
كلشي شاف فيه
ياسين:عندي ليكم واحد لخبار زوين
وبتاسم كيشوف فيهم واحد بواحد
حنان:وا دوي خلاص
ياسين:دويت مع بكر الواليدة غيجي هاد لعشية غالبا ايدير معانا كاس كروط
بالفرحة نزلو دموعها كتحمد الله وتشكرو..كلشي فرح وبداو كيهضرو دقة وحدة فرحانين وكيحمدو الله غادي يرجع محمد تنهد براحة ولدو غيرجع..من غير وحدة لي ماقالت والو مادارت تاشي ردة فعل مازال مكملة ماكلتها بهدوء وفلداخل ديالها ماهانياااش صافي غيرجع وغترجع لايامها لقديمة معااه عاود ..
حنان وقفات فرحانة:رقية خاص نوجدو شي كاس كروط فاعل تاارك داكشي لي كيعجبو غنوجدووه
رقية ناضت تاهي :نوجدووو لولدي نوجدولووو..نهار كبير هدا الله على فرحة غادي يرجع ليناا
محمد:وا دابة جلسو كملو غداكم
حنان:ماعندو منين يدوز يلاه يكفينا الوقت فتوجد بغيت ولدي يجي يلقانا كنتسناوه بغيتو يلقة الجو لي كيعجبووو..ماغانخلي تاحاجة تنقص..ياسين نووض تسخر لبناات نوضو جمعو طبلة تعاونو معانا صاافي
ناضو لبنات كيجمعو فطبلة ورقية وحنان كيخططو شغا يوجدووو وياسين واقف عليهم كيحسب معاهم داكشي لي غيحتاجوو وكيشوف واش اتشيط شي فلوس يديرها فجيبو خخخخ

هي بقات غير كتشوف شحال فرحانين برجوعوو المشكلة هي ماحاسة بوالو من غير انه غيرجع وايرجعو معاه لحكامات ديالو وصداعووو و... مابغاتش تزيد تفكر قررات تمشي للمحال حسن ماتبقة هنا تلاهة تماك يلاه اتخرج وهو يوقفها صوت حنان:بنتي ليلى
ليلى:نعام اخالتي
حنان:بكر كتعجبو لحلوة لي كديري اجي ابنتي صيبيها ليه عاد سيري هو ولعصير لي كتقاديه
بغات تهضر وهي تقاطعها رقية:الله يرضي عليك ابنتي
حنان:ماترديهاليش فوجهي ..كيبقة ولدي وبغيت فاش يجي نشوف الفرحة فعنيه نتي عارفة شحال نتي كتعني ليه و..
ليلى قاطعاتها:واخة اخالتي
ودخلات للكوزينة قالت لياسين اش يجيب ودقايق وجاب ليها كلشي وجدات لحلوة لي بحدها كتعرف ليها وكتصدق ليهاا بشكلاط ...وقادات لعصير ...داز الوقت كانو واجدين غسلات يديها وشافت فحنان:خالتي ها هي ديريها فتلاجة تزيد تبرد هي ولعاصير يلاه هاني مشيت
حنان:الله يرضي عليك ابنتي
كتافات بابتسامة وخرجات من دار بحاليلا هاربة منهم خلاتهم كيوجدو وطايح كتر من نايض بحاليلا لملك ايزورهم ..كانت نازلة من دروج حتى كتسمع سميتها:ليلى
ضارت كانت مها:نعام امِّي
قربات لعندها:مانبغي ديري تاشي حاجة تقلق بكر يكفي داكشي لي جاه منك وكاع داكشي لي خسر على قبلك هنا كنتبرا منك حيت والله ودرتي شي حاجة ماشي هي هدييك انا لي غناخد رووحك سمعتينيي
ليلى عصباتها بهاد الاهتمام كامل ليه تقول هي ماشي بنتها:علاش جااي علاش يبقى فيين كاين انا بغيتو قبل يوصل يموت ومانشوفش وجهو
قبل تكمل كلامها جمعات معاها بصقلة تا ضاار وجها ومع رقية كانت دايرة لخاتم فرعاتها ففمها تا سال الدم:اقسم بالله حتى موتك اتكون على يدي تحركيي من وجهييي تحركييي ماتستاهلييهش دابة تندمي عليه
ليلى هبطات كتجري فدروج وتسب وتعاير ودعي فيه هو بحاليلا هو لي ضربها