مريم: ترة اني كتلك مرتك مو خالية .. صار جم يوم تحوم فوك راس وائل الله اليعلم شنو براسها .. وطول الوكت يمة لو بحجة تعدله المخدة وتطخ بيه ، استغفر الله من ذنبها واني يعز عليه اشوف واسكت ما اكدر اضم عليك
وكف شعر راسي
من اللي سمعته
.. واسمعه يكلها
مرتضى: انتي متأكدة ؟ .. حور متسوي هيج
مريم: هاي شبيك مرتضى .. يعني اني جذااابة ؟ مرررتك عينها على وائل اخذها مني حجاية .. تلاحك الها قبل لا تسيس شنو نسيت ذاك اليوم عافت الدنيا كلها وراحت كالت لوائل بالذات حتى ياخذها لدكتورة
بقى صافن على كلامها مثل اللي محتار يصدكها لو لا
وهي ضلت توز براسة .. وتكله
.. هسه رجال متزوج وعنده عائلة شعندج وراه و هو المكرود يا غافلين الكم الله .. بس فدوة مرتضى مو تكول اني الكتلك
هز راسة ورد
مرنضى: يصير خير
خليت وطبيت للبيت بدون لا اطلع صوت حتى لا الفت الانتباه ..
وكفت انتجيت ع الكاونتر احس حيلي كله باد من كلامها .. وصارت حسبة تاخذني وحسبة تجيبني
شنو معقول حور تسويها ؟ ...
......
بعد ما تمت الموافقة المبدئية على خطبة يوسف و وتين
بعد فترة قرروا يجوون مشية مال زلم من بغداد للعمارة .. وبنفس اليوم يصير عقد وتلبيس حلقات
قبل يوم العقد ،
جنت اني اشتغل بالبيت ومخبوصة
.. مشيت الطلاب اليوم من وكت
عمتي والبنات على جية .. يجوون لهنا بيت قسور ويباتون لليوم الثاني
ولاول مرة بحياتي قبل الساعة 12 الظهر كملت تنظيف البيت .. وعطرته وخليت بخور عرب صارت الريحة تفتح النفس والكاع اباوعلها مرمر تلمع
ضربت كتفي واحجي وي نفسي : كفوو لبوة ما قصرتي
تعبت حيل بالتنظيف ..
وملابسي صارت كلها مي
كمت صعدت لغرفتي طلعت ملابس وطبيت سبحت .. طلعت نشفت شعري ، مشطته وضفرته
.. طلعت خصلتين من كذلتي من كدام .. وخليت كحلة حددت عيوني ، كولش تلوكلي
خليت حمرة وردية بناتية وخليت منها شوي على خدودي
اباوع للعطور واجت عيني على واحد منهم وابتسمت
.. غلاها زايد
رشيت منه واباوع لشكلي بالمراية واحجي
.. لجج صدقة شهل جمال ؟ تعاي ابوسج
وتقربت طبعت بوسة ع المراية ..
درت وجهي وانصدمت بقسور واكف بالباب يباوعلي ومستغرب من اللي اسوي
كال
قسور: انه اول مرة اشوف واحد يكول على نفسه حلو
هزيت اكتافي بغرور ورديت
لبوة: مدام محد مدلعني .. من حقي ادلع نفسي بنفسي
شفت انرسمت على شفايفة شبه ابتسامة .. وهمس بصوت رجولي هادئ
قسور: انغري بعد اكثر .. يلوكلج
دنكت راسي خجلت من نظراتة وافرك بأيدي ..
انتبه لنفسة ، حمحم وكال
.. تعاي جوة .. عندي حجي وياج
نزل هو واني باوعت لنفسي مرة اخيرة ، وجهي كله احمر .. واحسه يطلع حرارة
اخذت نفس وهدأت شوي ..
نزلت وراه
شفته واكف يحجي وي جدتي بالصالة .. منتجي على ميز ويفر بسويج السيارة ، مبين يريد يطلع
شافني كال : سجلي اي شي تحتاجينه من برة مسواك ، اغراض زايدة ناقصة .. قبل ليجوون الجماعة حتى كلشي يصير جوة ايدج ومتحتارين
هزيت راسي وجبت ورقة وقلم وكعدت اشوف شنو الناقصني .. كملت وانطيته الورقة كال
.. بس هذول ؟
هزيت راسي وكتله
لبوة: اي ..
قسور: غيره .. انتي ما محتاجة شي ؟
ما كدرت اخفي ابتسامتي واني اشوف ترددة وهو يسألني هل سؤال .. رديت
لبوة: لا ، سلامتك
راح هو واني كعدت وي جدة بالصالة نتابع مسلسل ..
واكعد اشرحلها لازم كل حدث وكل شخصية شنو هي
وهي بسرعة تندمج وتصير تتفاعل وي احداث المسلسل ( ولك هذا يريد يكتلك من دهر صابك ) .. ( خايبة يمفلوكة ما يحبج شابع بوس وي ذيج الفرخة )
وتكعد تتوقع شنو حيصير .. والمشكلة دائما يطلع توقعها صحيح
لشوي اندك الباب كمت افتحة وعطت لمن شفت عمتي بوجهي .. كمزت بحضنها وهي تبوس بيه ، حيل مشتاقة الها
جايات وياها البنات كلهن ما عدا ريتاج .. رجلها ما خلاها تجي
وقبل لا افوت تفاجأت بعمو أسر وهو يفتح الباب وينزلها من السيارة ..
اول ما شفتها دمعتي نزلت ، شافتني هي هم بجت واجت ارتمت بحضني .. شبكتها حيل واشتم بريحتها
واباوع لوجها .. شلون ضعفانة ومتغيرة ولا عبالك حور القديمة
لبوة: هاي شصاير بيج ؟
ابتسمت بخيبة وورة ابتسامتها حجي هواي ما كدرت تحجي .. كالت بصوت ناصي حتى لحد يسمع
حور: اني زينة .. انتي شلونج ؟ اشوفج منشنشه صايرة تخبلين على عين ذاك الرجال
تحجي وتغمزلي .. خزرتها واني اكتم ضحكتي
لبوة: لج ادبسز شو طالعة عينج
حور: هههههه هي اختي منو
لبوة: والنعمم والنعم .. ما كتيلي شعجب جاية ، كلت هسه زوجها النفسية ميخليها تجي
حور: لا وين اصلا هو كلي روحي .. صار اسبوع اني يم اهلي وخابرتة كتله اريد اروح ما اعترض
لبوة: الحمد لله عاد فرصة اشوفج واشبع منج .. بس شعجب اسبوع ؟ مو عوايدج تبقين هلكد
ذبت حسرة وكالت
حور: اوووف لبوة شحجيلج وشكول على ظيمي العايشتة هناك
لبوة: سوالف عمتج الحية مو ؟ والله طول عمري اكول هل مرة ما بالعتها وما خاب ظني بيها
فات عمو أسر للبيت شايل الجنط وكال
أسر: دفوتوا عمو جوة .. جا انتن سوالفجن تصير بالباب مال شارع
دخلنه كلنه جوة
.. والبيت صار بيه صوت
واحد يحجي وي الثاني بلهفته وعيونة تحجي عن اشتياقنه لهيج جمعات
اجه قسور جاب اكل من برة ومدينة سفرة كعدنه كلنه ناكل سوة .. كملنه الغدة وطول ما احنه كاعدين محد سكت
تبرعن البنات يغسلن المواعين .. نزلت رداني وصحت
لبوة: خفة وراحة .. مو صوجچن عود كلت جايات من طريق خطية ماريد اتعبهن
ريناد: ديلا يمعودة هن كم ماعون .. بعدين عود اطلعها من عيونج
لبوة: مو اني اكول متسوين شي لله
عفتهن ومشيت كعدت بالغرفة يم عمتي وجدة
.. ولحكتني حور
.. ها ؟ شو اجيتي
حور: طردني .. يكولن مرة حامل ما نريد نتعبج
جريتها كعدتها يمي .. خلت راسها على كتفي ومغمضة عيونها بتعب
باوعتلها عمتي بشك وسألتها
سهير: عمة حور بيج شي ؟
فتحت عيونها وردت
حور: شنو ؟ شبيه ؟؟
سهير: وجهج ما عاجبني ابد .. ضعفانة وصايرة ليمونة وهاي انتي عود بعدج بأول اشهر
حور: والله عمة دا اتعب هواي .. منا تنظيف وعيال ومنا اعراض النساوة والحمل هم موتتني
سهير: شنو السالفة ؟ مو كلتي ذاك اليوم رحتي للدكتورة .. شكلتلج
حور: انطتني ادوية وكالت ورة شهر من يخلص العلاج يلا ترجعين
لبوة: وعمتج الت...
بعدني ممكملة حجايتي وغمزتلي عمة وتأشرلي على جدتي .. عود لتحجين كدامها
سكتت غصبا عليه واباوعلها كوة تحجي ، عين مفتحة وعين مغمضة
.. بلسانها هواي حجي بس غلبها النعاس
كمت صعدتها بغرفتي خليتها تمدد خطية بسرعة نامت .. طفيت الاضوية وطلعت عفتها تنام براحتها
نزلت لاكتني عمتي طالعة من غرفة جدتي
سهير: نامت ؟
لبوة: اي خطية تعبت من الطريق
تقربت عليه سحبتني على جهة ونصت صوتها
سهير: اسمعيني عمة .. مو تحجين شي كدام امي ولا تجيبيلها طاري حور وعيالها .. وحتى اختج لتضلين تلحين عليها بالحجي خليها براحتها من تريد هي تحجي
لبوة: والله متت من شفت حالها .. صايرة مومياء الله اليعلم عمتها شمعيشتها هناك
سهير: سودة عليه جابت الطريق كله تتحسر .. ما كدرت احاجيها كدام عمج .. ادعيلها بلكي الله يسهل الها بحملها وتعدي هل فترة على خير
لبوة: ان شاء الله ..
.. مر الوكت بسرعة وصارت دنيا الليل ، عمتي نامت بغرفة جدتي وياها رنيم .. والبنات بغرفتي ضلينة كاعدين نسولف
صارت ب12 كلها دخلت بسبات طلع عليهم التعب ..
واني الليل كله خلصته ابحث بالنت عن ماسكات
.. لحد ما صفيت على واحد بالكهوة
نزلت للمطبخ بيدي فلاش الموبايل .. وصرت اتحرك بدون لا اطلع صوت .. سويتة لميت شعري كعكة وكعدت اخلي بالماسك وبأذني سماعات مشغلة اغاني وادندن وي نفسي
طفيت الاضوية ورجعت صعدت فوك ..
بعدني مداخله لغرفتي ولمحت خيال خطف
درت وجهي بسرعة واباوع للمكان واضوي ،
.. ماكو شي
مشيت لباب السطح شفته يلا كدرت اجر نفس
.. طلع الباب ما مقفول ويتحرك
قفلته ودا امشي راجعة للغرفة .. محسيت اله ايد تنحط على حلكي واندفعت ع الحايط
حسيت بشي ينبت بخصري ، فتحت عيوني مصدومة ووكع الموبايل من ايدي
.. لو سمعتلك نفس انقلك لعالم البرزخ
جمدت بمكاني من عرفت صاحب الصوت .. شال تليفونة فتح الفلاش وخلاه بوجهي
فتح عيونه على وسعهن متفاجأ ..
قسور: هاي انتي يبلوة الله !
غمضت عيوني بقوة من شدة الاضاءة
شال ايدة من حلكي .. جريت نفس قوي ، اختنكت
وقبل لا احجي اي شي همس بنبرة عصبية
.. شعندج تفترين مثل العتاوي اخر الليل ؟ عبالي حرامي طب من السطح جان فرغت المسدس براسج
اجيت احجي بس سكتت للحظة واني انتبه لقربة مني .. وجهة مقابيل وجهي وعيونه بعيوني ، انفاسة الحارة تلفح بشرتي .. وعيونة الحادة مسبلة بنعاس
انتبهت لايدي صايرة على صدرة اللي ميغطي الا فانيلة رجالية سودة .. نزلتها بسرعة
تهت وتاه الكلام مني .. ما عرفت انطق حرف
وبدة الشعور بالتوتر يسيطر على خلايا جسمي
انتبه للمسافة اللي بيني وبينه ..
ابتعد عني
ضل يباوعلي ركز بوجهي ومضيك عيونة : هاي شمخليه لوجهج ؟
عدلت وكفتي ورديت
لبوة: ماسك
قسور: عليش ؟
لبوة: حتى ازيد حلاة
قسور: انتي حالية من الله متحتاجين
حجاها وتقرب رفع ايدة ويمسح بوجهي بأطراف اصابعه
لبوة: لاااا قسور
قسور: وجعة ابوي صوتج الوادم نايمة ..
باوعتله مبوزة بوجهة
لبوة: هاي ليش عود ؟
قسور: حتى ما تخرعين واحد ثاني .. وداعت ابوي من لمحتج بالظلمة ختمت القرآن لبالي عفريت بالبيت
حصرتني البجية من تشبيهة ..
لبوة: بعد فلا يطخ لساني على لسانك
حجيتها ومشيت واسمعه يقهقه بخفة وراي
.. ابتسمت على ضحكتة
يربي صوتة شكد حلو ..
نمت بذيج الليلة واني افكر باللي صار وساعات اتذكر كلامة واضحك
.
: والله ازعل عليك وبعد لا تشوفني وجهك .. واني منتظرك عود توكفلي بهيج يوم تالي الغريب الكاه يمي وانت ماكو
تنهدت ورديت
مصطفى: يا خوية كتلك ما اكدر .. اوكفلك بيوم عرسك
يوسف: صدك تحجي مصطفى ؟ المفروض انت اول الناس الكاك بوجهي .. واني عود اعتز بيك واشوفك اكثر من اخ تالي حتى مشية وياي متروح
مصطفى: اعذرني والله الدنيا كلها طالعة من عيني ومالي خلك لشي
يوسف: تخاف تجي وتشوفها ؟
مسحت وجهي بتوتر وكتلة
مصطفى: معليه..
يوسف: ياخي شكد جبان انت .. شلون جنت ماخذ نظرة عليك واكول ضارب الدنيا بعرض الحايط ما يهمه شي .. تالي تتعلعل 3 سنين من ورة مرتضى وامثالة
مصطفى: لك والله لهسه كسرتة تدك بيه .. شلون بيوم من الايام جنت اشوفة اخو الي
يوسف: بعد هاي هي منكدر نغير شي .. اللي راح راح ووله .. هم عايشين حياتهم انت هم عيش .. انكطعت عن العالم كله ، ترة هم ما كالوها هيج
سكتت استمع لكلامة ومحاولاته وياي
.. اردف بجدية
.. اسمع والله ثم والله اذا ما اجيت بعد لا اعرفك ولا تعرفني
نهى كلامة وسد التليفون بدون لا ينتظر يسمع ردي
..
ناس رايحة وناس جاية
.. وكلها مخبوصة
هاي اللي تركض وذيج اللي تكدر وتقيس ، وثانية كاعدة على جهة تتمكيج ..
طلعت من الحمام المنشفة على راسي واحجي عليهن
لبوة: غضب الله على راسجن .. كلبتن الغرفة كلب ، كلنه خطار ع العين والراس بس مو هيج
ريناد: انجبي لج .. تعاي خلصيني سويلي شعري صار ساعتين منتظرتج ، شنو بس انتي حمامج ابو الخمس ساعات
لبوة: اي اني اطول بالسبح
وكفت كويتلها شعرها لبين ما نشف شعري ، رجعت هي تكوي الي .. صار سرح مي واباوع بالمراية واميل بيه يمنى و يسرى
حور: طولان
اجاني صوتها وهي تكعد ع الجرباية وتفتح شعرها ، وكملت
.. عكسي اني ، من صرت بالسادس ولهسه شعري خفيف ويتساقط
لبوة: ديضوجني حيل .. وكلما اكول اروح لصالون اكصة يروح من بالي
حور: اكعدي واسكتي لتكصين منه شي .. حلو يخبل ولايكلج
لبوة: ما اعرف اريد اسوي بيه تغيرر .. يمكن راح اصبغة
ريناد: لا ولج ديري بالج .. هاج شوفي هذا كدامج صبغته واحترك لحد ما بترتة يلا ارتاحيت
تحجي وتأشر على شعرها الاسود ونهايته مخصل باللون الاخضر العشبي ،
جان قصير واصل شوي جوة من اكتافها
بدلت ومكيجت مكياج خفيف والبنات كملن قبلي ونزلن .. لبست جبة اسلامية فوك فستاني ونزلت بيدي شالي وتليفوني
شافتني عمتي ، كالت
سهير: يلا عمة وين صرتن تأخرنه
لبوة: يلا كملنه ما عدنه شي
سهير: انتي رايحة هيج ؟
استغربت سؤالها وباوعت على نفسي
لبوة: شنو شبيه
سهير: قصدي على شعرج .. لمي بقراصة لو تضفرينه لتخلي محلل .. انتي شعرج صلوات طويل يروحن يزركنج بعين
لبوة: يبوو عمة اني عود ضامة روحي من جدة حتى لتشوفني .. تجين انتي تعيدين عليه نفس الكليشة
سهير: ولج هو اني احجي الي غير علمودج يحظي .. انتي شعرج ثخين وطويل وعلي بس يشوفنه توكعين وتخربين علينه وكولي ما كالت عمتي
لبوة: الللله اكبر .. ماكو غير لبوة يحسدنها .. حتى بهاي حظي مصخم
سهير: دتعاي المة الج قبل لا يجي عمج ياخذنه
ضفرته الي خسارة بيه الكوي والتسريح
.. خابر عمو جهاد على عمتي وكلها وصلت السيارات للعمارة ورايحين بوجهم لبيت داوود
رجعت عمتي خابرت عمو أسر وكلتله حتى يجي ياخذنه ..
ومن وصل تفاجأنه وياه مصطفى بسيارته ...
نزل سلم .. واباوع لشكله شلون متغير
لحيته طولانة وصاير ضخم
واكف يحجي وي عمو وانتبهلي اباوع عليه .. غمزلي ، ابتسمت على حركته وتقربت .. كتله
.. انت شتاكل شتشرب ؟ شو صاير صاك
مصطفى: اه ؟ انتي هيج تكولين
لبوة: والله ابن العم بيناتنه الحجي .. صاير تشلللللل
مصطفى: عاد انتي هم صايرة مرة .. ادور بالوجوه ما عرفتج
ضربته بكتفة
لبوة: اهوو صوفة .. بدينه
مصطفى: بس لو تبطلين تصيحلي بهل اسم اني بخير
لبوة: واحلى ابو الصوف هم
مصطفى: جا اني طلي وتكليلي ابو الصوف ؟؟
جنه نحجي وطلعت حور من البيت تحجي وي عمتي ما منتبهة لمصطفى
اول ما سمعها بسرعة صارت عينه عليها واشوف نظراته ولهفته عليها .. شافته ابتسمت واجت تسلم عليه
حور: شلونك خوية مصطفى
هي حجت هيج وهذا عبالك انضرب على راسة
.. دار وجهة بدون ليرد وفتح اول دكمتين من قميصة ووجهة صار احمر ، اختنك
مصطفى: زين .. اني كلش زين
حجاها ومشة من عدنه صعد سيارتة .. ضلت تباوع متفاجأه ودارتلي
حور: شبيه مصطفى ؟!
لبوة: ما بيه شي .. بس ضايج شوية من الشغل وابوه يلح عليه .. تعرفين عمو أكرم بعد
حور: خطية .. عمو أكرم ولا يخلي متهني
جانن سيارتين لان احنه هواي ومتكفي سيارة وحدة
راحن جدتي وعمتي وحور وياهم ريتان وي عمو أسر .. واني وريناد ورنيم وي مصطفى نمشي بوراهم
جنت اني ضايجة على مصطفى
.. وهو هم مطنكر وعاكد حواجبة الطريق كله محد فتح حلكة
لحد ما صاحت ريناد
ريناد: يابة صدك جذب .. رايحين خطوبة لو فاتحة .. دشغل اغاني ، ردح خلي ناخذنله هزة
مصطفى: تردين تهزين بنص الشارع والناس كلها تباوع ؟
ريناد: يااا ولكم هذا منو اليحجي ؟ متغير شو ولا عرفتك .. عشتو انت النكول عليك سبورتي
مصطفى: ريناد مالي خلكج اكرمينه بسكوتج .. راح اشغل اغنية والتركص اشمرها من الجامة
ريناد: شطلعت هاي .. طفيها عمي منريد لو ما حاجية احسنلي
مصطفى: بعد احسن
بالشافعات يلا وصلنة لبيت العروس .. لان مصطفى خلص الطريق كله ضايج وكل شوي يخابر ويصيح بالتليفون .. كلنه لاحظنة وضلينه صافنين عليه
معقول هذا مصطفى ؟؟ ..
نزلنة وجانت سيارة عمو أسر سابقتنه ..
واباوع للشارع متروس سيارات
.. وين عينج
باوعتله وكتله
لبوة: هاي شدعوة هلكد سيارات .. شنو هاي كلها النه ؟
مصطفى: البو رعب بعد مو هينين .. ابن عمج حتى شيخ العشيرة جايبة
لبوة: والله جنه سواها يوسف صدك من كال اجيب بغداد مشية للعمارة
مصطفى: هو غير ما ضل واحد ما عازمة .. دكاترة واصدقائة من الكلية هذا من غير كرايبنة سدوا نص الشارع
لبوة: يوسف يعزم وداوود يبتلي .. بلة وين يكعد هذول الناس
مصطفى: ينصبولهم جادر يمكن .. بس بيته جبير حتى لو الباقي يوكفون برة
اهتز موبايلي بيدي ..
لبوة: يا هاي عمتي
مصطفى: دمشي طبي جوة .. البنات صار ساعة من فاتن
دخلت للبيت ووصل لمسامعي صوت الديجي والاغاني العالية ..
اباوع بالوجوه ما اعرف احد ، لان النسوان بس كرايبهم متروسة الصالة
صارت بوجهي عمة أميرة سلمت عليها
أميرة: تعاي ليش واكفة .. عمتج والبنات يسألن عليج
اخذتني لعمتي والبنات لكيتهن كاعدات .. شافتني عمتي
سهير: وين صرتي شو تأخرتوا
لبوة: يبوو عمة خليها سكته .. ابن اخوج ضايج ولازم نتحمل مزاجة الترابي
سهير: منو ؟ مصطفى
لبوة: اكو غيرة
سهير: ياا شجاه هذا نوب
حور: تعاي اكعدي ليش واكفة
لبوة: هسه بس انزع الجبه والشال .. متت حر
أميرة: تعاي للغرفة .. وتين تسأل عليج
مشيت وراها .. واحنه نمشي تعرفني على هاي وذيج
.. طبيت للغرفة وشفت وتين ببدلة قصيرة باللون الزمردي ووتسريحة رافعة شعرها وي مكياج بارز ملامحها
باوستها وكعدت يمها .. جانت بعدها مخبوصة والبنات متجمعة يمها
لبوة: شوكت رجعتي من الصالون ؟
وتين: قبل شوي ما صار هواي .. خااب خليها سكته احسن ساعة السودة من اجيت وطبيت للبيت
لبوة: خير شكو
وتين: غير اول ما فتت للبيت وصارت بوجهي مرة كرابتنه كومي وطشي الجكليت بوجهي .. واجت وحدة بعيني وصار ساعة اعدل بالمكياج .. ااااخ شكول عليج
كمت اضحك وكتلها
لبوة: يلا ما صار شي .. حلو مرتب ما بيه شي
تقربت عليها وهمستلها
بس وربي طالعة كيك .. اليوم المحروس شينومة الليل بهاي بدلتج الفضيحة
احجي وءأشر بعيوني على صدر بدلتها .. طكيتها بضحكة من شفت خدودها احمرت من الخجل .. ومدنكة راسها تحاول تخفي ابتسامتها
.. لج علينه وتين البين .. عوفي سوالف المستحة اليوم يومج فوتي بزودج ، بيج وما تكدرين تحاولين تغرينة حتى يستعجل بموعد العرس
وتين: لا حبيبي ما كال شي .. كلي نكمل تجهيزات العرس ورأسن نتزوج منضل هواي
لبوة: مخططيلها قبل لتصير مو هينين
كامت تضحك
وتين: شعبالج لعد
التمت الناس وكاموا يحجون وبدوها بآيات قرآنية ونوب دخلوا بالموضوع وطلبوا وتين ليوسف كدام الحاضرين وابوها انطه الموافقة وقروا الفاتحة .. بعدها دزوا ورة وتين حتى يبدي السيد يعقدلهم
لبسوهة عباية وكبوس فوك راسها .. وخلوهم بغرفة وي السيد والشهود ع العقد
جنت اني واكفة على جهة منعزلة ومنتظرة عمة تجي
.. لحد ما شافتني واجتني تلهث بيدها ماعون الكيك
أميرة: هاج اخذي .. فلك صابهن دافناته بآخر الدنيا انشلع كَلبي
لبوة: سودة عليه جان عفتي
أميرة: دكلي يمعودة اكلي هسه ادزلج عصير
شكد استحيت منها .. بس نوب ما اهتميت واخذني الواهس وكعدت اكل بالكيكه بشهية ، جنت ما متغدية
بوكتها وهسه صارت دنيا المغرب واني ما ماكلة
وكفت اباوع للبنات وكم مرة شلون متجمعات على باب الغرفة يتنصتن عليهم وريناد حاشكة روحها بنصهن .. واني اكل واباوع عليها
اجت حور كعدت يمي .. كتلها
لبوة: هاي شكاعد تسوي ؟
احجي وءأشر على ريناد
.. ضحكت وكالت
حور: شمدريني .. شو بسرعة اندمجت وحاسبة روحها من اهل البيت
اجت عمتي شافتها وكالت
سهير: يااا ولكم هاي مو بنتي .. شعدها بنص الناس الغربة
لبوة: ذبت جرش وياهم عمة
راحت عليها جرتها وجابتها كعدتها
سهير: فضحتينه الله يفضحج اكعدي هنا وانجبي
ريناد: هاي شبيج يمة غير نسمع السيد شلون يعقدلهم
سهير: اثكلي يمة اثكلي .. الثكل حلو
لبوة: اي لجج .. اثكلي يلا
دارت عليه وتباوع على ماعون الكيك بيدي
سهير: وانتي الثانية شبيج ؟ شنو ولجن انهديتن ع الناس ، اليشوفج يكول ما ماكله
لبوة: عمي بطلت حتى بعد ما اكل
ريناد: عشتوو هو انتي شمخليه بالماعون
جاي نحجي وانصرعنه بصوت الهلاهل الترست البيت
.. الحمدلله تم العقد وطلعوا يوسف والسيد برة يتباركون ليوسف
وجابوا وتين للصالة كعدت على الكوشة .. وشالن من عدها البركع .. اباوعلها الفرحة تارسة عيونها
تنهدت بحسرة .. اااخ هم يجي هذا اليوم يالبالي ؟
مشيت باركتلها ..
وشغلن الاغاني وبدة الركص
عاد اني وريناد ما قصرنة .. وحور كل ما تريد تكوم تهز شوية وتعيط بيها جدتي
زهدية: خايبة بت حبلة .. ليروح الفرخ يطيح اكعدي واسكتي
لبوة: شنو جدة لازكتة بعلج ؟
زهدية: ميلي مني انتي روحي كملي هز .. هاي البت امانة نوب يروح يصير بيها شي لو بالجاهل ويجون اهله يهدون علينه هم شكلك ابنه
حور: لتخافين محد راح يهتم
حجتها بغصة وتبتسم تحاول تداري الغصة اللي بصوتها .. كومتها من ايدها
لبوة: شو دكومي يمعودة .. هي الدنيا خلصانه
وجريتها بالنص اني وياها ونضحك
.. وهناك جان اشوف اكثر شخص امقته واكرهة بهل دنيا
جانت كاعدة واباوعلها تسولف وتضحك وي النسوان .. مشيت كعدت بصف عمتي وتقربت احجي وياها بصوت ناصي
.. هاي شجابها ؟
سهير: ابوج وعمج جابوهن هي ومرتة الثانية وجيهان
لبوة: بلة وشعدها جاية ؟ شنو احد عاتب عليها
سهير: ياا شلون غير المرة عزمتها
لبوة: يا مرة ؟
سهير: أميرة
لبوة: حقها .. غير متعرف بسوالفها
سهير: هسه شلج بهل حجي مو جنتي تضحكين وتركصين .. خليها هي بحالها وانتي بحالج
لبوة: ما اكدر اشوفها عمة ماا اكدررر .. اختنك بكل مرة اشوف وجهة .. دشوفيها شصايرة مكلوبة خلقتها عبالك مشعوذة
سهير: الله اليجازيها ان شاء الله .. كومي لتضوجين البنات هم يشوفنج ويضلن يسألن
لحظات وكالن راح يفوت يوسف كامن هن يلبسن بشالاتهن ويتسترن ..
كمت للمطبخ ماريد اشوف ميسون
جانت عمتي أميرة هناك .. هو كالوا يوسف راح يطب و الحبايب لزمن سرة ع الشباك يشوفنه والمتزوجات كامن يندبن حظهن .. واسمع وحدة تكول
.. شنييي بقلاوة
: لج دباعي خاب فلكنييي كوون .. يشبه الممثل النبي يوسف
راحت عمة أميرة جابت سجاجين وصاحت بيهن
أميرة: يلا حبايب لو ترحن تكتلن زلمجن لو تكتلن ارواحتجن .. اني ابني حدة 4 بس ، ما اكدر ازوجة اكثر
هي حجت هيج وهن ضحكهن صار بفلس .. اجت جرتني ومشينة ثنينة للصالة نضحك ..
لبوة: مزقنة عمة .. حضريلج خرزة زركة
أميرة: يبو يعمة خلصن عمرهن يتبطرن متعودة عليهن .. بس خوفي صدك على هل ولد من عيونهن
لبوة: لو رايحة كايلة لوتين جان كامت هدت عليهن
أميرة: حرامات فاتتني
طب يوسف للصالة وتعالت الهلاهل والجكليت بكل صفحة .. واني الم واكل واباوعلهم
كامن عماتي يهوسلة .. وتفاجأت بجيهان وميسون بالنص يدبجن وحدة مكابلة الثانية
خطية مكطعات روحهن على كثر محبتهن ليوسف ..
وكف باس وتين من راسها وكعد يمها ع الكوشة ..
اباوع لجدتي تململت
لبوة: ها جدة ؟ رايدة شي
زهدية: خايبة دخت انه مالي بهل هوسة .. ما تخابرين واحد من الولد يجوون ياخذوني للبيت
لبوة: ليش بعدنه كاعدين
زهدية: خايبة اكلها ما بياش حيل
شاورت عمة سهير واجت عليها حجت وياها .. صدك هي متحمل الصوت العالي
سهير: وشلون هسه .. تروح وحدها شنو ؟
لبوة: لا اني راح اروح وياها وانتن ابقن عود
سهير: لا وين ترحين انتي .. خليني اني اروح
لبوة: لا لا عمة ضلي يم البنات انتي مياخذن راحتهن اذا يشوفنج ما موجودة .. اني هم مليت راح اروح ارتاح هناك شوي واكلي لكمة ، جوعانة
سهير: ومنو ياخذكم
لبوة: ما ادري .. هسه اشوف الولد منو فارغ بيهم
خابرت على مصطفى وكتله وكال اطلعن ..
صدك بدلت وكومت جدتي بعد ما تعذرنة من عمة أميرة ومرت داوود .. وباركت جدة ليوسف ووتين وخلت بيدها بتوت وطلعت
لكينه مصطفى واكف بالباب .. صعدنه السيارة ومشينة وضلت جدة الطريق كله تحجي وياه وتسأله عن حاله وتعاتبة لان ما يجي يشوفها
ومن بين الحجي سألتني جدتي كدامة
زهدية: خايبة صدك ما سألتج يمدهربة .. اختج بيا شهر
هي حجت هيج .. وهو ضرب بريك قوي وكف السيارة ويباوعلي من الجامة بعيون متسعة من الصدمة
مصطفى: حور حامل ؟
زهدية: خاب اي شمالك اجيت تدعمنه
تمالك نفسه .. ورجع مشة بالسيارة بس حسيت وضعه كله تخربط وكل شوي يمسح على وجهة ومبين صار اعصاب
وصلنة كدام البيت .. نزلت جدتي ساندها ايدها تمشي على عكازتها فاتت للبيت .. وقبل لا ادخل كتله
لبوة: مصطفى ..
باوعلي عيونة حمر لازم ستيرن السيارة بقوة بحيث اوردة ايدة كلها بارزة
.. كول يا الله خوية .. راحت بعد تزوجت وراح يصير عدها طفل انساهة وشوف انت حياتك
مصطفى: ااخ لبوة تكليلي انساهة ؟ شنسه ؟؟ .. سنة ، سنتين ثلاثة .. من جانت قطعة حمرة وهي متربعة بكَلبي .. لتكليلي انساهة ، بس كولي الله يصبرك
.. بس شكول ؟ الله يهنيها ويوفقها
كال اخر كلماته وشخط السيارة وراح
.. انعصر كَلبي عليه ، ان شاء الله يلكه بنت الحلال اللي تسعده
دخلت للبيت نزعت الجبة والشال واني بالمطبخ .. واباوع من الجامة مال باب اللي عاكسة صورتي ، فليت شعري واعدل بيه
صارت بيه كسرة خفيفة صار مموج .. زاد شكله جمال
مشيت للصالة ووكفت اطكطك صور ..
غافلة عن عيونة اللي واكفة تراقبني بصمت
درت وجهي ومدنكة ع التليفون اجاني صوته يحمحم
.. رفعت راسي بسرعة متفاجأة وجان اشوفة واكف بالباب وداير وجهة
ركضت جوة واني ميتة بدمي .. عززة وشافني هيج ؟
.. جنت لابسة فستان للركبة من فوك نص ردان بس ضيك من الصدر ومفصل جسمي ورجلية كلها طالعة
ضليت اكل باصابيعي .. لحد ما كمت بدلت
ولميت شعري وكمت طلعت من الغرفة
سمعت صوتة جاي من غرفته .. مشيت جان باب غرفتة شوي مفتوح لكيته يخابر بالتليفون
كمل مخابرتة واجيت ادك الباب .. بس رجعت بسرعة بعد ما شفته نزع دشداشته وبقة بالداخليات
درت وجهي حتى امشي واجاني صوتة
قسور: يواشج بوية
بلعت ريكي ودرت وجهي عليه .. لكيته يباوعلي واشرلي افوت
فتت للغرفة وعيني عليه وهو يتحرك .. نزع محبسة وفتح ثاني مجر من ميز المراية وطلع علبه متوسطة الحجم .. فتحها وخله بيها المحبس وي مجموعة محابسة
نزيت من صفنتي على صوتة وهو يكول : احجي شعندج
توترت ومترددة بالكلام اللي اريد احجي ..
خليت عيني بعينه وكتله
لبوة: قسور....
ضل مركز بنظرة عليه متراقب مترقب كلامي .. زاد توتري اكثر وكَلبي دكاته كل مالها تعله حسيته حيطلع من القفص الصدري ويفضحني
.. جريت نفس واستجمعت نفسي وحجيت امتمت وعيوني تتوزع داير مداير الغرفة .. اخاف اباوع بعيونة
.. اا..انت..يعني...هم..مثلي..يعني...هيج...
قاطعني
قسور: بوية هسه انه شفتهمت منج
حجيت بسرعة
لبوة: انت هم تحس بشعور غريب من تصير قريب عليه مثلي
حجيتها وباوعت عليه منتظرة ردة فعله ..
ضيك عيونة وتقرب اكثر وعلامات الاستغراب معتلية وجهة
قسور: شلون يعني ؟
دنكت راسي وافرك بأيدي .. اجاني صوتة يحجي بحزم
.. احجي وياج ارفعي راسج
رفعت راسي .. صارت عيني بعينه ومركزة بسواد عيونة .. ورديت بلا وعي
لبوة: أحبك
ضل ساكت للحظات يباوعلي .. بعدين كال
قسور: جدتي دزتج؟..
❄❄❄❄❄❄❄
يتبع