يوسف: يلا عمي حاسب اريد ارجع .. راح انتظرك برة
حجيتها وستوني مشيت باتجاه الباب بسرعة صار كدامي وسد الباب ..
ضليت واكف مصدوم اباوعلة
يوسف: شكوو سديت الباب ؟
: دوكف مو ردت الحساب .. هسه اجيب الفلوس أوكف هنا انت
حجاها وراح قبل لا افتح حلكي وامنعة
انجبرت اضل واكف انتظرة يجي يحاسبني
صارت عيوني تتنقل بين حيطان الشقة .. لا بأس بيها مو هلكد تعبانة بس قذرة بشكل خلاني أحس بالغثيان
انتبهت لواحد منهم متمدد ومخلي مخدة جوة راسة وبيدة بطل يشرب وعيونة متشكلة عليه !
درت وجهي منه باشمئزاز
واحس الهوى كوة صار يطب لصدري من ورة ريحة الشرب
رجعت اباوعله هم بعدة عيونة عليه ، ويباوع من فوك ليجوة ...
قطع عليه تفكيري وهو يجي بيدة الفلوس ومدلي ياهم
.. مديت ايدي أخذهم ضل لازم ايدي
ضليت واكف متصنم .. كتلة بصوت
يوسف: عوف ايدي
ضحك وعاف ايدي بسرعة وهو يكول
.. هاي شبيك عصبي يحلو
باوعتلة يأشر بعيونة لواحد من وراي
.. درت وجهي بسرعة شفتة نفسة هذا اللي جان يشرب ويباوعلي واكف على حيلة وراي مباشرة
بحيث رجعت بخطواتي من شفتة هيج قريب
.. جانت نظراتهم ما تتفسر
حسيت اكو شي غريب جاي يصير
ويحجون بالاشارات حتى لا احس عليهم
من الاخير ما ارتاحيت الهم ابد
.. اخذت فلوسي ومشيت للباب فتحتة وستوني طلعت رجع صاح عليه
.. اوووكف
درتلة اباوعلة بملامح جامدة
.. اجة عليه طلع 25 من جيبة وخلاها بيدي
وكال
: هاي اكراميتك اعتبرها هدية .. ولأن انت حلو تستاهل
شافني ضليت ساكن بمكاني رفع ايدي وخله الخمسة وعشرين بأديه
.. شمرتها بوجهة ونزلت بسرعة بدون لا التفت
شغلت الدراجة ومشيت راجع .. واباوع للطريق
اني بكل عقلي جاي لهنا ؟
.. الدنيا ليل ظلمة ولا طير بالشارع وبس صوت الجلاب مسموع ، والمنطقة اللي بيها العمارة شبه مقطوعة
وصلت المطعم باوعت الساعة 2
.. هيج وكت المفروض معزلين من زمان
بس لكيت اضوية المطعم بعدها مشتغلة فتت جوة .. لكيت الحجي كاعد على واحد من الكراسي ويمة واكف رحمن مدنك
اول ما شافني كمز تقرب عليه
رحمن: لك هااي انت وين صرت ؟ صار فوك الساعة من رحت
يوسف: شسوي المكان بعيد والشارع مو عدل طسات ضليت امشي على كيف
كام الحجي على حيلة
ابو رحمن: وليدي زين ومن رجعت سالم تالي الليل .. انه كلت راح الولد لا سامح الله
جان يحجي ومبين من نبرة صوتة جان خايف خطية ومن شافني عبالك يلا كدر يجر نفس
كال،
.. روح بدل ملابسك حتى نوصلك ويانة لبيتكم مو زين بهل وكت تاخذ تكسي
مشيت للطابق الثاني ولحكني رحمن .. طلعت ملابسي ووكفت ابدل تيشيرتي واحجي
يوسف: هاي ضليتوا منتظريني ؟
رحمن: اي لك غير ابوي كلب المطعم عليه وصرت دوشك مال رزايل لأن خليتك تروح تودي الطلب
لبست ملابسي ونزلنة ثنينة
.. لكينة الحجي منتظرنة برة
قفل المطعم على ايدة وعزلنة .. صعد سيارتة واحنة صعدنة وياه وحرك
التليفون كل ساعة يدك قسور ومصطفى حركوا التليفون
عليه رديت عليهم طمنتهم وخلصها مصطفى عليه فشار
واني اضحك عليه ..
وصلني كدام الباب .. تشكرت منه هواي وراحوا هم بطريقهم .. لكيت الباب مال شارع مفتوح سديتة وفتت للبيت
صار بوجهي مصطفى
مصطفى: ابن الكلب وين دايح لهل وكت .. مو كلنة ب12 احنة بالبيت؟
يوسف: قابل العب غير بالشغل
حجيتها وفتت للصالة لكيت قسور كاعد يدخن
.. شافني ، سلمت وسألني
قسور: شكو اليوم شو حيل تأخرتوا
يوسف: هواي ناس علينة وطلبات كل طلب بمنطقة شكل يا دوب لحكنة نخلص
قسور: اجيت تكسي ؟
يوسف: لا الحجي وصلني بسيارتة
كام وكف على حيلة وكال
قسور: اذا تريد اكو اكل بالثلاجة .. انه رايح انام الباجر وراي كعدة من الغبشة
حجاها ومشة لغرفتة
.. باوعت لمصطفى واشرتلة بمعنى شكو
مصطفى: اجه تعبان من شغلة وصار فوك الساعتين كاعد ينتظرك
هزيت راسي ومشيت للحمام سبحت
.. واكف جوة الدوش ونعاد عليه كل الصار
لهسه نظراتهم شلون يباوعون وحتى طريقتهم بالحجي غريبة ومثيرة للشك ...
.....
متمدد على جربايتي واكلب بالتليفون .. اجتني رسالة ع الفيس
_ مرحبا
باوعت صورة البروفايل ، حساب بنية
( Bayan Ismael ) اسمها
رديت .. مراحب منو ؟
كالت _ عادي اتصل
دزيت .. اوكِ
ثواني ورن الجهاز بأسمها .. فتحت خط اجاني صوتها
: مساء الخير
مصطفى: مساء النور .. ما عرفت منو ؟
ضحكت وكالت
بيان: يا شنو معرفتني اليوم اجينة اني وصديقتي اشترينة ملابس من عندك
رديت مستهزئ
مصطفى: واني احفظ وحدة ثنين .. مية وحدة تفوتلي للمحل باليوم ما اركز بالوجوه
بيان: هاي شبيك عيني اني بيان
صفنت احاول اتذكر
.. بيان بيان وين مار عليه هل اسم
بعدين طخت براسي وتذكرت البنية الحلوة .. كمزت من مكاني
مصطفى: اي ايي عرفتج .. ما خطر على بالي تتصلين عليه
بيان: اعتذر يمكن دا ازاحمك بهل وقت مو
مصطفى: لا لا يابة يا زحمة .. عادي كاعد ما عندي شي
بيان: ها زين لعد .. عود بس ردت اكولك وحدة من القطع اللي اخذتها منك معجبتهم بالبيت ، عادي امرلك باجر ابدلها بقطعة ثانية ؟
مصطفى: اكيد طبعا عادي .. شوكت متجين براحتج
بيان: اوووف عفية شكد ريحتني .. عبالي حتطلع نحس مثل باقي المحلات
مصطفى: لا يبوي بخدمتج اني
طلع يوسف من الحمام ينشف بشعرة .. وكف كبال المراية شافني اخابر ضل يباوعلي من انعكاسي اللي ع المراية
حجت شوي وكالت باجر امرلك للمحل
.. سديتة منها واني فرحان ،
اجاني صوتة
يوسف: شو الضحكة شاكة حلكك .. ضحكنة وياك
مصطفى: انصادت يولد انصادت
دارلي باستغراب
يوسف: منو هي ؟
مصطفى: وحدة
يوسف: رجعت لسوالفك المكسرة ؟ انت متجوز ؟؟
مصطفى: اهووو راح يلقي خطبة براسي .. ادري بيك مو مال هيج سوالف لهذا ما راح احجيلك احسن
.. راح انام ، تصبح على خير
حجيتها وخليت راسي ع المخدة ونمت...
.....
بيوم سبت ..
جانت عطلة
بابا وعمو أكرم أخذوا جدو للدكتور يجيكون وضعة لأن وكع علينة فد مرة تخربط
وامي ومرت عمو ( جيهان ) طالعات من الصبح
ضلينة بس اني وجدتي ولبوة بالبيت
الساعة ب11 الصبح اندك الباب مال شارع
.. صاحت علينة جدة
زهدية: وينجن يبنيات .. اطلعن شوفن منو بالباب انه ما بيه حيل اكومن .. ووينجن ولجن
حجيت واني امشي
حور: اي ايي جدة راح اروح اني افتحة
خليت شال على راسي وطلعت صرت ورة الباب صحت
.. منوو
اجاني صوتة
.. اني مرتضى
فتحت الباب ومديت راسي
حور: هلو مرتضى
حسيته تفاجأ لمن شافني وضل يباوعلي
.. توترت وهو هم دنك راسة وكال
مرتضى: ها هلا حور .. عود اجيت اشوف الحجية دازة عليه
رديت بسرعة متوترة
حور: ها اي تفضل فوت
حجيتها وفتحت الباب اسويلة مجال حتى يفوت
باوعلي وكال
مرتضى: احم سوي طريق
فد استحيت بلحظتها
.. وانتبهت لنفسي اني شجاي اخبص
رحت ركضت بسرعة جوة متفشلة ..
صارت بوجهي جدتي
زهدية: ها ولج منو دك الباب
حور: هذا مرتضى يريدج
طلعت تمشي على عكازتها
.. واني مشيت للسنك فتحت البوري وصرت اذب على وجهي مي بارد
.. احس روحي صخنت وكلبي يدك من الموقف
صرت اسمع صوتهم وهم يحجون بالهول
نزلت لبوة من فوك .. كالت
لبوة: منو هنا ؟
حور: مرتضى
باستغراب
لبوة: شعجب ! صار هواي مجاي علينة من وكت مراحوا الولد للعمارة
حور: والله ما ادري .. جدتي دزت عليه
هزت راسها ومشت باتجاه باب الهول وخلت اذنها تتسمع .. تقربت عليها وهمست
.. هاي شتسوين ؟
اشرتلي حتى اسكت
.. واجتنة أصواتهم
مرتضى: جدة بربج واني وين الكالج هيج واحد .. شمعرفني بهل سوالف ، شنو مرة لكيتيني وافتر من سيد لسيد حتى اسوي سحر لرجلي
زهدية: خاب يالاغبر وعود انه معتمدة عليك .. ما بيك خير كون هذاك الخبل مصطفى جان بيوم راح سوة الكتله عليه واجاني
مرتضى: عمي هسه اني شحاجي .. بس كتلج صعب الكة هيج واحد يشتغل بهل سوالف لازم اوصي ناس يعرفون بهيج شغلات
زهدية: اي ميخالف وصي وحتى إذا تريد فلوس انطيك .. بس بسرعة مو تبطي عني
مرتضى: ها جدة شو مستعجلة شعندج .. خاف تردين تسوين عقد لسان لشيخ علوان
زهدية: يا يا فلكك كون نفس الطينة انت وذاك ما تتغيرون ابد .. كوم ولي من وجهي خفت هل شوفة ما تنطون وجه
اسمع صوت ضحكاتة ويكلها
مرتضى: افا عليج مرت الشيخ انتي تأمرين واحنة ننفذ .. إن شاءالله هل كم يوم واردلج خبر
زهدية: اي بعد جدتك مو تنسى
أصواتهم اختفت الضاهر طلعوا برة
.. باوعت ل لبوة لكيتها صافنة
حور: شبيج وين صفنتي
لبوة: ها ماكو شي
حجتها ومشت من يمي .. مدري شصايرلها هل كم يوم
احس ضامة شي ومتريد تحجي
.....
جابوا جدو من الدكتور ووجوهم متبشر بخير
مشوا خلوه بغرفتة كوة يمشي وتعبان ولازمينة عمي وابوي كل واحد من جهة
.. حسيت بكسرة بداخلي
ووكت وشفت جدو بهل منظر
جانت صدمة بالنسبة الي
مو نفسة هذاك الرجال القوي اللي حتى ولدة واحدهم تارسة الشيب يتراجفون من يوكف كبالهم
وكفت بباب الغرفة وجدة تبجي وتسأل بيهم
زهدية: تحجوا ولكم فتيتوا كلبي .. شبيه ابوكم ؟ شكال الكم الدكتور ؟؟
دنك راسة عمو أكرم وحجة بأنكسار
اكرم: يمة ابوي شاكين بيه ذاك المرض
هو حجة هيج وجدتي عاطت
من العيطة فزيت بمكاني .. جسمي كلة انخض
واحسه يرجف
زهدية: يمممة هيج الدكتور كلكم ؟؟ خاف متووهم ولكم .. أخذوا على غير دكتور هذا غشمر
اشرف: يمة شنو السالفة كولي يا الله .. بعدنة هسه احنة نكول شاكين لا سامح الله يجوز مو اكيد .. سوينالة تحليل وبعدة ما طالع .. بلكي يطلع ما بيه شي
ضلت جدة تنعى وتبجي وابوي وعمي ضلوا يحجون عليها لان جدو جاي تعبان وهي تبجي فوك راسة
.. طلعوها من الغرفة وخلوا يرتاح
رجعن ميسون وجيهان من السوك شافن الأوضاع متخربطة بالبيت وعرفن بالصار .. ولا عبالك ولا مهتمات
وكعدن بسطن بالهول ويطلعن بالغراض ويحجن
احسهن متقصدات يسون هيج
شنو من كلب عدهن ..
ميسون: تعاي حور يمة وينج
حور: ها ماما
ميسون: هاج اخذي هذا كدري شوفي على كدج ؟ حتى إذا بي اشكال ارجعة
هي تحجي واني اباوعلها بحقد
.. وجدتي كاعدة على صفحة مدنكة
وخطية وجهة كلة انكلب
وهاي تحجي ولا جنها
باوعتلي وصاحت بخزرة
.. ها خير شكو تباعين ؟؟ لو هم دنت نفسج ع الملابس
ضليت ساكتة .. بلة هاي شحجي وياها
كامت لمت غراضها وعلاليكها من الكاع وحجت
.. امشي يمة حور امشي .. اكو ناس عيونها تكتل تريد تموت من الغيرة
حجتها ومشت واني اباوعلها صفح
.. اجت عليه حور مخنوكة وتحجي فشلانة
حور: عفية لبوة لتزعلين من ماما .. هي ترة والله تحبج بس.......
قاطعتها
لبوة: حور بداعتي اسكتي اني اعرف شي وانتي تعرفين شي واحنة ترة بعد مو صغار .. روحي شوفيها لتضل تصيح نوب عليج
باستني وكالت
حور: فدوة لكلبج ادري بيج متزعلين
حجتها وراحت
.. كمت اني على جدة
لبوة: جدة ما جوعانة ؟ اخليهم يصبون غدة
هزت راسها ب لا
.. زين لعد شتردين ، مشتهية شي تردين اجيبلج؟ اخابر عمة سهير تجيج ؟؟ عفية بس احجي لتضلين ساكتة
رفعت راسها باوعتلي وجرت حسرة
زهدية: ولج يمة ما بيه شي شسوي بعمتج خليها حايرة برجلها وبنياتها
لبوة: لعد شبيج هيج مكسورة ومتحجين ؟ عفية ترة محد الي من بعدكم انتي وجدو ، مو ثنينكم توكعون عليه
حجيتها ونزلت دموعي اخذتني لحظنها
.. وصارت تمسح على راسي وتسكت بيه
زهدية: سودة عليه يجدة .. انتي هم مظيومة من جنتي لحمة حمرة لا اماية بيها حظ وعرفت تاخذج بحظنها ولا اب بيه حظ ضال بيد النسوان
حجت كلمتها الأخيرة وهي تجر حسرة طويلة
.. مبينة محملة هواي على ابوي ومرتة
سألتها بفضول واني اشيل راسي
لبوة: شجنتي رايدة من مرتضى ؟
باوعتلي وابتسمت
زهدية: فلكج يمدهربة جا انه وين احجي وانتي وين تحجين .. شمدريج انه رايدة شي منه
كعدت تربعت كدامها واباوع للباب اخاف احد يجي
.. همست
لبوة: علمود سالفة مرت بابا مو ؟
زهدية: اششش ولج اسكتي ليسمعونج
لبوة: حبابة حبابة جدة احجيلي قابل اني صغيرة .. غير اني كتلج عليها ؟
زهدية: ولج جدة اخافن عليج والله .. جم مرة اكلج جوزي منها عوفيها وانتي ما تنردين، اسمج تطارديها على ساعة تشوفج وتسويلج سالفة هل متخاف الله
ضليت صافنة
لبوة: يعني شتسوي ؟
زهدية: غير مرة اسولفلج .. كومي مني شوفيهن محضرات الغدة ؟ خلي يصبن نكعد نتغدة انه وياج وجهج صاير اصفر
ابتسمت وحجيت
لبوة: اي والله جوعانة
زهدية: جا حقج يمفلوكة اذا للظهاري يلا تكعدن .. لا ريوك لا لكمة مثل العالم
كمنة اني وياها وهي ترزل بيه .. نوب انكلبت عليه واني اضحك ،
اهم شي متضل طافية ومكسورة ...
.....
مرن كم يوم واني حتى دراستي هاملها
ومكابل التليفون 24 ساعة احجي وي بيان
بحيث ميمر يوم اذا ما احجي وياها واجت للمحل اكثر من مرة ..
ما جنت حاس على نفسي
.. حيل تعلقت بيها
لحد ما بيوم خابرتني .. كالت
بيان: تعالي للبيت
مصطفى: لبيتج؟ وين اجيج يمعودة
بيان:............
مدري شلون كدرت تقنعني بيومها وتواعدت وياها ورحتلها للبيت .. وصار اللي صار
ما جنت محسب حساب للي جايني ...
.....
كاعدين اني وامي كبال السيد واني كلبي يرجف
ما مرتاحة للشغلة ابد وكلبي ناغزني
باوع علينة وهو يستغفر بعد ما حجتلة أمي على وضع ابوي ..
كلها :
حجية زوجج مشرب.............................................
❄❄❄❄❄❄
يتبع