غموض جارنا

بارت 20

غموض جارنا

الكاتبة يمامة

أرينا

ما حسيت على نفسي الا واني اصيح بعلو صوتي

_آدممم

وبقوة انضرب راسي بالسيارة وجان اكو ميدالية حديد حسيتها  جرحتني  وحسيت شي حار مثل المي نزل على گصتي عرفتة دم

باوعت لآدم شفتة لازم الستيرن بقوة يحاول يسيطر عالسيارة وبالگوة گدر يسيطر عليها

انتبه علي وگال  بصدمة: أري

بسرعة اخذ كلينكس وتقرب مني لزم راسي ومسح الدم باوعت لايدة وشفت الدم اتخبلت صرت ابجي بقوة واگول راح اموت آدم لا تعوفني حباب راح اموت

لزم ايدي وگال ما اعوفج بس لا تبجي....

قاطع كلامنا صوت طلقة ثانية ردت اصيح من الرعب بس آدم بسرعة سد حلگي

باوع ليورة وتغيرت ملامحة للعصبية والغضب گال وهو صاك على سنونة: ذولة ولد *****شعرفهم بمكانة ماكو غير جماعة فهد

فتح الجكمجة وبسرعة طلع سلاحة وماسك اسود لبسة ويا نظارات سود بقيت اباوعلة واني فاتحة حلگي ما اعرف ليش سوة هيج 

باوعلي بنظرات حنونة وگال: اري اني راح انزل واشوف شيردون بس انتي ابقي بالسيارة ولا تتحركين ولا تحجين اريد صوتج ما يطلع  تمام لو تشوفيني اموت لا تنزلين تمام وهسة الزمي الكلينكس زين علمود يتوقف النزف هو جرح بسيط لا تخافين تمام

وخر ايدة وبسرعة حطيت ايدي بمكانة باوعت لعيونة بخوف لزمت ايدة وگتلة: امانة آدم لا تروح و تعوفني وحدي ما اگدر

مسح على شعري وگال باستعجال: ماكو غير حل تحاصرنا بس اريدج توعديني لا تنزلين تمام لان بس تنزلين راح تصيرين نقطة ضعف بالنسبة الي ويمكن ياخذون الشي اليردونة

گتلة من بين دموعي: اوعدك بس انت هم اوعدني ما راح تعوفني وترجعلي

هز راسة ونزل من السيارة قفل الباب وراح الهم وهم هم نزلو من سيارتهم

جانو ثلاثة وكلهم ضخام ويخوفون وواحد بيهم بس شايل سلاح حجى واحد من عدهم وگال

_ها شو ضام وجهك بس لا تخاف

_لا تحاول ما راح تكدر تستفزني وهسة گولو شرايدين احنا اتفاقنا خلص وگلت لفهدكم مدري بزونكم ما اسوي الاريدة بعد ليش يلح

_انت شبيك ما تفهم الريس گال راح ينطيك اي شي بس نفذلة الي يريدة وبعد ما راح يتقرب منك

_بزون يعرف كلش زين ما احب اعيد كلامي ليش بالگوة يحب يتوسل ويهين نفسة

_يعني انت ما تمشي الا بالعين الحمرة

اتقدم من آدم وبسرعة وجه ايدة لبطن آدم بس ما لحگ لان آدم قفز بسرعة ليورة بحركة رشيقة

اتقدم الثاني وصارو اثنين على آدم اتقرب اول واحد من آدم وراد يضرب وجهة بس آدم بسرعة نزل جسمة ليجوة وبنفس اللحظة هجم الثاني على آدم وآدم استغل الموقف ضربة على رجلة الا خلاه يوگع صارت المعاركة بيناتهم مثل الافلام دموعي ما وگفن وبس حاطة ايدي على گلبي وادعي لا يأذون آدم 

الشايل سلاح كلش تعصب ووجهة سلاحة على آدم من ورة حطيت ايدي على حلگي شهگت بصدمة احس اريد اتحرك بس ما اگدر احس اتصنمت

فجأة طلعت رصاصة من المسدس واني فاتحة عيوني بصدمة ما مصدگة اشوف آدم راح يموت گدامي واني عاجزة ما اگدر اسوي اي شي

بس صار شي خلاني انصدم وحسيت نفسي بفلم من صدگ من شفت آدم بسرعة حرك جسمة والرصاصة طخت ايدة بحيث شگت جاكيتة

جنت بس واگفة اباوع بصدمة ما مصدگة آدم بعدة عايش صرت ابجي بفرح واشكر ربي

آدم التفت عالشايل مسدس وگال بضحكة: يمكن بعدكم ما تعرفون اني منو

وبحركة سريعة تقدم منة واخذ السلاح من ايدة وذاك بعدة يباوعلة بصدمة بحيث ما بدرت منة اي ردت فعل وما حس الا من صار المسدس بيد آدم

راد يتقرب ياخذة من ايدة بس آدم بسرعة وجه السلاج بوجهة وگال ولا حركة وايدك ليفوگ وانتوا هم مثلة يالا بسرعة

وگفو كلهم سوية بدون اي حركة وبس يباوعون بنظرات حقد وكره

وجه المسدس على رجل الشخص الجان لازم المسدس وبسرعة ضرب طلقة على رجلة وذاك وگع بالگاع يصيح ولازم رجلة يتألم وجماعتة بسرعة التمو عليه يحاولون يساعدونة

وآدم جان بس واگف بدون اي حرگة گال بصوت عالي: يالا بسرعة شيلو زبالتكم وروحو واريدكم توصلون هالرسالة لبزونكم خليه يعتبرها تهديد واذا مرة ثانية حاول يتقرب مني او يتجاوز حدودة راح تصير الرصاصة الجاية بگلبة

شالوه ووده بالگوة للسيارة وراحو

اتقدم آدم وفتح الباب دخل واني بنفس اللحظة ذبيت نفسي بحضنة لزمت قميصة بقوة وصرت اشهك وابوس راسة ما مصدگة هو عايش وگاعد گدامي

باوعلي وگال بابتسامة: شلون صرتي خوما تحسين بوجع

هزيت راسي بمعنى لا 

تقرب مني شال الكلينكس وگال: النزيف توقف والجرح صغير عود من نصل اعقمة الج بس هسة خل ابدل التاير لان ولد  ******** ضربو طلقة

طلع بدل التاير ورجع واني بعدني ساكتة ما حجيت اي شي بعدني بتأثير الصدمة

ركب السيارة وساق باوعلي وگال: ها اري ليش ما تحجين بس يالا ما بقى شي ونوصل للمفاجأة

باوعلة بصدمة يا مفاجاة هو بقى بينة حيل لمفاجأت اخرى بعد الصارت هسة صدگ يحجي!!

حجيت بتوتر من بعد سكوت طويل : منو ذولة وليش هاجمونا

گال بهدوء: جماعة شخص سويتلة شي وما رضى وهسة يهددون بية ويريدون امشي على مرام رئيسهم

_وليش يريدون ياذونك ويهاجمونك

_قصة طويلة ما راح تفهمين منها شي

_ميخالف احجيلي اسمعك

تنهد وگال: اكو واحد اسمه فهد راد مني معلومات عن شخص واني جبتلة اليريد وجنت متوقع شغلي خلص وياه بس هو اتمادى وراد مني انفذلة طلب مستحيل انفذة واصلا مو من ضمن شغلي طلبة

_وشنو طلبة الي مستحيل تنفذة

_يريد اخطف بنت الشخص الي راد اجمع معلومات عليه واني بالنسب الي ما ادخل بهيج شغل اني شغلي بس اجمع معلومات وما اخطف ولا اقتل ولا اهدد

حطيت ايدي وشهكت بصدمة

گلت بخوف: ليش يريد يخطف بنتة شنو ذنبها هي

_علمود يلوي ذراعة ببنتة ويگدر يهددة ويسوي الي يريدة بكل سهولة لان يعرفها نقطة ضعفة 

_وليش ما يطلب من جماعتة هالشي ويطلب منك شنو ما يگدرون

_لا مو هيج الشغلة بس لان بس اني اعرف مكان هالبنية ومحد يعرف مكانها وشكد دور عليها وراد يلگيها بس ما گدر  فالتجئ الي وجان متوقع راح انفذلة بس من رفضت حس بالاهانة وراد اسويله هالشي غصب

_زين سؤال اخير لان الفضول كتلني

_هههههه سألي وخلينا نشبع فضولج

_اممم ليش من نزلت لبست ماسك ونظارات شنو سببهن

_مثل ماتعرفين شغلي سري ومحد يدري ولا يعرفون هويتي الحقيقة ولا شكلي فالقناع والنظارات دائما احطهن للاحتياط من ما يكون ما عندي وقت وما متنكر وهسة يالا عوفينا من الاسئلة ونزلي

التفتت عالجام شفت دخلنا بمكان مثل المزرعة يجنن ويخوف بنفس الوقت لان داير مدايرة ماكو اي شي ولا بيوت صاير مثل الصحراء والگاع شوية بيها زرع

فتحلي آدم الباب وطلعت لزم ايدي وسحبني وراه سألتة بفضول: آدم احنا وين  جينا وشنو هالمكان

باوعلي وگال: مزرعة صديقي راح نگضي الليلة هنا وهسة دخلي بين ما انزل الغراض

فتحت الباب ودخلت جوة استكشفة جان البيت كلش صغير بس ممر وغرفة ومطبخ وحمامات وامبين منظفينة جديد

دخل آدم وهو شايل بيدة علاليك حطاهن عالگاع واتقرب مني گال بابتسامة: خلي نصلي ووراها نتعشى بس قبل ما نصلي تعاي اعقملج جرحج

سحبني گعدني عالكرسي وراح جاب علبة الاسعافات اتقدم وگعد گدامي على ركبة

فتح العلبة وصار يعقم جرحي بهدوء ويحجي وياي كلام هادى يحاول يخفف الالم وما اركز وياه

كمل وحط شاش ولفاه باوعلي وگال بابتسامة: ها كملنا خوما تاذيتي ترا هو جرح صغير ما يأذي

گومني على كيف ووداني للحمام توضيت وهو ساعدني وما خلا مي يوصل للجرح ومن كملت طلعت انتظرة علمود نصلي سوية

طلع ورا شوية والمي ينگط من شعرة ياربي جمالة موتني وخلاني انسى نفسي باوعلي بابتسامة وگال: يالا نروح نصلي

صلينا سوية ومن كملنا گعدنا بالگاع نتعشا جان جايب لفات همبرغر ووياهن بيتزا ووببسي جان اكو بالثلاجة  اتعجب من اشوف آدم يحب كلش هيج اكلات

بقيت طول الگعدة اباوعلة بنظرات كلها عشق وحب ومن ينتبه علي بسرعة انزل راسي

من كملت رحت غسلت ايدي ورجعت لگيت آدم فاتح علاگة ومطلع غراض منها ما عرفت شنو هنة بس جانن مثل العصا طوال وملونات

انتبه علي وگال: تعاي اري راح تشوفين شني المفاجأة

طلع برة واني طلعت وراه متحمسة اعرف شنو هالمفاجأة الغريبة

شفتة گاعد على ركبة وگاعد يثبت هاي العصا ومن ثبتها طلع جداحة علگها وبسرعة رجع ورا

گمزت من مكاني وصحت بصوت عالي وفرحة: العاب ناررررية

گام يضحك على ردة فعلي وبسرعة رحت ركض عليه حضنتة قوي وجلبت برگبتة واگول: العاب نارية العاب نارية ما مصدگة آدم سويتها من صدگ

بدت الالعاب النارية تنطلق بالسماء واني حاضنة آدم واباوعلها منظرها جان لا يوصف وكانها نجوم ملونة بالسما اجمل لحظة بحياتي ما مصدگة حلمي اتحقق جنت دائما احجي لآدم واگولة اريد اشوف العاب نارية بمكان هادئ ومظلم شي اكيد راح يطلع منظر يجنن وصدگ جان منظر يجنن ومستحيل يتكرر

بقيت اباوعلها ومن خلصت گلت لآدم اني هم اريد اشغلها وقبل بس بشرط يساعدني

صرت اشغل الالعاب وآدم يعلمني شلون ومن اشغلها بسرعة ارجع بخوف واضحك واصفگ واصوفر باعلى صوت وآدم بس واگف يضحك على تصرفاتي ويگول عيب لا تصوفرين مثل الولد  فرحتي جانت لا توصف بقينا هيج لساعة 11 جان احلى يوم گضيتة ويا آدم

حسيت نفسي كلش نعست گعدت بالگاع ارتاح من التعب وعيوني شوية شوية بدن ينغلقن

اتقرب مني آدم وشالني لزم رگبتة وگلت: احبك احبك

ضحك وگال: اني هم

فتحت عيوني بصدمة وگلت: وانت هم شنو

ضحك بقوة وگال:اني هم احبج ياوريدي ونبض گلبي 

دخلني عالغرفة ونزلني عالگاع بهدوء وگال هسة اروح اجيب مي وارجع

طلع واني  رحت اخذت ملابسي ودخلت اسبح وبسرعة كملت لبست فستان قصير لحد الركبة كلوش من جوة وما بي اردانات لون احمر وبي ورد صغار اسود

طلعت من الحمام حاطة الخاولي على شعري شفت آدم واگف گدام الشباك وفاتحة يا الله شكلة عبالك لوحة فنية

انتبه علي وبسرعة سد الشباك اتقرب علي وبقى صافن وبس يباوعلي بنظرات ثاقبة وكانة يتفحصني كلش وترني تحممت وهو انتبه على نفس

ابتسم وگال: تعاي اني امشطلج

رحت جبت المشط وگعدت گدامة اخذ الخاولي نشف شعري وصار يمشط شعري بكل هدوء وايديه عبالك مخدر حتى ما حسيت من كمل الا من دارني

باوعلي وابتسم وبدون سابق انذار قرب شفايفة من شفايفي وباسني واني بس صافنة جسمي گام يرجف ما وخر الا من حس اني اختنگت

گال بهيام وكانة مخدر: سبحان الخالق الذي خلق فابدع ملاك وگاعد گدامي الشي الوحيد الي ما تندمت عليه بحياتي من اختاريتج شريكة حياتي ونصي الثاني ولو بعد مية سنة ما اندم على هالقرار

قرب وجهة وهمس باذني: سأكونُ مجنوناً بحبكِ ، فالعُقلاءْ يتردَدون

شالني ووداني عالجرباية نزلني على كيف واتقرب مني بكل هدوء وبدة يهمس باذني باحلى كلام سمعتة جان كلامة كلة غزل وكانة عسل على گلبي جانت هاي الليلة اجمل ليلة بحياتي واول ليلة عشتها ويا الشخص الاحبة وحتى ما حسيت بالخوف والتوتر بالعكس جانت مشاعري مختلطة بين الحب والخجل والفرح
___________________________

غزل

مرت ثلاث اشهر وآسر لهسة ما فاتح الحظر وحتى ما شايفتة احس نساني وبعد ما يريدني بس اني مدري بية كلش اشتاقيتلة احس بالفراغ بحياتي وحتى دراستي اهملتها وبالگوة نحجت ودرجاتي زفت ليهسة افكر بي

بس باخر فترة فك الحظر لان اندي صارت تراسلني من موبايلة كلش فرحت بالبداية واتوقعت راح يرجع يراسلني بس خابت امالي من ابد ما راسلني ابد وحتى اني ما جان عندي الجرأة ادزلة رسالة اعتذار وبقيت بين خيارين ياما انتظر هو يرجع يراسلني او اني ادزلة رسالة اعتذار وابادر

واختاريت الخيار الاول لان ما جان عندي غير حل ومستحيل اسوي الثاني

وهيج مرت الايام وخلصت المرحلة الاولى وودعتها جانت ايام كلش حلوة ايام الجامعة ايام ما تتعوض

وورا اسبوع من خلصنا صار عرس بيداء وبالصدفة جان ويا عرس اخو اندي فما گدرت اروح للحنة لان جان بنفس يوم عرس بيداء

فگلت ميخالف اروح للعرس وراح احاول استغل الفرصة واعتذر من آسر

رحنا للعرس بس اني ونرجس لان خالتي جانت كلش تعبانة ما تگدر تجي

واوس هم گال راح يروح فهو الي وصلنا وگال اني ارجع الظهر

استقبلتني اندي بالاحضان والبوس حسيتها راح تشلع خدي  فديتها كلش مشتاقتلهة صار شكد ما شايفتهة

جان بيتهم كلش ازدحام وهوسة عاد اني دخلت للمطبخ ويا اندي و نزعت الصاية وصرت اساعد البنات بس نرجس خليتها تگعد يم البنات الي بعمرهة احسن علمود تتعرف على بنات لان ما عدها صديقات

جان المطبخ مو كلش ازدحام يمكن اربع بنات واني وياهن واندي

جنت واگفة احضر الاستكاين انتظر الجاي لما يفور واصب للنسوان

سمعت صوت شخص مألوف بسرعة رفعت راسي وانصدمت من شفت آسر دخل للمطبخ اخخ يا بوية من شفتة مدري شصار بية احس گلبي گام يدگ طبول صار يمكن حوالي اربع اشهر ما شايفتة وابد ما متغير بالعكس صاير احلى جان لابس دشداشة اول مرة اشوفة لابس هيج جمال جان لا يوصف وكان هالدشداشة تخيطت علمودة

انتبه علية وحسيتة انصدم من شافني هنا بقى واگف يباوع باتجاهي واني بس صافنة بعيونة

فزينا اثنينا على صوت بنية وهي تگول: ها آسر شتريد

هو حس على نفسة وبسرعة دار وجهة للبنية واني نزلت عيوني

التفتت اراقبهم من جوة ليجوة كل تركيزي صار وياه

گال باستعجال: سهيلة بلا زحمة عليج روحي جيبي موبايلي ناسي بالغرفة

ابتسمت وگالت: ادلل دقيقة ويمك

راحت تجبب الموبايل وهو بقى واگف يحرك رجلة بتوتر

نزلت ورا شوية البنية وبيدها الموبايل انطتة الشاحنة وطلع بسرعة انتبهت عليها بقت صافنة باثرة وبس تبتسم يا بوية احسها جاي تحركني بهاي نظراتها جانن امبينات نظرات حب واعجاب حتى ما حسيت مو وگعت علبة الشكر

فزيت بسرعة وانتبهت عالعلبة اتقربت اندي شالتهة وگالت بهمس : هاي زليخة الگتلج عليها مستعدة تسوي اي شي علمود تتزوج آسر

بس سمعت كلام اندي حسيت نار وشبت بصدري گمت اتنفس بقوة وجسمي گام يرجف يعني آسر بعد ما يريدني وراح يتزوج هاي وتصير زوجتة  اي طبعا يتزوجها غزل شوفيها شلون حلوة وصوتها كلة انوثة ورقة يعني راح يعوفها ويجي علي اني الي هنتة شكد احلامي مستحيلة وغبية حسيت دمعة حارة نزلت على خدي بسرعة مسحتها وسويت نفسي مشغولة 

والمشكلة آسر كل ما جاي يريد شي هي تگمز بوجة وتشوف شيريد وتسويله الشغل والضحكة مالية وجهة

واني بس واگفة احترگ على كيفي

كملو غدة واني ما اتغديت شكد اصرت اندي بس ما گدرت انسدت نفسي عالاكل بسبب هاي لزيكة مدري سهيلة

من كملو طلعت برة اريد اساعد البنات بغسيل  المواعين  شفت آسر ووياه ولد اثنين يغسلون الطرمة

بقيت واگفة انتظر اندي لما تجي ونروح سوية جنت واگفة صافنة عليهم بس بالي ابد مو يمهم

انتبهت آسر اتقرب مني وهو يخوزر بية يمة كلش خوفني ووترني وصل يمي گال وهو صاك على اسنانة: شعندج واگفة هنا

كلش وترني قربة وبالگوة گدرت احجي: اه. اه انتظر اندي لما تجي

جاوب بعصبية خفيفة: روحي واني ادزها وراج لا تبقين واگفة

هزيت راسي ورحت بخوف للترك لگيت البنات يغسلن المواعين رفعت ارداناتي وبديت اساعدهن وورة شوية جت اندي

ورا ما خلصنا نشفناهن وسفطناهن واني دخلت ارتاح لان خالتي ام اندي ما قبلت اسوي شغل وگالت انتي كلش تعبتي وانتي ضيفة ما يصير وعيبة بحقنة

عاد رحت گعدت بالمطبخ يم اندي بين ما تسوي الجاي

من صارت ساعة ثلاثة ونص اندي اخذتني وياها لغرفتها علمود نبدل ونجهز نفسنا

سبحت وبدلت بسرعة لبست فستان ماروني ويا شال ابيض وحطيت مكياج طوخ طلع كلش حلو ويا الشال الابيض

دخلت ام اندي ورادتها بشغلة واني بقيت وحدي ما اعرف شاسوي گلت اطلع برة احسن لما تجي اندي

قفلت الباب وطلعت ردت انزل جوة بس بطريقي شفت خالتي ام اندي شايلة جنط وامبينة خطية بالگوة شايلتهن

بسرعة اتقربت من عدها اخذت الجنط من ايدها وگتلها: انطي خالي ثگيلات عليج گولبلي وين اوديهن

تشكرت مني وگالت وديهن باخر غرفة

شلتهن ووديتهن لاخر غرفة فتحت الباب ودخلت جانت غرفة صغيرة وامبينة متروكة وما بيهة اثاث هواي

حطيتهن عالجرباية وتوجهت للباب اريد اطلع بس بنفس اللحظة انفتح الباب ودخل آسر

من الصدمة راسا رجعت ليورة وهو انصدم من شافني بلع ريگة

ونزل عيونة و بسرعة رجع وحهة لطبيعتة دخل للغرفة وكاني ما موجودة

واني بسرعة ردت اطلع بس توقفت وگلت هاي فرصتي لازم اعتذر بعد ما تتعوض

التفتت على كيفي باتجاهة وگلت بتوتر: آسر

جان فاتح الكنتور ومدري شيدور لكن بس سمع كلامي التفتت بسرعة وكانة ما مصدگ اني احجي وياه

واني واگفة مثل الصنم احس نفسي راح اوگع من التوتر اول مرة اگول اسمة واحجي وياه بهالشكل

جمعت قوتي وگلت: احمم اني اريد اعتذر منك على اخر موقف صار اعرف الاعتذار ما راح يكغي ولا يغير شي بس هذا الي اگدر عليه صح مالي حق ابرر بس والله العظيم جان عندي ظروف كلش صعبة ومحد يحس بية غير رب العالمين ما جان بيدي هالشي من حظرتك جنت احس نفسي مخدرة وعقلي مو وياي وانت ما تستحق هالشي جان تصرف نذل وغبي من عندي بس والله مثل ما گتلج ما جنت بوعي بذيج الفترة و اسفة مرة ثانية واتمنى منك تسامحني

من كملت كلامي حسيت دمعة حارة نزلت على خدي بسرعة مسحتها واخذت نفس قوي ما اريد ابين نفسي ضعيفة

باوعت عليه لگيتة صافن بوجهي ماكو اي ردت فعل على وجهة ولا اي شي يبن شنو شعورة بهاللحظة

بقيت خمس دقايق واگفة بمكاني ما اتحرك حسيت ما مرحب بية وآسر اصلا ما مهتم لوجودي

فتحت الباب ونزلت جوة بسرعة احاول امنع دموعي من النزول ابد مو الوقت المناسب علمود اضعف

اخذت جنطتي وبسرعة اتصلت على اوس وگتلة تعال اخذنا

رحت سحبت نرجس وطلعت برة انتظر اوس وهي بس واگفة تتذمر وتريد ترجع وتشوف العروس

بس اني حسيت راسي راح ينفجر مالي خلك لاي شي بس اريد اطلع من هالمكان بسرعة

اتصل اوس وطلعنا بسرعة همزين الشارع ما جان بي هواي زلم

وصلنا البيت وخالتي ظلت تسإل ليش رجعنا من وكت ما حجيت اي شي بس گتلها راسي گام يوجعني

عفتهم وصعدت لغرفتي بسرعة فتحت الباب ودخلت

وراسا نزلن دموعي بعد ما اگدر امنعهن رحت ذبيت نفسي عالجرباية ودفنت وجهي بيها واضرب بالمخدة قوي احاول اطلع الحزن والغضب الاني بيه

بقيت هيج حوالي ساعة بمكاني مالي واهس لاي شي حسيت الشغف انعدم عندي

گمت بدلت ملابسي ونزلت جوة اسوي العشا

سويتة وصبيت الهم تعشو واني بس گاعدة اراقبهم ومن كملو شلت المواعين غسلتهن واني صعدت فوگ وخليت نرجس تنظف المطبخ

دخلت للغرفة وردت اروح اسبح بس وگفني صوت الموبايل يرن

رحت شلتة وشفت المتصل اندي فصلتة وحطيتة عالوضع الصامت ورحت سبحت ومشطت شعري

ردت انام بس جاني فضول اشوف ليش اندي متصل اخذت الموبايل وانصدمت من شفت اندي متصلة عشر مرات اتعجبت هاي شعدها

بين ما شايلة الموبايل وحايرة اتصل لو لا اتصلت هي بسرعة فتحت الخط وانصدمت من الكلام الگالتة
__________________________

اندي

خلصت امتحانات نهاية السنة ودخلت بالعطلة وبعد اسبوعين عرس أمجد لان سمر بعدها ما مكملة امتحانات ومن هسة بدينا انظف ونجهز بالبيت لان احنا الاعراس نسويها بالبيت احس من القاعة واجوأها احلى

وامي استغلت اني مكملة امتحانات فذبت اكثر الشغل علي بحيث خلتني حتى الترك افركة بالليفة تگول نظفي وصيري شاطرة ونظيفة مادري ليش تگول هيج قابل اني وصخة

ومن هسة بدينا نعزم ويوميا امي متذكرة شخص جانت تعرفة قبل عشرين سنة وتعزمة

قبل العرس باسبوع گلت لامي راح اروح اعزم غزل ردت اني اروح لبيتها احسن من التليفون وامي وافقت اروح وأمجد مشغول ما يدري بية من اطلع

رحت بسرعة سبحت وبدلت شلت جنطتي وموبايلي وطلعت اتمشى لبيت غزل

جانت الدنيا عصر والجو حلو بس شوية حار والشوارع ازدحامات المحلات مفتوحة والجهال يلعبون بالشوارع اجواء بسيطة بس تجنن 

وصلت بيتهم وسلمت على غزل واصرت ابقى گاعدة وصدگ گعدت يمهم شوية وعزمتهم وگمت بسرعة رجعت للبيت

بطريقي واني اتمشى جنت اخابر زهراء واحجي وياها وما منتبهة  للسيارة الي تمشي قريب علي

قفلت الخط ويالا انتبهت الها جانت مظللة وما يبين اي شي داخلها

توترت كلش  حسيتهة تلحگني سرعت مشيتي وحاولت ما اركز وياها

بس فجأة انصدمت من نزل الجامة وطلع السايق محمد حطيت ايدي على حلگي شاهگة بصدمة الحقير همزين ماصرت جلطة بسببة

باوعلي وگال بابتسامة: السلام عليكم

باوعتلة بخوف بلعت ريگي ورديت بتوتر: وعليكم السلام

بقيت واگفة ما اعرف شاسوي احس جتني ام الركب  وهو هم وگف سيارتة نزع النظارة وگال: شلونج

هزيت راسي وگلت بتوتر: زينة الحمدلله

وبهاي اللحظة استوعبت اني بعدني واگفة بمكاني غميت نفسي شكد ثولة شعندي واگفة هنا هسة شيگول علي

عفتة وردت امشي بس وقفني صوتة وهو يگول: شعجب ما فكرتي حتى تشكرين الشخص الي ساعدج

التفتت عليه وگتلة باستغراب: يا مساعدة شتقصد

بقى ساكت وورا خمس دقايق يمكن يالا گال: شلون ما تذكرين من ساعدتج من السيارة لو ما اني جان هسة انتي شابعة مي ورد

يا هذا الموقف الي صار قبل ثلث شهور وهو ساعدني من ردت اندعم اني شكد غبية شلون نسيت اشكرة بس اني اصلا ما شايفتة شلون اشكرة بس هو شنو ما عندة سالوب ليش يحجي هيج شنو مسويهة مانية على راسي

گلبت عيوني وگتلة بملل: شكرا

ابتسم وگال: شنو هاي احسها من ورا خشمج وكانو ما عاجبج الحجي

نفخت بملل وگلت: شلون تريد اشكرك مثلا

غير الموضوع وگال: هسة عوفينا من هالحجي وجاوبني بس انتي شعندج يومية طالعة اهلج ما يخافون عليج شلون يخلوج تطلعين وحدج

گتلة بعصبية: وانت شعليك اطب اطلع انت منو

مشيت وعفتة بس حسيتة لحگني بالسيارة ما اهتميت الة واعتبرتة ما موجود الله يا الله انت منو وتدخل عم خال حي الله صديق نسيبي

گال بضحكة: هسة شنو ما ناوية تگولين شعندج جنتي طالعة

جاوبتة بعصبية:انت ما عليك

ضحك وگال:  ترا هو مجرد سؤال 

ما التفتت عليه وگتلة بملل: رحت اعزم صديقتي على عرس اخوية

سمعتة يگول: ليش ما تعزميني اني هم وتعتبرينها شكر لمساعدتي

جاوبتة بدون خلك: يالا انت معزوم على عرس اخوية

يابوية شكد بطران هالشخص يريد اعزمة وانت منو علمود اعزمك

دخلت فرعنا وبعد ما شفتة وصلت للبيت دخلت وشفت البنات مخبوصات يغسلن الفرش

حزيران انتبهت علي وگالت: يالا تعاي يالدايحة وغسلي ويانا مو بس شغلتج تفرفرين بالشوارع

نفخت بملل ورحت ذبيت جنطتي عالكاونتر ورجعت يمهن رفعت ملابسي وصرت اغسل وياهن

مر هالاسبوع واليوم يوم حنة سمر گالت راح تسويها ببيتهم لان ماشاء الله بيتهم عبالك قصر مو بيت

حزيران وسهيلة راحن العصر على بيتهم علمود يساعدون سمر بالتجهيزات وخاف عدها نقص ويروحن وياها للصالون

واني بقيت بالبيت علساس اساعد ماما بتجهز الضيافة  وارتب الحديقة ويا آسر لان حنة الولد راح يسوونها ببيتنا  لان  عددهم مو هواي بس اصدقاء أمجد واقاربنا وآسر سوة الحديقة تجنن مثل الافلام

كملنا كلشي وماما گالتلي روحي بدلي علمود نروح لبيت ام حارث قبل ما يجون الولد

واني طگيتها بركضة صعدت فوگ وبسرعة دخلت سبحت ولبست فستان لونة اسود لحد الركبة ومن فوگ يصير بي تول لون ابيض طالع يجنن ولبست وياه حذاء لون اسود وشعري بس سشورتة ومكياج حطيت خفيف بس الحمرة لون احمر

نزلت جوة يم ماما لگيتها مكملة كامل بس باقية تنتظرني

انتبهت علي وباوعتلي بصدمة گالت وهي فاكة حلكها: عزا بعينج بس لا تريدين تطلعين هيج ولج لو يشوفج ابوج لو  اخوانج  الا يموتونج على هالبس بسرعة روحي لبسي عباية من كنتوري علمود نروح قبل ما يجون

رحت ركض جبت عباية من كنتور امي ولفيتها على نفسي وطلعنا سوية لبيت سمر همزين الشارع بعدة ما بي هواي ناس

دخلنا لبيت سمر واستقبلتنا امهم جان البيت مو كلش ازدحام يعني لا هواي ولا قليل العدد مقبول وهمزين النسوان ما جايبات جهالهم لان مزعجين ويسوونها عزا وكل شوية واحد ضايع

دخلت للمطبخ احاول اساعد البنات وامي راحت گعدت يم النسوان

جانن موجودات بنات قليلات يجهزن الكيك والعصاير بديت اساعدهن على كيفي اخاف على ملابسي

ورا نص ساعة سمعنا هوسة برة طلعنا وشفنا سمر جاية من الصالون طالعة تجنن بوية وكانها ملاك لابسة بدلة حمرة قصيرة وحذاء اسود والمكياج فول وتسريحة شعرها مسويتها مثل التسعينات طالعة مثل الاميرة

وحزيران وسهيلة وبنت عمها وخالها لابسات فساتين للركبة لون زيتوني ومسويات نفس المكياج والتسريحة طالعات عبالك درزن سفن اب

النسوان گامن يهلهن واني هم اخذني الواهس وانطلقت اهلهل وياهن بفرحة وما حسيت الا على گرصة قوية بزندي بسرعة التفتت ليورة لگيتها ماما تخزر بية وتگول على كيفج خزيتينا

اوف من ماما واگفتلي مثل العظم بالبلعوم يعني عرس اخوية خليني افرح قابل يومية صاير

گعدن سمر عالكوشة وما خلن احد يتقرب وبالاخص الاطفال لان جان اكو كم واحد من اقاربها

راحن جابن الحنة وشغلن الديجي على اغاني اليسا وبدن يحطن الحنة على ايدها و سهيلة استلمت هالمهمة هي وبنت عم سمر لان شغلهن كلش حلو

وحزيران بس شايلة الكامرة وتاخذ صور هاي الشغلة مخصوصة الها

جانت اجواء كلش حلوة وسمر بس تضحك وفرحانة راسا من تشوفها تحس بالراحة والفرحة صح ما احبها بس بهاليوم كلش حبيتها

البنات گامن يوزعن الضيافة وزهراء تساعدهن بس اني بقيت گاعدة معتبرة نفسي من الخطار وغريبة وبس احش ويا النسوان وبالاخص اكو مرة عجوز گاعدة وتحجي وياي ولان جنت منطلقة وياها شكد حجت بحيث حسيتها صرعت راسي

كملن حنة سمر وشغلن الديجي على اغاني تخلي الواحد بالگوة يريد يگوم يرگص باوعت للبنات شفتهن مثل المطفيات وبس يصفگن وهاي الاجواء يحتاجلها شخص مثلي

انتبهت على زهراء تأشرلي علمود نگوم نرگص اني وياها وصدگ عفت العجوز وگمت متحمسة

جريت ايد زهراء وصرنا مثل التؤام اني وياها  لان لابسات نفس الشي وهم نفس الگصة وتسريحة الشعر

صحت للبنات وخليتهن يشغلن سارية السواس وساجدة

وگلبناها اني وزهراء للحنة گلاب ومن صدگ اطربنا الكل وحتى البنات من شافنا دخلن ويانا

بقيت ارگص يمكن حوالي ثلاث ساعات حسيت رجلي انكسرن من الكعب وكتفي كلش تعب من الهز عفت زهراء ترگص وحدها اليشوفها يگول هاي ما تتعب واني رحت گعدت يم الحجية

گعدت بمكاني وصرت اهف بيدي على وجهي كلش تعبت

انتبهت عالحجية وهي تگول

_يمة انتي شنو اسمج

التفتت عليها وگتلها بابتسامة

_اندلس خالة

_ماشاءالله شلون حلو اسمج مثل طولج ووجهج

_اشكرج خالة ذوقج الحلو

_يمة بنيتي اني عندي ولد وما شاءلله شلون ولد زينة الزلم ما احجي هيج لان هو ابني بس الله شاهد كل الناس  تحلف باخلاقة وما ناقص اي شي من اخلاق وجمال وشهادة بس ناقصتة بنت الحلال شنو رايج خالة

باوعتلها بصدمة وصرت ابلعم ما اعرف شاحجي صفنت بوجهة مثل الثولة

ردت گالت بابتسامة: ها يمة شنو رايج تقبلين بابني

عضيت شفتي وگتلها : عذريني خالة بس اني مزوجة وعندي ثلاث جهال

حسيتها انصدمت من كلامي گالت وهي تحاول تتأسف: عذريني يمة ما جنت اعرف بيج مزوجة بس شكلج كلش صغير ما توقعتج مزوجة وعندج جهال

حطيت ايدي على حلگي احاول اخفي ضحكتي عزا بعيني عمري 16 سنة وطلعت مزوجة وعندي جهال شلون جذبة خايسة

عفتها ورحت گعدت يم ماما

اتعجبت من شفت ماما  منطلقة كلش ويا النسوان تحجي وتمدح بية عزا بعيني بس لا تريد تزوجني من صدگ ماما يمكن عجبها الوضع وكلش تحمست وتريد تزوجني عالواهس صرت العب بموبايلي مسوية نفسي ما مركزة وياهن

ثاني يوم گعدنا من الاربعة وبدينا الشغل كلش تعبنا وانخبصنا خبص لان العرس بالبيت والكل اشتغل وحتى غزل خطية جت من ساعة ثمانية و ابد ما عافتني وساعدتني هواي

صارت ساعة عشرة وبدن النسوان يجن والبيت كلش صار ازدحام و الحمدلله ما قصرنا ويا اي شي شخص لان بابا ظل يوصينا ويگول العرس للفرح لا تغثون اي واحد يجي وسون كل واجبات الاستقبال

والطبخ جبنا طباخين وصار الطبخ ببيت نسيبي آدم

صبينا غدة ساعة 12 ونص وما كملنا الا بالوحدة ومن كملو وگفنا حايرات وين نغسل المواعين والجدورة والله كلش هواي ويتعبن عاد اخذناهن بالترك واجتمعنا سوية نص ساعة وكملناهن والولد غسلو الطرمة ورتبو الحوش

صارت ساعة ثلاثة ونص  جريت غزل وصعدنا لغرفتي  بسرعة نرتب نفسنا للزفة

دخلت بسرعة سبحت ولبست فستان لون ابيض طويل وارناتة هم طوال لان عيب وأمجد وآسر ما يقبلون ويا حذا كعب اسود

وغزل هم دخلت وراي ولبست فستان ماروني ويا شال ابيض وحذاء اسود وحطت مكياج طوخ فديتنا طلعنا نملخ

جنت واگفة گدام المراية ملتهية احط مكياج وانفتح الباب دخلت ماما وهي تگول باستعجال: وبج اندلس نزلي شوفي حزيران وين راحت مفتاح غرفة أمجد يمها ويريد يطلع القاط مستعجل

عفت غزل ونزلت بسرعة ادورها دورت بكل البيت ما لگيتها طلعت برة اشوف وينها بس لفت انتباهي صوت جاي من الترك

اتقربت امشي على كيفي اريد اشوف منو هنا مديت راسي شوية شفت حزيران لازگة بالحايط وحارث حاط ايديه عالحايط ما يخليها تتحرك ومقرب وجهة من اذنها مدري شيهمس وهي بس تضحك

بسرعة طلعت وسويتها عليهم مثل الداهمة گلت بصوت عالي : حزيران

هم انتبهو علي وبسرعة حارث رجع ليورة وهي بقت تلوف براسها ما تعرف وين تضم وجهة

گالت وهي تحجي بالگوة: ها اندي رايدة شي

باوعت على حارث وگتلها: امي تريد مفاتيح غرفة أمجد

گالت بتوتر ولعثمة: تمام هسة اجي انطيهن

بقيت واگفة بمكاني ما تحركت وهم يباوعون الي بنظرات وكانهم يگولون يالا ما تروحين بس اني باقية وما اروح الا حزيران وياي اخاف ابفيها وحدها ويا الاشقر المغرور اعرفة ما يگعد راحة

اتقربت حزيران مني سحبتني بعصبية وراها باوعت لحارث لگيتة يباوعلي بنظرات وكاني متعاركة وياه

راحت حزيران اطلع المفاتيح واني صعدت لغرفتي فتحت الباب بس ما لگيت غزل موجودة

بسرعة حطيت مكياج ونزلت جوة شفت محد ماكو عزا بعيني بس لا طالعين وناسيني

طلعت برة وبسرعة فتحت الباب الخارجي ردت اطلع بس بنفس اللحظة انضربت بشخص رفعت راسي وانصدمت من شفت

يتبع..........
بقلمي يمامة