غموض جارنا

بارت 16

احب اشكر كل شخص تابعني او قرا او صوت او كتب تعليق يا اخي فديتكم واحبكم كلش كلش هواية ❤❤

++++ احب اوجه رسالة لاحد متابعيني JS_1997_5 صراحة ما اعرف اسمها بس ببداية الرواية جانت دائما اول المصوتين بس هسة اختفت اتمنى تكون بخير وما تواجه اي مشكلة واذا قريتي كلامي اتمنى اطمنيني عليج لان انتو متابعيني غالين على گلبي واعرفكم واحد واحد

ملاحظة سالوب يعني اسلوب بس بطريقة اندي 😂😂

ملاحظة اخيرة اذا تريدون تعرفون شلون التقيت باندي وزهراء تابعوني وان شاءلله بنهاية الرواية احجيلكم

اسفة عالاطالة بس جان لازم احجي هالكلام

______________________________
غموض جارنا

الكاتبة يمامة

اندي

اعتذر استاذ آسر بس احنا لازم ننطيها انذار وفصل لمدة ثلاثة ايام

من گالت هيج حسيت نفسي فد وحدة حقيرة وما عدها اخلاق احس نزلت راس اخوية عضيت شفتي بقهر احاول امنع نفسي  واتماسك علمود لا ابجي مااريد اضعف گدامهن

آسر باوعلي بإبتسامة حنونة وكانة يگول لا تهتمين اني وياج ماكو داعي تبجين

سئل المعاونة اذا يگدر ياخذلي اجازة وهي وافقت لان هو ولي امري ويگدر ياخذلي

اتقرب مني وگال بابتسامة روحي جيبي جنطتج علمود نطلع واني راح انتظرج هنا

هزيتلة راسي وعيوني مدمعات باي لحظة راح ابجي بعد ما اگدر اتحمل مو بسبب الفصل والمشكلة بسبب آسر وحنيتة الي غامرنا بيها ومهما نسوي يوگف ويانا

رحت بسرعة اجيب جنطتي وهاي البنية لحگتني وصرعت راسي وهي تگول ولج اندي هذا اخوج ما جاي اصدگ ولج هو احلى منج بمليون مرة ما شاءلله اخوانج الباقين هم مثلة
ولج ليش اخوج هيج لطيف لو اني الا اخوية جان حفرلي گبري ودفني هنا ووووو. يا الله حسيت راسي راح ينفجر بسرعة اخذت جنطتي وجانت روان وجماعتها واگفات بالباب يحجن ويضحكن علي شكد حقيرات وما عدهن سالوب ما اهتميت الهن ورحت لآسر

طلعنا من المدرسة نتمشى للبيت لان آسر جاي مشي وسيارة يم المصلح

بقيت منزلة راسي وامشي بهدوء اثنينا ساكتين محد يحجي

حسيت صوت شهگاتي يعلى ما ادري شوكت بجيت بس والله قهر ما اگدر اسوي نفسي ما مهتمة والموضوع يقهر احس مثل السجاجين بگلبي

آسر باوعلي بخوف وگال بلهفة اندلس ليش تبجين

نزلت راسي بفشلة وخجل ما اگدر ارفع راسي وشلون يكون عندي الجرأة واخوية طالبتة الادارة لان اني رگصت بالصف

رفع راسي وگال شو باعلي ولج ليش كل هالبجي لا تبجين يعيوني ولا تهتمين مفهوم دموعج غاليات علي باعي ماكو انسان ما يخطأ كلنا نخطأ ونتعلم من تصرفاتنا لان الخطأ هو الي يخلينة نتعلم وبعد ما نعيدة ونمشي عالطريق الصحيح وانتي ان شاءلله اتعلمتي وبعد ما تعيدها

هزيت راسي بقبول بس الشهگة بعدها بصدري

آسر گال بابتسامة ولج كافي مسحي دموعج انفضحنا بين الناس

قرب ايديه من وجهي وصار يمسح بدموعي واني بس صافنة اباوعلة يعني آسر يخجلني بلطفة وحنيتة يمكن ماكو بهالكون مثلة ومثل حنيتة دعيت ربي يحفظة الي ويبعد كل شر منة

اخذ جنطتي مني ولزم ايدي كملنا مشيتنا واني مثل الالي بس امشي وراه وبطريقنا مرينا على محل اشترالي جبس ونستلة وخلاني اكلهن بالطريق

بالبداية گلت عيب بس هو ما اهتم فتح الجيس انطاني اياه وگال شعلينا بالناس كل واحد يهتم بنفسة وحياتة

اخذني لمحلة لان گال امي هسة راح تسأل ليش راجعة وماكو داعي نرجع نحجي بالموضوع فراح تبقين يمي لما اخلص ونرجع سوية

گعدت وحدي بنهاية المحل جان محلة حلو حجمة متوسط وتصميمة يجنن وبسيط صاير مثل الكوفي ويتشغلون وياه اثنين ولد بقيت گاعدة اراقبهم لما خلص وطلعنا سوية للبيت

وصلنا للبيت وتلگتنا زليخة جانت گاعدة تقرا بالحديقة بس شافتنا جت علينا بسرعة تقربت منا وهي منزلة راسها بخجل حجت بلهفة وخجل

_الله يساعدكم

رد آسر بهدوء ويساعدج اختي شلونج

عفست وجهة من گال اختي بس بسرعة رجعت تگول بصوتها الناعم

_بخير الحمدلله بس شعجب راجعين سوية

جاوبها آسر وگال جنت راجع وشفتها بالطريق فرجعنا سوية بس انتي شعجب راجعة من وكت

گالت بخجل وهدوء خلصنا محاضرات من وكت وگلت ارجع اقرا لان باجر عندي امتحان

_اي زين بس شنو راجعة وحدج اشو حزيران ماكو

_ اي رجعت وحدي ويا صديقتي لان حزيران بعد عدها محاضرة واني ما گدرت انتظر

_اها هيج السالفة لعد  بس باعي بعد لا ترجعين وحدج خطر عليج وانتي بنية حتى لو ويا صديقتج واذا ردتي ترجعين اتصلي عليه تمام

هزت راسها بخجل اباوعلها صارت طماطة من الخجل تسرسحت البنية عزا بعيني بس هسة لا عبالها آسر يحبها هاي يمكن ما تدري آسر هيج طبعة لازم ابدي اتصرف لا يضيع آسر من ايد غزل ويروح لزليخة وهي شلون زليخة تملخ تموت كلش حلوة

سألت آسر اذا يريد تصبلة غدة بس هو تشكرها وگال ما اشتهي هسة وعافها ودخل واني رحت لغرفتي بسرعة الحگ على فراشي فديتة بس هو اليحبني ودائما يحضني

اليوم راح تكون مشية الزلم الي راح يجيبهم حارث علمود يخطبون حزيران ويكون كلشي رسمي واحنا من الصبح مخبوصات تنظيف وجلف لكل البيت اني وحزيران وزهراء وزليخة وتغريد بنت عمي بحيث سوينا البيت يلمع لمع وكلش تونسنا محد من الولد جان موجود بالبيت عاد اني نزلت الديجي من غرفة أمجد جان صغير وكلش فادنا جنا انظف ونرگص بحيث بقينا اربع ساعات بس انظف ما كملنا الا بالوحدة وغدة طلبنا توصيل من المطعم ومن كملنا راحت تغريد وزهراء اخذت حسوني وراحت لبيتها گالت العصر تجي واحنا الباقيات رحنا سبحنا ونمنا نرتاح

گعدنا ساعة ثلاثة وبدينا نبخر البيت ونحظر الضيافة والزلم ما جو الا ساعة اربعة

جنة گاعدات بالمطبخ والجو توتر وخبصة فجأة دخل ابن عمتي عمرة 12 سنة وگال بسرعة جو الزلم لا تطلعن ابد مفهوم

گمزنا يم الشباك نباوع همزين جان الشباك من النوع المظلل ما يخلي البرة يشوف الداخل

جانو واگفين بابا وعمي حمد وصباح يستقبلونهم بالباب وآسر وأمجد واگفين يم الاستقبال دخلو الزلم وانصدمت من عددهم يمكن جانو بالثلاثين واحد وكلهم لابسين الزي العربي واكو بعضهم لابسين رسمي يمكن ذولا خوالة  وهيبتهم تسطر كلهم فخر

اخر شي دخل حارث جان طالع يجنن لابس بنطرون اسود وقميص اسود وراه دخل زوج زهراء وهم جان لابس اسود ما شاءلله نسابتي يجننون فديتهم لازم افتخر بيهم

سمعنا صوتهم بالاستقبال وهم يحجون جان صوتهم عالي بس ما واضح ماما گالت لحزيران جهزي الگهوة وصدگ حزيران سوتها وصبيتها بالفناجين وصحنا ابن عمتي علمود يوديهن

بس قبل ما يروح طلعت الملح وحطيت بواحد من الفناجين حزيران رادت تمنعني بس اني گتلها لا تدخلين هاي الاصول وصيت علاوي وگتلة علاوي حبيب گلبي انطي هذا لحارث انت تعرفة مو يعني تحطة گدامة فاهم

هز راسة ووداهن ورا شوية رجع وگال اريد مي بسرعة أمجد يريد

بسرعة  حطيت الكاسات بالصينية واني اسألة شبي أمجد

گال بتوتر واستعجال من شرب الگهوة گام يگح ما ادري ليش 
گالي روح جيبيلي مي

بس سمعت كلامة وگعت الكاسة من ايدي شلتها بسرعة ووداهن واني بقيت واگفة بمكاني ادگ والطم عزا بعيني وعينك يا علاوي بس لا انطة الفنجان البي ملح لامجد تعزيت اليوم الا يخنگني أمجد

بقيت گاعدة بالمطبخ اهز رجلي بتوتر وامي وحزيران يزيدن الطين بلة وهنة يگولن عندتي تستاهلين هسة الا يكتلج أمجد فضحتني امي گدام عمتي وزليخة

ما طولو الزلم يمكن ساعة وراحو كلهم وحتى عمامي هم راحو ابوية گاللهم ابقو للعشى بس هم ما بقو وحتى أمجد الحمدلله طلع يمكن عندة شغل محد بقى بالبيت بس آسر وصعد لغرفتة

من حسيت بالامان واطمنت أمجد ماكو بسرعة رحت جبت الديجي وشغلتة وصرت ارگص حتى نسيت المصيبة السويتهة

شغلت اغنية سيلافي وصرت ارگص بفرحة اليگول اني المخطوبة مو حزيران

امي صيحت علي علمود اطفي بس اني ما اهتميت اريد افرح وارگص قابل حزيران كل مرة مخطوبة

امي راحت ويا عمتي لان مادري شعدهن وقبل ما تطلع وصتنا انظف البيت

عاد بس بقينا احنا البنات وزهراء صارت ترگص وياي وتگابلنا سوية شعلنا الجو شعل على اغنية جيناك بهاية وشلون نرگص اني وزهراء عبالك منتولات بس نسمع اغنية بعد محد يوگفنا نموت عالرگص

وحزيران بس تگول مخابيل اكو واحد يرگص على هيج اغاني وحتى ما الهن اي دخل بالفرحة والخطوبة وتهز ايدها ما عاجبها وزليخة واگفة بس تغني وتصفگ

فجأة شفت أمجد واگف بالباب وعيونة متركزات علينا حسيت بلعت العافية من شفتة بلعت ريگة من بدة يتقرب منة

رأسا طگيتها بركضة ليفوگ وهو يركض وراي واني اصيح ولج يمة الحگيلي أمجد راح يموتني ولك وبابا وبنك

وهو يصيح على ويگول ولج يالعوبة اسكتي فضحتينا بس خل الزمج الا اموتج وازوعج العافية اصبريلي وين تولين

شفت آسر واگف يم الدرج بسرعة رحت وراه علمود أمجد لا يلزمني

اختليت ورا ظهر آسر ولزمت قميصة اخاول احتمي بيه وأمجد يحاول يلزمني بس آسر يگول عوفها خليها تفرح شكو بيها وأمجد يگول ولج اطلعي شنو جاي العب وياج اليوم الا  اموتج الثولة حاطة بالگهوة ملح جان متت بسببج

طلعت راسي من ورا ظهر آسر وگتلة بخوف شمدريك اني يمكن حزيران او زهراء

راد يلزمني بس بسرعة رجعت راسي گال بصوتة العصبي هو اكو واحد غيرج يسوي هالسوالف التعبانة

من بعد محاولات هواي أمجد ما گدر يلزمني بسبب آسر تالي مل من عدنة ونزل وهو بعدة يهدد ويتوعد

___________________________

غزل

رجعت لبيت ابو علي يعني مجبورة وماكو غير مكان اروحلة يعني مثلا اروح يم آميد شلون ابقى يمي وهو اصلا ما يصير وحرام عالاقل ولد ابو علي اخواني بالرضاعة واتعودت ابقى يمهم وهم اصلا ما مضوجيني بس بيداء وقررت ما اهتم الها

رحت اليوم للجامعة وداومت جانت محاضرات رايحة علي لان غبت اسبوع وبقيت طول الدوام استنسخ الماضرات بحيث بس تكمل المحاضرة راسا بوجهي للمكتبة وخطية عذراء ساعدتني هواي يالا كملتهن

بس رجعت من الدوام تغديت وغسلت المواعين وبديت اقرا حتى ما نمت اريد الحگ بسرعة وبقيت طول اليوم بغرفتي وكل شوية يجي سامر يحجي وياي او يسألني اذا ما اعرف شي بالمادة واذا ما عرفت اي شي اروحلة

اعرفه يسوي هيج علمود يشوفني اذا بعدني زعلانة او لا جنت اتشاقة واضحك وياه ما اريد اي واحد يحس بوجعي وفوگاها اني گاعدة يمهم موزين منهم مگعديني ومتحمليني يعني اجي اتعيقل واسوي نفسي زعلانة حتى عيب ما يصير

ورا حوالي  عشر ايام جان يوم جمعة والساعة 3 الظهر واگفة بالمطبخ اسوي بيتزا لان نرجس وسامر رادو اسويها صح جان وقت امتحانات ولازم اراجع بس ما ردت اكسر خاطرهم

جنت ملتهية اسوي اللحم وبيداء ونرجس گاعدات يمي هم واني وبيداء لهسة ما نتحاجة ومحد تباوع بوجه الاخرى صح اعتذرت مني  بس احسها مو من گلبها كانها مجبورة

فجأة سمعنا صوت الباب يندگ ونرجس طفرت للاستقبال  جابت كتبها ورجعت ركض وسامر راح يفتح الباب

شفت دخلن ثلاثة نسوان وحدة بيهن جانت ام مسلم راسا طخت براسي وگلت يمكن جايات علمود شغلة مسلم

طلعت خالتي استقبلتهن ونرجس ودت المي  واني بديت اجهز الجاي والضيافة

باوعت على بيداء لگيتها لازمة ملزمتها وتقرا ما مهتمة لاي شي وكل شوية ترفع راسها وتباوعلي بنظرات باردة وغامضة

ورا حوالي نص دخلت نرجس وگالت بصوت ناصي ولج بيداء گومي بدلي ملابسج ودخلي للنسوان امي گالت

باوعتلها بيداء بصدمة وگالت ليش ليش ابدل شكو

ردت نرجس بسرعة وگالت ولج گومي مو وكت صفنتج يعني شيريدن منج غير جايات خطابة تالي وكت الصغار يعلمون الكبار

باوعتلي بصدمة وكانها ما مصدگة سحبتها نرجس من ايدها وودتهة للغرفة ورا شوية رجعت لابسة فستان لون ازرق وحاطة مكياج خفيف رادت تدخل للغرفة بس اني صحتها وگتلها ودي الضيافة بيدج من تدخلين

اتقربت مني واخذتها بايدين ترجف بدون اي كلام راحت دخلت ورا شوية طلعت ووجهة صاير احمر طماطة

گعدت عالكرسي تهفي على وجهة وبسرعة تتنفس جنت اسوي البيتزا واراقبها حتى ما سئلتها شصار خاف تهد علي وتخاف لا احسدها فضلت السكوت احسن

كملت البيتزا والنسوان ما طولن هواي وراحن وخالتي ما حجت اي شي كان ما صار اي شي

ساعة 9 بالليل جنا گاعدين كلنة بالصالة جنت لازمة ملزمتي واقرا لفت انتباهي كلام خالتي على سبب جية النسوان وموضوع الخطبة بيداء بسرعة صعدت على غرفتها علساس خجلانة وخالتي حجت عالموضوع وعمي گال شكو بيها اني موافق اخذي راي بيداء واخوانها وان شاءلله خير

ورا يومين انطت بيداء موافقتها بعد ما اخذت موافقة اخوانها وبالاخص علي لان جان الجبير وبصعوبة يالا وافق ما ادري ليش

بيداء اعتذرت مني مرة ثانية وجانت امبينة متندمة وگالت الصار سوء فهم واسفة لان ما سمعت كلامج وصدگ سامحتها لان رب العالمين الي خلقنا يسامح منو اني علمود ما اسامح

مرت الايام وبيوم جنت اقرا لان هسة وقت الامتحانات النهائية وكلش مخبوصة واحس كارهة نفسي وكارهة الحياة وكلشي بدون سبب وما الي خلك احجي ويا احد بحيث آسر راسلني  ورجع عاد موضوع هو معجب بية ويريد يتقدم ومن هالسوالف خطية جانت مراسلتة بحسن نية وهاي صار ثالث مرة يراسلني على نفس الموضوع

واني الثولة بدون ما ارد عليه حظرتة وذبيت الموبايل عالميز ورجعت اكمل قرايتي

ثاني يوم گعدت واتذكرت شصار البارحة گمت ادگ والطم شلون حظرتة عقلي وين جان شلون اتصرف هيج تصرف غبي ومال زعاطيط هسة شيگول عليه والله فشلة وخزي اني

بسرعة لزمت الموبايل وفكيت الحظر گمت بسرعة سبحت وبدلت ورجعت للموبايل لگيتة حاظرني لزمت الموبايل اريد اكسرة من القهر يعني حقة هيج يسوي هسة اخذ التصرف على نفسة ياربي ليش اني دائما غبية ومتسرعة

رحت للامتحان وحتى ما جاوبت زين بسبب هالمشكلة ومن رجعت جنت متأملة يفك الحظر بس طلع بعدة معند وبقيت هيج طول فترة الامتحانات بالگوة اركز بدراستي وكل ساعة تمر ارجع للمحادثة واشوف عسى ولعل فاك الحظر بس ابد ما فكة شكد راسة يابس

رجعت اليوم من اخر امتحان وباجر تبدي عطلة نص السنة بس رجعت رأسا صعدت لغرفتي نزعت شالي  وذبيت نفسي عالجرباية حتى ما نزعت ملابسي نمت بعمق اريد اعوض تعب وقهر الامتحانات

گعدت على صوت نرجس وهي تگعدني وتحجي فوگ راسي بصوتها العالي  رفعت راسي لگيت نرجس واگفة يم المراية انتبهت الي وگالت امي تگول بسرعة بدلي ونزلي علمود نروح للسوك علمود تشترن جهاز بيداء

طلعت وعافتني قبل ما ارد گمت بسرعة صليت وبدلت ملابسي ولبست فستان حفيف لون ابيض ويا شال بنفسجي وحذاء ابيض سحبت الجنطة

وقبل ما اطلع باوعت للساعة لگيتها بالاربعة ونص نزلت بسرعة لگيت خالتي والبنات متحضرات رحنا للسوگ اني وبيداء وخالتي واخت بيداء الجبيرة اخذنا اوس بسيارتة

وصلنا للسوگ وبدت بيداء تجهز وجانت كل التشتري يكون حلة واهم شي زين حتى ما تهتم اذا جان غالي ما كملنا الا ساعة ثمانية بالليل وفوگاها مو كل الشغلات لان بيداء يحتاجلها بعد هواي شغلات وگالت اجهز على كيفي علمود لا اشتري شي بعدين اتندم عليه واني كلشي ما اشتريت بقيت گاعدة ويا اوس ننظرهم

ما رجعنا الا ساعة 9 واوس بطريقة اشترى عشا لان ما بقى وقت نطبخ ونرجس حتى جاي ما تعرف تسوي

وصلنا للبيت ولگينا جاية اخت بيداء الاخرى وعلي وزوجتة جاين هم جان البيت كلش ازدحام بحيث البيت صاير لخة ما تسمعين اي شي من الصوت العالي وهوسة الجهال

عفتهم ورحت للمطبخ اشوف آسر فتح الحظر دخلت ولگيتة ما فاتحة حسيت بغصة وايست منة هسة شي اكيد راح يعوفني ويمل مني

رحت اخذت موبايل نرجس وگتلها هسة ارجعة سجلت رقم آسر وراسلتة بقيت انتظر خمس دقايق يالا جاوب احس گلبي طار من الفرح بس ما طول هالشي من كتبتلة اني غزل راسا حظرني بدون اي كلام عيوني دمعن بسرعة ليش هيج يسوي عالاقل ينطيني مجال اشرحلة شبي هذا

مسحت المحادثة والرقم ورجعت الموبايل لنرجس رحت گعدت يمهم بالصالة جان الكل مجتمعين ويحجون بامور مختلفة واني بس صافنة واراقبهم جانت اجواء كلش حلوة والفرحة امبينة على وجوه الكل وحتى اني جنت فرحانة وياهم  بس الي عكر مزاجي هي مرت علي گاعدة گبالي وبس تخزر بية اليگول كاتلة ابوها
_____________________________

أرينا

گاعدة عالجرباية اراقب حركتة وهو يمشي گدامي وكل شوية مطلع اوراق من جنطتة لو يحط غيرهن كمل جنطتة وقفلها وراها دخل للحمام سبح وبدل ملابسة طلع لابس بنطرون وقميص وسترة وكلهن باللون الاسود

اتجه للمراية مشط شعرة وحط عطرة الهادئ الي ما يستغني عنة التفتت الي واني بقيت صافنة على شكلة وجمالة جان فاتح اول دگمة من القميص والملابس كانها اتصممت خصيصا الة جان عبارة عن كتلة من الجمال والاناقة والهيبة والرزانة

قاطع صفنتي وهو يضحك ويغمزلي تنهدت بقوة وحجيت من بعد سكوت طويل

_يعني لازم تطلع ترا بعدنا بثاني يوم بالعطلة جنت فرحانة ومتوقعة راح نگضيها سوية

_اعذريني أري وحقج عليه بس والله تعرفين عندي شغل هواي وما يصير يتأجل

_بس ليش الا تروح لغير محافظة وتعوفينا

_هي هنا المشكلة الشخص الاريدة بغير محافظة ولازم اني اروحلة لان الشغلة تخصني

_اووف شوكت تخلص شغلتك احس كلش طولت ما جنت متوقعة هيج راح اطول هواي يعني راح يصيرلك حوالي ثمن سنين بهاي الشغلة شوكت تكمل

_شبيج أري شو اشوفج مليتي ترا اني ما جبرتج على اي شي وانتي قررتي تساعديني بارادتج واذا تريدين تنسحبين الج كامل حرية القرار واذا بقيتي راح افديج بروحي 

_اهوو شبيك ليش تفهمني دائما تفهمني غلط ترا من خوفي عليك هيج احجي ما اريد اخسرك

ضوجني كلش وتعصبت من تفكيرة ردت اطلع من الغرفة بس هو سحبني بقوة باتجاهة بحيث لزگ ظهري بصدرة

قرب راسة من اذني وگال بضحكة شبيج أري جنت اتشاقة وياج ترا اني اعرفج كلش زين وما مستعد اضحي بيج لو مهما يصير

قربة كلش وترني گتلة بتوتر وخر آدم ترا حسوني گاعد هنا انتبهت على حسوني گاعد ملتهي يباوع عالتلفزيون

حضني بقوة وگال حسوني ما مهتم النة لا تتحجين

دارني الة باسني من خدي وراسي راد يبوسني من شفايفي بس بسرعة بعدتة عزا لا يفضحنة وحسوني گاعد هنا

صار يضحك على تصرفي راح على حسوني باسة من راسة وبقى يهمس باذنة جاني فضول اعرف شنو گالة

توجه لجنطتة شالها وطلع سلاحة حطاه بخصرة دائما شايلة وياه بس ما يستعملة يگول بس للضرورة استعملة ومن سألتة شلون تشيلة ما تخاف يلزمونك الضباط والسيطرات گال بكل ثقة لا ما يگدرون لان مرخص

طلع من البيت وتوجه للباب وقبل ما يطلع ودعنا وراح

رحت لبست شالي والصاية وشلت حسوني وطلعت قفلت الباب وتوجهت لبيت اهلي حسب وصية آدم ما يريد نبقى وحدنا

دگيت الباب فتحلنا آسر سلمت عليه وحضنتة قوي كلش مشتاقتلة صار اسبوع ما شايفتة بسبب الامتحانات

وخرت من حضنة وهو اخذ حسوني شالة يبوس بي ويگول ولك صاير رجال ليش ما تجينا وحسوني منزب راسة ويضحك بخجل فديتة ابني الحلو صاير رجال دخلو للاستقبال

واني رحت للصالة لگيت ماما والبنات مجتمعات سلمت عليهن وگعدت يمهن جانن مخبوصات بالتجهيزات  وهاي السوالف لان بعد خمس ايام عقد قران حزيران

گعدت يمهن وصرت اسوي وياهن ماسكات وتنظيف للبشرة كلش احب هاي اللمات مالت البنات بقينا للظهر هيج نسوي على راحتنا محد نوجود وآسر گاعد بالاستقبال ما دخل علينا

امي خطية هي سوت الغدة لان گالت انتن مخبوصات وما عدجن مجال تسون وهي كلش شوية رايحة للمطبخ وراجعة واندي لازمة الخيط بيدها تحف حواجبها وامي بس ترجع تضمة تخاف لا تشوفها لان تعرف راح تتكسر اذا امي عرفت

كملنا كامل ساعة بالوحدة نظفنا الصالة وتغدينا سوية وامي كل شوية تگول لاندي ولج اندي يالمصيبة اكو شي متغير ببج بس ما اعرف واندي من الخوف بس تنزل وجهة

من كملنا اني نظفت المطبخ وسهيلة غسلت المواعين سهيلة كلش بنية حبابة ولطيفة وطبعها كلش مرح بسرعة تندمج ويا الناس ويحبونها الا اندي ما اعرف ليش معادتيها وتگول عليها زليخة

حسيت بتعب وارهاق عالرغم ما سويت شغل هواي توجهت للساعة لگيتها بال2 ونص نسيت علاجي وحتى موعدة راح لهذا السبب تعبت رحت لآسر علمود يروح يجيبة لان ناسيتة بالبيت وما جايبتة

ما لگيتة لا هو ولا حسوني سألت امي گالت راحو هو وحسوني للمحل يشترون

اووف هاي شلون سالفة رحت لبست صايتي والشال وگلت لامي اروح اجيب علاجي وارجع بسرعة

طلعت متوجهة لبيتي فتحت الباب ودخلت بسرعة ما اريد ابقى هواي وحدي بهالبيت اخاف يطلعلي جني واموت بمكاني

دخلت للمطبخ وبنفس اللحظة رن موبايلي شفت المتصل آدم فتحت بسرعة وگلت بلهفة

_الو

_الو شلونج أري

_بخير الحمدلله انت شلونك

_الحمدلله بخير اتصلت علمود انطيج خبر اني بالطريق فد نص ساعة واصل

_صدگ تحجي توصل بالسلامة

_اللله يسلمج بس شبيج أري ليش صوتج تعبان وبالگوة تحجين

_لا ماكو شي بس نسيت اخذ علاجي وهسة راح اخذة

_ليش تسوين هيج أري كم مرة منبهج عالعلاج يا روحي صحتج مهمة لا تهملينها

_اي ان شاءلله

صرت افتح ببوب الكونتر ادور علاجي ما ادري وين حاطتة وآدم بعدة عالخط گال بهدوء

_أري انتي وين

_هاا........ اني ببيتنا نسيت العلاج وجيت اخذة

_شنو بس لا وحدج بالبيت

_اي وحدي بالب.....

بسرعة قطعت كلامي وسكتت من سمعت فجأة صوت طبة خفيفة بالحوش اتوجهت للشباك اشوف شنو مصدر هالصوت حسيت گلبي وگع بين رجلي من شفت اكو واحد لابس اسود كامل مثل الحرامية داخل الحوش وواگف يم الباب جاي يفتحة رجلي گامن يرجفن بسرعة عفت المطبخ ورحت لممر يصير بنهاية الصالة ويطلع عالترك

حجى آدم بقلق وگال أري وين رحتي

گلت بصوت مليان خوف وقلق واني حاطة ايدي على حلگي احاول ما اطلع صوت آدم آدم الحگلي اكو زلم لابسين اسود كامل بالحوش راح يدخلون هسة راح يدخلون ويموتوني

گال بخوف وجزع شنو شتحجين أري زين سمعيني ركزي زين انت هسة وين

_اني وين هااا اني بالصالة

_سمعي زين بسرعة روحي دخلي للمجمدة وادخلي بيها بسرعة

_ها شنو ادخل المجمدة

_ولج اري فدوة اروحلج بسرعة مو وكتج هسة لا اتعبيني روحي دخلي بالمجمدة راح اقفل الخط فد ربع ساعة واصل انتظريني لا تخافين

قفل الخط واني بسرعة رحت للمجمدة جانت مجمدة فارغة حاطينهة بالممر ما نستعملها بس نجمد بيها خبز واكثر شي نستعملها برمضان

فتحت الباب وبالگوة گدرت ادخلها باثناء دخولي حسيت رجلي التوت ردت اعيط من الالم حسيت روحي راح تطلع بس بسرعة عضيت اصبعي علمود لا اصرخ

بقيت گاعدة بالمجمدة اسمع صوتهم وهم يفترون ويفتشون بالبيت گلبي گام يأذيني لان ما اخذت العلاج ورجلي المها يزيد حتى ما اگدر احركها صارت دموعي تنزل بصمت واني حاطة ايدي على حلگي احاول امنع صوت شهگاتي تمنيت آدم وياي بهاي اللحظة بديت اعرگ بسبب المي والخوف والتوتر عالرغم جانت المجمدة كلش باردة بدى النفس يضيق عندي وبالگوة اجر الهوى والمصيبة من سمعت صوت اقدام متوجهة باتجاه المجمدة اتشاهدت وگلت ها هية راح اموت

يتبع.........
بقلمي يمامة