بأي ذنب ..!

الذنب السابع والعشرون

زهراء عـزالدين
الذنب السابع والعشرون
لـ بأي ذنب

مو تنسون التصويت++التعليق بين الفقرات

قراءة ممتعة شباباتنا الطيبة

________بأي ذنب..!________

‏عوض اللّٰه سيمحي مُرّ ما رأيت .

اخذني قبل مدة دكتور علي للبيت الي مسجلة بأسمي دكتور جمال وحرفياً البيت تحفة التصميم، الأثاث، كل جزء لالبيت مأثثة، وبهذا زاد إصراري أن أرفضة لان مستحيل اقبل هيج بيت وبمنطقة راقية يعني غالي جداً

رجعت حاجيت علي وحاولت وحاولت وهم ما قبل احجي وي دكتور جمال وما احسسه وبالاخص ان هو هالفترة مريض

سامر: دكتور بس افهمني ولا تحاول تقنعني

علي: اششششش ما اسمع الك كلمة حجينا اتوقع بما فيه الكفاية  وصدگني انا اعرف ان الموضوع صعب عليك ان تقبل وكبريائك كشاب بس سامر ابني انت تستحق هذا كله بعيداً عن جمال انت لو ابني اسوي اكثر مو عطف ولا شفقة بس لأنك تستحق هذا

لك يا غبي ههههه جمال ينادولة ابو سامر خاف ما تعرف

سامر: احلف !!

علي:  وداعت عيونك ، وهسه سكر الموضوع

وقنعني ثاني يوم اجيب عِطر واخليها تشوف البيت، ثاني يوم فعلاً جبت عِطر وهي لاحظت إنزعاجي وشاركتها افكاري بخصوص البيت وأنزعاجي، سحبتني من أيدي للصاله كعدنا هناك

عِطر: شوف أسمعني بع...

سامر: شوف وأسمعني!! شلون رهمتيها

عِطر: سامر أسمعني يا عيني هواي صاير تقاطعني كمال مأثر بيك شنو

سامر: تمام أُستاذتي الغالية تفضلي احجي وانا اسمعلج وانا الممنون

عِطر: لك عيني شكد احبك

سامر:  لا تتسرسحين

عِطر:  هو مو صوجك هههه بس شوف بعيداً عن دكتور جمال والبيت وبعيداً عن الكل وكلشي راح اسأل سؤال خاص بسامر

" يا ترى هل سامر بنظر سامر يستحق العوض"

سامر: سمعيني عِطر انا ما مستنقص من نفسي وأكيد استحق العوض بس ما اكدر اتقبل ينطوني شي مو الي انا وما تعبان بي شلون اخذة على الحاضر

عِطر: انت من حجيتلي عن حياتك وكيف تأذيت وعذابك، أمير، وأمك الي طلعت من تالي وقت، ياسين وعلاء،محمد ،أمنيات وأختها

حبيبي هذا كله انتَ تعبت من خلاله ومرضت هذا كله الي يصير وياك انتَ تستحقة لان مو الناس الي تقدمة الك لا ابداً هذا ربك ديقدمة الك من خلال هالناس

بسم الله الرحمن الرحيم
(ما عِندَكُم يَنفَدُ وَما عِندَ اللَّـهِ باقٍ وَلَنَجزِيَنَّ الَّذينَ صَبَروا أَجرَهُم بِأَحسَنِ ما كانوا يَعمَلونَ)

(أُولَـئِكَ يُجْزَوْنَ الْغُرْفَةَ بِمَا صَبَرُوا وَيُلَقَّوْنَ فِيهَا تَحِيَّةً وَسَلَامًا خَالِدِينَ فِيهَا حَسُنَتْ مُسْتَقَرًّا وَمُقَامًا)

يجي العوض بعد الصبر العظيم، مثل الغيوم المحملة بالمطر المليئة بالخيرات، حبيبي الله ما يترك قلبك حزين إلا ويعوضه خير ويجازيه جبر عظيم

فهمني شنو أعظم من العوض بعد الصبر عوض الله جميل، فوق توقعات الصابرين. كلما كان الصبر طويل كان العوض جميل. يجيك العوض يزحف الك بعد صبرك

الصبر يا حبيبي أفضل شيءٍ تستعين بي على الزمانِ إِذا ما مسَّكَ الضرر وأنت الحمدلله والشكر صبرت فوق طاقتك وأضعاف

وشفت بعينك إنّ الله يمهل ولا يهمل اعتذر بس امك البايولوجية من اجت وشفتها شلون لبسها وكلامها هذا معناها هي بعيدة كل البعد عن الله

وهذا اكبر عقاب الهي الها لان الي ما يملك بقلبة ذرة أيمان هذا جسد بدون روح ما يملك شي وهذا وحدة عقاب

وشفت أمير شلون سنييين وهو منتظر الأطفال بس ما صار عندة بسبب الي سواه بيك ولما صار عندة اطفال توفو هم وأمهم ما كاعد اتشمت انا بس اذكرك بيلي أذوك وين صارو وشنو صار بيهم وشفت امير بعينك مثل ما كلتلي من رحت تقابلة شنو صاير بي

اما أمنيات فهي الي دمرت نفسها وظلمتها من ما صدگتك وصدگت بصور مفبركة

ودكتور علي يگول ان ابوك انطاك كل الي عندك برضاتة ومن نية طيبة لأن يحبك ومعتبرك ابنة من صلبة مو مجرد تبني

حاول تتقبل الي يتقدم الك من خلالهم لان ينطوة الك بحب مو واجب وكله راجع الهم لا تنسى ان الي يقدم خير يجي خير

سامر:أنا الغريق فما خوفي من البلل

عِطر: اسم الله عليك يعوضها لعِطر، شدة وتزول
ولا تنسى أن عِقبَ الصبرِ نجاحٌ وغِنى، ورِداء الفقرِ من نَسْجِ الكَسَلْ وبالتأنّي تدْرَك الفرَص

سحبتها وضميتها لصدري وهي كالعادة تحب تلعب بشعري وهي بحضني، مددت ع التخم بالصالة وهي مدتت بحضني ممكن تنزعين حجابج لان شعرج وسادتي

عِطر: تتذكر من بتت ببيتنا

سامر: اممم بيوم الي تأخرت على القسم لان كان عندي لود شغل بالمطعم وما قبلو ادخل

عِطر: لو ما كنا متزوجين وين كنت بتت بيومها

سامر: عند دكتور علي لان ما عندي احد ثاني

عِطر: ههههههه لا ومن كل عقلة الاستاذ ابات يمه حبيبها لعِطر كلتلك ناس منفتحين شوي بتفكيرنا بس مو ابات ليلة كاملة وي خطيبي نفس الغرفة لا عيني نحن متحفظين بهالخصوص

ضميتها لصدري وخليت جهي بنحرها اشمها
سامر: نحن هسه بحضن بعض وببيت وحدنا وين تحفظكم اذا صار شي بينا هسه

عِطر: ههههههههه هذا لو كان شخص غير سامر اي اخذ حذري بس انا بأيدين سامر الي يحافظ عليه اكثر من نفسه مثل صلاته

سامر: اتمنى تدوم هالثقة بينا

عِطر: راح ادوم لأن الرجال سامر مو غيره، راح اكون وياك دائماً مثل ظلك من تحتاجني الا بالأوقات الي تريد تكون وحدك فهنا راح احترم رغبتك

سامر: عجبج البيت

عِطر: جداً حلو ومميز بتصميمها من الخارج أكثر شي حبيتة الحديقة واسعة ومليانة شجر وورد وكأن اكو شخص يعتني بيها مو متروكة!!

سامر: اي امس بلغني  علي ان أكو شخص يهتم بيها يجي كل أسبوع لأن دكتور جمال يعرفني أعشق الحدايق والهدوء

عِطر: ربي يحفظة ويديمة ويشفية ربي بأسرع وقت لأن هالشخص يستحق كلشي حلو رغم التقائي بي مرة وحدة بخطوبتنا بس دائماً يراسلني ويسأل عني حتى وامك جداً حبابة وأختك سديم

سامر: أمي!!

عِطر: اي زوجة دكتور جمال

سامر: هااا اي تدرين استحي احجي وياها رغم انها جداً حنوونة حتى سديم تراسلني دائماً وتسأل بس أستحي منهم جداً

عِطر: ههههههه اي كالتلي سديم شكد انتً تستحي منها وهي عن قصد تمليك حنية لان تحب من تتلعثم بالكلام، امس كنا فاتحين كامرا مع بعض

وتشرحلي من كنت عايش عدهم بعد الحادث وبعد ما تسجلت بأسم ابوها طارت من الفرحة ان عندها اخ كبير وراح يحميها ويحبها وبانية احلام على اخوها

بالأخير دم طخ ههههه تركتها وسافرت تستقر بالبصرة والى الأن على فكرة مخلية هالغدرة ببالها لهيج تحب اداهرك

سامر: عِطري

عِطر: هااا

سامر: لا تسكتين ابد اريدج دائماً تحجين وما تسكتين أبد صوتج موسيقى هادئة الحانة تطرب اذني

عِطر: ههههههه لا سامر لا ادغدغني ههههه لا ساااامر لا

سامر: احب اسمع ضحكاتج بلسمي

عِطر: خلينا نفتر نشوف البيت

سامر: يالله

عِطر: الوان الجدران والابواب جداً حلوة اتوقع هذه تصاميم وأختيارات مهندس تصميم داخلي مو مجرد شخص عادي مختارها

سامر: بالضبط هذا الي صاير هالبيت بناء خاص تصمم الي لهيج انا منزعج ومتثاقل لأن هالمبالغ الي دافعها دكتور جمال تثقل كاهلي من اجي واتقبلها بكل سهولة

عِطر: حبيبي انسى هالموضوع شنو حجينا قبل شوي وخلينا فرحانين بهاي اللحظات، مو يگولون الخطوبة احلى من الزواج

سامر: تعالي اعضج

عِطر: اهوووو لك شبيك يا سامر خدودي راحو ورمو من عضك حتى وجهي صار بي حبوب قبل كم يوم

سامر: مو انت تجبريني اكزكز عليج
خليتها تلتهي بالبيت وفجأة عضيتها وبقت تبجي سكتتها بالزور وزعلت وراضيتها

رجعنا نفتر بالبيت بي ثلاث غرف وحدة بالطابق الأرضي واثنين بالطابق الثاني  وحمامات من ضمن كل غرفة وصالة خارجية وصالة مفتوحة على المطبخ

والدرج من نص الصالة وينفتح على الجهتين وخلف الدرج مخزن صغير وحتى تدخل للدرج تمر بحديقة بوسط الصالة من زجاج محاوطة كل الدرج للطابق الثاني

وبلكونات الغرفتين الفوك تطل على الحديقة الداخلية الي كل زرعها ظلي ونافورة ع الجانب الحديقة واسعة ماخذة اغلب الصالة

صعدنا للطابق الثاني الغرفة الكبيرة شباكها كبير جدا وللسقف وفي بلكونات اثنين وحدة اطل على الحديقة الداخلية والثانية الكبير اطل على الحديقة الخارجية ذاب حيلة ومالة دكتور جمال بهالبيت

مدخل البيت بي بابين صغير للمدخل والثاني كبير لدخول سيارة ويكون مساحة بسيطة اما الحديقة تكون خلف البيت بابها من المطبخ

عِطر فرحانة بالبيت لأن جداً تصميمة مميز وشبابيكة كبار  تدخل الشمس من كل مكان واختارت غرفتنا الي تكون اطلالتها على الحديقة بالطابق الثاني لأن اكبر غرفة والثانية لأطفالنا بالمستقبل والي تحت للضيوف  قررت ووزعت وباقي من الفرحة بس تسمي الاطفال

ضحكتها وهي تتفتل بالبيت وتحجي عن هواي امور تنسيني كل تعبي وأنزعاجي وتخليني اتحمس وياها، بحماسها وهي كدامي تتفتل بالبيت تخيلت مستقبلنا وتجبرني أستعجل بالزواج

رحت حضنتها من الخلف
سامر: كاعد أشوف الفرحة بكل وجهج وانت تتفتلين بالبيت وهذا الشي يفرحني مميزتي

عِطر: فرحتي مو بس بالبيت وتصميمة والتفاصيل لا ابد انا كاعد اتخيل ان هالبيت راح يجمعنا وراح يكون مملكتي الي بيها أسعدك واعوض كل ذرة تعب بسامر

اتخيل شلون استقبلك من ترجع من شغلك تعبان، شلون ناكل هنا، وهنا راح نسهر على افلام ونتونس وتعال نصعد فوك اشوفك شي

شايف هاي الزاوية جداً حلوة سامر وهم شباكها واسع وومر يعني لو نزيح هذا الميز ونخلي مكان خاص بالصلاة

يعني شوف نخلي مكان الصلاة خارج الغرف بهذا الممر حلو يطل ع الحديقة من نفتح الشباك ونصلي ريحة الحديقة تجنن

نخلي الميز بزاوية اليمين نخلي عليها السجادات والقرأن وكتب الأدعية وعطورات الصلاة وملابس الصلاة خاصة هنا هم

وحتى لا سمح الله تمام خلي نتفق من هسه ان اذا كنا متخاصمين وواصلة للظالين ومن الروس بس هم وقت الصلاة نصلي سوى تمام

سامر: انا مو گد هذا كله عِطر گلبي مو حمل كل هالعوض واللطافة وانتِ احسني بحلم وما اريد اصحى منه

عِطر: هذا مو حلم صدگني هذا كله حصاد الصبر الي زرعتة وبس

سامر: تعالي وياي

عِطر: وين

سامر: تعالي
اخذتها للغرفة تمددت ونومتها بقربي على ايدي وانا العب بشعرها

سامر: تعرفين!؟ تكبدت عناء هواي من الأشياء الي يرغب بيها الرجال دوم ويعتبرونها من أولوياتهم المهمة

بس انا تخليت عن كلشي! جاهدت نفسي وأنتِ تعرفين يا حُلوتي بأن جهاد النفس مرهق جداً!

غضضت البصر عن جميع النساء بس حتى تمتلئ عيني بيج وحدج لأن ما كنت قريب من بنت بيوم ابداً إجلالاً لقربج مني وأقسم الج بهذا

من بعد المأساة الي عشتها بالماضي أقسمت هم أن ما افكر بأي بنت أبد ورسمتج بداخلي بس!

تخيلتج قريبة مني، تغارين عليه وتمنعيني من الخطأ، تمسكين أيدي بقوة واحس بأصابعج تندس ما بين أصابعي كلما حاولت وحدة من البنات ان تتقرب مني او اميل الهن!

بوقتها عرفت أنتِ هنا، ما بين ضلوعي وجدران قلبي! تتجولين بقفصي الصدري وترسلين أوامرج لجهازي العصبي!

حتى تخليني طوع أمرج بكلشي انت ترغبين بي! تنالين مني بكل مرة حاولت أبعدج عني وأمنع التفكير بيج

بينما رسمج عقلي بكل هذيج الدقة والوضوح وخليتي من حياتي قصرج الذهبي ومملكتج العظيمة وأستعمرتِ قلاع قلبي وسكنتي بكل هدوء بين نبضاتي!

لگيتج أخيراً! اي هاي أنت لگيتج بواقعي تنتقلين گدام عيوني، واكف حاير گدامج بدون ما أتحرك وبدون اي فعل يذكر يخليني أحس بأني أنسان يملك طاقة تحمل وإرادة!

احتضنتها اكثر بس يا جميلتي انا رجل أرادته صلبه، وعالمه كأنه صراح حلبه! شلون گدرتي تسوين بي كل هذا؟

مو لازم توگفين ولو شوي إجلالاً لأرادتي العظيمة الي انسحقت كدام جلالتج بكل سهولة وبدون ان تبذلين أي جهد!

مو من حقي أن أطالبج بكلمات قليلة تشفي وقوعي العنيف بيج لان اوقعتيني من أعلى جبال مقاومتي! و....

حسيت بأن ماكو حركة رفعت راسي وأشوفها غافية ابتسمت وحاولت اغفى وياها صحيت على صوت ضحكاتها وهي متربعة ع السرير مخلية ايدها على فمها وتضحك

ضحكات اخذت عقلي مباشرة كعدت لمستواها واخذتها اقبل خدودها وادغدغها حتى تنطرب اذني بضحكاتها

سامر: اضحكي كلما استطعتي عِطري، لأن ضحكتج دواي

عِطر: حبيبي صار المغرب كلش ما بقى شي للأذان خلي نرجع وأنت هم وراك شغل

سامر: يالله نروح

رجعتها للبيت ورحت للمطعم لأن هالفترة ما اشتغل بالمجمع مغلق لان صاحبة مسافر وانا اشتغل اتصلت بدكتور جمال اطمئن عليه وحجيتله عن موضوع الزواج ان حيكون بعد أمتحانات الفاينل مباشرة

فرحت أن هاليومين صحتة متحسنة ولحد وقت زواجي هو يجي بنفسة حتى يجهزني ويزفني رغم بعد أشهر

ومرت الأشهر بين الدراسة والشغل وعِطر تقريباً صار سنة على خطبتنا وما بقى الا مدة لسنوية محمد الأولى

امشي وأضحك وعايش واحاول ان ما اختلي بنفسي مثل ما وصاني محمد ووعدتة ان اتقوى بوجودة داخلي وهو مو ميت وراح يبقى وياي للأبد بقلبي وعقلي واحاول امشي حياتي طبيعية

الأيام تمر وتركض ركض ان شبسرعة صار سنة، واخذت قراري بعد ما مرت سنة على خطبتنا، صار الوقت مناسب حتى أرتبط بيها أرتباط روحي حقيقي وادخلها حياتي وتشاركني هذي الحياة

اخذت أجازة ورحت للبصرة وعزمت الكل ببيت خالو ابو محمد تكفلت بكل مصاريف العزيمة كل ما اجي للبصرة ننجمع ببيت ابو محمد لأن هم العائلة الاكبر واحاول احافظ على عائلتي الباقية

بعد الأكل فتحت وياهم موضوع زواجي والتجهيزات وهاي الأمور كلها واخذت رأيهم بهواي أمور

أمل: اي وأخيراً عاد نحضر عرسك لأن بالخطبة ما گدرت أروح

ابو محمد: اي بوية غير خوات العريس لعد اذا ما ترحين انت وسارة ومنتهى منو الي يهلهل اله ويصفكلة

سامر: عطر بعدها ما تعرف بموعد الزواج بالأول ردت أستشيركم واجهز اموري قبل الأمتحانات وبعدين نتفق انا وياها

بعد يومين رجعت لبغداد فرحان بعد ما حجيت وياهم وأتصلت بعِطر وكلتلها أن أجهز الها مفاجأة جداً جميلة وراح تفرحها هواي

عِطر: سااامر أحجيلي شنو هي المفاجأة؟

سامر: لا تستعجلين يا حبيبتي راح تعرفين قريباً

عِطر: بس أنت تعرف أنا ما أكدر اتحمل يقتلني الفضول فدوة احجيلي

سامر: ما راح تنتظرين هواي خلال هاي الأيام ابلغج والله خير

عِطر: أنت تزيدني فضول أرجوك داحجيلي، احجيلي

سامر: لا إله الا الله ، لا إله الأ الله

عِطر: منو الميت؟

سامر: ههههه ما مات أحد، أنتظري بس

عِطر: تختلف عن الكل بكلشي حتى بتعبيرك عن أنزعاجك وحزنك وغضبك!

سامر: شلون بالله

عِطر: لما تعصب تكول أستغفر الله ، لما تنزعج لا إله إلا الله ، ولما أسببلك الحزن وما تگدر تحجيلي تكول لا حول ولا قوة الا بالله

سامر: احبج انا هواي مميزتي واتحمل منج كلشي، انتظري كم يوم وتعرفين

بعد ايام تأخرت عن المحاضرة
سامر: راح تاكل راسي هسه وتتهمني بالتخاذل والأهمال

طلعت مستعجل.. وصلت للقاعة طرقت الباب وردت أدخل

عِطر: اطلع

سامر: ليش؟ ما تأخرت بس خمس دقايق

عِطر: لا تجادل أنت مطرود وما تدخل بمحاضرتي مرة ثانية

سامر: لحظة شنو؟ شصاير أستاذتي؟ ترى ما يستحق الأمر كل هذا؟

عِطر: مو گلت لا تجادل!! اطلع وإلا

سامر: وإلا شنو؟ شصاير ؟ انا ما سويت شي

عِطر: سامر أنت مفصول بهاي المادة وهسه يالله اطلللع ..........

_________________

شباب احس أني نسيت شلون اقفل بارت او شي 😶

شلونكم شخباركم طمنوني

لحظة لحظة سنة خير سعيدة عليكم يا رب وكلها خير ورحمة من الباري
كتبو هنا اكثر شي حلو اعطاكم اياه ربنا ب2023 ( مساحة خاصة)

نعسانة اعذروني اروح انام🙂

الملا سلام: كلنا بالنهاية ذكرى فأحسنوا ذكراكم