غموض جارنا

بارت 15

غموض جارنا

الكاتبة يمامة

أرينا

التفتت وراي احس گلبي وكع بين رجلي من شفت حزيران واگفة ورانة وعلى وجهة علامات الاستغراب

گاعدين اني واندي بالصالة وحدة لازگة نفسها بالثانية وكانو نريد نحمي نفسنا ومنزلين راسنة بالگاع من الخوف

وحزيران گاعدة گدامنة حاطة رجل على رجل وعيونها مليانات  عصبية وتهز رجلها بتوتر والبيت هدوء بحيث اذا توگع ابرة بالگاع ينسمع صوتها

حجت حزيران بعد سكوت لمدة ربع ساعة بنبرة مليانة عصبية وسخرية

_اي ست زهراء احجي شنو الكلام الي سمعتة برا ومنو هاي المرأة وبدون لف ودوران

_ها اا المرأة هاي...... هاي

_اي احجي ليش كل هالخوف ما راح اذيج

_ها ا.  هاي المراة.................. طليقة آدم السابقة وام حسوني

فتحت عيونها بصدمة وبقوة بقت تباوع بوجهي يمكن ما مصدگة الي جاي تسمعة بقت ساكتة وبس تهز برجلها والله لو تعرف كل الحقيقة الا تعلگني بالبنكة گالت ورا مدة بنفس نبرتها السابقة

_اي احجي

_شحجي

_احجي شلون عرفتي زوجج المصون جان مزوج وشوكت بدون جذب ولو بحرف واحد فاهمة

_اممممم الصراحة................. عرفت بي مزوج من اول ليلة تزوجتة هو اعترف الي بالحقيقة وجاب حسوني يمنة وگال گال...... يريد يبدي من جديد وهو هم يحبني وزوجتة السابقة تركتة وتركت حسوني من جان عمرة شهرين........  فهو راد نبدي حياتنا بدون اسرار وهاي كل الحقيقة وگال ما گدر يعترف بالبداية علمود لا يخسرني

_جيد جيد كلش جيد ما اعرف شاحجي مع الاسف عليجن علساس اني الاخت الجبيرة وكلشي اعرف طلع المي يمشي من جوة رجلي اهنيج على كلشي الاخت زهراء طلعت مزوجة واحد مزوج قبلها وعائلتها ما تدري الا ورا سنة والاخت الذكية الاخرى طلعت تعرف بس ما حجت اي شي والا هي شتحجي اذا ملتهية ويا صديقها الي بسببة تروح للجامعة بس علمود تشوفة

_والله حزيران مو مثل ما تفكرين بس هو مرة ساعدني وصار صدي...   

_اشش كافي حرف ما اريد اسمع صوتج سدي حلگج فاهمة حسابج بعدين انتي

باوعت لاندي نزلت راسها بخوف جي على بالي اعرف منو هذاالولد اليحجن علي بس مو وقتة هسة

گلت بخوف والله حزيران آدم خوش رجال حباب وابد ما يأذيني ابد حتى لو بكلمة واني احبة كلش وحتى حسوني احبة هواي واعتبرة مثل ابني وانتو هم تحبونة امانة لا تزعلين وإدم گال راح يگول الحقيقة بس عندة شغلة يخلصها

نزلت راسها بتعب وگالت تعبتني ما اعرف شاحجي وشاگول بس تبقى هاي حياتج واني تعرفين الصح من الخطأ

بقيت ساكتة ما اعرف شاگول احس اگو غصة بگلبي احس نفسي خذلت اهلي وخواتي  دموعي نزلن بصمت

حزيران باوعتلي وبسرعة تقربت مني حضنتني وگالت بخوف وقلق زهراء ليش تبجين اسفة والله اذا جرحتج بكلامي لا تبجين يعمري

حضنتها بقوة وگلت من بين دموعي لا انتي سامحيني عالسويتة  خذلتج وخذلت اهلي ما عرفت شاسوي جنت غبية وماعرفت شاسوي

مسحت على راسي وگالت بحنان يعمري لا تبجين كافي وماكو داعي تعتذرين خل ننسى الماضي والحاضر هو الاهم ومثل ما گلتي آدم زين ويحبج وهو خوش رجال والنعم منة وبعد شاكو بيدنا نسويه الصار صار ما ينفع الندم

سمعت صوت الباب ينفتح رفعت راسي شفت آدم داخل علينا وعلى وجهة علامات الاستغراب مسحت دموعي بسرعة وحزيران سحبت ايد اندي بسرعة وطلعت بس قبل ما تطلع گالت لآدم بصوت واضح خل طليقتك تبعد عن زهراء لان لو ما بعدت او فكرت تأذيها ولو بكلمة راح تشوف شي بحياتها ما تمنت تشوفة

طلعت بسرعة بدون حتى ما تسمع كلام آدم بقى آدم واگف بمكانة بعدة بصدمتة

انتبه علي كاعدة بالگاع تقرب بسرعة مني لزم وجهي وگال بخوف أري شبيج ليش باجية منو مزعلج يگلبي

ما احس الا اني حاضنتة قوي وصوت شهگاتي بس بالمكان گتلة بصوت باكي حزيران.... حزيران عرفت انت مزوج وحسوني ابنك ما تعرف يا آدم شلون النظرة الي شفتها بعينها من سمعت كلامي اتمنيت ميتة ولا شايفتها جانت نظرة مليانة حزن خذلان صدمة آدم اني خذلت اهلي

حضني بقوة وگال اشش يعمري لا تبجين امسحي دموعج ورفعي راسج اني السبب انتي ما الج دخل اوعدج راح اخليج تمشين بكل فخر ومحد يحجي عليج راح تگولين اني زوجة آدم وآدم زوجي ما راح اتخلى عنج ابد يا وريدي ما راح اخليهم يحاسبونج على قرارج راح اتحمل كل المسوؤلية

هدئت شوية وبعدت من حضنة مسحت دموعي وگلت لازم اسئلة السؤال الشاغل بالي هذا الوقت المناسب

گتلة بتوتر آدم ممكن اسألك سؤال بس لا تتعصب

گال اي سألي وان شاءلله ما اعصب يعني حسب السؤال

گلت بتوتر اممم منو فاطمة

بقى يباوع بوجهي ساكت وكانة يفكر او يسترجع ذكريات من ماضية الحزين

تنهد وگال بتعب راح اگولج منو هي بس بشرط ما تسألين اي سؤال اخر بخصوصها

هزيت راسي بقبول وهو گال بنبرة مليانة حزن فاطمة اختي

انصدمت من گال هالكلمتين احس واحد ضربني راجدي صفنت بوجهة ما اعرف شاحجي الاعدادت الي براسي تخربطت شلون عندة اخت واني عبالي اهلة ميتين وما عندة اخوات

سألت بفضول بس انت مو علساس ما عندك اخوات

گال بهدوء لا عندي بس محد يدري

ردت اسألة وين هي ليش ما عايشة ويا وليش ابد ما يحجي اي كلام عليها جان براسي هواي اسئلة تحتاج اجوبة بس ما گدرت لان وعدتة ما راح اسألة اي سؤال اخر

لمني لحضنة وصار يمسح على شعري وبس يتنهد اما اني جانت هواي اسئلة وافكار براسي تخص آدم وعائلتة الغامضة وشنو هو ماضية الي يرفض يحجي عليه

مر اسبوعين وحزيران بالگوة سامحتني بقيت اسبوع كامل اعتذر منها يالا سامحتني ورجعنا مثل قبل

شلت حسوني وطلعت اودي يم امي بين ما آدم يكمل تجهيز نفسة ويوديني بطريقة على دوامي

رحت دگيت الباب طلعتلي اندي خطية بعدة منعس فديتة ابني الحلو بستة بخدة و انطيتة الها

رجعت بسرعة بس فجأة شفت گدامي حسين اخو سمر انصدمت من شفتة صار شكد ما شايفتة يمكن اكثر من ست اشهر

رجعت بافكاري ليوم خطوبتي من راسلني وگال اني احبج ولا تقبلين ارفضي وحتى اتصل علي وجان يبجي  بوقتها انصدمت ما جنت متوقعة الي سمعتة بحيث جنت عبالي احلم ما متوقعة هالشي ولو واحد بالمية يعني عمرة جان 17 واني 19 مستحيل يصير بينة شي

گال بحسرة السلام عليكم شلونج زهراء

رديت بتوتر وعليكم السلام بخير الحمدلله انت شلونك

جاوب بتهيدة ضايع وتايه بسببج كلش اذيتني

انصدمت من جوابة شلون يحجي هيج كلام جريئ وهو يعرف اني متزوجة هذا شبي كلش متغير قبل جان مؤدب وخلوق كلش عصبني ردت ارزلة بس بنفس اللحظة طلع آدم سكتت لان ما ردت اسبب مشكلة

عفتة ورحت صعدت بالسيارة شفتة سلم على آدم بس نظراتة جانن مليانات شر كلش خفت لا يتهور ويسوي شي لان بعدة مراهق وتفكيرة متشتت

قفل آدم الباب وجي ركب ساق وطول الوقت جنة اثنينا ساكتين

وصلت للجامعة واخذت المحاضرات بس جنت احس بملل فضيع لان اسراء صار اسبوعين تگول عدها ظروف وما تگدر اداوم فطول الوقت ابقى وحدي وحتى ما اگدر اروح يم حزيران لان محد يعرغ بينا خوات وما بية حيل اگعد اشرح لصديقاتها

خلص الدوام وجي آدم اخذني ما ادري نفسي هالايام كلش اشتاقلة وما اگدر ابعد عنة

بس صعدت السيارة راح الملل وتجدد النشاط لان شفت زوجي العزيز سلمت علي وهو ظل يسئلني على يومي ابد ما يبطل هالعادة لازم يسئل على يومي واني احجيلة كلشي بالحرف الواحد وهو ابد ما يحس بملل

تقربت منة وبدون سابق انذار بستة من خدة ورجعت ورا بسرعة هو لزم خدة وباوعلي بصدمة

احس نفسي اريد اطب بهدومي من الفشلة مدري شلون اتجرأت وسويتها

صار يضحك بقوة وگال ها ولج أري طالعة عينج شنو هالتطورات

بقيت ساكتة ما اعرف شاحجي من الخجل والفشلة والله صدگ طالعة عيني بسبب تفكيري

وصلنا البيت وقبل ما انزل قفل البوب ودارني الة بحركة سريعة قبلني بعمق واني بس جنت فاتحة عيوني بصدمة ما مصدگة الجاي يصير همزين السيارة مظللة جان انفضحنا  ما وخر مني الا من دفعتة حسيتة خنگني

گال بضحكة ها اعتبريها رد دين الج بس بطريقتي

نزلت راسي بخجل زهو گال بضحكة رنانة  اويلي فديتة الخجلان

نزل قبلي واني بعدني تحت تأثيرات بوستة بالگوة فتحت الباب بايدين ترجف ونزلت

انصدمت من شفت ميسم وواگفة گدام بابنة وكانها تنتظرنة رأسا مشاعري تحولن من الفرحة للغضب فورت دمي الخبيثة

اتقدمت مني وسلمت علينا گالت لآدم بمياعة ومسوية  روحها خايفة على موضوع زوجها شلون يهددها وهي الخاتون تريد آدم علمود يساعدها

كلش عصبيتني اريد الزمها واخنگها ليش تريد مساعدة من آدم ما تروح على مركز الشرطة

فاجئني آدم من گاللها اني عندي شغل هواي وما اگدر اشوف الموضوع بس راح ادزلج صديقي محمد هو راح يتصرف وياه

ما توقعت راح يكون هذا جوابة توقعت راح يساعدها هو بنفسة

سحبني من ايدي ودخلنا وهي بقت تفور من عصبيتها

بس دخلنا شالني آدم بحركة فجأئية انصدمت من فعلتة

گال بابتسامة ما يصير انتعب ملكتنا لازم انشيلها

باوعت بعيونة ونظراتي كلها حب هزيت راسي بفرحة ولزمت رگبتة اريد ادخل بگلبة
_____________________________

حزيران

رحت للحمام اغسل وجهي بمي بارد بسبب درجة حرارتي العالية احاول اخففها بالگوة امشي من التعب وحتى ما اگدر احجي زين بسبب بلاعيمي كلش ملتهبات

طلعت لبست قمصلة طويلة مثل البالطو تصير وبيها كلاو دثرت نفسي بيها زين حطيت الكلاو على راسي وصعدت فوگ السطح اريد مكان هادئ وبي هوى نقي يمكن شوية تتحسن حالتي

فتحت الباب وطلعت جان اكو كرسي قديم رحت سحبتة وگعدت عليه

جانت نظراتي تخترق السماء الجو كلش بارد والسما لونها ارزق بمجرد تباوع الها تحس بشعور لا يوصف تحس نفسك كانك طاير تحب تسافر بهالحظة تحس اكو امل بحياتك تحس حياتك بدت من جديد

فزيت على صوت واحد يگول حزيران

التفتت وراي لگيتة حارث واگف فوگ سطحهم گمت من مكاني وتوجهت الة

گال بهدوء السلام عليكم  شلونج

رديت بابتسامة وعليكم السلام بخير الحمدلله انت شلونك

تنهد وگال بهدوء زين يعني بس اريد اسألج ليش هيج تسوين بية شنو القصور البية اكو شي بدر مني علمود هيج تسوين  تعرفين اذا وافقتي راح اسوي شي ابد ما يعجبج

اتعجبت شيحجي هذا شنو اوافق شنو جاي يحجي اشو جاي هاد علية

گتلة بأستغراب شتقصد ترا ما افتهمت من حجيك اي شي وشعندج جاي هاد علية

گال بعصبية خفيفة تعرفين كلش زين شاحجي وماكو غيرة موضوع خطوبتج

رديت بحيرة يا خطوبة شبيك انت

گال بعصبة لا تغشمين نفسج تعرفين احجي على موضوع خطوبة ابن خالتج الج وائل مدري شسمة

انصدمت من گال هيج شنو هالكلام واني اول مرة اسمع بي وشعندة حارث افندي جاي حامي ويهدد بية

گتلة بعصبية هي عيوني ترا اول مرة اسمع بهالحجي منين جبتة

گال باستغراب شنو منين جبتة غير اندي اختج گالت

اها هسة يالا افتهت طلعت هيج السالفة هاي اندلس الحقيرة لو الزمهاالي اسويها وصلتين واعلگها بالبنكة على هذا الجذب

گتلة بعصبية ترا كل الححجي السامعة من اندي جذب وترا وائل مزوج وعندة طفل

گال بهدوء وفرحة  يعني طلع محد خاطبج كلة جذب

جاوبتة بعصبية اي جذب ومن رخصتك اريد اروح

ردت امشي بس فجأة لزم ايدي التفتت علي متعجبة تصرفة  گتلة بعصبية وبسرعة هديت ايدي رفعت اصبعي بتهديد بوجهة وگتلة ديري بالك تعيدها مرة ثانية فاهم

نزل راسة وگال بهدوء اعذريني حزيران بس انتي تعرفين احبج ومن سمعت بيج مخطوبة حسيت عبالك ضربوني طلقة تمنيت ميت ولا سامعة ما اگدر اتخيل حياتي بدونج تعرفين اريد ابدي حياتي الجاية وياج اريد تكونين نصي الثاني تؤام روحي

سكت شوية يتنهد وگال حزيران بعد ما بقى عندي صبر راح ادز امي عليكم وحتى لو ما توافقين اخطفج وما اخلي غيري ياخذج

نزلت راسي بخجل احس گلبي صار ينبض بقوة من سمعت كلامة جان احلى كلام واعتراف سمعتة بحياتي ويا هذا الجو الحلو

ما رديت عليه عفتة بسرعة ودخلت سمعت صوتة وهو يگول يعني راح ادزها لان السكوت علامة الرضا

قفلت الباب ونزلت اركض لغرفتي ما مصدگة حارث واخيرا اعترفلي بحبة

وصلت لغرفتي فتحت الباب وتوجهت للمراية جان وجهي صاير وردي من الخجل حتى حسيت نفسي صرت زينة وكل شوية احط ايدي على وجهي واضحك مثل الخبلة

ورا اسبوع زارتنا ام حارث وعمتة وطلع صدگ رجاب و گد كلمتة ما خذلني وجن يخطبني

ماما وبابا سألوني عالموافقة وگالو حلرث خوش رجال وما يتعيب وما نلگى احسن منة

اني من حماسي وفرحي ردت بنفس اللحظة اگول موافقة بس گلت خل اثگل واسوي نفسي بعدني افكر

صليت استخارة وحسيت بشعور هادئ ولطيف واقنعت كلش بحارث وبهالقرار ورا اسبوع ردت امي خبر الموافقة وصارت مشية الزلم ورا اسبوع واتفقوا العقد راح يصير بالعطلة الربيعية جان المهر 20 مليون مقدم ومؤخر

واندي بس تمشي وتهوس وتگول اويلي راح ازوجكم كلكم و اشوف جهالكم واحفادكم قبل ما اموت عبالك عجوز
____________________________

اندي

نايمة عالرحلة وما ادري بالدنيا طشت رشت المدرسة لهسة ما جاية والبنات صوتهن واصل لسابع جار ما يعرفن بس يعيطن اريد اعرف الاتوثة وين

فجأة دخلت المراقبة تصيح وتگول اسكتو عندي خبر حلو رفعت راسي باتجاههة بقيت اراقبها وهي بعدها تصيح علمود يسكتن بس ذن جنهن عجايز ما يسكتن

اتعصبت المراقبة وگالت راح اطلع وما احجي كلشي عاد شوية سكتن

حجت بصوت عالي وگالت المد ر س ا ت عدهن اجتماعععععع

بس گالت هالكلمة صوت العياط صار مالة والي الصف انگلب حمام نسوان والدگ عالرحلات وصل الله اليدري ليم الادارة وهسة اذا يسمعونة المدرسات يجون يرزلونة لان معروفين احنا شعبة جيم بالكسالة والصوت العالي والمدرسات ياهي طابة او طالعة يرزلن بينا ويرجعن ليورة

كل بنية اخذت مجموعتها وگعدن يدگن سوالف واكو بيهن طلعن للساحة

لفت انتباهي مجموعة بنات گاعدات سوية مسوياتلهن  جمعة وجاي يدگن ويرگصن اكو وحدة بيهن صوتها كلش حلو تغني بالانگليزي

رحت اندمجت وياهن وگعدت بس اباوع الهن ماعندي صديقات محددات يومية ويا وحدة

جانن البنات كل شوية يرگصن رگص مختلف بس اكو اثنين بنات صار يرگصن مثل رگص البوب والبنية صارت تغني الهن

گمت ارگص وياهن لان كلش احبة يشبه الرقص الي انتشر بفترة الثمانينات

جنت اكثر وحدة بيهن اعرف ارگص والبنات البقية اتجمعو يمنة وصارن يشجعن ويصفگن واني كلش اتحمست صرت ارگص بحماس وفرحة وما ادري بنفسي

فجأة وگف صوت البنات والصف صار خنسة والبنات بس يباوعن باتجاه الباب استغربت تصرفهن والتفتت باتجاه الباب لگيت المعاونة واگف تباوع علينا بعصبية

من شفتها احس لساني انعگد ويلعت العافية عزا بعيني جاك الموت يا تارك الصلاة

گالت بصوتها الصارم ثلاثجن وراي للادارة بسرعة المراقبة تعاي وياهن

سبقتنا والمراقبة اخذتنا للادارة وهناك حصلنا رزالة غسل ولبس  وظل تحجي وتگرگ على راسنة وتگول المدرسة للتعليم مو للسوالف الطايحة حظهة مسويات الصف ملهى ما تستحن على وجهجن وگالت هواي حجي حتى نسيتة من الخرعة

گالت باجر لازم اجيبن ولي امرجن ما اعرف ليش كل هالتشديد والعقوبات والله رگصنا جان عفوي وما بي اي شي غير اخلاقي وهو رقص البوب هيج بس هاي العجوز مدري شبيها

خلص الدوام وطلعت اتمشى للبيت بس تفكيري جان مشغول بمصيبة اليوم شلون راح اجيب ولي امري والله امجد وبابا لو يعرفون الي يموتوني بابا احسن من امجد يمكن يتفهم  بس امجد شي اكيد ما راح يتفاهم احسن شي اگول بس لآسر واخلي هو يجي

قاطع افكاري صوت شخص وهو يگول اندي

انتبهت لليسار لگيت وليد يمشي وياي بس بعيد مني

گلت بفرحة ولهفة وليد

هز راسة وگال بابتسامة مرحبا شلونج شخبارج

رديتلة الإبتسامة وگتلة مراحب بخير الحمدلله انت شلونك

گال بهدوء الحمدلله بس انتي ليش حزينة لازم كلش ما اشوفج تكونين ضايجة وزعلانة

گتلة بقهر اليوم سويت مشكلة ويريدون اجيب ولي امري وحايرة شلون اگول لاهلي ما عندي شجاعة احجيلهم

هز راسة وگال باسف يالا ان شاءلله ماكو مشاكل انتي احجيلهم ولا تضمين اي شي عليهم

هزيت راسي ردت اغير الموضوع گتلة انت مو علساس عندك جامعة شعندك هنا

گال بابتسامة جيت علمود اشوفج وراها اروح للجامعة وراح اجي كل احد علمود اشوفج

نزلت راسي بخجل وگتلة يعني راح تجي كل احد؟

هزلي راسة بقبول

فكرت باخر مرة شفتة وشلون حزيران گالت ما يصير احجي ويا عاد گتلة من تجي بعد ما راح نحجي بس تمشي سوية ولازم يفصل بينا الشارع هو اتفهم وما حجى اي شي

وصلت بيتنا ودعتة ودخلت وبوجهي گبل رحت للمطبخ اريد اشوف شمسوين غدة لان ميتة جوع ومعدتي راح تاكل نفسها

لگيت سهيلة واگفة تسوي حلويات رحت وگفت يمها اشوف شسوي

انتبهت الي وگالت بفرحة همزين جيتي اندي اريد اسوي كيكة لآسر وما اعرف هو يحب الكاكاو لو لا ويا نوع كريمة يحبها

بقيت اباوع بوجهة واني افكر بتصرفاتها من جت علينا صارت دائما تسوي اكل لآسر ودائما تحجي ويا واذا راد شي هي بسرعة تروح تسوي ومن قبل جانت تسوي هيج حتى اذا رحنا عليهم او هم جو علينا

عرفتها زليخة الخبيثة تحب آسر بس لا والف لا آسر خط احمر محجوز لغزل وما راح اخلي احد يتقرب منة وراح اجمعهم هو وغزل سوية

رفعت ايدها بوجهي وگالت اندي وين رحتي هسة ما تگولين آسر يحب الكاكاو لو بالفانيلا ويا كريمة يحب

گتلها بخبث يحب الكاكاو و الكريمة بطعم الفراولة

تشكرتني بفرحة واني عفتها ورحت ما تعرف اني خبثت وگتلها عالنوع اليكرهة آسر اني الج يا زليخة راح اكون الج بالمرصاد ما راح اخليج تحصلين آسر

هي زليخة بنية حبابة ومرحة بس اني معاديتها لان تحب آسر واني ما اقبل بهالشي

رحت صعدت لغرفتي صليت وسبحت ونزلت بسرعة ادور آسر

لگيتة گاعد وحدة بالصالة يقرا كتاب لدتسويفكي مدري ايسكوفي المهم رحت گعدت يمة وگتلة ببرأة

گتلة بتوتر شلونج آسوري

گلب صفحة من الكتاب وگال بدون ما ينبهلي الحمدلله

گتلة بتوتر اسوي اريد احجي وياك بموضوع مهم

عاف الكتاب من ايدة عدل گعدتة وباوعلي باهتمام وگال اي احجي اسمعج شنو الموضوع

فرگت ايدي بتوتر ما اعرف شلون احجيلة كتلة بتوتر شوف آسر راح احجي بس لا تتعصب تمام حباب

گال بابتسامة شمسوي من مصيبة جديدة احجي ما راح اتعصب

حجيت بالگوة شو.... شوف اني الادارة گالت لازم اجيب ولي امري باجر

گال بهدوء وشنو السبب

رديت بسرعة ما اگدر اگول انت باجر راح تعرف بس امانة روح انت ما عندي غيرك  تمام حباب

هزلي راسة بقبول

گتلة برجاء وخوف بس لا تگول لامجد تمام

فزيت بسرعة من سمعت صوت امجد وراي وهو يگول شنو ما يگول لامجد

التفتت وراي لگيتة واگف گدامنا ومكتف ايدة لصدرة

احس بلعت لساني ما اعرف شاحجي عزا بعيني انكشفت راح اقري الفاتحة على روحي

حجى آسر بهدوء وگال اريد اشتريلها موبايل جديد وجاي احاجيها بخصوص هالموضوع بس هي گالت لا تگول لامجد

رد أمجد ببرود خل تولي لا تشتريلها بعدين تتلوگ وتطلع عينها وتظل تطلب

عاف وراح لغرفتة واني جسمي بعدة يرجف بسبب أمجد يوم من الايام الا يسويلي جلطة

ثاني يوم رحت للدوام وآسر گال داومي وبعدين اني اجي وراج عندي شغلة لازم اكملة

اخذت اول درسين بخوف وقلق وآسر لهسة ما جاي طلعت ويا بنية اگعد بالساحة انتظر شوكت يجي

جنت گاعدة بالگاع وحاطة راسي بين رجلي احس بملل وخوف فضيع

لفت انتباهي صوت البنية الگاعدة وياي وهي نگول ولج اندي شوفي هذا الصاك ولج اكرصيني علمود اصدك اني بحلم لو بالحقيقة عزا بعيني ما شاءلله ما اعرف اكو هيج انتاج عراقي

رفعت راسي بسرعة لگيتة آسر داخل وهو متجه للادارة گمت بسرعة اركض للادارة والبنية جت وياي لحگتني

رحت للمعاونة لگيتة گاعد يمها وهي تحجيلة عالسبب الي خلا يجي وعلى موقف البارحة

جنت واگفة اسمعها واني اريد الگاع تنشگ وتبلعني من الفشلة والخجل شلون موقف يفشل عيوني دمعن من گالت المعاونة

اني اعتذر يا استاذ آسر بس احنا لازم...........

يتبع........ 
بقلمي يمامة